by Midhun HP News | Jun 14, 2025 | Latest News, ജില്ലാ വാർത്ത
മിഥുനമാസ പൂജകൾക്കായി ശബരിമല നട തുറന്നു. വൈകിട്ട് അഞ്ചിന് തന്ത്രി കണ്ഠര് രാജീവര്, കണ്ഠര് ബ്രഹ്മദത്തൻ എന്നിവരുടെ സാന്നിധ്യത്തിൽ മേൽശാന്തി അരുൺകുമാർ നമ്പൂതിരി നട തുറന്നു ദീപം തെളിയി ച്ചു. ശേഷം പതിനെട്ടാം പടിക്ക് താഴെ ആഴിയിൽ അഗ്നി പകർന്നു.
ഉച്ച മുതൽ അതിശക്തമായ മഴയാണ് ശബരിമല സന്നിധാനത്ത് പെയ്യുന്നത്. കനത്ത മഴയിലും ആയിരങ്ങളാണ് ഭഗവാനെ കണ്ട് വണങ്ങാൻ കാത്തു നിന്നത്. മിഥുനമാസം ഒന്നിന് നാളെ രാവിലെ അഞ്ചുമണിക്ക് നട തുറക്കും. ഒന്നു മുതൽ എല്ലാ ദിവസവും ഗണപതിഹോമം, ഉഷപൂജ, നെയ്യഭിഷേകം, ഉച്ചപൂജ, ദീപാരാധന, അത്താഴപൂജ എന്നീ ചടങ്ങുകൾ ഉണ്ടായിരിക്കും. ഇവയ്ക്ക് പുറമേ എല്ലാദിവസവും ദീപാരാധനയ്ക്കു ശേഷം പതിനെട്ടാം പടിയിൽ പടി പൂജയും നടക്കും.
മിഥുനുമാസ പൂജകൾ പൂർത്തിയാക്കി ജൂൺ 19ന് രാത്രി 10 മണിക്ക് നടയടക്കും. ഭക്തർക്ക് സുരക്ഷിതവും സൗകര്യപ്രദവുമായ ദർശനം ഒരുക്കുന്നതിന് വേണ്ട എല്ലാ ക്രമീകരണങ്ങളും തിരുവിതാംകൂർ ദേവസ്വം ബോർഡും കേരള സർക്കാരും ചേർന്ന് സ്വീകരിച്ചിട്ടുണ്ട്.
by Midhun HP News | Jun 14, 2025 | Latest News, ജില്ലാ വാർത്ത
ലണ്ടന്‍: ലോക ടെസ്റ്റ് ചാംപ്യന്‍ഷിപ്പ് കിരീടം നേടി ദക്ഷിണാഫ്രിക്ക വിഖ്യാതമായ ലോര്‍ഡ്‌സ് മൈതാനത്ത് ചരിത്രമെഴുതി. ഫൈനലില്‍ ഓസ്‌ട്രേലിയയെ 5 വിക്കറ്റിന് വീഴ്ത്തിയാണ് പ്രോട്ടീസിന്റെ കിരീട നേട്ടം. 27 വര്‍ഷത്തെ ഇടവേളയ്ക്ക് ശേഷം ദക്ഷിണാഫ്രിക്ക ഒരു ഐസിസി കിരീടത്തില്‍ മുത്തമിട്ടു. 1998ല്‍ നേടിയ ചാംപ്യന്‍സ് ട്രോഫി കിരീടം മാത്രമായിരുന്നു അവരുടെ ഏക ഐസിസി ട്രോഫി. ഹാന്‍സി ക്രോണ്യയ്ക്കു ശേഷം ദക്ഷിണാഫ്രിക്കയ്ക്ക് ഐസിസി ട്രോഫി സമ്മാനിക്കുന്ന നായകനെന്ന ഒരിക്കലും മായാത്ത നേട്ടത്തില്‍ കൈയൊപ്പു ചാര്‍ത്താന്‍ അവരുടെ ക്യാപ്റ്റന്‍ ടെംബ ബവുമയ്ക്കും സാധിച്ചു.
ഒന്നാം ഇന്നിങ്സില് 212 റണ്‍സില്‍ പുറത്തായ ഓസ്ട്രേലിയ ദക്ഷിണാഫ്രിക്കയുടെ ഒന്നാം ഇന്നിങ്സ് വെറും 138 റണ്‍സില്‍ അവസാനിപ്പിച്ച് 74 റണ്‍സ് ലീഡുമായാണ് രണ്ടാം ഇന്നിങ്സ് ബാറ്റ് വീശിയത്. ഓസീസിന്റെ രണ്ടാം ഇന്നിങ്സ് 207 റണ്‍സില്‍ അവസാനിപ്പിക്കാന്‍ പ്രോട്ടീസിനു സാധിച്ചു. ഓസീസ് 282 റണ്‍സ് വിജയ ലക്ഷ്യം ദക്ഷിണാഫ്രിക്കയ്ക്ക് മുന്നില്‍ വയ്ക്കുകയും ചെയ്തു. ഒരു ദിവസവും മൂന്ന് സെഷനുകളും ബാക്കി നില്‍ക്കെ 5 വിക്കറ്റ് മാത്രം നഷ്ടപ്പെടുത്തി ദക്ഷിണാഫ്രിക്ക 282 റണ്‍സ് കണ്ടെത്തിയാണ് ലോര്‍ഡ്‌സില്‍ ചരിത്രമെഴുതിയത്.
3 ദിവസം മുന്നില്‍ നില്‍ക്കെ കരുതലോടെ ബാറ്റ് വീശിയാണ് ദക്ഷിണാഫ്രിക്ക വിജയം പിടിച്ചത്. ഓപ്പണര്‍ എയ്ഡന്‍ മാര്‍ക്രം നേടിയ ഐതിഹാസിക സെഞ്ച്വറിയും ക്യാപ്റ്റന്‍ ടെംബ ബവുമ നേടിയ അര്‍ധ സെഞ്ച്വറിയുമാണ് ദക്ഷിണാഫ്രിക്കന്‍ ജയം അനായാസമാക്കിയത്.
ഓപ്പണറായി ഇറങ്ങി ഒന്നാം ഇന്നിങ്സില് പൂജ്യത്തില്‍ മടങ്ങേണ്ടി വന്ന മാര്‍ക്രം രണ്ടാം ഇന്നിങ്സില് ക്ലാസ് ശതകവുമായി ഒരറ്റം കാത്താണ് ടീമിനെ ജയത്തിലേക്ക് നയിച്ചത്. വിജയത്തിനു ആറ് റണ്‍സ് അകലെയാണ് താരം 136 റണ്‍സ് സ്വന്തമാക്കി മടങ്ങിയത്. എട്ടാം ടെസ്റ്റ് സെഞ്ച്വറിയിലേക്ക് 14 ഫോറുകള്‍ സഹിതമാണ് മാര്‍ക്രം എത്തിയത്. കളി ജയിക്കുമ്പോള്‍ 21 റണ്‍സുമായി ഡേവിഡ് ബഡിങ്ഹാമും 4 റണ്‍സുമായി കെയ്ല്‍ വരെയ്‌നുമായിരുന്നു ക്രീസില്‍.
ബവുമ 66 റണ്‍സെടുത്തു മടങ്ങി. വിയാന്‍ മള്‍ഡര്‍ (27), റിയാന്‍ റിക്കല്‍ടന്‍ (6), ട്രിസ്റ്റന്‍ സ്റ്റബ്‌സ് (8) എന്നിവരാണ് പുറത്തായ മറ്റ് താരങ്ങള്‍.
ഓസ്‌ട്രേലിയക്കായി മിച്ചല്‍ സ്റ്റാര്‍ക്ക് 3 വിക്കറ്റുകള്‍ വീഴ്ത്തി. കമ്മിന്‍സ്, ഹെയ്സല്വുഡ് എന്നിവര്‍ ഓരോ വിക്കറ്റെടുത്തു.
74 റണ്‍സിന്റെ നിര്‍ണായക ലീഡുമായി രണ്ടാം ഇന്നിങ്സ് തുടങ്ങിയ ഓസീസ് 28 റണ്‍സ് വരെ വലിയ പ്രശ്നമില്ലാതെ പോയി. എന്നാല്‍ 28 റണ്‍സില്‍ തുടരെ രണ്ട് വിക്കറ്റുകള്‍ വീണത് അവര്‍ക്ക് തിരിച്ചടിയായി. പിന്നീട് വിക്കറ്റുകള്‍ കൊഴിയുന്ന കാഴ്ചയായിരുന്നു. ഒരു ഘട്ടത്തില്‍ ഓസീസ് 100 കടക്കുമോ എന്നു പോലും സംശയിച്ചു. മുന്‍നിര ബാറ്റര്‍മാരെല്ലാം അതിവേഗം മടങ്ങിയപ്പോള്‍ അവര്‍ 7 വിക്കറ്റ് നഷ്ടത്തില്‍ 73 റണ്‍സെന്ന പരിതാപകരമായ അവസ്ഥയിലേക്ക് കൂപ്പുകുത്തി.
എന്നാല്‍ എട്ടാം വിക്കറ്റിലെ വീരോചിത ചെറുത്തു നില്‍പ്പുമായി അലക്സ് കാരിയും മിച്ചല്‍ സ്റ്റാര്‍ക്കും ചേര്‍ന്നു പോരാട്ടം പ്രോട്ടീസ് പാളയത്തിലേക്ക് നയിച്ചതോടെ ഓസീസിനു അല്‍പ്പം ആശ്വാസമായി. സഖ്യം സ്‌കോര്‍ 100 കടത്തുകയും ലീഡ് 200 കടത്തിയുമാണ് പിരിഞ്ഞത്. ഇരുവരും ചേര്‍ന്നു ഉയര്‍ത്തിയത് 61 റണ്‍സിന്റെ വിലപ്പെട്ട റണ്‍സുകള്‍. സ്‌കോര്‍ 134ല്‍ നില്‍ക്കെ അലക്സ് കാരി മടങ്ങി. താരം 43 റണ്‍സാണ് എടുത്തത്.
പിന്നീട് മിച്ചല്‍ സ്റ്റാര്‍ക്ക് ജോഷ് ഹെയ്‌സല്‍വുഡിനെ കൂട്ടുപിടിച്ചു നടത്തിയ ചെറുത്തു നില്‍പ്പും നിര്‍ണായകമായി. ഇരുവരും ചേര്‍ന്ന് പത്താം വിക്കറ്റില്‍ 59 റണ്‍സും ചേര്‍ത്തു. മിച്ചല്‍ സ്റ്റാര്‍ക്കാണ് രണ്ടാം ഇന്നിങ്സില് ടീമിന്റെ ടോപ് സ്‌കോററായത്. താരം 58 റണ്‍സെടുത്തു. ഹെയ്സല്വുഡ് 53 പന്തുകള്‍ ചെറുത്ത് 17 റണ്‍സും കണ്ടെത്തി.
ആദ്യ ഇന്നിങ്സില് 5 ഓസീസ് വിക്കറ്റുകള്‍ പിഴുത കഗിസോ റബാഡ രണ്ടാം ഇന്നിങ്സില് 4 വിക്കറ്റുകള്‍ വീഴ്ത്തി നേട്ടം ഒന്‍പതാക്കി ഉയര്‍ത്തി. റബാഡയ്ക്കൊപ്പം രണ്ടാം ഇന്നിങ്സില് ലുന്‍ഗി എന്‍ഗിഡിയും ഓസീസിനെ വിറപ്പിച്ചു. താരവും 3 വിക്കറ്റുകള്‍ വീഴ്ത്തി. മാര്‍ക്കോ യാന്‍സന്‍, വിയാന്‍ മള്‍ഡര്‍, എയ്ഡന്‍ മാര്‍ക്രം എന്നിവര്‍ ഓരോ വിക്കറ്റെടുത്തു.
നേരത്തെ ഓസ്‌ട്രേലിയന്‍ ക്യാപ്റ്റന്‍ പാറ്റ് കമ്മിന്‍സ് മാരക പേസുമായി കളം വാണപ്പോള്‍ ദക്ഷിണാഫ്രിക്ക തകര്‍ന്നടിയുകയായിരുന്നു. ബൗളര്‍മാര്‍ നല്‍കിയ മേല്‍ക്കൈ മുതലാക്കാന്‍ പ്രോട്ടീസ് ബാറ്റര്‍മാര്‍ക്ക് സാധിച്ചില്ല. കമ്മിന്‍സ് വെറും 28 റണ്‍സ് മാത്രം വഴങ്ങി 6 വിക്കറ്റുകളാണ് പിഴുതത്. മിച്ചല്‍ സ്റ്റാര്‍ക്ക് രണ്ടും ജോഷ് ഹെയ്സല്വുഡ് ഒരു വിക്കറ്റും സ്വന്തമാക്കി. കേശവ് മഹാരാജ് റണ്ണൗട്ടായി.
ഓസീസിനെ 212 റണ്‍സില്‍ പുറത്താക്കി ബാറ്റിങ് തുടങ്ങിയ ദക്ഷിണാഫ്രിക്ക 4 വിക്കറ്റ് നഷ്ടത്തില്‍ 43 റണ്‍സെന്ന നിലയിലാണ് ഒന്നാം ദിനം അവസാനിപ്പിച്ചത്. ആദ്യ ദിനത്തില്‍ 30 റണ്‍സിനിടെ നാല് വിക്കറ്റുകള്‍ ദക്ഷിണാഫ്രിക്കയ്ക്ക് നഷ്ടമായിരുന്നു. പിന്നീട് ക്രീസില്‍ ഒന്നിച്ച ക്യാപ്റ്റന്‍ ടെംബ ബവുമയും ഡേവിഡ് ബഡിങ്ഹാമും ചേര്‍ന്നു കൂടുതല്‍ നഷ്ടങ്ങളില്ലാതെയാണ് ഒന്നാം ദിനം അവസാനിപ്പിച്ചത്.
രണ്ടാം ദിനത്തിലെ ആദ്യ സെഷനിലും ഇരുവരും കരുതലോടെ നീങ്ങി. സ്‌കോര്‍ 94ല്‍ നില്‍ക്കെ കമ്മിന്‍സാണ് ഈ കൂട്ടുകെട്ട് പൊളിക്കുന്നത്. കമ്മിന്‍സ് ബവുമയെ മടക്കി. ബവുമ- ബെഡിങ്ഹാം സഖ്യം അഞ്ചാം വിക്കറ്റില്‍ 64 റണ്‍സ് ചേര്‍ത്താണ് പിരിഞ്ഞത്. ഒന്നാം ഇന്നിങ്സില് ദക്ഷിണാഫ്രിക്കയുടെ മികച്ച കൂട്ടുകെട്ടും ഇതുതന്നെ.
ബഡിങ്ഹാമാണ് ടോപ് സ്‌കോറര്‍. താരം 111 പന്തില്‍ 45 റണ്‍സെടുത്തു. ബവുമ 84 പന്തില്‍ 36 റണ്‍സും കണ്ടെത്തി. 16 റണ്‍സെടുത്ത റിയാന്‍ റിക്കല്‍ടന്‍, 13 റണ്‍സെടുത്ത കെയ്ല്‍ വരെയ്ന്‍ എന്നിവരാണ് രണ്ടക്കം കടന്ന മറ്റുള്ളവര്‍.
ആദ്യം ബാറ്റിങിന് ഇറങ്ങിയ ഓസീസിനെ ഒന്നാം ഇന്നിങ്സില് കഗിസോ റബാഡയാണ് വെള്ളം കുടിപ്പിച്ചത്. പ്രോട്ടീസിനായി റബാഡ 5 വിക്കറ്റുകളും മാര്‍ക്കോ യാന്‍സന്‍ 3 വിക്കറ്റുകളും നേടി. ശേഷിച്ച രണ്ട് വിക്കറ്റുകള്‍ സ്പിന്നര്‍മാരായ കേശവ് മഹാരാജും എയ്ഡന്‍ മാര്‍ക്രവും നേടി.
മറുപടി പറയാനിറങ്ങിയ ദക്ഷിണാഫ്രിക്ക ഒരു ഘട്ടത്തില്‍ 30 റണ്‍സ് ചേര്‍ക്കുന്നതിനിടെ 4 വിക്കറ്റുകള്‍ നഷ്ടപ്പെട്ട് പരുങ്ങിയിരുന്നു. മിച്ചല്‍ സ്റ്റാര്‍ക്ക് രണ്ടും ക്യാപ്റ്റന്‍ പാറ്റ് കമ്മിന്‍സ്, ജോഷ് ഹെയ്സല്വുഡ് എന്നിവര്‍ ഓരോ വിക്കറ്റും നേടി. ആദ്യ ദിനത്തില്‍ വീണ 14ല്‍ 12 വിക്കറ്റുകളും പേസ് ബൗളര്‍മാര്‍ സ്വന്തമാക്കി
ഒന്നാം ഇന്നിങ്സില് ഓസീസിനായി ബ്യു വെബ്സ്റ്ററും മുന്‍ ക്യാപ്റ്റന്‍ സ്റ്റീവ് സ്മിത്തും അര്‍ധ സെഞ്ച്വറികള്‍ നേടി. മറ്റാരും കാര്യമായി പൊരുതിയില്ല. വെബ്സ്റ്റര്‍ 72 റണ്‍സും സ്മിത്ത് 66 റണ്‍സും കണ്ടെത്തി.
by Midhun HP News | Jun 14, 2025 | Latest News, ജില്ലാ വാർത്ത, ദേശീയ വാർത്ത
ന്യൂഡല്‍ഹി: ഉപഭോക്താക്കള്‍ക്ക് മികച്ച സേവനം ലഭ്യമാക്കുന്നതിന്റെ ഭാഗമായി കെവൈസി മാനദണ്ഡങ്ങളില്‍ ഭേദഗതി വരുത്തി റിസര്‍വ് ബാങ്ക് ഓഫ് ഇന്ത്യ. ഉപഭോക്താക്കളുടെ കെവൈസി അപ്‌ഡേഷന് ബാങ്കിങ് കറസ്‌പോണ്ടന്റിന് അനുവാദം നല്‍കി കൊണ്ടുള്ളതാണ് പുതിയ ഭേദഗതി. ഉപഭോക്താക്കളുടെ കെവൈസി പീരിയോഡിക് അപ്‌ഡേഷനും അനുമതി നല്‍കിയിട്ടുണ്ട്. എന്നാല്‍ പീരിയോഡിക് അപ്‌ഡേഷന് മുന്‍പ് ഉപഭോക്താവിനെ മൂന്ന് തവണ മുന്‍കൂട്ടി അറിയിക്കണം. ഇതില്‍ ഒരുതവണയെങ്കിലും കത്ത് മുഖേന ബാങ്കുകള്‍ അറിയിക്കണമെന്നും ആര്‍ബിഐയുടെ വിജ്ഞാപനത്തില്‍ പറയുന്നു.
ബാങ്കിങ് കറസ്‌പോണ്ടന്റുമാര്‍ ബാങ്കിന്റെ ഏജന്റുമാരായാണ് പ്രവര്‍ത്തിക്കുന്നത്. എന്‍ജിഒകള്‍, സ്വയംസഹായ ഗ്രൂപ്പുകള്‍, മൈക്രോ ഫിനാന്‍സ് സ്ഥാപനങ്ങള്‍ തുടങ്ങിയവയാണ് ബിസിനസ് കറസ്‌പോണ്ടന്റുമാരായി പ്രവര്‍ത്തിക്കുന്നത്. കരാര്‍ അടിസ്ഥാനത്തിലാണ് ഇവര്‍ പ്രവര്‍ത്തിക്കുന്നത്.
ബാങ്കില്‍ നിന്ന് ആവശ്യമായ അനുമതി ലഭിച്ചിട്ടുണ്ടെങ്കില്‍, പ്രദേശത്തുള്ള കടയുടമയ്ക്കും ബാങ്കിങ് കറസ്‌പോണ്ടന്റുമാരായി പ്രവര്‍ത്തിക്കാവുന്നതാണ്. ബാങ്കിങ് സൗകര്യമില്ലാത്ത പ്രദേശങ്ങളിലെ ഉപഭോക്താക്കള്‍ക്ക് സാമ്പത്തിക, ബാങ്കിങ് സേവനങ്ങള്‍ നല്‍കുന്ന ബാങ്ക് ശാഖയുടെ വിപുലീകൃത വിഭാഗമാണ് ബിസിനസ് കറസ്‌പോണ്ടന്റ്.
by Midhun HP News | Jun 14, 2025 | Latest News, ജില്ലാ വാർത്ത, മരണം
തോന്നയ്ക്കൽ, മാടമൺമൂഴി ശ്രീപത്മത്തിൽ (കട്ടയ്ക്കാലിൽ വീട് ) വിജയൻ നായർ. പി (69)
എക്സ് മിലിട്ടറി & എൻ സി സി (യു ഡി ക്ലാർക്ക്)അന്തരിച്ചു.
ഭാര്യ: പത്മകുമാരി
മക്കൾ: വിപിൻ. വി. പി (കേരള യൂണിവേഴ്സിറ്റി), വിനീത്. വി. പി (യു കെ)
മരുമക്കൾ: അമൃത. എസ് (ബി.ആർ. സി ആറ്റിങ്ങൽ), ചന്ദനാഹരി (യു കെ )
സഞ്ചയനം: ചൊവ്വാഴ്ച രാവിലെ 8.30ന്
by Midhun HP News | Jun 14, 2025 | Latest News, ജില്ലാ വാർത്ത
കാസർകോട്: അഹമ്മദാബാദ് വിമാനാപകടത്തില്‍ മരിച്ച പത്തനംതിട്ട പുല്ലാട് സ്വദേശി രഞ്ജിതയെ സമൂഹമാധ്യമത്തിലൂടെ അധിക്ഷേപിച്ച ഡെപ്യൂട്ടി തഹസില്‍ദാറെ പിരിച്ചുവിടാൻ ശുപാർശ. വെള്ളരിക്കുണ്ട് ഡെപ്യൂട്ടി തഹസില്‍ദാറായ എ പവിത്രനെയാണ് പിരിച്ചുവിടാൻ ജില്ലാ കലക്ടർ കെ ഇമ്പശേഖർ ശുപാർശ നൽകിയത്. ശുപാര്‍ശ കത്ത് റവന്യു വകുപ്പിന് കൈമാറി.
തുടർച്ചയായ അച്ചടക്ക ലംഘനം ഉണ്ടായ സാഹചര്യത്തിലാണ് തീരുമാനം. ഇതിനു മുമ്പ് നിരവധി മുന്നറിയിപ്പുകളും താക്കീതുകളും ഇയാൾക്ക് നല്‍കിയിട്ടുണ്ട്. നിരവധി നടപടികള്‍ക്ക് വിധേയനായിട്ടും നിരന്തരമായി റവന്യു വകുപ്പിനും സര്‍ക്കാരിനും അപകീര്‍ത്തി ഉണ്ടാക്കുന്ന പ്രവൃത്തികള്‍ ആവര്‍ത്തിച്ച് വരുന്നതിനാലാണ് പവിത്രനെ സര്‍വീസില്‍ നിന്ന് പിരിച്ചു വിടണം എന്ന ശുപാർശ ജില്ലാ കലക്ടർ സർക്കാരിന് നൽകിയ കത്തിൽ ഉൾപ്പെടുത്തിയത്.
ഹീനമായ നടപടിയെന്ന് മന്ത്രി കെ രാജനും മനുഷ്യത്വരഹിത നടപടി എന്ന് മന്ത്രി വീണാ ജോര്‍ജും വിഷയത്തിൽ പ്രതികരിച്ചിരുന്നു. രഞ്ജിതയെ സമൂഹമാധ്യമങ്ങളിലൂടെ അപമാനിച്ചതിന് പവിത്രനെ ജോലിയിൽ നിന്നും സസ്പെൻഡ് ചെയ്തിരുന്നു. വിമാനാപകടത്തിലെ അനുശോചന പോസ്റ്റിന് താഴെയായിരുന്നു പവിത്രന്‍ മോശമായ കമന്റിട്ടത്. അധിക്ഷേപ പരാമര്‍ശത്തിനെതിരെ വ്യാപക പ്രതിഷേധം ഉയര്‍ന്നിരുന്നു. പവിത്രൻ മുമ്പും പലരെയും അധിക്ഷേപിച്ചിരുന്നതായി പരാതികള്‍ ഉയര്‍ന്നിരുന്നു. മുന്‍മന്ത്രിയും എംഎല്‍എയുമായ ഇ ചന്ദ്രശേഖരനെ അധിക്ഷേപിച്ചതിന് കഴിഞ്ഞ സെപ്റ്റംബറില്‍ പവിത്രനെ സസ്‌പെന്‍ഡ് ചെയ്തിരുന്നു.
by Midhun HP News | Jun 14, 2025 | Latest News, ജില്ലാ വാർത്ത
കേരളത്തിൽ ബാലവേല കൂടുതലുള്ള 140 സ്ഥലങ്ങളുണ്ടെന്ന് സംസ്ഥാന വനിതാ ശിശു വികസന വകുപ്പ് കണ്ടെത്തി. സംസ്ഥാനത്ത് ബാലവേല കൂടുതലുള്ളത് വ്യവസായ നഗരമായ എറണാകുളം ജില്ലയാണ്.
തൊഴിൽ ചെയ്യുന്നവരും ഭിക്ഷാടനത്തിൽ ഏർപ്പെട്ടിരിക്കുന്ന കുട്ടികളെയും തെരുവുകളിൽ താമസിക്കുന്നവരെയും കണ്ടെത്തുന്നതിനായി സംസ്ഥാനവ്യാപകമായി നടത്തിയ സർവേയിലാണ് ഇങ്ങനെയുള്ള സ്ഥലങ്ങൾ തിരിച്ചറിഞ്ഞത്. കഴിഞ്ഞ സാമ്പത്തിക വർഷം സംസ്ഥാന വനിതാ ശിശു വികസന വകുപ്പ് 704 റെയ്ഡുകൾ നടത്തി. – ഭൂരിഭാഗവും കണ്ണൂരിലാണ് – ഇതിൽ 56 കുട്ടികളെ രക്ഷപ്പെടുത്തി പുനരധിവാസ സഹായം നൽകി.
ബാലവേലയിൽ കുടുങ്ങിക്കിടക്കുന്ന കുട്ടികളെ കണ്ടെത്തുന്നതിനും പുനരധിവസിപ്പിക്കുന്നതിനുമായി 2017-ൽ ആരംഭിച്ച ശരണബാല്യം പദ്ധതിയുടെ ഭാഗമായിരുന്നു ഇത്. സമീപ വർഷങ്ങളിൽ, പൊലീസ്, തൊഴിൽ, വിദ്യാഭ്യാസം, ആരോഗ്യ വകുപ്പുകളുമായി ഏകോപിപ്പിച്ചുകൊണ്ട് കൂടുതൽ സുസ്ഥിരമായ ഇടപെടലുകൾ സാധ്യമാക്കാൻ ‘കാവൽ പ്ലസ്’എന്ന പദ്ധതിയുമായി ബന്ധിപ്പിച്ചുകൊണ്ട് ശക്തിപ്പെടുത്തി.
ഏറ്റവും കൂടുതൽ ബാലവേലയുള്ള സ്ഥലങ്ങൾ കണ്ടെത്തിയത് എറണാകുളം (30), ഇടുക്കി (13) എന്നിവിടങ്ങളിലാണ്, ഏറ്റവും കുറവ് പാലക്കാട്, കോഴിക്കോട് (4 വീതം) എന്നിവിടങ്ങളിലാണ്.
“കഴിഞ്ഞ വർഷം ബാലവേലയുമായി ബന്ധപ്പെട്ട കേസുകളൊന്നും രേഖപ്പെടുത്തിയിട്ടില്ല. മുൻകാല പരിശോധനകളിൽ നിന്ന് ബാലവേല കൂടുതലുള്ള സ്ഥലങ്ങൾ ഞങ്ങൾ തിരിച്ചറിഞ്ഞു, കുടുംബങ്ങളുമായി വരുന്ന കുടിയേറ്റ തൊഴിലാളികളുടെ വാസസ്ഥലങ്ങൾ, അതിർത്തി പ്രദേശങ്ങൾ, തോട്ടങ്ങൾ, തുടങ്ങി ബാലവേല സാധ്യതയുള്ള പ്രദേശങ്ങൾ നിരീക്ഷിച്ചു. ജോലിയിൽ ഏർപ്പെടുന്നതോ സുരക്ഷിതമല്ലാത്ത സാഹചര്യങ്ങളിൽ ജീവിക്കുന്നതോ ആയ കുട്ടികളെ ചൈൽഡ് വെൽഫെയർ കമ്മിറ്റി വഴി അവർക്ക് അഭയം, പരിചരണം, പുനരധിവാസം, സ്വദേശത്തേക്ക് കൊണ്ടുപോകൽ എന്നിങ്ങനെയുള്ള കാര്യങ്ങൾ ചെയ്യുന്നു,” വനിതശിശുവികസന വകുപ്പിലെ ഒരു മുതിർന്ന ഉദ്യോഗസ്ഥൻ പറഞ്ഞു.
കേരളീയർ ഉൾപ്പെടുന്ന ബാലവേല കേസുകൾ വളരെ അപൂർവമാണ്, എന്നാൽ പൂർണ്ണമായും ഇല്ലാതായിട്ടില്ലെന്നും മറ്റൊരു ഉദ്യോഗസ്ഥൻ പറഞ്ഞു. “ബാലവേല കൂടുതലുള്ള കുട്ടികളിൽ ഭൂരിഭാഗവും മറ്റ് സംസ്ഥാനങ്ങളിൽ നിന്നുള്ളവരാണ്, അവർ കുടുംബത്തോടൊപ്പം ഇവിടെ വന്നവരാണ്, ചൂഷണത്തിന് ഇരയാകാനുള്ള സാധ്യത കൂടുതലാണ്. ഇവിടെ, ആളുകൾ കൂടുതൽ സംവേദനക്ഷമതയുള്ളവരാണ്. വിദ്യാഭ്യാസത്തെക്കുറിച്ച് കൂടുതൽ അവബോധം ഉണ്ട്, ”ഉദ്യോഗസ്ഥൻ പറഞ്ഞു.
“ചില ജില്ലകളിൽ, ഡാറ്റ പ്രകാരം തിരിച്ചറിഞ്ഞ ബാലവേല കൂടുതലുള്ള സ്ഥലങ്ങൾ കാണാനാകും, പക്ഷേ രക്ഷാപ്രവർത്തനങ്ങൾ നടന്നിട്ടില്ല. കാരണം, ബാലവേലയുടെ പരിധിയിൽ വരാത്ത, കഠിനാധ്വാനമില്ലാത്ത ജോലികളിൽ കുട്ടികൾ മാതാപിതാക്കളോടൊപ്പം ജോലി ചെയ്യുന്നതാണ് ഇതിന് കാരണം. അത്തരം കുട്ടികളെ അതിൽ നിന്നൊഴിവാക്കുന്നത് ഗുണത്തേക്കാൾ കൂടുതൽ ദോഷം ചെയ്യും. ഈ കുട്ടികളെ അവരുടെ വീടുകളിൽ നന്നായി പരിപാലിക്കുന്നുണ്ടെന്ന് ഉറപ്പാക്കുന്നു. ശിക്ഷാ നടപടികളെ മാത്രം ആശ്രയിക്കുന്നതിനേക്കാൾ നിരീക്ഷണം, അവബോധം, പുനരധിവാസം എന്നിവയാണ് കൂടുതൽ ഫലപ്രദമാണ്,” ഉദ്യോഗസ്ഥൻ പറഞ്ഞു.
രക്ഷപ്പെടുത്തിയ 56 കുട്ടികളിൽ ഭൂരിഭാഗവും പരിചരണവും സംരക്ഷണവും ആവശ്യമുള്ള കുട്ടികൾ (CNCP) എന്ന വിഭാഗത്തിൽ പെടുത്തി ഉചിതമായ പിന്തുണയ്ക്കായി ചൈൽഡ് വെൽഫെയർ കമ്മിറ്റികൾക്ക് റഫർ ചെയ്തു. ആവശ്യമുള്ളിടത്തെല്ലാം പൊലീസുമായി ഏകോപിപ്പിച്ചാണ് കുട്ടികളെ അവരുടെ കുടുംബങ്ങളിലേക്കോ സ്വദേശങ്ങളിലേക്കോ തിരിച്ചയച്ചത്.
ജില്ലാതല സർവേകളിലൂടെ തിരിച്ചറിഞ്ഞ ബാലവേല കൂടുതലുള്ള 140 സ്ഥലങ്ങൾ കണ്ടെത്തിയത് ഭാവിയിലെ ഇടപെടലുകൾക്കുള്ള പ്രധാന കേന്ദ്രങ്ങളാണ്.
തിരക്കേറിയ വാണിജ്യ കേന്ദ്രങ്ങൾ മുതൽ അർദ്ധ നഗര, ഗ്രാമീണ മേഖലകൾ വരെയുള്ള ഈ മേഖലകൾ പതിവ് പരിശോധനകളിലൂടെ സൂക്ഷ്മമായി നിരീക്ഷിക്കുമെന്ന് ഉദ്യോഗസ്ഥർ പറഞ്ഞു. രക്ഷാപ്രവർത്തനങ്ങൾ നടത്തുകയും കുടുംബങ്ങളെ ബാലവേലയുടെ അപകടസാധ്യതകളെ കുറിച്ച് ബോധവൽക്കരിക്കുകയും ചെയ്യും. കുട്ടി നേരിടുന്ന സാഹചര്യത്തിനെ ആശ്രയിച്ച്, രക്ഷാപ്രവർത്തനവും സ്വദേശത്തേക്ക് കൊണ്ടുപോകലും തീരുമാനിക്കുക.
“ഒരു കുടുംബം കുട്ടിയെ പരിപാലിക്കാൻ യോഗ്യരല്ലെന്ന് കണ്ടെത്തിയാൽ, അവരെ നേരിട്ട് ജില്ലാ ചൈൽഡ് പ്രൊട്ടക്ഷൻ ഓഫീസറുടെ മേൽനോട്ടത്തിൽ, എൻ‌ജി‌ഒകൾ നടത്തുന്നതും ജില്ലാ റെസ്‌ക്യൂ ഓഫീസറുടെ നേതൃത്വത്തിലുള്ളതുമായ കാവൽ പ്ലസ് പ്രോഗ്രാമിലേക്ക് മാറ്റും,” ഉദ്യോഗസ്ഥർ പറഞ്ഞു.
2024-25 ൽ സംസ്ഥാനത്ത് നടന്ന 704 രക്ഷാപ്രവർത്തനങ്ങളിൽ ഭൂരിഭാഗവും കണ്ണൂരിലാണ് (141), എറണാകുളം (82), ഇടുക്കി (64) എന്നിവിടങ്ങൾ. എറണാകുളത്തും ഇടുക്കിയിലുമാണ് ഏറ്റവും കൂടുതൽ രക്ഷാപ്രവർത്തനങ്ങൾ നടന്നത് (12 കുട്ടികൾ വീതം).
പതിവ് പരിശോധനകൾക്ക് പുറമേ, കുട്ടികളെ ജോലിക്കെടുക്കുന്നതായി സംശയിക്കുന്ന കടകൾ, കമ്പനികൾ, മറ്റ് ജോലിസ്ഥലങ്ങൾ എന്നിവിടങ്ങളിൽ വനിതാ ശിശുക്ഷേമ വകുപ്പ് 266 പരിശോധനകൾ നടത്തി. ഉത്സവങ്ങളിലും ആറ്റുകാൽ പൊങ്കാല, ശബരിമല തീർത്ഥാടനം, ബീമാപള്ളി ഉറൂസ് തുടങ്ങിയ പൊതുപരിപാടികളിലും പ്രത്യേക പരിശോധനകൾ നടത്തി.
ബാലവേലയുമായി ബന്ധപ്പെട്ട് സംസ്ഥാനത്ത് എഫ്‌ഐആറുകൾ രജിസ്റ്റർ ചെയ്തിട്ടില്ലെങ്കിലും 56 കുട്ടികളെ രക്ഷിക്കേണ്ടിവന്നത് വളരെയധികം അസ്വസ്ഥതയുണ്ടാക്കുന്നുവെന്ന് സാമൂഹിക പ്രവർത്തകയും കേരള സംസ്ഥാന ബാലാവകാശ സംരക്ഷണ കമ്മീഷൻ മുൻ അംഗവുമായ ജെ സന്ധ്യ പറഞ്ഞു. “ഈ യാഥാർത്ഥ്യം നമുക്ക് അവഗണിക്കാൻ കഴിയില്ല.ബാലവേല മുക്തമാക്കാനുള്ള ശ്രമങ്ങളിൽ കേരളം മറ്റ് പല സംസ്ഥാനങ്ങളെക്കാളും വളരെ മുന്നിലാണെങ്കിലും, ഇനിയും ഒരുപാട് ദൂരം സഞ്ചരിക്കാനുണ്ട്. ഈ വിഷയത്തിൽ തുടർച്ചയായ ശ്രദ്ധ ആവശ്യമാണ്.
“ഈ കുട്ടികളിൽ പലരും കുടിയേറ്റ കുടുംബങ്ങളിൽ നിന്നുള്ളവരാണെന്നതാണ് കൂടുതൽ ആശങ്കാജനകമായ കാര്യം. ചെറുപ്പത്തിൽ തന്നെ കഠിനാധ്വാനം ചെയ്യുന്നത് സാധാരണമായി കണക്കാക്കപ്പെടുന്ന ചുറ്റുപാടുകളിൽ നിന്നുള്ളവരായിരിക്കാം അവർ. നേരത്തെ തന്നെ ശ്രദ്ധിച്ചില്ലെങ്കിൽ, ഈ രീതി ഇവിടെയും തുടരാനുള്ള സാധ്യതയുണ്ട്. കുട്ടികളെ രക്ഷിക്കുക മാത്രമല്ല, ഈ രീതി പൂർണ്ണമായും ഇല്ലാതാക്കണം,” സന്ധ്യ പറഞ്ഞു.
Recent Comments