by Midhun HP News | Nov 18, 2025 | Latest News, ജില്ലാ വാർത്ത
മെഡിക്കൽ ബിരുദാനന്തര ബിരുദ പ്രവേശനത്തിനുള്ള നീറ്റ് – പി ജി ആദ്യ റൗണ്ട് അലോട്ട്മെന്റ് ഫലം ഈ മാസം 20 ന് പ്രഖ്യാപിക്കും. മെഡിക്കൽ കൗൺസിൽ കമ്മിറ്റിയാണ് ഇക്കാര്യം വ്യക്തമാക്കിയത്. അലോട്ട്മെന്റിൽ ഉൾപ്പെട്ടവർക്ക് 21 മുതൽ 27 വരെയുള്ള ദിവസങ്ങളിൽ ബന്ധപ്പെട്ട കോളജുകളിൽ എത്തി പ്രവേശനം നേടാം.
രണ്ടാം ഘട്ട നടപടികൾ അടുത്ത മാസം രണ്ടിന് ആരംഭിക്കും. അലോട്ട്മെന്റ് ഫലം ഡിസംബർ 10 ന് ആണ് പ്രസിദ്ധീകരിക്കുന്നത്. രണ്ടാം റൗണ്ട് അലോട്ട്മെന്റ് ലിസ്റ്റിൽ ഉൾപ്പെടുന്നവർക്ക് 11 മുതൽ 18 വരെയുള്ള ദിവസങ്ങളിൽ കോളജുകളിൽ എത്തി പ്രവേശനം നേടണം. മൂന്നാം ഘട്ട പ്രവേശന നടപടികൾ ഡിസംബർ 23 ന് ആരംഭിക്കും. അലോട്ട്മെന്റ് ഫലം 31 ന് പ്രസിദ്ധീകരിക്കും. ജനുവരി 1 മുതൽ 8 വരെയുള്ള തീയതികളിൽ കോളജുകളിൽ എത്തി അഡ്മിഷൻ നേടണം.
ഒഴിവുള്ള സീറ്റുകൾ നികത്തുന്നതിനുള്ള സ്ട്രെ വേക്കൻസി റൗണ്ട് അടുത്ത വർഷം ജനുവരി 13ന് തുടങ്ങും. അലോട്ട്മെന്റ് ഫലം 21 ന് പ്രഖ്യാപിക്കും. ജനുവരി 22 നും 31നും ഇടയിൽ കോളജിൽ എത്തി പ്രവേശനം നേടണം.
by Midhun HP News | Nov 18, 2025 | Latest News, ജില്ലാ വാർത്ത
ആറ്റിങ്ങൽ: നഷാ മുക്ത് ഭാരത് അഭിയാൻ ക്യാമ്പയിൻ നഗരസഭ ആരോഗ്യ വിഭാഗത്തിൻ്റെ നേതൃത്വത്തിൽ സംഘടിപ്പിച്ചു. രാജ്യത്തെ യുവാക്കളുടെ ഇടയിൽ വർദ്ധിച്ചു വരുന്ന മയക്കുമരുന്ന് ലഹരിയുടെ ഉപയോഗത്തിന് തടയിടുന്നതിൻ്റെ ഭാഗമായാണ് പ്രാദേശിക തലത്തിൽ ക്യാമ്പയിനുകൾ സംഘടിപ്പിക്കുന്നത്.
ഏതൊരു രാജ്യത്തിൻ്റെയും ഊർജ്ജവും, ശക്തിയും യുവത്വമാണെന്ന തിരിച്ചറിവ് പുതിയ തലമുറയ്ക്ക് അന്യമാകുന്ന സാഹചര്യമാണ് ഇന്നുള്ളത്. നഗരസഭാങ്കണത്തിൽ നടന്ന പരിപാടിയിൽ ആരോഗ്യ വിഭാഗം ക്ലീൻസിറ്റി മാനേജർ എം.ആർ. റാംകുമാർ അധ്യക്ഷനായി.
ഹെൽത്ത് ഇൻസ്പെക്ടർ എ.ആർ. ആരീഷ് പ്രതിജ്ഞാ വാചകം ചൊല്ലിക്കൊടുത്തു.
ആരോഗ്യ വിഭാഗം ഉദ്യോഗസ്ഥർ ശുചീകരണ തൊഴിലാളികൾ തുടങ്ങിയവർ ക്യാമ്പയിൽ പങ്കെടുത്തു. വരും ദിവസങ്ങളിൽ നഗരത്തിൻ്റെ പ്രധാന കേന്ദ്രങ്ങളിൽ പൊതുജന പങ്കാളിത്തത്തോടെ ക്യാമ്പയിനുകൾ സംഘടിപ്പിക്കാൻ ഒരുങ്ങുകയാണ് ആറ്റിങ്ങൽ നഗരസഭ.
by Midhun HP News | Nov 18, 2025 | Latest News, ജില്ലാ വാർത്ത
തിരുവനന്തപുരം: അതീവ ഗുരുതരാവസ്ഥയിലുള്ള രോഗിയുമായി ആശുപത്രിയിലേക്ക് പോയ ആംബുലൻസിന്റെ വഴി മുടക്കി കാർ ഡ്രൈവർ. കഴിഞ്ഞ ശനിയാഴ്ച പേരൂർകടയ്ക്കും വഴയിലയ്ക്കും ഇടയിലാണ് സംഭവം നടന്നത്. അബോധാവസ്ഥയിലായ കൃഷ്ണകുമാർ എന്ന രോഗിയുമായി വട്ടപ്പാറ എസ്യുടി ആശുപത്രിയിൽ നിന്ന് പോയ ആംബുലൻസിന് മുന്നിലാണ് തടസ്സമുണ്ടാക്കിയത്.
ശനിയാഴ്ച രാത്രി 10.15 ഓടെയാണ് സംഭവം. തിരുവനന്തപുരം എസ്കെ ആശുപത്രിയിലേക്ക് ഡയാലിസിസിനായാണ് രോഗിയുമായി ആംബുലൻസ് പുറപ്പെട്ടത്. ഏറെ നേരം മാർഗ തടസ്സമുണ്ടാക്കിയാണ് കാർ ആംബുലൻസിനെ പോകാൻ അനുവദിച്ചത്. ഹോണ് പലതവണ അടിച്ചിട്ടും കാർ വഴിമാറി കൊടുത്തില്ല. ആംബുലൻസ് അധികൃതർ ഇതുവരെ പൊലീസിൽ പരാതി നൽകിയിട്ടില്ല. ദൃശ്യങ്ങളുടെ അടിസ്ഥാനത്തിൽ മോട്ടോർ വാഹന വകുപ്പ് അധികൃതർ അന്വേഷണം തുടങ്ങി.
by Midhun HP News | Nov 18, 2025 | Latest News, ജില്ലാ വാർത്ത
തിരുവനന്തപുരം റവന്യൂ ജില്ലാ സ്കൂൾ കലോത്സവം നവം: 25, 26, 27, 28, 29 തീയതികളിലായി ആറ്റിങ്ങൽ ഗവ: ബോയ്സ്, ഗവ: ഗേൾസ്, ഡയറ്റ്, ഠൗൺ യു.പി.എസ്, സ്കൗട്ട് ഹാൾ എന്നിവിടങ്ങളിലായി നടക്കും.
ജില്ലയിലെ വിവിധ സ്കൂളുകളിൽ നിന്നായി പതിനായിരക്കണക്കിന് കുട്ടികൾ പങ്കെടുക്കുന്ന ഈ മേളയുടെ പന്തൽ നാട്ടൽ കർമ്മം ഇന്ന് ആറ്റിങ്ങൾ ബോയ്സ് സ്കൂളിൽ വച്ച് ആറ്റിങ്ങൽ ഡി.ഇ.ഒ. ബിജു നിർവ്വഹിച്ചു. ഈ ചടങ്ങിൽ വിവിധ സബ് കമ്മറ്റി കൺവീനർമാരായ എൻ. സാബു, വി സി അഖിലേഷ്, ദിനേഷ് കുമാർ .കെ, സുഖീന്ദ്രൻ, റഫീക്ക്, ബിജു, നജീബ്, സജ്ഞീവ്, എന്നിവരും ആറ്റിങ്ങൽ ബോയ്സ് സ്കൂൾ പ്രിൻസിപ്പൽ ജവാദ്, വൊക്കേഷണൽ ഹയർ സെക്കൻററി പ്രിൻസിപ്പൽ ഹസീന, ഹെഡ്മാസ്റ്റർ അനിൽ കുമാർ, ബി.പി.സി. വിനു എന്നിവർ പങ്കെടുത്തു.
by Midhun HP News | Nov 18, 2025 | Latest News, ജില്ലാ വാർത്ത
64-മത് തിരുവനന്തപുരം റവന്യൂ ജില്ലാ സ്കൂൾ കലോത്സവം ആറ്റിങ്ങലിൽ നടക്കും. 2025 നവംബർ 25 മുതൽ 29 വരെ ആറ്റിങ്ങൽ GBHSS, GGHSS, DIET School, Town UPS എന്നിവടങ്ങളിൽ വെച്ച് നടക്കുന്നതാണ്.
കലോത്സവത്തിന്റെ ഭാഗമായി ജില്ലയിലെ വിവിധ സ്കൂളിൽ നിന്നായി കുട്ടികൾ തയ്യാറാക്കിയ ലോഗോകളിൽ നിന്നും സെലക്ട് ചെയ്ത ലോഗോയുടെ പ്രകാശനം ആറ്റിങ്ങൽ ഗവണ്മെന്റ് മോഡൽ ബോയ്സ് HSS ഇൽ വച്ചു DGE ഉമേഷ് NSK IAS, തിരുവനന്തപുരം ജില്ല വിദ്യാഭ്യാസ ഡെപ്യൂട്ടി ഡയറക്ടർ ശ്രീജ ഗോപിനാഥിന് നൽകി നിർവഹിക്കുന്നു. നാളെ രാവിലെ 10 മണിയ്ക്കാണ് ലോഗോ പ്രകാശനം നടക്കുന്നത്. ചിറയിൻകീഴ് ശാരദ വിലാസം സ്കൂളിലെ ഒൻപതാം ക്ലാസ്സ് വിദ്യാർത്ഥിനി അദീന പി എൻ തയ്യാറാക്കിയ ലോഗോ ആണ് തെരെഞ്ഞെടുക്കപ്പെട്ടത്.
by Midhun HP News | Nov 18, 2025 | Latest News, ജില്ലാ വാർത്ത
തിരുവനന്തപുരം: തിരുവനന്തപുരം ജില്ലാ കോണ്ഗ്രസ് പ്രസിഡന്റ് പദവിയില് നിന്നും മുതിര്ന്ന നേതാവ് എന് ശക്തന് രാജിവെച്ചു. രാജിക്കത്ത് കെപിസിസി പ്രസിഡന്റ് സണ്ണി ജോസഫിന് കൈമാറി. ഡിസിസി അധ്യക്ഷ സ്ഥാനത്ത് തുടരാന് താല്പ്പര്യമില്ലെന്ന് ചൂണ്ടിക്കാട്ടിയാണ് രാജി. അതേസമയം കെപിസിസി രാജി അംഗീകരിച്ചിട്ടില്ലെന്നാണ് സൂചന.
ശബ്ദരേഖ വിവാദത്തെത്തുടര്ന്ന് പാലോട് രവി രാജിവെച്ചതിനെത്തുടര്ന്നാണ് മുതിര്ന്ന നേതാവായ എന് ശക്തനെ താല്ക്കാലിക ഡിസിസി അധ്യക്ഷനായി നിയമിച്ചത്. ഉടന് തന്നെ സ്ഥിരം ഡിസിസി അധ്യക്ഷനെ നിയമിക്കുമെന്നും, അതുവരെ ഡിസിസി പ്രസിഡന്റിന്റെ ചുമതല വഹിക്കാനുമാണ് കെപിസിസി നേതൃത്വം ശക്തനോട് ആവശ്യപ്പെട്ടിരുന്നത്. സ്ഥിരം അധ്യക്ഷനെ കണ്ടെത്താനായി പലവിധത്തിലുള്ള ചര്ച്ചകള് പാര്ട്ടിയില് നടന്നിരുന്നു. എന്നാല് ഡിസിസി അധ്യക്ഷന്റെ കാര്യത്തില് ഇതുവരെ തീരുമാനമായില്ല. നേരത്തെ പലതവണ സ്ഥാനം ഒഴിയാനുള്ള താല്പ്പര്യം ശക്തന് പാര്ട്ടി നേതൃത്വത്തെ അറിയിച്ചിരുന്നതായും റിപ്പോര്ട്ടുണ്ട്. അതേസമയം, തദ്ദേശ തെരഞ്ഞെടുപ്പ് കഴിയുന്നതുവരെ ഡിസിസി അധ്യക്ഷസ്ഥാനത്തു തുടരാന് കെപിസിസി നേതൃത്വം ശക്തനോട് ആവശ്യപ്പെടുമെന്നാണ് സൂചന.
Recent Comments