by Midhun HP News | Nov 5, 2026 | Latest News, ജില്ലാ വാർത്ത
കിളിമാനൂർ പാപ്പാല ജംഗ്ഷനിൽ ബൈക്കും പിക്കപ്പ് വാനും കൂട്ടിയിടിച്ച് ബൈക്ക് യാത്രികന് ഗുരുതരമായി പരിക്കേറ്റു ആറ്റിങ്ങൽ പൂവൻ പാറ സ്വദേശി 40 വയസ്സുള്ള ഷംനാദ് 40 നാണ് പരിക്കേറ്റത്. കഴിഞ്ഞ ദിവസം വൈകുന്നേരം അഞ്ചരയോടെയായിരുന്നു അപകടം. നിലമേൽ ഭാഗത്തുനിന്ന് കിളിമാനൂർ ഭാഗത്തേക്ക് എത്തിയ പിക്കപ്പ് വാനും എതിർ ദിശയിൽ നിന്ന് വന്ന ബൈക്കുമാണ് കൂട്ടിയിടിച്ചത്. അപകടത്തിൽ ഗുരുതരമായി പരിക്കേറ്റ ഷംനാദിനെ ഉടൻ വെഞ്ഞാറമൂട്ടിൽ സ്വകാര്യ ആശുപത്രിയിൽ പ്രവേശിപ്പിച്ചു.
by Midhun HP News | Nov 5, 2026 | Latest News, കേരളം
കൊച്ചി: ചേരാനെല്ലൂര്‍ വാഹനാപകട കേസില്‍ ജഡ്ജി തെളിവുനശിപ്പിച്ചെന്ന ആരോപണത്തില്‍ മരിച്ച ജയബാലകൃഷ്ണന്റെ മകള്‍ ഭദ്രകീര്‍ത്തി ക്രൈംബ്രാഞ്ചിന് മൊഴി നല്‍കി. സിസിടിവി ദൃശ്യങ്ങള്‍ അടക്കം കൈമാറിയെന്നും അന്വേഷണത്തില്‍ പ്രതീക്ഷയുണ്ടെന്നും ഭദ്രകീര്‍ത്തി പറഞ്ഞു.
പതിനേഴുകാരന്‍ ഓടിച്ച് വാഹനമിടിച്ച് അപകടമുണ്ടായ ശേഷം പിതാവായ അഡീഷണല്‍ ജില്ലാ ജഡ്ജി സ്ഥലത്തെത്തി ഏറെ നേരം ചെലവഴിച്ചെന്ന് ആരോപണം ഉണ്ടായിരുന്നു. തെളിവുനശിപ്പിക്കാന്‍ ശ്രമം നടത്തിയെന്ന പരാതി പിന്നീടാണ് ഉയര്‍ന്നത്. ഇതോടെ കേസില്‍ ബിഎന്‍എസ് 238ാം വകുപ്പ് അന്വേഷേണ സംഘം ചേര്‍ത്തിരുന്നു. കേസിലുള്‍പ്പെട്ട 17കാരന്റെ ജാമ്യം റദ്ദാക്കണമെന്ന പ്രോസിക്യൂഷന്‍ ആവശ്യത്തില്‍ ഇന്ന് കോടതി വിധി പറയും. പതിനേഴുകാരനെ ഒബ്‌സര്‍വേഷനില്‍ വിടണമെന്നതാണ് പൊലീസ് ആവശ്യം. എറണാകുളം അഡീഷണല്‍ സെഷന്‍കോടതിയാണ് ഹര്‍ജി പരിഗണിക്കുന്നത്. അതേസമയം, ജഡ്ജി നല്‍കിയ മുന്‍കൂര്‍ ജാമ്യാപേക്ഷ ഹൈക്കോടതി ഇന്ന് വീണ്ടും പരിഗണിക്കും.
17കാരന്റെ ചിത്രങ്ങള്‍ സാമൂഹിക മാധ്യമങ്ങളില്‍ പ്രചരിപ്പിച്ച സംഭവത്തില്‍ 28 കേസുകള്‍ രജിസ്റ്റര്‍ ചെയ്തിരുന്നു. സൈബര്‍ പൊലീസ് സാമൂഹിക മാധ്യമ പ്ലാറ്റ്‌ഫോമുകളോട് ഈ ലിങ്കുകളുമായി ബന്ധപ്പെട്ട വിവരങ്ങള്‍ തേടിയിട്ടുണ്ട്.അത് ലഭിച്ചാല്‍ നോട്ടീസ് അയക്കുന്നതുള്‍പ്പടെയുള്ള തുടര്‍നടപടികള്‍ സ്വീകരിക്കും.
by Midhun HP News | Nov 4, 2026 | Latest News, ദേശീയ വാർത്ത
ബംഗളൂരു: കര്‍ണാടകയിലെ ബംഗളൂരുവില്‍ മലയാളി യുവാവിനെ അടിച്ചു കൊലപ്പെടുത്തി. പാലക്കാട് തിരുവേഗപ്പുറ സ്വദേശി കിരണ്‍ (22) ആണ് മരിച്ചത്. പെണ്‍സുഹൃത്തിന്റെ അച്ഛനാണ് കൊലപാതകം നടത്തിയതെന്ന് പൊലീസ് വ്യക്തമാക്കി.
ബംഗളൂരു യെലഹങ്കയിലാണ് സംഭവം. ഇന്നലെ രാത്രിയാണ് കൊലപാതകം നടന്നത്. സംഭവത്തില്‍ കിരണിന്റെ തൊഴിലുടമ കൂടിയായ ആനന്ദ് അറസ്റ്റിലായി. കിരണ്‍ കഴിഞ്ഞ രണ്ടു വര്‍ഷമായി ആനന്ദിന്റെ കമ്പനിയിലെ ജോലിക്കാരനാണ്.
ആനന്ദിന്റെ 19 കാരിയായ മകളുമായി കിരണ്‍ അടുപ്പത്തിലായിരുന്നു. മൈസൂരില്‍ പഠിക്കുന്ന കുട്ടി തുടര്‍ച്ചയായ അവധിയെത്തുടര്‍ന്ന് വീട്ടിലെത്തിയിരുന്നു. തമിഴ്‌നാട് സ്വദേശിയായ ആനന്ദും ഭാര്യയും സ്വദേശത്തേക്ക് പോകുന്നുവെന്ന് പറഞ്ഞ് പോയി. ഇതിനു പിന്നാലെ കിരണ്‍ വീട്ടിലെത്തി.എന്നാല്‍ അപ്രതീക്ഷിതമായി വീട്ടിലെത്തിയ ആനന്ദ് കിരണിനെ പെണ്‍കുട്ടിക്കൊപ്പം കണ്ടതോടെ പ്രകോപിതനായി. മകളെ ചിക്കബെല്ലാപുരയിലെ ബന്ധുവീട്ടിലേക്ക് മാറ്റിയ ശേഷം ബാറ്റുകൊണ്ടും പൈപ്പ് കൊണ്ടും കിരണിനെ ക്രൂരമായി മര്‍ദ്ദിച്ചു. മര്‍ദനത്തെ തുടര്‍ന്ന് കുഴഞ്ഞുവീണ കിരണിനെ ആശുപത്രിയില്‍ എത്തിച്ചെങ്കിലും മരിച്ചിരുന്നു.
by Midhun HP News | Nov 4, 2026 | Latest News, ദേശീയ വാർത്ത
ഡല്‍ഹി: ദേശീയ മെഡിക്കല്‍ പ്രവേശന പരീക്ഷയായ നീറ്റ്-പിജി, നീറ്റ്-സൂപ്പര്‍ സ്‌പെഷ്യാലിറ്റി കൗണ്‍സിലിങ് നടപടികളില്‍ വലിയ മാറ്റത്തിനൊരുങ്ങി നാഷണല്‍ മെഡിക്കല്‍ കമ്മീഷന്‍ (എന്‍എംസി). നിലവിലുള്ള പെര്‍സന്റൈല്‍ സമ്പ്രദായം ഒഴിവാക്കി പകരം റാങ്ക് അടിസ്ഥാനമാക്കിയുള്ള സംവിധാനം നടപ്പിലാക്കുന്നതിന് കമ്മീഷന്‍ തത്വത്തില്‍ അനുമതി നല്‍കി. നീറ്റ്-പിജി പ്രവേശനവും കൗണ്‍സിലിങ് പ്രക്രിയയും അവലോകനം ചെയ്യാന്‍ സുപ്രീംകോടതി നിയോഗിച്ച 12 അംഗ വിദഗ്ധ സമിതിയാണ് ഇതുസംബന്ധിച്ച റിപ്പോര്‍ട്ട് ചൊവ്വാഴ്ച കോടതിയില്‍ സമര്‍പ്പിച്ചത്. പുതിയ ചട്ടപ്രകാരം പരീക്ഷാഫലത്തില്‍ പെര്‍സന്റൈല്‍ മാര്‍ക്കുകള്‍ ഒഴിവാക്കി ഉദ്യോഗാര്‍ഥികളുടെ റാങ്ക് മാത്രമായിരിക്കും പ്രസിദ്ധീകരിക്കുക.
കഴിഞ്ഞ സെപ്റ്റംബര്‍ 23ന് ചേര്‍ന്ന എന്‍എംസി യോഗത്തിലാണ് നിര്‍ദേശത്തിന് തത്വത്തില്‍ അംഗീകാരം ലഭിച്ചത്. ഇതുസംബന്ധിച്ച അന്തിമ ചട്ടങ്ങള്‍ കമ്മീഷന്‍ ഉടന്‍ രൂപീകരിക്കും. നീറ്റ്-പിജി 2025 പരീക്ഷയുടെ യോഗ്യതാ കട്ടോഫ് പെര്‍സന്റൈല്‍ കേന്ദ്ര സര്‍ക്കാര്‍ വന്‍തോതില്‍ വെട്ടിക്കുറച്ചതിനെതിരെയുള്ള ഹര്‍ജികള്‍ സുപ്രീം കോടതി പരിഗണിച്ചുവരികയാണ്. ജനറല്‍ വിഭാഗത്തിന്റെ യോഗ്യതാ സ്‌കോര്‍ 276ല്‍ നിന്ന് 103 ആയും എസ് സി/എസ്ടി/ഒബിസി വിഭാഗങ്ങളുടെ സ്‌കോര്‍ 235ല്‍ നിന്ന് മൈനസ് 40 ആയും കുറച്ചിരുന്നു. ഈ പശ്ചാത്തലത്തിലാണ് സമിതിയുടെ റിപ്പോര്‍ട്ട്.
നീറ്റ് പരീക്ഷകളുടെ പവിത്രത കാത്തുസൂക്ഷിക്കണമെന്നും വളരെ മോശമായതോ നെഗറ്റീവ് മാര്‍ക്ക് നേടിയതോ ആയ ഉദ്യോഗാര്‍ഥികള്‍ക്ക് പ്രവേശനം ലഭിക്കുന്ന രീതിയില്‍ യോഗ്യതാ മാനദണ്ഡങ്ങള്‍ അമിതമായി ഇളവ് ചെയ്യരുതെന്നും റിപ്പോര്‍ട്ടില്‍ ആവശ്യപ്പെടുന്നു. മത്സരപ്പരീക്ഷകളുടെ പ്രാധാന്യം ഭരണപരമായ ഔചാരികത മാത്രമായി ചുരുങ്ങരുത്. ക്ലിനിക്കല്‍, നോണ്‍-ക്ലിനിക്കല്‍ വിഭാഗങ്ങളില്‍ ജോലി ചെയ്യുന്ന റെസിഡന്റ് ഡോക്ടര്‍മാര്‍ തമ്മില്‍ ശമ്പളത്തില്‍ വിവേചനം ഉണ്ടാകരുത്. ഗ്രാമീണ മേഖലകളില്‍ സേവനം അനുഷ്ഠിക്കുന്ന ഡോക്ടര്‍മാര്‍ക്ക് പ്രത്യേക പ്രോത്സാഹനങ്ങള്‍ നല്‍കണമെന്നും കമ്മീഷന്‍ ശുപാര്‍ശ ചെയ്യുന്നു. 2027 മുതല്‍ പുതിയ സംവിധാനം നടപ്പിലാക്കാനാണ് നിര്‍ദേശം. എന്നാല്‍ ചട്ടങ്ങള്‍ ഇതുവരെ അന്തിമമായിട്ടില്ല.
by Midhun HP News | Nov 4, 2026 | Latest News, കേരളം
കൊച്ചി: കൊച്ചിയിൽ സ്വകാര്യ ബസുകളുടെ മരണപ്പാച്ചിലിൽ വീണ്ടും ജീവൻ പൊലിഞ്ഞു. കാക്കനാട് – ഇടച്ചിറ റോഡിൽ ഐഎംജി ജങ്ഷനിൽ അമിതവേഗതയിൽ എത്തിയ സ്വകാര്യ ബസ് ഇടിച്ച് കാൽനടയാത്രക്കാരിയായ യുവതിക്ക് ദാരുണാന്ത്യം. തൃശൂർ സ്വദേശിയായ അക്ഷരയ്ക്കാണ് ജീവൻ നഷ്ടമായത്. ഇൻഫോപാർക്കിലെ ജീവനക്കാരിയായിരുന്നു മരിച്ച അക്ഷര.
രാവിലെ എട്ടുമണിയോടെ ജിമ്മിൽ നിന്ന് മടങ്ങുകയായിരുന്ന യുവതിയെ അമിതവേഗതയിൽ എത്തിയ ‘മലയിൽ’ എന്ന സ്വകാര്യ ബസ് ഇടിക്കുകയായിരുന്നു. ഗുരുതരമായി പരിക്കേറ്റ യുവതിയെ ഉടൻ തന്നെ ആശുപത്രിയിൽ എത്തിച്ചെങ്കിലും ഉച്ചയോടെ ജീവൻ രക്ഷിക്കാനായില്ല. ബസ് അമിത വേഗതയിലായിരുന്നു എന്നാണ് പൊലീസിൽ നിന്ന് ലഭിക്കുന്ന പ്രാഥമിക വിവരം. സംഭവത്തിൽ മനപ്പൂർവമുള്ള നരഹത്യാ കുറ്റം ചുമത്തി ബസ് ഡ്രൈവർ ബിനോയിയെ പൊലീസ് അറസ്റ്റ് ചെയ്തു. കൊച്ചിയിൽ സ്വകാര്യ ബസുകളുടെ മരണപ്പാച്ചിലിനെതിരെയും അശ്രദ്ധമായ ഡ്രൈവിംഗിനെതിരെയും വ്യാപകമായ പരാതികൾ ഉയരുന്നതിനിടയാണ് ഈ ദാരുണ സംഭവം ഉണ്ടായിരിക്കുന്നത്.
Recent Comments