by Midhun HP News | Oct 14, 2026 | Latest News, ദേശീയ വാർത്ത
ഡല്‍ഹി: ഡല്‍ഹിയില്‍ മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് നടന്ന പ്രതിഷേധങ്ങള്‍ റിപ്പോര്‍ട്ട് ചെയ്യുന്നതിനിടയില്‍ മാധ്യമപ്രവര്‍ത്തകര്‍ക്ക് നേരെ ഡല്‍ഹി പൊലീസിന്റെയും കേന്ദ്ര അര്‍ധസൈനിക വിഭാഗങ്ങളുടെയും ഭാഗത്തുനിന്നുണ്ടായ അതിക്രമങ്ങള്‍ക്കെതിരെ കേരള യൂണിയന്‍ ഓഫ് വര്‍ക്കിങ് ജേര്‍ണലിസ്റ്റ്‌സ് (കെയുഡബ്ല്യുജെ – ഡല്‍ഹി യൂണിറ്റ്) സുപ്രീംകോടതിയെ സമീപിച്ചു. ഭരണഘടനയുടെ 32-ാം അനുച്ഛേദപ്രകാരമാണ് സംഘടന കോടതിയില്‍ ഹര്‍ജി ഫയല്‍ ചെയ്തത്.
ഒക്ടോബര്‍ 10, 11 തീയതികളില്‍ ഡല്‍ഹിയില്‍ നടന്ന പ്രക്ഷോഭങ്ങള്‍ റിപ്പോര്‍ട്ട് ചെയ്യുകയായിരുന്ന മാധ്യമപ്രവര്‍ത്തകരെ അന്യായമായി കസ്റ്റഡിയിലെടുക്കുകയും ശാരീരികമായി ഉപദ്രവിക്കുകയും ഭീഷണിപ്പെടുത്തുകയും ചെയ്തുവെന്നാണ് ഹര്‍ജിയിലെ പ്രധാന ആരോപണം. പ്രസ് ക്രെഡന്‍ഷ്യലുകള്‍ പ്രദര്‍ശിപ്പിച്ച് ജോലി ചെയ്തിരുന്ന മാധ്യമപ്രവര്‍ത്തകരെ പോലും പൊലീസ് ഉദ്യോഗസ്ഥര്‍ ലക്ഷ്യമിട്ടതായി ഹര്‍ജിയില്‍ പറയുന്നു. മാധ്യമപ്രവര്‍ത്തകരെ തടഞ്ഞുവെക്കുക, വലിച്ചിഴയ്ക്കുക, ദീര്‍ഘനേരം ചോദ്യം ചെയ്യുക, പരിശോധനകള്‍ നടത്തുക എന്നിവയ്ക്ക് പുറമെ ഒരു ഫോട്ടോഗ്രാഫറുടെ ക്യാമറ പിടിച്ചുവാങ്ങാന്‍ ശ്രമിക്കുകയും തത്സമയ റിപ്പോര്‍ട്ടിങ്ങിലുണ്ടായിരുന്ന വനിതാ മാധ്യമപ്രവര്‍ത്തകയെ മര്‍ദിക്കുകയും ചെയ്തതായും പരാതിയിലുണ്ട്.
മലയാളം വാര്‍ത്താ ചാനലുകളിലെ ഏഴ് മാധ്യമപ്രവര്‍ത്തകര്‍ പൊലീസ് അതിക്രമത്തിന് ഇരയായതായി ഹര്‍ജിയില്‍ പേരെടുത്ത് പറയുന്നുണ്ട്. ഒക്ടോബര്‍ 9, 11 തീയതികളില്‍ കോടതി പുറപ്പെടുവിച്ച ഇടക്കാല ഉത്തരവുകളുടെ നഗ്നമായ ലംഘനമാണ് പൊലീസിന്റെ ഭാഗത്തുനിന്നുണ്ടായതെന്ന് ഹര്‍ജിയില്‍ ചൂണ്ടിക്കാണിക്കുന്നു. ഒക്ടോബര്‍ 11-ൃലെ ഉത്തരവ് പ്രകാരം വക്കീലന്മാര്‍ക്കും മാധ്യമപ്രവര്‍ത്തകര്‍ക്കും മറ്റ് പ്രൊഫഷണലുകള്‍ക്കും തങ്ങളുടെ ജോലി നിര്‍വഹിക്കുന്നതില്‍ തടസ്സങ്ങള്‍ സൃഷ്ടിക്കാന്‍ പാടില്ല എന്ന് വ്യക്തമാക്കിയതാണെന്ന് ഹര്‍ജിയില്‍ ഓര്‍മ്മിപ്പിക്കുന്നു. ഇത് ഭരണഘടനയുടെ 14, 19(1)(a), 21 എന്നീ അനുച്ഛേദങ്ങളുടെ ലംഘനമാണെന്നും ഹര്‍ജിയില്‍ വാദിക്കുന്നു.
സംഭവത്തെക്കുറിച്ച് സ്വതന്ത്രവും നിഷ്പക്ഷവുമായ സമയബന്ധിതമായ അന്വേഷണം നടത്തണമെന്ന് സംഘടന ആവശ്യപ്പെട്ടു. ഉത്തരവാദികളായ ഉദ്യോഗസ്ഥര്‍ക്കെതിരെ കര്‍ശന നടപടി സ്വീകരിക്കണം. പൊതുപരിപാടികള്‍ റിപ്പോര്‍ട്ട് ചെയ്യുന്ന മാധ്യമപ്രവര്‍ത്തകര്‍ക്ക് സുരക്ഷ ഉറപ്പാക്കുന്നതിനും അവരുടെ ജോലിയില്‍ അനാവശ്യമായി ഇടപെടുന്നത് തടയുന്നതിനും കര്‍ശന നിര്‍ദ്ദേശങ്ങള്‍ പുറപ്പെടുവിക്കണം. ബാധിക്കപ്പെട്ട മാധ്യമപ്രവര്‍ത്തകര്‍ക്ക് നഷ്ടപരിഹാരം നല്‍കണം. സിസിടിവി ദൃശ്യങ്ങള്‍, ബോഡി വോണ്‍ ക്യാമറ ദൃശ്യങ്ങള്‍, ഫോട്ടോഗ്രാഫുകള്‍, ഡ്രോണ്‍ ദൃശ്യങ്ങള്‍, ഡിറ്റന്‍ഷന്‍ രജിസ്റ്ററുകള്‍ എന്നിവ സൂക്ഷിച്ചുവെക്കാന്‍ ഉത്തരവിടണമെന്നും ഹര്‍ജിയില്‍ ആവശ്യപ്പെടുന്നു. ഡല്‍ഹി പ്രതിഷേധങ്ങള്‍ റിപ്പോര്‍ട്ട് ചെയ്യുന്ന മാധ്യമപ്രവര്‍ത്തകരുടെ സുരക്ഷയുമായി ബന്ധപ്പെട്ട് സുപ്രീംകോടതിയുടെ പരിഗണനയിലുള്ള മറ്റ് ഹര്‍ജികളോടൊപ്പം ഈ ഹര്‍ജിയും പരിഗണിച്ചേക്കും.
by Midhun HP News | Oct 13, 2026 | Latest News, ദേശീയ വാർത്ത
ഡല്‍ഹി: ഡല്‍ഹിയില്‍ അടുത്തിടെ നടന്ന ‘ഇന്ത്യ മൊബൈല്‍ കോണ്‍ഗ്രസില്‍, റിലയന്‍സ് ജിയോ തങ്ങളുടെ അത്യാധുനിക എഐ സ്മാര്‍ട്ട് വെയറബിള്‍ ആയ ‘ജിയോ ഗ്ലാസസ്’ അവതരിപ്പിച്ചിരിക്കുകയാണ്. ഫോണ്‍ എടുക്കാതെയും ആപ്പുകള്‍ തുറക്കാതെയും ക്യുആര്‍ കോഡിലേക്ക് നോക്കി മാത്രം യുപിഐ പണമിടപാടുകള്‍ നടത്താന്‍ ഈ എഐ ഗ്ലാസ് ഉപയോഗിച്ച് സാധിക്കും.
ജിയോ ഗ്ലാസസിലെ കാമറ യുപിഐ ക്യു ആര്‍ കോഡ് സ്‌കാന്‍ ചെയ്യുകയും, അതേസമയം ഉപയോക്താവ് പേയ്മെന്റ് ആരംഭിക്കുന്നതിനായി വോയ്സ് കമാന്‍ഡ് നല്‍കുകയും ചെയ്യുന്നു. സ്ഥിരീകരണം ലഭിച്ചാലുടന്‍ പേയ്മെന്റ് പൂര്‍ത്തിയാകുന്നു. ‘യുപിഐ സര്‍ക്കിള്‍’ വഴി ഉപയോക്താക്കള്‍ക്ക് ഓരോ ഇടപാടിലും 5,000 രൂപ വരെ പണമടയ്ക്കാന്‍ സാധിക്കും. പ്രതിമാസ പരിധി 15,000 രൂപയാണ്. ഈ പരിധി നിശ്ചയിച്ചിരിക്കുന്നത് ജിയോ അല്ല, മറിച്ച് യുപിഐ സര്‍ക്കിള്‍ ചട്ടങ്ങള്‍ പ്രകാരമാണ്.
വ്യത്യസ്ത ഇന്ത്യന്‍ ഭാഷകള്‍ സംസാരിക്കുന്നവര്‍ക്ക് പരസ്പരം ആശയവിനിമയം നടത്താന്‍ സഹായിക്കുന്ന തത്സമയ വിവര്‍ത്തന സംവിധാനവും എഐ ഗ്ലാസുകളിലുണ്ട്. ഒരാള്‍ സ്വന്തം ഭാഷയില്‍ സംസാരിക്കുമ്പോള്‍ മറുവശത്തുള്ളയാളുടെ ഭാഷയിലേക്ക് സംഭാഷണം തര്‍ജമ ചെയ്ത് ആശയവിനിമയം എളുപ്പമാക്കാന്‍ എഐ സാങ്കേതികവിദ്യ സഹായിക്കും.ഇന്ത്യന്‍ ഭാഷകള്‍ക്ക് കൂടുതല്‍ പ്രാധാന്യം നല്‍കുന്ന ഈ സംവിധാനം, ഭാഷാ വ്യത്യാസങ്ങള്‍ മൂലമുള്ള ആശയവിനിമയ തടസ്സങ്ങള്‍ കുറയ്ക്കാന്‍ സഹായിക്കുമെന്നാണ് പ്രതീക്ഷ.
മീറ്റിങ്ങുകളിലും ചര്‍ച്ചകളിലും പ്രധാനപ്പെട്ട വിവരങ്ങള്‍ രേഖപ്പെടുത്താന്‍ സഹായിക്കുന്ന എഐ നോട്ട്-ടേക്കിങ് സംവിധാനവും പുതിയ ഡിവൈസിലുണ്ട്. യാത്രയിലായിരിക്കുമ്പോഴും മറ്റ് ജോലികളില്‍ ഏര്‍പ്പെട്ടിരിക്കുമ്പോഴും ക്രിക്കറ്റ് മത്സരങ്ങളുടെ തത്സമയ കമന്ററി അറിയാനുള്ള സൗകര്യവും അവതരിപ്പിച്ചിട്ടുണ്ട്.
by Midhun HP News | Oct 13, 2026 | Latest News, ദേശീയ വാർത്ത
ഡല്‍ഹി: ട്രെയിനുകളിലും റെയില്‍വെ പരിസരത്തും മൊബൈല്‍ ഫോണില്‍ സ്പീക്കര്‍ മോഡില്‍ ഉച്ചത്തില്‍ പാട്ടും വിഡിയോ പ്ലേ ചെയ്താല്‍ പിടിവീഴും. നിയമം തെറ്റിക്കുന്നവര്‍ ജയില്‍ ശിക്ഷ ഉള്‍പ്പെടെയുള്ള ശിക്ഷാ നടപടികള്‍ നേരിടേണ്ടി വരുമെന്ന് ഇന്ത്യന്‍ റെയില്‍വേ മുന്നറിയിപ്പ് നല്‍കി.
സഹയാത്രക്കാര്‍ക്ക് സമാധാനപരവും സുഖകരവുമായ യാത്ര ഉറപ്പാക്കാന്‍ മൊബൈല്‍ ഫോണുകളുടെ ഉപയോഗം നിയന്ത്രിക്കണമെന്നും അധികൃതര്‍ നിര്‍ദേശിച്ചു. പാട്ട് കേള്‍ക്കണമെന്നുള്ളവര്‍ ഇയര്‍ഫോണുകള്‍ ഉപയോഗിക്കാനും ഫോണ്‍ സംഭാഷണങ്ങള്‍ കുറഞ്ഞ ശബ്ദത്തില്‍ നടത്താനും റെയില്‍വെ യാത്രക്കാരോട് നിര്‍ദ്ദേശിച്ചു.
‘ഉച്ചത്തിലുള്ളതും ദീര്‍ഘനേരം നീണ്ടുനില്‍ക്കുന്നതുമായ ഫോണ്‍ സംഭാഷണങ്ങളും അലോസരപ്പെടുത്തുന്ന റിങ്ടോണുകളും മറ്റുള്ളവര്‍ക്ക്, പ്രത്യേകിച്ച് എസി കോച്ചുകള്‍ പോലുള്ള അടഞ്ഞ സ്ഥലങ്ങളില്‍, ബുദ്ധിമുട്ടുണ്ടാക്കിയേക്കാം, റെയില്‍വേ നിയമം 1989-ലെ സെക്ഷന്‍ 145(2)ല്‍ (ജന്‍ വിശ്വാസ് (ഭേദഗതി) നിയമം, 2026 പ്രകാരം ഭേദഗതി വരുത്തിയത്) പറയുന്ന വ്യവസ്ഥകള്‍ പ്രകാരം, ശല്യമുണ്ടാക്കുന്ന തരത്തിലുള്ള പെരുമാറ്റത്തിന് 1,000 രൂപ പിഴയും, കൂടാതെ റെയില്‍വേ പരിസരത്ത് നിന്ന് പുറത്താക്കുകയോ ടിക്കറ്റ് കണ്ടുകെട്ടല്‍ എന്നീ നടപടികളും നേരിടേണ്ടിവരും.
‘റെയില്‍വേ ഉദ്യോഗസ്ഥന്‍ ആവശ്യപ്പെട്ടിട്ടും ഒരാള്‍ ശല്യപ്പെടുത്തുന്ന പെരുമാറ്റം തുടരുകയാണെങ്കില്‍, ആറ് മാസം വരെ തടവോ 5,000 രൂപ വരെ പിഴയോ അല്ലെങ്കില്‍ ഇവ രണ്ടും കൂടിയോ ശിക്ഷയായി ലഭിക്കാം,’ എന്ന് റെയില്‍വേ അറിയിച്ചു.
റെയില്‍വേ സ്റ്റേഷനുകളിലും ട്രെയിനുകളിലും നിയന്ത്രണം നടപ്പാക്കാന്‍ ദക്ഷിണ റെയില്‍വേ നിര്‍ദേശം നല്‍കി.മൊബൈല്‍ ഇന്റര്‍നെറ്റിന്റെ വ്യാപനത്തോടെ സ്പീക്കറിലൂടെ വിഡിയോകളും മറ്റും കേള്‍ക്കുന്നതും കാണുന്നതും വ്യാപകമായിട്ടുണ്ടെന്ന് ദക്ഷിണ റെയില്‍വേ വാണിജ്യ വിഭാഗം പുറത്തിറക്കിയ സര്‍ക്കുലറില്‍ പറയുന്നു. ഇതു സംബന്ധിച്ച് റെയില്‍വേ സ്റ്റേഷനുകളിലും ട്രെയിനുകളിലും പൊതുജനങ്ങള്‍ക്കുള്ള അറിയിപ്പുകളിലൂടെ യാത്രക്കാരെ ബോധവല്‍ക്കരിക്കണം. മലയാളം ഉള്‍പ്പെടെയുള്ള പ്രാദേശിക ഭാഷകള്‍ക്കു പുറമേ ഹിന്ദിയിലും ഇംഗ്ലിഷിലും അറിയിപ്പുകള്‍ നല്‍കണം. സ്പീക്കര്‍ മോഡില്‍ പാട്ടുകളും വിഡിയോകളും കേള്‍ക്കരുതെന്നും ഉച്ചത്തില്‍ സംസാരിക്കുന്നത് ഒഴിവാക്കണമെന്നും അറിയിപ്പുകളില്‍ വ്യക്തമാക്കും.
by Midhun HP News | Oct 12, 2026 | Latest News, ദേശീയ വാർത്ത
സ്റ്റോക്ക്ഹോം: 2026-ലെ സാമ്പത്തിക ശാസ്ത്ര നൊബേൽ പുരസ്കാരം അമേരിക്കൻ സാമ്പത്തിക ശാസ്ത്രജ്ഞരായ റോബർട്ട് ഇ. ഹാളിനും മൈക്കൽ വുഡ്ഫോർഡിനും. ആഗോളതലത്തിൽ സർക്കാരുകൾക്കും സെൻട്രൽ ബാങ്കുകൾക്കും സാമ്പത്തിക ആഘാതങ്ങളെ കൃത്യമായി നിയന്ത്രിക്കാനും നേരിടാനും സഹായിക്കുന്ന സാമ്പത്തിക മാതൃകകൾ രൂപപ്പെടുത്തിയതിനാണ് ഈ അംഗീകാരം. സ്റ്റോക്ക്ഹോമിലെ റോയൽ സ്വീഡിഷ് അക്കാദമി ഓഫ് സയൻസസാണ് പുരസ്കാരം പ്രഖ്യാപിച്ചത്.
മാക്രോ ഇക്കണോമിക് സ്റ്റെബിലൈസേഷന്റെ സൂക്ഷ്മ സാമ്പത്തിക അടിത്തറയെക്കുറിച്ചുള്ള ഗവേഷണങ്ങൾക്കാണ് ഇരുവരും ആദരിക്കപ്പെട്ടത്. സാമ്പത്തിക വളർച്ചയിലെ ചാഞ്ചാട്ടങ്ങളും മാന്ദ്യങ്ങളും ലഘൂകരിക്കുന്നതിലും വിപണിയിൽ സ്ഥിരത കൊണ്ടുവരുന്നതിലും ഇവരുടെ പഠനങ്ങൾ നിർണ്ണായക പങ്കുവഹിച്ചതായി അക്കാദമി വിലയിരുത്തി. കാലിഫോർണിയയിലെ സ്റ്റാൻഫോർഡ് സർവകലാശാലയിലെ പ്രൊഫസറാണ് റോബർട്ട് ഇ. ഹാൾ. ന്യൂയോർക്കിലെ കൊളംബിയ സർവകലാശാലയിലെ പ്രൊഫസറാണ് മൈക്കൽ വുഡ്ഫോർഡ്. പുരസ്കാര നേട്ടം അപ്രതീക്ഷിതവും വലിയ ബഹുമതിയുമാണെന്ന് മൈക്കൽ വുഡ്ഫോർഡ് പ്രതികരിച്ചു.
ലോകമെമ്പാടുമുള്ള സെൻട്രൽ ബാങ്കുകളും ധനകാര്യ മന്ത്രാലയങ്ങളും ഇപ്പോൾ ഉപയോഗിക്കുന്ന പ്രായോഗിക മാതൃകകൾക്ക് സുസ്ഥിരമായ ഒരു സൈദ്ധാന്തിക അടിത്തറ നൽകാൻ ഇരുവരുടെയും കണ്ടെത്തലുകൾക്ക് സാധിച്ചുവെന്ന് സാമ്പത്തിക ശാസ്ത്ര നൊബേൽ സമിതി ചെയർമാൻ ജോൺ ഹാസ്‌ലർ വ്യക്തമാക്കി. ഊർജ്ജ പ്രതിസന്ധികൾ അല്ലെങ്കിൽ ഉപഭോക്തൃ വിപണിയിലെ പെട്ടെന്നുള്ള തകർച്ചകൾ പോലുള്ള സാമ്പത്തിക ആഘാതങ്ങളെ നേരിടാൻ ഇവരുടെ ഗവേഷണങ്ങൾ ലോകത്തിന് കരുത്തുപകർന്നതായും അദ്ദേഹം ചൂണ്ടിക്കാട്ടി.
ആൽഫ്രഡ് നൊബേലിന്റെ സ്മരണാർത്ഥം സ്വീഡിഷ് സെൻട്രൽ ബാങ്ക്1968-ൽ ഏർപ്പെടുത്തിയതാണ് സാമ്പത്തിക ശാസ്ത്ര പുരസ്കാരം. സാങ്കേതികമായി മറ്റ് അഞ്ച് നൊബേൽ പുരസ്കാരങ്ങൾ പോലെ ആൽഫ്രഡ് നൊബേൽ നേരിട്ട് സ്ഥാപിച്ചതല്ലെങ്കിലും, എല്ലാ വർഷവും ഡിസംബർ 10-ന് നൊബേൽ ചരമവാർഷിക ദിനത്തിൽ മറ്റ് പുരസ്കാരങ്ങൾക്കൊപ്പമാണ് ഇതും സമ്മാനിക്കുന്നത്. 12 ദശലക്ഷം സ്വീഡിഷ് ക്രോണറാണ് (ഏകദേശം 12 ലക്ഷം യു.എസ് ഡോളർ) പുരസ്കാരത്തുക.
by Midhun HP News | Oct 10, 2026 | Latest News, ദേശീയ വാർത്ത
ഡല്‍ഹി: ഡല്‍ഹി പൊലീസ് കസ്റ്റഡിയിലെടുത്ത പ്രതിപക്ഷ നേതാവ് പിണറായി വിജയനെ എട്ട് മണിക്കൂറിന് ശേഷം വിട്ടയച്ചു. മുഖ്യതെരഞ്ഞെടുപ്പ് കമീഷണറുടെ രാജി ആവശ്യപ്പെട്ടുള്ള പ്രതിഷേധത്തില്‍ പങ്കെടുക്കാനെത്തിയ പിണറായി വിജയന്‍, ജോണ്‍ ബ്രിട്ടാസ്, കെ എന്‍ ബാലഗോപാല്‍ എന്നിവരെ രാവിലെ 10.30 ടെയാണ് കസ്റ്റഡിയിലെടുത്തത്. എന്നാല്‍ മണിക്കൂറുകള്‍ക്ക് ശേഷം വൈകീട്ട് 6.30ടെയാണ് മൂവരെയും വിട്ടയച്ചത്.
വിട്ടയച്ചതിന് പിന്നാലെ പൊലീസ് നടപടിയെ രൂക്ഷമായാണ് പിണറായി വിജയന്‍ വിമര്‍ശിച്ചത്. വളരെ വിചിത്രമായ രീതിയാണ് പൊലീസിന്റെ ഭാഗത്തു നിന്നുണ്ടായതെന്നും കസ്റ്റഡിയിലെടുത്ത് മൂന്നര മണിക്കൂര്‍ റോഡിലൂടെ ചുറ്റിച്ചെന്നും അദ്ദേഹം പറഞ്ഞു.
‘ഒരു പൊലീസ് സ്‌റ്റേഷനില്‍ കൊണ്ടുവരാനാണെങ്കില്‍ ഇത്ര സമയം എടുക്കണോ? എന്തിനാണ് മൂന്നര മണിക്കൂര്‍ സമയം റോഡിലൂടെ കറക്കിയതെന്നറിയില്ല. വളടെ വിചിത്രമായ അനുഭവമാണ് ഉണ്ടായത്. ഇതിനിടെ ഛത്രസാല്‍ സ്‌റ്റേഡിയത്തില്‍ 10 മിനിറ്റ് ചെലവഴിച്ചു. രാജ്യത്ത് ജനാധിപത്യവിരോധത്തിനെതിരായ വികാരം ശക്തിപ്പെട്ടു വരുകയാണ്. ഈ പ്രതിഷേധത്തില്‍ ഇത്തരത്തില്‍ പങ്കുവഹിക്കാന്‍ കഴിഞ്ഞതില്‍ അഭിമാനമുണ്ട്. തുടര്‍ന്നുള്ള ദിവസങ്ങളില്‍ പ്രക്ഷോപം കരുത്തോടെ വളര്‍ന്ന് വരുമെന്നാണ് പ്രതീക്ഷിക്കുന്നതെന്നും പിണറായി വിജയന്‍ പറഞ്ഞു.
by Midhun HP News | Oct 10, 2026 | Latest News, ദേശീയ വാർത്ത
ചെന്നൈ: ഐപിഎല്‍ 2027നു മുന്നോടിയായി ചെന്നൈ സൂപ്പര്‍ കിങ്സ് മുന്‍ ഇന്ത്യന്‍ പേസര്‍ സഹീര്‍ ഖാനെ മുഖ്യ പരിശീലകനായി നിയമിച്ചത് ശ്രദ്ധേയ നീക്കമായിരുന്നു. ദീര്‍ഘകാലം കോച്ചായിരുന്ന സ്റ്റീഫന്‍ ഫ്ലെമിങ് പരിശീലക സ്ഥാനം ഒഴിഞ്ഞതോടെയാണ് സഹീറിനെ ചെന്നൈ ടീമിലെത്തിച്ചത്. ഇപ്പോഴിതാ ദീര്‍ഘകാലം ടീമിനൊപ്പമുള്ള മറ്റൊരാള്‍ കൂടി ടീമിന്റെ പടിയിറങ്ങി.
ചെന്നൈ ബാറ്റിങ് പരിശീലകനായിരുന്ന ഓസീസ് ഇതിഹാസം മൈക്ക് ഹസിയാണ് ടീമിനോട് വിട പറഞ്ഞത്. കളിക്കാരനായും പിന്നീട് പരിശീലകനായും 15 വര്‍ഷത്തോളം സിഎസ്‌കെയ്‌ക്കൊപ്പമുണ്ടായിരുന്ന ആളാണ് മൈക്ക് ഹസി. ചെന്നൈ ടീമിനൊപ്പം കളിക്കാരനായി 2 ഐപിഎല്‍ കിരീടങ്ങള്‍ നേടിയിട്ടുള്ള ഹസി കോച്ചിങ് സംഘത്തിനൊപ്പം 3 കിരീട നേട്ടങ്ങളിലും പങ്കാളിയാണ്.
ഫ്ലെമിങ് സ്ഥാനമൊഴിഞ്ഞതിനു പിന്നാലെ ടീമിന്റെ ബൗളിങ് പരിശീലക സ്ഥാനത്തു നിന്നു എറിക്ക് സിമണ്‍സ് സ്ഥാനമൊഴിഞ്ഞിരുന്നു. പിന്നാലെയാണ് ഹസിയും പുറത്തു പോകുന്നത്. ഫീല്‍ഡിങ് കോച്ച് ജെയിംസ് ഫോസ്റ്റര്‍ നിലവില്‍ ടീമിലുണ്ടെങ്കിലും അദ്ദേഹവും ഉടന്‍ സ്ഥാനമൊഴിയുമെന്ന റിപ്പോര്‍ട്ടുകളും വരുന്നുണ്ട്.
എറിക്ക് സിമണ്‍സിനു പകരം മുന്‍ സിഎസ്‌കെ പേസറായ മോഹിത് ശര്‍മയാണ് പുതിയ ബൗളിങ് കോച്ച്. അതേസമയം ഹസിയുടെ പകരക്കാരനെ ടീം ഇതുവരെ തീരുമാനിച്ചിട്ടില്ല. ഇതിഹാസ താരവും മുന്‍ നായകനുമായ എംഎസ് ധോനിയുടെ നിര്‍ണായക ഇടപെടലാണ് സഹീറിന്റെ വരവിനു പിന്നിലെന്ന് നേരത്തെ റിപ്പോര്‍ട്ടുകള്‍ വന്നിരുന്നു. പുതിയ ബാറ്റിങ് കോച്ചിനെ സംബന്ധിച്ച് ധോനി ഇടപെടുമോ അല്ലെങ്കില്‍ ആരായിരിക്കും ഹസി പകരം ടീമിലെത്തുന്നത് എന്നറിയാനുള്ള ആകാംക്ഷയിലാണ് ആരാധകര്‍.
Recent Comments