by Midhun HP News | Jan 24, 2025 | Latest News, ദേശീയ വാർത്ത
അഹമ്മദാബാദ്: ഇന്ത്യയില് ലോകത്തെ ഏറ്റവും വലിയ ഡാറ്റ സെന്റര് നിര്മ്മിക്കാന് മുകേഷ് അംബാനിയുടെ ഉടമസ്ഥതയിലുള്ള റിലയന്സ് ഇന്ഡസ്ട്രീസ് പദ്ധതിയിടുന്നതായി റിപ്പോര്ട്ട്. ആര്ട്ടിഫിഷ്യല് ഇന്റലിജന്സ് മേഖലയില് മത്സരിക്കാന് ലക്ഷ്യമിട്ട് ഗുജറാത്തിലെ ജാംനഗറില് ഡാറ്റ സെന്റര് സ്ഥാപിക്കാനാണ് മുകേഷ് അംബാനിയുടെ പദ്ധതി. ഇതിന്റെ ഭാഗമായി പ്രമുഖ അമേരിക്കന് കമ്പനിയായ എന്വിഡിയയില് നിന്ന് എഐ സെമികണ്ടക്ടറുകള് വാങ്ങാനാണ് റിലയന്സിന്റെ ആലോചനയെന്നും റിപ്പോര്ട്ടുകള് വ്യക്തമാക്കുന്നു.
2024 ഒക്ടോബറില് നടന്ന എഐ ഉച്ചകോടിയില് റിലയന്സും എന്വിഡിയയും ഇന്ത്യയില് എഐ ഇന്ഫ്രാസ്ട്രക്ചര് നിര്മ്മിക്കുന്നതിനുള്ള സംയുക്ത ശ്രമം പ്രഖ്യാപിച്ചിരുന്നു. റിലയന്സ് നിര്മ്മിക്കുന്ന ഒരു ഗിഗാവാട്ട് ഡാറ്റാ സെന്ററിനായി തങ്ങളുടെ ബ്ലാക്ക്വെല് എഐ പ്രോസസ്സറുകള് വിതരണം ചെയ്യുമെന്നാണ് എന്വിഡിയ വാഗ്ദാനം ചെയ്തത്. സഹകരണം സംബന്ധിച്ചുള്ള പുതിയ കാര്യങ്ങള് പുറത്തുവന്നിട്ടില്ല.
‘എല്ലാ ആളുകള്ക്കും അഭിവൃദ്ധി കൊണ്ടുവരാനും ലോകത്തിന് മുന്പാകെ തുല്യത കൊണ്ടുവരാനും നമുക്ക് ആര്ട്ടിഫിഷ്യല് ഇന്റലിജന്സ് ഉപയോഗിക്കാം. യുഎസിനും ചൈനയ്ക്കും പുറമെ, ഇന്ത്യയ്ക്കും ഏറ്റവും മികച്ച ഡിജിറ്റല് കണക്റ്റിവിറ്റി ഇന്ഫ്രാസ്ട്രക്ചര് ഉണ്ട്,’- എഐ ഉച്ചകോടിയില് ഇന്ത്യന് വിപണിയുടെ വലിയ ഇന്റലിജന്സ് ശേഷിയെക്കുറിച്ച് സംസാരിക്കവെ അംബാനി പറഞ്ഞു.
കഴിഞ്ഞ വര്ഷം സെപ്റ്റംബറില്, ഇന്ത്യയില് എഐ സൂപ്പര് കമ്പ്യൂട്ടറുകള് വികസിപ്പിക്കുന്നതിനും രാജ്യത്തിന്റെ വൈവിധ്യമാര്ന്ന ഭാഷകളില് പരിശീലനം ലഭിച്ച വലിയ ഭാഷാ മോഡലുകള് സൃഷ്ടിക്കുന്നതിനുമുള്ള പങ്കാളിത്തവും റിലയന്സ് ഇന്ഡസ്ട്രീസും എന്വിഡിയയും പ്രഖ്യാപിച്ചിരുന്നു.
by Midhun HP News | Jan 24, 2025 | Latest News, ദേശീയ വാർത്ത
ശ്രീനഗര്: ജമ്മു കശ്മീരിലെ രജൗരി ജില്ലയിലെ ബാദല് ഗ്രാമത്തിലെ ദുരൂഹമരണങ്ങളുടെ പശ്ചാത്തലത്തില് പ്രദേശവാസികളെ ക്വാറന്റൈന് കേന്ദ്രങ്ങളിലേക്ക് മാറ്റുന്നു. ഏതാണ്ട് 400-500 ഓളം തദ്ദേശവാസികളെയാണ് സര്ക്കാര് ക്യാമ്പുകളിലേക്ക് മാറ്റി പാര്പ്പിക്കുന്നത്. കഴിഞ്ഞ ഡിസംബര് മുതല് പ്രദേശത്ത് 17 ദുരൂഹമരങ്ങളാണ് റിപ്പോര്ട്ട് ചെയ്തത്. 11 പേര് ചികിത്സയിലുമാണ്.
കഴിഞ്ഞ രണ്ടുദിവസത്തിനിടെ അഞ്ചുപേര്ക്ക് കൂടി അജ്ഞാത രോഗബാധകണ്ടെത്തിയിരുന്നു. ഇതേത്തുടര്ന്നാണ് ഇവിടുത്തെ കുടുംബങ്ങളെയും അവരുടെ ബന്ധുക്കളെയും മാറ്റാന് തീരുമാനിച്ചത്. പുതിയ കേസുകളെ തുടര്ന്ന് രജൗരി ജില്ലാ കലക്ടര് ഗ്രാമത്തെ കണ്ടെയ്ന്മെന്റ് സോണ് ആയി പ്രഖ്യാപിച്ചിരുന്നു.
മുഴുവന് ഗ്രാമവാസികളെയും മാറ്റുന്നില്ലെന്നും, അസുഖ ബാധിത കുടുംബങ്ങളെയും അവരുടെ കുടുംബങ്ങളെയും അടുത്ത ബന്ധുക്കളെയും സുരക്ഷയ്ക്കായി മാറ്റിപ്പാര്പ്പിക്കുകയാണ് ചെയ്യുന്നതെന്ന് എംഎല്എ ജാവേദ് ഇഖ്ബാല് പറഞ്ഞു. ഗ്രാമവാസികളെ ജിഎംസി രജൗരി, പഴയ ആശുപത്രി രജൗരി, നഴ്സിംഗ് കോളജ് രജൗരി, ബോയ്സ് ഹയര് സെക്കന്ഡറി സ്കൂള് എന്നിവിടങ്ങളിലെ ക്വാറന്റൈന് കേന്ദ്രങ്ങളിലേക്കാണ് മാറ്റുന്നത്. പരിശോധനകള്, ഭക്ഷണം, ഉള്പ്പെടെ താമസത്തിനുള്ള ക്രമീകരണങ്ങള് അടക്കം സര്ക്കാര് ഉറപ്പാക്കിയിട്ടുണ്ട്.
ഡിസംബര് 2 ന് ഫസല് ഹുസൈന്റെ വീട്ടില് വിവാഹ വിരുന്ന് നടത്തിയിരുന്നു. ഇതിനുശേഷം ഡിസംബര് ഏഴിനാണ് അജ്ഞാത രോഗബാധ റിപ്പോര്ട്ട് ചെയ്യപ്പെടുന്നത്. ഫസലും നാല് പെണ്മക്കളും അഞ്ച് ദിവസത്തിനുള്ളില് രോഗബാധിതരായി മരിച്ചു. പിന്നാലെ മറ്റ് രണ്ട് കുടുംബങ്ങളില് കൂടി രോഗബാധയുണ്ടായി. മുഹമ്മദ് റഫീഖിന് ഭാര്യയെയും മൂന്ന് കുട്ടികളെയും നഷ്ടപ്പെട്ടു. മുഹമ്മദ് അസ്ലമിന്റെ കുടുംബത്തിലെ ആറ് കുട്ടികളും അമ്മാവനും അമ്മായിയും മരിച്ചു.
സംഭവത്തെക്കുറിച്ച് അന്വേഷിക്കാന് സംസ്ഥാന സര്ക്കാര് പ്രത്യേക സംഘത്തെ നിയോഗിച്ചിട്ടുണ്ട്. കേന്ദ്രത്തില്നിന്നുള്ള ഉന്നത തല സംഘവും ഗ്രാമത്തിലെത്തി പരിശോധന നടത്തി.
by Midhun HP News | Jan 24, 2025 | Latest News, ദേശീയ വാർത്ത
ചെന്നൈ: സ്ത്രീകള്ക്കെതിരെ അനുചിതമായ ഏതൊരു പെരുമാറ്റവും ലൈംഗികാതിക്രമമെന്ന് മദ്രാസ് ഹൈക്കോടതി. ഇത്തരം പ്രവൃത്തികള്ക്ക് പിന്നിലെ ഉദ്ദേശ്യം പരിഗണിക്കാതെ തന്നെ ലൈംഗിക പീഡനമായി കണക്കാക്കണമെന്ന് കോടതി നിര്ദേശിച്ചു. ജോലിസ്ഥലത്ത് സ്ത്രീകള്ക്കെതിരായ ലൈംഗികാതിക്രമം തടയല് നിയമത്തില് (PoSH) ഇതു സംബന്ധിച്ച് വ്യക്തമായ നിര്വചനം നല്കിയിട്ടുണ്ട്.
അത്തരം പ്രവൃത്തികള് ക്രിമിനല് കുറ്റകൃത്യമായി റിപ്പോര്ട്ട് ചെയ്യപ്പെട്ടാല്, വിചാരണയില് ഉദ്ദേശ്യവും തെളിയിക്കപ്പെടുമെന്ന് പ്രതീക്ഷിക്കാമെന്ന് ജസ്റ്റിസ് ആര് എന് മഞ്ജുള ഉത്തരവില് പറഞ്ഞു. ജോലി സ്ഥലത്തെ ലൈംഗിക പീഡന പരാതിയുമായി ബന്ധപ്പെട്ട പ്രിന്സിപ്പല് ലേബര് കോടതിയുടെ ഉത്തരവ് റദ്ദാക്കിക്കൊണ്ടാണ് ഹൈക്കോടതി നിരീക്ഷണം.
എച്ച്സിഎല് ടെക്നോളജീസിന്റെ സര്വീസ് ഡെലിവറി മാനേജരായിരുന്ന പാര്ത്ഥസാരഥിക്കെതിരെ മൂന്ന് വനിതാ ജീവനക്കാര് നല്കിയ പരാതികളില് കമ്പനിയുടെ ഇന്റേണല് കംപ്ലയിന്റ്സ് കമ്മിറ്റി (ഐസിസി) ശുപാര്ശകള് നല്കിയിരുന്നു. ഈ ശുപാര്ശകള് അസാധുവാക്കിയ പ്രിന്സിപ്പല് ലേബര് കോടതിയുടെ ഉത്തരവ് ഹൈക്കോടതി റദ്ദാക്കി.
അനിഷ്ടകരമായ തരത്തില് ശാരീരിക സ്പര്ശനത്തിന് ശ്രമിച്ചെന്നായിരുന്നു ഡെലിവറി മാനേജര്ക്കെതിരെ ഒരു ജീവനക്കാരി പരാതി നല്കിയത്. ശാരീരിക അളവുകളെക്കുറിച്ച് ചോദിച്ചെന്ന് മറ്റൊരു ജീവനക്കാരിയും, തന്റെ ആര്ത്തവചക്രത്തെക്കുറിച്ച് ആരാഞ്ഞെന്ന് മറ്റൊരു ജീവനക്കാരിയും പരാതിപ്പെട്ടു. എന്നാല് ജോലിയുടെ ഭാഗമായാണ് തന്റെ പ്രവൃത്തികളെന്നായിരുന്നു പാര്ത്ഥസാരഥി വാദിച്ചത്. പരാതി അന്വേഷിച്ച ആഭ്യന്തര പരാതി പരിഹാര സമിതി (ഐസിസി), പാര്ത്ഥസാരഥിയുടെ ശമ്പള വര്ദ്ധനവും അനുബന്ധ ആനുകൂല്യങ്ങളും രണ്ട് വര്ഷത്തേക്ക് വെട്ടിക്കുറയ്ക്കാനും അദ്ദേഹത്തെ നോണ്-സൂപ്പര്വൈസറി റോളില് നിയമിക്കാനും ശുപാര്ശ ചെയ്തു. ചെന്നൈയിലെ പ്രിന്സിപ്പല് ലേബര് കോടതി ഈ ശുപാര്ശകള് അസാധുവാക്കി. എന്നാല് ഈ തീരുമാനം റദ്ദാക്കിയ ഹൈക്കോടതി, ഐസിസി തീരുമാനം നീതിയുക്തമാണെന്ന് അഭിപ്രായപ്പെട്ടു.
by Midhun HP News | Jan 24, 2025 | Latest News, ദേശീയ വാർത്ത
ന്യൂയോർക്ക്: അമേരിക്കയിൽ ജന്മാവകാശ പൗരത്വം നിർത്തലാക്കാനുള്ള പ്രസിഡന്റ് ഡോണൾഡ് ട്രംപിന്റെ ഉത്തരവിനു സ്റ്റേ. സിയാറ്റിലിലെ ഫെഡറൽ ജഡ്ജാണ് ഉത്തരവ് 14 ദിവസത്തേക്ക് സ്റ്റേ ചെയ്തത്. ഉത്തരവിന്റെ തുടർ നടപടികളാണ് മരവിപ്പിച്ചത്. ജന്മാവകാശ പൗരത്വം നിർത്തലാക്കുന്നത് നഗ്നമായ ഭരണഘടനാ ലംഘനമാണെന്നു ജഡ്ജ് ജോൺ കോഗ്നർ അഭിപ്രായപ്പെട്ടു. വ്യാഴാഴ്ച ഇതു സംബന്ധിച്ച കേസ് പരിഗണിക്കവേയാണ് കോടതിയുടെ താത്കാലിക സ്റ്റേ. ഇതിനെതിരെ അപ്പീൽ പോകുമെന്നാണ് ട്രംപിന്റെ നിലപാട്.
നിലവിൽ അമേരിക്കയിൽ ജനിക്കുന്ന കുട്ടികൾക്ക് ജന്മാവകാശമായി പൗരത്വം ലഭിക്കും. ട്രംപിന്റെ കുടിയേറ്റ വിരുദ്ധ നടപടികളുടെ ഭാഗമായാണ് ജന്മാവകാശ പൗരത്വത്തിനു നിരോധനം ഏർപ്പെടുത്തിയത്. പ്രസിഡന്റായി സത്യപ്രതിജ്ഞ ചെയ്തു അധികാരമേറ്റതിനു പിന്നാലെ പൗരത്വം നിർത്തലാക്കാനുള്ള എക്സിക്യൂട്ടീവ് ഉത്തരവ് ട്രംപ് പുറപ്പെടുവിച്ചിരുന്നു. ഇന്ത്യക്കാർ ഉൾപ്പെടെ യുഎസിലുള്ള വലിയ വിഭാഗ വിദേശികളെ ആശങ്കയിലാക്കുന്ന ഉത്തരവ് ഫെബ്രുവരി 20നു പ്രാബല്യത്തിൽ വരുമെന്നു ഉത്തരവിൽ പറഞ്ഞിരുന്നു.
ട്രംപിന്റെ ഉത്തരവനുസരിച്ച് അമേരിക്കൻ പൗരൻമാരുടേയും നിയമാനുസൃതം സ്ഥിര താമസ അനുമതി ലഭിച്ചവരുടേയും മക്കൾക്കു മാത്രമേ പൗരത്വം ലഭിക്കുകയുള്ളു. വർഷത്തിൽഏതാണ്ട് രണ്ടര ലക്ഷത്തോളം കുട്ടികളെ നിയമം ബാധിക്കുമെന്നാണ് കണക്ക്.
ട്രംപിന്റെ ഉത്തരവിനെതിരെ വിവിധ സംസ്ഥാനങ്ങൾ ഇതിനകം നിയമ നടപടികൾക്കു തുടക്കമിട്ടിരുന്നു. ഉത്തരവ് നിയമവിരുദ്ധമാണെന്നു കാണിച്ചു വിവിധ വ്യക്തികളും സംഘടനകളും കോടതികളെ സമീപിക്കുകയും ചെയ്തിട്ടുണ്ട്.
by Midhun HP News | Jan 24, 2025 | Latest News, ദേശീയ വാർത്ത
മുംബൈ: ഡോളറിനെതിരെ രൂപയുടെ മൂല്യം ഉയര്ന്നു. വ്യാപാരത്തിന്റെ തുടക്കത്തില് 18 പൈസയുടെ നേട്ടമാണ് രൂപ സ്വന്തമാക്കിയത്. 86.26 എന്ന നിലയിലേക്കാണ് രൂപയുടെ മൂല്യം ഉയര്ന്നത്. ഓഹരി വിപണിയിലെ മുന്നേറ്റവും അമേരിക്കന് ഡോളര് അല്പ്പം താഴേക്കു പോയതുമാണ് രൂപയ്ക്ക് ഗുണമായത്.
വ്യാഴാഴ്ച 9 പൈസയുടെ നഷ്ടത്തോടെ 86.44 എന്ന നിലയിലാണ് രൂപയുടെ വിനിമയം അവസാനിച്ചത്. ഇന്ന് 86.31 എന്ന നിലയിലാണ് രൂപയുടെ വിനിമയം ആരംഭിച്ചത്. ഒരു ഘട്ടത്തില് 86.26ലേക്ക് രൂപ തിരിച്ചുകയറുകയായിരുന്നു. അസംസ്കൃത എണ്ണവില കുറഞ്ഞതും രൂപയുടെ മൂല്യം ഉയരാന് സഹായകമായി. നിലവില് ഇന്ത്യ മുഖ്യമായി ആശ്രയിക്കുന്ന ബ്രെന്ഡ് ക്രൂഡിന്റെ വില ബാരലിന് 78.12 ഡോളറാണ്.
അതിനിടെ നേട്ടത്തോടെ വ്യാപാരം ആരംഭിച്ച ഓഹരി വിപണി പിന്നീട് നഷ്ടത്തിലായി. ബിഎസ്ഇ സെന്സെക്സ് 250 പോയിന്റ് ആണ് താഴ്ന്നത്. ചെറുകിട, ഇടത്തരം കമ്പനികളാണ് ഏറ്റവുമധികം നഷ്ടം നേരിട്ടത്. ഫാര്മ, ക്യാപിറ്റല് ഗുഡ്സ് മേഖലകളും നഷ്ടത്തിലാണ്. ഒരു ശതമാനത്തിന് മുകളിലാണ് ഈ സെക്ടറുകളുടെ നഷ്ടം.
by Midhun HP News | Jan 23, 2025 | Latest News, ദേശീയ വാർത്ത
ഡല്ഹി: ഏറ്റവും പുതിയ ഫിഡെ റാങ്കിങില് നാലാം സ്ഥാനത്തേക്ക് ഉയര്ന്നു ഇന്ത്യന് യുവ താരവും ലോക ചാംപ്യനുമായ ഡി ഗുകേഷ്. ഏറ്റവും മികച്ച റാങ്കുള്ള ഇന്ത്യന് താരങ്ങളില് ഗുകേഷ് മുന്നിലെത്തി. മുന് ലോക ചാംപ്യന് നോര്വെയുടെ മാഗ്നസ് കാള്സന് റാങ്കിങില് ഒന്നാം സ്ഥാനം നിലനിര്ത്തി.
ദീര്ഘ നാളായി മുന്നിലുണ്ടായിരുന്ന ഇന്ത്യന് താരം അര്ജുന് എരിഗസിയായിരുന്നു. താരത്തെ അഞ്ചാം സ്ഥാനത്തേക്ക് പിന്തള്ളിയാണ് ഗുകേഷ് നാലാം റാങ്കിലേക്ക് കയറിയത്. ഗുകേഷിനു 2784 റേറ്റിങ് പോയിന്റുകള്. എരിഗസിക്ക് 2779.5 പോയിന്റുകള്.
2832.5 റേറ്റിങ് പോയിന്റുകളുമായാണ് കാള്സന് ഒന്നാം റാങ്കില് തുടരുന്നത്. അമേരിക്കന് ഗ്രാന്ഡ് മാസ്റ്റര് ഹികരു നകാമുറ (2802) രണ്ടാം സ്ഥാനത്തും അമേരിക്കയുടെ തന്നെ ഫാബിയോ കരുവാന (2798) മൂന്നാം റാങ്കിലും നില്ക്കുന്നു.
ചൈനയുടെ ഡിങ് ലിറനെ പരാജയപ്പെടുത്തിയാണ് ഗുകേഷ് പുതിയ ലോക ചാംപ്യനായത്. ലോക ചാംപ്യനാകുന്ന ഏറ്റവും പ്രായം കുറഞ്ഞ താരമെന്ന റെക്കോര്ഡും സ്വന്തമാക്കിയാണ് 18കാരന് ചരിത്രമെഴുതിയത്. റഷ്യന് ഇതിഹാസം ഗാരി കാസ്പറോവിന്റെ റെക്കോര്ഡാണ് ഗുകേഷ് പഴങ്കഥയാക്കിയത്. ഇതിഹാസ താരം ആനന്ദിനു ശേഷം ലോക ചെസിന്റെ നെറുകയില് എത്തുന്ന രണ്ടാമത്തെ ഇന്ത്യന് താരമെന്ന നേട്ടവും ഗുകേഷ് സ്വന്തമാക്കിയിരുന്നു.
Recent Comments