ഇന്ന് രാത്രിയും പവര്‍ കട്ട് തുടരും; വൈദ്യുതി മുടങ്ങുന്നത് തുടര്‍ച്ചയായ പത്താം ദിവസം

by Midhun HP News | Sep 10, 2026 | Latest News, കേരളം

തിരുവനന്തപുരം: ഗുരുതര വൈദ്യുതി പ്രതിസന്ധി തുടരുന്നതിനാല്‍ സംസ്ഥാനത്ത് ഇന്ന് രാത്രിയിലും ഭാഗിക വൈദ്യുതി നിയന്ത്രണം തുടരുമെന്ന് കെഎസ്ഇബി. തുടര്‍ച്ചയായി പത്താം ദിവസമാണ് വൈദ്യുതി നിയന്ത്രണം ഏര്‍പ്പെടുത്തേണ്ടി വരുന്നത്. വൈകിട്ട് 6.30 മുതല്‍ പുലര്‍ച്ചെ ഒരു മണിവരെയുള്ള സമയത്താണ് നിയന്ത്രണം. ഒന്നിലേറെ തവണ പവര്‍ കട്ടുണ്ടാവുന്നത് തുടരാനാണ് സാധ്യത.

വൈദ്യുതി നിയന്ത്രിക്കുന്ന സമയം സംബന്ധിച്ച് മുന്‍കൂട്ടി അറിയിക്കുന്ന സംവിധാനം ഇന്ന് വൈകുന്നേരത്തോടെ ഏര്‍പ്പെടുത്തുമെന്നാണ് വൈദ്യുതി മന്ത്രി സണ്ണി ജോസഫ് അറിയിച്ചിട്ടുള്ളത്. ആവശ്യമായ വൈദ്യുതി ലഭിക്കാത്തതുകൊണ്ടാണു നിയന്ത്രണം വേണ്ടി വരുന്നതെന്നും അതു പരിഹരിക്കാനായി സര്‍ക്കാര്‍ എല്ലാ ശമങ്ങളും നടത്തുന്നുണ്ടെന്നും മന്ത്രി പറഞ്ഞു. ജനങ്ങളുടെ പ്രതിസന്ധി മനസ്സിലാക്കുന്നെന്നും സ്വിച്ചിട്ട പോലെ പരിഹരിക്കാന്‍ പറ്റാത്ത വിഷയമാണിതെന്നും ജനങ്ങള്‍ സഹകരിക്കണമെന്നുമായിരുന്നു മന്ത്രിയുടെ അഭ്യര്‍ഥന.

എല്‍ നിനോ പ്രതിഭാസത്തെ തുടര്‍ന്ന മഴ കുറയുകയും ചൂട് കൂടുകയുമാണ്. അതുകൊണ്ടു തന്നെ വൈദ്യുതി ഉല്‍പാദനം കുറയുകയും ഉപയോഗം ഗണ്യമായി കൂടുകയും ചെയ്തു. കഴിഞ്ഞ വര്‍ഷം സെപ്റ്റംബര്‍ മാസത്തില്‍ 3,794 മെഗാവാട്ടാണ് ഒരു ദിവസം വൈദ്യുതി ആവശ്യമായി വന്നത്. എന്നാല്‍ ഇന്നലെ 5200 മെഗാവാട്ടാണ് നമ്മുടെ ഉപയോഗം. നമ്മുടെ നല്‍കല്‍ ശേഷിയേക്കാള്‍ 900 മെഗാവാട്ടിന്റെ കുറവാണ് വന്നത്. അതുകൊണ്ടാണ് ഇപ്പോഴത്തെ പ്രതിസന്ധിയെന്നാണ് സര്‍ക്കാര്‍ പറയുന്നത്.

അതേസമയം, കനത്ത ചൂടിന് ആശ്വാസമായി സംസ്ഥാനത്ത് ഇന്നു മുതല്‍ വീണ്ടും മഴ ശക്തമാകുമെന്നാണ് കാലാവസ്ഥ വകുപ്പിന്റെ പ്രവചനം. ശക്തമായ മഴ കണക്കിലെടുത്ത് ആലപ്പുഴയിലും എറണാകുളത്തും യെല്ലോ അലര്‍ട് പ്രഖ്യാപിച്ചു. നാളെ പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലും ശനിയാഴ്ച പത്തനംതിട്ട, ഇടുക്കി, എറണാകുളം, പാലക്കാട് ജില്ലകളിലും മഴ മുന്നറിയിപ്പുണ്ട്. ഈ ജില്ലകളില്‍ പരക്കെ മഴലഭിക്കും. ഒറ്റപ്പെട്ട ശക്തമായ മഴക്കും സാധ്യതയുണ്ട്. ആന്ധ്ര ഒഡീഷ തീരത്തിന് സമീപം ബംഗാള്‍ ഉള്‍ക്കടലില്‍ ന്യൂനമര്‍ദം രൂപമെടുക്കാനിടയുണ്ട്. ഇതിന്റെ സ്വാധീനത്തില്‍ കേരളത്തില്‍ കൂടുതല്‍ മഴ ലഭിച്ചേക്കുമെന്നാണ് കേന്ദ്രകാലാവസ്ഥ വകുപ്പിന്റെ പ്രവചനം

ലഹരി ഉപയോഗിച്ച് വീട്ടിൽ നിരന്തരം പ്രശ്നം; അച്ഛൻ മകനെ തലയ്ക്കടിച്ചു കൊന്നു

by Midhun HP News | Sep 9, 2026 | Latest News, കേരളം

ഇടുക്കി: ലഹരി ഉപയോഗിച്ച് വീട്ടിൽ നിരന്തരം പ്രശ്നങ്ങളുണ്ടാക്കിയിരുന്ന മകനെ പിതാവ് കമ്പിവടികൊണ്ട് തലയ്ക്കടിച്ചു കൊലപ്പെടുത്തി. ഇടുക്കി ആനക്കുളം സ്വദേശി ജസ്റ്റിൻ ജോയി (30) ആണ് കൊല്ലപ്പെട്ടത്. സംഭവത്തിന് ശേഷം വിഷം കഴിച്ച് അവശനിലയിലായ പിതാവ് ജോയിയെ അടിമാലി താലൂക്ക് ആശുപത്രിയിൽ പ്രവേശിപ്പിച്ചു. ഇന്ന് രാവിലെയോടെയായിരുന്നു നാടിനെ നടുക്കിയ സംഭവം.

കൊല്ലപ്പെട്ട ജസ്റ്റിൻ ജോയി സ്ഥിരമായി ലഹരി ഉപയോഗിച്ച് വീട്ടിലെത്തി മാതാപിതാക്കളുമായി വഴക്കിടാറുണ്ടായിരുന്നതായി പൊലീസ് അറിയിച്ചു. ഇന്ന് രാവിലെയും വീട്ടിൽ സമാനമായ രീതിയിൽ രൂക്ഷമായ തർക്കമുണ്ടായി. തർക്കത്തിനിടെ കോപാകുലനായ ജോയി കമ്പിവടിയെടുത്ത് ജസ്റ്റിന്റെ തലയ്ക്കടിക്കുകയായിരുന്നു. ഗുരുതരമായി പരിക്കേറ്റ ജസ്റ്റിൻ സംഭവസ്ഥലത്തുവച്ചുതന്നെ മരിച്ചു.

കൊലപാതകം നടക്കുന്ന സമയത്ത് ജസ്റ്റിന്റെ അമ്മയും വീട്ടിലുണ്ടായിരുന്നു. തുടർന്ന് മാതാപിതാക്കൾ തന്നെ വിവരമറിയിച്ചതിനെ തുടർന്ന് മാങ്കുളം എയ്ഡ് പോസ്റ്റിൽ നിന്നുള്ള പൊലീസ് സംഘമാണ് ആദ്യം സ്ഥലത്തെത്തിയത്.

പൊലീസെത്തുമ്പോൾ അവശനിലയിലായിരുന്ന ജോയി താൻ വിഷം കഴിച്ചതായി വെളിപ്പെടുത്തുകയായിരുന്നു. തുടർന്ന് പൊലീസ് ഉടൻതന്നെ ഇയാളെ ആശുപത്രിയിലേക്ക് മാറ്റി. സംഭവത്തിൽ മൂന്നാർ പൊലീസ് കേസെടുത്ത് വിശദമായ അന്വേഷണം ആരംഭിച്ചിട്ടുണ്ട്.

പ്രതിപക്ഷ നേതാവ് പിണറായി വിജയനെതിരെ കേസെടുക്കാമെന്ന ഇഡി ശുപാർശക്കെതിരെ സിപിഎം പോളിറ്റ് ബ്യൂറോ

by Midhun HP News | Sep 9, 2026 | Latest News, കേരളം

ഡൽഹി: പ്രതിപക്ഷ നേതാവ് പിണറായി വിജയനെതിരെ കേസെടുക്കാമെന്ന എൻഫോഴ്സ്മെൻ്റ് ഡയറക്ടറേറ്റ് ശുപാർശക്കെതിരെ സിപിഎം പോളിറ്റ് ബ്യൂറോ. സതീശൻ സർക്കാർ ഇഡി ഏജൻ്റാകരുതെന്നും പിണറായിക്കെതിരായ ഇഡിയുടെ നടപടി രാഷ്ട്രീയ വേട്ടയാടലാണെന്നും ആരോപിച്ച പിബി കേസെടുക്കരുതെന്ന് കേരള സർക്കാരിന് മുന്നറിയിപ്പും നൽകി. കേസെടുത്താൽ എല്ലാ ശക്തിയുമുപയോ​ഗിച്ച് പാർട്ടി ചെറുക്കുമെന്നും നിയമപരമായും രാഷ്ട്രീയപരമായും നേരിടുമെന്നും പിബി പുറത്തിറക്കിയ പ്രസ്താവനയിൽ പറയുന്നു.