by Midhun HP News | Aug 8, 2026 | Latest News, കേരളം
വഴി അറിയാനും ട്രാഫിക് ബ്ലോക്കുകളില് നിന്ന് രക്ഷപ്പെടാനും നമ്മള് സ്ഥിരമായി ഉപയോഗിക്കുന്ന ഗൂഗിള് മാപ്സ് ഇനി വെറും നാവിഗേഷന് ആപ്പ് മാത്രമല്ല. യാത്ര ചെയ്യുന്നതിനിടയില് ഭക്ഷണം ഓര്ഡര് ചെയ്യാനും, തങ്ങാന് ഹോട്ടലുകള് കണ്ടെത്താനും, യാത്രാ പദ്ധതികള് തയ്യാറാക്കാനും സഹായിക്കുന്ന മികച്ച എഐ ഫീച്ചറുകള് അവതരിപ്പിച്ചിരിക്കുകയാണ് മാപ്സ്.
പുതിയ ഏതെങ്കിലും സ്ഥലത്ത് യാത്ര ചെയ്യുമ്പോള് പെട്ടെന്ന് ബട്ടര് ചിക്കനോ ചിക്കന് ബിരിയാണിയോ മസാല ദോശയോ കഴിക്കാന് തോന്നിയാല് ഇനി വിഷമിക്കേണ്ട. ഗൂഗിള് മാപ്സിലെ ആസ്ക് മാപ്സ് (Ask Maps) ഫീച്ചറിനോട് നിങ്ങള്ക്ക് കഴിക്കാന് ആഗ്രഹമുള്ള വിഭവത്തെക്കുറിച്ച് ചോദിക്കാം. നിങ്ങള് സഞ്ചരിക്കുന്ന വഴിയില് ഈ ഭക്ഷണം ലഭിക്കുന്ന മികച്ച റെസ്റ്റോറന്റുകള് മാപ്സ് കണ്ടെത്തിത്തരും. അവ അന്നേദിവസം തുറന്നിട്ടുണ്ടോ എന്നും നിങ്ങളുടെ ഭക്ഷണ രീതികള്ക്ക് അനുയോജ്യമാണോ എന്നും പരിശോധിക്കും. റെസ്റ്റോറന്റ് തിരഞ്ഞെടുത്താല്, ആ വിഭവം ആപ്പിന്റെ കാര്ട്ടിലേക്ക് ചേര്ത്ത് ഓര്ഡര് ചെയ്യാനും സഹായിക്കും.
പലതരം ഫില്റ്ററുകള് മാറ്റി മാറ്റി സമയം കളയാതെ ഇനി കൃത്യമായ ആവശ്യങ്ങള് മാപ്സിനോട് ടൈപ്പ് ചെയ്തു ചോദിക്കാം. ഉദാഹരണത്തിന്, കൊച്ചി മറൈന് ഡ്രൈവിന് സമീപമുള്ള, വിശാലമായ മുറികളുള്ള ബജറ്റ് ഫ്രണ്ട്ലി ഫാമിലി ഹോട്ടല് കണ്ടെത്തുക എന്ന് ചോദിച്ചാല്, നിലവിലെ മുറി വാടകയും ലഭ്യതയും പരിശോധിച്ച് ഏറ്റവും അനുയോജ്യമായ ഹോട്ടലുകള് മാപ്സ് മുന്നിലെത്തിക്കും. കൂടാതെ, നിങ്ങള് തങ്ങുന്ന സ്ഥലത്തിന് സമീപം നടക്കുന്ന പ്രാദേശിക ഉത്സവങ്ങള്, സംഗീത പരിപാടികള്, മറ്റ് കാഴ്ചകള് എന്നിവ കണ്ടെത്താനും അവയുടെ ടിക്കറ്റുകള് ബുക്ക് ചെയ്യാനുള്ള ലിങ്കുകളും മാപ്സ് നല്കും.
ഇന്ത്യന് ഉപയോക്താക്കള്ക്കായി പ്രത്യേകമായി ചില ഫീച്ചറുകള് ഗൂഗിള് അവതരിപ്പിച്ചിട്ടുണ്ട്. ബസ്, മെട്രോ, ട്രെയിന്, ഫെറി സര്വീസുകളുടെ തത്സമയ വിവരങ്ങള് ഇനി കൂടുതല് കൃത്യതയോടെ മാപ്പില് അറിയാനാകും. പേഴ്സണല് ഇന്റലിജന്സാണ്് മറ്റൊന്ന്. നിങ്ങളുടെ ജിമെയില് സന്ദേശങ്ങളുമായി ബന്ധിപ്പിക്കാന് അനുവാദം നല്കിയാല്, നിങ്ങളുടെ ടിക്കറ്റ് ബുക്കിങ്ങുകളും ഹോട്ടല് കണ്ഫര്മേഷനുകളും മനസ്സിലാക്കി യാത്രാ പദ്ധതികള്ക്ക് അനുയോജ്യമായ നിര്ദ്ദേശങ്ങള് ആപ്പ് തനിയെ നല്കും.
ഇനി ഇംഗ്ലീഷിന് പകരം ഹിന്ദിയിലും റെസ്റ്റോറന്റുകളെക്കുറിച്ചോ വിനോദസഞ്ചാര കേന്ദ്രങ്ങളെക്കുറിച്ചോ ചോദിക്കാം. ഓസ്ട്രേലിയ, ബ്രസീല്, കാനഡ, മെക്സിക്കോ തുടങ്ങി 150ലധികം രാജ്യങ്ങളിലാണ് ഗൂഗിള് പുതിയ ‘ആസ്ക് മാപ്സ്’ എഐ ഫീച്ചറുകള് ലഭ്യമാക്കിയിരിക്കുന്നത്. യാത്രകളെയും ഭക്ഷണ അനുഭവങ്ങളെയും തികച്ചും ലളിതമാക്കുന്ന രീതിയിലേക്കാണ് ഗൂഗിള് മാപ്സിന്റെ ഈ പുതിയ മാറ്റം.
by Midhun HP News | Aug 8, 2026 | Latest News, കേരളം
തിരുവനന്തപുരം: കാസര്ഗോഡ് ജില്ലയിലെ എന്ഡോസള്ഫാന് ദുരിതബാധിതരുടെ പുനരധിവാസത്തിനും ക്ഷേമത്തിനുമായി നടപ്പിലാക്കി വരുന്ന സമഗ്ര പാക്കേജായ ‘സ്നേഹസാന്ത്വനം’ പദ്ധതിയുടെ തുടര്പ്രവര്ത്തനങ്ങള്ക്കായി 14.40 കോടി രൂപയുടെ ഭരണാനുമതി. 2026-2027 സാമ്പത്തിക വര്ഷത്തെ സംസ്ഥാന ബജറ്റിലെ ധനാഭ്യര്ത്ഥനയില് ഉള്പ്പെടുത്തി സാമൂഹ്യനീതി വകുപ്പ് വഴിയാണ് സര്ക്കാര് തുക അനുവദിച്ചിരിക്കുന്നത്.
അനുവദിച്ച തുകയില് പ്രധാന പങ്കും ദുരിതബാധിതര്ക്കുള്ള നേരിട്ടുള്ള സാമ്പത്തിക ആശ്വാസത്തിനായാണ് വിനിയോഗിക്കുക എന്ന് മുഖ്യമന്ത്രിയുടെ ഓഫീസ് അറിയിച്ചു. നിലവില് ധനസഹായം ലഭിക്കുന്ന 5,208 എന്ഡോസള്ഫാന് ഗുണഭോക്താക്കള്ക്ക് 2026 ഏപ്രില് മുതല് 2027 മാര്ച്ച് വരെയുള്ള മാസാന്ത ആശ്വാസ ധനസഹായത്തിനായി 9,84,31,200 രൂപയും പുതുതായി ലിസ്റ്റില് ഉള്പ്പെടുന്നതായി പ്രതീക്ഷിക്കുന്ന 1,000 ഗുണഭോക്താക്കള്ക്കായി 2,64,00,000 രൂപയും മാറ്റിവെച്ചിട്ടുണ്ട്. കൂടാതെ, ദുരിതബാധിതരെ പരിചരിക്കുന്ന 771 കെയര് ഗിവേഴ്സിന് നല്കുന്ന മാസാന്ത ധനസഹായമായ ‘ആശ്വാസകിരണം’ പദ്ധതിക്കായി 64,76,400 രൂപയും വകയിരുത്തി.
ദുരിതബാധിത കുടുംബങ്ങളുടെ സാമൂഹികവും വിദ്യാഭ്യാസപരവുമായ പിന്തുണ ഉറപ്പാക്കുന്നതിന്റെ ഭാഗമായി 400 കുട്ടികളുടെ 2026-27 അധ്യയന വര്ഷത്തെ വിദ്യാഭ്യാസ ആനുകൂല്യങ്ങള്ക്കായി 10,05,000 രൂപ അനുവദിച്ചിട്ടുണ്ട്. പ്രദേശത്തെ 10 മാതൃകാ ചൈല്ഡ് പുനരധിവാസ കേന്ദ്രങ്ങളുടെ ഭൗതിക സാഹചര്യങ്ങളും സേവനങ്ങളും നവീകരിച്ച് മെച്ചപ്പെടുത്തുന്നതിനായി 1,16,87,400 രൂപയും വിനിയോഗിക്കുമെന്നും മുഖ്യമന്ത്രിയുടെ ഓഫീസ് വ്യക്തമാക്കി.
ദുരിതബാധിത കുടുംബങ്ങളുടെ സാമൂഹികവും വിദ്യാഭ്യാസപരവുമായ പിന്തുണ ഉറപ്പാക്കുന്നതിന്റെ ഭാഗമായി 400 കുട്ടികളുടെ 2026-27 അധ്യയന വര്ഷത്തെ വിദ്യാഭ്യാസ ആനുകൂല്യങ്ങള്ക്കായി 10,05,000 രൂപ അനുവദിച്ചിട്ടുണ്ട്. പ്രദേശത്തെ 10 മാതൃകാ ചൈല്ഡ് പുനരധിവാസ കേന്ദ്രങ്ങളുടെ ഭൗതിക സാഹചര്യങ്ങളും സേവനങ്ങളും നവീകരിച്ച് മെച്ചപ്പെടുത്തുന്നതിനായി 1,16,87,400 രൂപയും വിനിയോഗിക്കുമെന്നും മുഖ്യമന്ത്രിയുടെ ഓഫീസ് വ്യക്തമാക്കി.
by Midhun HP News | Aug 8, 2026 | Latest News, കേരളം
തിരുവനന്തപുരം: കേരളത്തിലെ സ്വാതന്ത്ര്യ ദിനാഘോഷങ്ങളില് ദേശീയ ഗീതമായ വന്ദേമാതരം മുഴുവനായും ആലപിക്കണമെന്ന് ഉത്തരവിറക്കി സംസ്ഥാന സര്ക്കാര്. വന്ദേമാതരം നിര്ബന്ധമാക്കാനുള്ള കേന്ദ്ര തീരുമാനത്തിന് പിന്നാലെയാണ് ഇതുസംബന്ധിച്ച് ചീഫ് സെക്രട്ടറി, തദ്ദേശ വകുപ്പ് സെക്രട്ടറിക്ക് കത്ത് നല്കിയത്.
വന്ദേമാതരം ആലപിക്കുന്ന കാര്യത്തില് പുതിയ നിര്ദേശങ്ങള് കേന്ദ്രസര്ക്കാര് പുറത്തിറക്കിയിരുന്നു. സംസ്ഥാന ഗീതത്തിന് ശേഷം ദേശീയ ഗീതമായ വന്ദേമാതരവും പിന്നെ ദേശീയ ഗാനവും എന്ന ക്രമത്തില് ആലപിക്കണമെന്നായിരുന്നു പുതിയ മാര്ഗനിര്ദേശം. ആദ്യം സംസ്ഥാന ഗീതം ഇല്ലെങ്കില് ആദ്യം വന്ദേമാതരം അതിന് ശേഷം ദേശീയ ഗാനം എന്ന ക്രമത്തിലാണ് ആലപിക്കേണ്ടത്.
വന്ദേമാതരത്തില് യഥാര്ഥ കവിതയിലെ ആറ് ചരണങ്ങളും പൂര്ണമായി ആലപിക്കണമെന്ന നിര്ദേശമുണ്ടായിരുന്നു. ദേശീയ ഗീതത്തിന്റെ ഔദ്യോഗിക ആലാപന സമയം മൂന്ന് മിനിറ്റും 10 സെക്കന്റുമാണ്. ദേശീയ ഗാനം ആലപിക്കുമ്പോള് അതിന്റെ വരികളും ചിഹ്നങ്ങളും അടക്കം ശ്രദ്ധിച്ച് തന്നെ ആലപിക്കണമെന്ന നിര്ദേശവുമുണ്ട്.
ഇക്കാര്യത്തില് കേന്ദ്ര ആഭ്യന്തര മന്ത്രാലയം സംസ്ഥാനങ്ങള്ക്ക് മാര്ഗ നിര്ദേശം അയച്ചിട്ടുണ്ട്. സംസ്ഥാനങ്ങള് അവര്ക്ക് കീഴിലുള്ള കേന്ദ്രങ്ങള്ക്ക് ഇത് സംബന്ധിച്ച നിര്ദേശങ്ങല് നല്കണമെന്നും ആഭ്യന്തര മന്ത്രാലയം ഉത്തരവിട്ടിരുന്നു. ഇതിന്റെ ഭാഗമായാണ് സംസ്ഥാന ചീഫ് സെക്രട്ടറി, തദ്ദേശ വകുപ്പ് സെക്രട്ടറിക്ക് വന്ദേമാതരം ആലപിക്കേണ്ടത് സംബന്ധിച്ച് നിര്ദേശങ്ങള് നല്കിയത്.
by Midhun HP News | Aug 8, 2026 | Latest News, കേരളം
നടന് ഉല്ലാസ് പന്തളത്തിന് സഹായവുമായി നടന് ബാല. പക്ഷാഘാതത്തെ തുടര്ന്ന് ആരോഗ്യ പ്രശ്നങ്ങള് നേരിടുന്ന താരത്തിനും കുടുംബത്തിനും ഓണക്കാലത്ത് ധനസഹായം നല്കിയാണ് ബാല സഹായവുമായി മുന്നോട്ട് വന്നത്. ഉല്ലാസിന് പണം കൈമാറുന്നതിന്റെ വിഡിയോ പങ്കുവച്ചിട്ടുണ്ട് ബാല.
”ഇദ്ദേഹത്തിന് കുറച്ച് വര്ഷങ്ങള് മുമ്പ് ജീവിതത്തില് വലിയൊരു അടിയേറ്റു. അതില് നിന്നും തിരിച്ചുവന്നപ്പോള് സ്ട്രോക്ക് വന്നു. ഒരാള് തളര്ന്നു പോയാല് നാല് പേര് ചേര്ന്ന് കൈ കൊടുക്കണം. അതാണ് ഏറ്റവും വലിയ ദൈവ തുണ. ഇതുപോലെയുള്ള കലാകാരന്മാര്ക്ക് കലയല്ലാതെ വേറെ ജോലി അറിയില്ല. ഇവര്ക്ക് ചെയ്യാനാകുന്നത് നമുക്ക് ചെയ്യണം. എത്രോ മിമിക്രി കലാകാരന്മാരുണ്ട്, ഇത് കാണുന്ന സാധാരണക്കാരുണ്ട്, ബാലയെ ഇഷ്ടപ്പെടുന്നവരുണ്ട്.’ ബാല പറയുന്നു.
”ഞാന് നിങ്ങളോട് സഹായം ചോദിക്കുകയാണ്. ഞാന് എന്നെക്കൊണ്ട് ചെയ്യാന് പറ്റുന്നത് മനസു കൊണ്ട് ചെയ്യുന്നു. ഇത് കാശിന്റെ കണക്കല്ല ഇത്. ഈ കുട്ടികള് വലിയ സ്വപ്നങ്ങളോടെയാണ് നില്ക്കുന്നത്. മികച്ച കലാകാരനായ ഉല്ലാസ് പന്തളത്തെ എനിക്ക് തിരിച്ചു വേണം. മലയാളത്തിന് തിരിച്ചു വേണം. ഞങ്ങള് ഒരുപാട് ഷോകള് ഒരുമിച്ച് ചെയ്തിട്ടുണ്ട്. തിരിച്ചു വരും. സിനിമയില് കയറണം. ഈ വിഡിയോ പോലും എനിക്ക് വേണ്ടിയല്ല എടുക്കുന്നത്. മരണത്തെ മുഖാമുഖം കണ്ട് വന്ന എനിക്ക് പബ്ലിസിറ്റി വേണ്ട. ഇദ്ദേഹത്തിനും കുടുംബത്തിന് നന്മയുണ്ടാകണം” എന്നും ബാല പറയുന്നു.
ഓണക്കാലത്ത് കുടുംബത്തിനുള്ളതെന്ന് പറഞ്ഞ് പണം കൈമാറിയ ബാല ആരോഗ്യം ശരിയാകുന്നത് വരെ ഞാന് നോക്കിക്കോളാം എന്നും പറയുന്നുണ്ട്. ആരോഗ്യം എല്ലാം ശരിയായി കഴിഞ്ഞ് മമ്മൂട്ടി, മോഹന്ലാല്, തുടങ്ങിയവര്ക്കൊപ്പം അഭിനയിക്കുമ്പോള് നമ്മളെ മറക്കരുതെന്നും ബാല പറയുന്നുണ്ട്.
മിമിക്രി വേദികളിലൂടെയാണ് ഉല്ലാസ് പന്തളം താരമാകുന്നത്. റിയാലിറ്റി ഷോകളിലൂടെ ചിരിപ്പിച്ച് മലയാളികളുടെ വീട്ടിലെ ഒരംഗമായി മാറുകയായിരുന്നു ഉല്ലാസ്. നിരവധി സിനിമകളിലും അഭിനയിച്ചിട്ടുണ്ട്. കഴിഞ്ഞ വര്ഷമാണ് താരത്തിന് പക്ഷാഘാതം ഉണ്ടാകുന്നത്. ശരീരത്തിന്റെ ഇടതുഭാഗം ഭാഗികമായി തളര്ന്നുപോയി. വേദികള് നഷ്ടമായതോടെ ഹോട്ടല് തുടങ്ങിയിരുന്നു. വീണ്ടും വേദികളിലേക്ക് തിരികെ വരാനുള്ള ശ്രമത്തിലാണ് ഉല്ലാസ്.
by Midhun HP News | Aug 8, 2026 | Latest News, ജില്ലാ വാർത്ത
തിരുവനന്തപുരം: എറണാകുളത്ത് അന്താരാഷ്ട്ര നിലവാരത്തിലുള്ള ക്രിക്കറ്റ് സ്റ്റേഡിയം നിർമ്മിക്കുന്നതിന് കേരള സർക്കാർ ഔദ്യോഗിക അനുമതി നൽകി. നെടുമ്പാശ്ശേരി അന്താരാഷ്ട്ര വിമാനത്താവളത്തിന് സമീപം ആലുവ താലൂക്കിലെ ചെങ്ങമനാട് വില്ലേജിൽ 10.1312 ഹെക്ടർ ഭൂമി തരം മാറ്റാനാണ് കൃഷി വകുപ്പ് ഇന്നലെ ഉത്തരവിറക്കിയത് (G.O NO. 61/2026/AGRI). 2008-ലെ കേരള നെൽവയൽ-തണ്ണീർത്തട സംരക്ഷണ നിയമത്തിലെ വകുപ്പ് 10(2) പ്രകാരമാണ് ഈ നടപടി.
കേരള സ്പോർട്സ് നയം 2023, കേരള സ്പോർട്സ് ആക്ട് 2025, കേരള സ്പോർട്സ് ഇൻഫ്രാസ്ട്രക്ചർ ഡെവലപ്മെന്റ് സ്കീം 2025 എന്നിവയുടെ അടിസ്ഥാനത്തിൽ പദ്ധതിയെ ‘പൊതു ആവശ്യം’ ആയി പരിഗണിച്ചാണ് അനുമതി നൽകിയിട്ടുള്ളത്. പരിസ്ഥിതി സംരക്ഷണവും ജലസംരക്ഷണവും ഉറപ്പുവരുത്തുന്നതിനുള്ള നിർബന്ധ വ്യവസ്ഥകളും സർക്കാർ മുന്നോട്ട് വെച്ചിട്ടുണ്ട്.കേരള ക്രിക്കറ്റ് അസോസിയേഷൻ മുൻ സർക്കാരിന്റെ കാലത്ത് സമർപ്പിച്ച അപേക്ഷ സംസ്ഥാനതല സമിതി വിശദമായി പരിശോധിച്ച് തരംമാറ്റത്തിന് ശുപാർശ ചെയ്തിരുന്നു. എങ്കിലും നിയമപരമായ ചില സാങ്കേതിക തടസ്സങ്ങൾ കാരണം അപേക്ഷ അംഗീകരിക്കപ്പെട്ടിരുന്നില്ല.
തുടർന്ന് മുൻ മുഖ്യമന്ത്രി പിണറായി വിജയൻ, റവന്യൂ മന്ത്രി കെ. രാജൻ, സ്പോർട്സ് വകുപ്പ് മന്ത്രി വി. അബ്ദുറഹ്മാൻ, കൃഷി മന്ത്രി പി. പ്രസാദ് എന്നിവരുടെ നേതൃത്വത്തിൽ പദ്ധതിക്കായി നിയമഭേദഗതി കൊണ്ടുവരികയും എൽ.ഡി.എഫ് സർക്കാരിന്റെ അവസാന ക്യാബിനറ്റിൽ പദ്ധതിയെ ‘പൊതു ആവശ്യം’ ആയി പ്രഖ്യാപിക്കുകയുമായിരുന്നു. അതോടൊപ്പം കെ.സി.എയ്ക്ക് ഭൂപരിഷ്കരണ നിയമത്തിലും ഇളവ് അനുവദിക്കുകയും ചെയ്തു.
തുടർന്ന് പദ്ധതി എത്രയും വേഗത്തിൽ പൂർത്തിയാക്കുന്നതിനായി മുഖ്യമന്ത്രി വി.ഡി. സതീശൻ നടപടിക്രമങ്ങൾ പൂർത്തിയാക്കുന്നതിൽ നേരിട്ട് ഇടപെടുകയും കൃഷിവകുപ്പ് മന്ത്രി ടി. സിദ്ദിഖ്, കായിക വകുപ്പ് മന്ത്രി ഒ.കെ. ജനീഷ് എന്നിവർ ആവശ്യമായ നിർദ്ദേശങ്ങൾ നൽകുകയും ചെയ്തു. ഇതിനെത്തുടർന്ന് കെ.സി.എ സമർപ്പിച്ച അപേക്ഷ സംസ്ഥാനതല സമിതി വീണ്ടും പരിശോധിച്ച് അന്താരാഷ്ട്ര പദ്ധതിക്കായി
തരംമാറ്റത്തിന് ശുപാർശ നൽകുകയും ചെയ്തു. ആ ശുപാർശ സംസ്ഥാന സർക്കാർ പൂർണ്ണമായി അംഗീകരിക്കുകയായിരുന്നു.
കേരളത്തിലെ കായിക അടിസ്ഥാന സൗകര്യ വികസനത്തിൽ നാഴികക്കല്ലായ തീരുമാനമാണിതെന്ന് കെ.സി.എ പ്രസിഡന്റ് അഡ്വ. ശ്രീജിത്ത് വി. നായർ പറഞ്ഞു. നിർദ്ദിഷ്ട അന്താരാഷ്ട്ര സ്റ്റേഡിയം ക്രിക്കറ്റ് താരങ്ങൾക്കും ആരാധകർക്കും ലോകോത്തര സൗകര്യങ്ങൾ ഒരുക്കും.
ദേശീയ-അന്തർദേശീയ മത്സരങ്ങൾക്ക് വേദിയാകുന്നതോടെ കായിക ടൂറിസവും സംസ്ഥാനത്തിന്റെ സമ്പദ്വ്യവസ്ഥയും കുതിച്ചുയരും. പദ്ധതിക്കായി ബി.സി.സി.ഐയുടെ അനുമതി നേടിയതിനും സർക്കാരുകളുമായി ഫലപ്രദമായി ഏകോപനം നടത്തിയതിനും മുൻ കെ.സി.എ പ്രസിഡന്റും നിലവിലെ ഡബ്ല്യു.പി.എൽ ചെയർമാനുമായ ജയേഷ് ജോർജിന് കെ.സി.എയുടെ പ്രത്യേക നന്ദിയും അദ്ദേഹം രേഖപ്പെടുത്തി.
ബി.സി.സി.ഐ ഭാരവാഹികളും ഇൻഫ്രാസ്ട്രക്ചർ കമ്മിറ്റിയും പദ്ധതി പ്രദേശം ഉടൻ സന്ദർശിക്കുമെന്ന് ബി.സി.സി.ഐ ഡബ്ല്യു.പി.എൽ ചെയർമാനും കെസിഎ മുൻ പ്രസിഡന്റുമായ ജയേഷ് ജോർജ് വ്യക്തമാക്കി. മുൻപ് കേരളത്തിൽ നടന്ന ഐ.പി.എൽ ലേലത്തിൽ പങ്കെടുക്കാൻ എത്തിയ ഐ.സി.സി ചെയർമാൻ ജയ് ഷാ പദ്ധതി പ്രദേശം നേരിട്ട് സന്ദർശിക്കുകയും തുടർനടപടികൾക്കായി നിർദ്ദേശം നൽകുകയും ചെയ്തിരുന്നു. നടപടിക്രമങ്ങൾ വേഗത്തിൽ പൂർത്തിയാക്കി അനുമതി നൽകിയ മുഖ്യമന്ത്രി വി.ഡി. സതീശനും സർക്കാരിനും ഹൃദയം നിറഞ്ഞ നന്ദിയും അദ്ദേഹം രേഖപ്പെടുത്തി.
എല്ലാ പാരിസ്ഥിതിക മാനദണ്ഡങ്ങളും പൂർണ്ണമായി പാലിച്ച് സുസ്ഥിരവും ലോകോത്തരവുമായ സ്റ്റേഡിയം കേരളത്തിന് സമ്മാനിക്കുമെന്ന് കെ.സി.എ സെക്രട്ടറി വിനോദ് എസ്. കുമാർ വ്യക്തമാക്കി. പദ്ധതിയിൽ ക്രിക്കറ്റിന് പുറമെ മറ്റ് കായിക ഇനങ്ങൾക്കുള്ള സൗകര്യങ്ങളും ഉൾപ്പെടുത്തുമെന്ന് അറിയിച്ച അദ്ദേഹം സ്റ്റേഡിയം നിർമ്മാണം വിജയകരമായി പൂർത്തീകരിക്കാൻ എല്ലാവരുടെയും പിന്തുണ ഉണ്ടാകണമെന്നും അഭ്യർത്ഥിച്ചു.
Recent Comments