പ്രമുഖ ഗാന്ധിയൻ എം.എം.ഉമ്മറിനു ആദരവ്

by Midhun HP News | Aug 19, 2022 | Latest News, ജില്ലാ വാർത്ത

പെരുമാതുറ: ഇന്ത്യൻ സ്വാതന്ത്ര്യത്തിന്റെ എഴുപത്തിയഞ്ചാം
വാർഷികാഘോഷങ്ങളുടെ ഭാഗമായി പെരുമാതുറയിലെ പ്രമുഖ ഗാന്ധിയൻ എം.എം.ഉമ്മർ ഇന്ത്യൻ നാഷണൽ കോൺഗ്രസ് ചിറയിൻകീഴ് മണ്ഡലം കമ്മിറ്റി ആദരിച്ചു. പെരുമാതുറ ജംഗ്ഷനിൽ നടന്ന പരിപാടിയിൽ കോൺഗ്രസ്‌ മണ്ഡലം പ്രസിഡന്റ്‌ ജോഷിബായ് അദ്ധ്യക്ഷത വഹിച്ചു. ബ്ലോക്ക് പ്രസിഡന്റ് വിശ്വനാഥൻ നായർ ചടങ്ങ് ഉദ്ഘാടനം ചെയ്തു. തുടർന്ന് അദ്ദേഹം ഉമർസാറിനെ പൊന്നാട അണിയിച്ച് ആദരിക്കുകയും ആദരസൂചകമായി മണ്ഡലം കമ്മിറ്റിയുടെ ഫലകം കൈമാറുകയും ചെയ്തു.

ഗാന്ധിദർശൻ, ഗാന്ധി സ്മാരക നിധി, ഗാന്ധി പീസ് ഫൗണ്ടേഷൻ, ശാന്തിസേന, കേരള യൂണിവേഴ്സിറ്റിയുടെ ഗാന്ധിയൻ പഠന കേന്ദ്രം തുടങ്ങി നിരവധി മേഖലകളിൽ ഗാന്ധി ദർശനങ്ങളുടെ പ്രചാരണത്തിനായി പ്രവർത്തിച്ചിട്ടുള്ള അദ്ദേഹം മാറാട് കലാപം നടന്നപ്പോഴുള്ള സർക്കാരിന്റെ സമാധാന സേനയിലും അംഗമായിരുന്നു. കലാപ കലുഷിതമായ മേഖലയിൽ നിരവധി ദിവസം താമസിച്ച് സമാധാനം പുനസ്ഥാപിക്കാൻ അദ്ദേഹവും സംഘവും പരിശ്രമിച്ചു.

കോൺഗ്രസ്‌ ശാർക്കര മണ്ഡലം പ്രസിഡന്റ്‌ അഡ്വ.രാജേഷ്.ബി.നായർ മുഖ്യപ്രഭാഷണം നടത്തി. ബ്ലോക്ക്‌ കോൺഗ്രസ് ജനറൽ സെക്രട്ടറി സുനിൽ സലാം സ്വാഗതവും യൂത്ത് കോൺഗ്രസ്‌ മണ്ഡലം പ്രസിഡന്റ്‌ റാഫി ബഷീർ നന്ദിയും പറഞ്ഞു.

വൃദ്ധയെ പാലത്തിനടിയിൽ മരിച്ച നിലയിൽ കണ്ടെത്തി

by Midhun HP News | Aug 19, 2022 | Latest News, ജില്ലാ വാർത്ത

വർക്കല: വൃദ്ധയെ പാലത്തിനടിയിൽ മരിച്ച നിലയിൽ കണ്ടെത്തി. മുത്താന വിളയിൽ പുത്തൻ വീട്ടിൽ രാജമ്മ (75)യെയാണ് മുത്താന പാലത്തിനു സമീപം മരിച്ച നിലയിൽ കണ്ടെത്തിയത്. മുത്താന പാലത്തിനു സമീപമുള്ള തോട്ടിൽ വൈകുന്നേരങ്ങളിൽ വൃദ്ധ കുളിക്കുവാൻ പോകുന്നത് പതിവാണെന്ന് നാട്ടുകാർ പറയുന്നു.കഴിഞ്ഞ ദിവസം കുളിക്കുന്നതിനിടയിൽ കാൽ വഴുതി തോട്ടിലേക്ക് വീണു അപകടം സംഭവിച്ചതാകാമെന്നാണ് പോലീസിന്റെ പ്രാഥമിക നിഗമനം.

ഫോറിൻസിക് വിദഗ്ധരും പോലീസും സ്ഥലത്തെത്തി ആവശ്യമായ നടപടികൾ സ്വീകരിച്ച ശേഷം മൃതദേഹം പോസ്റ്റ്‌ മോർട്ടത്തിനായി പാരിപ്പള്ളി മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി. 40 വർഷമായി ഒറ്റക്കാണ് രാജമ്മ താമസിക്കുന്നത്. വിവാഹിതയായിരുന്നുവെങ്കിലും മക്കളില്ല. ചെമ്മരുതി ഗ്രാമ പഞ്ചായത്തിന്റെ പകൽ വീടിലാണ് ഇവർ പകൽ സമയം ചിലവഴിച്ചിരുന്നത്. കല്ലമ്പലം പോലിസ് കേസെടുത്തു.

തിങ്കളാഴ്ച വരെ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ മഴയ്ക്ക് സാധ്യത

by Midhun HP News | Aug 19, 2022 | Latest News, ജില്ലാ വാർത്ത

തിരുവനന്തപുരം: കേരളത്തിൽ തിങ്കളാഴ്ച വരെ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. ഇന്ന് സംസ്ഥാനത്ത് കൊല്ലം, പത്തനംതിട്ട, ആലപ്പുഴ, എറണാകുളം, തൃശ്ശൂർ, കണ്ണൂർ എന്നീ ജില്ലകളിൽ ഒറ്റപ്പെട്ടയിടങ്ങളിൽ മഴയ്ക്ക് സാധ്യതയുണ്ടെന്നാണ് കാലാവസ്ഥ വകുപ്പ് അറിയിച്ചത്.