by Midhun HP News | Nov 7, 2023 | Latest News, കായികം
ലോകകപ്പിൽ ഓസ്ട്രേലിയക്ക് ഇന്ന് നിർണായക മത്സരം. ഇന്ന് അഫ്ഗാനിസ്താനെതിരായ മത്സരം വിജയിച്ചാൽ ഓസ്ട്രേലിയക്ക് സെമി ഉറപ്പിക്കാം. ഓസ്ട്രേലിയയെ അട്ടിമറിക്കാനായാൽ അഫ്ഗാനിസ്താൻ ന്യൂസീലൻഡിനെ മറികടന്ന് നാലാം സ്ഥാനത്തും എത്തും. മുംബൈ വാംഖഡെ സ്റ്റേഡിയത്തിൽ ഉച്ചകഴിഞ്ഞ് 2 മണിക്കാണ് മത്സരം. ഇതിനകം ഇന്ത്യയും ദക്ഷിണാഫ്രിക്കയുമാണ് സെമിയിൽ പ്രവേശിച്ച ടീമുകൾ.ഏറ്റവുമധികം ലോകകപ്പുകൾ നേടിയ ഓസ്ട്രേലിയ കടലാസിൽ അഫ്ഗാനിസ്താന് എതിരാളികളേയല്ല. ആദ്യ രണ്ട് മത്സരങ്ങളിലെ പരാജയത്തിൽ നിന്ന് പൂർവാധികം ശക്തിയോടെ തിരികെവന്ന ഓസീസ് തുടരെ അഞ്ച് മത്സരങ്ങൾ വിജയിച്ചുകഴിഞ്ഞു. ബിസിനസ് എൻഡിൽ പതിവുപോലെ തകർത്ത് കളിക്കുന്ന ഓസ്ട്രേലിയ അതേ പാതയിലാണ് മുന്നോട്ടുപോകുന്നത്. ടോപ്പ് ഓർഡറിൽ ഡേവിഡ് വാർണർ കാഴ്ചവെക്കുന്ന സ്ഥിരത ഓസീസ് പടയോട്ടത്തെ സഹായിക്കുന്നുണ്ട്. ടോപ്പ് ഓർഡറിൽ ട്രാവിസ് ഹെഡ്, മിച്ചൽ മാർഷ് എന്നിവരും ഫോമിലാണ്. മധ്യനിരയിൽ മാർനസ് ലബുഷെയ്നും ഗ്ലെൻ മാക്സ്വലും തകർപ്പൻ പ്രകടനങ്ങൾ നടത്തുന്നു. സ്റ്റീവ് സ്മിത്ത് മാത്രമാണ് ഇതുവരെ ഒരു വലിയ ഇന്നിംഗ്സ് കളിക്കാത്തത്. ബൗളർമാരിൽ ആദം സാമ്പ അസാമാന്യ പ്രകടനങ്ങൾ തുടരുമ്പോൾ പേസർമാർ സാമ്പയ്ക്ക് മികച്ച പിന്തുണയാണ് നൽകുന്നത്. ടീമിൽ മാറ്റമുണ്ടാവാനിടയില്ല.മറുവശത്ത് ഒരു സ്വപ്ന യാത്രയിലാണ് അഫ്ഗാനിസ്താൻ. ഇംഗ്ലണ്ട്, പാകിസ്താൻ, ശ്രീലങ്ക എന്നീ മുൻ ചാമ്പ്യന്മാരെ വീഴ്ത്തിയ അഫ്ഗാൻ പൂർണമായും പ്രൊഫഷണൽ സമീപനമാണ് കാഴ്ചവെക്കുന്നത്. എല്ലാ താരങ്ങളും അവരവരുടെ ജോലി കൃത്യമായി ചെയ്യുന്നു. റഹ്മാനുള്ള ഗുർബാസും ഇബ്രാഹിം സദ്രാനും ചില നല്ല പ്രകടനങ്ങൾ നടത്തി. റഹ്മത് ഷായും ക്യാപ്റ്റൻ ഹഷ്മതുള്ള ഷാഹിദിയുമാണ് അഫ്ഗാൻ്റെ ബാറ്റിംഗ് കരുത്ത്. ഇരുവർക്കും മൂന്ന് വീതം ഫിഫ്റ്റികളുണ്ട്. ബൗളിംഗിൽ എടുത്തുപറയത്തക്ക പേരില്ലെങ്കിലും റാഷിദ് ഖാൻ, ഫസലുൽ ഹഖ് ഫാറൂഖി, മുഹമ്മദ് നബി, മുജീബ് റഹ്മാൻ തുടങ്ങിയവർ അടങ്ങുന്ന ബൗളിംഗ് നിര ശക്തമാണ്. ഇവരിലേക്ക് നൂർ അഹ്മദ് കൂടി എത്തുമ്പോൾ വളരെ ശക്തമായ ബൗളിംഗ് നിര അഫ്ഗാനുണ്ട്.
അഫ്ഗാനിസ്താനെതിരെ വിജയിച്ച് ഓസ്ട്രേലിയ സെമിയുറപ്പിക്കാൻ തന്നെയാണ് സാധ്യത. ലോകത്തിലെ ഏറ്റവും മികച്ച ലീഗുകളിൽ കളിക്കുന്ന താരങ്ങളെ ഒരുമിച്ച് നിയന്ത്രിക്കുക എന്നത് അഫ്ഗാനിസ്താന് എളുപ്പമാവില്ല.
by Midhun HP News | Nov 6, 2023 | Latest News, കായികം
കൊളംബോ: ലോകകപ്പിലെ ദയനീയ പ്രകടനത്തിന് പിന്നാലെ ശ്രീലങ്കന് ക്രിക്കറ്റ് ബോര്ഡിനെ പുറത്താക്കി. ശ്രീലങ്കന് കായികമന്ത്രി റോഷന് രണസിംഗെയാണ് നടപടിയെടുത്തത്. ഇന്ത്യയോട് 302 റണ്സിന്റെ ദയനീയ തോല്വി ഏറ്റുവാങ്ങിയതിന് പിന്നാലെയാണ് നടപടി.
ഇന്ത്യയോടും പരാജയപ്പെട്ട ശ്രീലങ്ക ലോകകപ്പില് നിന്നും ഏറെക്കുറെ പുറത്തായ സ്ഥിതിയിലാണ്. ഇന്ത്യയ്ക്കെതിരായ തോല്വിക്ക് പിന്നാലെ ശ്രീലങ്കന് ക്രിക്കറ്റ് ഭാരവാഹികളോട് ഉത്തരവാദിത്തം ഏറ്റെടുത്ത് രാജി വെക്കാന് ലങ്കന് കായിക മന്ത്രി നിര്ദേശം നല്കിയിരുന്നു.
രാജിവെച്ചില്ലെങ്കില് പുറത്താക്കുമെന്നും മുന്നറിയിപ്പ് നല്കി. മുതിര്ന്ന താരങ്ങളായ ഏയ്ഞ്ചലോ മാത്യൂസ്, ദിനേഷ് ചണ്ഡിമല് എന്നിവരെ ലോകകപ്പ് ടീമില് ഉള്പ്പെടുത്താതിരുന്നത് വന് തിരിച്ചടിയായി.
എന്നാല് ലങ്കന് ക്രിക്കറ്റ് ബോര്ഡ് സെലക്ടര്മാരെയും എക്സിക്യൂട്ടീവ് കമ്മിറ്റിയെയും ന്യായീകരിക്കുകയാണ് ഇപ്പോഴും ചെയ്യുന്നതെന്നും മന്ത്രി റോഷന് രണസിംഗെ കുറ്റപ്പെടുത്തി. ലങ്കന് ക്രിക്കറ്റ് ബോര്ഡ് പിരിച്ചു വിട്ട സര്ക്കാര്, മുന് നായകന് അര്ജുന രണതുംഗെയുടെ നേതൃത്വത്തില് ഇടക്കാല ഭരണസമിതിയെ നിയോഗിച്ചു.
by Midhun HP News | Nov 4, 2023 | Latest News, കായികം
ലഖ്നൗ: ഏകദിന ലോകകപ്പ് പോയിന്റ് പട്ടികയില് പാകിസ്ഥാനെ പിന്തള്ളി അഫ്ഗാനിസ്ഥാന് അഞ്ചാമതെത്തി: ഇന്ന് നെതര്ലന്ഡ്സിനെ 7 വിക്കറ്റിന് തോല്പ്പിച്ചതോടെയാണ് അഫ്ഗാന് മുന്നേറിയത്. ടോസ് നേടി ബാറ്റിംഗ് തിരഞ്ഞെടുത്ത നെതര്ലന്ഡ്സ് 46.3 ഓവറില് 179ന് ഓൾഔട്ടായി. മറുപടി ബാറ്റിംഗില് അഫ്ഗാന് 31.3 ഓവറില് മൂന്ന് വിക്കറ്റ് മാത്രം നഷ്ടത്തില് വിജയത്തിലെത്തി.
നിലവില് അഫ്ഗാനിസ്ഥാനും ന്യൂസിലന്ഡിനും എട്ട് പോയിന്റ് വീതമാണുള്ളത്. എന്നാല് കിവീസിന്റെ മികച്ച റണ്റേറ്റാണ് അഫ്ഗാനെ അഞ്ചാം സ്ഥാനത്താക്കിയത്. നാളെ ന്യൂസിലന്ഡിനെതിരെ വൻ മാര്ജനില് ജയിച്ചാല് മാത്രമെ പാകിസ്ഥാന് സെമി പ്രതീക്ഷക്ക് വകയുള്ളൂ.
by Midhun HP News | Nov 2, 2023 | Latest News, കായികം
മുംബൈ: വീണ്ടും അഞ്ച് വിക്കറ്റ് പ്രകടനവുമായി മുഹമ്മദ് ഷമിയുടെ പേസ് സൗന്ദര്യം. സിറാജ് കൊടുങ്കാറ്റായി തുടക്കമിട്ട തകര്ച്ച. ലങ്കാ ദഹനം പൂര്ത്തിയാക്കി ഷമിയുടെ തീ മഴ. 358 റണ്സ് പിന്തുടര്ന്നിറങ്ങിയ ലങ്ക വെറും 55 റണ്സില് കൂടാരം കയറി. ഒരു ടി20 മത്സരത്തിന്റെ ബാറ്റിങ് സമയം പോലും പൂര്ത്തിയാക്കിയില്ല. 19.4 ഓവറില് അവര് കത്തിച്ചാമ്പലായി.
302 റണ്സിന് വമ്പന് തോല്വിയാണ് ഇന്ത്യ ലങ്കയ്ക്ക് നല്കിയത്. ഉജ്ജ്വല വിജയവുമായി ഇന്ത്യ ലോകകപ്പ് ക്രിക്കറ്റിന്റെ സെമിയില്. ഏഴില് ഏഴും ജയിച്ച് ഇന്ത്യ അപരാജിതരായി ഒന്നാം സ്ഥാനത്തോടെ അവസാന നാലില്.
ഷമി അഞ്ചോവറില് 18 റണ്സ് മാത്രം വഴങ്ങി അഞ്ച് വിക്കറ്റുകള് നേടി. ഏഴോവറില് 16 റണ്സ് മാത്രം വഴങ്ങി സിറാജ് മൂന്ന് വിക്കറ്റുകളും സ്വന്തമാക്കി. ജസ്പ്രിത് ബുമ്ര, രവീന്ദ്ര ജഡേജ എന്നിവര് ഓരോ വിക്കറ്റെടുത്തു.
ആദ്യം ബാറ്റ് ചെയ്ത ഇന്ത്യ നിശ്ചിത ഓവറില് എട്ട് വിക്കറ്റ് നഷ്ടത്തില് എടുത്തത് 357 റണ്സ്. കളിയുടെ ഒരു ഘട്ടത്തിലും ലങ്ക വിജയിക്കാനുള്ള വീര്യം കാണിച്ചില്ല. ആദ്യ പന്തില് തന്നെ അവര്ക്ക് പതും നിസങ്കയെ നഷ്ടമായി. ബുമ്രയാണ് തകര്ച്ചയ്ക്ക് തുടക്കമിട്ട വിക്കറ്റുമായി വരാനിരിക്കുന്ന പരമ ദയനീയ സ്ഥിതിയുടെ സൂചന ആദ്യം കൊടുത്തത്.
പിന്നാലെ സിറാജിന്റെ മാസ്മരിക സ്പെല്. രണ്ടാം ഓവറിന്റെ ഒന്നാം പന്തിലും അഞ്ചാം പന്തിലും വിക്കറ്റ്. പിന്നാലെ പന്തെടുത്ത മുഹമ്മദ് ഷമിയുടെ തീ മഴ! പേസിന്റെ കൊടൂര വേര്ഷന് വാംഖഡയെ വിറപ്പിച്ചപ്പോള് ഒറ്റ റണ് കൊടുക്കാതെ വീഴ്ത്തിയത് രണ്ട് വിക്കറ്റുകള്. ലങ്ക മൂന്ന് റണ്സിനു നാല് വിക്കറ്റെന്ന നിലയില് നിന്നു 14 റണ്സിനിടെ ആറ് വിക്കറ്റിലേക്ക് കൂപ്പുകുത്തി.
പീന്നീട് ക്രീസിലെത്തിയ ആഞ്ചലോ മാത്യൂസിനും മഹീഷ തീക്ഷണയ്ക്കും കസുന് രജിതയ്ക്കും നന്ദി. സ്കോര് 50 എങ്കിലും കടത്തിയതിന്.
മാത്യൂസ് 25 പന്തുകള് പ്രതിരോധിച്ച് 12 റണ്സെടുത്തു. തീക്ഷണ 23 പന്തുകള് നേരിട്ട് രണ്ട് ഫോറുകള് സഹിതം 12 റണ്സെടുത്തു പുറത്താകാതെ നിന്നു. രജിത 17 പന്തില് രണ്ട് ഫോറുകള് സഹിതം 12 റണ്സെടുത്തു.
ഷമി തന്റെ രണ്ടാം ഓവറില് ഒരു വിക്കറ്റ് കൂടി വീഴ്ത്തി. ഇത്തവണ ഒരു റണ് കൊടുത്തു. രണ്ടോവറില് ഒരു റണ്സ് മാത്രം വഴങ്ങി മൂന്ന് വിക്കറ്റുകള്. 22 റണ്സിനിടെ ഏഴ് വിക്കറ്റുകള് ലങ്കയ്ക്ക് നഷ്ടമായി. പിന്നീടുള്ള മൂന്നോവറില് ശേഷിക്കുന്ന രണ്ട് വിക്കറ്റുകളും താരം സ്വന്തമാക്കി. ലോകകപ്പില് മൂന്ന് മത്സരങ്ങളില് നിന്നു 14 വിക്കറ്റുകള്. അതില് രണ്ട് അഞ്ച് വിക്കറ്റ് നേട്ടം.
358 റണ്സ് ലക്ഷ്യത്തിലേക്ക് ബാറ്റേന്തിയ ലങ്ക മൂന്ന് റണ്സ് ചേര്ക്കുന്നതിനിടെ നാല് വിക്കറ്റ് നഷ്ടപ്പെട്ട് തുടക്കത്തില് തന്നെ നിലയില്ലാ കയത്തിലായിരുന്നു. അതില് നിന്നു കര കയറാന് ശ്രമിക്കുന്നതിനിടെയാണ് ഷമിയുടെ പന്തുകള് മാരക ഭാവത്തില് കളം വാണത്.
ഇന്നിങ്സിന്റെ ആദ്യ പന്തില് തന്നെ ഓപ്പണര് പതും നിസ്സങ്കയെ മടക്കി ബുമ്ര അവരെ ഞെട്ടിച്ചു. പിന്നാലെ പന്തെറിയാനെത്തിയ സിറാജ് ദിമുത് കരുണരത്നയെ തന്റെ ആദ്യ ഓവറിലെ ആദ്യ പന്തില് തന്നെ മടക്കി. ഇതേ ഓവറിന്റെ അഞ്ചാം പന്തില് സദീര സമര വിക്രമയേയും പുറത്താക്കി. അടുത്ത വരവില് കുശാല് മെന്ഡിസിന്റെ പ്രതിരോധവും തകര്ത്തു. ലങ്കയുടെ താരങ്ങള് സംപൂജ്യരായി.
മൂന്ന് സെഞ്ച്വറി നഷ്ടങ്ങള്
മൂന്ന് സെഞ്ച്വറി നഷ്ടങ്ങളുടെ നിരാശ മാറ്റി നിര്ത്തിയാല് വാംഖഡെയില് ശ്രീലങ്കക്കെതിരെ ഇന്ത്യയുടെ ബാറ്റിങിന് 100ല് 100 മാര്ക്ക്. രണ്ടാം പന്തില് ക്യാപ്റ്റന് രോഹിത് ശര്മയെ നഷ്ടമായെങ്കിലും വിരാട് കോഹ്ലി, ശുഭ്മാന് ഗില്, ശ്രേയസ് അയ്യര് എന്നിവരുടെ അര്ധ സെഞ്ച്വറി ബലത്തില് ഇന്ത്യ ബോര്ഡില് ചേര്ത്തത് എട്ട് വിക്കറ്റ് നഷ്ടത്തില് 357 റണ്സ്. ലങ്കയ്ക്ക് ജയിക്കാന്, സെമി സാധ്യത നിലനിര്ത്താന് വേണ്ടത് 358 റണ്സ്.
ടോസ് നേടി ശ്രീലങ്ക ബൗളിങ് തിരഞ്ഞെടുക്കുകയായിരുന്നു. ഒന്നാം ഓവറിലെ ആദ്യ പന്ത് ബൗണ്ടറിയടിച്ചു തുടങ്ങിയ രോഹിത് തൊട്ടടുത്ത പന്തില് ക്ലീന് ബൗള്ഡായത് ഇന്ത്യയെ ഞെട്ടിച്ചു.
പിന്നീട് ക്രീസില് ഒന്നിച്ച കോഹ്ലി- ഗില് സഖ്യം 189 റണ്സിന്റെ തകര്പ്പന് കൂട്ടുകെട്ടുയര്ത്തി. ഇന്ത്യയുടെ കൂറ്റന് സ്കോറിന്റെ നട്ടെല്ലും ഈ കൂട്ടുകെട്ടായിരുന്നു. അര്ഹിച്ച സെഞ്ച്വറിക്ക് എട്ട് റണ്സ് അകലെ ശുഭ്മാന് ഗില്ലും ചരിത്ര സെഞ്ച്വറിക്ക് അരികെ ഒരിക്കല് കൂടി വിരാട് കോഹ്ലിയും വീണു.
ഗില് 92 പന്തില് 11 ഫോറും രണ്ട് സിക്സും സഹിതം 92 റണ്സ് നേടി. കോഹ്ലി 11 ഫോറുകള് സഹിതം 88 റണ്സെടുത്തും മടങ്ങി. 49 സെഞ്ച്വറികളെന്ന സച്ചിന് ടെണ്ടുല്ക്കറുടെ ഏകദിന റെക്കോര്ഡിനൊപ്പം കോഹ്ലി വാംഖഡെയില് എത്തുമെന്ന ആരാധക പ്രതീക്ഷ ഒരിക്കല് കൂടി നിരാശയ്ക്ക് വഴി മാറി.
കോഹ്ലിയും ഗില്ലും മടങ്ങിയതിനു പിന്നാലെ ക്രീസിലെത്തിയ ശ്രേയസ് ഒരറ്റത്തു നിന്നപ്പോള് മറുഭാഗത്ത് എത്തിയ കെഎല് രാഹുല് (21), സൂര്യകുമാര് യാദവ് (12)എന്നിവര് വേഗം പുറത്തായി.
ഫോം ഔട്ടായതിന്റെ പേരില് വിമര്ശനം ഉയരുന്നതിനിടയാണ് ശ്രേയസ് തകര്പ്പന് ബാറ്റിങുമായി കളം നിറഞ്ഞത്. താരം 56 പന്തില് ആറ് സിക്സും മൂന്ന് ഫോറും സഹിതം 82 റണ്സ് വാരി. താരത്തിനും സെഞ്ച്വറി നഷ്ടം. 24 പന്തില് 35 റണ്സെടുത്ത് രവീന്ദ്ര ജഡേജയും സ്കോറിലേക്ക് സംഭാവന നല്കി.
ഇന്നിങ്സിന്റെ രണ്ടാം പന്തില് ക്യാപ്റ്റന് രോഹിത് ശര്മയെ മടക്കി ഇന്ത്യയെ ഞെട്ടിച്ച മദുഷങ്ക തന്നെ കോഹ്ലി, ഗില് എന്നിവരേയും മടക്കി ലങ്കയെ കളിയിലേക്ക് തിരിച്ചെത്തിച്ചു. പിന്നാലെ സൂര്യകുമാര് യാദവിനേയും സെഞ്ച്വറിയിലേക്ക് കുതിക്കുകയായിരുന്നു ശ്രേയസിനേയും മടക്കി താരം അഞ്ച് വിക്കറ്റുകള് വീഴ്ത്തി. രണ്ട് വിക്കറ്റുകള് ദുഷ്മന്ത ചമീര സ്വന്തമാക്കി.
ഈ വാര്ത്ത കൂടി വായിക്കൂ
by Midhun HP News | Oct 31, 2023 | Latest News, കായികം
കൊളംബോ: ശ്രീലങ്കന് ക്രിക്കറ്റ് ടീമിനായി ഗാലറികളിലിരുന്ന് പതാക വീശാന് 87കാരനായ അങ്കിള് പേര്സി ഇനിയുണ്ടാകില്ല. രോഗബാധയെ തുടര്ന്ന് ചികിത്സയിലിരിക്കെയാണ് ലങ്കന് ടീമിന്റെ സൂപ്പര്ഫാന് അബേശേഖര മരണത്തിന് കീഴടങ്ങിയത്. ശ്രീലങ്കന് ടീമിന്റെ പ്രധാന മത്സരങ്ങളുള്ള വേദികളില്ലൊം അങ്കിള് പേര്സിയുടെ സാന്നിധ്യം ഉണ്ടായിരുന്നു. ലങ്കന് ടീം 1979 ലോകകപ്പില് കളിച്ചത് മുതല് ഈ ആരാധകന് ടീമിനെ പിന്തുണയ്ക്കാന് ഗാലറികളില് എത്തിയിരുന്നു. എന്നാല് അസുഖ ബാധിതനായതിനെ തുടര്ന്ന് ഈ ലോകകപ്പിന് എത്തിയിരുന്നില്ല.
ശ്രീലങ്കന് താരങ്ങളായ അര്ജുന രണതുങ്ക, സനത് ജയസൂര്യ, കുമാര് സംഗക്കാരെ എന്നിവരുമായി ഇദ്ദേഹത്തിന് വ്യക്തി ബന്ധങ്ങളുണ്ടായിരുന്നു. എം എസ് ധോനി, വിരാട് കോഹ്ലി, രോഹിത് ശര്മ്മ, എന്നിവരുമായും സൗഹൃദമുണ്ടായിരുന്നു. കൊളംബോയില് നടന്ന ഏഷ്യ കപ്പിനിടെ അബേശേഖരയെ രോഹിത് ശര്മ്മ വീട്ടിലെത്തി സന്ദര്ശിച്ചിരുന്നു. 2015 ലെ ശ്രീലങ്കന് പര്യടനത്തിനിടെ ഇദ്ദേഹത്തെ വിരാട് കോഹ് ലി ഇന്ത്യയുടെ ഡ്രസ്സിങ് റൂമിലേക്ക് ക്ഷണിച്ചിരുന്നു. രോബാധിതനായ ഇദ്ദേഹത്തിന് ലങ്കന് ക്രിക്കറ്റ് ടീം ചികിത്സക്കായി കഴിഞ്ഞ സെപ്റ്റംബറില് ശ്രീലങ്കന് ടീം വന്തുക കൈമാറിയിരുന്നു.
അങ്കിള് പേര്സിയുടെ മരണത്തില് ബിസിസിഐയും അനുശോചനം അറിയിച്ചു. ”അങ്കിള് പേര്സി് വലിയ ഉര്ജമായിരുന്നു, ഇദ്ദേഹത്തിന്റെ സ്ഥിരതയാര്ന്ന പ്രോത്സാഹനം മൈതാനത്ത് ഓരോ നിമിഷവും പ്രകാശം പകര്ന്നു. ഇന്ത്യന് ക്രിക്കറ്റ് താരങ്ങളുമായി അദ്ദേഹം ആഴത്തിലുള്ള ബന്ധം പങ്കിടുകയും ടീം ഇന്ത്യ ശ്രീലങ്കയില് പര്യടനം നടത്തുമ്പോഴെല്ലാം ശക്തമായ ബന്ധം വളര്ത്തിയെടുക്കുകയും ചെയ്തു. അദ്ദേഹത്തിന്റെ അസാന്നിധ്യം വലിയ നഷ്ടമാണ്” ബിസിസിഐ എക്സ് പോസ്റ്റില് പറഞ്ഞു.
by Midhun HP News | Oct 31, 2023 | Latest News, കായികം
എട്ടാം തവണയും ബാലൺ ദ് ഓർ പുരസ്കാരം സ്വന്തമാക്കി അർജന്റീനിയൻ ഇതിഹാസം ലയണൽ മെസ്സി. എർലിംഗ് ഹാലൻഡ്, കിലിയൻ എംബാപ്പെയെയും പിന്തള്ളിയാണ് നേട്ടം. 2021ലാണ് ഇന്റർ മിയാമിയുടെ മെസ്സി അവസാനമായി പുരസ്കാരം നേടിയത്.
ഖത്തർ ലോകകപ്പിൽ കിരീടത്തിലെത്തിച്ചതും ലോകകപ്പിലെ ഏറ്റവും മികച്ച താരമായി തെരഞ്ഞെടുക്കപ്പെട്ടതും നേട്ടമായി. 2009, 2010, 2011, 2012, 2015, 2019, 2021 വർഷങ്ങളിലാണ് മെസി ബാലൺ ദ് ഓർ പുരസ്കാരത്തിന് അർഹനായത്. അഞ്ച് ബാലൺ ദ് ഓർ പുരസ്കാരം നേടിയിട്ടുള്ള പോർട്ടുഗൽ സൂപ്പർ താരംക്രിസ്റ്റ്യാനോ റൊണാൾഡോ ആണ് രണ്ടാം സ്ഥാനത്താണ്.
ബാഴ്സലോണയുടെ സ്പാനിഷ് താരം എയ്താന ബോൺമാട്ടിയാണ് മികച്ച വനിതാ ഫുട്ബോളർക്കുള്ള ബാലൺ ദ് ഓർ നേടിയത്. മികച്ച ഗോൾ കീപ്പർക്ക് നൽകുന്ന പുരസ്കാരമായ ലെവ് യാഷിൻ ട്രോഫി അർജന്റീന ഗോൾ കീപ്പർ എമിലിയാനോ മാർട്ടിനസ് സ്വന്തമാക്കി. അർജന്റീനക്കായി ലോകകപ്പിൽ നടത്തിയ മികച്ച പ്രകടനത്തിനാണ് പുരസ്കാരം.
ടോപ്സ്കോറർക്കുള്ള ഗെർഡ് മുള്ളർ ട്രോഫി എർലിംഗ് ഹാലൻഡ് സ്വന്തമാക്കി. എംബാപ്പെയെ നേരിയ വ്യത്യാസത്തിൽ മറികടന്നാണ് ഈ 23-ാകാരന്റെ നേട്ടം. ബ്രസീൽ, റയൽ മാഡ്രിഡ് താരം വിനിഷ്യസ് ജൂനിയർ സോക്രട്ടീസ് പുരസ്കാരം നേടിയപ്പോൾ മികച്ച യുവതാരത്തിനുള്ള കോപ്പ ട്രോഫി പുരസ്കാരം ജൂഡ് ബെല്ലിംഗ്ഹാം സ്വന്തമാക്കി. 2023 ലെ മികച്ച ക്ലബ്ബിനുള്ള അവാർഡ് മാഞ്ചസ്റ്റർ സിറ്റിയും ബാഴ്സലോണ വനിതാ ടീമും പങ്കിട്ടു
Recent Comments