by Midhun HP News | Nov 2, 2026 | Latest News, കേരളം
കൊല്ലം: സ്ത്രീധന പീഡനവുമായി ബന്ധപ്പെട്ട് 26 വയസ്സുകാരിയായ യുവതി ജീവനൊടുക്കി. പത്തനാപുരം സ്വദേശിനിയായ സായയാണ് മരിച്ചത്.
വിവാഹസമ്മാനമായി നൽകിയ കാറിന്റെ വായ്പയുടെ മാസതവണയായ ഇ എം ഐ മുടങ്ങിയതിനെച്ചൊല്ലി ഭർത്താവിന്റെ ഭാഗത്തുനിന്ന് യുവതിക്ക് പീഡനം നേരിടേണ്ടിവന്നെന്നാണ് പുറത്തുവരുന്ന ആരോപണം.
കാറിന്റെ ഇ എം ഐ അടയ്ക്കുന്നതുമായി ബന്ധപ്പെട്ട തർക്കങ്ങളാണ് യുവതിയെ മാനസികമായി തളർത്തിയതെന്നാണ് ആരോപണം. സംഭവത്തിൽ കൂടുതൽ വിവരങ്ങൾ പുറത്തുവരാനുണ്ട്. വിവാഹബന്ധങ്ങളുടെ പേരിൽ സ്ത്രീകൾക്ക് നേരിടേണ്ടിവരുന്ന മാനസിക പീഡനങ്ങളും സ്ത്രീധനവുമായി ബന്ധപ്പെട്ട സമ്മർദങ്ങളും വീണ്ടും ചർച്ചയാകുകയാണ് ഈ സംഭവം.
by Midhun HP News | Nov 2, 2026 | Latest News, ദേശീയ വാർത്ത
ചെന്നൈ: ‘മുറസു’ ചുഴലിക്കാറ്റ് തെക്കന്‍ ആന്ധ്രാപ്രദേശ് തീരത്തേക്ക് നീങ്ങുന്നതിനിടെ തമിഴ്നാടിന്റെ വടക്കന്‍ മേഖലകളില്‍ ശക്തമായ മഴ. നിലവില്‍ ചെന്നൈയില്‍ നിന്ന് ഏകദേശം 250-260 കിലോമീറ്റര്‍ അകലെയാണ് മുറസു. ചുഴലിക്കാറ്റിന്റെ സ്വാധീനത്താല്‍ ചെന്നൈയിലെ പലയിടങ്ങളിലും വെള്ളക്കെട്ട് രൂപപ്പെട്ടു. ചെന്നൈയിലും സമീപ പ്രദേശങ്ങളിലും വ്യാപകമായ മഴയാണ് അനുഭവപ്പെടുന്നത്.
24 മണിക്കൂറിനുള്ളില്‍ നഗരത്തിന്റെ പല ഭാഗങ്ങളിലും 10 മുതല്‍ 15 സെന്റീമീറ്റര്‍ വരെ മഴ പെയ്തു. കടപ്പാക്കം ഉള്‍പ്പെടെയുള്ള ഇടങ്ങളില്‍ 15 സെന്റീമീറ്റര്‍ വീതം മഴയുണ്ടായി. മണലി ന്യൂ ടൗണിലും മണലിയിലും 14 സെന്റീമീറ്റര്‍ വീതം മഴ രേഖപ്പെടുത്തി. സത്തങ്ങാടില്‍ 13 സെന്റീമീറ്റര്‍ മഴ ലഭിച്ചപ്പോള്‍, കത്തിവക്കം, എന്നൂര്‍, ബേസിന്‍ ബ്രിഡ്ജ്, പുഴല്‍, വിംകോ നഗര്‍, തൊണ്ടിയാര്‍പേട്ട് തുടങ്ങിയ പ്രദേശങ്ങളില്‍ 11 സെന്റീമീറ്റര്‍ വീതം മഴ ലഭിച്ചു.
ശക്തമായ മഴയിലും മോശം കാലാവസ്ഥയിലും ചെന്നൈയെയും ആന്ധ്രാപ്രദേശിലെ വിവിധ നഗരങ്ങളെയും തിരുച്ചിറപ്പള്ളിയെയും ബന്ധിപ്പിക്കുന്ന 11 വിമാന സര്‍വീസുകള്‍ റദ്ദാക്കി. ചെന്നൈയില്‍ നിന്ന് വിജയവാഡ, രാജമുന്ദ്രി, കടപ്പ, തിരുച്ചിറപ്പള്ളി എന്നിവിടങ്ങളിലേക്കും തിരിച്ചുമുള്ള 11 വിമാന സര്‍വീസുകളാണ് ഇന്ന് റദ്ദാക്കിയത്.
ചെന്നൈ – വിജയവാഡ റൂട്ടിലെ മൂന്ന് സര്‍വീസുകളും, ചെന്നൈ – രാജമുന്ദ്രി റൂട്ടിലെ രണ്ട് സര്‍വീസുകളും, ചെന്നൈ – കടപ്പ റൂട്ടിലെ രണ്ട് സര്‍വീസുകളും, ചെന്നൈ – തിരുച്ചിറപ്പള്ളി റൂട്ടിലെ നാല് സര്‍വീസുകളുമാണ് റദ്ദാക്കിയതായി ചെന്നൈ വിമാനത്താവള അധികൃതര്‍ അറിയിച്ചു. വിശാഖപട്ടണം, ഹൈദരാബാദ്-വിജയവാഡ രണ്ട് സര്‍വീസുകള്‍ എയര്‍ ഇന്ത്യ എക്‌സ്പ്രസ് റദ്ദാക്കിയിട്ടുണ്ട്. വിജയവാഡ വിമാനത്താവളത്തില്‍ നിന്നുള്ള 10 വിമാന സര്‍വീസുകള്‍ ഇന്‍ഡിഗോയും റദ്ദാക്കിയിട്ടുണ്ട്.
by Midhun HP News | Nov 2, 2026 | Latest News, ജില്ലാ വാർത്ത
കേരളത്തിലെ മികച്ച ജീവകാരുണ്യ പ്രവർത്തനങ്ങൾക്കുള്ള അംഗീകാരം നേടി കലാഭവൻ മണി സേവനസമിതി.
കഴിഞ്ഞ നിരവധി വർഷങ്ങളായി നിരാലംബർക്കും അശരണർക്കും കൈത്താങ്ങായി, സമൂഹത്തിന് മാതൃകാപരമായ ജീവകാരുണ്യ പ്രവർത്തനങ്ങൾ നടത്തിവരുന്ന സമിതിയുടെ സേവനങ്ങൾക്കുള്ള അംഗീകാരമായാണ് ഈ ആദരം ലഭിച്ചത്.
നന്ദു മഹാദേവയുടെ ആത്മകഥയായ ‘പുകയരുത് ജ്വലിക്കണം’ എന്ന പുസ്തകത്തിന്റെ പ്രകാശനച്ചടങ്ങിനോടനുബന്ധിച്ച് കേരളപ്പിറവി ദിനത്തിൽ തിരുവനന്തപുരം യൂണിവേഴ്സിറ്റി സെനറ്റ് ഹാളിൽ നടന്ന ചടങ്ങിൽ വെച്ച് ശ്രീ ശക്തി ശാന്താനന്ദ മഹർഷിയിൽനിന്ന് കലാഭവൻ മണി സേവനസമിതി പുരസ്കാരം ഏറ്റുവാങ്ങി. ചടങ്ങിൽ സമിതി ചെയർമാൻ അജിൽ മണിമുത്ത്, സെക്രട്ടറി സുമ, രജനി, ഡോ. കൃഷ്ണലത എന്നിവർ പങ്കെടുത്തു.
by Midhun HP News | Nov 2, 2026 | Latest News, കേരളം
കൊച്ചി: മുന്‍ ഡിജിപി ടോമിന്‍ ജെ തച്ചങ്കരിയുടെ ജാമ്യഹര്‍ജിയില്‍ ചോദ്യങ്ങളുമായി ഹൈക്കോടതി. അനധികൃത സ്വത്ത് സമ്പാദന കേസില്‍ ശിക്ഷിക്കപ്പെട്ട ടോമിന്‍ ചികിത്സയിലായിരുന്നുവല്ലോയെന്നും പിന്നെ എങ്ങനെ വിദേശത്ത് പോകുമെന്നും കോടതി ചോദിച്ചു.
വിദേശത്ത് ജോലിയുണ്ടെന്നും അവിടെ ജോലിയില്‍ പ്രവേശിച്ചില്ലെങ്കില്‍ തൊഴില്‍ നഷ്ടപ്പെടുമെന്നും അതുകൊണ്ട് ജാമ്യവ്യവസ്ഥയില്‍ ഇളവ് വേണമെന്നുമായിരുന്നു തച്ചങ്കരിയുടെ ആവശ്യം. യുഎഇയിലേക്ക് യാത്ര ചെയ്യാനും ജോലി ചെയ്യാനും അനുമതി നല്‍കുക, അല്ലെങ്കില്‍, ഒക്ടോബര്‍ 26 മുതല്‍ 2027 മാര്‍ച്ച് 31 വരെയുള്ള സമയത്ത് യുഎഇയിലേക്ക് പോകാന്‍ അനുമതി നല്‍കുക എന്ന് ആവശ്യപ്പെട്ടായിരുന്നു തച്ചങ്കരിയുടെ ഹര്‍ജി.
അനധികൃത സ്വത്ത് സമ്പാദന കേസില്‍ കോട്ടയം വിജിലന്‍സ് സ്‌പെഷല്‍ കോടതി തച്ചങ്കരിയെ 4 വര്‍ഷം തടവിനും 30.84 ലക്ഷം രൂപ പിഴയടയ്ക്കാനും ശിക്ഷിച്ചിരുന്നു. പിന്നാലെ ഹൈക്കോടതി അദ്ദേഹത്തിന്റെ ശിക്ഷാവിധി മരവിപ്പിച്ച് ജാമ്യം അനുവദിച്ചു.
കോടതിയുടെ മുന്‍കൂര്‍ അനുമതിയില്ലാതെ രാജ്യത്തിനു പുറത്തുപോകരുതെന്ന ജാമ്യ വ്യവസ്ഥ ഭേദഗതി ചെയ്യണമെന്നാണ് തച്ചങ്കരിയുടെ ആവശ്യം. താന്‍ ഷാര്‍ജയില്‍ ഒരു ജ്വല്ലറി ഗ്രൂപ്പിന്റെ ഓപ്പറേഷന്‍സ് മാനേജരായി ജോലി ചെയ്തുവരികയാണെന്നും ഒപ്പം ദുബായിലെ ഐടി കണ്‍സള്‍ട്ടന്‍സി സ്ഥാപനത്തില്‍ പങ്കാളിയാണെന്നും ഹര്‍ജിയില്‍ പറയുന്നു. ജോലിയില്‍ ഉടന്‍ പ്രവേശിച്ചില്ലെങ്കില്‍ തൊഴില്‍ നഷ്ടപ്പെടുമെന്നും ഇത് തന്റെ ഉപജീവനമാര്‍ഗത്തെ സാരമായി ബാധിക്കുമെന്നും തച്ചങ്കരി പറയുന്നു.
ഹര്‍ജി പരിഗണിക്കുന്നതിനിടെ തച്ചങ്കരിക്കെതിരെ രൂക്ഷമായ പരിഹാസമാണ് കോടതിയുടെ ഭാഗത്തുനിന്നുണ്ടായത്. ജയിലിലേക്ക് പോയപ്പോള്‍ ആരോഗ്യപ്രശ്‌നങ്ങള്‍ ചൂണ്ടിക്കാട്ടി ആശുപത്രിയിലേക്ക് പോയ ആളാണ് ടോമിന്‍ ജെ തച്ചങ്കരിയെന്നും കോടതി അഭിപ്രായപ്പെട്ടു. ജയിലില്‍ നിന്ന് ഇറങ്ങി കഴിഞ്ഞപ്പോള്‍ ജോലിക്ക് പോകണമെന്ന് പറയുന്നതില്‍ വൈരുദ്ധ്യമുണ്ട്. ആരോഗ്യപ്രശ്‌നങ്ങളാണ് ജാമ്യാപേക്ഷയില്‍ ഉയര്‍ത്തിക്കാണിച്ചത്. ആരോഗ്യപ്രശ്‌നങ്ങളുള്ളയാള്‍ക്ക് എങ്ങനെ വിദേശത്ത് പോയി ജോലി ചെയ്യാന്‍ കഴിയുമെന്നും കോടതി ചോദിച്ചു. വെള്ളിയാഴ്ചയ്ക്കുള്ളില്‍ തച്ചങ്കരിയുടെ ചികിത്സാവിവരങ്ങള്‍ ഹാജരാക്കാന്‍ കോടതി പൂജപ്പുര ജയില്‍ സൂപ്രണ്ടിനോട് നിര്‍ദേശിച്ചു.
എത്രദിവസം ജയിലില്‍ കഴിഞ്ഞു, എത്ര ദിവസം ആശുപത്രിയില്‍ കഴിഞ്ഞു എന്നതടക്കം അറിയിക്കണമെന്നാണ് നിര്‍ദേശത്തിലുള്ളത്. ജയിലില്‍ പോകുമ്പോള്‍ ഗുരുതരരോഗം ജയിലില്‍ നിന്ന് പുറത്തിറങ്ങിയാല്‍ സുഖവാസം എന്ന നിലപാട് ആണ് പലര്‍ക്കുമുള്ളത്. ഇത് കാണുന്ന ജനങ്ങള്‍ കോടതിയിലുള്ള ജഡ്ജിമാര്‍ക്ക് ബുദ്ധിയില്ലെന്ന് കരുതും. എന്നാല്‍ ആരും അങ്ങനെ കരുതേണ്ടതില്ലെന്നും ഹര്‍ജി പരിഗണിച്ച ജസ്റ്റിസ് എ ബദറുദ്ദീന്‍ ഓര്‍മിപ്പിച്ചു.
by Midhun HP News | Nov 2, 2026 | Latest News, കേരളം
കാഞ്ഞിരപ്പള്ളി: ദേശീയപാത 183-ൽ ചോറ്റി ജംഗ്ഷനിലുണ്ടായ ഏഴു വാഹനങ്ങള്‍ ഉള്‍പ്പെട്ട വാഹനാപകടം ഡ്രൈവറുടെ ആത്മഹത്യാശ്രമമാണെന്ന് പൊലീസ്. റോഡിൽ അമിതവേഗതയിൽ കാറോടിച്ച് മറ്റ് വാഹനങ്ങളിലേക്ക് മനഃപൂർവം ഇടിച്ചുകയറ്റുകയായിരുന്നുവെന്ന് ഡ്രൈവർ പൊലീസിനോട് സമ്മതിച്ചു.
സംഭവത്തിൽ അപകടമുണ്ടാക്കിയ കാർ ഓടിച്ചിരുന്ന കൂട്ടിക്കൽ പുത്തൂർ സ്വദേശി ശാരോണിൺ ഫിലിപ്പിനെ (27) കാഞ്ഞിരപ്പള്ളി പൊലീസ് അറസ്റ്റ് ചെയ്തു. മനഃപൂർവമുള്ള നരഹത്യാശ്രമത്തിനാണ് ഇയാൾക്കെതിരെ കേസെടുത്തിട്ടുള്ളത്. അപകടത്തിൽ പരിക്കേറ്റ ശാരോണിൺ നിലവിൽ പൊലീസ് കാവലിൽ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലാണ്.
ഞായറാഴ്ച രാവിലെ 8.15-ഓടെയായിരുന്നു ചോറ്റി ജംഗ്ഷനെ വിറപ്പിച്ച നാടകീയ അപകടം. മുണ്ടക്കയം ഭാഗത്തുനിന്നും അമിതവേഗതയിൽ പാഞ്ഞെത്തിയ പ്രതിയുടെ കാർ ആദ്യം മുന്നിൽ പോവുകയായിരുന്ന മറ്റൊരു കാറിൽ ചെറുതായി തട്ടി. തുടർന്ന് വേഗത ഒട്ടും കുറയ്ക്കാതെ മുന്നോട്ട് കുതിച്ച കാർ അതേദിശയിൽ സഞ്ചരിക്കുകയായിരുന്ന ഓട്ടോറിക്ഷയുടെ പിന്നിലേക്ക് അതിശക്തമായി ഇടിച്ചുകയറി. ഇതിനുപിന്നാലെ റോഡിലുണ്ടായിരുന്ന മറ്റൊരു കാറിലും ഇടിച്ചു.
നിയന്ത്രണം വിട്ട കാർ എതിർദിശയിൽ പാതയോരത്ത് പാർക്ക് ചെയ്തിരുന്ന സ്കൂട്ടറിലും, തുടർന്ന് ചോറ്റി റോഡിൽനിന്ന് ദേശീയപാതയിലേക്ക് കയറാൻ നിർത്തിയിട്ടിരുന്ന മറ്റൊരു കാറിലും ഇടിച്ചാണ് ഒടുവിൽ നിന്നത്. ആകെ അഞ്ച് കാറുകളും ഒരു ഓട്ടോറിക്ഷയും ഒരു സ്കൂട്ടറുമാണ് കൂട്ടിയിടിയിൽ തകർന്നത്. ഇടിയുടെ ആഘാതത്തിൽ കാറിന്റെ ഡോറുകൾ ലോക്കാവുകയും ശാരോണിൺ ഉള്ളിൽ കുടുങ്ങുകയും ചെയ്തു. തുടർന്ന് നാട്ടുകാരും അഗ്നിരക്ഷാസേനയും ചേർന്ന് സാഹസികമായാണ് ഇയാളെ പുറത്തെടുത്തത്.
അപകടത്തിൽ കുട്ടികളടക്കം പത്തുപേർക്കാണ് പരിക്കേറ്റത്. കാഞ്ഞിരപ്പള്ളി ഭാഗത്തേക്ക് പോവുകയായിരുന്ന കൂട്ടിക്കൽ മഠത്തിൽ അൻസാരി (65), കൂട്ടിക്കൽ മഠത്തിൽ സഹിൽ (31), മടുക്ക മരുതുംവയലിൽ ശ്യാംജിത്ത് (35), ഭാര്യ ശാലിനി (30), ഇവരുടെ മക്കളായ എം.എസ്. അദ്വൈത് (9), എം.എസ്. ആവണി (4), ചോറ്റി ഇല്ലക്കുളത്ത് പി.വി. രാജൻ (65), കൊച്ചുമക്കളായ രേവന്ത് (12), ശ്രേവന്ദ് (11), ചോറ്റി പ്ലാമുട് രാജു (71) എന്നിവർക്കാണ് പരിക്കേറ്റത്.
ശ്യാംജിത്തും കുടുംബവും സഞ്ചരിച്ചിരുന്ന ഓട്ടോറിക്ഷയിലേക്ക് കാർ പാഞ്ഞുകയറിയതോടെ ഓട്ടോ റോഡിലേക്ക് തലകീഴായി മറിയുകയായിരുന്നു. ഇതിലുണ്ടായിരുന്ന നാലുവയസ്സുകാരി ആവണിയടക്കമുള്ള യാത്രക്കാർക്കാണ് ഗുരുതരമായി പരിക്കേറ്റത്. പരിക്കേറ്റവരിൽ മൂന്നുപേർ പ്രാഥമിക ചികിത്സയ്ക്ക് ശേഷം ആശുപത്രി വിട്ടു.
ബാക്കിയുള്ളവർ വിവിധ ആശുപത്രികളിൽ ചികിത്സയിലാണ്. അപകടത്തെ തുടർന്ന് ദേശീയപാതയിൽ ഒരു മണിക്കൂറിലധികം ഗതാഗതം സ്തംഭിച്ചിരുന്നു. പ്രതിയെ വിശദമായി ചോദ്യം ചെയ്ത ശേഷം തുടർനടപടികൾ സ്വീകരിക്കുമെന്ന് പൊലീസ് അറിയിച്ചു
Recent Comments