തിരുവനന്തപുരം: സൂര്യാതപമേറ്റ് ചികിത്സയില് കഴിഞ്ഞിരുന്ന യുവാവ് മരിച്ചു. ഇടവ വെണ്കുളം സ്വദേശി ഷൈന് ആണ് മരിച്ചത്. വെല്ഡിങ്ങ് തൊഴിലാളിയാണ്. കഴിഞ്ഞ 18നാണ് സംഭവം. ഷൈന് കുഴഞ്ഞു വീഴുകയായിരുന്നു. ഉടന് തന്നെ പാരിപ്പള്ളി മെഡിക്കല് കോളജിലേക്ക് കൊണ്ടുപോയി. തുടര്ന്ന് വിദഗ്ധ ചികിത്സയ്ക്കായി തിരുവനന്തപുരം മെഡിക്കല് കോളജിലേക്ക് മാറ്റി. ഇവിടെ ചികിത്സയിലിരിക്കെ ആരോഗ്യനില വഷളായതിനെ തുടര്ന്നാണ് മരണം സംഭവിച്ചത്.
ബി ഡി എസ് വിദ്യാര്ത്ഥി നിതിന് രാജിന്റെ മരണത്തിന് ഉത്തരവാദികളായവരെ അറസ്റ്റു ചെയ്യണമെന്നാവശ്യപ്പെട്ട് നാളെ രാവിലെ ആറു മുതല് വൈകിട്ട് ആറു വരെ നടത്തുന്ന ഹര്ത്താലുമായി സഹകരിക്കില്ലെന്ന് കേരള വ്യാപാരി വ്യവസായി ഏകോപന സമിതി സംസ്ഥാന വൈസ് പ്രസിഡന്റ് പി സി ജേക്കബ്ബ് വാര്ത്താക്കുറിപ്പില് അറിയിച്ചു.
കേസിന്റെ അന്വേഷണം ശരിയായ ദിശയിലൂടെയാണ് മുന്നോട്ടു പോകുന്നതെന്നാണ് മനസിലാക്കാന് കഴിഞ്ഞത്. നിതിന് രാജിന്റെ മരണത്തില് പ്രതിസ്ഥാനത്തുളള വ്യക്തിയുടെ മുന്കൂര് ജാമ്യാപേക്ഷ കോടതി തള്ളുകയും ഇയാള്ക്കെതിരെ പോലീസ് അന്വേഷണം ഊര്ജ്ജിതമാക്കുകയും ചെയ്ത സാഹചര്യത്തില് ഹര്ത്താല് നടത്തി ജനങ്ങളെ ബുദ്ധിമുട്ടിപ്പിക്കുന്നതിനോട് യോജിപ്പില്ല.
ഏകോപന സമിതിയില് അംഗങ്ങളായിട്ടുള്ള മുഴുവന് വ്യാപാരികളും പതിവ് പോലെ നാളെയും കടകള് തുറക്കുമെന്നും പി സി ജേക്കബ്ബ് വ്യക്തമാക്കി.
തിരുവനന്തപുരം: കനത്ത ചൂടിനെത്തുടര്ന്ന് ഉപഭോഗം വന്തോതില് വര്ധിച്ചതോടെ സംസ്ഥാനത്ത് വൈദ്യുത നിയന്ത്രണം ഏര്പ്പെടുത്തുന്നു. പീക്ക് ലോഡ് മാനേജ്മെന്റ് എന്ന പേരിലാണ് നിയന്ത്രണം. നിയന്ത്രണം ഇല്ലാതെ മുന്നോട്ടു പോകാനാകില്ലെന്ന നിലപാടിലാണ് വൈദ്യുതി ബോര്ഡ്.
15 മിനിറ്റ് മുതല് അര മണിക്കൂര് വരെയാകും വൈദ്യുതി നിയന്ത്രണം ഏര്പ്പെടുത്തുക. വൈദ്യുതമുടക്കം എസ്എംഎസ് ആയി ഉപഭോക്താക്കളെ അറിയിക്കും. അതാത് പ്രദേശത്തിന്റെ സാഹചര്യവും, വൈദ്യുത ഉപയോഗ തോതും പരിഗണിച്ചായിരിക്കും നിയന്ത്രണം ഏര്പ്പെടുത്തുക.
പീക്ക് മണിക്കൂറുകളിലെ വൈദ്യുതി ഉപയോഗം ക്രമീകരിച്ച് സഹകരിക്കണമെന്ന് കെഎസ്ഇബി അഭ്യര്ഥിച്ചു. വൈകീട്ട് ആറിനും രാത്രി 11 നും ഇടയില് വൈദ്യുതി ഉപഭോഗം വളരെ ഉയര്ന്നിരിക്കുകയാണ്. ലോഡ് താങ്ങാന് കഴിയാത്തത്ര തരത്തില് ഉയരുമ്പോള് സിസ്റ്റം തന്നെ തകരാറിലാകാന് ഇടയാക്കുമെന്ന് കെഎസ്ഇബി പറയുന്നു.
നിലവിലെ പ്രതിസന്ധി തരണം ചെയ്യാൻ വൈകീട്ട് 6-നും രാത്രി 11-നുമിടയിൽ വൈദ്യുതി ഉപയോഗം പരമാവധി കുറയ്ക്കണം. പമ്പ് സെറ്റ്, ഇൻഡക്ഷൻ സ്റ്റൗ, വാട്ടർ ഹീറ്റർ, ഇസ്തിരിപ്പെട്ടി, വാഷിംഗ് മെഷീൻ, തുടങ്ങിയ ഉപകരണങ്ങളുടെ ഉപയോഗവും വൈദ്യുതി വാഹന ചാർജിങ്ങും ആറുമണിക്കുശേഷം ഒഴിവാക്കണം. എസിയുടെ താപനില 24-26 ഡിഗ്രി സെൽഷ്യസിൽ ക്രമീകരിച്ചും, അത്യാവശ്യമല്ലാത്ത ലൈറ്റുകളും മറ്റുപകരണങ്ങളും ഓഫ് ചെയ്തും സഹകരിക്കണമെന്നും കെഎസ്ഇബി ആവശ്യപ്പെട്ടു.
ആറ്റിങ്ങൽ: ഇടയ്ക്കോട് അനീഷ്കോട്ടേജിൽ കെ തുളസീധരൻ നായർ (72) അന്തരിച്ചു.
ഭാര്യ: എസ് അംബികാ കുമാരി.
മക്കൾ: റ്റി അനീഷ് (സി.പി.ഐ.എം ഇടയ്ക്കോട് ലോക്കൽ കമ്മിറ്റി അംഗം, ബാലസംഘം ആറ്റിങ്ങൽ ഏര്യ കൺവീനർ), റ്റി അജീഷ്, റ്റി അഖിലേഷ്.
മരുമക്കൾ: അശ്വതി എസ് നായർ, വിജി ആർ, അഭിരാമി എസ്.എസ്.
സഞ്ചയനം വെള്ളിയാഴ്ച രാവിലെ 8 മണിക്ക്
ആലപ്പുഴ: ജില്ലാ ജയിലിൽ റിമാൻഡ് പ്രതിയെ തൂങ്ങി മരിച്ച നിലയിൽ കണ്ടെത്തി. റിമാൻഡ് പ്രതിയായ ശരത് പ്രസാദിനെയാണ് മരിച്ച നിലയിൽ കണ്ടെത്തിയത്. ഇന്ന് വൈകീട്ടാണ് തൂങ്ങിയ നിലയിൽ മൃതദേഹം കണ്ടത്.
ജനറൽ ആശുപത്രിയിൽ ഡ്യൂട്ടി ഡോക്ടറെ അസഭ്യം പറഞ്ഞ കേസിൽ പ്രതിയാണ് ശരത്. ആലപ്പുഴ പുന്നപ്ര സ്വദേശിയാണ് ശരത്. ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
തിരുവനന്തപുരം: നെയ്യാറ്റിന്കരയില് യുവാവ് ഭാര്യയെ കുത്തിക്കൊലപ്പെടുത്തി. വ്ലാത്താങ്കര സ്വദേശി എംഎല് അല്മയാണ് കൊല്ലപ്പെട്ടത്. 33 വയസ്സായിരുന്നു. സംഭവത്തില് ഭര്ത്താവ് വിഷ്ണുവിനെ പൊലീസ് അറസ്റ്റ് ചെയ്തു.
രാവിലെ 8 മണിക്കും 8.30 നും ഇടയിലാണ് സംഭവം. കൊലപാതകത്തിന്റെ കാരണം എന്താണെന്ന് വ്യക്തമല്ല. പ്രതി വിഷ്ണു ട്യൂഷന് സെന്ററുകളില് ക്ലാസെടുക്കുന്ന അധ്യാപകനാണ്. കൊലപാതകശേഷം വിഷ്ണു സമീപത്തെ വീട്ടിലെത്തി വിവരം അറിയിക്കുകയായിരുന്നു. ഉടന് പൊലീസ് സ്ഥലത്തെത്തി വിഷ്ണുവിനെ കസ്റ്റഡിയിലെടുക്കുകയായിരുന്നു. വിഷ്ണുവും അല്മയുമാണ് താമസിച്ചിരുന്നത്. മക്കളില്ല. ഇവരുടെ വിവാഹം കഴിഞ്ഞിട്ട് ഒമ്പതു വര്ഷമായി. കുടുംബ വഴക്കാണ് കൊലപാതകത്തിന് കാരണമെന്നാണ് പൊലീസിന്റെ പ്രാഥമിക നിഗമനം.
Recent Comments