by Midhun HP News | Jun 25, 2026 | Latest News, ജില്ലാ വാർത്ത
തിരുവനന്തപുരം: സത്യപ്രതിജ്ഞാ വിവാദത്തില് കോര്പറേഷന് മേയറും ഡെപ്യൂട്ടി മേയറും രാജിവെക്കണമെന്ന് ആവശ്യപ്പെട്ട് എല്ഡിഎഫ് നടത്തിയ പ്രതിഷേധത്തില് സംഘര്ഷം. മേയര് വിവി രാജേഷ് ഉള്പ്പെടെയുള്ളവര്ക്ക് പരിക്കേറ്റു. ചികിത്സ തേടിയ മേയറുടെ കാലില് പ്ലാസ്റ്ററിട്ടു. ഡെപ്യൂട്ടി മേയര് ആശാനാഥ് ഉള്പ്പെടെ പതിനഞ്ചോളം പേര്ക്ക് പരിക്കുണ്ട്.
ഓഫിസില് പ്രവേശിക്കാന് അനുവദിക്കാതെ സിപിഎം കൗണ്സിലര്മാര് മേയറെ തടഞ്ഞതാണ് സംഘര്ഷത്തിലേക്ക് നയിച്ചത്. പ്രതിഷേധത്തിനിടെ മേയറും ഡെപ്യൂട്ടി മേയറും ഓഫിസിലേക്കെത്തി. എല്ഡിഎഫ് കൗണ്സിലര്മാര് ഇവരെ തടയാന് ശ്രമിച്ചപ്പോള് ബിജെപി കൗണ്സിലര്മാര് പ്രതിരോധവുമായി രംഗത്തെത്തി. മേയറും ഡെപ്യൂട്ടി മേയറും ബലംപ്രയോഗിച്ച് ഓഫിസില് കയറി. ഇതിനിടെ ഉന്തിലും തള്ളിലും സിപിഎം വനിത കൗണ്സിലറുടെ തലയ്ക്ക് പരിക്കേറ്റു. ഇവരെയും ആശുപത്രിയിലേക്ക് മാറ്റി.
മേയറെ ഓഫിസിലേക്ക് കയറ്റില്ലെന്ന് തിട്ടൂരം പുറപ്പെടുവിക്കാന് എല്ഡിഎഫിന് ആരാണ് അധികാരം നല്കിയതെന്ന് വിവി രാജേഷ് ചോദിച്ചു. അക്രമങ്ങള് അംഗീകരിക്കില്ലെന്നും ബിജെപി കൗണ്സിലര്മാര്ക്കും പരിക്കേറ്റിട്ടുണ്ടെന്നും മേയര് പറഞ്ഞു. പൊലീസ് സുരക്ഷയോടെയാണ് മേയര് വിവി രാജേഷ് കോര്പറേഷന് ഓഫിസില്നിന്നു പുറത്തേക്കു പോയത്. ബിജെപി പ്രവര്ത്തകര് മേയറെ അഭിവാദ്യം ചെയ്തപ്പോള് എല്ഡിഎഫ് പ്രവര്ത്തകര് മേയറെ കൂക്കിവിളിച്ചു.
by Midhun HP News | Jun 25, 2026 | Latest News, ജില്ലാ വാർത്ത
ആറ്റിങ്ങൽ ഡി ഇ ഒ ഓഫീസിൽ സിപിഐയുടെ ധർണ്ണ നടന്നു. പി എം ശ്രീ കേരളത്തിൽ നടപ്പാക്കരുത് എന്ന ആവശ്യവുമായാണ് ധർണ്ണ നടന്നത്. മണ്ഡലം സെക്രട്ടറി സഖാവ് ജയചന്ദ്രൻ ഉദ്ഘാടനം ചെയ്തു. അസിസ്റ്റന്റ് സെക്രട്ടറി മോഹൻദാസ്, അഡ്വക്കേറ്റ് മുഹസിൻ, അവനവഞ്ചേരി രാജു, കൗൺസിലർ പ്രിയാ സാബു എന്നിവർ പങ്കെടുത്തു.
by Midhun HP News | Jun 25, 2026 | Latest News, കായികം, ജില്ലാ വാർത്ത
മെക്സിക്കോ സിറ്റി: ദക്ഷിണ കൊറിയയെ എതിരില്ലാത്ത ഒരു ഗോളിന് പരാജയപ്പെടുത്തി ദക്ഷിണാഫ്രിക്ക ലോകകപ്പ് നോക്കൗട്ടില്. ചരിത്രത്തിലാദ്യമായാണ് ദക്ഷിണാഫ്രിക്ക ലോകകപ്പിന്റെ നോക്കൗട്ട് ഘട്ടത്തില് കളിക്കുന്നത്.
തപെലോ മാസെക്കോയാണ് ദക്ഷിണാഫ്രിക്കയ്ക്കായി വിജയഗോള് നേടിയത്. 2010ല് ആതിഥേയത്വം വഹിച്ച ശേഷം വീണ്ടും ഇത്തവണയാണ് ദക്ഷിണാഫ്രിക്ക ലോകകപ്പിന് എത്തുന്നത്. ആദ്യമത്സരത്തില് മെക്സിക്കോയോട് പരാജയപ്പെട്ടതോടെ ടൂര്ണമെന്റില് നിന്ന് പുറത്താകുമെന്നായിരുന്നു കണക്ക്കൂട്ടല്. എന്നാല് രണ്ടാമത്തെ മത്സരത്തില് ചെക്കിനെ സമനിലയില് തളയ്ക്കുകയും കരുത്തരായ ദക്ഷിണ കൊറിയയെ തകര്ത്ത് ഗ്രൂപ്പില് രണ്ടാം സ്ഥാനക്കാരാണ് നോക്കൗട്ട് പ്രവേശം.
ദക്ഷിണ കൊറിയന് കോച്ച് ഹോങ് മ്യുങ് ബോ ക്യാപ്റ്റന് സണ് ഹ്യൂങ്-മിനെ ആദ്യ ഇലവനില് ഉള്പ്പെടുത്താത്ത തീരുമാനം ആരാാധകരെ ഞെട്ടിക്കുന്നതായിരുന്നു. ദക്ഷിണ കൊറിയ തുടക്കം മുതല് ശക്തമായ മുന്നേറ്റങ്ങള് നടത്തിയെങ്കിലും ലക്ഷ്യത്തിലെത്തിക്കാന് സാധിച്ചില്ല. ഒത്തിണക്കത്തോടെയും ആത്മവിശ്വാസത്തോടെയു കളിച്ച ദക്ഷിണാഫ്രിക്കയ്ക്ക് ഫിനിഷിങ്ങിലെ പോരായ്മകള് ഉണ്ടായിരുന്നില്ലെങ്കില് കൊറിയന് വല വീണ്ടും വീണ്ടും കുലുങ്ങുമായിരുന്നു.
ആതിഥേയരായ മെക്സിക്കോയ്ക്ക് ഗ്രൂപ്പ് എ ചാംപ്യന്മാരായി നോക്കൗട്ടില് എത്തി. ചെക്ക് റിപ്പബ്ലിക്കിനെ എതിരില്ലാത്ത മൂന്ന് ഗോളിന് തകര്ത്താണ് മെക്സിക്കോയുടെ നോക്കൗട്ട് പ്രവേശനം. നോക്കൗട്ടില് എത്താന് തെക്കന് കൊറിയ ഇനിയും കാത്തിരിക്കണം. മികച്ച മൂന്നാം സ്ഥാനക്കാരില് ഉള്പ്പെട്ടാല് മാത്രമേ കൊറിയക്ക് നോക്കൗട്ടില് എത്താന് കഴിയുകയുള്ളു.
by Midhun HP News | Jun 24, 2026 | കേരളം, ജില്ലാ വാർത്ത
തിരുവനന്തപുരം: വീര്യം കുറഞ്ഞ മദ്യത്തിന്റെ വിൽപ്പനയിൽ സമ്മർദത്തിന് വഴങ്ങി മുഖ്യമന്ത്രി വി ഡി സതീശന്. കേരളത്തിൽ വീര്യം കുറഞ്ഞ മദ്യം വിൽക്കുന്നതിൽ അന്തിമ തീരുമാനം യുഡിഎഫ് എടുക്കുമെന്ന് മുഖ്യമന്ത്രി നിയമസഭയില് പറഞ്ഞു.
തീരുമാനിച്ചത് നികുതി ഘടനമാത്രമെന്നും വിൽപനയിൽ അന്തിമ തീരുമാനം യുഡിഎഫ് ചര്ച്ച ചെയ്ത് എടുക്കുമെന്നുമാണ് വി ഡി സതീശന്റെ വിശദീകരണം. വീര്യം കുറഞ്ഞ മദ്യത്തിന്റെ വിൽപന നടപ്പാക്കാൻ യുഡിഎഫ് തീരുമാനിച്ചാൽ ഈ നികുതി ഘടന നിലവിൽ വരും. യുഡിഎഫ് വേണ്ട എന്ന് തീരുമാനിച്ചാല് മുന്നോട്ട് പോകില്ലെന്നും മുഖ്യമന്ത്രി വ്യക്തമാക്കി. വീര്യം കുറഞ്ഞ മദ്യം വിൽക്കാനുള്ള നടപടികളെല്ലാം തുടങ്ങിയത് എൽഡിഎഫിന്റെ കാലത്താണെന്നും വി ഡി സതീശൻ സഭയില് പറഞ്ഞു. ബക്കാർഡി കമ്പനിയുമായി ബന്ധപ്പെട്ടുള്ള ആരോപണങ്ങളെ മുഖ്യമന്ത്രി പരിഹസിച്ച് തള്ളി.
വീര്യം കുറഞ്ഞ മദ്യനികുതിയില് പ്രതിഷേധം ഫലം കണ്ടു. വിഷയത്തില് അന്തിമതീരുമാനം യുഡിഎഫ് എടുക്കുമെന്നാണ് മുഖ്യമന്ത്രിയുടെ വിശദീകരണം. നികുതിയിളവ് നിർത്തിയാണ് മുഖ്യമന്ത്രി തീരുമാനം യുഡിഎഫിന് വിട്ടത്. വിമര്ശനങ്ങള്ക്ക് മുഖ്യമന്ത്രി സഭയില് മറുപടി നല്കി. അപേക്ഷകൾ ആദ്യം പരിഗണിച്ചത് പിണറായി സർക്കാരിന്റെ കാലത്താണ്.
ആരാണ് ബക്കാഡി കമ്പനിയുമായി സംസാരിച്ചത്. എം വി ഗോവിന്ദൻ എക്സൈസ് മന്ത്രിയായിരുന്ന കാലത്ത് ബക്കാർഡി കമ്പനിക്കായി വിദേശ മദ്യ നയത്തിൽ ഭേദഗതി വരുത്തിയത് എൽഡിഎഫാണെന്നും സതീശന് വിമര്ശിച്ചു. ടാക്സ് നിശ്ചയിക്കുന്ന നടപടികൾ വേഗത്തിൽ തന്നെയാണ് നടക്കാറുള്ളതെന്നും മുഖ്യമന്ത്രി കൂട്ടിച്ചേര്ത്തു. വീര്യം കുറഞ്ഞ മദ്യം നിശ്ചയിച്ചത് നിങ്ങളാണ്. ഞങ്ങൾ നികുതി നിരക്ക് നിശ്ചയിച്ചു എന്ന് മാത്രമെന്നാണ് മുഖ്യമന്ത്രി വീശദീകരണം.
മദ്യനയം തീരുമാനിക്കേണ്ടത് രാഷ്ട്രീയ തീരുമാനമാണ്. ഇത് യുഡിഎഫിൽ എല്ലാവരുമായും സംസാരിച്ച് തീരുമാനമെടുക്കുമെന്നും അദ്ദേഹം വ്യക്തമാക്കി.
by Midhun HP News | Jun 24, 2026 | Latest News, ജില്ലാ വാർത്ത, മരണം
ആറ്റിങ്ങൽ: മൃഗാശുപത്രിക്ക് സമീപം അനന്യം വീട്ടിൽ (എം.ആർ.എ:50 ജി 3) പരേതനായ എൻ അപ്പുക്കുട്ടൻ നായരുടെ (എക്സസർവീസ്) സഹധർമ്മിണി എസ് ജയലക്ഷ്മി അമ്മ (70) (റിട്ടയേർഡ് അധ്യാപിക, എസ്.സി.വി എൽ.പി.എസ് ചിറയിൻകീഴ്) അന്തരിച്ചു.
മക്കൾ: എ അജു (റിട്ടയേർഡ് ഗൾഫ്), എ.ജെ അഞ്ജു (അധ്യാപിക, കുന്നുവാരം യു.പി.എസ്).
മരുമകൻ എം.ബി ബിജു (കുവൈറ്റ്)
by Midhun HP News | Jun 23, 2026 | Latest News, ജില്ലാ വാർത്ത
പൊതുജനാരോഗ്യ സംരക്ഷണ പ്രവർത്തനങ്ങളുടെ ഭാഗമായി വേങ്ങോട് ടെലിഫോൺ എക്സ്ചേഞ്ചിനു മുന്നിലായി റോഡിനിരുവശത്തും കാടുകയറിക്കിടന്ന പ്രദേശങ്ങളിൽ ശുചീകരണ പ്രവർത്തനങ്ങൾ നടത്തി.
വേങ്ങോട് മണ്ഡലം കോൺഗ്രസ്സ് കമ്മിറ്റി ജനറൽ സെക്രട്ടറി കല്ലുവെട്ടി സജിത്തിൻ്റെ അദ്ധ്യക്ഷതയിൽ കൂടിയ യോഗത്തിൽ മംഗലപുരം പഞ്ചായത്ത് മെമ്പർമാരായ ജി.ആർ. അജിത്ത് കുമാർ, മുൻ മണ്ഡലം പ്രസിഡൻ്റ് ഉദയകുമാരി, ഐ.എൻ.റ്റി.യു.സി. ജില്ലാ സെക്രട്ടറിയും സംസ്ഥാന കൗൺസിൽ അംഗവുമായ ആർ.എസ്. വിനോദ് മണി, നെടുമങ്ങാട് മണ്ഡലം കെ എസ് യു മുൻ ജനറൽ സെക്രട്ടറി ആദിൽ, ബൂത്ത് പ്രസിഡൻ്റ് രവീന്ദ്രൻ നായർ, ഷിനോദ്.പി.എസ്. തുടങ്ങിയവർ സംസാരിച്ചു.
Recent Comments