by Midhun HP News | Feb 3, 2026 | Latest News, ദേശീയ വാർത്ത
മുംബൈ: ഇത്തവണത്തെ ലോകകപ്പിനുള്ള ഇന്ത്യൻ സ്ക്വാഡ് മികച്ചതാണെങ്കിലും 2024ലെ കിരീടം നേടിയ ടീമിന് ചെറിയ മുൻതൂക്കമുണ്ടെന്ന് മുൻ ഇന്ത്യൻ ക്യാപ്റ്റനും മുഖ്യ പരിശീലകനുമായിരുന്ന അനിൽ കുംബ്ലെ. രോഹിത്ത്- കോഹ്ലി സഖ്യമുള്ളത് അന്നത്തെ ടീമിന് വലിയ രീതിയിൽ ഗുണം ചെയ്തു. ഇരുവരുടെയും സാന്നിധ്യം ടീമിന്റെ സമ്മർദ്ദം കുറയ്ക്കാൻ സാധിച്ചുവെന്നും അനിൽ കുംബ്ലെ വ്യക്തമാക്കി.
“ വിരാട് കോഹ്ലിയെയും രോഹിത് ശർമയെയും പോലെയുള്ള എക്സ്പീരിയൻസുള്ള താരങ്ങൾ ടീമിൽ ഇല്ലാത്തത് തിരിച്ചടിയാണ്. പക്ഷേ, ഇപ്പോഴത്തെ ലോകകപ്പിനുള്ള ഇന്ത്യൻ ടീമിന് കൃത്യമായ ബാലൻസുണ്ട്. ബൗളിംഗ് ഓപ്ഷനുകൾ ശക്തമാണ്, ബാറ്റിങിലും ഒരുപടി മുന്നിലാണ് ടീം” അനിൽ കുംബ്ലെ പറഞ്ഞു.
നിരവധി വെല്ലുവിളികൾ സൂര്യകുമാർ യാദവിന്റെ നേതൃത്വത്തിലുള്ള ഇന്ത്യൻ ടീം നേരിടേണ്ടി വരും. 2024ലെ സാഹചര്യങ്ങൾ വളരെ വ്യത്യസ്തമായിരുന്നു. ആ ടീമിന് ഞാൻ 10 ശതമാനം മുൻതൂക്കം നൽകും. നിലവിലെ ടീമിന്റെ പ്രകടനവും അതിനടുത്ത് എത്തുമെന്നും അദ്ദേഹം പറഞ്ഞു.
കഴിഞ്ഞ ഫൈനലിൽ വിരാട് കോഹ്ലിയും അക്സർ പട്ടേലും സമ്മർദ്ദഘട്ടത്തിൽ കാഴ്ചവച്ച പ്രകടനം ഓർമ്മിപ്പിച്ച കുംബ്ലെ ഈ ടൂർണമെന്റിലും സമാനമായ അനുഭവം ഉണ്ടായേക്കാമെന്ന് മുന്നറിയിപ്പ് നൽകി. ആ സമയങ്ങളിൽ കളിക്കാർ അവരുടെ മുഴുവൻ കഴിവും പുറത്തെടുക്കണം.
ഇന്ത്യൻ ടീം ക്യാപ്റ്റൻ സൂര്യകുമാർ യാദവിന്റെ പങ്ക് ഈ ടൂർണമെന്റിൽ നിർണായകമാകുമെന്നും സമ്മർദ്ദഘട്ടങ്ങളിൽ തരണം ചെയ്യാൻ താരത്തിന് കഴിയും. അദ്ദേഹത്തിന്റെ പരിചയസമ്പത്തും നിർണായക ഘട്ടങ്ങളിൽ ടീമിനെ മുന്നോട്ട് നയിക്കാനുള്ള കഴിയും ലോകകപ്പിൽ ഇന്ത്യക്ക് ഗുണം ചെയ്യുമെന്നും അനിൽ കുംബ്ലെ വ്യക്തമാക്കി.
by Midhun HP News | Feb 3, 2026 | Latest News, ദേശീയ വാർത്ത
ഡല്ഹി: ഇന്ത്യ- യുഎസ് വ്യാപാര കരാര് നയതന്ത്ര വിജയമെന്ന് പ്രധാനമന്ത്രി നരേന്ദ്രമോദി. എന്ഡിഎ പാര്ലമെന്ററി പാര്ട്ടി യോഗത്തില് സംസാരിക്കുകയായിരുന്നു മോദി. ഇന്ത്യ ക്ഷമയോടെ കത്തിരുന്നു. അതിന്റെ ഫലം ലഭിച്ചുവെന്നും പ്രധാനമന്ത്രി യോഗത്തില് പറഞ്ഞു.
ഇന്ത്യയും അമേരിക്കയും തമ്മിലുള്ള ചരിത്രപ്രധാനമായ വ്യാപാര കരാര് നിരന്തരമായ ക്ഷമയുടെ ഫലമാണ്. താരിഫ് ചര്ച്ചകളെക്കുറിച്ചുള്ള മുന് വിമര്ശനങ്ങള് ഇപ്പോള് ഒരു നല്ല ഫലത്തിലേക്ക് എത്തിച്ചേര്ന്നു. വ്യാപാര കരാര് അനുകൂലമായ ഒരു സാമ്പത്തിക അന്തരീക്ഷം സൃഷ്ടിച്ചുവെന്നും മോദി പറഞ്ഞു.ആഗോള വ്യാപാര ചര്ച്ചകളോടുള്ള സര്ക്കാരിന്റെ സ്ഥിരതയുള്ളതും കണിശവുമായ സമീപനത്തെ കരാര് പ്രതിഫലിപ്പിക്കുന്നുവെന്നും മോദി അഭിപ്രായപ്പെട്ടു. ലോകക്രമം മാറിക്കൊണ്ടിരിക്കുന്നു, അതിന്റെ പാത ഇന്ത്യയിലേക്ക് കൂടുതല് കൂടുതല് ചായുകയാണ്. ഇന്ന് പല രാജ്യങ്ങളിലെയും വ്യാപാര സംഘര്ഷങ്ങള്ക്കിടയിലും ഇന്ത്യ നേട്ടമുണ്ടാക്കുന്നു. മോദി പറഞ്ഞു.
വ്യാപാരക്കരാറിൽ തീരുമാനമായതിനു പിന്നാലെ ചേർന്ന എൻഡിഎ പാർലമെൻ്ററി യോഗത്തിൽ നിറഞ്ഞ കരഘോഷത്തോടെയും അഭിനന്ദനങ്ങളോടെയുമാണ് പ്രധാനമന്ത്രി നരേന്ദ്ര മോദിയെ വരവേറ്റത്.
എല്ലാ പുരോഗതിക്കും പിന്നിലെ പ്രേരകശക്തി ആത്മവിശ്വാസമാണെന്ന് എന്ഡിഎ യോഗത്തിന് മുമ്പായി പ്രധാനമന്ത്രി എക്സില് കുറിച്ചിരുന്നു. ‘എല്ലാം സാധ്യമാകുന്ന ശക്തിയാണ് ആത്മവിശ്വാസം. വികസിത ഇന്ത്യ എന്ന സ്വപ്നം സാക്ഷാത്കരിക്കുന്നതിന് നാട്ടുകാരുടെ ഈ ശക്തി തന്നെ വളരെയധികം ഉപയോഗപ്രദമാകും.’ മോദി അഭിപ്രായപ്പെട്ടു.
by Midhun HP News | Feb 3, 2026 | Latest News, ദേശീയ വാർത്ത
ചെന്നൈ: സംഗീത സംവിധായകന് എസ്.പി വെങ്കിടേഷ് അന്തരിച്ചു. ഹൃദയാഘാതത്തെ തുടർന്നായിരുന്നു അന്ത്യം. ചെന്നൈയിലെ വീട്ടിലെ ശുചിമുറിയില് കുഴഞ്ഞു വീണ നിലയില് കണ്ടെത്തുകയായിരുന്നു. 70 വയസായിരുന്നു. എണ്പതുകളുകളിലും തൊണ്ണൂറുകളിലും മലയാളത്തില് നിരവധി ഹിറ്റുകളൊരുക്കിയ സംഗീത സംവിധായകനായിരുന്നു. 1985 ല് പുറത്തിറങ്ങഇയ ജനകീയ കോടതിയിലൂടെയാണ് മലയാളത്തിലെ കരിയര് ആരംഭിക്കുന്നത്.
മോഹന്ലാല് പ്രധാനവേഷത്തിലെത്തിയ രാജാവിന്റെ മകനിലൂടെ ശ്രദ്ധനേയനായി. തുടര്ന്ന് കിലുക്കം, ഇന്ദ്രജാലം, സ്പടികം, കൗരവ്വര്, ജോണി വാക്കര്, കിഴക്കന് പത്രോസ്, ഹിറ്റ്ലര് തുടങ്ങി നിരവധി ഹിറ്റ് സിനിമകള്ക്ക് സംഗീതമൊരുക്കിയിട്ടുണ്ട്.
by Midhun HP News | Feb 3, 2026 | Latest News, ദേശീയ വാർത്ത
ദുബൈ: ടി20 ലോകകപ്പില് ഇന്ത്യക്കെതിരെ കളിക്കില്ലെന്നു പാകിസ്ഥാന് സര്ക്കാര് പ്രഖ്യാപിച്ചെങ്കിലും പാക് ക്രിക്കറ്റ് ബോര്ഡ് അക്കാര്യം ഐസിസിയെ ഇപ്പോഴും അറിയിച്ചിട്ടില്ല. പാകിസ്ഥാനെതിരെ എന്ത് നടപടിയെന്ന കാര്യത്തില് ഐസിസിയും ഇതുവരെ ഒന്നും പറഞ്ഞിട്ടില്ല. കളി ഉപേക്ഷിച്ചാല് പാകിസ്ഥാനെ കാത്ത് പിഴയടക്കമുള്ള നടപടികള് ഉണ്ടാകുമെന്നു റിപ്പോര്ട്ടുകളുണ്ടെങ്കിലും ഇതിലൊന്നും വ്യക്തത ഇനിയുമായിട്ടില്ല. പാകിസ്ഥാനെതിരെ എന്ത് നടപടിയുണ്ടാകുമെന്ന കാര്യത്തില് ആകാംക്ഷ ഇപ്പോഴും നിനില്ക്കുന്നു.
ലോകകപ്പ് കളിക്കുമെന്നും എന്നാല് ഇന്ത്യക്കെതിരെ കളിക്കില്ലെന്നുമാണ് നിലവില് പാകിസ്ഥാന് എടുത്ത തീരുമാനം. ഇത്തരത്തില് ഒരു മത്സരം ബഹിഷ്കരിക്കാന് ഐസിസി നിയമം അനുവദിക്കുന്നുണ്ടോ?
ടൂര്ണമെന്റില് പങ്കെടുക്കുമ്പോള് തന്നെ മത്സരം ബഹിഷ്കരിക്കാനുള്ള സ്വാതന്ത്ര്യം ടീമുകള്ക്കുണ്ട്. ഇക്കാര്യത്തില് ഐസിസിക്ക് ഒന്നും ചെയ്യാന് സാധിക്കില്ല. എന്നാല് ചില നടപടികള് ടീമുകള്ക്കെതിരെ എടുക്കാന് സാധിക്കുന്ന തരത്തിലുള്ള നിയമങ്ങളും ഐസിസിക്കുണ്ട്.
വാക്കോവര്
ഒരു ടീം മത്സരം ബഹിഷ്കരിച്ചാല് എതിരാളികള്ക്ക് കളിക്കാതെ തന്നെ മുഴുവന് പോയിന്റും നല്കുന്നതാണ് ഒരു നടപടി. പാകിസ്ഥാന് കളിക്കാതിരുന്നാല് ഇന്ത്യക്ക് കളത്തിലിറങ്ങാതെ തന്നെ രണ്ട് പോയിന്റ് ഇതിലൂടെ ലഭിക്കും. ഇന്ത്യന് ക്യാപ്റ്റന് ടോസിനായി ഗ്രൗണ്ടിലേക്ക് വരണം. പാക് നായകന് ഗ്രൗണ്ടിലേക്ക് വന്നില്ല എങ്കില് മത്സരം ബഹിഷ്കരിച്ചതായി ഉറപ്പിക്കപ്പെടും. ഇതോടെ മാച്ച് റഫറിക്ക് മത്സരം റദ്ദാക്കിയതായി പ്രഖ്യാപിക്കാം. മത്സരം ഇന്ത്യ ജയിച്ചതായി കണക്കാക്കി രണ്ട് പോയിന്റ് ടീമിനു സമ്മാനിക്കും.
മാത്രമല്ല കളിക്കാത്ത ടീം 20 ഓവര് കളിച്ചിട്ടും പൂജ്യം റണ്സ് മാത്രമാണ് എടുത്തത് എന്നു റിപ്പോര്ട്ട് നല്കി അവരുടെ നെറ്റ് റണ്റേറ്റ് ഗണ്യമായി കുറയ്ക്കാനും മാച്ച് റഫറിക്ക് സാധിക്കും. അതോടെ മത്സരം ബഹിഷ്കരിക്കുന്ന ടീമിന്റെ നോക്കൗട്ട് സാധ്യതകളേയും ഇതു ബാധിക്കും. മറ്റ് മത്സരങ്ങള് ജയിച്ചാലും 20 ഓവറില് പൂജ്യം റണ്സെന്ന കണക്ക് ആ ടീമിനു തിരിച്ചടിയായി മാറും.
പിഴ
ഇന്ത്യക്കെതിരായ മത്സരം പാകിസ്ഥാന് ഉപേക്ഷിച്ചാല് അത് ലോകകപ്പിനെ മൊത്തത്തില് തന്നെ ബാധിക്കും. ക്രിക്കറ്റ്, മത്സരം മാത്രമല്ല. അതൊരു വിപണി മൂല്യമുള്ള വ്യവസായം കൂടിയായതിനാല് വരുമാനത്തെ കാര്യമായി തന്നെ ബാധിക്കും. പ്രത്യേകിച്ച് ഇന്ത്യ- പാകിസ്ഥാന് പോരാട്ടം പോലെ ഹൈ വോള്ട്ടേജ് മത്സരമാകുമ്പോള് പ്രത്യേകിച്ചും. മത്സരത്തിന്റെ സംപ്രേഷണ അവകാശം, പരസ്യ വരുമാനം അടക്കമുള്ള നിരവധി വിഷയങ്ങള് ഉള്ച്ചേര്ന്നതിനാല് പാകിസ്ഥാന് ക്രിക്കറ്റ് നേരിടാന് പോകുന്ന ഏറ്റവും വലിയ പ്രതിസന്ധിയും ഇതു തന്നെയാണ്.
മത്സരം ഉപേക്ഷിക്കുന്നതിലൂടെ ഐസിസിക്ക് ലഭിക്കേണ്ട വരുമാനത്തെ അതു ബാധിക്കും. പരസ്യം നല്കിയവരേയും സംപ്രേഷാവകാശം സ്വന്തമാക്കിയ കമ്പനികളേയും സാമ്പത്തികമായി ബാധിക്കുന്ന കാര്യം കൂടിയായി സംഭവം മാറും. ഈ നഷ്ടം പാക് ക്രിക്കറ്റ് ബോര്ഡിനോട് ആവശ്യപ്പെടാനുള്ള എല്ലാ അധികാരങ്ങളും ഐസിസിക്കുണ്ട്. മാത്രമല്ല പാക് ക്രിക്കറ്റ് ബോര്ഡിനു വാര്ഷികമായി ലഭിക്കുന്ന വരുമാനത്തിന്റെ 80 ശതമാനം വരെ തടഞ്ഞു വയ്ക്കാനുള്ള അധികാരവും ഐസിസിക്കുണ്ട്. ഇപ്പോള് തന്നെ സാമ്പത്തികമായി തകര്ന്നു നില്ക്കുന്ന പാക് ടീമിനെ സംബന്ധിച്ച് ഇത് വലിയ കുരുക്കായി മാറുന്ന അവസ്ഥയാണ് വരാന് പോകുന്നത്.
സര്ക്കാര് ഇടപെടല് അംഗീകരിക്കില്ല
നിലവില് പാകിസ്ഥാന് സര്ക്കാരാണ് ഇന്ത്യക്കെതിരെ കളിക്കില്ലെന്നു പറഞ്ഞത്. പാക് ക്രിക്കറ്റ് ബോര്ഡ് ഇക്കാര്യത്തില് മൗനം തുടരുകയാണ്. പാക് ക്രിക്കറ്റ് ബോര്ഡ് ബഹിഷ്കരണ കാര്യം പറയാത്തതിനാല് ഐസിസിയെ സംബന്ധിച്ച് മത്സരം നടക്കും എന്നു തന്നെയാണ്. കാരണം രാജ്യത്തെ ക്രിക്കറ്റ് ബോര്ഡുകളില് സര്ക്കാര് ഇടപെടല് ഐസിസി അനുവദിക്കുന്നില്ല. സ്വതന്ത്രമായി പ്രവര്ത്തിക്കുന്ന കൂട്ടായ്മയാണ് എല്ലാ രാജ്യങ്ങളിലേയും ക്രിക്കറ്റ് ബോര്ഡുകള്. അതിനാല് നിലവില് ഐസിസിയുടെ കണ്ണില് ഇന്ത്യ- പാക് പോരാട്ടം നടക്കുമെന്നു തന്നെയാണ്.
സര്ക്കാര് തീരുമാനങ്ങള് നടപ്പിലാക്കുന്നതിന്റെ പേരില് ഐസിസി ഉപരോധം അടക്കമുള്ള നടപടികളില് പാക് ക്രിക്കറ്റിനു സംരക്ഷണം നല്കണമെന്നു മുന് പിസിബി ചെയര്മാന് എഹ്സാന് മാനി വാദിച്ചിരുന്നു. എന്നാല് ഐസിസി ഇതംഗീകരിച്ചില്ല. മാത്രമല്ല ഇന്ത്യയില് കളിക്കില്ലെന്നു നേരത്തെ തന്നെ വ്യക്തമാക്കിയ സാഹചര്യത്തിലാണ് പാകിസ്ഥനു വേണ്ടി ശ്രീലങ്കയേയും ഐസിസി ലോകകപ്പ് വേദിയായി നിശ്ചയിച്ചത്. ആ വേദിയിലും ഇന്ത്യക്കെതിരെ കളിക്കില്ലെന്നു പറയുന്നത്, അതും സര്ക്കാര് ഇടപെട്ട് മത്സരം ബഹിഷികരിക്കുന്നത് ഐസിസി ഭരണഘടനയുടെ നേരിട്ടുള്ള ലംഘനമായും കണക്കാക്കും. അപ്പോള് ചില്ലര ബുദ്ധിമുട്ടുകളല്ല പാക് ക്രിക്കറ്റിനു മുകളില് വാളായി തൂങ്ങി നില്ക്കുന്നത് എന്നു ചുരുക്കം.
by Midhun HP News | Feb 2, 2026 | Latest News, ദേശീയ വാർത്ത
ഡല്ഹി: കേരളത്തിന് 3795 കോടി റെയില്വേ ബജറ്റ് വിഹിതം അനുവദിച്ചെന്ന് കേന്ദ്ര റെയില്വേമന്ത്രി അശ്വിനി വൈഷ്ണവ്. കേരളത്തിന് മികച്ച പരിഗണനയാണ് നല്കിയിട്ടുള്ളത്. മംഗലാപുരം- ഷൊര്ണൂര് മൂന്നും നാലും പാതകളുടെ ഡിപിആര് നടപടികള് പുരോഗമിക്കുന്നു. ഷൊര്ണൂര് കോയമ്പത്തൂര് മൂന്നാം നാലും പാതയുടെ ഫീല്ഡ് സര്വേ പൂര്ത്തിയായി. ഡിപിആര് നടപടികള് അന്തിമ ഘട്ടത്തിലാണെന്ന് കേന്ദ്ര റെയില്വേ മന്ത്രി പറഞ്ഞു.
ഷൊര്ണൂര്- എറണാകുളം മൂന്നാം പാതയുടെ ഫീല്ഡ് സര്വേ പൂര്ത്തിയായി. ഡിപിആര് അന്തിമ നടപടികളിലാണ്. എറണാകുളം- കായംകുളം മൂന്നാം പാത ( കോട്ടയം വഴി) ട്രാഫിക് സര്വേ പൂര്ത്തിയായി. കായംകുളം- തിരുവനന്തപുരം മൂന്നാം പാതയുടെ ട്രാഫിക് സര്വേ പൂര്ത്തിയായി അലൈന്മെന്റ് പൂര്ത്തിയായിട്ടുണ്ട്. ഡിപിആര് ഉടന് തയ്യാറാക്കും. തിരുവനന്തപുരം – നാഗര്കോവില് സര്വേ നടക്കുകയാണ്.
തുറവൂര്- അമ്പലപ്പുഴ പാത ഇരട്ടിപ്പിക്കലില് സര്വേ പൂര്ത്തിയായി. ഡിപിആര് തയ്യാറാക്കിക്കൊണ്ടിരിക്കുകയാണ്. ഏറെ സുപ്രധാനമായ ശബരിപാതയ്ക്ക് എല്ലാ നടപടികളും പൂര്ത്തിയായി. അങ്കമാലി ശബരിപാതയ്ക്ക് സ്ഥലമേറ്റെടുക്കല് തുടങ്ങി. ഗുരുവായൂര്- തിരുനാവായ പാതയുടെ നടപടികള് ആരംഭിച്ചു. സ്ഥലം ഏറ്റെടുക്കലില് സംസ്ഥാന സര്ക്കാരിന്റെ പിന്തുണ തേടിയിട്ടുണ്ട്. പദ്ധതിക്കായി 1975 കോടി രൂപ വകയിരുത്തിയിട്ടുണ്ട്.റെയില്വേ മേല്പ്പാലങ്ങള്, അടിപ്പാതകള് തുടങ്ങിയവയുടെ നിര്മ്മാണവുമായി ബന്ധപ്പെട്ട് റെയില്വേ നടപടി ആരംഭിച്ചിട്ടുണ്ട്. 105 റെയില്വേ മേല്പ്പാലങ്ങളുടെ നിര്മ്മാണത്തിന് സംസ്ഥാന സര്ക്കാരുകളുടെ പിന്തുണയും തേടിയിട്ടുണ്ട്. സ്ഥലമേറ്റെടുക്കലില് സംസ്ഥാന സര്ക്കാരിന്റെ സഹകരണവും വേണം.
മെട്രോ മാൻ ഇ ശ്രീധരന്റെ കണ്ടിരുന്നുവെന്ന് കേന്ദ്രമന്ത്രി പറഞ്ഞു.. കേരളത്തിലെ റെയില്വേ വികസനങ്ങളെപ്പറ്റി ചര്ച്ച ചെയ്തിരുന്നു. അദ്ദേഹത്തിന്റെ പ്രവര്ത്തനങ്ങള്ക്ക് പിന്തുണ നല്കുന്നുവെന്നും കേന്ദ്രമന്ത്രി പറഞ്ഞു. എന്നാല് ശ്രീധരന്റെ അതിവേഗ റെയില്പാത സംബന്ധിച്ച ചോദ്യങ്ങളില് കേന്ദ്ര റെയില്വേ മന്ത്രി അശ്വിനി വൈഷ്ണവ് വ്യക്തമായ മറുപടി നല്കിയില്ല.
by Midhun HP News | Feb 2, 2026 | Latest News, ദേശീയ വാർത്ത
ഡല്ഹി: ചൈന ലഡാക്കില് ഇന്ത്യന് ഭൂമി കയ്യേറിയെന്ന് ലോക്സഭയില് പ്രതിപക്ഷ നേതാവ് രാഹുല് ഗാന്ധി. മുന് കരസേനാ മേധാവി ജനറല് എം എം നരവനെയുടെ പുറത്തിറങ്ങാത്ത പുസ്തകത്തിലെ ഉള്ളടക്കമാണ് രാഹുല് ഗാന്ധി സഭയില് ഉന്നയിച്ചത്. ചൈന അതിര്ത്തിയില് ഇന്ത്യ ഉറച്ച നിലപാടെടുത്തില്ലെന്നും രാഹുല് പറഞ്ഞു. പുസ്തകങ്ങളിലെ പരാമര്ശത്തോടെ ലോക്സഭയില് ഭരണ പ്രതിപക്ഷം രൂക്ഷമായതോടെ സഭ തല്ക്കാലത്തേക്ക് നിര്ത്തി.
രാഹുല്ഗാന്ധി സംസാരിക്കുമ്പോള്, പ്രകാശിപ്പിക്കാത്ത പുസ്തകത്തിലെ കാര്യങ്ങള് സഭയില് ഉന്നയിക്കുന്നത് ചട്ടവിരുദ്ധമാണെന്ന് പ്രതിരോധ മന്ത്രി രാജ്നാഥ് സിങ് ചൂണ്ടിക്കാട്ടി. എന്നാല് താന് ഒരു മാഗസിനില് വന്ന റിപ്പോര്ട്ടാണ് വായിക്കുന്നതെന്ന് രാഹുല്ഗാന്ധി പറഞ്ഞു. പുറത്തിറങ്ങാത്ത പുസ്തകം വായിക്കാനാകില്ലെന്ന് സ്പീക്കര് ഓം ബിര്ല സൂചിപ്പിച്ചു. സഭാചട്ടം പാലിക്കണമെന്നും സ്പീക്കര് നിര്ദേശിച്ചു.
എന്നാല് വഴങ്ങാതെ രാഹുല് പ്രസംഗം തുടരാന് ശ്രമിച്ചു. ഇതേത്തുടര്ന്ന് പ്രതിരോധമന്ത്രി രാജ്നാഥ് സിങ്ങും രാഹുല് ഗാന്ധിയുമായി തര്ക്കമായി. പുസ്തകം പ്രസിദ്ധീകരിച്ചോ എന്ന് രാഹുല് വ്യക്തമാക്കണമെന്ന് കേന്ദ്ര ആഭ്യന്തരമന്ത്രി അമിത് ഷാ ചോദിച്ചു. പുറത്തിറങ്ങാത്ത പുസ്തകത്തിലെ പരാമര്ശങ്ങള് എങ്ങനെ ശരിയാകും. മാഗസിനുകള്ക്ക് എന്തും പറയാമെന്നും അമിത് ഷാ പറഞ്ഞു. ജനറല് നരവനെയെ പുസ്തകം ഇറക്കാന് കേന്ദ്രസര്ക്കാര് അനുവദിച്ചില്ലെന്ന് രാഹുല് ഗാന്ധി ആരോപിച്ചു.
അതിനിടെ, ബിജെപി എംപി തേജസ്വി സൂര്യ കോൺഗ്രസിന്റെ രാജ്യസ്നേഹത്തെയും സംസ്കാരത്തെയും ചോദ്യം ചെയ്തതോടെ തർക്കം രൂക്ഷമായി. ചൈനയുമായി ബന്ധപ്പെട്ട വിഷയം വളരെ ഗൗരവമേറിയതാണെന്നും, ലോക്സഭ പ്രതിപക്ഷ നേതാവിനെ സംസാരിക്കാൻ അനുവദിക്കമെന്നും സമാജ് വാദി പാർട്ടി നേതാവ് അഖിലേഷ് യാദവ് ആവശ്യപ്പെട്ടു. രാഹുൽ ഗാന്ധിയുടെ മൈക്ക് പലതവണ ഓഫാക്കിയത് സഭയിൽ വൻ പ്രതിഷേധത്തിന് കാരണമായി. ബഹളത്തെത്തുടർന്ന് ലോക്സഭ മൂന്നു മണി വരെ നിർത്തിവച്ചു.
Recent Comments