by Midhun HP News | Oct 27, 2026 | Latest News, കേരളം
കൊച്ചി: ചേരാനെല്ലൂരില്‍ 17 കാരനായ മകന് ഓടിച്ച് കാര്‍ ഇടിച്ച് സ്‌കൂട്ടര്‍ യാത്രക്കാരനായ തട്ടുകടക്കാരന്‍ മരിച്ച സംഭവത്തില്‍ പ്രതിയുടെ പിതാവായ അഡീഷണല്‍ ജഡ്ജിയെ പൊലീസ് ചോദ്യം ചെയ്തു. ഇന്നലെ രാത്രി ആലുവയിലെ ഫ്‌ലാറ്റിലെത്തിയാണ് ചോദ്യം ചെയ്തത്. തന്റെ അറിവോടെയല്ല മകന് വാഹനം ഓടിച്ചതെന്ന് ജഡ്ജി മൊഴി നല്‍കിയതായാണ് സൂചന. അന്വേഷണ പുരോഗതി വിലയിരുത്താനായി എഡിജിപി പി വിജയന് ഇന്ന് ചേരാനെല്ലൂരിലെത്തും.
അന്വേഷണം ജില്ലാ ക്രൈംബ്രാഞ്ച് ഏറ്റെടുത്തിട്ടുണ്ട്. താനും ഭാര്യയും അറിയാതെയാണ് മകന് കാറിന്റെ താക്കോലുമായി പോയതെന്ന് ജഡ്ജി പറഞ്ഞു. മകന് വാഹനം ഓടിക്കുമെന്ന് അറിയില്ലെന്നും മൊഴി നല്‍കിയതായാണ് സൂചന. പ്രതിയായ 17 കാരനെതിരെ കടുത്ത നടപടിക്ക് മോട്ടോര്‍ വാഹന വകുപ്പും ഒരുങ്ങുകയാണ്. പ്രതിക്ക് 25 വയസ്സ് പൂര്‍ത്തിയാകുന്നത് വരെ ലൈസന്‍സ് ലഭിക്കുന്നത് തടയാനാണ് നീക്കം.
പ്രതിയുടെ പിതാവായ അഡീഷണല്‍ ജഡ്ജിക്കെതിരെ പോര്‍ട്ട്‌ഫോളിയോ ജഡ്ജി ഹൈക്കോടതിയില്‍ റിപ്പോര്‍ട്ട് നല്‍കിയിട്ടുണ്ട്. അഡീഷണല്‍ ജഡ്ജി പൊലീസ് സ്റ്റേഷനില് പോയത് തെറ്റാണ്. ഔദ്യോഗിക ആവശ്യത്തിനല്ലാതെ സ്റ്റേഷനില് പോകുമ്പോള്‍ ജില്ലാ ജഡ്ജിയുടെ അനുമതി വാങ്ങണമെന്നാണ് വ്യവസ്ഥ. ഇതില്‍ ജഡ്ജിക്ക് വീഴ്ച പറ്റിയതാണെന്നും റിപ്പോര്‍ട്ടില്‍ സൂചിപ്പിക്കുന്നു. ജഡ്ജിയെ സസ്‌പെന്‍ഡ് ചെയ്യുന്നതില്‍ ഹൈക്കോടതി അഡ്മിനിസ്‌ട്രേറ്റീവ് കമ്മിറ്റിയുടെ തീരുമാനം ഇന്നുണ്ടായേക്കും.
അതേസമയം, പ്രതിയായ 17 കാരന്‍ മുമ്പ് അമിതവേഗത്തില്‍ കാറോടിച്ച് സമൂഹമാധ്യമത്തില്‍ റീലിട്ടിരുന്നുവെന്ന് കണ്ടെത്തിയിട്ടുണ്ട്. എന്നാല്‍ അപകടം വലിയ ചര്‍ച്ചയായതോടെ പ്രതിയായ 17 കാരന്‍ ഇന്‍സ്റ്റഗ്രാം പേജ് ഡിലീറ്റ് ചെയ്തിരിക്കുകയാണ്. തെളിവ് നശിപ്പിക്കലിന്റെ ഭാഗമായിട്ടാണ് ഈ നടപടിയെന്ന് മരിച്ച ജയബാലകൃഷ്ണന്റെ കുടുംബം ആരോപിക്കുന്നു. 17 കാരന്‍ വാഹനം ഓടിച്ചിരുന്ന ചിത്രങ്ങളും 208 കിലോമീറ്റര്‍ വേഗത്തില്‍ കാറോടിക്കുന്ന ദൃശ്യങ്ങളും സാമൂഹിക മാധ്യമ പ്രൊഫൈലില്‍ പോസ്റ്റ് ചെയ്തിരുന്നുവെന്നും ഇവര്‍ ആരോപിക്കുന്നു.
by Midhun HP News | Oct 27, 2026 | Latest News, കായികം
വെല്ലിങ്ടന്‍: ന്യൂസിലന്‍ഡിനെതിരെയുള്ള മൂന്നാം ടി20 പോരാട്ടത്തിന് കളമൊരുങ്ങുമ്പോള്‍, ക്രിക്കറ്റ് ലോകം ആകാംക്ഷയോടെ ഉറ്റുനോക്കുന്നത് വെല്ലിങ്ടനിലെ ഹെന്റി സ്റ്റേഡിയത്തിലേക്കാണ്. പരമ്പരയില്‍ ഇതിനകം 2-0 ന് മുന്നിലെത്തിയ ഇന്ത്യ, ഈ മത്സരവും ജയിച്ച് പരമ്പര സ്വന്തമാക്കാനുള്ള പോരാട്ടത്തിനൊരുങ്ങുമ്പോള്‍, തങ്ങളുടെ പ്രതീക്ഷകള്‍ നിലനിര്‍ത്താന്‍ ജീവനുവേണ്ടി പൊരുതുകയാണ് കിവീസ് പട. ഇന്ത്യന്‍ സമയം ഉച്ചയ്ക്ക് 12.30നാണ് മത്സരം ആരംഭിക്കുന്നത്.
ക്രൈസ്റ്റ്ചര്‍ച്ചില്‍ നടന്ന ആദ്യ രണ്ട് മത്സരങ്ങളിലും സമാനതകളില്ലാത്ത ത്രില്ലര്‍ വിജയങ്ങളാണ് ഇന്ത്യ സ്വന്തമാക്കിയത്. രണ്ട് കളികളിലും വമ്പന്‍ ലക്ഷ്യങ്ങള്‍ പിന്തുടര്‍ന്നിറങ്ങിയ ഇന്ത്യന്‍ ബാറ്റിങ് നിര, അവസാന ഓവറുകളിലെ കരുത്തുറ്റ പ്രകടനത്തിലൂടെ 4 വിക്കറ്റിന്റെ തകര്‍പ്പന്‍ ജയങ്ങള്‍ പിടിച്ചെടുക്കുകയായിരുന്നു. സഞ്ജു സാംസണ്‍, തിലക് വര്‍മ, നമന്‍ ധീര്‍, നിതീഷ് കുമാര്‍ റെഡ്ഡി തുടങ്ങി ഓരോ മത്സരത്തിലും ഉത്തരവാദിത്തം ഏറ്റെടുത്ത് കളിച്ച താരങ്ങളുടെ ബാറ്റിങ് മികവാണ് ഇന്ത്യയുടെ വിജയ രഹസ്യം.
മറുവശത്ത്, ന്യൂസിലന്‍ഡിന്റെ അവസ്ഥ അത്രകണ്ട് സുഖകരമല്ല. ഗ്ലെന്‍ ഫിലിപ്‌സും ബെവോന്‍ ജേക്കബ്സും അടക്കമുള്ള ബാറ്റര്‍മാര്‍ മികച്ച പ്രകടനം പുറത്തെടുത്തെങ്കിലും, ഡെത്ത് ഓവറുകളിലെ പാളിച്ചകള്‍ കിവീസിനെ നിരന്തരം വേട്ടയാടുന്നു. പരിക്കുകളുടെ വലിയ തിരിച്ചടിയും ആതിഥേയരെ ഉലയ്ക്കുന്നുണ്ട്. പ്രധാന പേസര്‍ മാറ്റ് ഹെന്റിക്ക് പരമ്പര മുഴുവന്‍ നഷ്ടമായി, ലോക്കി ഫെര്‍ഗൂസനാകട്ടെ നിര്‍ണായക മത്സരത്തില്‍ നിന്നും പുറത്താണ്. നായകന്‍ മിച്ചല്‍ സാന്റ്‌നറും സംഘവും പരമ്പരയില്‍ ജീവശ്വാസം നിലനിര്‍ത്തണമെങ്കില്‍ ഇന്ന് അത്ഭുതങ്ങള്‍ കാണിക്കേണ്ടിവരും.
വെല്ലിങ്ടനിലെ കാറ്റും വ്യത്യസ്തമായ പിച്ച് സ്വഭാവവും ഇരു ടീമുകളുടെയും പേസര്‍മാര്‍ക്കും മുന്‍നിര ബാറ്റര്‍മാര്‍ക്കും കടുത്ത പരീക്ഷണമാകും സമ്മാനിക്കുക. ടോസ് നേടുന്ന നായകന്‍ ഫീല്‍ഡിങ് തെരഞ്ഞെടുക്കാനാണ് സാധ്യതയെന്നാണ് വിദഗ്ധരുടെ വിലയിരുത്തല്‍. പരമ്പര തൂത്തുവാരി ചരിത്രമെഴുതാന്‍ ഇന്ത്യ ഇറങ്ങുമ്പോള്‍, അഭിമാനം കാക്കാനുള്ള മരണപോരാട്ടത്തിലാണ് കിവീസ്. ക്രിക്കറ്റ് പ്രേമികള്‍ക്ക് മറ്റൊരു ആവേശരാത്രി കൂടി സമ്മാനിക്കാന്‍ കളിക്കളമൊരുങ്ങി കഴിഞ്ഞു.
ഇഷാന്‍ ഇന്നുമില്ല
പരമ്പരയിലെ ആദ്യ മത്സരത്തിനിടെ പരിക്കേറ്റ ബാറ്റര്‍ ഇഷാന്‍ കിഷന്‍ ഇന്നത്തെ മത്സരത്തിലും കളിക്കില്ലെന്ന് ബിസിസിഐ അറിയിച്ചിട്ടുണ്ട്. യുവതാരം വൈഭവ് സൂര്യവംശിയെ വീണ്ടും പ്ലേയിങ് ഇലവനില്‍ ഉള്‍പ്പെടുത്തിയേക്കും. കഴിഞ്ഞ മത്സരത്തില്‍ വൈഭവിനെ മൂന്നാം നമ്പരില്‍ കളിപ്പിച്ചതില്‍ വലിയ വിമര്‍ശനങ്ങള്‍ ഉയര്‍ന്നിരുന്നു. താരത്തെ ഓപ്പണിങ് സ്‌പോട്ടില്‍ ഇറക്കണമെന്നും പരിചയ സമ്പന്നനായ സഞ്ജു സാംസണിനെ മൂന്നാം നമ്പരില്‍ കളിപ്പിക്കണമെന്നും ആവശ്യപ്പെട്ട് മുന്‍ താരങ്ങളുള്‍പ്പെടെ രംഗത്തെത്തിയിട്ടുണ്ട്. ടീം മാനേജ്‌മെന്റിന്റെ അന്തിമ തീരുമാനമറിയാന്‍ ടോസ് വരെ കാത്തിരിക്കണം.
by Midhun HP News | Oct 26, 2026 | Latest News, ദേശീയ വാർത്ത
ചെന്നൈ: സ്വകാര്യ സ്‌കൂളുകള്‍ക്ക് ലൈസന്‍സ് നല്‍കുന്നതുമായി ബന്ധപ്പെട്ട് 100 കോടിയുടെ അഴിമതി കേസില്‍ ഡിഎംകെയുടെ മുതിര്‍ന്ന നേതാവും മുന്‍ വിദ്യാഭ്യാസ മന്ത്രിയുമായ അന്‍പില്‍ മഹേഷ് പൊയ്യാമൊഴി അറസ്റ്റില്‍. കേസില്‍ മഹേഷിന്റെ മുന്‍കൂര്‍ ജാമ്യാപേക്ഷ മദ്രാസ് ഹൈക്കോടതി തള്ളിയതിന് പിന്നാലെയാണ് സെന്‍ട്രല്‍ ക്രൈംബ്രാഞ്ചിന്റെ നടപടി.
സര്‍ക്കാരിന്റെ അനുമതി വാങ്ങി നല്‍കാമെന്ന് വാഗ്ദാനം ചെയ്ത് സ്വകാര്യ വിദ്യാഭ്യാസ സ്ഥാപനങ്ങളില്‍ നിന്ന് മഹേഷ് പണം വാങ്ങിയതായുള്ള ആരോപണമാണ് ക്രൈംബ്രാഞ്ച് അന്വേഷിച്ചത്. ഈ അഴിമതിയില്‍ 177 സ്‌കൂളുകള്‍ക്ക് പങ്കുണ്ടെന്ന് അന്വേഷണത്തില്‍ കണ്ടെത്തിയിട്ടുണ്ട്. അന്വേഷണത്തിനിടെ ശേഖരിച്ച തെളിവുകള്‍ അഴിമതിയിലും വിശ്വാസവഞ്ചനയിലും മഹേഷിന്റെ പങ്ക് വ്യക്തമാക്കുന്നതായി അന്വേഷണ സംഘം അറിയിച്ചു. ഡിജിറ്റല്‍ ഉപകരണങ്ങളില്‍ നിന്നുള്ള വിവരങ്ങളും ചോദ്യം ചെയ്യലില്‍ രേഖപ്പെടുത്തിയ മൊഴികളുമാണ് തെളിവുകള്‍ക്ക് ആധാരമെന്നും അന്വേഷണ സംഘം വ്യക്തമാക്കി.
മഹേഷിനെതിരെ അഴിമതി തടയല്‍ നിയമം പ്രകാരമുള്ള വകുപ്പുകള്‍ ചുമത്തിയിട്ടുണ്ട്. അതിനിടെ ആരോപണങ്ങള്‍ അദ്ദേഹം നിഷേധിച്ചു. കേസിനെ നിയമപരമായി നേരിടുമെന്നും അദ്ദേഹം അറിയിച്ചു. രാഷ്ട്രീയ എതിരാളികളെ ലക്ഷ്യമിടാന്‍ ടിവികെ സര്‍ക്കാര്‍ അന്വേഷണ ഏജന്‍സികളെ ദുരുപയോഗം ചെയ്യുന്നതായി ഡിഎംകെ ആരോപിച്ചു. തിങ്കളാഴ്ചയാണ് മഹേഷിന്റെ മുന്‍കൂര്‍ ജാമ്യാപേക്ഷ മദ്രാസ് ഹൈക്കോടതി തള്ളിയത്.
by Midhun HP News | Oct 26, 2026 | Latest News, ജില്ലാ വാർത്ത
ആറ്റിങ്ങൽ: ആലംകോട് ഗവൺമെന്റ് വൊക്കേഷണൽ ഹയർ സെക്കൻഡറി സ്കൂളിൽ 2026 മാർച്ചിലെ പൊതു പരീക്ഷയിൽ ഉന്നത വിജയം കരസ്ഥമാക്കിയ ഹൈസ്കൂൾ വിഎച്ച്എസ്എസ്, ഹയർസെക്കൻഡറി വിദ്യാർത്ഥികളെ ആദരിക്കുന്നതിന്റെ ഭാഗമായി പ്രതിഭാ സംഗമം 2026 സംഘടിപ്പിച്ചു.
കിളിമാനൂർ ബ്ലോക്ക് പഞ്ചായത്ത് വൈസ് പ്രസിഡണ്ട് സജീർ രാജകുമാരി അധ്യക്ഷത വഹിച്ച ചടങ്ങിൽ സ്കൂൾ പ്രിൻസിപ്പൽ ബിജു കെ എസ് സ്വാഗതം ആശംസിച്ചു. പ്രതിഭകളെ ആദരിക്കൽ ചടങ്ങിന്റെ ഉദ്ഘാടനം തിരുവനന്തപുരം ജില്ല പഞ്ചായത്ത് പ്രസിഡന്റ് വി പ്രിയദർശനി നിർവഹിച്ചു. അക്കാദമിക് മികവിനൊപ്പം സാമൂഹിക പ്രതിബദ്ധതയും മൂല്യബോധവും വിദ്യാർത്ഥികളിൽ ഉണ്ടാകേണ്ടത് കാലഘട്ടത്തിന്റെ ആവശ്യമാണെന്ന് തന്റെ ഉദ്ഘാടന പ്രസംഗത്തിൽ അവർ ഊന്നി പറഞ്ഞു.
സ്കൂൾ ആഡിറ്റോറിയത്തിന്റെ അപര്യാപ്ത പരിഹരിക്കുന്നതിന് വേണ്ടിയിട്ടുള്ള സത്വര നടപടികൾ ഉടൻ സ്വീകരിക്കുമെന്നും ഉറപ്പുനൽകി. പൂർവ്വ വിദ്യാർത്ഥിയും ജില്ലാ പഞ്ചായത്ത് മണമ്പൂർ ഡിവിഷൻ മെമ്പറുമായ നബീൽ കല്ലമ്പലത്തിനെ ചടങ്ങിൽ ആദരിച്ചു. കരവാരം പഞ്ചായത്ത് മെമ്പർ ഷൈജാ സാജിദ്, പിടിഎ പ്രസിഡന്റ് ദാഹിർ പി ബി, വൈസ് പ്രസിഡന്റ് പുതിയതടം നിസാറുദ്ദീൻ, മുൻ പിടിഎ പ്രസിഡന്റ് മേവർക്കൽ നാസർ, ഹെഡ്മിസ്ട്രസ് ദിസീല സുൽത്താന എസ്, വിഎച്ച്എസ്ഇ പ്രിൻസിപ്പൽ നിഷ വി, മുൻ ഹെഡ്മിസ്ട്രസ് ദീപ്തി വി വി, സീനിയർ അധ്യാപകൻ ഷിബു എസ് തുടങ്ങിയവർ ചടങ്ങിൽ പങ്കെടുത്ത് സംസാരിച്ചു.
by Midhun HP News | Oct 26, 2026 | Latest News, കേരളം
തിരുവനന്തപുരം: പിഎസ്‌സി പരീക്ഷാ അഡീഷണല്‍ സെക്രട്ടറിക്ക് സസ്‌പെന്‍ഷന്‍. ആര്‍ ഹരിയെയാണ് സസ്‌പെന്‍ഡ് ചെയ്തത്. ആസൂത്രണ ബോര്‍ഡ് ചീഫ് പരീക്ഷാ കേസില്‍ ഹരിയെ ക്രൈംബ്രാഞ്ച് പ്രതി ചേര്‍ത്തിരുന്നു. പിന്നാലെയാണ് നടപടി.
കേസില്‍ പ്രതി ചേര്‍ക്കപ്പെട്ട പിഎസ്‌സി ഉദ്യോഗസ്ഥനായിരുന്ന പി സതീഷിന്റെ ആനുകൂല്യങ്ങള്‍ തടയാനും തീരുമാനിച്ചിട്ടുണ്ട്. അദ്ദേഹം വിരമിച്ച ഉദ്യോഗസ്ഥനാണ്.
ആസൂത്രണ ബോര്‍ഡ് ചീഫ് പരീക്ഷ നടത്തിപ്പില്‍ ഇരുവരും നേരിട്ട് ഇടപെട്ടിരുന്നു എന്നാണ് കണ്ടെത്തല്‍. ഇരുവരേയും ക്രൈംബ്രാഞ്ച് ചോദ്യം ചെയ്തിരുന്നു. ഇതിനു ശേഷമാണ് കേസില്‍ പ്രതി ചേര്‍ത്തത്.
കേസുമായി ബന്ധപ്പെട്ട് നേരത്തെ ഉയര്‍ന്ന പരാതിയ്ക്ക് പിന്നാലെ പിഎസ്‌സിയുടെ പരീക്ഷാ നടത്തിപ്പിലെ ഗുരുതരമായ വീഴ്ചകള്‍ പുറത്തു വന്നിരുന്നു. ഇതോടെയാണ് ക്രൈംബ്രാഞ്ച് കേസെടുത്ത് അന്വേഷണം ആരംഭിച്ചത്.
by Midhun HP News | Oct 26, 2026 | Latest News, കേരളം
കൊച്ചി: സിഎംആർഎൽ–എക്സാലോജിക് കേസിൽ മുൻ മുഖ്യമന്ത്രി പിണറായി വിജയൻ ഉൾപ്പെടെയുള്ള പ്രതികൾക്ക് താൽക്കാലിക ആശ്വാസം. പിണറായി വിജയനെതിരെ കൈക്കൂലിക്കേസും മുഹമ്മദ് റിയാസിനെതിരെ ഹവാല കേസും റജിസ്റ്റർ ചെയ്യാനുള്ള സിംഗിൾ ബെഞ്ചിന്റെ ഉത്തരവ് പ്രകാരമുള്ള എല്ലാ തുടർനടപടികളും ഹൈക്കോടതി ഡിവിഷൻ ബെഞ്ച് തടഞ്ഞു.
സിംഗിൾ ബെഞ്ചിന്റെ വിധി ചോദ്യംചെയ്ത് പിണറായി സമർപ്പിച്ച അപ്പീൽ ഡിവിഷൻ ബെഞ്ച് ഫയലിൽ സ്വീകരിച്ചു.
Recent Comments