by Midhun HP News | Nov 4, 2026 | Latest News, ജില്ലാ വാർത്ത
തിരുവനന്തപുരം: തിരുവനന്തപുരം ജില്ലയിൽ ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. അടുത്ത മൂന്നു മണിക്കൂറിൽ ജില്ലയിൽ ഓറഞ്ച് അലർട്ട് പ്രഖ്യാപിച്ചു.
ഇടിമിന്നലോട് കൂടിയ മഴയ്ക്കും മണിക്കൂറിൽ 40-50 കിലോമീറ്റർ വരെ വേഗതയിൽ ശക്തമായ കാറ്റിനുമുള്ള സാധ്യതയാണ് കേന്ദ്ര കാലാവസ്ഥ വകുപ്പ് പുറപ്പെടുവിച്ചിരിക്കുന്നത്. ആന്ധ്ര തീരത്ത് തീവ്ര ന്യൂനമർദ്ദം സ്ഥിതി ചെയ്യുന്നതിനാൽ ഞായറാഴ്ച വരെ മഴ തുടരും.
ലക്ഷദ്വീപിന് മുകളിലും, തെക്കൻ തമിഴ്നാട്ടിന് മുകളിലുമായി ചക്രവാത ചുഴികളും നിലനിൽക്കുന്നതും മഴ സ്വാധീനിക്കും. ബുധനാഴ്ച കോട്ടയം, ഇടുക്കി, വയനാട് ജില്ലകളിൽ യെലോ അലേര്‍ട്ട് പ്രഖ്യാപിച്ചിട്ടുണ്ട്. വ്യാഴാഴ്ച പത്തനംതിട്ട ജില്ലയിലും യെലോ അലര്‍ട്ടാണ്.
by Midhun HP News | Nov 4, 2026 | Latest News, ജില്ലാ വാർത്ത
ആറ്റിങ്ങൽ വിദ്യാഭ്യാസ ഉപജില്ലാ സ്കൂൾ കലോത്സവം 2026 നവംബർ
9 മുതൽ 13 വരെ ഡയറ്റ്, ഠൗൺ യു.പി.എസ്, ഗവ.ഗേൾസ് എച്ച്.എസ്.എസ് എന്നീ സ്കൂളുകളിൽ വച്ച് നടക്കുന്നു. ഈ കലാതസവത്തിന്റെ ലോഗോപ്രകാശനം
ആറ്റിങ്ങൽ നഗരസഭ ചെയർമാൻ എം. പ്രദീപ് നിർവ്വഹിച്ചു.
ഉപജില്ലയിലെ സ്കൂളുകളിലെ കുട്ടികൾ വരച്ച നാല്പതിലോളം ലോഗോയിൽ നിന്നാണ്
ഇത് തെരെഞ്ഞെടുത്തത്. ചിറയിൻകീഴ് ശാരദാവിലാസം ഗേൾസ്ഹയർഹയർസെക്കൻററി സ്കൂളിലെ പത്താം ക്ലാസ്സ് വിദ്യാർത്ഥി അഥീനയാണ്
ലോഗോ വരച്ചത്. ലോഗോ പ്രകാശന ചടങ്ങിൽ ഡയറ്റ് പി.ടി.എ പ്രസിഡന്റ അഡ്വ.ശ്രീകുമാർ, ആറ്റിങ്ങൽ എ.ഇ. ഒ ലത.ജി.എസ്, സ്റ്റാന്റിംഗ്
കമ്മറ്റിഅംഗങ്ങളായ അഡ്വ .സുരേഷ്, ബിനു, അദ്ധ്യാപക സംഘടനാ
നേതാക്കളായ ദിനേഷ്കുമാർ.കെ, എൻ.സാബു, സജ്ഞീവ്ഗിരിലാൽ, ഹൻസീർ, അക്ബർഷാ, അരുൺ, ഡയറ്റ് പ്രിൻസിപ്പൽ ഗീതാനായർ, ഫോറംസെക്രട്ടറി അജികുമാർ എന്നിവർ സന്നിഹിതരായിരുന്നു.
by Midhun HP News | Nov 4, 2026 | Latest News, കായികം, ജില്ലാ വാർത്ത
ഓക്‌ലന്‍ഡ്: ന്യൂസിലന്‍ഡിനെതിരായ ഏകദിന പരമ്പരിയിലെ ആദ്യ മത്സരത്തില്‍ ഇന്ത്യക്ക് 5 വിക്കറ്റിന്റെ ജയം. ഏകദിന കരിയറിലെ 80-ാം അര്‍ധ ശതകം സ്വന്തമാക്കിയ വിരാട് കോഹ്‌ലിയാണ് ഇന്ത്യയുടെ ചേസിങ് എളുപ്പമാക്കിയത്. മഴ മൂലം ഇന്ത്യയുടെ ഇന്നിങ്‌സ് 32 ഓവറായും വിജയലക്ഷ്യം 143 റണ്‍സായും പുനര്‍നിശ്ചയിച്ചിരുന്നു. 56 പന്തുകള്‍ ബാക്കിനില്‍ക്കെ ഇന്ത്യ ജയം പിടിച്ചു. സ്‌കോര്‍: ന്യൂസിലന്‍ഡ് – 40.2 ഓവറില്‍ 185ന് പുറത്ത്, ഇന്ത്യ – 22.4 ഓവറില്‍ അഞ്ചിന് 143. ജയത്തോടെ അഞ്ച് മത്സര പരമ്പരയില്‍ 1-0ന് മുന്നിലെത്താനും ഇന്ത്യക്കായി. ശനിയാഴ്ച വെല്ലിങ്ടനിലാണ് രണ്ടാം മത്സരം.
മറുപടി ബാറ്റിങ്ങിനിറങ്ങിയ ഇന്ത്യക്ക് ആദ്യ ഓവറില്‍ തന്നെ ഹിറ്റ്മാൻ രോഹിത് ശര്‍മയുടെ വിക്കറ്റ് നഷ്ടമായി. കൈല്‍ ജാമിസന്റെ പന്തില്‍ മിച്ചല്‍ സാന്റ്‌നര്‍ പിടിച്ച് പുറത്തായ രോഹിത്തിന് അക്കൗണ്ട് തുറക്കാനായില്ല. എന്നാല്‍ രണ്ടാം വിക്കറ്റിലൊന്നിച്ച ഗില്‍-കോഹ്‌ലി സഖ്യം ഇന്ത്യയെ മുന്നോട്ടു നയിച്ചു. ഇടയ്ക്ക് മഴ രസംകൊല്ലിയായെങ്കിലും ഇരുവരും ചേര്‍ന്ന് സെഞ്ച്വറി പാര്‍ട്‌നര്‍ഷിപ്പൊരുക്കി. അക്രമണോത്സുക ബാറ്റിങ് പുറത്തെടുത്ത കോഹ്‌ലി, 35 പന്തില്‍ അര്‍ധ ശതകം പൂര്‍ത്തിയാക്കി. ഇതിനിടെ മൂന്നാം നമ്പരില്‍ കളിച്ച് 13,000 റണ്‍സ് പൂര്‍ത്തിയാക്കുന്ന ആദ്യ താരമെന്ന നാഴിക്കല്ലും താണ്ടി.
സ്‌കോര്‍ 114ല്‍ നില്‍ക്കേ ഗില്ലിനെ പുറത്താക്കി നഥാന്‍ സ്മിത്ത് പാര്‍ട്‌നര്‍ഷിപ്പ് തകര്‍ത്തു. 56 പന്തില്‍ 37 റണ്‍സാണ് ഇന്ത്യന്‍ ക്യാപ്റ്റന്‍ അടിച്ചെടുത്തത്. അഞ്ച് ഫോറുള്‍പ്പെടുന്നതാണ് ഇന്നിങ്‌സ്. ഏറെ വൈകാതെ കോഹ്‌ലിയും പുറത്തായി. 51 പന്തില്‍ 13 ഫോറും ഒരു സിക്‌സും സഹിതം 74 റണ്‍സ് നേടിയ കോഹ്‌ലിയെ ജേക്കബ് ഡഫിയാണ് പുറത്താക്കിയത്. പിന്നാലെയെത്തിയ അക്ഷര്‍ പട്ടേല്‍ സംപൂജ്യനായി മടങ്ങിയതോടെ സ്‌കോര്‍ നാലിന് 124.
ഫലത്തില്‍ 10 റണ്‍സിന്റെ ഇടവേളയില്‍ മൂന്നു വിക്കറ്റുകള്‍ ഇന്ത്യക്ക് നഷ്ടമായി. തന്റെ തൊട്ടടുത്ത ഓവറില്‍ ശ്രേയസ് അയ്യരം കൂടി പുറത്താക്കിയ ജേക്കബ് ഡഫി, വിക്കറ്റ് നേട്ടം മൂന്നാക്കി ഉയര്‍ത്തി. 13 പന്തില്‍ 15 റണ്‍സാണ് ശ്രേയസിന്റെ സമ്പാദ്യം. കെഎല്‍ രാഹുലും (3*) നമന്‍ ധീറും (5*) ചേര്‍ന്ന് ഇന്ത്യയെ വിജയ വിജയതീരമണച്ചു.
മത്സരത്തില്‍ ടോസ് നേടിയ ഇന്ത്യ ബൗളിങ് തെരഞ്ഞെടുക്കുകയായിരുന്നു. 38 റണ്‍സ് നേടിയ ഓപ്പണര്‍ ടിം സെയ്ഫെര്‍ടാണ് ആദ്യം ബാറ്റ് ചെയ്ത ന്യൂസിലന്‍ഡിന്റെ ടോപ് സ്‌കോറര്‍. അവസാന ഓവറുകളില്‍ തകര്‍ത്തടിച്ച ബ്ലയര്‍ ടിക്ക്നറുടെ (34) പ്രകടനവും അവര്‍ക്ക് നിര്‍ണായകമായി. ഇന്ത്യക്കായി അര്‍ഷ്ദീപ് സിങ് നാലും ഗുര്‍നൂര്‍ ബ്രാര്‍ മൂന്നും വിക്കറ്റുകള്‍ നേടി. സീനിയര്‍ താരങ്ങളായ രോഹിതും വിരാടും ഫീല്‍ഡിങ്ങില്‍ പുറത്തെടുത്ത മികവും ശ്രദ്ധേയമായി.
by Midhun HP News | Nov 4, 2026 | Latest News, ജില്ലാ വാർത്ത
തിരുവനന്തപുരം: സംസ്ഥാന വനം വകുപ്പിന്റെ അംബാസഡര്‍മാരായി ചലച്ചിത്ര താരങ്ങളായ പൃഥ്വിരാജ് സുകുമാരനെയും കുഞ്ചാക്കോ ബോബനേയും നിയമിച്ചു. ഇതുസംബന്ധിച്ച ഉത്തരവ് പുറത്തിറങ്ങി.
വന സംരക്ഷണം, വന്യജീവി പരിപാലനം, പരിസ്ഥിതി സന്തുലിതാവസ്ഥ, ജൈവവൈവിധ്യ സംരക്ഷണം എന്നിവയെക്കുറിച്ച് പൊതുജനങ്ങളില്‍ അവബോധം വളര്‍ത്തുകയാണ് പ്രധാന ലക്ഷ്യം.
വനം വകുപ്പിന്റെ വിവിധ പദ്ധതികളും പൊതുജനസേവനങ്ങളും കൂടുതല്‍ ആളുകളിലേക്ക് എത്തിക്കുന്നതിനായി ബോധവല്‍ക്കരണ പരിപാടികള്‍, റെക്കോര്‍ഡ് ചെയ്ത സന്ദേശങ്ങള്‍, ഡിജിറ്റല്‍ പ്രചാരണങ്ങള്‍ എന്നിവയിലെല്ലാം ഇരുവരും പങ്കാളികളാകും. വനം വകുപ്പ് മേധാവിയുടെ നിര്‍ദേശത്തെത്തുടര്‍ന്ന് സ്വകാര്യ സേവന അടിസ്ഥാനത്തിലാണ് ഇരുവരെയും അംബാസഡര്‍മാരായി നിയമിച്ചിരിക്കുന്നത്.
by Midhun HP News | Nov 4, 2026 | Latest News, ദേശീയ വാർത്ത
ഡല്‍ഹി: ഹ്രസ്വകാലയളവിലേക്ക് യുവാക്കളെ സായുധ സേവനത്തിന് നിയോഗിക്കുന്ന അഗ്നിപഥ് പദ്ധതിയില്‍ നിര്‍ണായക മാറ്റവുമായി കേന്ദ്രസര്‍ക്കാര്‍. പദ്ധതിയില്‍ അഗ്നിവീറായി നിയമിക്കപ്പെട്ട 25 ശതമാനം പേരെ സേനയില്‍ സ്ഥിരപ്പെടുത്തി. ശേഷിക്കുന്ന 75 ശതമാനം അഗ്നിവീറുകളുടെ കാലാവധി രണ്ടു വര്‍ഷം കൂടി ദീര്‍ഘിപ്പിക്കാന്‍ കേന്ദ്രസര്‍ക്കാര്‍ തീരുമാനിച്ചതായി സംയുക്ത സേനാ മേധാവി എന്‍ എസ് രാജാസുബ്രഹ്മണി അറിയിച്ചു.
ഈ അധിക കാലാവധിക്ക് ശേഷം, താല്‍പ്പര്യമുള്ളവര്‍ക്ക് നിശ്ചിത മാനദണ്ഡങ്ങളുടെ അടിസ്ഥാനത്തില്‍ സായുധ സേനയില്‍ സ്ഥിരമായി ചേരാവുന്നതാണെന്നും സംയുക്ത സേനാ മേധാവി പറഞ്ഞു. ‘ഇന്ത്യന്‍ പ്രതിരോധ സേനയ്ക്കും നമ്മുടെ അഗ്‌നിവീര്‍മാര്‍ക്കും സുപ്രധാന ദിവസമാണ്. എല്ലാ അഗ്‌നിവീര്‍ സൈനികര്‍ക്കും ഇന്ത്യന്‍ സായുധ സേനയുടെ ഭാഗമാകാന്‍ കഴിയുന്ന ഒരു സുപ്രധാന സാധ്യതയാണ് കേന്ദ്രമന്ത്രിസഭ ഒരുക്കിയിരിക്കുന്നത്.’ രാജാസുബ്രഹ്മണി പറഞ്ഞു.
നാലു വര്‍ഷത്തെ സേവന കാലാവധി പൂര്‍ത്തിയാക്കി ആദ്യ ബാച്ചിലെ പതിനെട്ടായിരത്തിലധികം അഗ്‌നിവീര്‍ സൈനികര്‍ ഡിസംബര്‍ 31-ഓടെ സേവനത്തില്‍ നിന്ന് വിരമിക്കാന്‍ ഒരുങ്ങുന്നതിനിടെയാണ് കേന്ദ്രത്തിന്റെ നിര്‍ണായക തീരുമാനം. 2022 ജൂണ്‍ 14-നാണ് ‘അഗ്നിപഥ്’ പദ്ധതിക്ക് തുടക്കം കുറിച്ചത്. നാല് വര്‍ഷത്തെ അഗ്‌നിവീര്‍കളുടെ പ്രകടനം തുടര്‍ച്ചയായി വിലയിരുത്തിയിരുന്നു. വളരെ നല്ല പ്രതികരണമാണ് ലഭിച്ചതെന്നും സംയുക്ത സേനാ മേധാവി പറഞ്ഞു.
പുതിയ തീരുമാനം അനുസരിച്ച് 25 ശതമാനം പേര്‍ സേനയുടെ ഭാഗമായി സ്ഥിരമാകുന്നു. ശേഷിക്കുന്ന 75 ശതമാനം പേര്‍ക്ക് സേവനത്തില്‍ തുടരാന്‍ രണ്ട് വര്‍ഷം കൂടി അധികമായി ലഭിക്കും. അതിനുശേഷം, സ്ഥിരം സായുധ സേനയില്‍ ചേരാനുള്ള മറ്റൊരു അവസരം കൂടി അവര്‍ക്ക് ലഭിക്കും. ഈ അധിക കാലയളവിന് ശേഷം ഇവരെ സ്ഥിരപ്പെടുത്തുന്നത് അടക്കമുള്ള പ്രക്രിയ വസ്തുനിഷ്ഠമായ മാനദണ്ഡങ്ങളെ അടിസ്ഥാനമാക്കി ആയിരിക്കുമെന്ന് സംയുക്ത സേനാ മേധാവി എന്‍ എസ് രാജാസുബ്രഹ്മണി വ്യക്തമാക്കി.
Recent Comments