by Midhun HP News | Nov 4, 2026 | Latest News, ദേശീയ വാർത്ത
ഡല്‍ഹി: ഹ്രസ്വകാലയളവിലേക്ക് യുവാക്കളെ സായുധ സേവനത്തിന് നിയോഗിക്കുന്ന അഗ്നിപഥ് പദ്ധതിയില്‍ നിര്‍ണായക മാറ്റവുമായി കേന്ദ്രസര്‍ക്കാര്‍. പദ്ധതിയില്‍ അഗ്നിവീറായി നിയമിക്കപ്പെട്ട 25 ശതമാനം പേരെ സേനയില്‍ സ്ഥിരപ്പെടുത്തി. ശേഷിക്കുന്ന 75 ശതമാനം അഗ്നിവീറുകളുടെ കാലാവധി രണ്ടു വര്‍ഷം കൂടി ദീര്‍ഘിപ്പിക്കാന്‍ കേന്ദ്രസര്‍ക്കാര്‍ തീരുമാനിച്ചതായി സംയുക്ത സേനാ മേധാവി എന്‍ എസ് രാജാസുബ്രഹ്മണി അറിയിച്ചു.
ഈ അധിക കാലാവധിക്ക് ശേഷം, താല്‍പ്പര്യമുള്ളവര്‍ക്ക് നിശ്ചിത മാനദണ്ഡങ്ങളുടെ അടിസ്ഥാനത്തില്‍ സായുധ സേനയില്‍ സ്ഥിരമായി ചേരാവുന്നതാണെന്നും സംയുക്ത സേനാ മേധാവി പറഞ്ഞു. ‘ഇന്ത്യന്‍ പ്രതിരോധ സേനയ്ക്കും നമ്മുടെ അഗ്‌നിവീര്‍മാര്‍ക്കും സുപ്രധാന ദിവസമാണ്. എല്ലാ അഗ്‌നിവീര്‍ സൈനികര്‍ക്കും ഇന്ത്യന്‍ സായുധ സേനയുടെ ഭാഗമാകാന്‍ കഴിയുന്ന ഒരു സുപ്രധാന സാധ്യതയാണ് കേന്ദ്രമന്ത്രിസഭ ഒരുക്കിയിരിക്കുന്നത്.’ രാജാസുബ്രഹ്മണി പറഞ്ഞു.
നാലു വര്‍ഷത്തെ സേവന കാലാവധി പൂര്‍ത്തിയാക്കി ആദ്യ ബാച്ചിലെ പതിനെട്ടായിരത്തിലധികം അഗ്‌നിവീര്‍ സൈനികര്‍ ഡിസംബര്‍ 31-ഓടെ സേവനത്തില്‍ നിന്ന് വിരമിക്കാന്‍ ഒരുങ്ങുന്നതിനിടെയാണ് കേന്ദ്രത്തിന്റെ നിര്‍ണായക തീരുമാനം. 2022 ജൂണ്‍ 14-നാണ് ‘അഗ്നിപഥ്’ പദ്ധതിക്ക് തുടക്കം കുറിച്ചത്. നാല് വര്‍ഷത്തെ അഗ്‌നിവീര്‍കളുടെ പ്രകടനം തുടര്‍ച്ചയായി വിലയിരുത്തിയിരുന്നു. വളരെ നല്ല പ്രതികരണമാണ് ലഭിച്ചതെന്നും സംയുക്ത സേനാ മേധാവി പറഞ്ഞു.
പുതിയ തീരുമാനം അനുസരിച്ച് 25 ശതമാനം പേര്‍ സേനയുടെ ഭാഗമായി സ്ഥിരമാകുന്നു. ശേഷിക്കുന്ന 75 ശതമാനം പേര്‍ക്ക് സേവനത്തില്‍ തുടരാന്‍ രണ്ട് വര്‍ഷം കൂടി അധികമായി ലഭിക്കും. അതിനുശേഷം, സ്ഥിരം സായുധ സേനയില്‍ ചേരാനുള്ള മറ്റൊരു അവസരം കൂടി അവര്‍ക്ക് ലഭിക്കും. ഈ അധിക കാലയളവിന് ശേഷം ഇവരെ സ്ഥിരപ്പെടുത്തുന്നത് അടക്കമുള്ള പ്രക്രിയ വസ്തുനിഷ്ഠമായ മാനദണ്ഡങ്ങളെ അടിസ്ഥാനമാക്കി ആയിരിക്കുമെന്ന് സംയുക്ത സേനാ മേധാവി എന്‍ എസ് രാജാസുബ്രഹ്മണി വ്യക്തമാക്കി.
by Midhun HP News | Nov 4, 2026 | Latest News, കേരളം
കൊച്ചി: കൊച്ചി മെട്രോ രണ്ടാംഘട്ട നിർമ്മാണ പ്രവർത്തനങ്ങളുടെ ഭാഗമായി പാലാരിവട്ടം സെന്റ് മാർട്ടിൻ ചർച്ചിന് സമീപം പൈലിംഗ് പ്രവൃത്തികൾ ആരംഭിക്കുന്നതിന്റെ പശ്ചാത്തലത്തിൽ പ്രദേശത്ത് ഗതാഗതം വഴിതിരിച്ചുവിടും.ശ്രീനാരായണ ജങ്ഷൻ (എസ്.എൻ. ജങ്ഷൻ) മുതൽ സെന്റ് മാർട്ടിൻ ചർച്ച് വരെയുള്ള റോഡ് ഭാഗമാണ് താത്കാലികമായി അടച്ചിടുന്നത്. നാളെ മുതലാണ് നിയന്ത്രണം.
ഇടപ്പള്ളി ഭാഗത്തുനിന്ന് കലൂരിലേക്ക് പോകുന്ന വാഹനങ്ങൾ എസ്.എൻ. ജങ്ഷനിൽ നിന്ന് പാലാരിവട്ടം ജങ്ഷനിലെത്തി വലത്തോട്ട് തിരിഞ്ഞ് കലൂർ ഭാഗത്തേക്ക് പോകേണ്ടതാണെന്ന് അധികൃതർ അറിയിച്ചു. കൊച്ചി മെട്രോ അധികൃതരും കൊച്ചി സിറ്റി പൊലീസ് അസിസ്റ്റന്റ് കമ്മീഷണറും സംയുക്തമായി സ്ഥലം സന്ദർശിച്ച് വിശദമായി പരിശോധിച്ച ശേഷമാണ് ഗതാഗത നിയന്ത്രണവുമായി ബന്ധപ്പെട്ട അന്തിമ തീരുമാനമെടുത്തത്.
ഗതാഗതം വഴിതിരിച്ചുവിടുന്നതിന്റെ മുന്നോടിയായി റോഡ് താത്കാലികമായി അടയ്ക്കുന്നതിനുള്ള മുന്നൊരുക്കങ്ങൾ മെട്രോ അധികൃതർ പൂർത്തിയാക്കിയിട്ടുണ്ട്. തുടർന്ന് ട്രയൽ റൺ അടിസ്ഥാനത്തിൽ വാഹനങ്ങൾ വഴിതിരിച്ചുവിടുന്ന ഗതാഗത ക്രമീകരണങ്ങൾ നടപ്പിലാക്കും. ഒരു മാസത്തേക്കാണ് ഈ ഗതാഗത നിയന്ത്രണം ഏർപ്പെടുത്തിയിരിക്കുന്നത്. പൊതുജനങ്ങൾ യാത്രാവേളകളിൽ ഈ ഗതാഗത ക്രമീകരണങ്ങളോട് പൂർണ്ണമായും സഹകരിക്കണമെന്ന് കൊച്ചി മെട്രോ റെയിൽ ലിമിറ്റഡ് അഭ്യർത്ഥിച്ചു.
by Midhun HP News | Nov 4, 2026 | Latest News, ദേശീയ വാർത്ത
കൊയിലാണ്ടി: പയ്യോളിയില്‍ 13കാരിയെ ലൈംഗികമായി പീഡിപ്പിച്ച കേസിലെ ഒന്നാം പ്രതി വ്യവസായിയും വടകര ചങ്ങരോത്ത് സ്വദേശിയുമായ അബ്ദുള്‍ റഫീഖിനെ കൊയിലാണ്ടി പൊലീസ് കസ്റ്റഡിയില്‍ എടുത്തു. ജാമ്യം റദ്ദാക്കിയതിനെതിരെ പ്രതി കോടതിയില്‍ സമര്‍പ്പിച്ച ഹര്‍ജി തള്ളിയതോടെയാണ് ഇന്ന് രാവിലെ പത്തരയോടെ ഇയാളെ കസ്റ്റഡിയില്‍ എടുത്തത്.
പയ്യോളിയിലെ സ്വന്തം വീട്ടില്‍ വെച്ച് 13കാരിയെ ക്രൂരമായി ലൈംഗിക പീഡനത്തിനിരയാക്കിയ കേസില്‍ ജാമ്യമില്ലാ വകുപ്പുകള്‍ പ്രകാരം കേസെടുത്തിട്ടും ഒരു ദിവസം പോലും ഇയാളെ പോലീസ് കസ്റ്റഡിയില്‍ എടുത്തില്ല. പോലീസിന്റെ ഭാഗത്തുനിന്നുണ്ടായ ഗുരുതര വീഴ്ച്ചയെ തുടര്‍ന്ന് പെണ്‍കുട്ടിയുടെ കുടുംബവും നാട്ടുകാരും പ്രതിയുടെ വീടിനു മുന്നില്‍ പ്രതിഷേധിച്ചിരുന്നു. ജനകീയപ്രക്ഷോഭം കനത്തതോടെ കേസ് അന്വേഷിച്ച സി ഐ സാബുമോന്‍, സിപിഒ അബ്ദുള്‍ ഹമീദ് എന്നിവരെ സര്‍വീസില്‍ നിന്ന് സസ്‌പെന്റ് ചെയ്യുകയും ചെയ്തിരുന്നു.
രണ്ടു വര്‍ഷം മുന്‍പാണ് കേസിനാസ്പദമായ സംഭവം നടക്കുന്നത്. പെണ്‍കുട്ടിയുടെ അമ്മയുടെ സുഹൃത്തായ അബ്ദുള്‍ റഫീഖ്, അവരുടെ ഒത്താശയോടെ കത്തികാട്ടി ഭീഷണിപ്പെടുത്തി കുട്ടിയെ സ്വന്തം വീട്ടില്‍ വെച്ച് നിരന്തരം പീഡനത്തിനിരയാക്കുകയായിരുന്നു. പഠനത്തില്‍ പിന്നോക്കം പോയതിനെ തുടര്‍ന്ന് സ്‌കൂളില്‍ നടത്തിയ കൗണ്‍സിലിംഗിലാണ് പെണ്‍കുട്ടി പീഡനവിവരം പുറത്ത് പറയുന്നത്.
10 മാസം മുന്‍പ് കേസ് രജിസ്റ്റര്‍ ചെയ്ത പയ്യോളി പോലീസ് രണ്ടാം പ്രതിയായ കുട്ടിയുടെ അമ്മയെ അറസ്റ്റ് ചെയ്‌തെങ്കിലും ഒന്നാം പ്രതി വിദേശത്തേയ്ക്ക് കടന്നുകളഞ്ഞു. ഇയാള്‍ വിമാനത്താവളത്തില്‍ എത്തിയാല്‍ ഉടന്‍ അറസ്റ്റു ചെയ്യുമെന്ന് ഉറപ്പു നല്‍കിയിരുന്നെങ്കിലും പാലിക്കപ്പെട്ടില്ല.
നെടുമ്പാശേരി വഴി നാട്ടിലെത്തിയിട്ടും ഇയാളെ കസ്റ്റഡിയില്‍ എടുക്കാന്‍ പൊലീസ് തയ്യാറായില്ല. നേരത്തെ ജാമ്യഹർജി പരിഗണിക്കുന്ന സമയത്ത് ശാരീരിക അസ്വസ്ഥത ചൂണ്ടിക്കാട്ടി ആശുപത്രിയിൽ അഡ്മിറ്റായ ഇയാള്‍ വിധി പ്രതികൂലമാണെന്നറിഞ്ഞതോടെ പൊലീസിനെ വെട്ടിച്ച് കടന്നു കളയുകയായിരുന്നു. ഇതെതുടർന്ന് പൊലീസിനെതിരെ ഉയര്‍ന്ന ശക്തമായ ജനരോഷത്തിനൊടുവിലാണ് ഇപ്പോള്‍ പ്രതി പിടിയിലാകുന്നത്.
by Midhun HP News | Nov 4, 2026 | Latest News, ദേശീയ വാർത്ത
വാഷിങ്ടൺ:ഡിസി: അമേരിക്കന്‍ ഇടക്കാല തെരഞ്ഞെടുപ്പില്‍ വോട്ടെണ്ണല്‍ പുരോഗമിക്കുമ്പോള്‍ ഡെമോക്രാറ്റിക്ക് പാര്‍ട്ടിക്ക് മുന്നേറ്റം. ട്രംപിന് തിരിച്ചടിയാണ് ആദ്യ ഫല സൂചനകള്‍ നല്‍കുന്നത്. നിര്‍ണായക പോരാട്ടമാണ് സീറ്റുകളില്‍ നടക്കുന്നത്.
അമേരിക്കന്‍ പ്രസിഡന്റ് ഭരണത്തിന്റെ പകുതിയില്‍ വച്ച് നടത്തുന്ന തെരഞ്ഞെടുപ്പായതിനാലാണ് ഇത് ഇടക്കാല തെരഞ്ഞെടുപ്പ് എന്നറിയപ്പെടുന്നത്. കോണ്‍ഗ്രസിലെ ഇരുസഭകളിലും ഈ തെരഞ്ഞെടുപ്പ് മാറ്റമുണ്ടാക്കുമെന്നാണ് കരുതുന്നത്. അമേരിക്കന്‍ ജനപ്രതിനിധി സഭയിലെ 435 സീറ്റുകളിലേക്കും സെനറ്റിലെ 100 സീറ്റുകളില്‍ 35 എണ്ണത്തിലേക്കുമാണ് തെരഞ്ഞെടുപ്പ് നടന്നത്. കൂടാതെ 36 സംസ്ഥാനങ്ങളിലെ ഗവര്‍ണര്‍ സ്ഥാനങ്ങളിലേക്കും വോട്ടെടുപ്പ് നടക്കുന്നു. ഏകദേശം 21 കോടി (210 മില്യണ്‍) ആളുകളാണ് ഈ തെരഞ്ഞെടുപ്പില്‍ വോട്ട് ചെയ്തത്.
റിപ്പബ്ലിക്കന്‍ പാര്‍ട്ടി വിജയിക്കുമെന്ന് ട്രംപ് ആത്മവിശ്വാസം പ്രകടിപ്പിക്കുമ്പോള്‍ അമേരിക്കയിലെ ഉയരുന്ന ജീവിതച്ചെലവ് ചൂണ്ടിക്കാട്ടിയാണ് ഡെമോക്രാറ്റിക് പാര്‍ട്ടി പ്രചാരണം നടത്തിയത്.
ജനപ്രതിനിധിസഭയുടെ നിയന്ത്രണം ഡെമോക്രാറ്റുകള്‍ക്ക് ലഭിക്കാനാണ് സാധ്യതയെന്ന് അഭിപ്രായ സര്‍വേകള്‍ സൂചിപ്പിച്ചിരുന്നു. എന്നാല്‍ റിപ്പബ്ലിക്കന്‍ പാര്‍ട്ടിയുടെ ശക്തികേന്ദ്രങ്ങളില്‍ എത്രത്തോളം സീറ്റുകള്‍ ഡെമോക്രാറ്റുകള്‍ക്ക് നേടാനാകുമെന്നത് വ്യക്തമല്ല.
എന്നാല്‍ സെനറ്റിന്റെ നിയന്ത്രണം പിടിച്ചെടുക്കുക ഡെമോക്രാറ്റുകള്‍ക്ക് എളുപ്പമാകില്ല. റിപ്പബ്ലിക്കന്‍ പാര്‍ട്ടിയുടെ കൈവശമുള്ള നാല് സീറ്റുകള്‍ പിടിച്ചെടുക്കുന്നതിനൊപ്പം നിലവിലുള്ള തങ്ങളുടെ എല്ലാ സീറ്റുകളും നിലനിര്‍ത്തുകയും വേണം.
by Midhun HP News | Nov 4, 2026 | Latest News, ജില്ലാ വാർത്ത
ഇന്ത്യയുടെ നേതൃത്വത്തിൽ നടക്കുന്ന ഇന്ത്യ – ശ്രീലങ്ക സംയുക്ത സൈക്ലിങ് പര്യവേഷണത്തിന്റെ ഉദ്ഘാടന ക്യാമ്പിലേക്ക് തിരഞ്ഞെടുക്കപ്പെട്ടിരിക്കുകയാണ് അണ്ടർ ഓഫീസർ അഭിമന്യു. എസ്. എസ്. മണമ്പൂർ തുളസി വിലാസത്തിൽ റിട്ടയേർഡ് സബ് മേജർ തുളസിധരൻ പിള്ളയുടെ ചെറുമകനും സരിത ടി ജി യുടെ മകനുമാണ് അഭിമന്യു. ഡോൺ ബോസ്കോ കോളേജ് കൊട്ടിയം ബി എസ് സി
സൈക്കോളജി തേർഡ് ഇയർ വിദ്യാർത്ഥിയാണ്.
2026 നവംബർ 1 മുതൽ നവംബർ 13 വരെ അമൃതപുരിയിലെ വള്ളിക്കാവിലാണ് ക്യാമ്പ് നടക്കുന്നത്.
ഇന്ത്യയിലെയും ശ്രീലങ്കയിലെയും എൻ.സി.സി കേഡറ്റുകളാണ് സൈക്ലിങ് ടീമിലുള്ളത്. ഇരു രാജ്യങ്ങളിലെയും യുവപ്രതിഭകളെയാണ് ഈ സംഘം പ്രതിനിധീകരിക്കുന്നത്. എൻ.സി.സി സൈക്ലിങ് കേഡറ്റുകളും ഭരണവിഭാഗം ജീവനക്കാരും ഉൾപ്പെടുന്ന 11 അംഗ ശ്രീലങ്കൻ സംഘം നവംബർ 1-ന് വള്ളിക്കാവിൽ എത്തിച്ചേർന്നു. ഇന്ത്യൻ ടീമിൽ 14 എൻ.സി.സി കേഡറ്റ് സൈക്ലിസ്റ്റുകളും 10 സഹായ ജീവനക്കാരുമാണുള്ളത്.
സംയുക്ത പരിശീലനത്തിന്റെ മുഴുവൻ നടത്തിപ്പും ക്രമീകരണങ്ങളും കേരള-ലക്ഷദ്വീപ് ഡയറക്ടറേറ്റിന്റെ നേതൃത്വത്തിൽ കൊല്ലത്തെ എൻ.സി.സി ഗ്രൂപ്പ് ഹെഡ്ക്വാർട്ടേഴ്സുമായി സഹകരിച്ചാണ് നടത്തുന്നത്. പരിശീലനം പൂർത്തിയാക്കിയ ശേഷം സംഘം നവംബർ 13-ന് ശ്രീലങ്കയിലേക്ക് പുറപ്പെടും. കൊളംബോയിൽ നിന്ന് ന്യൂഡൽഹിയിലേക്ക് ഏകദേശം 3,500 കിലോമീറ്റർ ദൂരമാണ് ഈ പര്യവേഷണം നടത്തുന്നത്.
Recent Comments