by liji HP News | Mar 25, 2024 | Latest News, ജില്ലാ വാർത്ത
തിരുവനന്തപുരം: വാഹനങ്ങളില് അതിസുരക്ഷാ നമ്പര്പ്ലേറ്റുകള് കര്ശനമായി നടപ്പാക്കാന് മോട്ടോര്വാഹനവകുപ്പ്. 2019 ഏപ്രില് ഒന്നുമുതല് നിര്മിക്കപ്പെട്ട വാഹനങ്ങള്ക്കാണ് ഇത് ബാധകമാകുക. രാജ്യത്താകമാനം അതിസുരക്ഷാ നമ്പര്പ്ലേറ്റ് നിര്ബന്ധമാക്കി കേന്ദ്രസര്ക്കാര് ഉത്തരവിറങ്ങിയിരുന്നു.
വാഹന നിര്മാതാക്കള് നിബന്ധനകള് അനുസരിച്ചുള്ള നമ്പര്പ്ലേറ്റുകള് നിര്മിച്ചുനല്കും. ഇത്തരം പ്ലേറ്റ് ഘടിപ്പിച്ചവയുടെ വിവരങ്ങള് ഡാറ്റവാഹന് സോഫ്റ്റ് വെയറില് അപ്ഡേറ്റ് ചെയ്താല് മാത്രമേ ആര്ടി ഓഫീസില് രജിസ്ട്രേഷന് സര്ട്ടിഫിക്കറ്റ് എടുക്കാനാകൂ. ഇത്തരം നമ്പര്പ്ലേറ്റുകള് ഘടിപ്പിക്കാതെ വാഹനമോടിച്ചാല് 2,000 രൂപ മുതല് 5,000 വരെ പിഴ അടക്കേണ്ടി വരുമെന്നും മോട്ടോര്വാഹനവകുപ്പ് പറയുന്നത്.
നിബന്ധനകള്
നമ്പര്പ്ലേറ്റ് ഒരുമില്ലീമീറ്റര് കനമുള്ള അലുമിനിയം ഷീറ്റുകൊണ്ടുണ്ടാക്കിയതും ടെസ്റ്റിങ് ഏജന്സി പാസാക്കിയതുമാവണം. പ്ലേറ്റിന്റെ നാല് അരികുകളും മൂലകളും റൗണ്ട് ചെയ്തിട്ടുണ്ട്.
വ്യാജപ്ലേറ്റുകള് ഉണ്ടാക്കുന്നത് തടയാനായി 20*20 മില്ലീമീറ്റര് ആകൃതിയിലുള്ള ഒരു ക്രോമിയം ഹോളോഗ്രാം പ്ലേറ്റിന്റെ മുകളില് ഇടതുഭാഗത്തായി ഹോട്ട് സ്റ്റാമ്പ് ചെയ്തിട്ടുണ്ട്. ഹോളോഗ്രാമില് നീലനിറത്തില് അശോകചക്രമുണ്ട്. ഇടതുഭാഗത്ത് താഴെ പത്തക്ക ലേസര് ബ്രാന്ഡ് ഐഡന്റിഫിക്കേഷന് നമ്പറുണ്ട്. വാഹന നമ്പറിന്റെയും അക്ഷരങ്ങളുടെയും മുകളില് ഇന്ത്യ എന്ന് 45 ഡിഗ്രി ചെരിച്ചെഴുതിയ ഹോട്ട് സ്റ്റാമ്പിങ് ഫിലിം ഉണ്ട്.
പ്ലേറ്റില് ഇടതുഭാഗത്ത് നടുവിലായി ഐഎന്ഡി എന്ന് നീലക്കളറില് ഹോട്ട് സ്റ്റാമ്പ് ചെയ്തിട്ടുണ്ട്. ഈ പ്ലേറ്റുകള് ഊരിമാറ്റാനാവാത്ത വിധവും ഊരിമാറ്റിയാല് പിന്നീട് ഉപയോഗിക്കാനാവാത്ത വിധവും സ്നാപ് ലോക്കിങ് സിസ്റ്റം ഉപയോഗിച്ചാണ് ഘടിപ്പിക്കുക.
by liji HP News | Mar 25, 2024 | Latest News, ജില്ലാ വാർത്ത
തിരുവനന്തപുരം കിളിമാനൂരിൽ എട്ടാം ക്ലാസുകാരിയെ പീഡിപ്പിയ്ക്കാൻ ശ്രമിച്ച മധ്യവയസ്കൻ അറസ്റ്റിൽ. വെള്ളല്ലൂർ മാത്തയിൽ സ്വദേശി ജോൺസൻ (54) ആണ് പിടിയിലായത്.
കഴിഞ്ഞ ദിവസമായിരുന്നു സംഭവം. ട്യൂഷൻ സെൻ്ററിൽ കൊണ്ടുവിടാമെന്ന് പറഞ്ഞ് കാറിൽ കയറ്റി പീഡിപ്പിയ്ക്കാൻ ശ്രമിക്കുകയായിരുന്നു. പെൺകുട്ടി ബഹളം വച്ചതോടെ പ്രതി ഓടി രക്ഷപ്പെട്ടു. രക്ഷിതാക്കൾ നൽകിയ പരാതിയിലാണ് കിളിമാനൂർ പൊലീസ് കേസെടുത്തത്.
by liji HP News | Mar 25, 2024 | Latest News, ജില്ലാ വാർത്ത
സമഗ്ര ശിക്ഷ കേരളയുടെ നേതൃത്വത്തിൽ ഒന്നും രണ്ടും ക്ലാസ്സുകളിൽ നടന്ന പഠന പ്രവർത്തനത്തിന്റെ ഭാഗമായി അവനവഞ്ചേരി ഗവ. ഹൈസ്കൂളിലെ കുട്ടികൾ തയ്യാറാക്കിയ സംയുക്ത ഡയറി പുറത്തിറക്കി. കുട്ടികളുടെ രചനകൾ ഉൾപ്പെടുത്തിയ ‘ഓർമ്മച്ചെപ്പ്’ എന്ന പേരിലുള്ള സംയുക്ത ഡയറി സ്കൂൾ ഹെഡ്മാസ്റ്റർ ജി.എൽ. നിമി, പിടിഎ പ്രസിഡന്റ് ജി.ആർ. ജിബി യ്ക്ക് നൽകിക്കൊണ്ട് പ്രകാശനം നടത്തി. സീനിയർ അധ്യാപകൻ സാബു നീലകണ്ഠൻ നായർ, അധ്യാപകരായ കെ. ജെയിംസ്, സീനത്ത് ബീവി, എസ്. കാവേരി, ജി.സി. ദീപാറാണി, രാഖി രാമചന്ദ്രൻ, ഡി. ശരണ്യദേവ്, വി.കെ. രേവതി, എസ്.ഷീന, എന്നിവർ സംബന്ധിച്ചു.
by liji HP News | Mar 23, 2024 | Latest News, ജില്ലാ വാർത്ത
തിരുവനന്തപുരം: ഭിന്നശേഷിക്കാര്ക്ക് തെരഞ്ഞെടുപ്പ് പ്രക്രിയ ലഘൂകരിക്കുന്നതിനായി സാക്ഷം ആപ്ലിക്കേഷനുമായി തെരഞ്ഞെടുപ്പ് കമ്മീഷന്. ഭിന്നശേഷി വോട്ടര്മാര്ക്ക് രജിസ്ട്രേഷന് പ്രക്രിയ മുതല് വോട്ടെടുപ്പ് ദിവസം പിക് ആന്ഡ് ഡ്രോപ്പ് സൗകര്യം വരെ വിവിധ സേവനങ്ങള് നല്കുന്നതിന് തെരഞ്ഞെടുപ്പ് കമ്മീഷന് സാക്ഷം ആപ്പിനാണ് രൂപം നല്കിയിരിക്കുന്നത്.
ഇതിനായി ഉപയോക്താവിന് ഒരു സജീവ മൊബൈല് നമ്പര് ഉണ്ടായിരിക്കണം. പുതിയ വോട്ടര് രജിസ്ട്രേഷനുള്ള അപേക്ഷ, ഭിന്നശേഷി ആയി അടയാളപ്പെടുത്താനുള്ള അഭ്യര്ഥന, മൈഗ്രേഷനുള്ള അഭ്യര്ത്ഥന (ഒരു സ്ഥലത്ത് നിന്ന് മറ്റൊരു സ്ഥലത്തേക്ക് വോട്ട് കൈമാറ്റം), തിരുത്താനുള്ള അപേക്ഷ, സ്റ്റാറ്റസ് ട്രാക്കിംഗ്, ഭിന്നശേഷിക്കാര്ക്കുള്ള സൗകര്യങ്ങള് അറിയുക, വീല് ചെയറിനുള്ള അഭ്യര്ത്ഥന, ഇലക്ടറല് റോളില് പേര് തിരയുക, പോളിംഗ് സ്റ്റേഷന് അറിയുക, ബൂത്ത് ലൊക്കേറ്റര്, സ്ഥാനാര്ത്ഥികളെ അറിയുക, പരാതികള് രജിസ്റ്റര് ചെയ്യുക തുടങ്ങിയവക്കായി ഈ ആപ്ലിക്കേഷന് ഉപയോഗിക്കാം. സാക്ഷം ആപ്പ് ഗൂഗിള് പ്ലേ സ്റ്റോറിലും ആപ്പിള് സ്റ്റോറിലും ലഭ്യമാണ്.
by liji HP News | Mar 23, 2024 | Latest News, Uncategorized, ജില്ലാ വാർത്ത
കൊച്ചി: സംസ്ഥാനത്ത് സ്വര്ണവില വീണ്ടും കുറഞ്ഞു. 80 രൂപ കുറഞ്ഞ് ഇന്ന് ഒരു പവന് സ്വര്ണത്തിന്റെ വില 49,000 രൂപയായി. ഗ്രാമിന് പത്തുരൂപയാണ് കുറഞ്ഞത്. 6125 രൂപയാണ് ഒരു ഗ്രാം സ്വര്ണത്തിന്റെ വില.
റെക്കോര്ഡുകള് ഭേദിച്ച് മുന്നേറുന്ന സ്വര്ണവില അമ്പതിനായിരവും കടക്കുമെന്ന് തോന്നിപ്പിച്ച ഘട്ടത്തിലാണ് ഇന്നലെ മുതല് വില കുറയാന് തുടങ്ങിയത്. എന്നാല് ഇത് താത്കാലികം മാത്രമാണെന്നും സ്വര്ണവില വരുംദിവസങ്ങളില് വീണ്ടും വര്ധിക്കുമെന്നുമാണ് വിദഗ്ധരുടെ അഭിപ്രായം. ഈ മാസത്തിന്റെ തുടക്കത്തില് 46,320 രൂപയായിരുന്നു സ്വര്ണവില. മൂന്നാഴ്ചയ്ക്കിടെ 3000 രൂപയിലധികം വര്ധിച്ച ശേഷം ഇന്നലെ 360 രൂപയാണ് ഇടിഞ്ഞത്. തുടര്ന്ന് ഇന്നും ഇടിയുകയായിരുന്നു.
by Midhun HP News | Mar 22, 2024 | Latest News, ജില്ലാ വാർത്ത
അവനവഞ്ചേരി ഗവ. ഹൈസ്കൂളിന് ഹരിതകേരള മിഷൻ്റെ എ പ്ലസ് ഗ്രേഡ് സർട്ടിഫിക്കറ്റ് ലഭിച്ചു. പരിസ്ഥിതി പരിപാലനത്തിൻ്റെ സംസ്കാരം സമൂഹത്തിന് പകർന്നു നൽകുവാനായി ഹരിത പെരുമാറ്റച്ചട്ടം പാലിച്ചുകൊണ്ട് ശുചിത്വ- മാലിന്യ സംസ്കരണം, ജലസുരക്ഷ, ഊർജ്ജ സംരക്ഷണം, ജൈവവൈവിധ്യ സംരക്ഷണം എന്നീ മേഖലകളുമായി ബന്ധപ്പെട്ട് കാര്യക്ഷമവും മാതൃകാപരവുമായ പ്രവർത്തനങ്ങൾ നടത്തിവരുന്നതിൻ്റെ അടിസ്ഥാനത്തിലാണ് അംഗീകാരം. ആറ്റിങ്ങൽ നഗരസഭ സെക്രട്ടറി, സ്കൂൾ നോഡൽ ഓഫീസർ എൻ. സാബുവിന് സാക്ഷ്യപത്രം കൈമാറി. സാക്ഷ്യപത്രം നേടിയതോടെ ഹരിത സ്ഥാപന പദവിയുള്ള വിദ്യാലയമായി അവനവഞ്ചേരി ഗവ. ഹൈസ്കൂൾ മാറി.
Recent Comments