by Midhun HP News | Sep 14, 2025 | Latest News, ജില്ലാ വാർത്ത
അമീബിക് മസ്തിഷ്ക ജ്വരം സ്ഥിരീകരിച്ചതിനെ തുടർന്ന് ആക്കുളം നീന്തൽകുളം അണുവിമുക്തമാക്കാൻ ആരോഗ്യ വകുപ്പിൻ്റെ കർശന നിർദേശം. നീന്തൽക്കുളത്തിലെ മുഴുവൻ വെള്ളവും തുറന്നുവിടണം. നീന്തൽക്കുള ഭിത്തി തേച്ച് ഉരച്ച് ശുചിയാക്കണം. വെള്ളം നിലനിർത്തുമ്പോൾ ക്ലോറിനേറ്റ് ചെയ്ത് നിലനിർത്തണമെന്നും ജില്ലാ ആരോഗ്യവിഭാഗം ആക്കുളം ടൂറിസ്റ്റ് വില്ലേജിന് നിർദ്ദേശം നൽകി. തിരുവനന്തപുരത്ത് പൂവാർ സ്വദേശിയായ പതിനേഴുകാരന് രോഗം സ്ഥിരീകരിച്ചതിന് പിന്നാലെ ആക്കുളം ടൂറിസ്റ്റ് വില്ലേജിലെ നീന്തൽകുളം ആരോഗ്യവകുപ്പ് പൂട്ടിയിരുന്നു. വെള്ളത്തിന്റെ സാമ്പിൾ ആരോഗ്യവകുപ്പ് പരിശോധനയ്ക്ക് അയച്ചിരിക്കുകയാണ്.
മൂന്നു കൂട്ടുകാർക്കൊപ്പമായിരുന്നു പതിനേഴുകാരൻ ഓഗസ്റ്റ് 16ന് ആക്കുളം ടൂറിസ്റ്റ് വില്ലേജിലെ നീന്തൽകുളത്തിലെത്തി കുളിച്ചിരുന്നത്. പിറ്റേന്ന് മുതലാണ് രോഗലക്ഷണങ്ങൾ കണ്ടു തുടങ്ങിയത്. ഇന്നലെയാണ് പതിനേഴുകാരന് അമീബിക് മസ്തിഷ്ക ജ്വരം സ്ഥിരീകരിച്ചത്. ഒപ്പമുണ്ടായിരുന്നു മൂന്നുപേർക്ക് നിലവിൽ രോഗലക്ഷണങ്ങൾ ഇല്ല. എന്നാൽ ഇവർ ആരോഗ്യവകുപ്പിന്റെ നിരീക്ഷണത്തിലാണ്.
അതേസമയം, തിരുവനന്തപുരം മെഡിക്കൽ കോളജിൽ നിലവിൽ ഒൻപത് പേർ അമീബിക് മസ്തിഷ്ക ജ്വരം ബാധിച്ച് ചികിത്സയിലുണ്ട്. ഇതിൽ പതിനാലുകാരൻറെ നില ഗുരുതരമാണ്. അമീബിക് മസ്തിഷ്ക ജ്വരം ബാധിച്ച് കോഴിക്കോട് ജില്ലയിൽ 10 പേർ ചികിത്സയിൽ തുടരുകയാണ്.
കോഴിക്കോട്, മലപ്പുറം, വയനാട് സ്വദേശികളാണ് ചികിത്സയിലുള്ളത്. കോഴിക്കോട് മെഡിക്കൽ കോളജ് ആശുപത്രിയിൽ 9 പേരും സ്വകാര്യ ആശുപത്രിയിൽ ഒരാളുമാണ് ഉള്ളത്. ഈ വർഷം 66 പേർക്ക് രോഗബാധ ഉണ്ടായെന്നും 17 പേർ മരിച്ചെന്നുമാണ് ആരോഗ്യവകുപ്പിൻ്റെ കണക്ക്. ഈ മാസം ഇതുവരെ 19 പേർക്ക് രോഗം സ്ഥിരീകരിക്കുകയും ഏഴു പേർ മരിക്കുകയും ചെയ്തു. പല കേസുകളിലും ഉറവിടം വ്യക്തമല്ലാത്തതാണ് ആരോഗ്യവകുപ്പിനെ കുഴക്കുന്നത്
by Midhun HP News | Sep 14, 2025 | Latest News, ജില്ലാ വാർത്ത
മാമം, തക്ഷശില ലൈബ്രറിയിൽ ഗ്രന്ഥശാല ദിനം ആചരിച്ചു. ലൈബ്രറി അങ്കണത്തിൽ നടന്ന ചടങ്ങിൽ തിരു:ജില്ലാ ലൈബ്രറി കൗൺസിൽ മെമ്പർ ഗിരി കെ എസിന്റെ സാന്നിധ്യത്തിൽ പ്രസിഡന്റ്‌ ജയകുമാർ പതാക ഉയർത്തി.
തുടർന്ന് ഗിരി കെ എസ്സ്, ലൈബ്രറിയുടെ പുസ്തക സമാഹരണം ഉദ്ഘാടനം ചിറയിൻകീഴിലെ പൂരം ഫാൻസി കട ഉടമ സിന്ധു മധുവിൽനിന്ന് പുസ്തകങ്ങൾ സ്വീകരിച്ച് നിർവ്വഹിക്കുകയും ചെയ്തു. അംഗത്വ വിതരണ ഉദ്ഘാടനം ലൈബ്രറി സെക്രട്ടറി രഞ്ജിത്ത് കുമാർ ഗായത്രിക്കു നൽകി നിർവ്വഹിച്ചു. ലൈബ്രറി എക്സിക്യൂട്ടീവ് അംഗം ശ്രീജിത്ത്, ബ്രദേഴ്സ് കൺസ്ട്രക്ഷൻ എം.ഡി മധു എസ്സ്, ലൈബറി വനിതാവേദി, ബാലവേദി അംഗങ്ങൾ തുടങ്ങിയവർ പങ്കെടുത്തു.
by Midhun HP News | Sep 14, 2025 | Latest News, ജില്ലാ വാർത്ത
കേരള ഹിന്ദി പ്രചാരസഭ 2025 ആഗസ്റ്റ് മാസത്തിൽ നടത്തിയ പ്രഥമ പരീക്ഷയിൽ ഒന്നാം റാങ്ക് നേടിയ നിവേദിത എ.എൻ. ആറ്റിങ്ങൽ മൃഗാശുപത്രിക്ക് സമീപം ഹരിചന്ദനത്തിൽ നിതിൻ രാജേന്ദ്രന്റേയും ആതിര എം.എസിന്റേയും മകളാണ്. ആറ്റിങ്ങൽ ബാബുജി ഹിന്ദി വിദ്യാലയത്തിലേയും മദർ ഇന്ത്യയിലെയും വിദ്യാർത്ഥിയാണ്.
by Midhun HP News | Sep 14, 2025 | Latest News, ജില്ലാ വാർത്ത
വക്കം ഗവൺമെന്റ് വിഎച്ച്എസ്എസ് 125 വർഷത്തിന്റെ നിറവിൽ. സെപ്റ്റംബർ 15 മുതലാണ് വാർഷികാഘോഷ പരിപാടികൾ സംഘടിപ്പിച്ചിരിക്കുന്നത്. ഒരു വർഷം നീളുന്ന ആഘോഷ പരിപാടികളുടെ ഉദ്ഘാടനം നാളെ (സെപ്റ്റംബർ 15ന്) വൈകുന്നേരം നാലിന് മന്ത്രി വി. ശിവൻകുട്ടി നിർവഹിക്കും.
സ്കൂളിന്റെ സുരക്ഷയും അച്ചടക്കവും ഉറപ്പുവരുത്തുവാൻ പൂർവ വിദ്യാർത്ഥികളും അധ്യാപകരും നാട്ടുകാരും മുൻകൈയെടുത്ത് സ്കൂൾ അങ്കണത്തിൽ സ്ഥാപിച്ച സിസിടിവി പദ്ധതിയുടെ സ്വിച്ച് ഓൺ കർമ്മം അടൂർപ്രകാശ് എം. പി നിർവഹിക്കും.
പൂർവ്വ അധ്യാപക വിദ്യാർത്ഥികളുടെയും നാട്ടുകാരുടെയും സഹകരണത്തോടെ മൂന്നുലക്ഷം രൂപ സമാഹരിച്ചാണ് പദ്ധതി നടപ്പിലാക്കിയത്.
1900ത്തിൽ കുടിപ്പള്ളിക്കുടമായി തുടങ്ങിയതാണ്. പ്രജാസഭ മെമ്പർ ആയിരുന്ന കൊച്ചു പപ്പുതരകൻ സംഭാവന ചെയ്ത വസ്തുവിൽ ആണ് വിദ്യാലയം ആരംഭിച്ചത്. ശ്രീനാരായണഗുരുദേവൻ ആണ് ഉദ്ഘാടനം നിർവഹിച്ചത്.
1905ഇൽ ഈ കുടിപ്പള്ളിക്കൂടത്തെ സർക്കാർ ഏറ്റെടുത്തു പൊട്ടച്ചൻ വിളാകം പ്രൈമറി സ്കൂൾ ആയി ഉയർത്തി. 1961ൽ ഹൈസ്കൂൾ ആയും 1984ഇൽ വി എച്ച് എസ് ഇയും അനുവദിച്ചു. ആദ്യകാല വൊക്കേഷണൽ ഹയർ സെക്കൻഡറി സ്കൂളുകളിൽ ഒന്നാണിത്. തുടർന്ന് 2004ൽ ഹയർസെക്കൻഡറി വിഭാഗവും തുടങ്ങി. പഠന നിലവാരത്തിൽ 100% വിജയം നിലനിർത്തുന്ന മേഖലയിലെ സ്കൂളുകളിൽ ഒന്നാണിത്.
ലോക ബാങ്കിന്റെ സാമ്പത്തിക സഹായത്തോടെ സ്റ്റാർസ് പദ്ധതിയും പഠനത്തോടൊപ്പം തൊഴിലധിഷ്ഠിത കോഴ്സുകളും ഇവിടെയുണ്ട്. ജി എസ് ടി അസിസ്റ്റന്റ്, ക്ലൗഡ് കമ്പ്യൂട്ടിംഗ് എന്നീ കോഴ്സുകളും ഇതിൽ പെടും. സ്കൂളുകളിലെ വിദ്യാർത്ഥികൾക്കും പുറമേ നിന്നുള്ള കുട്ടികൾക്കും സൗജന്യമായി തൊഴിൽ പരിശീലന കോഴ്സുകളിൽ പ്രവേശനം ഉണ്ട്. ഒട്ടേറെ പ്രഗത്ഭരായവരെ വാർത്തെടുത്തിട്ടുള്ള വിദ്യാലയം കൂടിയാണിത്.
by Midhun HP News | Sep 14, 2025 | Latest News, ജില്ലാ വാർത്ത
വട്ടിയൂർക്കാവ് പുളിമൂട് ലെയിനിൽ ഗോപിനാഥൻപിള്ള (95) (കാളി ഗോപി, ബി എച്ച് എസ് ആറ്റിങ്ങൽ) നിര്യാതനായി.
by Midhun HP News | Sep 14, 2025 | Latest News, ജില്ലാ വാർത്ത
തിരുവനന്തപുരം: കിളിമാനൂരില്‍ വാഹനമിടിച്ച് കാല്‍നടയാത്രക്കാരനായ രാജന്‍ മരിച്ച സംഭവത്തില്‍ അപകടമുണ്ടാക്കി നിര്‍ത്താതെ പോയ വാഹനം തിരിച്ചറിഞ്ഞു. പാറശ്ശാല എസ്എച്ച്ഒ അനില്‍കുമാറിന്റെ ഉടമസ്ഥതയിലുള്ള കാറാണ് അപകടത്തിനു കാരണമായത്. കഴിഞ്ഞ ഞായറാഴ്ച പുലര്‍ച്ചെ നാലുമണിക്കും അഞ്ചുമണിക്കും ഇടയിലാണു സംഭവം. റോഡിലൂടെ നടന്നുപോകുകയായിരുന്ന രാജനെ ഇടിച്ചിട്ട് കാര്‍ നിര്‍ത്താതെ പോവുകയായിരുന്നു.
സിസിടിവി ദൃശ്യങ്ങള്‍ കേന്ദ്രീകരിച്ചുള്ള അന്വേഷണത്തിലാണു വാഹനം തിരിച്ചറിഞ്ഞത്. വാഹനം അമിതവേഗത്തില്‍ അലക്ഷ്യമായി ഓടിച്ചു എന്നാണ് എഫ്ഐആര്‍. കൂലിപ്പണിക്കാരനായ രാജന്‍ റോഡില്‍ ചോരവാര്‍ന്ന് ഒരു മണിക്കൂറോളം കിടന്നു. രാവിലെ 6 മണിയോടെ നാട്ടുകാരാണ് ഇദ്ദേഹത്തെ കണ്ടെത്തിയത്. നാട്ടുകാരും പൊലീസും ചേര്‍ന്ന് ആശുപത്രിയിലെത്തിച്ചെങ്കിലും രക്ഷിക്കാനായില്ല.
കിളിമാനൂര്‍ പൊലീസിന്റെ നേതൃത്വത്തില്‍ നടക്കുന്ന അന്വേഷണത്തില്‍ വാഹനം ഓടിച്ചത് അനില്‍കുമാറാണോ എന്ന് പരിശോധിക്കും. അനില്‍കുമാറാണു ഡ്രൈവറെന്നു തെളിഞ്ഞാല്‍ ജാമ്യമില്ലാ വകുപ്പുകള്‍ ചുമത്തി കേസെടുക്കും. സമീപത്തെയും ഈ റോഡിലെയും കൂടുതല്‍ സിസിടിവി ദൃശ്യങ്ങള്‍ പരിശോധിച്ചാണ് ഡ്രൈവര്‍ ആരാണ് എന്നു തിരിച്ചറിയാന്‍ ശ്രമിക്കുന്നത്.
Recent Comments