by Midhun HP News | Apr 8, 2026 | Latest News, കേരളം
പാലക്കാട്: അട്ടപ്പള്ളം ആൾക്കൂട്ട കൊലപാതക കേസിൽ ജാമ്യത്തിലായിരുന്ന ആറാം പ്രതി തൂങ്ങി മരിച്ചു. കിഴക്കേ അട്ടപ്പള്ളത്ത് വിനോദ് കുമാറിനെയാണ് (54) വീടിനു സമീപത്തെ പറമ്പിൽ തൂങ്ങി മരിച്ച നിലയിൽ കണ്ടെത്തിയത്. കേസിൽ മണ്ണാർക്കാട് സ്പെഷൽ കോടതി ഇയാൾക്ക് ജാമ്യം അനുവദിച്ചിരുന്നു.
അന്വേഷണ സംഘം ഇത് റദ്ദാക്കണമെന്നാവശ്യപ്പെട്ട് ഹൈക്കോടതിയിൽ അപേക്ഷ നൽകിയിരുന്നു. ഇതു ഹൈക്കോടതി പരിഗണിക്കാനിരിക്കെയാണ് പ്രതിയുടെ മരണം. മൃതദേഹം ജില്ലാ ആശുപത്രിയിലേക്ക് മാറ്റി.
ഒരു മാസം മുൻപ് അന്വേഷണ സംഘത്തിന്റെ അപേക്ഷയിൽ ഹൈക്കോടതി മറ്റു എട്ട് പ്രതികളുടെയും ജാമ്യം റദ്ദാക്കിയിരുന്നു. ഇവർ നിലവിൽ റിമാൻഡിലാണ്. കഴിഞ്ഞ ദിവസം മണ്ണാർക്കാട് സ്പെഷൽ കോടതി പ്രതികളുടെ ജാമ്യാപേക്ഷ പരിഗണിക്കുന്നത് ഈ മാസം 18ലേക്കു മാറ്റിയിരുന്നു. കൊല്ലപ്പെട്ട രാം നാരായൺ ഭാഗേലിന്റെ ഭാര്യയെ അന്ന് ഹാജരാക്കാനും മണ്ണാർക്കാട് പട്ടികജാതി പട്ടികവർഗ പ്രത്യേക കോടതി ജഡ്ജി ജോമോൻ ജോൺ ഉത്തരവിട്ടിട്ടുണ്ട്. ഇരയുടെ ബന്ധുക്കൾക്ക് പറയാനുള്ളതു കേൾക്കാതെയാണ് വിചാരണക്കോടതി ജാമ്യം നൽകിയതെന്ന ആക്ഷേപം ഉയർന്നതിനെ തുടർന്നായിരുന്നു ഹൈക്കോടതിയുടെ ഇടപെടൽ. കേസിൽ ആകെ ഒൻപതു പ്രതികളുണ്ട്. കഴിഞ്ഞ ഡിസംബർ 17-നാണ് ജാർഖണ്ഡ് സ്വദേശി രാം നാരായൺ ഭഗേൽ ആൾക്കൂട്ട ആക്രമണത്തിനിരയായി കൊല്ലപ്പെട്ടത്.
by Midhun HP News | Apr 8, 2026 | Latest News, ദേശീയ വാർത്ത
ടെഹ്റാന്: അമേരിക്കയുമായുള്ള രണ്ടാഴ്ചത്തെ വെടിനിര്ത്തലിന് സമ്മതിച്ചതിനെത്തുടര്ന്ന്, വെടിവയ്പ് നിര്ത്താന് ഇറാന്റെ പരമോന്നത നേതാവ് മുജ്തബ ഖമേനി എല്ലാ സൈനിക യൂണിറ്റുകള്ക്കും നിര്ദ്ദേശം നല്കിയതായി റിപ്പോര്ട്ട്. എന്നാല്, ഇതോടൊപ്പം തന്നെ ഇത് യുദ്ധത്തിന്റെ അവസാനമല്ലെന്നും അദ്ദേഹം വ്യക്തമാക്കി.
‘ഇത് യുദ്ധത്തിന്റെ അവസാനമല്ല, എന്നാല് എല്ലാ സൈനിക വിഭാഗങ്ങളും പരമോന്നത നേതാവിന്റെ ഉത്തരവ് പാലിച്ച് വെടിനിര്ത്തണം.’- പ്രസ്താവനയില് ഖമേനി പറഞ്ഞു. വെടിനിര്ത്തല് യുദ്ധത്തിന്റെ അവസാനമല്ലെന്നും യുഎസോ ഇസ്രയേലോ ഏതെങ്കിലും തരത്തില് ഇതിനെതിരായി പ്രവര്ത്തിച്ചാല് തങ്ങളുടെ കൈകള് ട്രിഗറില് തന്നെയാണെന്നും ഇറാന് മുന്നറിയിപ്പ് നല്കി. ‘ഇത് യുദ്ധത്തിന്റെ അന്ത്യത്തെ സൂചിപ്പിക്കുന്നില്ലെന്ന് ഊന്നിപ്പറയുന്നു. ഞങ്ങളുടെ കൈകള് ട്രിഗറില് തന്നെ തുടരുന്നു, ശത്രുവിന്റെ ഭാഗത്തുനിന്ന് ചെറിയൊരു തെറ്റ് സംഭവിച്ചാല് പോലും അതിനെ പൂര്ണ്ണ ശക്തിയോടെ നേരിടും.’- വെടിനിര്ത്തല് പ്രഖ്യാപനത്തിന് പിന്നാലെ ഇറാന്റെ സുപ്രീം നാഷണല് സെക്യൂരിറ്റി കൗണ്സില് പുറത്തിറക്കിയ പ്രസ്താവനയില് പറയുന്നു. ‘യുദ്ധത്തിന്റെ മിക്കവാറും എല്ലാ ലക്ഷ്യങ്ങളും കൈവരിച്ചുവെന്നും നിങ്ങളുടെ ധീരരായ മക്കള് ശത്രുവിനെ ചരിത്രപരമായ നിസ്സഹായതയിലേക്കും ശാശ്വതമായ പരാജയത്തിലേക്കും എത്തിച്ചുവെന്നുമുള്ള ശുഭവാര്ത്ത ഇപ്പോള് ഞങ്ങള് ഇറാന്റെ മഹത്തായ രാഷ്ട്രത്തിന് നല്കുന്നു.’- ഇറാനിലെ ജനങ്ങളുടെ ത്യാഗത്തിന് നന്ദി പറഞ്ഞുകൊണ്ട് ഇറാന്റെ സുപ്രീം നാഷണല് സെക്യൂരിറ്റി കൗണ്സില് പറഞ്ഞു.
ഫെബ്രുവരി 28-ന് യുഎസും ഇസ്രയേലും ഇറാനെതിരെ നടത്തിയ സംയുക്ത ആക്രമണത്തില്, യുദ്ധത്തിന്റെ ഒന്നാം ദിവസം തന്നെ പരമോന്നത നേതാവ് ആയിരുന്ന ആയത്തുള്ള അലി ഖമേനി കൊല്ലപ്പെട്ടിരുന്നു. കഴിഞ്ഞ 39 ദിവസത്തിനിടെ നടന്ന സംഘര്ഷത്തില് വിവിധ രാജ്യങ്ങളിലായി നിരവധി പേരാണ് കൊല്ലപ്പെട്ടത്.
ദിവസങ്ങള്ക്ക് മുന്പ് വെടിനിര്ത്തല് ആവശ്യപ്പെട്ട് യുഎസ് ഇറാനിലേക്ക് 15 ഇന നിര്ദ്ദേശം അയച്ചിരുന്നു. ഇതിന് മറുപടിയായി ചര്ച്ചകള്ക്കായി പരിഷ്കരിച്ച 10 ഇന നിര്ദ്ദേശങ്ങള് ഇറാന് മുന്നോട്ടുവെച്ചിട്ടുണ്ട്. ഈ നിര്ദ്ദേശത്തിലെ പ്രധാന കാര്യങ്ങള് ചുവടെ:
ഇറാന് സായുധ സേനയുമായി ഏകോപിപ്പിച്ച് ഹോര്മുസ് കടലിടുക്കിലൂടെ നിയന്ത്രിത ഗതാഗതം.
‘ആക്സിസ് ഓഫ് റെസിസ്റ്റന്സിലെ’ എല്ലാ ഘടകങ്ങള്ക്കും എതിരായ യുദ്ധം അവസാനിപ്പിക്കേണ്ടതിന്റെ ആവശ്യകത.
മേഖലയിലെ എല്ലാ താവളങ്ങളില് നിന്നും സ്ഥാനങ്ങളില് നിന്നും യുഎസ് സേനയെ പിന്വലിക്കുക.
അംഗീകരിച്ചിട്ടുള്ള പ്രോട്ടോക്കോള് അനുസരിച്ച് ഇറാന്റെ ആധിപത്യം ഉറപ്പുനല്കുന്ന സുരക്ഷിത ട്രാന്സിറ്റ് പ്രോട്ടോക്കോള് ഹോര്മുസ് കടലിടുക്കില് സ്ഥാപിക്കുക.
കണക്കാക്കിയ പ്രകാരം ഇറാന് ഉണ്ടായ നാശനഷ്ടങ്ങള് പൂര്ണ്ണമായി നല്കുക.
എല്ലാ പ്രാഥമിക, അനുബന്ധ ഉപരോധങ്ങളും ബോര്ഡ് ഓഫ് ഗവര്ണേഴ്സിന്റെയും സെക്യൂരിറ്റി കൗണ്സിലിന്റെയും പ്രമേയങ്ങളും നീക്കം ചെയ്യുക.
വിദേശത്തുള്ള ഇറാന്റെ തടഞ്ഞുവെച്ച എല്ലാ ആസ്തികളും വസ്തുവകകളും വിട്ടുനല്കുക.
ഈ ഇനങ്ങളെല്ലാം യുഎന് സുരക്ഷാ കൗണ്സിലിന്റെ നിര്ബന്ധിത പ്രമേയത്തിലൂടെ അംഗീകരിക്കുക.
10 ഇന പദ്ധതിയിലെ തത്വങ്ങള് അംഗീകരിക്കുന്ന പക്ഷം യുദ്ധം അവസാനിപ്പിക്കാന് തയ്യാറാകുമെന്നും ഇറാന് വ്യക്തമാക്കി.
by Midhun HP News | Apr 8, 2026 | Latest News, കേരളം
ഗുവാഹത്തി: ഐപിഎല്ലില് മഴ വില്ലനായെത്തിയ മത്സരത്തില് മുംബൈയെ കീഴടക്കി രാജസ്ഥാന് റോയല്സ്. 11 ഓവര് ആയി ചുരുക്കിയ മത്സരത്തില് 27 റണ്സിനാണ് രാജസ്ഥാന്റെ ജയം. രാജസ്ഥാന് ഉയര്ത്തിയ 151 റണ്സ് വിജയലക്ഷ്യവുമായി ബാറ്റിങ്ങിന് ഇറങ്ങിയ മുംബൈയുടെ ഇന്നിങ്സ് 123-9ന് അവസാനിച്ചു. രാജസ്ഥാന്റെ തുടര്ച്ചയായ മൂന്നാം ജയമാണിത്. മഴ മൂലം രണ്ടര മണിക്കൂര് വൈകിയാണ് കളി ആരംഭിച്ചത്.
ആദ്യം ബാറ്റുചെയ്ത രാജസ്ഥാന് 11 ഓവറില് മൂന്ന് വിക്കറ്റ് നഷ്ടത്തില് 150 റണ്സാണെടുത്തത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ രാജസ്ഥാന് വെടിക്കെട്ടോടെയാണ് തുടങ്ങിയത്. ദീപക് ചഹാര് എറിഞ്ഞ ആദ്യ ഓവറില് യശസ്വി ജയ്സ്വാള് 22 റണ്സാണ് അടിച്ചെടുത്തത്. ഒരു സിക്സറും നാല് ഫോറുകളും ഓവറില് ജയ്സ്വാള് നേടി. ബുംറ എറിഞ്ഞ രണ്ടാം ഓവറില് സിക്സറോടെ വൈഭവ് സൂര്യവംശിയും വെടിക്കെട്ടിന് തുടങ്ങമിട്ടു. ആ ഓവറില് 14 റണ്സാണ് പിറന്നത്. മൂന്നാം ഓവറിലും സമാനമായിരുന്നു സ്ഥിതി. വൈഭവും ജയ്സ്വാളും ചേര്ന്ന് ട്രെന്റ് ബോള്ട്ടിനെ പലകുറി അതിര്ത്തികടത്തി. മൂന്ന് സിക്സറുകളടക്കം ആ ഓവറിലും 22 റണ്സാണ് രാജസ്ഥാന് അടിച്ചെടുത്തത്. അതോടെ സ്കോര് 58 ലെത്തി.
എന്നാല് നാലാം ഓവറില് ഹാര്ദിക് പാണ്ഡ്യ നന്നായി പന്തെറിഞ്ഞു. ആകെ വിട്ടുനല്കിയത് നാല് റണ്സ് മാത്രമാണ്. ശാര്ദുല് താക്കൂര് എറിഞ്ഞ അഞ്ചാം ഓവറില് വൈഭവ് തകര്ത്തടിച്ചു. ഓവറില് 17 റണ്സെടുത്ത വൈഭവ് അവസാന പന്തില് പുറത്തായി. 14 പന്തില് 39 റണ്സെടുത്താണ് താരം മടങ്ങിയത്. പിന്നാലെ ധ്രുവ് ജുറേലും(2) കൂടാരം കയറി. വിക്കറ്റുകള് വീണ് പ്രതിരോധത്തിലായെങ്കിലും മറുവശത്ത് നിലയുറപ്പിച്ച് ബാറ്റേന്തിയ ജയ്സ്വാളാണ് ടീമിനെ മുന്നോട്ടുനയിച്ചത്.
എട്ടാം ഓവറില് ഫിഫ്റ്റി തികച്ച ജയ്സ്വാള് ടീമിനെ നൂറുകടത്തി. 23 പന്തിലാണ് താരം ഫിഫ്റ്റി സ്വന്തമാക്കിയത്. ക്യാപ്റ്റന് പരാഗ് 10 പന്തില് 20 റണ്സെടുത്ത് പുറത്തായി. അവസാനഓവറുകളില് ജയ്സ്വാള് തകര്ത്തടിച്ചതോടെ സ്കോര് 150 ലെത്തി. ജയ്സ്വാള് 32 പന്തില് നിന്ന് 77 റണ്സെടുത്തു.
മറുപടി ബാറ്റിങ്ങിനിറങ്ങിയ മുംബൈയുടെ തുടക്കം തകര്ച്ചയോടെയായിരുന്നു. ആദ്യ മൂന്നോവറുകളിലും മുംബൈക്ക് വിക്കറ്റ് നഷ്ടമായി. ആദ്യ ഓവറില് റയാന് റിക്കെല്ട്ടണും (8) രണ്ടാം ഓവറില് സൂര്യകുമാര് യാദവും (6) മൂന്നാം ഓവറില് രോഹിത് ശര്മയും (5) പുറത്തായി. അതോടെ മുംബൈ 22-3 എന്ന നിലയിലായി. പിന്നീട് വന്നവരെല്ലാം നിരനിരയായി മടങ്ങുന്നതാണ് ഗുവാഹത്തിയില് കണ്ടത്. ഹാര്ദിക് പാണ്ഡ്യ 9 റണ്സെടുത്തും തിലക് വര്മ 14 റണ്സെടുത്തും പുറത്തായി.
ആറാം വിക്കറ്റില് ഷെര്ഫെയ്ന് റൂഥര്ഫോര്ഡ്, നമാന് ധിര് എന്നിവര് ചേര്ന്ന് കൂട്ടുകെട്ട് പടുത്തുയര്ത്തിയതാണ് മുംബൈക്ക് അല്പ്പമെങ്കിലും ആശ്വാസമായത്. എന്നാല് എട്ടാം ഓവറില് റൂഥര്ഫോര്ഡ് മടങ്ങിയതോടെ മുംബൈ പരാജയം മണത്തു. എട്ട് പന്തില് നിന്ന് 25 റണ്സെടുത്താണ് താരം പുറത്തായത്.
by Midhun HP News | Apr 8, 2026 | Latest News, കേരളം
കൊല്ലം: കലാശക്കൊട്ട് കഴിഞ്ഞ് മടങ്ങിയ കെഎസ്യു പ്രവർത്തകരുടെ കാറിടിച്ച് കായിക താരങ്ങളായ രണ്ട് വിദ്യാർഥികൾക്ക് പരിക്ക്. കൊല്ലം വള്ളിക്കീഴ് ഗവ.എച്ച്എസ്എസിലെ 8ാം ക്ലാസ് വിദ്യാർഥികളായ വള്ളിക്കീഴ് സ്വദേശി ചിന്നുലക്ഷ്മി, രാമൻകുളങ്ങര സ്വദേശി ധനലക്ഷ്മി എന്നിവർക്കാണ് പരിക്കേറ്റത്.
ഇടിയുടെ ആഘാതത്തിൽ ചിന്നുലക്ഷ്മി കായലിലേക്കു തെറിച്ചു വീണു. ധനലക്ഷ്മി ഫുട്പാത്തിലെ സംരക്ഷണ കമ്പിയിൽ കുടുങ്ങിക്കിടന്നു. ഇരുവരെയും ആദ്യം ജില്ലാ ആശുപത്രിയിലും പിന്നീട് കൊല്ലത്തെ സ്വകാര്യ മെഡിക്കൽ കോളജ് ആശുപത്രിയിലും പ്രവേശിപ്പിച്ചു. വൈകിട്ട് 6.30ന് ആശ്രാമം ലിങ്ക് റോഡിൽ കെഎസ്ആർടിസി ഡിപ്പോയ്ക്കു സമീപമാണ് അപകടമുണ്ടായത്. ബിന്ദു കൃഷ്ണയുടെ പ്രചാരണ വാഹനമാണ് അപകടമുണ്ടാക്കിയതെന്നാണ് സിപിഎമ്മിന്റെ ആരോപണം.
വാഹനം ഓടിച്ചിരുന്ന നെയ്യാറ്റിൻകര സ്വദേശി ദേവനന്ദിനെ ഈസ്റ്റ് പൊലീസ് കസ്റ്റഡിയിലേടുത്തു. ആശ്രാമം ഹോക്കി സ്റ്റേഡിയത്തിൽ ഹോക്കി സമ്മർ ക്യാംപിൽ പങ്കെടുത്ത ശേഷം ചിന്നുലക്ഷ്മിയും ധനലക്ഷ്മിയും രക്ഷിതാക്കളോടൊപ്പം ഫുട്പാത്തിലൂടെ നടക്കുമ്പോഴാണ് അപകടമുണ്ടായത്. അമിത വേഗതയിൽ എത്തിയ കാർ ഫുട്പാത്തിലേക്ക് ഇടിച്ചു കയറിയാണ് അപകടം.
by Midhun HP News | Apr 8, 2026 | Latest News, ദേശീയ വാർത്ത
ന്യൂഡല്ഹി: അമേരിക്കന് പ്രസിഡന്റ് ഡോണള്ഡ് ട്രംപ് ഇറാനെതിരായ ആക്രമണങ്ങള്ക്ക് രണ്ടാഴ്ചത്തെ വെടിനിര്ത്തല് പ്രഖ്യാപിച്ചതിനെത്തുടര്ന്ന് എണ്ണവില കുത്തനെ ഇടിഞ്ഞു. ഇന്ത്യ മുഖ്യമായി ആശ്രയിക്കുന്ന ബ്രെന്ഡ് ക്രൂഡിന്റെ വില ബാരലിന് 109.77 ഡോളറില് നിന്ന് 94.57 ഡോളറായി കുത്തനെ ഇടിഞ്ഞു. പ്രഖ്യാപനത്തിന് പിന്നാലെ യുഎസ് വെസ്റ്റ് ടെക്സസ് ഇന്റര്മീഡിയറ്റ് (WTI) ക്രൂഡ് ഓയില് വിലയും ബാരലിന് ഏകദേശം 20 ഡോളറോളം താഴ്ന്നു.
ലോകത്തിലെ എണ്ണയുടെയും വാതകത്തിന്റെയും ഏകദേശം അഞ്ചിലൊന്ന് കടന്നുപോകുന്ന ഹോര്മുസ് കടലിടുക്ക് ഉടനടി വീണ്ടും തുറക്കുന്നതുമായി ബന്ധപ്പെട്ടാണ് ഈ വെടിനിര്ത്തല് പ്രഖ്യാപിച്ചിരിക്കുന്നത്. മിനിറ്റുകള്ക്കുള്ളില് തന്നെ വിപണി ഇതിനോട് പ്രതികരിച്ചു. എണ്ണവില കുറയുകയും ബോണ്ട് നിരക്കുകള് ഉയരുകയും യുഎസ് ഓഹരി വിപണി കുതിച്ചുയരുകയും ചെയ്തു. ആഴ്ചകളോളം നീണ്ടുനിന്ന തടസ്സങ്ങള്ക്ക് ശേഷം എണ്ണ വിതരണം സാധാരണ നിലയിലാകുമെന്ന പ്രതീക്ഷയിലാണ് നിക്ഷേപകര്.
പശ്ചിമേഷ്യന് സംഘര്ഷത്തെ തുടര്ന്ന് കുത്തനെ ഉയര്ന്ന എണ്ണവില ഇടിഞ്ഞത് ഇന്ത്യയ്ക്കും ആശ്വാസമാകും. എണ്ണവില ഉയര്ന്ന് നില്ക്കുന്നത് തുടര്ന്നാല് സമീപഭാവിയില് തന്നെ ഇന്ത്യയില് ഇന്ധനവില വര്ധിപ്പിക്കേണ്ടതായി വരുമെന്നാണ് വിപണി വിദഗ്ധര് നല്കിയ മുന്നറിയിപ്പ്. എന്നാല് മേഖലയില് സമാധാനം പുലരുന്നതിന് വേണ്ടിയുള്ള ഇടപെടല് സജീവമാകുന്നത് എണ്ണവില കുറയാന് ഇടയാക്കുമെന്നത് ഇന്ത്യ അടക്കമുള്ള രാജ്യങ്ങള്ക്ക് ആശ്വാസമാകും.
Recent Comments