by Midhun HP News | Apr 26, 2025 | Latest News, ജില്ലാ വാർത്ത
തിരുവനന്തപുരം: സംസ്ഥാനത്തെ കുടുംബശ്രീ അയല്ക്കൂട്ടങ്ങള്ക്ക് വിവിധ ബാങ്കുകളിലായുള്ള നിക്ഷേപം 9,369 കോടി രൂപ. നിക്ഷേപത്തില് കഴിഞ്ഞ ഒന്പത് വര്ഷത്തിനിടെയാണ് ഏറ്റവുമധികം കുതിപ്പ് ഉണ്ടായത്. ഒന്പതുവര്ഷം കൊണ്ട് കുടുബശ്രീ അയല്ക്കൂട്ട അംഗങ്ങള് സമ്പാദിച്ച് വിവിധ ബാങ്കുകളില് നിക്ഷേപിച്ചത് 7,076.06 കോടി രൂപയാണെന്ന് കണക്കുകള് വ്യക്തമാക്കുന്നു.
എല്ലാ അംഗങ്ങളും ആഴ്ചയില് കുറഞ്ഞത് 10 രൂപ നിക്ഷേപിക്കണമെന്ന വ്യവസ്ഥയോടെയാണ് പദ്ധതി ആരംഭിച്ചത്.ആഴ്ചതോറും നല്കുന്ന ചെറുതുകയാണ് ഇത്രവലിയ സമ്പാദ്യമായി മാറിയത്. ആഴ്ചസമ്പാദ്യത്തിലൂടെ ഏഷ്യയില്ത്തന്നെ ഏറ്റവും കൂടുതല് നിക്ഷേപം കൈവരിക്കുന്ന സ്ത്രീക്കൂട്ടായ്മയെന്ന ഖ്യാതിയും കുടുംബശ്രീ ഇതിലൂടെ നേടി. സാധാരണക്കാരായ സ്ത്രീകളുടെ സമ്പാദ്യശീലം പ്രോത്സാഹിപ്പിക്കാനും വ്യക്തിഗത ആവശ്യങ്ങള് നിറവേറ്റാനും 1998 മുതല് കുടുംബശ്രീ നടപ്പാക്കുന്ന മൈക്രോഫിനാന്സ് പദ്ധതിയുടെ ഭാഗമായാണ് സമ്പാദ്യപദ്ധതി തുടങ്ങിയത്. ഇതുവരെയുള്ള മൊത്തം നിക്ഷേപം 9,369 കോടി രൂപ വരുമെങ്കിലും ഒന്പതു വര്ഷത്തിനിടെയാണ് വന് കുതിപ്പുണ്ടായത്.
തുടക്കത്തില് ചുരുക്കം ചില ജില്ലകളിലായിരുന്നു അയല്ക്കൂട്ടങ്ങളുടെ പ്രവര്ത്തനം. 2008ഓടെ അത് സംസ്ഥാനമെങ്ങും വ്യാപിപ്പിച്ചു. ഇപ്പോള് 3.17 ലക്ഷം അയല്ക്കൂട്ടങ്ങളുണ്ട്. 48 ലക്ഷത്തോളം അംഗങ്ങളും. ആദ്യഘട്ടത്തില് ഓരോ അംഗവും കുറഞ്ഞത് പത്തുരൂപ വീതമാണ് ആഴ്ചതോറും നിക്ഷേപിച്ചത്. ഘട്ടംഘട്ടമായി തുക കൂട്ടി. സാമ്പത്തികശേഷിക്കനുസരിച്ചാണ് ഇപ്പോള് നിക്ഷേപത്തുക നിശ്ചയിക്കുന്നത്. കിട്ടുന്ന തുക ഓരോ ആഴ്ചയും ബാങ്ക് നിക്ഷേപമാക്കും. കൂടാതെ, 2024-25 കാലയളവില് കുടുംബശ്രീ നടത്തിയ സുസ്ഥിര ത്രിഫ്റ്റ് ആന്ഡ് ക്രെഡിറ്റ് കാംപെയ്നിലൂടെ അയല്ക്കൂട്ട അംഗങ്ങളുടെ ശരാശരി പ്രതിവാര സമ്പാദ്യം ഗണ്യമായി വര്ദ്ധിച്ചു.
വലിയ നടപടിക്രമങ്ങളില്ലാതെ നാലുശതമാനം പലിശയ്ക്ക് അംഗങ്ങള്ക്ക് അവരുടെ നിക്ഷേപത്തിന് ആനുപാതികമായി വായ്പയെടുക്കാനുള്ള സൗകര്യവുമുണ്ട്. സ്വന്തം നിക്ഷേപത്തെക്കാള് കൂടുതല് വായ്പയെടുക്കാന് മറ്റംഗങ്ങളുടെ സമ്മതം മതി. പരസ്പര ജാമ്യത്തിലും വായ്പയെടുക്കാം. ഈ വായ്പകള് നേടുന്നതിലൂടെ, സ്വകാര്യ വായ്പാ ദാതാക്കളുടെ കടക്കെണി ഒഴിവാക്കാനും കഴിയും. ഇന്നുവരെ, 28,723.89 കോടി രൂപ അയല്ക്കൂട്ട അംഗങ്ങള്ക്ക് ആഭ്യന്തര വായ്പകളുടെ രൂപത്തില് വിതരണം ചെയ്തിട്ടുണ്ട്.
എല്ലാ അയല്ക്കൂട്ട അംഗങ്ങള്ക്കും സ്വന്തമായി ബാങ്ക് അക്കൗണ്ടുകളുണ്ട്. ഇതുവരെ 3.07 ലക്ഷം അയല്ക്കൂട്ട അക്കൗണ്ടുകള് ബാങ്കുകളുമായി ബന്ധിപ്പിച്ചിട്ടുണ്ട്. ഇത് അയല്ക്കൂട്ട അംഗങ്ങള്ക്ക് സ്വന്തമായി ബാങ്കിങ് ഇടപാടുകള് നടത്താനും ഡിജിറ്റല് പേയ്മെന്റുകള് നടത്താനും പ്രാപ്തമാക്കി. ”സാധാരണ സ്ത്രീകളുടെ സമ്പാദ്യശീലം പ്രോത്സാഹിപ്പിക്കുന്നതിനും അവരുടെ വ്യക്തിപരമായ ആവശ്യങ്ങള് നിറവേറ്റുന്നതിനുമായി 1998 മുതല് കുടുംബശ്രീ നടപ്പിലാക്കി വരുന്ന മൈക്രോ-ഫിനാന്സ് പദ്ധതിയുടെ ഭാഗമാണ് അയല്ക്കൂട്ട തലത്തില് സമ്പാദ്യം സൃഷ്ടിക്കല്. ഇതുവരെ അയല്ക്കൂട്ട അംഗങ്ങള് നടത്തിയ വലിയ നിക്ഷേപമാണ് കുടുംബശ്രീയുടെ ഏറ്റവും വലിയ നേട്ടങ്ങളിലൊന്ന്,” – കുടുംബശ്രീ ഉദ്യോഗസ്ഥന് പറഞ്ഞു.
by Midhun HP News | Apr 26, 2025 | Latest News, മരണം
ആറ്റിങ്ങൽ: കിഴുവിലം കെ.എസ്.ഭവനിൽ സുഭദ്ര പി (79) അന്തരിച്ചു. ഭർത്താവ്: കൃഷ്ണൻകുട്ടി.
മക്കൾ: സതീഷ് കെ, ഹരികുമാർ കെ, പ്രിയ കെ എസ്
മരുമക്കൾ: പ്രീത എസ്.ആർ, സ്വപ്നാറാണി, ജയകുമാർ
സംസ്കാരം ഇന്ന് (26.04.25) വൈകു ന്നേരം 3 പിഎം .) വെഞ്ഞാറമൂട്. പിച്ചിമംഗലം
by Midhun HP News | Apr 26, 2025 | Latest News, കേരളം
കോഴിക്കോട്: പ്രമുഖ ചരിത്ര പണ്ഡിതനും ഗവേഷകനും എഴുത്തുകാരനുമായ പ്രൊഫസര് എം ജി എസ് നാരായണന് (92) അന്തരിച്ചു. കോഴിക്കോട് മലാപ്പറമ്പിലെ വസതിയിലായിരുന്നു അന്ത്യം. കേരളത്തിന്റെ ചരിത്ര ഗവേഷണത്തിന് അതുല്യ സംഭാവനകള് നല്കിയ പ്രതിഭയാണ് വിടപറഞ്ഞത്. സംസ്കാരം ഇന്ന് വൈകിട്ട് മാവൂര് റോഡ് ശ്മശാനത്തില്.
ഒന്നരപ്പതിറ്റാണ്ട് കാലിക്കറ്റ് സര്വകലാശാലയുടെ ചരിത്ര വിഭാഗം മേധാവിയായിരുന്നു. കുറച്ചു നാളുകളായി വാര്ധക്യ സഹജമായ ആരോഗ്യ പ്രശ്നങ്ങളുണ്ടായിരുന്നു. ഇന്ന് രാവിലെ ആരോഗ്യ നില മോശമാവുകയായിരുന്നു.
1932 ല് പൊന്നാനിയിലാണ് ജനനം. പരപ്പനങ്ങാടിയിലും പൊന്നാനി എ വി സ്കൂളിലും പ്രാഥമിക വിദ്യാഭ്യാസവും ഹൈസ്കൂള് പഠനവും പൂര്ത്തിയാക്കിയശേഷം കോഴിക്കോട് സാമൂതിരി (ഗുരുവായൂരപ്പന്) കോളജിലും ഫാറൂഖ് കോളജിലും തൃശൂര് കേരളവര്മ കോളജിലും മദ്രാസ് ക്രിസ്ത്യന് കോളജിലും ഉന്നതബിരുദ-ബിരുദാനന്തര പഠനങ്ങള് പൂര്ത്തിയാക്കി. ഒന്നാം റാങ്കോടെ ചരിത്രത്തില് മാസ്റ്റര് ബിരുദം നേടിയ ശേഷം ഇരുപത്തിരണ്ടാമത്തെ വയസ്സില് ഗുരുവായൂരപ്പന് കോളജില് അധ്യാപകനായി ഔദ്യോഗിക ജീവിതം ആരംഭിച്ചു. ഇരുപത്തിയെട്ടാമത്തെ വയസ്സില് യുജിസി ഫെലോഷിപ്പില് യൂണിവേഴ്സിറ്റിയില് ചരിത്രഗവേഷണം ആരംഭിച്ചു.
എം ജി എസ് പുരാതന ഇന്ത്യന് ലിപികള് (ബ്രാഹ്മി, ഗ്രന്ഥം എന്നിവ) പഠിക്കുകയും തമിഴ്, ക്ലാസിക്കല് സംസ്കൃതം എന്നിവയില് വൈദഗ്ദ്ധ്യം നേടുകയും ചെയ്തിട്ടുണ്ട്. കൊടുങ്ങല്ലൂരില് (1969-70) പുരാവസ്തു ഗവേഷണങ്ങളില് നിരീക്ഷകനായി പങ്കെടുത്തു. കേരളത്തിലെ ചേര പെരുമാളുകളെ പരാമര്ശിക്കുന്ന നിരവധി മധ്യകാല വട്ടെഴുത്തു ലിഖിതങ്ങളും അദ്ദേഹം കണ്ടെത്തി പ്രസിദ്ധീകരിച്ചു. കോമണ്വെല്ത്ത് അക്കാദമിക് സ്റ്റാഫ് ഫെലോ, സ്കൂള് ഓഫ് ഓറിയന്റല്, ആഫ്രിക്കന് സ്റ്റഡീസ്, യൂണിവേഴ്സിറ്റി ഓഫ് ലണ്ടന് (1974 -75); വിസിറ്റിംഗ് ഫെലോ, മോസ്കോ, ലെനിന്ഗ്രാഡ് സര്വകലാശാലകള് (1991); വിസിറ്റിംഗ് റിസര്ച്ച് പ്രൊഫസര്, ടോക്കിയോ യൂണിവേഴ്സിറ്റി ഓഫ് ഫോറിന് സ്റ്റഡീസ്, ടോക്കിയോ (1994-95). ഫസ്റ്റ് മെംബര് സെക്രട്ടറിയായും (1990-92) ഇന്ത്യന് കൗണ്സില് ഓഫ് ഹിസ്റ്റോറിക്കല് റിസര്ച്ചിന്റെ ചെയര്മാനായും (2001-03) സേവനമനുഷ്ഠിച്ചു. അന്തര്ദേശീയ ശ്രദ്ധ നേടിയ ഒട്ടേറെ പ്രബന്ധങ്ങള് അദ്ദേഹം പ്രസിദ്ധീകരിച്ചു.
ഇന്ത്യന് ചരിത്ര പരിചയം-1969, സാഹിത്യ അപരാധങ്ങള് 1970, കേരള ചരിത്രത്തിന്റെ അടിസ്ഥാന ശിലകള് 1971, കോഴിക്കോടിന്റെ കഥ-2001, സെക്കുലര് ജാതിയും സെക്കുലര് മതവും-2001, ജനാധിപത്യവും കമ്മ്യൂണിസവും-2004,പെരുമാള്സ് ഓഫ് കേരള എന്നിവയാണ് അദ്ദേഹത്തിന്റെ പ്രധാന പുസ്തകങ്ങള്.
by Midhun HP News | Apr 26, 2025 | Latest News, കേരളം
ചെന്നൈ: 9 കളിയില് ഏഴാം തോല്വി വഴങ്ങി ചെന്നൈ സൂപ്പര് കിങ്സ് അവസാന സ്ഥാനത്താണ്. അവരുടെ പ്ലേ ഓഫ് സാധ്യതകളും ഏതാണ്ട് അവസാനിച്ചു. ടീമിന്റെ പ്രകടനത്തില് കടുത്ത നിരാശയിലാണ് ക്യാപ്റ്റന് മഹേന്ദ്ര സിങ് ധോനി. ടീമിലെ നിര്ണായക താരങ്ങളില് മിക്കവരും ഫോം കിട്ടാതെ ഉഴലുമ്പോള് പോസിറ്റിവായ ഫലം കിട്ടുക എന്നത് ഏറെ പ്രയാസകരമായ കാര്യമാണെന്നു ധോനി വ്യക്തമാക്കി.
സ്വന്തം തട്ടകത്തില് സണ്റൈസേഴ്സ് ഹൈദരാബാദിനോടു 5 വിക്കറ്റിനാണ് ചെന്നൈ തോറ്റത്. ഇതോടെ അവരുടെ പ്ലേ ഓഫ് സാധ്യതകള് ഏറെക്കുറെ അവസാനിച്ചു. ആദ്യം ബാറ്റ് ചെയ്ത ചെന്നൈ 154 റണ്സിനു ഓള് ഔട്ടായി. എസ്ആര്എച് 5 വിക്കറ്റ് നഷ്ടത്തില് 155 റണ്സെടുത്താണ് വിജയിച്ചത്.
‘ഒന്നോ രണ്ടോ മേഖലകളിലാണ് ടീമിനു പ്രശ്നമുള്ളതെങ്കില് അതു പരിഹരിക്കാന് സാധിക്കും. എന്നാല് കളിക്കാരില് ഭൂരിഭാഗം പേരും മോശം ഫോമില് കളിച്ചാല് ഒന്നും ചെയ്യാനില്ല- മത്സര ശേഷം മാധ്യമങ്ങളോടു സംസാരിക്കവേ ധോനി വ്യക്തമാക്കി.’
കാലങ്ങളായി വിന്നിങ് കോമ്പിനേഷനില് വലിയ മാറ്റങ്ങള് വരുത്താത്ത ടീമാണ് സിഎസ്കെ. എന്നാല് ഇത്തവണ അവര് പല മാറ്റങ്ങള് വരുത്തിയെങ്കിലും ഒന്നും ക്ലിക്കായില്ല.
‘9 മത്സരങ്ങളില് 19 കളിക്കാരെയാണ് സിഎസ്കെ ഇത്തവണ മാറി പരീക്ഷിച്ചത്. ഇത്തരം പരീക്ഷണങ്ങള് നടത്തുകയല്ലാതെ മറ്റ് രക്ഷകളൊന്നുമില്ല. മാറ്റം വരുത്താന് ആഗ്രഹിച്ചാലും ആരും മികവിലേക്ക് വരുന്നില്ലെങ്കില് എന്തു ചെയ്യും. താരങ്ങള് നന്നായി കളിക്കുന്നുണ്ടെങ്കില് കോമ്പിനേഷന് തുടരെ അഞ്ചോ ആറോ മത്സരങ്ങള് വരെ കൊണ്ടു പോകാം. ടീമിലെ നാലോ അഞ്ചോ താരങ്ങള് തുടരെ പരാജയപ്പെട്ടാല് മാറ്റം വരുത്താതെ മുന്നോട്ടു പോകാന് ടീമിനു സാധിക്കില്ല.’
‘ഡെവാള്ഡ് ബ്രെവിസ് നന്നായി ബാറ്റ് ചെയ്തു. മധ്യനിരയില് അത്തരമൊരു മാറ്റം ടീമിനു അനിവാര്യമായിരുന്നു. സ്പിന്നിനെ കളിക്കാന് ഞങ്ങള് ബുദ്ധിമുട്ടിയിരുന്നു. സ്പിന്നര്മാര്ക്കെതിരെ വേഗതയില് റണ്സടിച്ച് ആധിപത്യം സ്ഥാപിക്കുന്നതിന്റെ കുറവ് ടീമിനുണ്ടായിരുന്നു. കാര്യമായ റണ്സ് നേടേണ്ട ഘട്ടത്തില് അതു വരുന്നില്ല എന്നതാണ് ടീമിന്റെ പ്രശ്നം. എല്ലായ്പ്പോഴും 180-200 റണ്സ് അടിക്കാനൊന്നും സാധിക്കില്ല. പക്ഷേ സാഹചര്യം നോക്കി റണ്സടിക്കാന് സാധിക്കണം.’
‘പിച്ചിന് പ്രശ്നങ്ങളുണ്ടായിരുന്നില്ല. പിച്ച് ബാറ്റിങിനു അനുകൂലമായിരുന്നു. എന്നാല് ടീമിനു മികച്ച സ്കോര് നേടാനായില്ല.’
‘155 റണ്സ് ന്യായീകരിക്കാവുന്ന സ്കോറല്ല. കുറച്ചു റണ്സ് കൂടി ഞങ്ങള് നേടണമായിരുന്നു. ടീമിന്റെ ബൗളിങ് പ്രത്യേകിച്ച് സ്പിന്നര്മാര് മികച്ച രീതിയില് പന്തെറിഞ്ഞു. എന്നാല് അന്തിമ വിജയത്തിലേക്ക് ഞങ്ങള്ക്ക് 20 റണ്സിന്റെ കുറവെങ്കിലും വന്നു’- ധോനി വ്യക്തമാക്കി.
സിഎസ്കെയുടെ സമീപ കാലത്തെ ഏറ്റവും മോശം ഐപിഎല്ലാണിത്. ഏഴ് തോല്വികളില് നാലും സ്വന്തം തട്ടകമായി ചെപ്പോക്കില് തന്നെയാണ് അവര് വഴങ്ങിയത് എന്നതും ടീമിനു ക്ഷീണമായി.
ഡോവോണ് കോണ്വെ, രചിന് രവീന്ദ്ര, സാം കറന് തുടങ്ങിയ വിദേശ താരങ്ങളും രാഹുല് ത്രിപാഠി, ദീപക് ഹൂഡ, വിജയ് ശങ്കര് തുടങ്ങിയ ഇന്ത്യന് താരങ്ങളും വമ്പന് പരാജയമായി മാറി. മധ്യ ഓവറുകളില് ബാറ്റര്മാര്ക്കും സ്പിന്നിനെ ഫലപ്രദമായി നേരിടാന് സാധിക്കാത്തതും ടീമിന്റെ തിരിച്ചടിക്കു വേഗം കൂട്ടി.
by Midhun HP News | Apr 26, 2025 | Latest News, ദേശീയ വാർത്ത
വാഷിങ്ടൻ: ഇന്ത്യ- പാകിസ്ഥാൻ സംഘർഷത്തിൽ ഇടപെടില്ലെന്നു യുഎസ് പ്രസിഡന്റ് ഡോണൾഡ് ട്രംപ്. പഹൽഗാം ഭീകരാക്രമണത്തിന്റെ പശ്ചാത്തലത്തിൽ ഇരു രാജ്യങ്ങളും തമ്മിലുള്ള ബന്ധം കൂടുതൽ വഷളായ സാഹചര്യം നിലനിൽക്കെയാണ് ട്രംപ് നിലപാട് വ്യക്തമാക്കിയത്.
ഇരു രാജ്യങ്ങളും ചേർന്നു പ്രശ്നം പരിഹരിക്കും. ഇന്ത്യയും പാകിസ്ഥാനുമായി തനിക്ക് നല്ല ബന്ധമാണെന്നും ട്രംപ് പറഞ്ഞു. ‘ഇന്ത്യയുമായി എനിക്ക് അടുത്ത ബന്ധമുണ്ട്. പാകിസ്ഥാന്റേയും അടുത്ത ആളാണ് ഞാൻ. കശ്മീരിൽ വർഷങ്ങളായി ഇരു രാജ്യങ്ങളും പോരാടുന്നുണ്ട്. ആ അതിർത്തിയിൽ 1,500 വർഷമായി സംഘർഷം നിലനിൽക്കുന്നു. അവർ ഒരു വിധത്തിലല്ലെങ്കിൽ മറ്റൊരു വിധത്തിൽ അതു പരിഹരിക്കുമെന്നു എനിക്കുറപ്പുണ്ട്. രണ്ട് നേതാക്കളേയും എനിക്കറിയാം. ഇരു രാജ്യങ്ങളും തമ്മിൽ എക്കാലത്തും വലിയ സംഘർഷമുണ്ടായിട്ടുണ്ട്’- ട്രംപ് വ്യക്തമാക്കി.
ഭീകരാക്രമണത്തിനു പിന്നാലെ പ്രധാനമന്ത്രി നരേന്ദ്ര മോദിയെ ഫോണിൽ വിളിച്ച് ട്രംപ് ശക്തമായി അപലപിച്ചിരുന്നു. ഹീനമായ ആക്രമണം നടത്തിയ കുറ്റവാളികളെ നിയമത്തിനു മുന്നിൽ കൊണ്ടു വരുന്നതിൽ ഇന്ത്യക്കു പൂർണ പിന്തുണയും അദ്ദേഹം അറിയിച്ചിരുന്നു.
Recent Comments