by Midhun HP News | Oct 15, 2026 | Latest News, ദേശീയ വാർത്ത
ഡല്‍ഹി: ഫോണില്‍ അജ്ഞാത നമ്പറില്‍ നിന്നുള്ള കോള്‍ കണ്ട് ഇത് ആരുടേതാണ് എന്ന കണ്‍ഫ്യൂഷന്‍ ഇനി വേണ്ട. സുരക്ഷ കണക്കിലെടുത്ത് ഉപയോക്താക്കള്‍ക്ക് കോളര്‍ ഐഡി കേന്ദ്രസര്‍ക്കാര്‍ നിര്‍ബന്ധമാക്കി. നവംബര്‍ ഒന്നുമുതല്‍ കോള്‍ വിളിക്കുന്ന ആളിന്റെ പേര് പ്രദര്‍ശിപ്പിക്കുന്ന കോളിങ് നെയിം പ്രസന്റേഷന്‍ നടപ്പിലാക്കാന്‍ ടെലികോം സേവന ദാതാക്കളോട് ടെലികോം വകുപ്പ് നിര്‍ദേശം നല്‍കി.
ഫോര്‍ജിയും അതിന് മുകളിലുള്ള മൊബൈല്‍ നെറ്റ് വര്‍ക്കുകളിലും ( ഉദാഹരണത്തിന് ഫൈവ്ജി) എല്ലാ ഉപയോക്താക്കളുടെയും ഫോണില്‍ കോളിങ് നെയിം പ്രസന്റേഷന്‍ സ്ഥിരമായി പ്രവര്‍ത്തനക്ഷമമായിരിക്കണമെന്ന് ഡിപ്പാര്‍ട്ട്‌മെന്റ് ഓഫ് ടെലികോമ്മിന്റെ ഉത്തരവില്‍ പറയുന്നു. ഒരു കോള്‍ വരുമ്പോള്‍ ഫോണില്‍ വിളിക്കുന്നയാളുടെ പേരും നമ്പറും തെളിയുന്ന തരത്തിലാണ് പുതിയ സംവിധാനം. 2ജി, 3ജി നെറ്റ് വര്‍ക്കുകളിലും പബ്ലിക് സ്വിച്ച്ഡ് ടെലിഫോണ്‍ നെറ്റ് വര്‍ക്കുകളിലും ഇത് നടപ്പിലാക്കുന്നത് പിന്നീട് പരിഗണിക്കുമെന്നും ഉത്തരവില്‍ ചൂണ്ടിക്കാണിക്കുന്നു.
കോളര്‍ ഐഡി എങ്ങനെയാണ് പ്രവര്‍ത്തിക്കുക?
കോള്‍ വരുമ്പോള്‍ സ്‌ക്രീനിലെ ആദ്യ ഭാഗത്ത് വിളിക്കുന്നയാളുടെ നമ്പര്‍ കാണിക്കും. രണ്ടാമത്തെ ഭാഗത്ത് ഉപയോക്താവിന്റെ കോണ്‍ടാക്ടുകളില്‍ സേവ് ചെയ്തിട്ടുള്ള പേര് കാണിക്കും. നമ്പര്‍ സേവ് ചെയ്തിട്ടില്ലെങ്കില്‍ ആഭ്യന്തര കോളുകള്‍ക്കായി ഒറിജിനേറ്റിങ് ടെലികോം ഓപ്പറേറ്ററുടെ സബ്‌സ്‌ക്രൈബര്‍ ഡാറ്റാബേസില്‍ രേഖപ്പെടുത്തിയിരിക്കുന്ന വിളിക്കുന്നയാളുടെ പേര് പ്രദര്‍ശിപ്പിക്കും. അന്തരാഷ്ട്ര കോളുകള്‍ക്ക്, സ്‌ക്രീനില്‍ ഇന്റര്‍നാഷണല്‍ കോള്‍ എന്ന് പ്രദര്‍ശിപ്പിക്കും.
ഓരോ ടെലികോം സേവന ദാതാവും വരിക്കാരുടെ പേരുകള്‍ അവരുടെ നമ്പറുകളുമായി മാപ്പ് ചെയ്യുന്ന ഡാറ്റാ ബേസ് സ്ഥാപിക്കുകയും പരിപാലിക്കുകയും വേണമെന്നാണ് വ്യവസ്ഥ. കോള്‍ സ്വീകരിക്കുന്ന ഓപ്പറേറ്റര്‍ ഈ ഡാറ്റാ ബേസില്‍ നിന്ന് പേര് വീണ്ടെടുത്ത് വിളിക്കപ്പെട്ട ഉപയോക്താവിന് മുന്നില്‍ പ്രദര്‍ശിപ്പിക്കുന്ന തരത്തിലാണ് ക്രമീകരണം.
by Midhun HP News | Oct 15, 2026 | Latest News, ദേശീയ വാർത്ത
ഡൽഹി: സുപ്രീം കോടതി വളപ്പിലേക്ക് മാർച്ചും പ്രതിഷേധവും നടത്തുകയും ഹർജി നൽകാനായി കൂട്ടത്തോടെ രജിസ്ട്രിയിൽ പ്രവേശിക്കുകയും ചെയ്ത സംഭവത്തിൽ കോൺഗ്രസ് പാർട്ടിക്കും ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കും ഇന്ത്യ മുന്നണിയിലെ പ്രമുഖ നേതാക്കൾക്കും സുപ്രീം കോടതിയുടെ നോട്ടീസ്. ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മാല്യ ബാഗ്ചി എന്നിവരടങ്ങിയ ബെഞ്ചാണ് ഹർജിയിൽ മറുപടി തേടിയത്. സുപ്രീം കോടതിയിലും ഹൈക്കോടതികളിലും ഇത്തരം രാഷ്ട്രീയ പ്രകടനങ്ങളും മാർച്ചുകളും കർശനമായി നിയന്ത്രിക്കണമെന്ന് ആവശ്യപ്പെട്ട് അഭിഭാഷകരായ ദിഗന്ത് മിശ്ര, ദിവ്യാൻഷ് ബിഷ്ത്, ആശിഷ് ഗോപാൽ ഗാർഗ്, ശ്വേത ഗാർഗ് എന്നിവർ സമർപ്പിച്ച പൊതുതാൽപര്യ ഹർജിയിലാണ് കോടതിയുടെ ഇടപെടൽ.
സുപ്രീം കോടതി പരിസരത്ത് അരങ്ങേറിയ സംഭവങ്ങൾ അംഗീകരിക്കാനാവില്ലെന്നും ഇത്തരത്തിൽ ജുഡീഷ്യറിയെ വിരട്ടാൻ ശ്രമിക്കുന്നത് അനുവദിക്കരുതെന്നും ഹർജിക്കാർക്ക് വേണ്ടി ഹാജരായ മുതിർന്ന അഭിഭാഷകൻ ഗൗരവ് ഭാട്ടിയ വാദിച്ചു. എന്നാൽ, “ആർക്കും ജുഡീഷ്യറിയെ ഭയപ്പെടുത്താൻ കഴിയില്ല” എന്ന് ചീഫ് ജസ്റ്റിസ് സൂര്യ കാന്ത് വ്യക്തമാക്കി. “ഞങ്ങൾ ദന്തഗോപുരങ്ങളിൽ വസിക്കുന്നവരല്ല; അവർ പുറത്ത് എന്താണ് പറയുന്നതെന്നും കോടതിയിൽ എന്താണ് പറയുന്നതെന്നും ഞങ്ങൾക്ക് വ്യക്തമായി അറിയാം” എന്നും ചീഫ് ജസ്റ്റിസ് സൂര്യകാന്ത് കൂട്ടിച്ചേർത്തു.
ഒക്ടോബർ 12-ന് പ്രതിപക്ഷ നേതാക്കൾ സുപ്രീം കോടതിയിലേക്ക് നടത്തിയ മാർച്ചിന് പിന്നാലെ, ചീഫ് ജസ്റ്റിസിനെ വ്യക്തിപരമായി അധിക്ഷേപിച്ച് കേരള പ്രദേശ് കോൺഗ്രസ് കമ്മിറ്റിയുടെ ഔദ്യോഗിക എക്സ് ഹാൻഡിലിൽ വന്ന പോസ്റ്റിനെതിരെ ക്രിമിനൽ കോടതിയലക്ഷ്യ നടപടി വേണമെന്നും ഹർജിക്കാർ ആവശ്യപ്പെട്ടു. എന്നാൽ ഈ ഘട്ടത്തിൽ കോടതിയലക്ഷ്യത്തിന് നോട്ടീസ് അയക്കുന്നില്ലെന്ന് കോടതി വ്യക്തമാക്കി. മറ്റ് ആവശ്യങ്ങളിൽ എതിർകക്ഷികൾ നിലപാട് വ്യക്തമാക്കട്ടെയെന്നും അവരുടെ മറുപടി പരിശോധിച്ച ശേഷം തുടർനടപടികൾ ആലോചിക്കാമെന്നും ബെഞ്ച് അറിയിച്ചു.
by Midhun HP News | Oct 15, 2026 | Latest News, ദേശീയ വാർത്ത
നെടുങ്കണ്ടം: വിനോദസഞ്ചാരികളുടെ ജീവന് വൻ ഭീഷണിയുയർത്തുന്ന ഇടുക്കി നെടുങ്കണ്ടം തൂവൽ വെള്ളച്ചാട്ടത്തിൽ പൊതുജനങ്ങൾക്കും സഞ്ചാരികൾക്കും പ്രവേശന വിലക്കേർപ്പെടുത്തി. കഴിഞ്ഞ ദിവസം അരുവിയിൽ യുവാവ് മുങ്ങിമരിച്ച സാഹചര്യത്തിൽ ജില്ലാ ദുരന്തനിവാരണ അതോറിറ്റി ചെയർമാൻ കൂടിയായ ജില്ലാ കളക്ടർ ഡോ. ദിനേശ് ചെറുവാട്ടാണ് ഇതുസംബന്ധിച്ച ഉത്തരവ് പുറത്തിറക്കിയത്.
വെള്ളച്ചാട്ടത്തിന് സമീപം ആവശ്യമായ സുരക്ഷാ സംവിധാനങ്ങൾ ഇല്ലാത്തതിനാൽ പൊതുജനങ്ങളുടെ പ്രവേശനം പൂർണ്ണമായും നിരോധിക്കണമെന്ന് കാണിച്ച് ഉടുമ്പൻചോല തഹസിൽദാർ നൽകിയ റിപ്പോർട്ടിന്റെ അടിസ്ഥാനത്തിലാണ് കളക്ടറുടെ അടിയന്തര നടപടി. വെള്ളച്ചാട്ടത്തിലെ അടിയൊഴുക്കിന്റെ ശക്തി, അപ്രതീക്ഷിതമായ ആഴം, പാറക്കെട്ടുകളുടെ സ്വഭാവം, വെള്ളത്തിനടിയിലെ അപകടക്കെണികൾ എന്നിവ സന്ദർശകർക്ക് തിരിച്ചറിയാൻ സാധിക്കുന്നില്ല. മുന്നറിയിപ്പ് ബോർഡുകളോ, പ്രവേശന നിയന്ത്രണ സംവിധാനങ്ങളോ, അപകടസാധ്യതയുള്ള ഭാഗങ്ങളിലേക്ക് ആളുകൾ പോകുന്നത് തടയാനുള്ള വേലികളോ നിലവിൽ പ്രദേശത്തില്ല. ഇത്തരമൊരു സാഹചര്യത്തിൽ ആളുകൾ പ്രവേശിക്കുന്നത് കൂടുതൽ ജീവഹാനിക്ക് ഇടയാക്കുമെന്നായിരുന്നു തഹസിൽദാറുടെ റിപ്പോർട്ട്.
ഇതിന്റെ വെളിച്ചത്തിൽ തൂവൽ വെള്ളച്ചാട്ടത്തിലേക്കും അപകടസാധ്യതയുള്ള പരിസരപ്രദേശങ്ങളിലേക്കും പ്രവേശിക്കുന്നതും, അരുവിയിൽ ഇറങ്ങുന്നതും കുളിക്കുന്നതും പൂർണ്ണമായി നിരോധിച്ചു. കഴിഞ്ഞയാഴ്ച അപകടത്തിൽപ്പെട്ട അശ്വിൻ ഉൾപ്പെടെ ഇതുവരെ 13-ലധികം ആളുകളാണ് തൂവൽ അരുവിയിലെ അപകടച്ചുഴികളിൽപ്പെട്ട് ജീവൻ നഷ്ടപ്പെട്ടത്. നിരോധനം ലംഘിച്ച് പ്രദേശത്തേക്ക് കടക്കുന്നവർക്കെതിരെ ദുരന്തനിവാരണ നിയമപ്രകാരം കർശന നടപടി സ്വീകരിക്കുമെന്നും അധികൃതർ വ്യക്തമാക്കി.
by Midhun HP News | Oct 14, 2026 | Latest News, ദേശീയ വാർത്ത
മീററ്റ്: മര്‍ച്ചന്റ് നേവി ഉദ്യോഗസ്ഥനായ ഭര്‍ത്താവിനെ കാമുകന്റെ സഹായത്തോടെ കൊലപ്പെടുത്തിയ കേസില്‍ മുസ്‌കാന്‍ റസ്തഗിക്കും സാഹില്‍ ശുക്ലയ്ക്കും വധശിക്ഷ. മീററ്റ് കോടതിയാണ് ഇരുവര്‍ക്കും വധശിക്ഷ വിധിച്ചത്. ഇരുവരും കുറ്റക്കാരാണെന്ന് കോടതി നേരത്തെ കണ്ടെത്തിയിയിരുന്നു. കേസില്‍ മൃതദേഹം ഒളിപ്പിച്ച നീല ഡ്രമ്മാണ് നിര്‍ണായക തെളിവായത്.
2025 മാര്‍ച്ച് നാലിനായിരുന്നു രാജ്യത്തെ നടുക്കിയ കൊലപാതകം നടന്നത്. മുസ്‌കാനും സാഹിലും ചേര്‍ന്ന് സൗരഭിനെ കുത്തിക്കൊലപ്പെടുത്തിയ ശേഷം മൃതദേഹം കഷണങ്ങളാക്കി മുറിച്ചു. തെളിവ് നശിപ്പിക്കുന്നതിനായി ശരീരാവശിഷ്ടങ്ങള്‍ സിമന്റ് നിറച്ച നീല ഡ്രമ്മിലാക്കി ഒളിപ്പിക്കുകയായിരുന്നു.
126 വിചാരണകളുടെയും 22 സാക്ഷി മൊഴികളുടെയും അടിസ്ഥാനത്തിലാണ് ജില്ലാ ജഡ്ജി അരവിന്ദ് കുമാര്‍ മിശ്ര വിധി പ്രസ്താവിച്ചത്. ഇത്തരത്തിലുള്ള കുറ്റകൃത്യങ്ങള്‍ സമൂഹത്തില്‍ ഭയം വളര്‍ത്തുമെന്നും ജഡ്ജി അഭിപ്രായപ്പെട്ടു. രാവിലെ, മുസ്‌കാന്‍ റസ്തഗിയുടെ മാതാപിതാക്കള്‍ കോടതിയില്‍ എത്തിയിരുന്നു. സൗരഭ് രാജ്പുത് വളരെ നല്ല മനുഷ്യനായിരുന്നെന്നും കുറ്റവാളികളെ വധശിക്ഷയ്ക്ക് വിധിച്ചാല്‍ സ്വാഗതം ചെയ്യുമെന്നും പറഞ്ഞിരുന്നു.
കഴിഞ്ഞ വര്‍ഷം ഫെബ്രുവരി 28നാണ് ആറു വയസ്സുള്ള മകളുടെ ജന്മദിനാഘോഷത്തിനു സൗരഭ് രജ്പുത്ത് നാട്ടിലെത്തിയത്. ഇയാളെ കൃത്യമായ ആസൂത്രണത്തിലൂടെ ഭാര്യയും കാമുകനും ചേര്‍ന്നു കൊലപ്പെടുത്തുകയായിരുന്നു. ആദ്യം ഭക്ഷണത്തില്‍ ഉറക്കഗുളിക ചേര്‍ത്ത് നല്‍കി ഇയാളെ അബോധാവസ്ഥയിലാക്കി. പിന്നീട് കത്തികൊണ്ട് കുത്തി കൊലപ്പെടുത്തി 15 കഷ്ണങ്ങളാക്കിയ ശേഷം വീപ്പയിലിട്ട് കോണ്‍ക്രീറ്റ് നിറച്ചു.
സൗരഭിനെ കാണാതായതോടെ ആളുകള്‍ അന്വേഷിച്ചു തുടങ്ങിയപ്പോള്‍ സൗരഭ് മണാലിയില്‍ പോയിരിക്കുകയാണെന്നാണ് ഇവരോട് മുസ്‌കാന്‍ പറഞ്ഞത്. ആര്‍ക്കും സംശയം തോന്നാതിരിക്കാന്‍ സാഹിലിനൊപ്പം മണാലിയില്‍ പോയി ചിത്രങ്ങളെടുത്ത് സൗരഭിന്റെ സമൂഹമാധ്യമ പേജുകളില്‍ പോസ്റ്റ് ചെയ്തു. എന്നാല്‍ സൗരഭിനെ ഫോണിലൂടെ ബന്ധപ്പെടാന്‍ കഴിയാതെ വന്നതോടെ കുടുംബം പൊലീസില്‍ പരാതി നല്‍കുകയായിരുന്നു. പരാതിയുടെ അടിസ്ഥാനത്തില്‍ പൊലീസ് മുസ്‌കാനെയും സാഹിലിനെയും കസ്റ്റഡിയിലെടുത്തു നടത്തിയ ചോദ്യം ചെയ്യലിലാണ് കൊലപാതക വിവരം പുറത്തുവരുന്നത്. മൃതദേഹത്തെ കുറിച്ചു പ്രതികള്‍ നല്‍കിയ വിവരത്തിന്റെ അടിസ്ഥാനത്തില്‍ പൊലീസ് നടത്തിയ തിരച്ചിലില്‍ വീപ്പ കണ്ടെത്തുകയും ശരീരഭാഗങ്ങള്‍ കണ്ടെടുക്കുകയും ചെയ്തു.
2016ല്‍ ആണ് സൗരഭും മുസ്‌കാനും വിവാഹിതരാകുന്നത്. പ്രണയ വിവാഹമായിരുന്നു. മുസ്‌കാനോടൊപ്പം സമയം ചെലവിടുന്നതിനു വേണ്ടി സൗരഭ് മര്‍ച്ചന്റ് നേവിയിലെ ജോലി ഉപേക്ഷിച്ചു. ഇത് സൗരഭിന്റെ വീട്ടില്‍ പ്രശ്‌നമാകുകയും ഇരുവരും വാടകവീട്ടിലേക്ക് മാറുകയുമായിരുന്നു.
by Midhun HP News | Oct 14, 2026 | Latest News, ദേശീയ വാർത്ത
ജിദ്ദ: ഫെയ്‌സ്ബുക്കില്‍ പ്രവാചകനെതിരെ കമന്റിട്ടതിന് വധശിക്ഷയ്ക്ക് വിധിക്കപ്പെട്ട ശ്രീലങ്കന്‍ പ്രവാസി അനോജന്‍ ശിവരാസയുടെ ശിക്ഷാവിധി സൗദി അറേബ്യയിലെ സുപ്രീം കോടതി റദ്ദാക്കി. ശ്രീലങ്കയുടെ നയതന്ത്ര ഇടപെടലുകള്‍ക്ക് പിന്നാലെയാണ് കോടതി നടപടി. സൗദി സുപ്രീം കോടതി ഒക്ടോബര്‍ 13-ന് വധശിക്ഷ റദ്ദാക്കിയതായി ശ്രീലങ്കന്‍ വിദേശകാര്യ മന്ത്രാലയം പുറത്തിറക്കിയ പ്രസ്താവനയില്‍ പറയുന്നു.
ശ്രീലങ്കയിലുണ്ടായ ഒരു സംഭവത്തെ തുടര്‍ന്ന് രൂപപ്പെട്ട ഓണ്‍ലൈന്‍ വാക്കുതര്‍ക്കമാണ് സംഭവങ്ങളുടെ തുടക്കം. ഹിന്ദു തീര്‍ഥാടനത്തിനിടയില്‍ മുസ്‌ലിം യുവാവ് നായയെ ചവിട്ടുന്ന ദൃശ്യങ്ങള്‍ ഉള്‍പ്പെട്ട വിഡിയോ വ്യാപകമായി പ്രചരിച്ചിരുന്നു. ഇതിനെച്ചൊല്ലിയുള്ള തര്‍ക്കിത്തിനിടയില്‍ ഒരാള്‍ അധിക്ഷേപ കമന്റിട്ടു. ഇതില്‍ പ്രകോപിതനായാണ് അനോജന്‍ പ്രവാചകനെതിരെ തമിഴില്‍ അധിക്ഷേപകരമായ കമന്റ് രേഖപ്പെടുത്തിയത്.
കമന്റ് പിന്നീട് അനോജന്‍ ഡിലീറ്റ് ചെയ്തിരുന്നു. എന്നാല്‍, അതിനുമുമ്പേ ഇതിന്റെ സ്‌ക്രീന്‍ഷോട്ട് സൗദിയിലെ തൊഴിലുടമക്ക് അയച്ചുകൊടുത്തിരുന്നു. തൊഴിലുടമ വിവരം സൗദി അധികൃതരെ അറിയിച്ചതിനെ തുടര്‍ന്ന് കഴിഞ്ഞ ജൂലൈയിലാണ് അനോജനെ അറസ്റ്റ് ചെയ്തത്. തുടര്‍ന്ന് അദ്ദേഹത്തിന്റെ മൊബൈല്‍ അടക്കമുള്ള വസ്തുക്കള്‍ പിടിച്ചെടുത്തു.
ആദ്യം അല്‍ അഹ്‌സ ക്രിമിനല്‍ കോടതി അഞ്ച് വര്‍ഷത്തെ തടവും 30 ലക്ഷം സൗദി റിയാല്‍ (ഏകദേശം എട്ട് ലക്ഷം അമേരിക്കന്‍ ഡോളര്‍) പിഴയുമാണ് ശിക്ഷ വിധിച്ചത്. എന്നാല്‍ സെപ്റ്റംബര്‍ 17ന് സൗദി പ്രോസിക്യൂഷന്‍ ഇതിനെതിരെ അപ്പീല്‍ നല്‍കുകയും സൈബര്‍ കുറ്റകൃത്യ നിയമങ്ങള്‍ക്ക് പകരം മതനിന്ദാ നിയമപ്രകാരം കേസ് പരിഗണിക്കണമെന്ന് ആവശ്യപ്പെടുകയും ചെയ്തു. ഇതോടെ കോടതി അനോജന്റെ ശിക്ഷ വധശിക്ഷയായി ഉയര്‍ത്തുകയായിരുന്നു.
by Midhun HP News | Oct 14, 2026 | Latest News, ദേശീയ വാർത്ത
ബെയ്ജിംഗ്: ചൈനയും ഉത്തരകൊറിയയും തമ്മിലുള്ള ബന്ധം കൂടുതല്‍ ദൃഢമാകുന്നതിന്റെ സൂചനയായി പുതിയ പാലം ഉദ്ഘാടനത്തിന് ഒരുങ്ങുന്നു. ന്യൂ യാലു റിവര്‍ ബ്രിഡ്ജ് എന്ന് പേരിട്ടിരിക്കുന്ന പാലത്തിന്റെ ഉദ്ഘാടനം വ്യാഴാഴ്ച ഇരു രാജ്യങ്ങളും ചേര്‍ന്ന് നടത്തും. ചൈനീസ് ഔദ്യോഗിക വാര്‍ത്താ ഏജന്‍സിയായ സിന്‍ഹുവയാണ് ഈ വാര്‍ത്ത പുറത്തു വിട്ടത്. പത്ത് വര്‍ഷത്തിലധികം നിര്‍മ്മാണപ്രവര്‍ത്തനങ്ങള്‍ ഇഴഞ്ഞു നീങ്ങുകയും അനിശ്ചിതത്വങ്ങള്‍ക്കും ശേഷമാണ് പാലം യാഥാര്‍ത്ഥ്യമായത്.
വടക്കു കിഴക്കന്‍ ചൈനീസ് നഗരമായ ദാന്‍ഡോങ്ങിനെയും ഉത്തരകൊറിയന്‍ നഗരമായ സിനുയിജുവിനെയും തമ്മില്‍ ബന്ധിപ്പിക്കുന്ന 3 കിലോമീറ്റര്‍ നീളമുള്ള പാലം നാലു വരി പാതയിലാണ് ക്രമീകരിച്ചിരിക്കുന്നത്. ഉത്തരകൊറിയ നിര്‍മ്മാണ പ്രവര്‍ത്തനങ്ങളില്‍ കാണിച്ച അലംഭാവമാണ് പാലത്തിന്റെ നിര്‍മാണം അനിശ്ചിതമായി നീളാന്‍ കാരണം. ചൈനീസ് ഭാഗത്തെ നിര്‍മാണം 2014ല്‍ തന്നെ പൂര്‍ത്തിയായിരുന്നു.
ഉത്തരകൊറിയയുടെ ആണവപരീക്ഷണങ്ങളെ തുടര്‍ന്ന് ഐക്യരാഷ്ടസഭ ഏര്‍പ്പെടുത്തിയ ഉപരോധങ്ങള്‍ ശക്തിപ്പെടുത്തുന്നതിനെ ചൈന പിന്തുണച്ചതോടെ ഇരുരാജ്യങ്ങളും തമ്മിലുള്ള ബന്ധം വഷളായി. ഇതാണ് കൊറിയയുടെ ഭാഗത്തെ നിര്‍മ്മാണം നീണ്ടു പോകാന്‍ കാരണം. അടുത്തകാലത്തായി ഇരുരാജ്യങ്ങളും തമ്മിലുള്ള ബന്ധം മെച്ചപ്പെടുത്താനുള്ള നീക്കങ്ങള്‍ സജീവമായി നടന്നിരുന്നു. കഴിഞ്ഞ വര്‍ഷം ഉത്തരകൊറിയയിലേക്കുള്ള ചൈനയുടെ കയറ്റുമതി 2.3 ബില്യണ്‍ ഡോളറിലെത്തി. ആറു വര്‍ഷത്തിനിടയിലെ ഏറ്റവും ഉയര്‍ന്ന കണക്കാണിത്.
നിലവില്‍ ഇരുരാജ്യങ്ങളും തമ്മിലുള്ള ഔദ്യോഗിക വ്യാപാരത്തിന്റെ 70 ശതമാനത്തിലധികം കൈകാര്യം ചെയ്യുന്നത് 1937ല്‍ നിര്‍മിച്ച പഴക്കമേറിയ ഒരു പാലത്തിലൂടെയാണ്. ഇതിലൂടെ തീവണ്ടിപ്പാതയും റോഡും ഉണ്ടെങ്കിലും വാഹനങ്ങള്‍ക്ക് ഒരു സമയം ഒരു വശത്തേക്ക് മാത്രമേ പ്രവേശിക്കാന്‍ സാധിക്കൂ. പുതിയ പാലം വരുന്നതോടെ ഈ യാത്രാക്ലേശത്തിന് പരിഹാരമാകും.
1961ല്‍ ഒപ്പുവെച്ച സൗഹൃദ,സഹകരണ,പരസ്പര സഹായ ഉടമ്പടിയാണ് ചൈന-ഉത്തരകൊറിയ ബന്ധത്തിന്റെ പ്രധാന അടിത്തറ. സായുധ ആക്രമണം നേരിടുന്ന ഏതെങ്കിലും ഒരു രാജ്യത്തെ മറ്റേ രാജ്യം സഹായിക്കണമെന്ന വ്യവസ്ഥയും ഉടമ്പടിയിലുണ്ട്. 2019ന് ശേഷം ചൈനീസ് പ്രസിഡന്റ് ഷി ജിന്‍പിങ്ങ് ഈ വര്‍ഷം ജൂണില്‍ ഉത്തരകൊറിയയിലെ പ്യോങ്ങ്‌യാങ്ങില്‍ സന്ദര്‍ശനം നടത്തിയതും ഇരുരാജ്യങ്ങള്‍ തമ്മിലുള്ള ബന്ധം ഊഷ്മളമാക്കി.
പുതിയ യാലു നദി പാലം തുറക്കുന്നതോടെ ഇരുരാജ്യങ്ങള്‍ക്കിടയിലെ വ്യാപാരവും ഗതാഗതവും കൂടുതല്‍ സുഗമമാകുമെന്നാണ് പ്രതീക്ഷിക്കുന്നത്. അതേസമയം റഷ്യയുമായുള്ള ഉത്തരകൊറിയയുടെ ബന്ധം അടുത്തകാലത്ത് കൂടുതല്‍ ശക്തമായിട്ടുണ്ട്. 2024ല്‍ ഇരുരാജ്യങ്ങളും സമഗ്രതന്ത്രപ്രധാന പങ്കാളിത്ത കരാറില്‍ ഒപ്പുവെച്ചിരുന്നു. റഷ്യയുമായുള്ള സൈനിക-രാഷ്ട്രീയ സഹകരണം വര്‍ദ്ധിച്ചതോടെ ഉത്തരകൊറിയയുടെ ചൈനയോടുള്ള ആശ്രയത്തില്‍ മാറ്റമുണ്ടായിരിക്കാമെന്നാണ് നിരീക്ഷകരുടെ വിലയിരുത്തല്‍.
Recent Comments