by Midhun HP News | Oct 17, 2026 | Latest News, ദേശീയ വാർത്ത
ഉത്തര്‍പ്രദേശ്: ഗ്രേറ്റര്‍ നോയിഡയിലെ റാബുപുരയില്‍ ഒരു കുടുംബത്തിലെ അഞ്ചു പേരെ മരിച്ച നിലയില്‍ കണ്ടെത്തി. നഗ്ലാ ശ്രീ പദം ഗ്രാമത്തിലെ മഹേഷ് (37), മഹേഷിന്റെ ഭാര്യ (35), മക്കളായ മിഷ്ടി (7), ലഡ്ഡു (11), സാക്ഷത് (3) എന്നിവരാണ് മരിച്ചത്. സംഭവത്തിന് പിന്നില്‍ ഭക്ഷ്യവിഷബാധയാണെന്നാണ് പൊലീസ് സംശയിക്കുന്നത്. പോസ്റ്റുമോര്‍ട്ടം റിപ്പോര്‍ട്ടുകളും ഫൊറന്‍സിക് പരിശോധന ഫലങ്ങളും ലഭിച്ചതിന് ശേഷം മാത്രമേ മരണത്തിന്റെ യഥാര്‍ത്ഥ കാരണം സ്ഥിരീകരിക്കാന്‍ കഴിയൂ എന്ന് അന്വേഷണോദ്യോഗസ്ഥന്‍ അറിയിച്ചു.
കഴിഞ്ഞ ദിവസം രാത്രി ഇവര്‍ ന്യൂഡില്‍സ് കഴിച്ചതായി മഹേഷിന്റെ അമ്മ പൊലീസിന് മൊഴി നല്‍കിയിട്ടുണ്ട്. ന്യൂഡില്‍സില്‍ നിന്ന് വിഷബാധയേറ്റാണോ മരണം എന്ന് പരിശോധിച്ച് വരികയാണ്. ഫോറന്‍സിക് ഉദ്യോഗസ്ഥരും ഭക്ഷ്യസുരക്ഷാ സംഘവും സ്ഥലത്തെത്തി സാമ്പിളുകള്‍ ശേഖരിക്കുകയും പരിശോധന നടത്തുകയും ചെയ്തു. പ്രാഥമികമായി ഭക്ഷണത്തില്‍ നിന്നുള്ള വിഷബാധയാണെന്നാണ് കരുതുന്നതെങ്കിലും മരണത്തിന്റെ കൃത്യമായ കാരണം ഇതുവരെ വ്യക്തമായിട്ടില്ലെന്നും പൊലീസ് വ്യക്തമാക്കി.
മൂന്ന് കുട്ടികള്‍ ഉള്‍പ്പടെ ഒരു കുടുംബത്തിലെ 5 അംഗങ്ങള്‍ ഇത്തരം സാഹചര്യങ്ങളില്‍ അകാലത്തില്‍ മരണമടഞ്ഞത് അത്യന്തം വേദനാജനകവും ഹൃദയഭേദകവുമാണെന്ന് സംഭവ സ്ഥലം സന്ദര്‍ശിച്ച ജേവര്‍ എംഎല്‍എ ധീരേന്ദ്ര സിങ് പറഞ്ഞു. സംഭവത്തിന്റെ എല്ലാ വശങ്ങളും നിഷ്പക്ഷമായി അന്വേഷിക്കുമെന്നും ദാരുണമായ സംഭവത്തിന്റെ യഥാര്‍ത്ഥ കാരണം എന്താണെന്ന് എത്രയും പെട്ടെന്ന് വ്യക്തമാക്കേണ്ടതുണ്ടെന്നും അദ്ദേഹം കൂട്ടിച്ചേര്‍ത്തു.
by Midhun HP News | Oct 17, 2026 | Latest News, ദേശീയ വാർത്ത
ചെന്നൈ: പ്രശസ്ത ദക്ഷിണേന്ത്യൻ സംഗീത സംവിധായകൻ ദേവ ( ദേവൻ ചൊക്കലിംഗം – 75) അന്തരിച്ചു. വാർധക്യസഹജമായ അസുഖങ്ങളെ തുടർന്നായിരുന്നു അന്ത്യം. നാല് പതിറ്റാണ്ടിലേറെ നീണ്ട സംഗീത ജീവിതത്തിലൂടെ തമിഴ്, തെലുങ്ക്, കന്നഡ, മലയാളം തുടങ്ങിയ വിവിധ ഭാഷകളിലായി നാനൂറിലധികം ചിത്രങ്ങൾക്ക് അദ്ദേഹം സംഗീതം നൽകിയിട്ടുണ്ട്.
രജനീകാന്ത് നായകനായെത്തിയ എക്കാലത്തെയും മികച്ച ഹിറ്റ് ചിത്രങ്ങളായ ‘ബാഷ’, ‘അണ്ണാമലൈ’ തുടങ്ങിയ സിനിമകൾക്ക് സംഗീതം നൽകിയത് ദേവയാണ്. തമിഴ് സിനിമയിൽ ‘തേനിസൈ തെന്ദ്രൽ’ എന്ന വിശേഷണത്തിൽ അറിയപ്പെട്ടിരുന്ന അദ്ദേഹത്തിന്റെ വേർപാടിൽ സിനിമാ ലോകം അനുശോചനം രേഖപ്പെടുത്തി. 1950 നവംബർ 20-ന് ദേവനേശൻ ചൊക്കലിംഗം എന്ന പേരിൽ ജനിച്ച അദ്ദേഹം, തമിഴ് സിനിമയിലെ എക്കാലത്തെയും പ്രമുഖ സംഗീത സംവിധാരിൽ ഒരാളാണ്. 1980-കളുടെ അവസാനത്തിലും 1990-കളുടെ തുടക്കത്തിലുമാണ് ദേവ തമിഴ് സിനിമയിൽ തന്റേതായ ഇടം നേടിയെടുക്കുന്നത്. അണ്ണാമലൈ, ബാഷ, ആശൈ, കാതൽ കോട്ടൈ, നേരുക്കു നേർ, നിനൈത്തേൻ വന്ദേയ്, പ്രിയമുടൻ, വാലി, ഖുഷി, അരുണാചലം തുടങ്ങിയവ അദ്ദേഹത്തിന്റെ അവിസ്മരണീയമായ ചിത്രങ്ങളിൽ ചിലതാണ്.
തമിഴ്നാട് സംസ്ഥാന സർക്കാരിന്റെ കലൈമാമണി പുരസ്കാരം ഉൾപ്പെടെ നിരവധി അംഗീകാരങ്ങൾ അദ്ദേഹത്തിന് ലഭിച്ചിട്ടുണ്ട്. ‘ആശൈ’ എന്ന ചിത്രത്തിലെ സംഗീതസംവിധാനത്തിന് മികച്ച സംഗീത സംവിധായകനുള്ള തമിഴ്നാട് സംസ്ഥാന ചലച്ചിത്ര അവാർഡും അദ്ദേഹത്തിന് ലഭിച്ചു.
by Midhun HP News | Oct 17, 2026 | Latest News, ദേശീയ വാർത്ത
ഡല്‍ഹി: നവംബറില്‍ കേന്ദ്രസര്‍ക്കാര്‍ ഇന്ധനവില വര്‍ധിപ്പിച്ചേക്കുമെന്ന് ബ്ലൂംബെര്‍ഗ് റിപ്പോര്‍ട്ട്. അടുത്ത വര്‍ഷത്തിന്റെ തുടക്കത്തിലാണ് നിരവധി സംസ്ഥാനങ്ങളില്‍ തെരഞ്ഞെടുപ്പ് വരുന്നത്. അങ്ങനെ വരുമ്പോള്‍ ഇന്ധനവില വര്‍ധിപ്പിക്കാന്‍ അനുകൂല സാഹചര്യമായാണ് നവംബര്‍ മാസത്തെ കേന്ദ്രസര്‍ക്കാര്‍ കാണുന്നതെന്ന് ഒക്‌സ്ഫണ്ട് ഇക്കണോമിക്‌സിനെ ഉദ്ധരിച്ചുള്ള റിപ്പോര്‍ട്ട് നിരീക്ഷിക്കുന്നു. നിലവില്‍ ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 109 ഡോളറിന് മുകളിലാണ്.
‘2027ന്റെ തുടക്കത്തിലുള്ള നിയമസഭാ തെരഞ്ഞെടുപ്പുകള്‍ക്കായുള്ള പ്രചാരണം ശക്തമാകുന്നതിന് മുന്‍പ് ഇന്ധനവില വര്‍ധിപ്പിക്കാനുള്ള കേന്ദ്രസര്‍ക്കാരിന്റെ ഏറ്റവും അവസാനത്തെ യാഥാര്‍ഥ്യബോധമുള്ള അവസരമായി നവംബര്‍ മാസത്തെ കാണുന്നു’- ഒക്‌സ്ഫണ്ട് ഇക്കണോമിക്‌സിലെ ലീഡ് സാമ്പത്തിക ശാസ്ത്രജ്ഞനായ അലക്‌സാണ്ട്ര ഹെര്‍മാന്‍ പ്രസാദ് പറുന്നു. ഗോവ, ഉത്തരാഖണ്ഡ്, പഞ്ചാബ്, മണിപ്പൂര്‍, ഉത്തര്‍പ്രദേശ്, ഹിമാചല്‍ പ്രദേശ്, ഗുജറാത്ത് എന്നിവിടങ്ങളിലാണ് അടുത്തവര്‍ഷം തെരഞ്ഞെടുപ്പ് നടക്കാന്‍ പോകുന്നത്.
മെയ് മാസത്തിലെ ഇന്ധന വില വര്‍ധനയുടെ പകുതിയോളം നവംബറില്‍ ഉണ്ടായേക്കും. ഇത് രാജ്യത്ത് പണപ്പെരുപ്പ് നിരക്ക് ഉയര്‍ത്താന്‍ ഇടയാക്കിയേക്കുമെന്നും ഹെര്‍മാന്‍ പ്രസാദ് പറഞ്ഞു. അടുത്ത വര്‍ഷത്തിന്റെ തുടക്കത്തില്‍ പണപ്പെരുപ്പനിരക്ക് 6.5 ശതമാനമായി ഉയരാനുള്ള സാധ്യതയാണ് നിലനില്‍ക്കുന്നത്. അങ്ങനെ വന്നാല്‍ പണപ്പെരുപ്പം പിടിച്ചുനിര്‍ത്താന്‍ റിസര്‍വ് ബാങ്ക് പലിശ നിരക്ക് വര്‍ധിപ്പിക്കാന്‍ വീണ്ടും മുതിര്‍ന്നേക്കുമെന്നും റിപ്പോര്‍ട്ട് വ്യക്തമാക്കുന്നു.
by Midhun HP News | Oct 16, 2026 | Latest News, ദേശീയ വാർത്ത
ഡൽഹി: സിഎംആർഎൽ–എക്സാലോജിക് മാസപ്പടി ഇടപാടിൽ വിജിലൻസ് എഫ്ഐആർ രജിസ്റ്റർ ചെയ്യണമെന്ന കേരള ഹൈക്കോടതി സിംഗിൾ ബെഞ്ച് ഉത്തരവിനെതിരെ മുൻ മുഖ്യമന്ത്രി പിണറായി വിജയനും മകൾ ടി. വീണയും മരുമകനും മുൻ മന്ത്രിയുമായ പി.എ. മുഹമ്മദ് റിയാസും സുപ്രീം കോടതിയെ സമീപിച്ചു. എൻഫോഴ്‌സ്‌മെന്റ് ഡയറക്ടറേറ്റ് കൈമാറിയ വിവരങ്ങളുടെ അടിസ്ഥാനത്തിൽ അഴിമതി നിരോധന നിയമപ്രകാരം കേസെടുക്കാനുള്ള ഹൈക്കോടതി ഉത്തരവ് സ്റ്റേ ചെയ്യണമെന്നാണ് ഹർജിയിലെ പ്രധാന ആവശ്യം.
പിണറായി വിജയനായി ഹാജരായ മുതിർന്ന അഭിഭാഷകൻ സിദ്ധാർത്ഥ് ലൂത്ര ചീഫ് ജസ്റ്റിസ് സൂര്യ കാന്ത് അധ്യക്ഷനായ ബെഞ്ചിന് മുന്നിൽ വിഷയം പരാമർശിച്ച് ഹർജി അടിയന്തരമായി ലിസ്റ്റ് ചെയ്യണമെന്ന് ആവശ്യപ്പെട്ടു. ഇതിനോടകം വിജിലൻസ് എഫ്ഐആർ രജിസ്റ്റർ ചെയ്തിട്ടുണ്ടെന്നും പ്രതികൾക്ക് നേരെ നടപടികൾക്ക് സാധ്യതയുണ്ടെന്നും അദ്ദേഹം ബോധിപ്പിച്ചു. 82 വയസ്സുള്ള മുതിർന്ന വ്യക്തിയാണെന്നും അദ്ദേഹത്തിന് അറസ്റ്റിൽ നിന്നടക്കം നിയമസംരക്ഷണം ആവശ്യമാണെന്നും ലൂത്ര കോടതിയിൽ വാദിച്ചു.
ദസറ അവധിക്ക് ശേഷം ഒക്ടോബർ 26-നോ 27-നോ കോടതി തുറക്കുമ്പോൾ ഹർജി ലിസ്റ്റ് ചെയ്യാമെന്ന് ചീഫ് ജസ്റ്റിസ് വ്യക്തമാക്കി. എന്നാൽ കേസ് അടിയന്തരമായി കേൾക്കണമെന്ന് അഭിഭാഷകൻ ആവർത്തിച്ചതോടെ, ജഡ്ജിമാരുടെ ലഭ്യതയ്ക്കനുസരിച്ച് അവധിക്കാല പ്രത്യേക ബെഞ്ചിന്റെ പരിഗണനയ്ക്ക് വിടുന്നത് ആലോചിക്കാമെന്ന് ചീഫ് ജസ്റ്റിസ് അറിയിച്ചു.
ഹൈക്കോടതി ഉത്തരവിലെ പിഴവുകൾ ചൂണ്ടിക്കാട്ടി പ്രതിഭാഗം
കെ.എം. ഷാജഹാൻ നൽകിയ പൊതുതാൽപ്പര്യ സ്വഭാവമുള്ള റിട്ട് ഹർജിയിലാണ് സിംഗിൾ ബെഞ്ച് ഈ ഉത്തരവ് പുറപ്പെടുവിച്ചതെന്നും, പൊതുതാൽപ്പര്യ ഹർജികൾ പരിഗണിക്കാൻ ചുമതലയില്ലാത്ത (റോസ്റ്റർ ഇല്ലാത്ത) ബെഞ്ചാണ് ഇതെന്നും ലൂത്ര കോടതിയിൽ വാദിച്ചു. ആരോപണവിധേയരായ ആളുകളുടെ ഭാഗം കേൾക്കാതെയാണ് സിംഗിൾ ബെഞ്ച് കേസ് രജിസ്റ്റർ ചെയ്യാൻ ഉത്തരവിട്ടത്. ഇതിനെതിരെ നൽകിയ അപ്പീൽ ഹൈക്കോടതി ഡിവിഷൻ ബെഞ്ച് കഴിഞ്ഞ ദിവസം തള്ളിയ സാഹചര്യത്തിലാണ് നേതാക്കൾ സുപ്രീം കോടതിയെ സമീപിച്ചതെന്നും അദ്ദേഹം ചൂണ്ടിക്കാട്ടി.
by Midhun HP News | Oct 16, 2026 | Latest News, ദേശീയ വാർത്ത
അബുദാബി: യുഎഇയില്‍ പല ഇടങ്ങളിലായി ശക്തമായ മൂടല്‍മഞ്ഞ്. ഇന്ന് രാവില്‍െ മുതല്‍ പലയിടത്തും കാഴ്ചാപരിധി വളരെ കുറഞ്ഞതിനാല്‍, വാഹനമോടിക്കുന്നവര്‍ക്ക് റോഡരികിലെ സൂചനാ ബോര്‍ഡുകള്‍ അടുത്തെത്തിയാല്‍ മാത്രമേ കണാന്‍ കഴിയുന്നുള്ളു. കാഴ്ചാപരിധി കുറവായതിനാല്‍ വാഹനങ്ങളുടെ വേഗത കുറയ്ക്കാനും അതീവ ജാഗ്രത പാലിക്കാനും പൊലീസ് നിര്‍ദ്ദേശം നല്‍കി.
ദുബൈ മുതല്‍ റാസല്‍ഖൈമ വരെ പലയിടങ്ങളിലും മൂടല്‍മഞ്ഞ് അനുഭവപ്പെട്ടു. എമിറേറ്റില്‍ പല ഇടങ്ങളിലും മൂടല്‍മഞ്ഞ് അനുഭവപ്പെടുന്നുണ്ട്. നാഷണല്‍ സെന്റര്‍ ഓഫ് മെറ്റീരിയോളജി രാജ്യത്തുടനീളം മൂടല്‍മഞ്ഞിനെത്തുടര്‍ന്ന് റെഡ്, യെല്ലോ അലേര്‍ട്ടുകള്‍ പ്രഖ്യാപിച്ചിരുന്നു. ഇന്ന് രാവിലെ 9 മണി വരെ ഇവ പ്രാബല്യത്തിലുണ്ടായിരുന്നു.
ഇന്ന് യുഎഇയില്‍ കാലാവസ്ഥ തെളിഞ്ഞതോ ഭാഗികമായി മേഘാവൃതമോ ആയിരിക്കും.ഉച്ചകഴിഞ്ഞ് കിഴക്കന്‍, തെക്കന്‍ മേഖലകളില്‍ സംവഹന മേഘങ്ങള്‍ രൂപപ്പെടാനും മഴ പെയ്യാനും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. വെള്ളിയാഴ്ച രാത്രിയും ശനിയാഴ്ച രാവിലെയും തീരപ്രദേശങ്ങളിലും ഉള്‍പ്രദേശങ്ങളിലും അന്തരീക്ഷത്തില്‍ ഈര്‍പ്പം വര്‍ദ്ധിക്കാനും, മൂടല്‍മഞ്ഞുണ്ടാകാനും സാധ്യതയുണ്ട്.
മിതമായ രീതിയില്‍ കാറ്റിന് സാധ്യയുണ്ട്. എന്നാല്‍ ചില സമയങ്ങളില്‍ മണിക്കൂറില്‍ 45 കിലോമീറ്റര്‍ വരെ വേഗതയില്‍ ശക്തമായ കാറ്റ് വീശിയേക്കാം. കാറ്റ് കാരണം പൊടിപടലങ്ങള്‍ ഉയരാനും, ഇത് കാഴ്ചാപരിധി കുറയ്ക്കാനും ഇടയാക്കിയേക്കാം. അറേബ്യന്‍ ഗള്‍ഫില്‍ കടല്‍ ശാന്തമോ മിതമായതോ ആയിരിക്കും, ഒമാന്‍ കടലില്‍ കടല്‍ താരതമ്യേന ശാന്തമായിരിക്കും. വെള്ളിയാഴ്ച അബുദാബി, ഷാര്‍ജ, ദുബൈ എന്നിവിടങ്ങളില്‍ താപനില 37°C വരെ ഉയരും. ഈ എമിറേറ്റുകളില്‍ രേഖപ്പെടുത്തുന്ന ഏറ്റവും കുറഞ്ഞ താപനില 29°C ആയിരിക്കും.
by Midhun HP News | Oct 16, 2026 | Latest News, ദേശീയ വാർത്ത
ഡൽഹി: കേരളം ഉൾപ്പെടെയുള്ള സംസ്ഥാനങ്ങളിലും കേന്ദ്രഭരണ പ്രദേശങ്ങളിലും വാര്‍ഷിക വോട്ടര്‍ പട്ടിക പരിഷ്ക്കരണത്തിന് ഉത്തരവിട്ട് തെരഞ്ഞെടുപ്പ് കമ്മീഷന്‍. 17 ഇടങ്ങളിലെ വോട്ടർ പട്ടികകളിൽ എസ്എസ്ആർ (സ്‌പെഷൽ സമ്മറി റിവിഷൻ) നടത്താനാണ് കേന്ദ്ര തെരഞ്ഞെടുപ്പ് കമ്മീഷൻ ഒരുങ്ങുന്നത്. 13 സംസ്ഥാനങ്ങളിലും 3 കേന്ദ്ര ഭരണ പ്രദേശങ്ങളിലും അസമിലുമാണ് എസ്എസ്ആർ ആരംഭിക്കുന്നത്.
എസ്‌ഐആറിൽ ഒഴിവാക്കപ്പെട്ടവരെയും പുതിയ വോട്ടർമാരെയും വോട്ടർ പട്ടികയിൽ ഉൾപ്പെടുത്തുന്നതിന്റെ ഭാഗമായാണ് നടപടി. കേരളമടക്കം എസ്ഐആര്‍ പൂര്‍ത്തിയായ സംസ്ഥാനങ്ങളിലാണ് നടപടി.
എസ്എസ്ആറിന് ശേഷമുള്ള കരട് പട്ടിക നവംബർ 12-ന് പ്രസിദ്ധീകരിക്കും. ഡിസംബർ 11-ാം തീയതിവരെ അവകാശവാദങ്ങളും എതിർപ്പുകളും ബോധിപ്പിക്കാം. അന്തിമപട്ടിക 2027 ജനുവരി നാലാം തീയതി നിലവിൽ വരും. നിലവിൽ എസ്‌ഐആർ നടപടികൾ പുരോഗമിച്ചുകൊണ്ടിരിക്കുന്നിടങ്ങളിൽ തീയതികളിൽ വ്യത്യാസമുണ്ടാകും.
എസ്എസ്ആറിന് ശേഷമുള്ള കരട് പട്ടിക നവംബർ 12 ന് പ്രസിദ്ധീകരിക്കും. ഡിസംബർ 11 തീയതിവരെ അവകാശവാദങ്ങളും എതിർപ്പുകളും ബോധിപ്പിക്കാം. അന്തിമപട്ടിക 2027 ജനുവരി നാലാം തീയതി നിലവിൽ വരും. നിലവിൽ എസ്‌ഐആർ നടപടികൾ പുരോഗമിച്ചുകൊണ്ടിരിക്കുന്നിടങ്ങളിൽ തീയതികളിൽ വ്യത്യാസമുണ്ടാകും. അടുത്ത വര്‍ഷം നിയമസഭാ തെരഞ്ഞെടുപ്പ് നടക്കുന്ന സംസ്ഥാനങ്ങളും ഇതില്‍പെടും.
Recent Comments