by Midhun HP News | Nov 4, 2026 | Latest News, ജില്ലാ വാർത്ത
വര്‍ക്കലയില്‍ വറ്റ മത്സ്യം കഴിച്ച് ഗുരുതരാവസ്ഥയിലായിരുന്ന യുവാവ് മരിച്ചു. വര്‍ക്കല സ്വദേശി സുധീര്‍ (40) ആണ് മരിച്ചത്. കഴിഞ്ഞ മാസം 30നാണ് ആരോഗ്യനില മോശമായതിനെ തുടര്‍ന്ന് സുധീറിനെ ആശുപത്രിയില്‍ പ്രവേശിപ്പിച്ചത്. വെന്റിലേറ്ററില്‍ ചികിത്സയിലിരിക്കെയാണ് മരണം.
തിരുവനനന്തപുരം മെഡിക്കല്‍ കോളേജിലായിരുന്നു സുധീറിനെ പ്രവേശിപ്പിച്ചിരുന്നത്. വറ്റ മത്സ്യം കഴിച്ച 27 പേര്‍ വിവിധ ആശുപത്രികളില്‍ ചികിത്സ തേടിയിരുന്നു. ഗുരുതരാവസ്ഥയിലായ ചിലക്കൂര്‍ സ്വദേശിയായ 17 കാരന്‍ ഹാഷിം പാരിപ്പള്ളി മെഡിക്കല്‍ കോളേജിലും ചികിത്സയിലാണ്.
നിരവധി പേര്‍ക്ക് ആരോഗ്യപ്രശ്‌നങ്ങള്‍ നേരിട്ടതിനു പിന്നാലെ മത്സ്യത്തിന്റെ സാമ്പിളുകള്‍ പരിശോധനയ്ക്ക് അയച്ചതായി ജില്ലാ മെഡിക്കല്‍ ഓഫീസര്‍ വ്യക്തമാക്കി. വെട്ടൂരില്‍ വിറ്റ മത്സ്യം കഴിച്ചാണ് ആരോഗ്യ പ്രശ്‌നങ്ങളുണ്ടായത്. പിന്നാലെ വെട്ടൂരില്‍ വറ്റ മത്സ്യത്തിന്റെ വില്‍പന നിര്‍ത്തിവച്ചിരുന്നു.
തീരദേശ മേഖലയില്‍ കഴിഞ്ഞ രണ്ടു ദിവസങ്ങളിലായി വറ്റ മത്സ്യത്തിന്റെ ചാകരയുണ്ടായിരുന്നു.
തുടര്‍ന്ന് വിപണിയില്‍ നിന്നും മത്സ്യം വാങ്ങി ഉപയോഗിച്ച ചിലര്‍ക്കാണ് ദേഹാസ്വാസ്ഥ്യം അനുഭവപ്പെട്ടത്. മത്സ്യം വാങ്ങുമ്പോള്‍ അതീവ ജാഗ്രത പാലിക്കണമെന്നും ഭക്ഷ്യയോഗ്യമായ മത്സ്യങ്ങള്‍ മാത്രമേ വാങ്ങി ഉപയോഗിക്കാവൂ എന്നും കര്‍ശന ജാഗ്രത പുലര്‍ത്തണമെന്നും വർക്കല നഗരസഭ മുന്നറിയിപ്പ് നല്‍കി.
by Midhun HP News | Nov 4, 2026 | Latest News, ദേശീയ വാർത്ത
ഓക്‌ലന്‍ഡ്: ന്യൂസിലന്‍ഡിനെതിരായ ഏകദിന പരമ്പരയിലെ ആദ്യ മത്സരത്തില്‍ ഇന്ത്യക്ക് 186 റണ്‍സ് വിജയലക്ഷ്യം. 40.2 ഓവറില്‍ 185 റണ്‍സിന് കിവികള്‍ ഓള്‍ഔട്ടായി. 38 റണ്‍സ് നേടിയ ഓപ്പണര്‍ ടിം സെയ്‌ഫെര്‍ടാണ് ആതിഥേയരുടെ ടോപ് സ്‌കോറര്‍. അവസാന ഓവറുകളില്‍ തകര്‍ത്തടിച്ച ബ്ലയര്‍ ടിക്ക്‌നറുടെ (34) പ്രകടനവും അവര്‍ക്ക് നിര്‍ണായകമായി. ഇന്ത്യക്കായി അര്‍ഷ്ദീപ് സിങ് നാലും ഗുർനൂർ ബ്രാർ മൂന്നും വിക്കറ്റുകള്‍ നേടി.
മത്സരത്തില്‍ ടോസ് നേടിയ ഇന്ത്യന്‍ ക്യാപ്റ്റന്‍ ശുഭ്മന്‍ ഗില്‍ ഫീല്‍ഡിങ് തെരഞ്ഞെടുക്കുകയായിരുന്നു. മികച്ച പ്രകടനത്തിലൂടെ ഇന്ത്യന്‍ ബൗളര്‍മാര്‍ കിവീസ് നിരയെ തുടക്കത്തില്‍ തന്നെ പ്രതിരോധത്തിലാക്കി. അര്‍ഷ്ദീപ് സിങ്ങും ഗുര്‍നൂര്‍ ബ്രാറും രണ്ട് വിക്കറ്റുകള്‍ വീതം വീഴ്ത്തി കിവീസിനെ തുടക്കത്തില്‍ തന്നെ ഞെട്ടിച്ചു. സ്‌കോര്‍ ബോര്‍ഡില്‍ 40 റണ്‍സ് പിറക്കുന്നതിനിടെ ഓപ്പണര്‍ വില്‍ യങ്ങും (9) മൂന്നാം നമ്പരിലിറങ്ങിയ ഹെന്റി നിക്കോള്‍സും (9) മടങ്ങി. തുടര്‍ന്ന് ടിം സീഫര്‍ട്ടും (38) ഡാരില്‍ മിച്ചലും (28) ചെറുത്തുനില്‍പ്പിന് ശ്രമിച്ചെങ്കിലും ഇന്ത്യന്‍ ബൗളര്‍മാര്‍ക്കു മുന്നില്‍ ഏറെ നേരം പിടിച്ചുനില്‍ക്കാനായില്ല.
മത്സരത്തില്‍ ഇന്ത്യന്‍ താരങ്ങളുടെ ഫീല്‍ഡിങ് മികവ് ശ്രദ്ധേയമായി. ഡാരില്‍ മിച്ചലിനെ റണ്ണൗട്ടാക്കാന്‍ വെറ്ററന്‍ താരം രോഹിത് ശര്‍മ നടത്തിയ മിന്നല്‍ നീക്കം കളിയിലെ പ്രധാന ഹൈലൈറ്റുകളില്‍ ഒന്നായി. ഗ്ലെന്‍ ഫിലിപ്‌സ് എടുത്ത സിംഗിളിനായി ഓടിയപ്പോള്‍, അതിവേഗം പന്ത് കൈക്കലാക്കി സ്റ്റംപ് ലക്ഷ്യമാക്കി രോഹിത് എറിഞ്ഞ പന്ത് വിക്കറ്റ് കീപ്പര്‍ കെഎല്‍ രാഹുല്‍ കൃത്യമായി സ്റ്റംപ് ചെയ്യുകയായിരുന്നു.
ഇത് കിവീസിന് കനത്ത പ്രഹരമായി. അന്‍ഷുല്‍ കാംബോജിന്റെ പന്തില്‍ നഥാന്‍ സ്മിത്തിനെ പുറത്താക്കാന്‍ വിരാട് കോഹ്ലി ഒറ്റക്കൈയിലെടുത്ത ക്യാച്ച് കളിയിലെ ഏറ്റവും മികച്ച നിമിഷമായി മാറി. സ്ലിപ്പില്‍ നിന്ന് വലതുവശത്തേക്ക് ചാടി കോഹ്ലി എടുത്ത അവിശ്വസനീയ ക്യാച്ച് കാണികളെ അമ്പരപ്പിച്ചു.
വിക്കറ്റ് കീപ്പിങ് ബാറ്റര്‍ ടോം ലാഥത്തെ (3) ഗുര്‍നൂര്‍ ബ്രാര്‍ റിട്ടേണ്‍ ക്യാച്ചിലൂടെ മടക്കി. കിവീസ് ക്യാപ്റ്റന്‍ മിച്ചല്‍ സാന്റ്‌നറെ അന്‍ഷുല്‍ കാംബോജ് ബൗള്‍ഡാക്കി. ഒരോ റണ്‍ വീതമെടുത്ത നഥാന്‍ സ്മിത്ത്, കൈല്‍ ജാമിസന്‍ എന്നിവരെ ലിരാട് കോഹ്ലി കൈപ്പിടിയിലൊതുക്കി. വാലറ്റത്തെ കൂട്ടുപിടിച്ച് ഭേദപ്പെട്ട പ്രകടനം പുറത്തെടുത്ത ഗ്ലെന്‍ ഫിലിപ്‌സിനെ (30) അര്‍ഷ്ദീപ് ശ്രേയസ് അയ്യരുടെ കൈകളിലെത്തിച്ചു.
11-ാമനായി ക്രീസിലെത്തിയ ബ്ലയര്‍ ടിക്ക്‌നെര്‍ വമ്പന്‍ ഷോട്ടുകള്‍ പുറത്തെടുത്ത് ഇന്ത്യന്‍ ബൗളര്‍മാരെ ഞെട്ടിച്ചു. അര്‍ഷ്ദീപിന്റെ അവസാന ഓവറില്‍ മാത്രം മൂന്ന് സിക്‌സറുകളാണ് താരം അടിച്ചെടുത്തത്. ആകെ 23 പന്തില്‍ നാല് സിക്‌സും ഒരു ഫോറും ഉള്‍പ്പെടെ 34 റണ്‍സ് അടിച്ചെടുത്ത താരത്തെ വിക്കറ്റ് കീപ്പര്‍ കെഎല്‍ രാഹുലിന്റെ കൈകളിലെത്തിച്ച് ബ്രാര്‍ ഇന്നിങ്‌സിന് തിരശീലയിട്ടു. പത്താം വിക്കറ്റില്‍ ജേക്കബ് ഡഫിക്കൊപ്പം 39 റണ്‍സിന്റെ കൂട്ടുകെട്ടാണ് ടിക്ക്‌നെര്‍ തീര്‍ത്തത്. 15 റണ്‍സെടുത്ത ഡഫി പുറത്താകാതെ നിന്നു.
by Midhun HP News | Nov 4, 2026 | Latest News, ജില്ലാ വാർത്ത
ആറ്റിങ്ങൽ: ചിറയിൻകീഴ് റെയിൽവേ സ്റ്റേഷനിൽ ഏറനാട് എക്സ്പ്രസിന് (ട്രെയിൻ നമ്പർ 16605/16606) അടിയന്തരമായി സ്റ്റോപ്പ് അനുവദിക്കണമെന്ന് ആവശ്യപ്പെട്ട് അടൂർ പ്രകാശ് എം.പി റെയിൽവേ ബോർഡ് ചെയർമാനും സി.ഇ.ഒയുമായ സതീഷ് കുമാറിന് കത്തുനൽകി.
ആറ്റിങ്ങൽ പാർലമെന്റ് മണ്ഡലത്തിലെ ഏറ്റവും പ്രധാനപ്പെട്ട റെയിൽവേ കേന്ദ്രങ്ങളിലൊന്നായ ചിറയിൻകീഴിൽ ഏറനാട് എക്സ്പ്രസിന് സ്റ്റോപ്പ് അനുവദിക്കണമെന്നത് പ്രദേശവാസികളുടെയും യാത്രക്കാരുടെയും ദീർഘകാലത്തെ ആവശ്യമാണ്. എന്നാൽ ന്യായമായ ഈ ആവശ്യം പരിഗണിക്കാൻ റെയിൽവേ അധികൃതർ ഇതുവരെ തയ്യാറായിട്ടില്ലെന്ന് എം.പി കത്തിൽ ചൂണ്ടിക്കാട്ടി.
ചിറയിൻകീഴ് സ്റ്റേഷനേക്കാൾ വരുമാനത്തിലും യാത്രക്കാരുടെ എണ്ണത്തിലും വളരെ പിന്നിലുള്ള മറ്റ് ചില സ്റ്റേഷനുകളിൽ പോലും അടുത്തിടെ ഏറനാട് എക്സ്പ്രസിന് സ്റ്റോപ്പ് അനുവദിച്ചിട്ടുണ്ട്. എന്നാൽ കൂടുതൽ യാത്രക്കാർ ആശ്രയിക്കുന്ന ചിറയിൻകീഴിന്റെ അവകാശങ്ങളെ തള്ളിക്കളയുന്ന നിലപാടാണ് റെയിൽവേ സ്വീകരിക്കുന്നത്. ഈ വിഷയത്തിന്റെ ഗൗരവം ചൂണ്ടിക്കാട്ടി മുൻപ് തിരുവനന്തപുരം റെയിൽവേ ഡിവിഷൻ, സതേൺ റെയിൽവേ, റെയിൽവേ ബോർഡ് എന്നിവർക്ക് പലതവണ നിവേദനങ്ങൾ സമർപ്പിച്ചിരുന്നെങ്കിലും അന്തിമതീരുമാനം എടുക്കാൻ അധികൃതർ തയ്യാറായിട്ടില്ലെന്നും എം.പി വ്യക്തമാക്കി.
ചരിത്രപ്രസിദ്ധമായ ശാർക്കര ദേവി ക്ഷേത്രത്തിലേക്ക് എത്തുന്ന തീർത്ഥാടകർ, കയർ മേഖലയിലെ തൊഴിലാളികൾ, വിവിധ സർക്കാർ-സ്വകാര്യ സ്ഥാപനങ്ങളിലെ ഉദ്യോഗസ്ഥർ, വിദ്യാർത്ഥികൾ തുടങ്ങി ദിനംപ്രതി ആയിരക്കണക്കിന് ആളുകളാണ് ചിറയിൻകീഴ് റെയിൽവേ സ്റ്റേഷനെ ആശ്രയിക്കുന്നത്. മലബാർ ഭാഗത്തേക്ക് അടക്കം ദീർഘദൂര യാത്ര ചെയ്യുന്നവർക്ക് ഏറനാട് എക്സ്പ്രസിന്റെ സ്റ്റോപ്പ് വലിയ ആശ്വാസമാകും.
സാധാരണക്കാരായ യാത്രക്കാരുടെ ദുരിതത്തിന് അടിയന്തര പരിഹാരം കാണുന്നതിനായി റെയിൽവേ ബോർഡ് ചെയർമാൻ വിഷയത്തിൽ നേരിട്ട് ഇടപെടണമെന്നും, ചിറയിൻകീഴിൽ ഏറനാട് എക്സ്പ്രസിന് സ്റ്റോപ്പ് അനുവദിച്ചുകൊണ്ട് ഉടൻ ഉത്തരവിറക്കണമെന്നും അടൂർ പ്രകാശ് എം.പി ആവശ്യപ്പെട്ടു.
by Midhun HP News | Nov 4, 2026 | Latest News, കേരളം
കൊച്ചി: സാധാരണക്കാരുടെ കുടുംബ ബജറ്റ് താളം തെറ്റിച്ചുകൊണ്ട് മത്സ്യവില കുതിച്ചുയരുന്നു. ജനപ്രിയ മത്സ്യ ഇനങ്ങളായ മത്തിക്കും അയലക്കും ദിനംപ്രതി വില കയറിക്കൊണ്ടിരിക്കുകയാണ്. ഏതാനും ആഴ്ചകള്‍ക്ക് മുന്‍പ് 100-150 രൂപ കിലോ വിലയുണ്ടായിരുന്ന മത്തി(ചാള) 300 രൂപയായി ഉയര്‍ന്നു. ചെറിയ മത്തിക്ക് പോലും 240-250 രൂപയാണ് വില. 160-180 രൂപയുണ്ടായിരുന്ന അയല വില 220 മുതല്‍ 240 രൂപ വരെ ഉയര്‍ന്നു. ഇത് വരും ദിവസങ്ങളില്‍ 300 രൂപയോളമെത്തുമെന്നാണ് മത്സ്യത്തൊഴിലാളികള്‍ പറയുന്നത്.
കായല്‍ മീനുകളായ കണമ്പ്, കരിമീന്‍, ചെമ്പല്ലി എന്നിവയ്ക്ക് കിലോയ്ക്ക് 600-800 രൂപ വരെയാണ് വില. കൂന്തള്‍ 120-140, കിളിമീന്‍ 200-220, ചെമ്മീന്‍ 300 രൂപ എന്നിങ്ങനെയാണ് പുതിയ വില. നെയ്മീന്‍, ആവോലി, മോദ എന്നിവയാണ് വലിയ മീനുകളുടെ കൂട്ടത്തില്‍ വിലയില്‍ മുന്നില്‍. 1000-1300 വരെയാണ് നെയ്മീന്റെ വില. വിപണിയില്‍ നെയ്മീന്റെ വരവും പാതി കുറഞ്ഞിട്ടുണ്ട്. ആവോലി വില 600-800 രൂപയും മോദ 700 രൂപ മുതല്‍ 750വരെയുമാണ് കിലോ വില.
കാലാവസ്ഥാ വ്യതിയാനം കാരണം കടലില്‍ ചെറുമത്സ്യങ്ങളുടെ ലഭ്യതയും വരവും ഗണ്യമായി കുറഞ്ഞതാണ് വിലക്കയറ്റത്തിന്റെ പ്രധാന കാരണം. കാലാവസ്ഥാ വ്യതിയാനം ചെറുമീനുകളുടെ പ്രജനനത്തെ ബാധിച്ചതായും റിപ്പോര്‍ട്ടുകള്‍ ഉണ്ട്. രാസവസ്തുക്കള്‍ ചേര്‍ത്ത മീനുമായി വന്ന ട്രക്കുകള്‍ പിടികൂടിയ പശ്ചാത്തലത്തില്‍ ഇതര സംസ്ഥാനങ്ങളില്‍ നിന്നുള്ള മീനുകളോടുള്ള താല്‍പ്പര്യം കുറഞ്ഞതും പ്രാദേശിക മീനുകളുടെ ഡിമാന്റും വിലയും കൂട്ടാന്‍ ഇടയാക്കി.
മീന്‍ വിലയിലെ വ്യതിയാനം ഹോട്ടലുകളുടെ പ്രവര്‍ത്തനത്തെയും ബാധിച്ചിട്ടുണ്ട്. എന്നാല്‍ വറ്റ ഉള്‍പ്പടെയുള്ള വലിയ മീനുകളുടെ വില താഴേയ്ക്ക് പോയത് ആശ്വാസത്തിനിട നല്‍കുന്നു. 250 രൂപ കിലോ വിലയുണ്ടായിരുന്ന വറ്റ ഒറ്റയടിക്ക് 100 രൂപയിലേക്ക് എത്തി. തിരുവനന്തപുരം മുതലപ്പൊഴിയില്‍ ചാകര ഉണ്ടായപ്പോള്‍, വറ്റ കഴിച്ച് നിരവധി പേര്‍ക്ക് ഭക്ഷ്യവിഷബാധ ഉണ്ടായിരുന്നു. ഇത് സാമൂഹിക മാധ്യമങ്ങളില്‍ വ്യാപകമായി പ്രചരിച്ചതോടെയാണ് വറ്റയുടെ ഡിമാന്റ് കുറഞ്ഞത്.
by Midhun HP News | Nov 4, 2026 | Latest News, കേരളം
തിരുവനന്തപുരം: കേരള സ്റ്റേറ്റ് ട്രാന്‍സ്‌പോര്‍ട്ട് പ്രോജക്ടിന് (കെഎസ്ടിപി) കീഴില്‍ നടത്തിയ റോഡ് നിര്‍മാണ പദ്ധതിയുമായി ബന്ധപ്പെട്ട് മുഖ്യ തെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനെതിരെ ഉയര്‍ന്ന 2 കോടി രൂപയുടെ കൈക്കൂലി ആരോപണത്തില്‍ അന്വേഷണം നടത്താന്‍ ആഭ്യന്തരമന്ത്രി രമേശ് ചെന്നിത്തല വിജിലന്‍സിന് നിര്‍ദേശം നല്‍കി. രണ്ട് പതിറ്റാണ്ട് മുമ്പ് ഗ്യാനേഷ് കുമാര്‍ കേരളത്തില്‍ സേവനമനുഷ്ഠിച്ചിരുന്ന കാലത്തെ സംഭവത്തിലാണ് ആരോപണം ഉയര്‍ന്നത്. എസ്‌ഐആറുമായി ബന്ധപ്പെട്ട് രാജ്യവ്യാപകമായി ഗ്യാനേഷ് കുമാറിനെതിരെ കോണ്‍ഗ്രസും മറ്റ് പ്രതിപക്ഷ പാര്‍ട്ടികളും പ്രതിഷേധം ശക്തമാക്കുന്നതിനിടെയാണ് പുതിയ നീക്കം.
കൊല്ലം കടയ്ക്കല്‍ ചാടയമംഗലം സ്വദേശിയും കരാറുകാരനുമായ സാജന്‍ വിജിലന്‍സ് ഡയറക്ടര്‍ക്ക് നല്‍കിയ പരാതിയിലാണ് ആരോപണങ്ങള്‍ ഉന്നയിച്ചിട്ടുള്ളത്. കെഎസ്ടിപി പദ്ധതിക്ക് കീഴില്‍ പൂര്‍ത്തിയാക്കിയ പ്രവൃത്തികളുടെ കുടിശ്ശിക തുക അനുവദിക്കുന്നതിനായി അന്നത്തെ പൊതുമരാമത്ത് വകുപ്പ് സെക്രട്ടറിയായിരുന്ന ഗ്യാനേഷ് കുമാര്‍ 2 കോടി രൂപ കോഴ ആവശ്യപ്പെട്ടെന്നാണ് ആരോപണം. എന്‍ജിനീയര്‍മാര്‍ തുക പാസാക്കി നല്‍കിയ 17 കോടി രൂപയുടെ ബില്ലുകളുടെ ചെക്കുകള്‍ ഗ്യാനേഷ് കുമാര്‍ മനപ്പൂര്‍വ്വം തടഞ്ഞുവെച്ചെന്നും, ഇത് മലേഷ്യന്‍ കമ്പനിയായ പതി-ബെലിനും കമ്പനിയുടെ കരാറുകാര്‍ക്കും തൊഴിലാളികള്‍ക്കും വലിയ സാമ്പത്തിക പ്രതിസന്ധി സൃഷ്ടിച്ചെന്നും സാജന്‍ പരാതിയില്‍ പറയുന്നു.
ചോദിച്ച കോഴപ്പണം നല്‍കിയില്ലെങ്കില്‍ ചെക്കുകള്‍ നല്‍കില്ലെന്ന് ജ്ഞാനേഷ് കുമാര്‍ വ്യക്തമാക്കിയതായി കമ്പനിയുടെ പ്രോജക്ട് എന്‍ജിനീയറും മലേഷ്യന്‍ പൗരനുമായ ലീ സീ ബീന്‍ തന്നോട് പറഞ്ഞിരുന്നതായി സാജന്‍ ആരോപിക്കുന്നു. ‘കുറച്ചു തുക നല്‍കി വിഷയം തീര്‍ക്കാന്‍ ഞാന്‍ നിര്‍ദേശിച്ചപ്പോള്‍, കൈക്കൂലി നല്‍കി ചെക്കുകള്‍ കൈപ്പറ്റാന്‍ പതി-ബെല്‍ അധികൃതര്‍ അനുവാദം നല്‍കുന്നില്ലെന്നാണ് അവര്‍ പറഞ്ഞത്’ -സാജന്‍ തന്റെ പരാതിയില്‍ വ്യക്തമാക്കി. കരാറുകാര്‍ക്കും തൊഴിലാളികള്‍ക്കും നല്‍കാനുള്ള തുകയുടെ ഒരു ഭാഗം നല്‍കി തീര്‍ക്കാന്‍ ബംഗളൂരുവിലെ മറ്റൊരു പ്രോജക്ടിന്റെ ഫണ്ടാണ് ലീ ഉപയോഗിച്ചിരുന്നതെന്നും സാജന്‍ അവകാശപ്പെട്ടു. അംഗീകരിച്ച ബില്ലുകള്‍ നല്‍കുന്നതില്‍ വരുത്തിയ കാലതാമസവും കോഴ ആവശ്യപ്പെട്ടതുമാണ് 2006-ല്‍ ലീയുടെ ആത്മഹത്യയിലേക്ക് നയിച്ചതെന്നും പരാതിയില്‍ ആരോപിക്കുന്നുണ്ട്.
ആത്മഹത്യക്കുറിപ്പില്‍ ലീ, ഗ്യാനേഷ് കുമാറിന്റെ പങ്കിനെക്കുറിച്ച് പരാതിപ്പെട്ടിട്ടുണ്ടെന്നും മലേഷ്യയിലുള്ള ലീയുടെ കുടുംബാംഗങ്ങള്‍ ഇക്കാര്യം കമ്പനി ജീവനക്കാരെ അറിയിച്ചിരുന്നതായും പരാതിക്കാരന്‍ പറഞ്ഞു. മുമ്പ് ഈ സംഭവത്തില്‍ വിജിലന്‍സ് നടത്തിയ അന്വേഷണത്തില്‍ തന്നെയോ കോഴ ആവശ്യപ്പെട്ടതിനെക്കുറിച്ച് നേരിട്ട് അറിവുള്ള മറ്റുള്ളവരെയോ ചോദ്യം ചെയ്തിരുന്നില്ലെന്ന് സാജന്‍ ചൂണ്ടിക്കാട്ടി. തെളിവ് നല്‍കുന്നതിനായി ലീയുടെ കുടുംബാംഗങ്ങളെയും കമ്പനിയിലെ മുന്‍ ജീവനക്കാരെയും മറ്റ് സാക്ഷികളെയും ഹാജരാക്കാന്‍ തയ്യാറാണെന്നും അദ്ദേഹം അറിയിച്ചിട്ടുണ്ട്.
പരാതിയുടെ അടിസ്ഥാനത്തില്‍ പ്രാഥമിക അന്വേഷണം നടത്തിയ ശേഷം കേസ് രജിസ്റ്റര്‍ ചെയ്യാന്‍ വിജിലന്‍സ് ആഭ്യന്തര വകുപ്പിന്റെ അനുമതി തേടിയിരുന്നു. നിയമോപദേശം ലഭിച്ച ശേഷമാണ് വിഷയം വിജിലന്‍സ് പരിശോധിക്കാന്‍ മന്ത്രി ഉത്തരവിട്ടത്. കെപിസിസി നേതാവ് മലയിന്‍കീഴ് വേണുഗോപാലിന്റെ പരാതിയെ തുടര്‍ന്ന് ഒക്ടോബര്‍ 4ന് ആഭ്യന്തരമന്ത്രി വിജിലന്‍സ് അന്വേഷണത്തിന് ഉത്തരവിട്ടിരുന്നു. നിലവില്‍ അന്വേഷണം നടത്തുന്ന വിജിലന്‍സ് സംഘം തന്നെയാകും പുതിയ പരാതിയും പരിശോധിക്കുക.
പതി-ബെല്‍ കണ്‍സോര്‍ഷ്യം ഏറ്റെടുത്ത് നടത്തിയ എംസി റോഡ് നവീകരണത്തിലെ അഴിമതി ആരോപണവുമായാണ് ഈ കേസ് ബന്ധപ്പെട്ടിരിക്കുന്നത്. ആ കാലയളവിലാണ് ഗ്യാനേഷ് കുമാര്‍ സംസ്ഥാന പൊതുമരാമത്ത് സെക്രട്ടറിയായി സേവനമനുഷ്ഠിച്ചിരുന്നത്. 2006-ല്‍ ലീയുടെ മരണത്തെത്തുടര്‍ന്ന് വിജിലന്‍സ് അന്വേഷണം ആരംഭിച്ചിരുന്നെങ്കിലും, ആരോപണങ്ങള്‍ തെളിയിക്കപ്പെടാത്തതിനെ തുടര്‍ന്ന് കേസ് അവസാനിപ്പിക്കുകയായിരുന്നു. ആദ്യത്തെ വിജിലന്‍സ് അന്വേഷണത്തില്‍ നിര്‍ണായക വിവരങ്ങള്‍ വിട്ടുപോയിട്ടുണ്ടോ എന്ന കാര്യവും പുതിയ അന്വേഷണത്തില്‍ ഉള്‍പ്പെടുത്തും. അരോപണങ്ങളില്‍ ഗ്യാനേഷ് കുമാര്‍ ഇതുവരെ പ്രതികരിച്ചിട്ടില്ല.
Recent Comments