by Midhun HP News | Oct 14, 2026 | Latest News, ദേശീയ വാർത്ത
ഡല്‍ഹി: സൗദി അറേബ്യയില്‍ ആക്രമണങ്ങള്‍ ശക്തമായ സാഹചര്യത്തില്‍ സൗദിയിലെ പ്രധാന നഗരങ്ങളിലേക്കും തിരിച്ചുമുള്ള വിമാന സര്‍വീസുകള്‍ ഒക്ടോബര്‍ 17 വരെ റദ്ദാക്കി ഇന്ത്യന്‍ വിമാന കമ്പനികള്‍. ആക്രമണങ്ങളില്‍ ജാഗ്രത പാലിക്കാനും പ്രാദേശിക അധികൃതരുടെ നിര്‍ദ്ദേശങ്ങള്‍ അനുസരിക്കാനും റിയാദിലെ ഇന്ത്യന്‍ എംബസി അഭ്യര്‍ത്ഥിച്ചു.
എയര്‍ ഇന്ത്യ, ഇന്‍ഡിഗോ, എയര്‍ ഇന്ത്യ എക്‌സ്പ്രസ്, ആകാശ എയര്‍ എന്നിവ റിയാദ്, ജിദ്ദ, ദമ്മാം എന്നിവിടങ്ങളിലേക്കുള്ള സര്‍വീസുകള്‍ റദ്ദാക്കിയതായി അറിയിച്ചു. ഇന്‍ഡിഗോ മദീനയിലേക്കുള്ള സര്‍വീസുകളും നിര്‍ത്തിവച്ചിട്ടുണ്ട്. സാഹചര്യങ്ങള്‍ നിരീക്ഷിച്ചുവരികയാണെന്നും, അതത് എയര്‍ലൈനുകളുടെ നയമനുസരിച്ച് ടിക്കറ്റ് തുക തിരികെ നല്‍കുന്നതിനോ യാത്ര പുനഃക്രമീകരിക്കുന്നതിനോ സൗകര്യമൊരുക്കുമെന്നും കമ്പനികള്‍ വ്യക്തമാക്കി.
‘സൗദി അറേബ്യയിലെ നിലവിലെ സാഹചര്യങ്ങള്‍ കണക്കിലെടുത്ത്, റിയാദ്, ദമ്മാം, ജിദ്ദ എന്നിവിടങ്ങളിലേക്കും തിരിച്ചുമുള്ള എല്ലാ എയര്‍ ഇന്ത്യ വിമാനങ്ങളും ഒക്ടോബര്‍ 17 വരെ റദ്ദാക്കിയതായി’ എയര്‍ ഇന്ത്യ അറിയിച്ചു. സാഹചര്യങ്ങള്‍ വിലയിരുത്തിയ ശേഷമേ സര്‍വീസുകള്‍ പുനരാരംഭിക്കുന്നതില്‍ തീരുമാനം എടുക്കാന്‍ കഴിയുവെന്നും അധികൃതര്‍ വ്യക്തമാക്കി.
സൗദി അറേബ്യയിലേക്കും തിരിച്ചും യാത്ര നിശ്ചയിച്ചിരുന്ന യാത്രക്കാര്‍ എയര്‍പോര്‍ട്ടുകളിലേക്ക് പുറപ്പെടുന്നതിന് മുന്‍പായി എയര്‍ലൈനിന്റെ ഔദ്യോഗിക വെബ്സൈറ്റ് സന്ദര്‍ശിച്ച് തങ്ങളുടെ വിമാനങ്ങളുടെ തത്സമയ സ്റ്റാറ്റസ് പരിശോധിക്കേണ്ടതാണ്. വിമാന കമ്പനിയില്‍ നിന്നുള്ള അടിയന്തിര അറിയിപ്പുകളും സമയ മാറ്റങ്ങളും തടസ്സമില്ലാതെ നേരിട്ട് ലഭിക്കുന്നതിനായി തങ്ങളുടെ ഇമെയില്‍ വിലാസവും ഫോണ്‍ നമ്പറും അടക്കമുള്ള കോണ്‍ടാക്റ്റ് വിവരങ്ങള്‍ കൃത്യമായി അപ്‌ഡേറ്റ് ചെയ്തിട്ടുണ്ടെന്ന് യാത്രികര്‍ ഉറപ്പുവരുത്തണമെന്നും അധികൃതര്‍ നിര്‍ദേശിച്ചു.
by Midhun HP News | Oct 14, 2026 | Latest News, ദേശീയ വാർത്ത
ദുബൈ: ഫ്രാന്‍സിലെ ഇന്റര്‍മാര്‍ഷെ സൂപ്പര്‍മാര്‍ക്കറ്റുകളില്‍ സൈബര്‍ ആക്രമണത്തില്‍ യുഎഇയിലും ആശങ്ക. ഫ്രാന്‍സില്‍ റഫ്രിജറേഷന്‍ താപനില 50 ഡിഗ്രി സെല്‍ഷ്യസായി ഉയര്‍ത്തി ടണ്‍ കണക്കിന് ഭക്ഷണ സാധനങ്ങളാണ് ഹാക്കര്‍മാര്‍ നശിപ്പിച്ചത്. വാരാന്ത്യത്തില്‍ സൂപ്പര്‍മാര്‍ക്കറ്റുകള്‍ അടഞ്ഞുകിടക്കുന്ന സമയത്താണ് ഹാക്കര്‍മാര്‍ സിസ്റ്റം നിയന്ത്രണത്തിലാക്കി ഈ കൃത്രിമം കാണിച്ചത്.
റഫ്രിജറേഷന്‍ കണ്‍ട്രോളറുകള്‍ നല്‍കിയ കമ്പനി കാലഹരണപ്പെട്ട ഫേംവെയര്‍ ഉപയോഗിച്ചതായി സ്ഥിരീകരിക്കുന്നു. ചില ഡിവൈസുകള്‍ അപ്ഡേറ്റുകള്‍ സ്വീകരിക്കാന്‍ കഴിയാത്തത്ര പഴയതാണെന്നും കണ്ടെത്തിയിട്ടുണ്ട്. മാനേജ്മെന്റ് ഇന്റര്‍ഫേസുകള്‍ നേരിട്ട് ഇന്റര്‍നെറ്റിനെ അഭിമുഖീകരിക്കരുതെന്ന് ഫ്രാന്‍സിന്റെ സൈബര്‍ ഏജന്‍സി മുന്നറിയിപ്പ് നല്‍കിയിരുന്നു.
ഫ്രാന്‍സിലെ സൈബര്‍ ആക്രമണം യുഎഇക്കും മുന്നറിയിപ്പാണ്. സൂപ്പര്‍മാര്‍ക്കറ്റുകളിലെ ഡിവൈസുകള്‍ സൈബര്‍ സുരക്ഷാ ഉറപ്പാക്കണമെന്നാണ് വിദഗ്ധര്‍ പറയുന്നത്. ഫ്രാന്‍സിലേതിന് സമാനമായ ഉപകരണങ്ങളാണ് യുഎഇയിലെ ഹൈപ്പര്‍മാര്‍ക്കറ്റുകള്‍, കോള്‍ഡ് സ്റ്റോറുകള്‍, ആശുപത്രികള്‍ എന്നിവടങ്ങളിലും ഉപയോഗിക്കുന്നത് എന്നതിനാല്‍ ഇവിടുത്തെ സുരക്ഷാ സംവിധാനങ്ങള്‍ എത്രത്തോളം സുരക്ഷിതമാണെന്ന ചോദ്യം ഉയരുകയാണ്. സാങ്കേതികവിദ്യയും ഇന്റര്‍നെറ്റ് സുരക്ഷാ ആവശ്യകതകളും കോള്‍ഡ് ചെയിനുകളിലേക്കും സൂപ്പര്‍മാര്‍ക്കറ്റുകളിലേക്കും വ്യാപിപ്പിക്കണമെന്ന് വിദഗ്ധരെ ഉദ്ധരിച്ച് ഗള്‍ഫ് ന്യൂസ് റിപ്പോര്‍ട്ട് ചെയ്തു.
by Midhun HP News | Oct 14, 2026 | Latest News, ദേശീയ വാർത്ത
സുൽത്താൻ ബത്തേരി: സൗദി അറേബ്യയിലേക്കുള്ള യാത്രയ്ക്കിടെ ജിദ്ദ വിമാനത്താവളത്തിൽ കാണാതായ മലയാളി നഴ്സ് ഫിലോമിനയെക്കുറിച്ച് (32) യാതൊരു വിവരവുമില്ലാതെ ആശങ്കയോടെ കാത്തിരിക്കുകയാണ് വയനാട്ടിലെ കുടുംബം. ഒന്നരമാസത്തെ അവധി കഴിഞ്ഞ് ജോലിയിൽ തിരികെ പ്രവേശിക്കാനായി റിയാദിലേക്ക് മടങ്ങിയ ഫിലോമിനയെക്കുറിച്ച് അവസാനമായി ലഭിച്ചത് ജിദ്ദ വിമാനത്താവളത്തിൽ തന്നെ തടഞ്ഞുവെച്ചിരിക്കുകയാണെന്ന സന്ദേശം മാത്രമാണ്. ഇതിനുശേഷം യുവതി എവിടെയാണെന്നോ എന്തുസംഭവിച്ചെന്നോ ഉള്ള വിവരങ്ങൾ ലഭ്യമല്ല.
സുൽത്താൻ ബത്തേരി അയ്യങ്കൊല്ലി അനന്ത് നിവാസിൽ രവിയുടെയും സെൽവിയുടെയും മകളായ ഫിലോമിന റിയാദിലെ കിങ് ഫഹദ് ആശുപത്രിയിൽ കഴിഞ്ഞ മൂന്നുവർഷമായി നഴ്സായി ജോലി ചെയ്തുവരികയായിരുന്നു. ഒക്ടോബർ 10-ന് ശനിയാഴ്ച ബെംഗളൂരുവിൽനിന്ന് ഭർത്താവ് ജോണിനോടും കുടുംബത്തോടും യാത്രപറഞ്ഞ് വിമാനം കയറിയ ഫിലോമിന, ജിദ്ദയിലെത്തിയ ശേഷം കുടുംബത്തെ ഫോണിൽ ബന്ധപ്പെട്ടിരുന്നു. തുടർന്ന് ജിദ്ദയിൽനിന്ന് റിയാദിലേക്കുള്ള കണക്ഷൻ വിമാനത്തിൽ യാത്ര തുടരാനിരിക്കെയാണ് യുവതിയെ കാണാതാകുന്നത്.
വിമാനത്താവളത്തിൽ ഇറങ്ങിയ തന്നെ ജീവനക്കാർ തടഞ്ഞുവെച്ചിരിക്കുകയാണെന്നും ബാഗും മറ്റ് സാധനങ്ങളും പരിശോധിച്ച ശേഷം സെക്യൂരിറ്റി ഉദ്യോഗസ്ഥർ പാസ്‌പോർട്ട് വാങ്ങിവെച്ചെന്നുമായിരുന്നു കുടുംബത്തിന് ലഭിച്ച അവസാന സന്ദേശം. തന്റെ ബാഗുകളും സാധനങ്ങളും കൊണ്ടുപോകാൻ മറ്റാരോടെങ്കിലും ഏർപ്പാടാക്കാൻ വിമാനത്താവളത്തിലെ ജീവനക്കാർ ആവശ്യപ്പെട്ടതായും ഫിലോമിന വാട്‌സാപ്പിലൂടെ കുടുംബത്തെ അറിയിച്ചിരുന്നു. ഇതിന് പിന്നാലെ ഫിലോമിനയുടെ മൊബൈൽ ഫോൺ പൂർണ്ണമായും സ്വിച്ച് ഓഫായി.
തുടർന്ന് റിയാദിലെ ആശുപത്രിയിലും താമസസ്ഥലത്തും അന്വേഷിച്ചെങ്കിലും ഫിലോമിന അവിടെ എത്തിയിട്ടില്ലെന്ന മറുപടിയാണ് സഹപ്രവർത്തകർ നൽകിയത്. ജിദ്ദയിൽ വിമാനമിറങ്ങിയ ശേഷം പലതവണ ഫോണിൽ ബന്ധപ്പെടാൻ കുടുംബം ശ്രമിച്ചെങ്കിലും യാതൊരു വിവരവും ലഭിച്ചില്ല. ഫിലോമിനയെക്കുറിച്ചുള്ള വിവരങ്ങളൊന്നും ലഭിക്കാത്തതിൽ കടുത്ത ദുഃഖത്തിലും ആശങ്കയിലുമാണ് ഭർത്താവ് ജോണും നാല് വയസ്സ് മാത്രമുള്ള ഇവരുടെ മകനും. കഴിഞ്ഞ ശനിയാഴ്ചയാണ് ഭാര്യ നാട്ടിൽനിന്ന് പോയതെന്നും അവൾക്ക് എന്താണ് സംഭവിച്ചതെന്ന് തങ്ങൾക്ക് അറിയില്ലെന്നും ജോൺ പറഞ്ഞു. അമ്മയെ കാണാതെ കുഞ്ഞ് നിർത്താതെ കരയുകയാണെന്നും അവനോട് എന്ത് പറയണമെന്ന് അറിയില്ലെന്നും ജോൺ വിതുമ്പലോടെ വ്യക്തമാക്കി.
ഫിലോമിനയെ എത്രയും വേഗം കണ്ടെത്താൻ സഹായം തേടി സൗദി എംബസിയുമായും നോർക്കയുമായും ഇ-മെയിൽ മുഖേന ബന്ധപ്പെട്ടിട്ടുണ്ടെങ്കിലും ഇതുവരെ മറുപടിയൊന്നും ലഭിച്ചിട്ടില്ല. ഈ സാഹചര്യത്തിൽ വിഷയത്തിൽ കേന്ദ്ര–സംസ്ഥാന സർക്കാരുകൾ അടിയന്തരമായി ഇടപെട്ട് ഫിലോമിനയെ കണ്ടെത്താൻ നടപടി സ്വീകരിക്കണമെന്നാണ് കുടുംബത്തിന്റെ ആവശ്യം.
by Midhun HP News | Oct 14, 2026 | Latest News, ദേശീയ വാർത്ത
പട്‌ന: ബിഹാറിലെ വൈശാലി ജില്ലയിലെ രാഘോപൂരില്‍ ഗംഗാനദിയില്‍ ബോട്ടു മറിഞ്ഞ് 13 പേര്‍ മരിച്ചു. ബോട്ടില്‍ 30 ഓളം പേരാണ് ഉണ്ടായിരുന്നത്. മരിച്ചവരില്‍ ഭൂരിഭാഗവും കുട്ടികളാണെന്നാണ് വിവരം. രാത്രി എട്ടുമണിയോടെയാണ് അപകടമുണ്ടായത്.
നദിക്കപ്പുറത്തുള്ള രാംപൂര്‍ ശ്യാംചന്ദ് ഗ്രാമത്തിലെ ഒരു ചടങ്ങില്‍ പങ്കെടുക്കാന്‍ പോയവരാണ് അപകടത്തില്‍പ്പെട്ടത്. വൈശാലി ജില്ലയിലെ രാഘോപൂര്‍ പൊലീസ് സ്റ്റേഷന്‍ പരിധിയിലാണ് സംഭവം. അമിത ഭാരത്തെത്തുടര്‍ന്ന് നിയന്ത്രണം വിട്ട് ബോട്ട് മറിയുകയായിരുന്നുവെന്നാണ് റിപ്പോര്‍ട്ട്.
അപകടത്തില്‍പ്പെട്ട ആറുപേരെ രക്ഷപ്പെടുത്തിയതായി വൈശാലി ജില്ലാ കലക്ടര്‍ വ്യക്തമാക്കി. എന്‍ഡിആര്‍എഫ് സംഘത്തിന്റെയും നാട്ടുകാരുടെയും നേതൃത്വത്തിലായിരുന്നു രക്ഷാപ്രവര്‍ത്തനം. മരണസംഖ്യ ഇനിയും ഉയരാന്‍ സാധ്യതയുണ്ടെന്ന് പ്രാദേശിക ഭരണകൂടം അറിയിച്ചു.
മരിച്ചവരുടെ ബന്ധുക്കള്‍ക്ക് രണ്ട് ലക്ഷം രൂപയും പരിക്കേറ്റവര്‍ക്ക് 50,000 രൂപയും ധനസഹായം നല്‍കുമെന്ന് പ്രധാനമന്ത്രി നരേന്ദ്രമോദി അറിയിച്ചു. അപകടത്തില്‍ ബിഹാര്‍ മുഖ്യമന്ത്രി സാമ്രാട്ട് ചൗധരിയും പ്രതിപക്ഷ നേതാവ് തേജസ്വി യാദവും അനുശോചിച്ചു. മരിച്ചവരുടെ ബന്ധുക്കള്‍ക്ക് നാല് ലക്ഷം രൂപ വീതം സഹായധനം സംസ്ഥാനസര്‍ക്കാര്‍ പ്രഖ്യാപിച്ചു.
by Midhun HP News | Oct 14, 2026 | Latest News, ദേശീയ വാർത്ത
അബുദാബി: അബുദാബിയിലെ സ്‌കൂളില്‍ കുട്ടികളെ മര്‍ദിച്ച അധ്യാപകന് 2 വര്‍ഷം തടവ്. ശിക്ഷ പൂര്‍ത്തിയാക്കിയശേഷം അധ്യാപകനെ നാടുകടത്താനും കോടതി ചെലവുകള്‍ ഈടാക്കാനും അബുദാബി ക്രിമിനല്‍ കോടതി ഉത്തരവിട്ടു.
അബുദാബിയിലെ ഒരു സ്വകാര്യ സ്‌കൂളിലെ ക്ലാസ് മുറിയിലാണ് സംഭവം. കുട്ടികള്‍ ക്ലാസില്‍ ബഹളമുണ്ടാക്കുന്നത് തടയാനും അച്ചടക്കം പാലിക്കാനുമാണ് മര്‍ദിച്ചതെന്നായിരുന്നു അധ്യാപകന്റെ വിശദീകരണം. മര്‍ദനമേറ്റ നാല് കുട്ടികള്‍ക്ക് ഇരുപത് ദിവസം വരെ പ്രാഥമിക കൃത്യങ്ങള്‍ നിര്‍വഹിക്കാന്‍ കഴിയാത്ത അവസ്ഥയിലായിരുന്നു. അന്വേഷണത്തിലും കോടതിയിലും അധ്യാപകന് കുറ്റം സമ്മതിച്ചു. കുറ്റസമ്മതം ശരിവയ്ക്കുന്ന സിസിടിവി ദൃശ്യങ്ങളും കോടതി പരിശോധിച്ചു. ന്യായീകരണമില്ലാതെ വിദ്യാര്‍ഥികളോട് അതിക്രമം കാട്ടിയതായി ദൃശ്യങ്ങളില്‍ വ്യക്തമായെന്ന് കോടതി നിരീക്ഷിച്ചു.
പഠനസമയത്ത് നടന്ന മര്‍ദനം പൊതുസുരക്ഷയ്ക്കും ക്രമസമാധാനത്തിനും ഭീഷണിയാണെന്ന് കോടതി ചൂണ്ടിക്കാട്ടി. വ്യക്തികളുടെ സുരക്ഷയും അവകാശങ്ങളും സംരക്ഷിക്കാനും ഇത്തരം നിയമലംഘനങ്ങള്‍ ആവര്‍ത്തിക്കുന്നത് തടയാനും നിയമം കര്‍ശനമായി നടപ്പാക്കേണ്ടതിന്റെ പ്രാധാന്യവും കോടതി വ്യക്തമാക്കി.
by Midhun HP News | Oct 14, 2026 | Latest News, ദേശീയ വാർത്ത
ഹൈദരാബാദ്: ഇന്ദോറിലെ തകര്‍പ്പന്‍ വിജയത്തിന്റെ ആത്മവിശ്വാസത്തില്‍, വെസ്റ്റ് ഇന്‍ഡീസിനെതിരായ അഞ്ച് മത്സരങ്ങളുടെ ടി20 പരമ്പര സ്വന്തമാക്കാന്‍ ഇന്ത്യ ഇന്ന് ഹൈദരാബാദില്‍ ഇറങ്ങുന്നു. പരമ്പരയില്‍ നിലവില്‍ 2-1ന് മുന്നിലുള്ള ഇന്ത്യക്ക്, നാലാം മത്സരത്തില്‍ വിജയിച്ചാല്‍ പരമ്പര സ്വന്തമാക്കാം. മറുവശത്ത്, പരമ്പര ജീവനോടെ നിലനിര്‍ത്താന്‍ വിന്‍ഡീസിന് ഈ മത്സരത്തില്‍ വിജയം അനിവാര്യമാണ്. മത്സരം രാത്രി 7 മണിക്ക് ആരംഭിക്കും.
സഞ്ജു സാംസണ്‍, അഭിഷേക് ശര്‍മ, ഇഷാന്‍ കിഷന്‍ എന്നിവരടങ്ങുന്ന ഇന്ത്യന്‍ ടോപ് ഓര്‍ഡര്‍ തകര്‍പ്പന്‍ ഫോമിലാണ്. മൂന്നാം ടി20യില്‍ വെറും 30 പന്തില്‍ 6 ഫോറുകളും 5 സിക്‌സറുകളും സഹിതം 69 റണ്‍സ് അടിച്ചുകൂട്ടിയ അഭിഷേക് ശര്‍മ ഇന്ത്യക്ക് 223 എന്ന മികച്ച സ്‌കോര്‍ സമ്മാനിച്ചിരുന്നു. ടോപ് ഓര്‍ഡര്‍ താരങ്ങള്‍ മികച്ച പ്രകടനം കാഴ്ചവെക്കുന്നതിനാല്‍ മധ്യനിരയ്ക്ക് വലിയ സമ്മര്‍ദം നേരിടേണ്ടി വന്നിട്ടില്ലെന്നത് ഇന്ത്യക്ക് അനുകൂലമായ കാര്യമാണ്. നിര്‍ണായക മത്സരമായതിനാല്‍ പ്ലേയിങ് ഇലവനില്‍ വലിയ അഴിച്ചുപണിക്ക് ടീം മുതിര്‍ന്നേക്കില്ല.
രണ്ട് മത്സരങ്ങളില്‍ പരാജയപ്പെട്ടെങ്കിലും വെസ്റ്റ് ഇന്‍ഡീസ് ദുര്‍ബലരല്ലെന്ന് ഈ പരമ്പര തെളിയിച്ചിട്ടുണ്ട്. ക്യാപ്റ്റന്‍ ഷായ് ഹോപ്പും, ഓപ്പണര്‍ ഷെര്‍ഫെയ്ന്‍ റുഥര്‍ഫോര്‍ഡും മികച്ച പ്രകടനമാണ് പുറത്തെടുത്തത്. റാഞ്ചിയില്‍ നടന്ന രണ്ടാം ടി20യില്‍ ഇന്ത്യയുടെ 249 റണ്‍സ് വിജയലക്ഷ്യം വിന്‍ഡീസ് അനായാസം മറികടന്നത് അവരുടെ ബാറ്റിങ് കരുത്ത് വ്യക്തമാക്കുന്നു. ഇന്ത്യന്‍ ബൗളര്‍മാര്‍ കൂടുതല്‍ അച്ചടക്കം പുലര്‍ത്തിയില്ലെങ്കില്‍ വിന്‍ഡീസ് വീണ്ടും ഭീഷണിയായേക്കാം.
ഹൈദരാബാദിലെ പിച്ചില്‍ റണ്‍മഴ ഉണ്ടാകുമെന്നാണ് പ്രതീക്ഷിക്കുന്നത്. ഈ വര്‍ഷത്തെ ഐപിഎല്‍ മത്സരങ്ങളില്‍ ഇവിടെ ആദ്യ ഇന്നിങ്‌സിലെ ശരാശരി സ്‌കോര്‍ 209 ആയിരുന്നു. ഫ്‌ലഡ് ലൈറ്റിന് കീഴില്‍ മഞ്ഞുവീഴ്ച കാര്യമായി ബാധിക്കാന്‍ ഇടയില്ല. 2024ല്‍ ബംഗ്ലാദേശിനെതിരെ ഇവിടെ നടന്ന ടി20 മത്സരത്തില്‍ ഇന്ത്യ 6 വിക്കറ്റിന് 297 റണ്‍സ് അടിച്ചുകൂട്ടിയപ്പോള്‍ സഞ്ജു സാംസണ്‍ 47 പന്തില്‍ 111 റണ്‍സ് നേടിയിരുന്നു. മലയാളി താരത്തില്‍ നിന്ന് ഇന്നും അത്തരമൊരു വെടിക്കെട്ട് പ്രകടനത്തിനായിരിക്കും ആരാധകര്‍ ഉറ്റുനോക്കുന്നത്.
Recent Comments