by Midhun HP News | Nov 16, 2025 | Latest News, കേരളം
സംസ്ഥാനത്ത് സ്വർണവിലയിൽ ഇടിവ്. ഇന്ന് ഒരു പവൻ സ്വർണത്തിന് 91,720 രൂപ രേഖപ്പെടുത്തി. 11,465 രൂപയായിരുന്നു ഇന്ന് ഒരു ഗ്രാം സ്വർണത്തിന്റെ നിരക്ക്. ഇന്നലെ മാത്രം ഒരു പവൻ സ്വർണത്തിന് 1440 രൂപയുടെ കുറവാണു രേഖപ്പെടുത്തിയത്. 91,720 രൂപയായിരുന്നു ഇന്നലെയും ഒരു പവന് സ്വർണത്തിന്റെ വില.
വെള്ളിയാഴ്ച ഒരു പവൻ സ്വർണത്തിന് 93160 രൂപയായിരുന്നു വൈകേന്നേരത്തെ വില.അതേസമയം, ചില ദിവസങ്ങളിൽ രാവിലെയും വൈകീട്ടും സ്വർണവിലയിൽ ഉണ്ടാകുന്ന മാറ്റങ്ങൾ സ്വർണം വാങ്ങാൻ വരുന്നവരിൽ ആശങ്ക സൃഷ്ട്ടിക്കുന്നുണ്ട്. പതിമൂന്നാം തീയതിയാണ് ഈ മാസത്തെ ഏറ്റവും കൂടിയ നിരക്കിൽ സ്വർണം എത്തിയത്. 94,320 രൂപയായിരുന്നു അന്നത്തെ വില.
കുതിച്ചു കയറിയ വില താഴേക്ക് വന്നത് വിവാഹപ്പാർട്ടിക്കാർക്കും ആഭരണം വാങ്ങാൻ കാത്തിരുന്നവർക്കും ആശ്വാസം നൽകുന്നുണ്ട്. നവംബർ 5 ന് 89,080 രൂപയായി വില കുറഞ്ഞിരുന്നു. ഇതായിരുന്നു ഈ മാസത്തെ ഏറ്റവും കുറഞ്ഞ നിരക്ക്.
by Midhun HP News | Nov 16, 2025 | Latest News, കേരളം
തിരുവനന്തപുരം: ബംഗാള് ഉള്ക്കടലില് പുതിയ ന്യൂനമര്ദ്ദം രൂപപ്പെട്ട സാഹചര്യത്തില് സംസ്ഥാനത്ത് ശക്തമായ മഴ മുന്നറിയിപ്പ്. ഇന്ന് ഇടുക്കി ജില്ലയില് യെല്ലോ അലര്ട്ട് പ്രഖ്യാപിച്ചിട്ടുണ്ട്. 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുമെന്നാണ് മുന്നറിയിപ്പ്.
തെക്ക് പടിഞ്ഞാറന് ബംഗാള് ഉള്ക്കടലില് ശ്രീലങ്കയ്ക്ക് സമീപമാണ് പുതിയ ന്യൂനമര്ദ്ദം രൂപപ്പെട്ടത്. അറബിക്കടലില് തെക്കന് കേരളത്തീരത്തിന് സമീപമായി ചക്രവാതച്ചുഴിയും സ്ഥിതി ചെയ്യുന്നുണ്ട്. ഇതിന്റെയെല്ലാം സ്വാധീനഫലമായി കേരളത്തില് അടുത്ത അഞ്ചു ദിവസം ഇടിമിന്നലോടു കൂടിയ നേരിയ/ഇടത്തരം മഴയ്ക്ക് സാധ്യതയുണ്ട്.
നാളെ തിരുവനന്തപുരം, കൊല്ലം, പത്തനംതിട്ട, ഇടുക്കി ജില്ലകളിലും ചൊവ്വാഴ്ച പത്തനംതിട്ട, കോട്ടയം, ഇടുക്കി ജില്ലകളിലും യെല്ലോ അലര്ട്ട് പ്രഖ്യാപിച്ചിട്ടുണ്ട്. ബുധനാഴ്ച പത്തനംതിട്ട, കോട്ടയം ജില്ലകളില് ഒറ്റപ്പെട്ട സ്ഥലങ്ങളില് ശക്തമായ മഴ ലഭിക്കുമെന്നതിനാല് ജാഗ്രത പാലിക്കണമെന്നും മുന്നറിയിപ്പില് പറയുന്നു.
തെക്കന് ആന്ധ്രാപ്രദേശ് തീരം, മധ്യ പടിഞ്ഞാറന്- തെക്കു പടിഞ്ഞാറന് ബംഗാള് ഉള്ക്കടലിനോട് ചേര്ന്ന ഭാഗങ്ങള് എന്നിവിടങ്ങളില് മണിക്കൂറില് 35 മുതല് 45 കിലോമീറ്റര് വരെയും ചില അവസരങ്ങളില് 55 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യത.
by Midhun HP News | Nov 16, 2025 | Latest News, കേരളം
ആറ്റിങ്ങൽ സബ്ജില്ലാ കലോത്സവത്തിൽ തുടർച്ചയായി ഓവറോൾ ഫസ്റ്റ് നേടി എ എം എൽ പി എസ് പെരുംകുളം. കൂന്തള്ളൂർ സ്കൂളിൽ വെച്ച് നടന്ന ആറ്റിങ്ങൽ സബ്ജില്ല കലോത്സവത്തിൽ ജനറൽ, അറബിക്, വിഭാഗത്തിലും ഒന്നാം സ്ഥാനം നിലനിർത്തി.
പൊതു വിദ്യാലയങ്ങളിൽ ഏറ്റവും കൂടുതൽ പോയിന്റ് നേടി ആ വിഭാഗത്തിലും ഒന്നാം സ്ഥാനം കരസ്ഥമാക്കി. ആർട്സ് ക്ലബ് അംഗങ്ങൾ ആയ ഷെമീറ, രാജലക്ഷ്മി, റീന ഇവരുടെ നേതൃത്വത്തിൽ പ്രഥമാധ്യാപകന്റെയും മറ്റ് അധ്യാപകരുടെയും രക്ഷിതാക്കളുടെയും മാനേജ്മെന്റിന്റെയും കൂട്ടായ പ്രവർത്തനത്തിലൂടെയാണ് ഈ അഭിമാനകരമായ നേട്ടം നേടിയെടുത്തത് അവധി ദിവസങ്ങളിലും ക്ലാസ് സമയം കഴിഞ്ഞുമാണ് കുട്ടികൾക്ക് പരിശീലനം നൽകിയിരുന്നത്.
by Midhun HP News | Nov 16, 2025 | Latest News, കേരളം
പത്തനംതിട്ട: മണ്ഡല- മകര വിളക്ക് തീര്ഥാടനത്തിനായി ശബരിമല നട ഇന്ന് വൈകീട്ട് തുറക്കും. വൈകീട്ട് 5ന് കണ്ഠര് മഹേഷ് മോഹനരുടെ സാന്നിധ്യത്തില് മേല്ശാന്തി അരുണ്കുമാര് നമ്പൂതിരിയാണ് നട തുറക്കുന്നത്. തുടര്ന്ന് മേല്ശാന്തി പതിനെട്ടാം പടിയിറങ്ങി ശ്രീകോവിലില് നിന്നുള്ള ദീപംകൊണ്ട് ആഴി ജ്വലിപ്പിക്കും. പതിനെട്ടാം പടിക്കു താഴെ ഇരുമുടിക്കെട്ടേന്തി കാത്തുനില്ക്കുന്ന നിയുക്ത മേല്ശാന്തിമാരെ അദ്ദേഹം കൈപിടിച്ച് സന്നിധാനത്തേക്ക് ആനയിക്കും.
6.30ന് ശബരിമല സോപാനത്ത് നിയുക്ത ശബരിമല മേല്ശാന്തി പ്രസാദ് നമ്പൂതിരിയെ തന്ത്രി അഭിഷേകം ചെയ്ത് അവരോധിക്കും. തുടര്ന്ന് മാളികപ്പുറം ക്ഷേത്രനടയില് നിയുക്ത മേല്ശാന്തി മനു നമ്പൂതിരിയുടെ അവരോധിക്കല് ചടങ്ങും നടക്കും. ഞായറാഴ്ച പൂജകള് ഇല്ല. തിങ്കളാഴ്ച പുലര്ച്ചെ മൂന്നിന് വൃശ്ചിക പുലരിയില് പുതിയ മേല്ശാന്തിമാര് ശബരിമല, മാളികപ്പുറം നടകള് തുറക്കുന്നതോടെ തീര്ഥാടനം തുടങ്ങും. ദിവസവും പുലര്ച്ചെ മൂന്നുമുതല് ഉച്ചയ്ക്ക് ഒരു മണിവരെയും ഉച്ചകഴിഞ്ഞ് മൂന്നു മുതല് രാത്രി 11 വരെയുമാണ് ദര്ശനം.
ഡിസംബര് 2 വരെ വെര്ച്യുല് ക്യൂ ബുക്കിങ്ങില് ഒഴിവില്ല. 70,000 പേര് ഡിസംബര് രണ്ട് വരെ വെര്ച്യുല് ക്യൂ വഴി ദര്ശനം ബുക്ക് ചെയ്തിട്ടുണ്ട്. 20,000 പേര്ക്ക് സ്പോട്ട് ബുക്കിങ് വഴി ദര്ശനം നടത്താം. തത്സമയ ബുക്കിങ് കൗണ്ടറുകള് പമ്പ, നിലക്കല്, എരുമേലി, വണ്ടിപ്പെരിയാര്, ചെങ്ങന്നൂര് എന്നിവിടങ്ങളിലാണ്. ഒരു ദിവസം 90,000 പേര്ക്കാണ് ദര്ശനത്തിന് അനുമതിയുള്ളത്. പമ്പയില് ഒരേസമയം 10,000 പേര്ക്ക് വിശ്രമിക്കാന് കഴിയുന്ന പത്ത് നടപ്പന്തലുകളും ജര്മന് പന്തലും ഉണ്ട്.
മണ്ഡല- മകരവിളക്കുമായി ബന്ധപ്പെട്ട വിവരങ്ങളും പൂജാവിശേഷങ്ങളും ചുവടെ:
വൃശ്ചികമാസം ഒന്നുമുതല് (നവംബര് 17-തിങ്കളാഴ്ച) രാവിലെ മൂന്ന് മണി മുതല് ഉച്ചക്ക് ഒരു മണിവരെയും ഉച്ചക്കഴിഞ്ഞ് മൂന്ന് മണിമുതല് രാത്രി 11 മണിക്കുള്ള ഹരിവരാസനം വരെയും തിരുനട തുറന്നിരിക്കും.
സമയക്രമം:
രാവിലെ നട തുറക്കുന്നത്- 3 മണിക്ക്
നിര്മ്മാല്യം
അഭിഷേകം 3 മുതല് 3.30 വരെ
ഗണപതി ഹോമം 3.20 മുതല്
നെയ്യഭിഷേകം 3.30 മുതല് 7 വരെ
ഉഷ പൂജ 7.30 മുതല് 8 വരെ
നെയ്യഭിഷേകം 8 മുതല് 11 വരെ
25 കലശം, കളഭം 11.30 മുതല് 12 വരെ
ഉച്ചപൂജ 12.00 ന്
തിരുനട അടക്കല് 1.00ന്
തിരുനട തുറക്കല് വൈകീട്ട് മൂന്നിന്
ദീപാരാധന 6.30-6.45
പുഷ്പാഭിഷേകം 6.45 മുതല് 9 വരെ
അത്താഴ പൂജ 9.15 മുതല് 9.30 വരെ
ഹരിവരാസനം 10.45
തിരുനട അടക്കല് 11ന്
ഓണ്ലൈന് ബുക്കിങ് ആരംഭിച്ചു
ഗണപതിഹോമം, അഷ്ടാഭിഷേകം, നെയ്യഭിഷേകം, ഉഷപൂജ, ഉച്ചപൂജ, നിത്യപൂജ, പുഷ്പാഭിഷേകം എന്നീ വഴിപാടുകള്ക്കുള്ള ഓണ്ലൈന് ബുക്കിങ്ങുകള് ആരംഭിച്ചു. കൂടാതെ നേരിട്ട് ടിക്കറ്റെടുത്ത് വഴിപാടുകള് നടത്തുന്നതിനും സൗകര്യമുണ്ടാകും. ദര്ശനത്തിനായി ക്യൂ നില്ക്കുന്ന അയ്യപ്പ ഭക്തര്ക്ക് മുഴുവന് സമയവും ബിസ്കറ്റും ഔഷധ കുടിവെള്ളവും ലഭ്യമാക്കുന്നതിനുള്ള സൗകര്യം ഏര്പ്പെടുത്തിയിട്ടുണ്ട്.
സ്ത്രീകള്ക്കും കുട്ടികള്ക്കും പതിനെട്ടാം പടിക്കു മുമ്പായി നട പന്തല് മുതല് പ്രത്യേക ക്യൂ സംവിധാനവും പെട്ടെന്നു ദര്ശനം ലഭിക്കുന്നതിനുള്ള സൗകര്യവും ഏര്പ്പെടുത്തിയിട്ടുണ്ട്. ഡോളിക്കാര് ഭക്തരെ ചൂഷണം ചെയ്യാതിരിക്കാന് ദേവസ്വം വിജിലന്സിന്റെ പ്രത്യേക മോണിട്ടറിങ് സംവിധാനം ഏര്പ്പെടുത്തിയിട്ടുണ്ട്. ഭക്തര്ക്ക് സ്വാദിഷ്ടമായ ഭക്ഷണം യഥേഷ്ടം ലഭിക്കുന്നതിന് മാളികപ്പുറത്തെ അന്നദാന മണ്ഡപത്തില് പ്രത്യേക സംവിധാനം ഏര്പ്പെടുത്തിയിട്ടുണ്ട്. മലകയറി എത്തുന്ന ഭക്തര്ക്ക് കൈകാല് വേദനകള്ക്ക് പരിഹാരമായി സന്നിധാനത്ത് 24 മണിക്കൂറും പ്രവര്ത്തിക്കുന്ന സൗജന്യ ഫിസിയോ തൊറാപ്പി സെന്റര് ബോര്ഡിന്റെ നിയന്ത്രണത്തില് പ്രവര്ത്തിക്കും.
പമ്പയിലും സന്നിധാനത്തും ബോര്ഡിന്റെ ഓഫ് റോഡ് ആംബുലന്സ് സംവിധാനം 24 മണിക്കൂറും പ്രവര്ത്തിക്കും. കൂടാതെ ഫയര്ഫോഴ്സിന്റെ നേതൃത്വത്തില് സ്ട്രച്ചര് സര്വ്വീസും ഉണ്ടാകും. പൊലീസ്, റവന്യൂ തുടങ്ങി എല്ലാ വകുപ്പുകളുമായുള്ള ഏകോപനത്തിന് മുതിര്ന്ന പരിചയ സമ്പന്നരായ ഉദ്യോഗസ്ഥരെ ചുമതലപ്പെടുത്തി.
മണ്ഡലപൂജ
ഡിസംബര് 27നാണ് മണ്ഡല പൂജ. അന്നേ ദിവസം രാത്രി 10 നു നട അടച്ച ശേഷം ഡിസംബര് 30 വൈകുന്നേരം 5 ന് നട തുറക്കും.
മകരവിളക്ക്
ജനുവരി 14നാണ് മകരവിളക്ക്. 14 മുതല് 18 വരെ രാത്രി മാളികപ്പുറത്ത് എഴുന്നള്ളിപ്പ് ഉണ്ടായിരിക്കും. ജനുവരി15 മുതല് പടി പൂജ ഉണ്ടായിരിക്കും. ജനുവരി 18 ന് രാവിലെ കൊട്ടാരം വക കളഭാഭിഷേകം. അതിനു ശേഷം നെയ്യഭിഷേകം ഉണ്ടാവില്ല. 19ന് രാത്രിയാണ് മാളികപ്പുറത്ത് ഗുരുതി. അന്ന് മറ്റു വഴിപാടുകള് ഇല്ല. 20 നു രാവിലെ കൊട്ടാരം പ്രതിനിധിക്കു മാത്രം ദര്ശനം നല്കി തിരു നട അടക്കും.
by Midhun HP News | Nov 16, 2025 | Latest News, ജില്ലാ വാർത്ത
തിരുവനന്തപുരം: സീറ്റ് നിഷേധിച്ചതില് പ്രതിഷേധിച്ച് ബിജെപി പ്രവര്ത്തക ആത്മഹത്യയ്ക്ക് ശ്രമിച്ചു. നെടുമങ്ങാട് നഗരസഭയിലെ പനയ്കോട്ടല വാര്ഡിലെ ശാലിനിയാണ് കൈ ഞരമ്പ് മുറിച്ച് ആത്മഹത്യയ്ക്ക് ശ്രമിച്ചത്. ഉടന് തന്നെ ആശുപത്രിയില് എത്തിച്ചതിനാല് ജീവന് രക്ഷിക്കാന് സാധിച്ചു. ശാലിനി അപകടനില തരണം ചെയ്തതായി ഡോക്ടര്മാര് അറിയിച്ചതായാണ് റിപ്പോര്ട്ടുകള് വ്യക്തമാക്കുന്നത്.
നെടുമങ്ങാട് നഗരസഭയുടെ 26-ാം വാര്ഡില് ബിജെപി സീറ്റ് നിഷേധിച്ചതില് മനംനൊന്താണ് ആത്മഹത്യാശ്രമം. ഇവിടെ സീറ്റ് ലഭിക്കുമെന്ന് ശാലിനി പ്രതീക്ഷിച്ചിരുന്നു. എന്നാല് പ്രാദേശിക നേതൃത്വം ഇടപെട്ട് സീറ്റ് നിഷേധിച്ചു എന്നാണ് ആക്ഷേപം. ഇന്ന് പുലര്ച്ചയോടെയായിരുന്നു ആത്മഹത്യാശ്രമം. ശബ്ദം കേട്ട് മകന് എഴുന്നേറ്റ് നോക്കുമ്പോള് കൈ ഞരമ്പ് മുറിച്ച് രക്തത്തില് കുളിച്ച് നില്ക്കുന്ന നിലയില് അമ്മയെ കാണുകയായിരുന്നു. ഉടന് തന്നെ ആശുപത്രിയില് എത്തിച്ചതിനാല് ജീവന് രക്ഷിക്കാന് സാധിച്ചു.
പ്രദേശത്ത് സ്ഥാനാര്ഥി നിര്ണയം സംബന്ധിച്ച് ബിജെപിയില് പ്രശ്നങ്ങള് ഉണ്ടായിരുന്നു. മഹിളാ മോര്ച്ചയുടെ ജില്ലാ നേതാവ് കൂടിയാണ് ശാലിനി. ഇത്തവണ നഗരസഭയുടെ 26-ാം വാര്ഡില് സീറ്റ് ലഭിക്കുമെന്നായിരുന്നു ശാലിനി പ്രതീക്ഷിച്ചിരുന്നത്. എന്നാല് പ്രാദേശിക നേതൃത്വം ഇതിന് എതിരായിരുന്നുവെന്നാണ് റിപ്പോര്ട്ടുകള് വ്യക്തമാക്കുന്നത്.
by Midhun HP News | Nov 16, 2025 | Latest News, ദേശീയ വാർത്ത
കൊല്ക്കത്ത: ദക്ഷിണാഫ്രിക്കയ്ക്കെതിരായ ആദ്യ ടെസ്റ്റില് ഇന്ത്യയ്ക്ക് ജയിക്കാന് വേണ്ടത് 124 റണ്സ്. രണ്ടാം ഇന്നിങ്സിലും ബാറ്റിങ് തകര്ച്ച നേരിട്ട ദക്ഷിണാഫ്രിക്ക 153 റണ്സിന് പുറത്താകുകയായിരുന്നു. 4 വിക്കറ്റ് നേട്ടത്തോടെ ബൗളിങ് നിരയില് ജഡേജയുടെ പ്രകടനമാണ് ഇന്ത്യയ്ക്ക് നിര്ണായകമായത്.
ഇന്നലെ 93 ന് 7 എന്ന നിലയില് മൂന്നാം ദിനം കളി ആരംഭിച്ച ദക്ഷിണാഫ്രിക്കയ്ക്ക് അധിക നേരം പിടിച്ചു നില്ക്കാനായില്ല. ഇന്ന് മത്സരം ആരംഭിച്ച് 135 സ്കോര് 135 ല് നില്ക്കെ ദക്ഷിണാഫ്രിക്കയുടെ എട്ടാം വിക്കറ്റും വീണു. 25 റണ്സെടുത്ത കോര്ബിന് ബോഷിനെ ബുംറ വിക്കറ്റിന് മുന്നില് കുടുക്കുകയായിരുന്നു. പിന്നാലെ 153 റണ്സില് നില്ക്കെ ഒമ്പതാം വിക്കറ്റും വീണു. 7 റണ്സെടുത്ത സൈമണ് ഹാമറാണ് പുറത്തായത്. സിറാജിനായിരുന്നു വിക്കറ്റ്. പിന്നാലെ എത്തിയ കേശവ് മഹാരാജും സിറാജിന്റെ പന്തില് പുറത്തായതോടെ ദക്ഷിണാഫ്രിക്ക ഓള് ഔട്ടാകുകയായിരുന്നു.
55 റണ്സെടുത്ത ടെംബ ബാവുമയാണ് രണ്ടാം ഇന്നിങ്സില് ദക്ഷിണാഫ്രിക്കയുടെ ടോപ് സ്കോറര്. രണ്ടാം ദിനമായ ഇന്നലെ കളി അവസാനിക്കുമ്പോള് 7ന് 93 റണ്സെന്ന നിലയിലായിരുന്നു ദക്ഷിണാഫ്രിക്ക. 91 റണ്സെടുക്കുന്നതിനിടെയാണ് ദക്ഷിണാഫ്രിക്കയുടോെ ഏഴു വിക്കറ്റുകള് വീണത്. പുറത്തായവരില് മൂന്നു പേര് മാത്രമാണ് രണ്ടക്കം കടന്നത്. റയാന് റിക്കിള്ട്ടന് (23 പന്തില് 11), എയ്ഡന് മാര്ക്രം (23 പന്തില് 4), വിയാന് മുള്ഡര് (30 പന്തില് 11), ടോണി ഡെ സോര്സി (2 പന്തില് 2), ട്രിസ്റ്റന് സ്റ്റബ്സ് (18 പന്തില് 5), കെയ്ല് വെറൈന് (16 പന്തില് 9), മാര്ക്കോ യാന്സനുമാണ് (16 പന്തില് 13) എന്നിവരാണു പുറത്തായത്. സ്പിന്നര്മാരായ രവീന്ദ്ര ജഡേജ നാലും കുല്ദീപ് യാദവ് രണ്ടും അക്ഷര് പട്ടേല് ഒരു വിക്കറ്റും വീഴ്ത്തി. മുഹമ്മദ് സിറാജ് രണ്ടും, ബുംറ ഒരു വിക്കറ്റും വീഴ്ത്തി.
Recent Comments