by Midhun HP News | Oct 5, 2026 | Latest News, ജില്ലാ വാർത്ത
പ്രമുഖ കാഥികൻ ഞെക്കാട് ശശി അന്തരിച്ചു. 76 വയസ്സായിരുന്നു.
സംസ്കാരം നാളെ (06-10-26) രാവിലെ 10 മണിക്ക് ഞെക്കാട് വീട്ടുവളപ്പിൽ നടക്കും. ഇന്നലെ രാത്രി 12.30ന് ആലുവ രാജഗിരി ആശുപത്രിയിൽ വച്ചാണ് അന്ത്യം സംഭവിച്ചത്.
എറണാകുളത്ത് മകനോടൊപ്പമായിരുന്നു ഞെക്കാട് ശശി താമസിച്ചിരുന്നത്.
ഇന്ന് വൈകിട്ടോടെ മൃതദേഹം വർക്കല ഞെക്കാട് വീട്ടിലെത്തിക്കും.
കഥാപ്രസംഗം എന്ന ജനകീയ കല സജീവമായിരുന്ന കാലത്ത് ആ രംഗത്ത് നിറഞ്ഞു നിന്നിരുന്ന കാഥികനാണ് ഞെക്കാട് ശശി. ജനകീയ അംഗീകാരം ലഭിച്ച നിരവധി കഥകൾ ശശി അവതരിപ്പിച്ചിട്ടുണ്ട്. കേരളത്തിൽ അങ്ങോളമിങ്ങോളം കഥ പറഞ്ഞിട്ടുള്ള ശശി ജനങ്ങളുമായും ഇടതുപക്ഷ പ്രസ്ഥാനങ്ങളുമായും ബന്ധപ്പെട്ട കഥകൾ പറയുന്നതിൽ ശ്രദ്ധ കേന്ദ്രീകരിച്ചിരുന്നു.
by Midhun HP News | Oct 5, 2026 | Latest News, കേരളം
കൊല്ലം: ആയൂർ അഞ്ചൽ റോഡിൽ പ്രവർത്തിക്കുന്ന സമാന്തര ട്യൂഷൻ സെന്ററിലെ ഉടമയും പ്രിൻസിപ്പളുമായ വ്യക്തി സ്ഥാപനത്തിൽ പഠിക്കുന്ന പ്ലസ് ടു വിദ്യാർത്ഥിനിക്ക് നേരെ ലൈംഗിക അതിക്രമം നടത്തിയെന്ന് ആരോപിച്ച് പെൺകുട്ടി നൽകിയ പരാതിയിൽ കൊല്ലം ആയൂർ കടയിൽ വീട്ടിൽ പ്രവീൺ
(49)നെ ചടയമംഗലം പോലീസ് അറസ്റ്റ് ചെയ്തു.
പെൺകുട്ടിയും കുടുംബവും ജില്ലാ പോലീസ് മേധാവിക്ക് നൽകിയ പരാതിയെത്തുടർന്നാണ് ആരോപണ വിധേയനായ പ്രവീണിനെ ചടയമംഗലം പോലീസ് കസ്റ്റഡിയിലെടുത്തത്. എന്നാൽ സ്ഥാപനത്തെ അപകീർത്തിപ്പെടുത്തുവാനും തന്റെ സർക്കാർ ജോലി ഇല്ലാതാക്കാനും ഉള്ള ശ്രമമാണ് കേസിന് പിന്നിലെന്നും ഇതിൽ ഗൂഢാലോചനയുണ്ടെന്നും പ്രവീണിന്റെ കുടുംബം ആരോപിക്കുന്നു.
പോക്സോപ്രകാരം കേസെടുത്ത ചടയമംഗലം പോലീസ് ആരോപണ വിധേയനെ കടയ്ക്കൽ കോടതിയിൽ ഹാജരാക്കി. കടയ്ക്കൽ കോടതി ഇദ്ദേഹത്തെ റിമാൻഡ് ചെയ്തു.
by Midhun HP News | Oct 5, 2026 | Latest News, ജില്ലാ വാർത്ത
തിരുവനന്തപുരം: ഭവനരഹിതരില്ലാത്ത കേരളമാണ് സര്‍ക്കാരിന്റെ ലക്ഷ്യമെന്നും സംസ്ഥാനത്ത് ലൈഫ് പദ്ധതി തുടരുമെന്നും മുഖ്യമന്ത്രി വിഡി സതീശന്‍. ലൈഫ് പദ്ധതിയില്‍ നിന്ന് മത്സ്യത്തൊഴിലാളികളെ മാറ്റിയതായി ബജറ്റില്‍ പ്രഖ്യാപിച്ചു. ലൈഫ് മിഷനേക്കാള്‍ ഉയര്‍ന്ന തുക ലഭ്യമാക്കിക്കൊണ്ട് മത്സ്യത്തൊഴിലാളികള്‍ക്കായി പ്രത്യേക ഭവന പദ്ധതി നടപ്പിലാക്കുമെന്നും മുഖ്യമന്ത്രി പറഞ്ഞു. മത്സ്യത്തൊഴിലാളി വനിതകള്‍ക്കുള്ള ഷീ സ്‌കൂട്ടര്‍ വിതരണത്തിന്റെ ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി.
തീരദേശത്ത് നടപ്പിലാക്കുന്ന ഏത് വികസന പദ്ധതികളിലും ആ മേഖലയിലുള്ളവര്‍ക്ക് പ്രത്യേക തൊഴില്‍ സംവരണം ഏര്‍പ്പെടുത്തുമെന്നും സ്ത്രീകളെ സാമ്പത്തിക സ്വയംപര്യാപ്തതയിലേക്ക് നയിക്കുകയാണ് സര്‍ക്കാരിന്റെ പ്രധാന ലക്ഷ്യമെന്നും അദ്ദേഹം ചൂണ്ടിക്കാട്ടി. ഭവനരഹിതരായ ഒരാള്‍ പോലും ഉണ്ടാകരുത് എന്നതാണ് സര്‍ക്കാരിന്റെ നയം. മത്സ്യത്തൊഴിലാളി മേഖലയില്‍ പ്രത്യേക ഭവന പദ്ധതി നടപ്പിലാക്കും. ലൈഫ് പദ്ധതിയില്‍ നിന്ന് കിട്ടിയ തുകയെക്കാള്‍ കൂടുതലുണ്ടാകും. അത് എത്രയാണെന്ന് ഇപ്പോള്‍ പറയുന്നില്ല. അത് സസ്‌പെന്‍സ് ആയി കിടക്കട്ടെയെന്നും മുഖ്യമന്ത്രി പറഞ്ഞു.
വിഴിഞ്ഞത്ത് ഉള്‍പ്പെടെ പ്രദേശിക മല്‍സ്യ തൊഴിലാളികള്‍ക്ക് ജോലി നല്‍കണമെന്ന കര്‍ശന നിര്‍ദേശം നല്‍കിയിട്ടുണ്ടെന്നും വിഡി സതീശന്‍ പറഞ്ഞു. തീരദേശ ജനതയുടെ കണ്ണീരൊപ്പാന്‍ സര്‍ക്കാര്‍ എന്നും ഒപ്പമുണ്ടാകുമെന്നും അദ്ദേഹം ഉറപ്പുനല്‍കി.
by Midhun HP News | Oct 5, 2026 | Latest News, ദേശീയ വാർത്ത
ഡല്‍ഹി: ചന്ദ്രനില്‍ ആണവ റിയാക്ടറുകള്‍ സ്ഥാപിക്കാന്‍ അമേരിക്കയും ചൈനയും റഷ്യയും തമ്മില്‍ കടുത്ത മത്സരമെന്ന് റിപ്പോര്‍ട്ട്. ചന്ദ്രനില്‍ സ്ഥിരമായി കേന്ദ്രങ്ങള്‍ നിര്‍മിക്കുന്നതിനും വിഭവങ്ങള്‍ പര്യവേക്ഷണം ചെയ്യുന്നതിനും കൂടുതല്‍ ബഹിരാകാശ ദൗത്യങ്ങള്‍ക്ക് പിന്തുണ നല്‍കുന്നതിനും അണുശക്തി നിര്‍ണായകമാകുമെന്നാണ് വിലയിരുത്തല്‍.
ചന്ദ്രന്റെ ദക്ഷിണ ധ്രുവത്തിന് സമീപം മനുഷ്യരുടെ അറ്റകുറ്റപ്പണികളില്ലാതെ പ്രവര്‍ത്തിക്കാനും ശേഷിയുള്ള ആണവ റിയാക്ടര്‍ തയ്യാറാക്കാന്‍ നാസ ഇതിനകം തന്നെ കരാറുകാരോട് ആവശ്യപ്പെട്ടതായി ‘ദി ന്യൂയോര്‍ക്ക് ടൈംസ്’ റിപ്പോര്‍ട്ട് ചെയ്തു. 2030 ഡിസംബറോടെ ഈ റിയാക്ടര്‍ വിക്ഷേപണത്തിന് സജ്ജമാക്കുകയാണ് നാസയുടെ ലക്ഷ്യം.
നാസ നിര്‍ദേശിച്ചിരിക്കുന്ന ‘ലൂണാര്‍ റിയാക്ടര്‍-1’ 20 കിലോവാട്ട് വൈദ്യുതി ഉല്‍പ്പാദിപ്പിക്കുമെന്നും അറ്റകുറ്റപ്പണികളില്ലാതെ അഞ്ച് വര്‍ഷത്തോളം പ്രവര്‍ത്തിക്കുമെന്നും പ്രതീക്ഷിക്കുന്നു. അതേസമയം, ചൈനയുമായുള്ള രഹസ്യ സഹകരണത്തിന്റെ ഭാഗമായി 2036-ഓടെ ‘സെലെന’ എന്ന് പേരിട്ടിരിക്കുന്ന റിയാക്ടര്‍ വികസിപ്പിക്കാനാണ് റഷ്യ പദ്ധതിയിടുന്നത്.
ചൈനീസ് നേതൃത്വത്തിലുള്ള ചന്ദ്രനിലയങ്ങള്‍ക്ക് ആവശ്യമായ വൈദ്യുതി നല്‍കാനാണ് ഈ പദ്ധതി ലക്ഷ്യമിടുന്നത്. 10 കിലോവാട്ട് വരെ വൈദ്യുതി ഉല്‍പ്പാദിപ്പിക്കാനും പത്ത് വര്‍ഷത്തോളം പ്രവര്‍ത്തിക്കാനും തക്കവണ്ണമാണ് രൂപകല്‍പ്പന ചെയ്തിരിക്കുന്നത്.
ചന്ദ്രനില്‍ സ്ഥിരമായ ഒരു താവളം പ്രവര്‍ത്തിപ്പിക്കാന്‍ വൈദ്യുതോര്‍ജ സ്രോതസ്സ് അത്യന്താപേക്ഷിതമാണ്. പകല്‍ സമയത്ത് സൗരോര്‍ജ പാനലുകള്‍ ഉപയോഗിച്ച് വൈദ്യുതി ഉണ്ടാക്കാമെങ്കിലും സൗരോര്‍ജത്തെ മാത്രം ആശ്രയിക്കുക പ്രയാസകരമാണ്.
സൂര്യപ്രകാശമില്ലാതെയും പ്രവര്‍ത്തിക്കാന്‍ സാധിക്കുന്ന ആണവ റിയാക്ടറുകള്‍ക്ക്, പരിമിത മനുഷ്യ ഇടപെടലുകളോടെ ദീര്‍ഘകാലത്തേക്ക് വൈദ്യുതി നല്‍കാന്‍ കഴിയും. പ്രാരംഭ ഘട്ടത്തില്‍, ഉപകരണങ്ങള്‍ പ്രവര്‍ത്തിപ്പിക്കാനും ലൂണാര്‍ വാഹനങ്ങള്‍ ചാര്‍ജ് ചെയ്യുന്നതിനും സൗരോര്‍ജവും റേഡിയോ ഐസോടോപ്പ് സംവിധാനങ്ങളുമാണ് അമേരിക്കയും ചൈനയും ഉപയോഗിക്കാന്‍ ലക്ഷ്യമിടുന്നത്. എന്നാല്‍, കൂടുതല്‍ വലിയ താവളങ്ങള്‍ നിര്‍മിക്കുമ്പോള്‍ അതിന് വലിയ അളവില്‍ വൈദ്യുതി ആവശ്യമായി വരും.
by Midhun HP News | Oct 5, 2026 | Latest News, കേരളം
കൊച്ചി: ആസൂത്രണ ബോര്‍ഡിലേക്ക് നടന്ന പരീക്ഷയുടെ മൂല്യനിര്‍ണയ ക്രമക്കേടില്‍ പിഎസ്‌സിക്കെതിരെ രൂക്ഷവിമര്‍ശനവുമായി ഹൈക്കോടതി. നടന്നത് ഗുരുതരമായ അഴിമതിയാണ്. ക്രമക്കേട് നടത്തിയെങ്കില്‍ അത് അന്വേഷിക്കേണ്ടേയെന്ന് ചോദിച്ച കോടതി പിഎസ്‌സി അന്വേഷണത്തോട് സഹകരിക്കുകയാണ് വേണ്ടതെന്ന് ചൂണ്ടിക്കാട്ടി. ക്രൈംബ്രാഞ്ച് അന്വേഷണത്തിനെതിരെ ഹര്‍ജി നല്‍കാന്‍ പിഎസ്‌സിക്ക് എന്തധികാരമെന്നും കോടതി ചോദിച്ചു.
പിഎസ്‌സി ഒരു ഭരണഘടനാ സ്ഥാപനമാണ്. അതിനാല്‍ ക്രൈബ്രാഞ്ച് അന്വേഷണം തടയണമെന്നായിരുന്നു പിഎസ്‌സിയുടെ വാദം. ഇങ്ങനെ ഒരുഹര്‍ജി നല്‍കാന്‍ പിഎസ്‌സിക്ക് എന്തധികാരമെന്ന് ജസ്റ്റിസ് ബദറുദ്ദീന്‍ ചോദിച്ചു. 58 ചോദ്യങ്ങള്‍ മൂല്യനിര്‍ണയം നടത്താത്തത് ഗുരുതരമാണ്. ഇത് പ്രഥമദൃഷ്ട്യാ അഴിമതിയാണെന്ന് കോടതി നിരീക്ഷിച്ചു.
മൂല്യനിര്‍ണയത്തിലെ വീഴ്ച ക്ലറിക്കല്‍ പിഴവാണെന്നായിരുന്നു പിഎസ്‌സിയുടെ വാദം. എന്നാല്‍, ഇത് ആസൂത്രിതമായി നടത്തിയ കുറ്റകൃത്യമാണെന്ന് സര്‍ക്കാര്‍ അഭിഭാഷകന്‍ മറുവാദം ഉന്നയിച്ചു. പരീക്ഷയിലെ ചോദ്യങ്ങള്‍ മൂല്യനിര്‍ണയം നടത്താതിരുന്നത് ക്ലറിക്കല്‍ പിഴവാണെന്ന് പറയാനാവില്ലെന്ന് ഹൈക്കോടതി നിരീക്ഷിച്ചു. അന്വേഷണം തടയണമെന്ന വാദം ശരിയല്ല.
പിഎസ്‌സിയ്ക്ക് എതിരേ ഒന്നും അന്വേഷിക്കരുതെന്നാണോ നിലപാടെന്ന് കോടതി ചോദിച്ചു. പിഎസ്‌സിയുടെ വിശ്വാസ്യത കാത്തുസൂക്ഷിക്കണം. യുവാക്കളുടെ പ്രതീക്ഷയാണ് പിഎസ്‌സി അതിനെ തകര്‍ക്കുന്ന നടപടികള്‍ അനുവദിക്കാനാകില്ലെന്ന് കോടതി വ്യക്തമാക്കി. അന്വേഷണം തടയണമെന്ന ഹര്‍ജി നിലനില്‍ക്കില്ലെന്നും ഗുരുതര ആരോപണമാണ് പിഎസ്‌സിക്കെതിരേ ഉയര്‍ന്നിരിക്കുന്നതെന്നും കോടതി പറഞ്ഞു. വാദംകേള്‍ക്കുന്നതിന് അടുത്ത വ്യാഴാഴ്ചത്തേക്ക് ഹര്‍ജി മാറ്റി.
Recent Comments