by Midhun HP News | Sep 30, 2026 | ദേശീയ വാർത്ത
ഡല്‍ഹി: ഒക്ടോബറില്‍ സിമന്റ് വില വര്‍ധിപ്പിച്ചേക്കുമെന്ന് റിപ്പോര്‍ട്ട്. ചാക്ക് ഒന്നിന് അഞ്ചു രൂപ മുതല്‍ 20 രൂപ വരെ വില വര്‍ധന ഉണ്ടായേക്കുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. സെപ്റ്റംബറില്‍ അഖിലേന്ത്യാ തലത്തില്‍ ശരാശരി ചാക്ക് ഒന്നിന് ഏഴ് രൂപ വര്‍ധിച്ച് 356 രൂപയിലെത്തിയിരുന്നു. എന്നാല്‍ വീണ്ടും വില വര്‍ധിപ്പിക്കാനുള്ള സാധ്യത വിപണിയിലെ ആവശ്യകതയെയും ഡീലര്‍മാരുടെ സ്വീകാര്യതയെയും ആശ്രയിച്ചിരിക്കും.
ആഗോള വിപണിയിലെ എണ്ണവില വര്‍ധന അടക്കമുള്ള വിഷയങ്ങളാണ് സിമന്റ് വിലയില്‍ നിര്‍ണായമാകുക. നിലവില്‍ ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 104 ഡോളറിന് മുകളിലാണ്. ജൂലൈ, ഓഗസ്റ്റ് മാസങ്ങളില്‍ വലിയ മാറ്റമില്ലാതെ തുടര്‍ന്ന സിമന്റ് വിലയാണ് സെപ്റ്റംബറില്‍ കൂടിയത്. സെപ്റ്റംബറില്‍ ട്രേഡ്, നോണ്‍-ട്രേഡ് വിഭാഗങ്ങളിലാണ് സിമന്റ് വില വര്‍ധിച്ചത്. മിക്ക വിപണികളിലും നോണ്‍-ട്രേഡ് വിലകളിലാണ് കൂടുതല്‍ വര്‍ധന ഉണ്ടായത്.
ടാര്‍ഗറ്റ് കൈവരിക്കുന്നതിനായി ഡീലര്‍മാര്‍ പഴയ വിലക്ക് തന്നെ വില്‍പ്പന തുടര്‍ന്നിരുന്നതിനാല്‍ കമ്പനികളുടെ ഉയര്‍ന്ന ബില്ലിങ് നിരക്കുകള്‍ പല വിപണികളിലും ഉപഭോക്താക്കള്‍ക്ക് പൂര്‍ണമായി ബാധകമായിരുന്നില്ല. ദക്ഷിണേന്ത്യയില്‍ സെപ്റ്റംബറില്‍ ചാക്ക് ഒന്നിന് 11 രൂപയാണ് വര്‍ധിച്ചത്. സെപ്റ്റംബറില്‍ ഏറ്റവും കൂടുതല്‍ വില വര്‍ധന ദക്ഷിണേന്ത്യയിലാണ്. പശ്ചിമ ഇന്ത്യ ഒന്‍പത് രൂപ വര്‍ധന രേഖപ്പെടുത്തി. മധ്യ, കിഴക്കന്‍, ഉത്തരേന്ത്യ മേഖലകളില്‍ ചാക്ക് ഒന്നിന് അഞ്ചു രൂപ വീതമാണ് വില കൂടിയത്.
by Midhun HP News | Sep 30, 2026 | Latest News, കേരളം
കുട്ടികളുടെ ആധാര്‍ കാര്‍ഡിലെ നിര്‍ബന്ധ ബയോമെട്രിക് വിവരങ്ങള്‍ പുതുക്കുന്നത് ഒരുവര്‍ഷത്തേക്കു കൂടി സൗജന്യമാക്കി ആധാര്‍ അതോറിറ്റി (യുഐഡിഎഐ). ഏഴു മുതല്‍ 15 വരെ വയസ്സുള്ളവര്‍ക്ക് 2027 സെപ്റ്റംബര്‍ 30 വരെ സൗജന്യമായി പുതുക്കാം. നേരത്തെ ഈ മാസം 30വരെ ആയിരുന്നു അവസാന തീയതി.
രാജ്യമൊട്ടാകെ കോടിക്കണക്കിനു കുട്ടികളുടെ ബയോമെട്രിക് വിവരം ഇനിയും അപ്‌ഡേറ്റ് ചെയ്യാനുണ്ട്. കേരളത്തില്‍ 10 ലക്ഷത്തോളം കുട്ടികളുടെ വിവരങ്ങള്‍ പുതുക്കാനുണ്ട്. വിരലടയാളം, രണ്ടു കണ്ണിന്റെയും കൃഷ്ണമണിയുടെ അടയാളം, ഫോട്ടോ എന്നിവയാണ് സൗജന്യമായി പുതുക്കുന്നത്.
കുട്ടികള്‍ക്ക് മാതാപിതാക്കളുടെ വിവരങ്ങളുടെ അടിസ്ഥാനത്തിലാണ് ആദ്യം ആധാര്‍ നല്‍കുന്നത്. കുഞ്ഞിന്റെ മുഖത്തിന്റെ ചിത്രം മാത്രമാണ് അപ്പോള്‍ എടുക്കാറുള്ളത്. അഞ്ചുവയസ്സു തികയുമ്പോഴാണ് വിരലിന്റെയും കൃഷ്ണമണിയുടെയും അടയാളമെടുക്കുക. കുട്ടികള്‍ വളരുമ്പോള്‍ ഇവയ്ക്കു മാറ്റമുണ്ടാകുമെന്നതിനാലാണ് 15 വയസ്സിലും നിര്‍ബന്ധ പുതുക്കല്‍ നടത്തുന്നത്.
നീറ്റ് ഉള്‍പ്പെടെയുള്ള പരീക്ഷകള്‍ക്ക് രജിസ്റ്റര്‍ ചെയ്യുമ്പോള്‍ ആധാര്‍ നിര്‍ബന്ധമാണ്. സ്‌കോളര്‍ഷിപ്പ്, മെഡിക്കല്‍ ആനുകൂല്യം, റേഷന്‍ തുടങ്ങിയവയ്ക്കും ആധാര്‍ ബയോമെട്രിക് വിവരം കൃത്യമായിരിക്കണം.
ബാങ്ക് അക്കൗണ്ട് തുടങ്ങുമ്പോഴും മൊബൈല്‍ ഫോണ്‍ സിം കാര്‍ഡ് എടുക്കുമ്പോഴും വിരലടയാളം കൃത്യമായില്ലെങ്കില്‍ ബുദ്ധിമുട്ടുണ്ടാകും. ആധാര്‍ പ്രവര്‍ത്തനരഹിതമാകാനും സാധ്യതയുണ്ട്. പിഴ നല്‍കി വീണ്ടെടുക്കേണ്ടി വരും. ആധാര്‍ സേവനകേന്ദ്രങ്ങള്‍, സ്‌കൂളുകളിലെ ക്യാമ്പ്, ബാങ്ക്, പോസ്റ്റോഫീസ് എന്നിവിടങ്ങളില്‍ പുതുക്കാന്‍ സൗകര്യമുണ്ട്.
by Midhun HP News | Sep 30, 2026 | Latest News, കേരളം
മദ്യപിച്ച് വാഹനമോടിച്ച കേസില്‍ യൂട്യൂബര്‍ അശ്വന്ത് കോക്കിന് വന്‍ തിരിച്ചടി. അശ്വന്തിന്റെ ഡ്രൈവിങ് ലൈസന്‍സ് സ്‌പെന്‍ഡ് ചെയ്യാന്‍ നടക്കാവ് പൊലീസ് മോട്ടോര്‍ വാഹന വകുപ്പിന് റിപ്പോര്‍ട്ട് നല്‍കും. കസ്റ്റഡിയിലെടുത്ത വാഹനത്തില്‍ നടത്തിയ പരിശോധനയില്‍ പൊലീസ് എയര്‍ഗണ്ണും പെല്ലറ്റുകളും കണ്ടെത്തി. വാഹനത്തില്‍ നിന്നും മദ്യക്കുപ്പികളും കണ്ടെത്തിയിട്ടുണ്ട്. കസ്റ്റെഡിയിലെടുത്ത വാഹനവും എയര്‍ഗണ്ണും പൊലീസ് കോടതിയില്‍ ഹാജരാക്കി.
തിങ്കളാഴ്ച രാത്രി ഏഴരയോടെയാണ് സംഭവം. കോഴിക്കോട് എരഞ്ഞിപ്പാലത്ത് വച്ച് അശ്വന്ത് കോക്ക് ഓടിച്ച വാഹനം രണ്ട് കാറുകളിലും ബൈക്കിലും ഇടിക്കുകയായിരുന്നു. തുടര്‍ന്ന് നാട്ടുകാര്‍ അശ്വന്ത് കോക്കിന്റെ വാഹനം തടയുകയും യൂട്യൂബറെ പിടികൂടി പൊലീസിനെ ഏല്‍പ്പിക്കുകയുമായിരുന്നു. റോഡില്‍ നിര്‍ത്തിയിട്ട കാറിലും ഭിന്നശേഷിക്കാരന്‍ സഞ്ചരിച്ച വാഹനത്തിലുമടക്കം അശ്വന്ത് കോക്കിന്റെ വാഹനം ഇടിച്ചിരുന്നു.
അശ്വന്ത് കോക്കിനെ നാട്ടുകാര്‍ തടഞ്ഞു നിര്‍ത്തുന്നതിന്റേയും പൊലീസിന് കൈമാറുന്നതിന്റേയും ദൃശ്യങ്ങള്‍ സോഷ്യല്‍ മീഡിയയില്‍ വൈറലായിരുന്നു. വൈദ്യ പരിശോധനയ്ക്കായി ആശുപത്രിയിലെത്തിച്ച ശേഷം മടങ്ങവെ മദ്യപിച്ചിരുന്നുവോ എന്ന മാധ്യമങ്ങളുടെ ചോദ്യത്തിന് ദാറ്റ്‌സ് കേരളാ പൊലീസ് എന്ന അശ്വന്ത് കോക്കിന്റെ മറുപടിയും വൈറലായിരുന്നു. അതേസമയം, അറസ്റ്റിലായ അശ്വന്ത് കോക്കിനെ പിന്നീട് സ്റ്റേഷന്‍ ജാമ്യത്തില്‍ വിട്ടയച്ചിരുന്നു.
സിനിമാ റിവ്യുകളിലൂടെയാണ് അശ്വന്ത് കോക്ക് ശ്രദ്ധേയനാകുന്നത്. സോഷ്യല്‍ മീഡിയയില്‍ ധാരാളം ഫോളോവേഴ്‌സുള്ള യൂട്യൂബറാണ് അശ്വന്ത് കോക്ക്. വിവാദങ്ങളും എന്നും അശ്വന്ത് കോക്കിന് പിന്നാലെയുണ്ടായിരുന്നു. സിനിമ റിവ്യുകളിലെ അശ്വന്ത് കോക്കിന്റെ പ്രയോഗങ്ങളും ഭാഷയുമെല്ലാം കടുത്ത വിമര്‍ശനങ്ങള്‍ നേരിട്ടിരുന്നു.
by Midhun HP News | Sep 30, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാനത്തെ സാംസ്‌കാരിക സ്ഥാപനങ്ങളിലെ അധ്യക്ഷസ്ഥാനങ്ങളിലേക്കുള്ള നിയമനങ്ങളില്‍ കടുത്ത ലോബിയിങ്ങും രാഷ്ട്രീയ സമ്മര്‍ദ്ദവുമാണ് നടന്നത്. കേരള ചലച്ചിത്ര അക്കാദമി ചെയര്‍മാന്‍ സ്ഥാനത്തേക്ക് സംവിധായകന്‍ ബ്ലെസിയെയാണ് പരിഗണിച്ചിരുന്നത്. എന്നാല്‍ അവസാന നിമിഷമാണ് ബ്ലെസ്സിയെ പിന്തള്ളി നടന്‍ രവീന്ദ്രന്‍ ചെയര്‍മാന്‍ സ്ഥാനം കരസ്ഥമാക്കിയത്. പരിഗണനയിലുണ്ടായിരുന്ന നടൻ ജോയ് മാത്യുവിന് കാര്യമായ പിന്തുണ ലഭിച്ചതുമില്ല.
കേരള സാഹിത്യ അക്കാദമി ചെയര്‍മാനായി കവിയും എഴുത്തുകാരനുമായ കല്‍പ്പറ്റ നാരായണനെ നിയമിച്ചതിനു പിന്നില്‍ മുഖ്യമന്ത്രി വി ഡി സതീശന്റെ താല്‍പ്പര്യമാണ്. എഴുത്തുകാരായ സി വി ബാലകൃഷ്ണന്‍, യു കെ കുമാരന്‍ എന്നിവരുള്‍പ്പെടെ പലരുടെയും പേരുകള്‍ സാഹിത്യ അക്കാദമി ചെയര്‍മാന്‍ സ്ഥാനത്തേക്ക് പരിഗണിച്ചിരുന്നു. എന്നാല്‍ മുഖ്യമന്ത്രിയുടെ താല്‍പ്പര്യമാണ് അന്തിമമായി പരിഗണിക്കപ്പെട്ടത്.
മറ്റ് സ്ഥാപനങ്ങളിലെ അധ്യക്ഷ നിയമന നടപടികളില്‍ നിന്ന് വിട്ടുനിന്ന മുഖ്യമന്ത്രി വി ഡി സതീശന്‍, സാഹിത്യ അക്കാദമി ചെയര്‍മാന്‍ സ്ഥാനത്തേക്ക് നാരായണനെ നിയമിക്കണമെന്ന താല്‍പ്പര്യം സാംസ്‌കാരിക വകുപ്പ് മന്ത്രി പി സി വിഷ്ണുനാഥിനെ അറിയിക്കുകയായിരുന്നു. മറ്റു പദവികളിലെ നിയമനങ്ങളില്‍ ഇടപെടാനില്ലെന്ന് മുഖ്യമന്ത്രി തീരുമാനിച്ചതിനാല്‍, ഈ നിര്‍ദേശം അംഗീകരിക്കുകയായിരുന്നുവെന്ന് ഒരു നേതാവ് ദി ന്യൂ ഇന്‍ഡ്യന്‍ എക്‌സ്പ്രസിനോട് സൂചിപ്പിച്ചു.
ചലച്ചിത്ര അക്കാദമി ചെയര്‍മാന്‍ സ്ഥാനത്തേക്ക് നടന്‍ ജോയ് മാത്യു, സംവിധായകന്‍ ബ്ലെസി, നടനും ചലച്ചിത്രമേള ക്യൂറേറ്ററുമായ രവീന്ദ്രന്‍ എന്നിവരായിരുന്നു പ്രധാന പരിഗണനാ പട്ടികയിലുണ്ടായിരുന്നത്. ചില യുഡിഎഫ് അനുഭാവികള്‍ സംവിധായകന്‍ ഡോ. ബിജുവിന്റെ പേര് നിര്‍ദ്ദേശിച്ചെങ്കിലും അദ്ദേഹത്തിന് ആവശ്യമായ പിന്തുണ നേടാനായില്ല. ബ്ലെസിക്ക് കാര്യമായ പിന്തുണ ലഭിച്ചിരുന്നെങ്കിലും, അവസാന നിമിഷം സാഹചര്യങ്ങള്‍ മാറിമറിയുകയും, രവീന്ദ്രനെ നിയമിക്കാന്‍ തീരുമാനിക്കുകയുമായിരുന്നു.
കോണ്‍ഗ്രസ് ആശയങ്ങളോട് ആഭിമുഖ്യമുള്ളവരെ സാംസ്‌കാരിക സ്ഥാപനങ്ങളുടെ പ്രധാന പദവികളില്‍ നിയമിക്കണമെന്ന സര്‍ക്കാരിന്റെ നിലപാടാണ് നിയമനങ്ങളില്‍ പ്രതിഫലിച്ചത്. മുന്‍ എല്‍ഡിഎഫ് സര്‍ക്കാരിന്റെ കാലത്ത് സാഹിത്യ അക്കാദമി പ്രസിഡന്റ് കെ. സച്ചിദാനന്ദന്‍ പദവിയിലിരിക്കെ സര്‍ക്കാരിനെ പരസ്യമായി വിമര്‍ശിച്ചിരുന്നു. അത്തരമൊരു വിവാദത്തിന് വഴിയൊരുക്കാന്‍ സര്‍ക്കാര്‍ ആഗ്രഹിച്ചില്ല. ഒരു നേതാവ് പറഞ്ഞു.
അതേസമയം ചില നിയമനങ്ങളില്‍ പാര്‍ട്ടിക്കുള്ളില്‍ അതൃപ്തിയും ശക്തമായുണ്ട്. കേരള സ്റ്റേറ്റ് ഫിലിം ഡെവലപ്മെന്റ് കോര്‍പ്പറേഷന്‍ (KSFDC) ചെയര്‍മാന്‍ പദവിയില്‍ ആലപ്പി അഷ്റഫിനെ തഴഞ്ഞതാണ് അതൃപ്തിക്കിടയാക്കിയ ഒരു തീരുമാനം. നടന്‍ പ്രേം കുമാറിനെയാണ് ചെയര്‍മാനാക്കിയത്. സംവിധായകന്‍ രഞ്ജിത്ത് രാജിവെച്ചപ്പോള്‍ ഒഴിവുവന്ന പദവി ലഭിക്കാത്തതിന് പ്രേം കുമാര്‍ എല്‍ഡിഎഫില്‍ നിന്ന് അകന്ന കാര്യം വിമര്‍ശകര്‍ ചൂണ്ടിക്കാട്ടി. എന്നാല്‍, പ്രേം കുമാറിന് നേരത്തെ നല്‍കിയ ഉറപ്പ് പാലിക്കണമെന്ന നിലപാടില്‍ നേതൃത്വം ഉറച്ചുനിന്നു.
എഴുത്തുകാരിയും കോളമിസ്റ്റുമായ സുധാ മേനോന്റെ പേരും പരിഗണിച്ചിരുന്നെങ്കിലും, താനില്ലെന്ന് അവര്‍ നേതൃത്വത്തെ വിവരം അറിയിച്ചിരുന്നു.
by Midhun HP News | Sep 30, 2026 | Latest News, ദേശീയ വാർത്ത
ഡല്‍ഹി: അറബിക്കടലില്‍ വന്‍ ലഹരി മരുന്ന് കടത്ത് പിടികൂടി. അന്താരാഷ്ട്ര വിപണിയില്‍ 3,000 കോടിയിലധികം രൂപ വിലമതിക്കുന്ന, ഹെറോയിനും മെത്താംഫെറ്റാമിനും അടക്കമുള്ള മയക്കുമരുന്ന് പിടികൂടി. ഏകദേശം 526 കിലോഗ്രാം ഉയര്‍ന്ന നിരോധിത ലഹരിവസ്തുക്കളാണ് പിടിച്ചെടുത്തത്. പായ് വഞ്ചിയിലുണ്ടായിരുന്ന അഞ്ച് പാകിസ്ഥാന്‍ പൗരന്മാരെയും പിടികൂടി.
ലക്ഷദ്വീപിന് പടിഞ്ഞാറ് അറബിക്കടലില്‍, ഗുജറാത്ത് ഭീകര വിരുദ്ധ സ്‌ക്വാഡുമായി (ATS) സഹകരിച്ച് ഇന്ത്യന്‍ തീരസംരക്ഷണ സേന (Indian Coast Guard) നടത്തിയ ഓപ്പറേഷനിലാണ് വന്‍തോതിലുള്ള ലഹരിമരുന്ന് കടത്ത് സംഘത്തെ പിടികൂടിയത്. രഹസ്യാന്വേഷണ വിവരങ്ങളുടെ അടിസ്ഥാനത്തില്‍ സംഘം നിരീക്ഷണം നടത്തിവരികയായിരുന്നു.ഇതിനിടെയാണ് അറബിക്കടലില്‍ സംശയാസ്പദമായ നിലയില്‍ ഒരു ഇറാനിയന്‍ ‘ധൗ’ (പരമ്പരാഗത പായ്വഞ്ചി) സെപ്റ്റംബര്‍ 25-ന് ശ്രദ്ധയില്‍പ്പെടുന്നത്. തുടര്‍ന്ന് ഇതിനെ പിന്തുടര്‍ന്ന സേന പായ് വഞ്ചിയില്‍ കയറി നടത്തിയ പരിശോധനയിലാണ് മയക്കുമരുന്ന് കണ്ടെടുത്തത്. പിടിച്ചെടുത്ത വഞ്ചിയും അതിലെ ജീവനക്കാരെയും ലഹരിവസ്തുക്കളും മുംബൈയിലേക്ക് കൊണ്ടുപോയി.
Recent Comments