by Midhun HP News | Oct 20, 2026 | Latest News, കേരളം
കൊച്ചി: ജോലിയിലും പഠനത്തിലും ഏര്‍പ്പെട്ടിരിക്കുന്ന യുവാക്കളുടെ അനുപാതത്തില്‍ രാജ്യത്ത് ഒന്നാമത് എറണാകുളം ജില്ല. ഇവിടെ പത്തില്‍ ഒന്‍പതുപേരും ഏതെങ്കിലും ജോലിയിലോ പഠനത്തിലോ പരിശീലനത്തിലോ പങ്കാളികളാകുന്നുവെന്നാണ് കണക്കുകള്‍ വ്യക്തമാക്കുന്നത്. രാജ്യത്തെ കുടുതല്‍ ജനസംഖ്യയുള്ള നൂറ് ജില്ലകളില്‍ തൊഴില്‍ വിദ്യാഭ്യാസപരീശിലനം എന്നിവയില്‍ ഏര്‍പ്പെടാത്ത യുവാക്കളുടെ അനുപാതം (നീറ്റ്) അടിസ്ഥാനപ്പെടുത്തിയാണ് കണക്കുകള്‍.
ദേശീയ സ്റ്റാറ്റിസ്റ്റിക്കല്‍ ഓഫീസിന്റെ സര്‍വേ പ്രകാരം, 15-29 വയസ്സിനിടയിലുള്ളവരുടെ എറണാകുളത്തെ നീറ്റ് നിരക്ക് 9.6 ശതമാനമാണ്. കേരളത്തിന്റെ മൊത്തത്തിലുള്ള നീറ്റ് നിരക്ക് 21.5 ശതമാനമാണ്. സംസ്ഥാനത്ത് മലപ്പുറത്താണ് ഈ നിരക്ക് ഏറ്റവും കൂടുതല്‍, തൃശൂര്‍ 17.8, കോഴിക്കോട് 19.3, തിരുവനന്തപുരം 21.3, ആലപ്പുഴ 22.2, കണ്ണൂര്‍ 23.0, പാലക്കാട് 23.8, കാസര്‍കോട് 25.8, കൊല്ലം 28.5 എന്നിങ്ങനെയാണ്.
ദേശീയ തലത്തില്‍ കോയമ്പത്തൂരാണ് എറണാകുളത്തിന് തൊട്ടുപിന്നില്‍ (14.5 ശതമാനം). മൂന്നാമത് 15 ശതമാനവുമായി ബംഗളൂരുവുമാണ്. 17.8 ശതമാനം നിരക്കുമായി തൃശൂരും മികച്ച 10 ജില്ലകളുടെ പട്ടികയില്‍ ഇടംനേടി. ഇതോടെ കേരളത്തില്‍ നിന്ന് രണ്ട് ജില്ലകള്‍ ഈ പട്ടികയിലുണ്ട്. രാജ്യത്തുടനീളം 45.9 ശതമാനം ജില്ലകളിലും നീറ്റ് നിരക്ക് 20-നും 30-നും ഇടയിലാണ്. 23.7 ശതമാനം ജില്ലകളില്‍ ഇത് 30 ശതമാനത്തിന് മുകളിലാണ്. ഉയര്‍ന്ന വിദ്യാഭ്യാസ നിലവാരവും വൈവിധ്യമാര്‍ന്ന സമ്പദ്വ്യവസ്ഥയുമാണ് എറണാകുളത്തിന്റെ ഈ നേട്ടത്തിന് കാരണമെന്ന് നാഷണല്‍ ഇന്‍സ്റ്റിറ്റ്യൂട്ട് ഓഫ് പബ്ലിക് ഫിനാന്‍സ് ആന്‍ഡ് പോളിസിയിലെ ലേഖ ചക്രവര്‍ത്തി പറയുന്നു.
‘കൊച്ചയില്‍ പ്രൊഫഷണല്‍, സാങ്കേതിക, പാരാമെഡിക്കല്‍ കോഴ്‌സുകളിലെ ഉയര്‍ന്ന പ്രവേശനം നിരവധി യുവാക്കളെ വിദ്യാഭ്യാസ രംഗത്ത് നിലനിര്‍ത്തുന്നു. ഇവിടുത്തെ തുറമുഖം, ലോജിസ്റ്റിക്‌സ് മേഖല, ഐ.ടി വ്യവസായം, ആരോഗ്യം, ടൂറിസം, ചില്ലറ വില്‍പ്പന, ഗിഗ് ഇക്കോണമി എന്നിവ തൊഴില്‍ മേഖലയിലേക്ക് പ്രവേശിക്കുന്നവര്‍ക്ക് വലിയ അവസരങ്ങളാണ് നല്‍കുന്നത്,’ അവര്‍ പറഞ്ഞു.
എറണാകുളത്തിന്റെ പ്രകടനം യുവാക്കളും സാമ്പത്തിക അവസരങ്ങളും തമ്മിലുള്ള ശക്തമായ ബന്ധത്തെയാണ് സൂചിപ്പിക്കുന്നതെന്ന് ബംഗളൂരു ക്രൈസ്റ്റ് യൂണിവേഴ്സിറ്റിയിലെ ഇക്കണോമിക്സ് അസിസ്റ്റന്റ് പ്രൊഫസറും ഗവേഷകനുമായ എംപി. ജയേഷ് പറയുന്നു. ‘എറണാകുളത്തിലെ യുവാക്കള്‍ തൊഴില്‍മേഖലയിലേക്ക് കടന്നുവരുന്നു എന്ന് കണക്കുകള്‍ കാണിക്കുന്നുണ്ടെങ്കിലും, അത് ഒരുഭാഗം മാത്രമാണ്. ബിരുദധാരികളായ പല യുവാക്കളും അവരവരുടെ യോഗ്യതക്കനുസരിച്ചുള്ളതല്ലാത്ത, കുറഞ്ഞ ശമ്പളമുള്ള, ഭാവിയില്ലാത്ത ജോലികളില്‍ കുടുങ്ങിക്കിടക്കുന്നു എന്ന യാഥാര്‍ത്ഥ്യത്തെ കുറഞ്ഞ നിഷ്‌ക്രിയ നിരക്ക് മറച്ചുപിടിക്കുന്നു. യഥാര്‍ത്ഥ ലക്ഷ്യം യുവാക്കള്‍ക്ക് എന്തെങ്കിലും ജോലി നല്‍കുക മാത്രമല്ല; മറിച്ച് അവര്‍ക്ക് ന്യായമായ ശമ്പളവും വളരാനുള്ള ഇടവും ഭാവി കെട്ടിപ്പടുക്കാന്‍ കഴിയുന്ന ജോലിയും ഉണ്ടെന്ന് ഉറപ്പാക്കുക എന്നതാണ്,’ അദ്ദേഹം പറഞ്ഞു.
by Midhun HP News | Oct 20, 2026 | Latest News, ജില്ലാ വാർത്ത
തിരുവനന്തപുരം: നവരാത്രി മഹോത്സവത്തോടനുബന്ധിച്ച് പ്രമുഖ ക്ഷേത്രങ്ങളില്‍ വന്‍ ഭക്തജനതിരക്ക്. വിദ്യാരംഭത്തോടനുബന്ധിച്ച് വിപുലമായ ക്രമീകരണങ്ങളാണ് ഒരുക്കിയിരിക്കുന്നത്. കേരളത്തിന് പുറത്താണെങ്കിലും മലയാളികള്‍ വിദ്യാരംഭത്തിന് ഏറ്റവും കൂടുതല്‍ ആശ്രയിക്കുന്നത് കൊല്ലൂര്‍ മൂകാംബിക ക്ഷേത്രമാണ്. മൂകാംബികയില്‍ പുലര്‍ച്ചെ 3 മണിക്ക് നടതുറക്കും. മുഖ്യതന്ത്രി രാമചന്ദ്ര അഡിഗയുടെ കാര്‍മികത്വത്തില്‍ സരസ്വതി മണ്ഡപത്തിലും മണ്ഡപ വരാന്തയിലുമായി കുരുന്നുകള്‍ ആദ്യാക്ഷരം കുറിക്കും.
ചോറ്റാനിക്കരയില്‍ തന്ത്രി എരൂര്‍ പുലിയന്നൂര്‍ ദിലീപന്‍ നമ്പൂതിരിപ്പാടിന്റെ കാര്‍മികത്വത്തില്‍ പന്തീരടി പൂജയും മേല്‍ശാന്തിമാരായ എന്‍ വി കൃഷ്ണന്‍ നമ്പൂതിരിയുടെയും സി എല്‍ സതീഷ് നമ്പൂതിരിയുടെയും കാര്‍മികത്വത്തില്‍ സരസ്വതി മണ്ഡപത്തിലെ സരസ്വതി പൂജയും കഴിഞ്ഞാണ് എഴുത്തിനിരുത്ത് ആരംഭിക്കുക. ക്ഷേത്രത്തിന്റെ കിഴക്കേ നടയ്ക്കല്‍ പ്രത്യേകം തയ്യാറാക്കിയ ഇരിപ്പിടങ്ങളില്‍ 16 വൈദിക ബ്രാഹ്മണര്‍ നേതൃത്വം നല്‍കും. കുരുന്നുകള്‍ക്ക് പൂജിച്ച സാരസ്വതാരിഷ്ടം, പഞ്ചാമൃതം, പഴം തുടങ്ങിയവ നല്‍കുമെന്ന് ദേവസ്വം അധികൃതര്‍ അറിയിച്ചു.
തിരൂരിലെ തുഞ്ചന്‍പറമ്പില്‍ പുലര്‍ച്ചെ മുതല്‍ എഴുത്തിനിരുത്ത് ചടങ്ങുകള്‍ നടക്കും. സാംസ്‌കാരിക-സാഹിത്യ രംഗത്തെ പ്രമുഖരും ആശാന്മാരും ചേര്‍ന്നാണ് കുരുന്നുകളുടെ നാവില്‍ ഹരിശ്രീ കുറിക്കുന്നത്. ഗുരുവായൂര്‍ ശ്രീകൃഷ്ണസ്വാമി ക്ഷേത്രത്തില്‍ രാവിലെ 7 മണിക്ക് ചടങ്ങുകള്‍ ആരംഭിക്കും. ക്ഷേത്രത്തിലെ വടക്കേ പഠിപ്പുര മണ്ഡപത്തിലാണ് എഴുത്തിനിരുത്ത് നടക്കുക. പുലര്‍ച്ചെ ശീവേലിയും സരസ്വതി പൂജയും കഴിഞ്ഞാണ് വിദ്യാരംഭം.
പറവൂര്‍ ദക്ഷിണ മൂകാംബിക ക്ഷേത്രത്തില്‍ തിരുവിതാംകൂര്‍ ദേവസ്വം ഡെപ്യൂട്ടി കമ്മീഷണര്‍ കെ ഇന്ദുകുമാരി വിദ്യാരംഭത്തിന് തുടക്കമിടും. ദേവസ്വവും ക്ഷേത്രോപദേശക സമിതിയും ചേര്‍ന്ന് തെരഞ്ഞെടുത്ത ആചാര്യന്മാര്‍ ആദ്യാക്ഷരം പകരും. മഹാനവമി ദിവസത്തിലും മീനത്തിലെ അത്തം നാളും ഒഴികെ എല്ലാ ദിവസവും എഴുത്തിനിരുത്തല്‍ ചടങ്ങ് നടക്കുന്ന ചേര്‍പ്പ് തിരുവുള്ളക്കാവ് ക്ഷേത്രത്തിലും ഇക്കുറി തിരക്കേറും.
പനച്ചിക്കാട് സരസ്വതി ക്ഷേത്രം, ആറ്റുകാല്‍ ഭഗവതി ക്ഷേത്രം, തിരുവമ്പാടി, പാറമേക്കാവ് ക്ഷേത്രങ്ങള്‍ തുടങ്ങിയ ക്ഷേത്രങ്ങളിലും ആയിരക്കണക്കിന് കുരുന്നുകള്‍ ആദ്യാക്ഷരം തേടി എത്തും. തിരക്ക് നിയന്ത്രിക്കുന്നതിനായി പല പ്രമുഖ ക്ഷേത്രങ്ങളിലും മുന്‍കൂട്ടി ബുക്കിംഗ് ചെയ്യാനുള്ള സൗകര്യങ്ങള്‍ ഏര്‍പ്പെടുത്തിയിട്ടുണ്ട്.
by Midhun HP News | Oct 20, 2026 | Latest News, കേരളം
തൊടുപുഴ: നാച്വറല്‍ ഇന്‍ഫിനിറ്റി പൂളില്‍ 800 അടി താഴ്ചയിലേക്കു വീണ ഡോക്ടറെ സാഹസികമായി രക്ഷപ്പെടുത്തി അഗ്‌നിരക്ഷാസേന. വാഗമണില്‍നിന്നു 2 കിലോമീറ്റര്‍ അകലെയുള്ള നാച്വറല്‍ ഇന്‍ഫിനിറ്റി പൂളില്‍ വിനോദയാത്രയ്‌ക്കെത്തിയ ഉത്തര്‍പ്രദേശ് സ്വദേശിയായ 28കാരിയാണ് അപകടത്തില്‍പെട്ടത്. സഞ്ജീവ് ഗാന്ധി ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സിലെ ഇഎന്‍ടി സര്‍ജനായ സുഖിയ ജെയിനെ ഈരാറ്റുപേട്ടയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
കുത്തനെയുള്ളതും നടന്നു കയറാന്‍ ബുദ്ധിമുട്ടുള്ളതുമായ പാതയിലൂടെ നാച്വറല്‍ ഇന്‍ഫിനിറ്റി പൂളിലേക്ക് ഇറങ്ങിച്ചെല്ലുന്നതിനിടെ 800 അടി താഴ്ചയിലേക്ക് ഡോക്ടര്‍ കാല്‍ വഴുതി വീഴുകയായിരുന്നു. വീഴ്ചയില്‍ ഇവരുടെ പാദം ഒടിഞ്ഞു തൂങ്ങുകയും നടക്കാന്‍ കഴിയാത്ത അവസ്ഥയിലാകുകയും ചെയ്തു.
വിവരം അറിഞ്ഞ് പീരുമേട് നിന്നുള്ള അഗ്നിരക്ഷാ സേന സ്ഥലത്തെത്തി ഇവരെ രക്ഷപ്പെടുത്തുകയായിരുന്നു. സീനിയര്‍ ഫയര്‍ ആന്‍ഡ് റെസ്‌ക്യൂ ഓഫിസര്‍ നവാസിന്റെ നേതൃത്വത്തില്‍, ഫയര്‍ ആന്‍ഡ് റെസ്‌ക്യൂ ഓഫിസര്‍മാരായ ആനന്ദ്, രജീഷ്, രാഗേഷ് ലാല്‍, അലക്‌സ് സൈമണ്‍ എന്നിവരടങ്ങിയ സംഘമാണ് യുവതിയെ രക്ഷപ്പെടുത്തിയത്. പരിക്കേറ്റ സുഖിയ ജെയിന്‍ ഈരാറ്റുപേട്ട ആശുപത്രിയില്‍ ചികിത്സയിലാണ്.
by Midhun HP News | Oct 20, 2026 | Latest News, ജില്ലാ വാർത്ത
തിരുവനന്തപുരം: 2027ലെ കേരളത്തിലെ പൊതു അവധി ദിനങ്ങള്‍ സംസ്ഥാന സര്‍ക്കാര്‍ പ്രഖ്യാപിച്ചു. ഒക്ടോബര്‍ 18ന് പ്രസിദ്ധീകരിച്ച കേരള ഗസറ്റിലാണ് അവധി ദിനങ്ങള്‍ സംബന്ധിച്ച വിജ്ഞാപനമുള്ളത്. റിപ്പബ്ലിക് ദിനം, വിഷു, ഈസ്റ്റര്‍, ബക്രീദ്, ഓണം, ക്രിസ്മസ് തുടങ്ങി 21 ദിവസങ്ങളാണ് പട്ടികയില്‍ പൊതു അവധികളായി ഉള്‍പ്പെടുത്തിയിരിക്കുന്നത്. ഇതിന് പുറമെ എല്ലാ ഞായറാഴ്ചകളും മാസത്തിലെ രണ്ടാം ശനിയാഴ്ചകളും സര്‍ക്കാര്‍ ഓഫീസുകള്‍ക്ക് അവധിയായിരിക്കും.
ജനുവരി രണ്ടിന് മന്നം ജയന്തിയോടെയാണ് 2027ലെ പൊതു അവധി ദിനങ്ങള്‍ ആരംഭിക്കുന്നത്. മാര്‍ച്ചില്‍ മഹാശിവരാത്രി, റംസാന്‍, പെസഹ വ്യാഴം, ദുഃഖവെള്ളി തുടങ്ങിയ അവധി ദിനങ്ങളുണ്ട്. ഏപ്രിലില്‍ അംബേദ്കര്‍ ജയന്തിയും വിഷുവും മെയില്‍ മെയ് ദിനവും ബക്രീദും അവധികളാണ്. ഓണം സെപ്റ്റംബറിലാണ്. മൂന്നാം ഓണം സെപ്റ്റംബര്‍ 13നും നാലാം ഓണം സെപ്റ്റംബര്‍ 14നും ശ്രീനാരായണ ഗുരു ജയന്തി സെപ്റ്റംബര്‍ 15നുമാണ്. സെപ്റ്റംബര്‍ 22ന് ശ്രീനാരായണ ഗുരു സമാധി ദിനവും അവധിയായിരിക്കും.
ഒക്ടോബര്‍ രണ്ടിന് ഗാന്ധി ജയന്തിയും ഒക്ടോബര്‍ 28ന് ദീപാവലിയും ഡിസംബര്‍ 25ന് ക്രിസ്മസും പൊതു അവധി ദിനങ്ങളാണ്. റംസാന്‍, ബക്രീദ്, മുഹറം എന്നീ അവധി ദിനങ്ങള്‍ ചന്ദ്രദര്‍ശനത്തിന് അനുസരിച്ച് മാറാന്‍ സാധ്യതയുണ്ടെന്ന് വിജ്ഞാപനത്തില്‍ വ്യക്തമാക്കിയിട്ടുണ്ട്.
2027ലെ കേരളത്തിലെ പൊതു അവധി ദിനങ്ങള്‍
മന്നം ജയന്തി – ജനുവരി 2 ശനി
റിപ്പബ്ലിക് ദിനം – ജനുവരി 26 ചൊവ്വ
മഹാശിവരാത്രി – മാര്‍ച്ച് 6 ശനി
ഇദുല്‍ ഫിത്തര്‍ (റംസാന്‍) – മാര്‍ച്ച് 10 ബുധന്‍
പെസഹ വ്യാഴം – മാര്‍ച്ച് 25 വ്യാഴം
ദുഃഖവെള്ളി – മാര്‍ച്ച് 26 വെള്ളി
ഡോ. ബി.ആര്‍. അംബേദ്കര്‍ ജയന്തി – ഏപ്രില്‍ 14 ബുധന്‍
വിഷു – ഏപ്രില്‍ 15 വ്യാഴം
മെയ് ദിനം – മെയ് 1 ശനി
ഇദുല്‍ അദ്ഹ (ബക്രീദ്) – മെയ് 17 തിങ്കള്‍
മുഹറം – ജൂണ്‍ 15 ചൊവ്വ
കര്‍ക്കടക വാവ് – ഓഗസ്റ്റ് 2 തിങ്കള്‍
ശ്രീകൃഷ്ണ ജയന്തി – ഓഗസ്റ്റ് 24 ചൊവ്വ
അയ്യങ്കാളി ജയന്തി| ഓഗസ്റ്റ് 28 ശനി
മൂന്നാം ഓണം – സെപ്റ്റംബര്‍ 13 തിങ്കള്‍
നാലാം ഓണം – സെപ്റ്റംബര്‍ 14 ചൊവ്വ
ശ്രീനാരായണ ഗുരു ജയന്തി – സെപ്റ്റംബര്‍ 15 ബുധന്‍
ശ്രീനാരായണ ഗുരു സമാധി സെപ്റ്റംബര്‍ 22 ബുധന്‍
ഗാന്ധി ജയന്തി – ഒക്ടോബര്‍ 2 ശനി
ദീപാവലി – ഒക്ടോബര്‍ 28 വ്യാഴം
ക്രിസ്മസ് – ഡിസംബര്‍ 25 ശനി
എല്ലാ ഞായറാഴ്ചകളും മാസത്തിലെ രണ്ടാം ശനിയാഴ്ചകളും സര്‍ക്കാര്‍ ഓഫീസുകള്‍ക്ക് അവധിയായിരിക്കും. ഈ ദിവസങ്ങളില്‍ വരുന്ന ചില ആഘോഷങ്ങള്‍ പൊതു അവധി പട്ടികയില്‍ ഉള്‍പ്പെടുത്തിയിട്ടില്ല. പൊതു അവധി ദിവസങ്ങളുമായി ഒത്തുവന്നതിനാല്‍ പ്രത്യേക പട്ടികയില്‍ ഉള്‍പ്പെടുത്തിയിട്ടില്ലാത്ത ദിനങ്ങള്‍ ചുവടെ.
ഈസ്റ്റര്‍ – മാര്‍ച്ച് 28 ഞായര്‍
മിലാദ്-ഇ-ഷെരീഫ് (നബി ദിനം) – ഓഗസ്റ്റ് 14 രണ്ടാം ശനി
സ്വാതന്ത്ര്യദിനം – ഓഗസ്റ്റ് 15 ഞായര്‍
ഒന്നാം ഓണം – സെപ്റ്റംബര്‍ 11 രണ്ടാം ശനി
തിരുവോണം – സെപ്റ്റംബര്‍ 12 ഞായര്‍
മഹാനവമി – ഒക്ടോബര്‍ 9 രണ്ടാം ശനി
വിജയദശമി – ഒക്ടോബര്‍ 10 ഞായര്‍
നിയന്ത്രിത അവധി ദിനങ്ങള്‍
ചില വിഭാഗങ്ങളിലെ സര്‍ക്കാര്‍ ജീവനക്കാര്‍ക്കും അധ്യാപകര്‍ക്കും പ്രത്യേക സാഹചര്യങ്ങളില്‍ ഉപയോഗിക്കാവുന്ന മൂന്ന് നിയന്ത്രിത അവധി ദിനങ്ങളും വിജ്ഞാപനത്തിലുണ്ട്.
അയ്യാ വൈകുണ്ഡ സ്വാമി ജയന്തി – മാര്‍ച്ച് 4, വ്യാഴം – നാടാര്‍ സമുദായത്തില്‍പ്പെട്ട സര്‍ക്കാര്‍, അര്‍ധസര്‍ക്കാര്‍, പൊതുമേഖലാ സ്ഥാപനങ്ങളിലെ ജീവനക്കാര്‍ക്കും അധ്യാപകര്‍ക്കും
ആവണി അവിട്ടം – ഓഗസ്റ്റ് 17, ചൊവ്വ – ബ്രാഹ്മണ സമുദായത്തില്‍പ്പെട്ട സര്‍ക്കാര്‍ ജീവനക്കാര്‍ക്ക്
വിശ്വകര്‍മ ദിനം – സെപ്റ്റംബര്‍ 17, വെള്ളി – വിശ്വകര്‍മ സമുദായത്തില്‍പ്പെട്ട സര്‍ക്കാര്‍, അര്‍ധസര്‍ക്കാര്‍, പൊതുമേഖലാ സ്ഥാപനങ്ങളിലെ ജീവനക്കാര്‍ക്കും അധ്യാപകര്‍ക്കും
ന്യൂഡല്‍ഹിയില്‍ പ്രവര്‍ത്തിക്കുന്ന എല്ലാ സംസ്ഥാന സര്‍ക്കാര്‍ ഓഫീസുകള്‍ക്കും പൊതുമേഖലാ സ്ഥാപനങ്ങള്‍ക്കും 2027 മാര്‍ച്ച് 23ന് ഹോളി പ്രമാണിച്ച് അവധി പ്രഖ്യാപിച്ചിട്ടുണ്ട്. വിജ്ഞാപനം സംസ്ഥാന സര്‍ക്കാരിന് കീഴിലുള്ള പൊതു ഓഫീസുകളിലെ അവധി ദിനങ്ങളാണ് വ്യക്തമാക്കുന്നത്. ബാങ്കുകള്‍, വിദ്യാഭ്യാസ സ്ഥാപനങ്ങള്‍, മറ്റ് സ്ഥാപനങ്ങള്‍ എന്നിവയുടെ അവധി പട്ടികകള്‍ വ്യത്യസ്തമായിരിക്കാം.
by Midhun HP News | Oct 20, 2026 | Latest News, കേരളം
തിരുവനന്തപുരം: സംസ്ഥാനത്ത് അടുത്ത നാല് ദിവസം ശക്തമായ മഴ തുടരുമെന്ന് കേന്ദ്രകാലാവസ്ഥ വകുപ്പ്. ശക്തമായ മഴ കണക്കിലെടുത്ത് വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി ജില്ലകളിലാണ് മഴ മുന്നറിയിപ്പ്.
നാളെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം ജില്ലകളിലും വ്യാഴാഴ്ച ഇടുക്കി, എറണാകുളം, തൃശ്ശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍ ജില്ലകളിലും വെള്ളിയാഴ്ച തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍ ജില്ലകളിലുമാണ് കേന്ദ്ര കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചത്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്റര്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്.
മത്സ്യത്തൊഴിലാളി ജാഗ്രത നിർദേശം
കേരള – കർണാടക – ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് തടസ്സമില്ലെന്നും; 22/10/20206 & 23/10/2026 തീയതികളിൽ മത്സ്യബന്ധനത്തിന് പോകാൻ പാടില്ലെന്നും കേന്ദ്ര കാലാവസ്ഥ വകുപ്പ് അറിയിച്ചു.
22/10/20206 & 23/10/2026: കേരള – കർണാടക – ലക്ഷദ്വീപ് തീരങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
കള്ളക്കടൽ ജാഗ്രത നിർദേശം
കള്ളക്കടൽ പ്രതിഭാസത്തിന്റെ ഭാഗമായി തിരുവനന്തപുരം (കാപ്പിൽ മുതൽ പൊഴിയൂർ വരെ) ജില്ലയിലെ തീരങ്ങളിൽ ഇന്ന് രാവിലെ 08.30 വരെ 0.8 മുതൽ 1.3 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
കള്ളക്കടൽ പ്രതിഭാസത്തിന്റെ ഭാഗമായി കന്യാകുമാരി തീരത്ത് 20/10/2026 രാവിലെ 08.30 വരെ 1.2 മുതൽ 1.4 മീറ്റർ വരെ ഉയർന്ന തിരമാലകൾ കാരണം കടലാക്രമണത്തിന് സാധ്യതയുണ്ടെന്ന് ദേശീയ സമുദ്ര വിവര വിശകലന കേന്ദ്രം (INCOIS) അറിയിച്ചു.
കടലാക്രമണത്തിന് സാധ്യതയുള്ളതിനാൽ മത്സ്യത്തൊഴിലാളികളും തീരദേശവാസികളും ജാഗ്രത പാലിയ്ക്കുക.
Recent Comments