by Midhun HP News | Oct 10, 2026 | Latest News, ദേശീയ വാർത്ത
ഡല്‍ഹി: ഫ്‌ലൈദുബൈ യാത്രാവിമാനം തട്ടിയെടുക്കാന്‍ ശ്രമിച്ച സംഭവത്തില്‍ എഫ്‌ഐആര്‍ റജിസ്റ്റര്‍ ചെയ്ത് ദേശീയ അന്വേഷണ ഏജന്‍സി (എന്‍ഐഎ). ഒമാനി പൗരനായ സഹപൈലറ്റ് ഇന്ത്യന്‍ ക്യാപ്റ്റന്‍ സ്മിത് മച്ചാറിനെ കുത്തിപ്പരിക്കേല്‍പ്പിച്ച സംഭവത്തിലാണ് എംഐഎ നടപടി. സംഭവത്തില്‍ വിശദമായ അന്വേഷണം നടത്താന്‍ കേന്ദ്ര സര്‍ക്കാര്‍ എന്‍ഐഎയോട് നിര്‍ദേശിച്ചതായും എഫ്‌ഐആര്‍ പറയുന്നു.
വിമാനം റാഞ്ചാനോ തകര്‍ക്കാനോ ഉള്ള ശ്രമത്തിനിടെയാണ് സഹപൈലറ്റ് ഇന്ത്യന്‍ ക്യാപ്റ്റനെ കുത്തിയതെന്ന് യാത്രക്കാര്‍ റിപ്പോര്‍ട്ട് ചെയ്തതായി എഫ്ഐആറില്‍ പറയുന്നു. ആക്രമണത്തില്‍ സ്മിത് മച്ചാറിന്റെ തലയിലും കൈകളിലും ആഴത്തിലുള്ള മുറിവുകള്‍ ഏറ്റിരുന്നു.
എന്‍ഐഎ നിയമത്തിലെ 6ാം വകുപ്പിന്റെ ഉപവകുപ്പുകളായ (5), (8), 8ാം വകുപ്പ് എന്നിവ പ്രകാരം കേസ് റജിസ്റ്റര്‍ ചെയ്ത് അന്വേഷണം ആരംഭിക്കാനാണ് കേന്ദ്രം നിര്‍ദേശിച്ചിരിക്കുന്നത്. ഇന്ത്യന്‍ പൈലറ്റിന് നേരെ ആക്രമണം ഉണ്ടായതും വിമാനം തട്ടിയെടുക്കാന്‍ ശ്രമിച്ചതും കണക്കിലെടുത്താണ് എന്‍ഐഎയെ അന്വേഷണം ഏല്‍പിച്ചത്.
സെപ്റ്റംബര്‍ 30-ന് 174 യാത്രക്കാരും 6 ജീവനക്കാരുമായി ദുബൈായില്‍നിന്ന് ഇസ്രയേലിലെ ടെല്‍ അവീവിലേക്ക് പോയ വിമാനത്തിലാണ് അട്ടിമറി ശ്രമം നടന്നത്. സഹപൈലറ്റായ ഒമാന്‍ സ്വദേശി ഹമാം അല്‍ ഹമാമിയുടെ ആക്രമണത്തില്‍ ഇന്ത്യക്കാരനായ ക്യാപ്റ്റന്‍ സ്മിത് മച്ഛറിന്റെ തലയിലും കൈകളിലും ആഴത്തില്‍ മുറിവേറ്റിരുന്നു. യാത്രക്കാരും വിമാന ജീവനക്കാരും ചേര്‍ന്ന് സഹപൈലറ്റിനെ ബലപ്രയോഗത്തിലൂടെ കീഴടക്കി. തുടര്‍ന്ന് വിമാനത്തിലുണ്ടായിരുന്ന മറ്റ് പൈലറ്റുമാര്‍ വിമാനത്തിന്റെ നിയന്ത്രണം ഏറ്റെടുത്ത് സൗദിയിലെ തബൂക്കിലുള്ള പ്രിന്‍സ് സുല്‍ത്താന്‍ ബിന്‍ അബ്ദുല്‍ അസീസ് വിമാനത്താവളത്തില്‍ സുരക്ഷിതമായി ഇറക്കി.
by Midhun HP News | Oct 10, 2026 | Latest News, ദേശീയ വാർത്ത
ഡല്‍ഹി: മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജി ആവശ്യപ്പെട്ട് ഡല്‍ഹി ജന്തര്‍മന്തര്‍ പ്രതിഷേധത്തിന് നേരെ പൊലീസ് രാജ്. സമരത്തിന് ഐക്യദാര്‍ഢ്യം പ്രഖ്യാപിച്ചെത്തിയ സിപിഎം നേതാക്കളായ പിണറായി വിജയന്‍, എംഎ ബേബി ഉള്‍പ്പടെയുള്ളവരെയും പ്രതിഷേധത്തിന് എത്തിയ സിജെപി നേതാക്കളായ അഭിജീത്ത് ദിപ്കെ, അശുതോഷ് റാങ്ക, സൗരവ് ദാസ് എന്നിവരെ വിമാനത്തില്‍ വച്ചും കസ്റ്റഡിയിലെടുത്തു. എസ്എഫ്‌ഐ – ഡിവൈഎഫ്‌ഐ നടത്തിയ സമരത്തിനുനേരെ പൊലീസ് ലാത്തിച്ചാര്‍ജ് നടത്തി. മുതിര്‍ന്ന മാധ്യമപ്രവര്‍ത്തകരെയും പൊലീസ് കസ്റ്റഡിയിലെടുത്തു.
സിജെപി സമരത്തിന്റെ ഭാഗമായി ഡല്‍ഹി പൊലീസ് ആദ്യം കസ്റ്റഡിയിലെടുത്തത്. പ്രമുഖ യൂട്യൂബറും ഇന്‍ഫ്‌ളുവന്‍സറുമായ ധ്രുവ് റാഠിയെ ഗുരുഗ്രാമിലെ വസതിയില്‍നിന്ന് ഡല്‍ഹി പൊലീസ് രാവിലെ ഏഴേമുക്കാലോടെയാണ് കസ്റ്റഡിയിലെടുത്തത്. രാവിലെ ധ്രുവ് റാഠിയുടെ അമ്മ വാതില്‍ തുറന്നതോടെ പോലീസ് അകത്തുകയറി റാഠിയെ കസ്റ്റഡിയിലെടുക്കുകയായിരുന്നു. അര്‍ധരാത്രിയില്‍ അന്‍പതോളം വരുന്ന പൊലീസ് സംഘം അദ്ദേഹത്തിന്റെ വീടിനുമുന്നില്‍ നിലയുറപ്പിച്ചിരുന്നു.
സിജെപി സമരത്തിന് പിന്തുണ പ്രഖ്യാപിച്ച് കേരള ഹൗസിന് മുന്നില്‍ മാര്‍ച്ചിനൊരുങ്ങുന്നതിനിടെ സിപിഎം ജനറല്‍ സെക്രട്ടറി എംഎ ബേബി, എം വി ഗോവിന്ദന്‍, ബൃന്ദ കെകെ ശൈലജ, പികെ ശ്രീമതി, ശിവദാസന്‍ എംപി, പി രാജീവ്, പി കെ ശ്രീമതി എന്നിവരെ പൊലീസ് കസ്റ്റഡിയിലെടുത്തു. പി കെ ശ്രീമതി, എം എ ബേബി എന്നിവരെ വലിച്ചിഴച്ചാണ് പൊലീസ് കസ്റ്റഡിയിലെടുത്തത്. പിടിവലിയില്‍ താഴെ വീണ പികെ ശ്രീമതിയെ വലിച്ചെടുത്ത് പൊലീസ് വാഹനത്തില്‍ കയറ്റുകയായിരുന്നു. മുതിര്‍ന്ന നേതാക്കളെ വലിച്ചിഴച്ച സാഹചര്യത്തില്‍ പിണറായി വിജയന്റെ നേതൃത്വത്തില്‍ ജോണ്‍ ബ്രിട്ടാസ്, കെ എന്‍ ബാലഗോപാല്‍ എന്നിവര്‍ ജന്തര്‍ മന്തറിലേക്ക് നടന്നുനീങ്ങി. കുറച്ചുദൂരം നടക്കുന്നതിനിടെ മൂവരെയും പൊലീസ് കസ്റ്റഡിയിലെടുത്തു.
പ്രതിഷേധത്തിനായി ഡല്‍ഹിയിലെത്തിയ കോക്രോച്ച് ജനതാ പാര്‍ട്ടി നേതാക്കളായ അഭിജീത്ത് ദിപ്കെ, അശുതോഷ് റാംക, സൗരവ് ദാസ് എന്നിവരെ വിമാനത്തില്‍ വച്ചാണ് ഡല്‍ഹി പൊലീസ് കസ്റ്റഡിയിലെടുത്തത്. വിമാനം തലസ്ഥാനത്തെത്തിയതിന് പിന്നാലെയായിരുന്നു പൊലീസ് നടപടി.
‘അറസ്റ്റ് വരിക്കാന്‍ തന്നെയാണ് ഞാന്‍ വന്നത്. എനിക്ക് നിങ്ങളെ ഭയമില്ല’ കസ്റ്റഡിയിലെടുക്കുന്നതിന് മുന്‍പായി ദീപ്കെ പറഞ്ഞു. നേതാക്കളെ കസ്റ്റഡിയിലെടുത്തതിന് പിന്നാലെ പൊലീസ് നടപടിയെ അപലപിച്ച് സിജെപി രംഗത്തെത്തി. തങ്ങളുടെ നേതാക്കളെ തടയാനുള്ള പൊലീസിന്റെ ആസൂത്രിത നീക്കമാണ് നടന്നതെന്ന് സിജെപി പ്രസ്താവനയില്‍ അറിയിച്ചു. നടന്നത് അവകാശ ലംഘനമാണെന്നും നേതാക്കളെ ഉടന്‍ വിട്ടയക്കണമെന്നും പാര്‍ട്ടി പ്രസ്താവനയില്‍ അറിയിച്ചു.
ആംആദ്മി നേതാക്കളായ അരവിന്ദ് കെജരിവാള്‍, മനീഷ് സിസോദിയ തുടങ്ങി മുതിര്‍ന്ന നേതാക്കളെയും ഡല്‍ഹി പൊലീസ് കസ്റ്റഡിയിലെടുത്തു. വീട്ടില്‍ നിന്ന് ഡല്‍ഹി പൊലീസ് കസ്റ്റഡിയിലെടുക്കുകയായിരുന്നു. സിജെപി സമരത്തില്‍ കുടുംബസമേതം പങ്കെടുക്കുമെന്ന് കെജരിവാള്‍ പറഞ്ഞിരുന്നു. അതിന് പിന്നാലെ അദ്ദേഹത്തിന്റെ വീടിന് സമീപം പൊലീസ് കാവല്‍ ഏര്‍പ്പെടുത്തിയിരുന്നു. സമരത്തിന് പിന്തുണ പ്രഖ്യാപിച്ച് ആംആദ്മി പാര്‍ട്ടി പ്രവര്‍ത്തകര്‍ പഞ്ചാബില്‍ പ്രതിഷേധം നടത്തി. മഹാത്മാഗാന്ധിയുടെ പ്രപൗത്രനും ആക്ടിവിസ്റ്റുമായ തുഷാര്‍ ഗാന്ധിയെ മുംബൈയില്‍ അറസ്റ്റ് ചെയ്തു. മുംബൈയിലെ ഓഗസ്റ്റ് ക്രാന്തി മൈതാനില്‍ സിജെപിയുടെ നേതൃത്വത്തില്‍ നടത്തുന്ന പ്രക്ഷോഭത്തില്‍ പങ്കെടുക്കാനാരിക്കേയാണ് അറസ്റ്റ്.
ഡല്‍ഹിയില്‍ ജന്തര്‍ മന്തറിലേക്ക് പ്രതിഷേധിക്കാനെത്തിയ എസ്എഫ്‌ഐ ഡിവൈഎഫ്‌ഐ പ്രവര്‍ത്തകര്‍ക്ക് നേരെ പൊലീസ് ലാത്തിച്ചാര്‍ജ് നടത്തി. എകെജി ഭവനില്‍നിന്ന് എ.എ.റഹീമിന്റെ നേതൃത്വത്തില്‍ മുന്നൂറോളം വരുന്ന ഡിവൈഎഫ്‌ഐ പ്രവര്‍ത്തകരുടെ സംഘം അപ്രതീക്ഷിതമായി മാര്‍ച്ച് നടത്തുകയായിരുന്നു. കൂടുതല്‍ പൊലീസ് എത്തി അടുത്ത പോയിന്റില്‍വച്ച് എല്ലാവരെയും കസ്റ്റഡിയിലെടുത്തു. ആറ് ബസുകളിലായാണ് പ്രവര്‍ത്തകരെ കസ്റ്റഡിയിലെടുത്തു നീക്കിയത്.
ഇരുപത്തിയ്യായിരം സുരക്ഷാ ഉദ്യോഗസ്ഥരെയാണ് ജന്തര്‍ മന്തറില്‍ വിന്യസിച്ചിട്ടുള്ളത്. മുഖ്യ തെരഞ്ഞെടുപ്പ് കമ്മിഷണര്‍ ഗ്യാനേഷ് കുമാറിന്റെ രാജിയാവശ്യപ്പെട്ട് ‘സിജെപി’ നടത്തുന്ന സമരം രാവിലെ ആരംഭിക്കും. രാവിലെ 10 മണിയോടെ ജന്തര്‍ മന്തറിലെത്തണമെന്നാണു പ്രവര്‍ത്തകര്‍ക്ക് സിജെപി നല്‍കിയിട്ടുള്ള നിര്‍ദേശം. നീറ്റ് ചോദ്യപ്പേപ്പര്‍ ചോര്‍ച്ച വിഷയത്തില്‍ ധര്‍മേന്ദ്ര പ്രധാനെ കേന്ദ്രമന്ത്രി സ്ഥാനത്തുനിന്നു താഴെയിറക്കിയ ആത്മവിശ്വാസത്തിലാണ് സിജെപി രണ്ടാം സമരത്തിനെത്തുന്നത്.
അതേസമയം, പ്രതിഷേധത്തിന് അനുമതി നല്‍കിയിട്ടില്ലെന്ന് ഡല്‍ഹി പൊലീസ് വ്യക്തമാക്കി. മുന്‍കരുതലിന്റെ ഭാഗമായി ഡല്‍ഹിയിലെ രാജീവ് ചൗക്ക്, ന്യൂഡല്‍ഹി, സെന്‍ട്രല്‍ സെക്രട്ടേറിയറ്റ്, പട്ടേല്‍ ചൗക്ക്, കശ്മീരി ഗേറ്റ് ഉള്‍പ്പെടെയുള്ള 45 മെട്രോ സ്റ്റേഷനുകള്‍ അടച്ചു. ലോക്കല്‍ ട്രെയിനുകളും മറ്റ് സംസ്ഥാനങ്ങളിലേക്കുള്ള 250 ട്രെയിനുകളും റദ്ദാക്കിയിട്ടുണ്ട്. ജന്‍പഥ്കര്‍ത്തവ്യ പഥിന് 4 കിലോമീറ്റര്‍ ചുറ്റളവില്‍ ഇന്റര്‍നെറ്റ് നിരോധിച്ചിട്ടുണ്ട്.
by Midhun HP News | Oct 10, 2026 | Latest News, ദേശീയ വാർത്ത
ന്യൂയോര്‍ക്ക്: ഇടക്കാല തെരഞ്ഞെടുപ്പിന് മുന്നോടിയായി എണ്ണവില കുറയ്ക്കുന്നതിനായി റഷ്യയില്‍ നിന്ന് എണ്ണ വാങ്ങുന്നതിന് കരാറിലെത്തി അമേരിക്ക. നിലവില്‍ റഷ്യയ്‌ക്കെതിരായ ഉപരോധങ്ങളില്‍ ഇളവ് വരുത്തിയാണ് റഷ്യയില്‍ നിന്ന് ഡീസല്‍ വാങ്ങാന്‍ അമേരിക്ക നടപടി സ്വീകരിച്ചത്. ഡീസല്‍ വാങ്ങുന്നതിന് റഷ്യയുമായി കരാറിലെത്തിയതായി അമേരിക്ക പ്രസിഡന്റ് ഡോണള്‍ഡ് ട്രംപ് അറിയിച്ചു.
2022ല്‍ അയല്‍രാജ്യമായി യുക്രൈനില്‍ നടത്തിയ അധിനിവേശത്തെ തുടര്‍ന്നാണ് റഷ്യയ്ക്ക് മേല്‍ അമേരിക്കയും സഖ്യകക്ഷികളും നിരവധി ഉപരോധങ്ങള്‍ ഏര്‍പ്പെടുത്തിയത്. എന്നാല്‍ ഡീസല്‍ വാങ്ങാന്‍ റഷ്യയുമായി കരാറില്‍ എത്തിയ അമേരിക്കന്‍ നടപടി അനുചിതമെന്ന് യുക്രൈന്‍ പ്രസിഡന്റ് സെലെന്‍സ്‌കി വിമര്‍ശിച്ചു. അമേരിക്കയില്‍ ജീവിതച്ചെലവ് ഉയരുന്നതില്‍ വോട്ടര്‍മാര്‍ക്കിടയില്‍ അതൃപ്തി നിലനില്‍ക്കുകയാണ്. ആഴ്ചകള്‍ക്ക് ശേഷം നടക്കുന്ന അമേരിക്കയിലെ ഇടക്കാല തെരഞ്ഞെടുപ്പില്‍ വോട്ടര്‍മാര്‍ക്കിടയിലെ അതൃപ്തി കോണ്‍ഗ്രസിലെ റിപബ്ലിക്കന്‍ പാര്‍ട്ടിയുടെ ആധിപത്യം നഷ്ടപ്പെടാന്‍ ഇടയാക്കുമോ എന്ന ഭയമാണ് ഈ കരാറിന് പിന്നിലെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.
ഇറാനെതിരെയുള്ള അമേരിക്കന്‍ ആക്രമണങ്ങളെ തുടര്‍ന്ന് ഹോര്‍മുസ് കടലിടുക്ക് വഴിയുള്ള എണ്ണവിതരണം സാധാരണ നിലയിലായിട്ടില്ല. ഇതുമൂലം ഫെബ്രുവരി അവസാനം മുതല്‍ അമേരിക്കയില്‍ പെട്രോള്‍, ഡീസല്‍ വില കുത്തനെ ഉയരുകയാണ്. റഷ്യ ഉടന്‍ തന്നെ മൂന്ന് ലക്ഷം ടണിലധികം ഡീസല്‍ അമേരിക്കയ്ക്ക് കൈമാറുമെന്ന് ട്രംപ് സോഷ്യല്‍മീഡിയയില്‍ കുറിച്ചു. നവംബറില്‍ അഞ്ചുലക്ഷം ടണും തുടര്‍ന്ന് 10 ലക്ഷം ടണും റഷ്യ വിതരണം ചെയ്യും. ഭാവിയില്‍ കൂടുതല്‍ അളവില്‍ അമേരിക്കയിലേക്ക് റഷ്യ എണ്ണ കൈമാറുമെന്നും ട്രംപ് കൂട്ടിച്ചേര്‍ത്തു. ‘ഇത് തീര്‍ത്തും സത്യസന്ധമല്ല, നമ്മുടെ പങ്കാളികള്‍ക്ക് ഒട്ടും ചേര്‍ന്നതല്ല, എന്റെ കാഴ്ചപ്പാടില്‍ ഇതൊരു ദുര്‍ബലമായ തീരുമാനമാണ്’- സെലെന്‍സ്‌കി മാധ്യമപ്രവര്‍ത്തകരോട് പറഞ്ഞു.
ശൈത്യകാലത്തിന് മുന്‍പ് റഷ്യയുമായുള്ള യുദ്ധം ലഘൂകരിക്കാനും അവസാനിപ്പിക്കാനുമുള്ള സാധ്യതകളെ കുറിച്ച് ഇരുപക്ഷം ചര്‍ച്ചകള്‍ നടത്തിയതായി യുഎസ് പ്രതിനിധി സ്റ്റീവ് വിറ്റ്‌കോഫ് പറഞ്ഞു.
by Midhun HP News | Oct 10, 2026 | Latest News, ദേശീയ വാർത്ത
ഡല്‍ഹി: ട്രെയിനുകളിലും റെയില്‍വേ പരിസരങ്ങളിലും ഉച്ചത്തില്‍ പാട്ടു കേള്‍ക്കുന്നവര്‍ക്കെതിരെ നടപടി സ്വീകരിക്കുമെന്ന മുന്നറിയിപ്പുമായി ഇന്ത്യന്‍ റെയില്‍വേ. മൊബൈല്‍ ഫോണില്‍ സ്പീക്കര്‍ മോഡില്‍ ഓഡിയോയോ വിഡിയോയോ പ്ലേ ചെയ്ത് മറ്റുള്ളവര്‍ക്ക് ബുദ്ധിമുട്ട് ഉണ്ടാക്കുന്ന യാത്രക്കാര്‍ക്കെതിരെയാണ് നടപടി സ്വീകരിക്കുക. സഹയാത്രികര്‍ക്ക് സുഖകരമായ യാത്ര ഉറപ്പാക്കാന്‍ മൊബൈല്‍ ഫോണുകള്‍ ഉത്തരവാദിത്തത്തോടെ ഉപയോഗിക്കണമെന്നും ഇന്ത്യന്‍ റെയില്‍വേ അഭ്യര്‍ഥിച്ചു.
ഇയര്‍ഫോണുകള്‍ ഉപയോഗിക്കാനും ഫോണ്‍ സംഭാഷണങ്ങള്‍ കുറഞ്ഞ ശബ്ദത്തില്‍ കേള്‍ക്കാനും റെയില്‍വേ യാത്രക്കാരോട് ആവശ്യപ്പെട്ടു. യാത്രയ്ക്കിടെ മൊബൈല്‍ ഫോണുകളോ മറ്റു ഉപകരണങ്ങളോ ഉപയോഗിച്ച് സംഗീതമോ വിഡിയോയോ പ്ലേ ചെയ്യുന്നത് മൂലം സഹയാത്രികര്‍ക്ക് ഉണ്ടാകുന്ന ബുദ്ധിമുട്ടുകള്‍ പരിഹരിക്കാന്‍ ലക്ഷ്യമിട്ടാണ് നടപടി. ഉച്ചത്തിലുള്ളതും ദീര്‍ഘനേരം നീണ്ടുനില്‍ക്കുന്നതുമായി ഫോണ്‍ സംഭാഷണങ്ങളും റിങ്‌ടോണുകളും മറ്റുള്ളവര്‍ക്ക് ബുദ്ധിമുട്ട് ഉണ്ടാക്കിയേക്കാം. പ്രത്യേകിച്ച് എസി കോച്ചുകള്‍ പോലുള്ള ക്ലോസ്ഡ് സ്ഥലങ്ങളില്‍ യാത്രക്കാരെ അലോസരപ്പെടുത്തിയേക്കാമെന്നും ഇന്ത്യന്‍ റെയില്‍വേ വ്യക്തമാക്കി.
ജന്‍ വിശ്വാസ് (ഭേദഗതി) നിയമം 2026 അനുസരിച്ച് ശല്യം ഉണ്ടാക്കുന്ന തരത്തിലുള്ള പെരുമാറ്റത്തിന് ആയിരം രൂപ പിഴ, കൂടാതെ റെയില്‍വേയില്‍ നിന്ന് പുറത്താക്കല്‍, പാസ് അല്ലെങ്കില്‍ ടിക്കറ്റ് കണ്ടുകെട്ടല്‍ എന്നി നടപടികള്‍ നേരിടേണ്ടി വരും. ഉച്ചത്തില്‍ വെയ്ക്കുന്നത് നിര്‍ത്താന്‍ റെയില്‍വേ ഉദ്യോഗസ്ഥന്‍ ആവശ്യപ്പെട്ടിട്ടും നിയമലംഘനം തുടര്‍ന്നാല്‍ ആറുമാസം വരെ തടവോ 5000 രൂപ പിഴയോ അല്ലെങ്കില്‍ ഇവ രണ്ടും കൂടിയോ ശിക്ഷയായി ലഭിക്കുമെന്നും റെയില്‍വേ മുന്നറിയിപ്പ് നല്‍കി.
by Midhun HP News | Oct 10, 2026 | Latest News, ദേശീയ വാർത്ത
സി ജെ പി നേതാവ് അഭിജിത് ദീപ്കെയെ ഡൽഹി പോലീസ് കസ്റ്റഡിയിൽ എടുത്തു. പോലീസ് അഭിജിത് എത്തിയ വിമാനത്തിനുള്ളിൽ കയറിയാണ് കസ്റ്റഡിയിൽ എടുത്തത്.
അഭിജീത് ദിപ്കെയും സംഘവും സഞ്ചരിച്ചിരുന്ന എയർ ഇന്ത്യ വിമാനം ഡൽഹിയിലെ ഐജിഐ വിമാനത്താവളത്തിൽ ഇറങ്ങി മിനിറ്റുകൾക്കുള്ളിലാണ് നാടകീയ രംഗങ്ങൾ അരങ്ങേറിയത്. ഡൽഹി പോലീസ് ഉദ്യോഗസ്ഥർ വിമാനത്തിനുള്ളിൽ പ്രവേശിച്ച് സംഘത്തെ സമീപിക്കുകയായിരുന്നു.
വിമാനത്താവളത്തിലെത്തുന്നതിന് മുൻപുതന്നെ അറസ്റ്റിന് തയ്യാറാണെന്ന് വ്യക്തമാക്കിയിരുന്ന ദിപ്കെ, പോലീസ് ഉദ്യോഗസ്ഥർ അടുത്തേക്ക് വന്നപ്പോൾ ഉറച്ച നിലപാടോടെ തന്നെ നിലകൊണ്ടു. “ഞാൻ അറസ്റ്റിന് തയ്യാറായിരുന്നു. എനിക്ക് ആരെയും ഭയമില്ല” – അദ്ദേഹം പറഞ്ഞു.
by Midhun HP News | Oct 10, 2026 | Latest News, ദേശീയ വാർത്ത
കൊച്ചി: തന്റെ വീട്ടിലെ കാലിത്തൊഴുത്തില്‍ ശ്വാസം കിട്ടാതെ കിതച്ചിരുന്നൊരു നേപ്പാളി ബാലനിലേക്ക് കല്‍പ്പറ്റ മുന്‍ എംഎല്‍എ സി കെ ശശീന്ദ്രന്റെ കണ്ണെത്താന്‍ അധികനേരം വേണ്ടി വന്നില്ല. നിരവധി ജീവകാരുണ്യ പ്രവര്‍ത്തനങ്ങളിലൂടെ മനുഷ്യന്റെ മനസ് തിരിച്ചറിഞ്ഞയാള്‍ എന്ന് അറിയപ്പെടുന്ന ശശീന്ദ്രന്‍ ആ ബാലന്റെ കൈപിടിച്ച് വയനാടന്‍ ചുരമിറങ്ങി. സഹായം തേടി നടന്‍ മമ്മൂട്ടിയുടെ അരികിലേക്ക് ആയിരുന്നു ആ യാത്ര.
മമ്മൂട്ടിയുടെ നിര്‍ദ്ദേശപ്രകാരം കെയര്‍ ആന്‍ഡ് ഷെയര്‍ ഇന്റര്‍നാഷണലും ആലുവ രാജഗിരി ആശുപത്രിയും ചേര്‍ന്ന് നടത്തുന്ന ഹൃദ്യം പദ്ധതിയില്‍ ഉള്‍പ്പെടുത്തി ചികിത്സ സൗജന്യമായി നടത്തി. ഹൃദയ ധമനിയിലെ സുഷിരം മൂലം പഠനം പാതിവഴിയില്‍ ഉപേക്ഷിക്കേണ്ടിവന്ന ബിക്രം കഴിഞ്ഞ ദിവസം നിറഞ്ഞ ചിരിയോടെ ആശുപത്രി വിട്ടു.
പിതാവ് ദല്ലോ സൗദിനൊപ്പം മൂന്ന് വര്‍ഷം മുമ്പാണ് ബിക്രവും കുടുംബവും വയനാട്ടില്‍ എത്തിയത്. ശശീന്ദ്രന്റെ ഫാമിലായിരുന്നു തുടക്കത്തില്‍ ദല്ലോ സൗദിന് ജോലി. കുടുംബത്തിന്റെ സുഖവിവരങ്ങള്‍ അന്വേഷിക്കുന്നതിനിടയിലാണ് സികെ ശശീന്ദ്രന്‍ ബിക്രമിന്റെ ആരോഗ്യപ്രശ്‌നങ്ങള്‍ അറിയുന്നത്. വോളിബോള്‍ നന്നായി കളിക്കുമെങ്കിലും, കടുത്ത ശ്വാസതടസ്സം കാരണം എട്ടാം ക്ലാസ്സില്‍ വച്ച് ബിക്രമിന് പഠനം നിര്‍ത്തേണ്ടി വന്നു. അവന്റെയും കുടുംബത്തിന്റെയും ഹൃദയവേദനയറിഞ്ഞ സി കെ ശശീന്ദ്രന്‍, കോഴിക്കോട് മെഡിക്കല്‍ കോളജിലെ ഡോക്ടര്‍മാരെ ബന്ധപ്പെട്ടു. അവിടെ നടത്തിയ പരിശോധനയില്‍ ബിക്രമിന് ‘പേറ്റന്റ് ഡക്റ്റസ് ആര്‍ട്ടീരിയോസസ്” എന്ന ജന്മനാലുളള ഹൃദയവൈകല്യവും ശ്വാസകോശ ധമനിയില്‍ ഉയര്‍ന്ന രക്തസമ്മര്‍ദ്ദവും കണ്ടെത്തി.
മരുന്നുകള്‍ നല്‍കി സ്ഥിതി നിയന്ത്രിച്ചെങ്കിലും പൂര്‍ണപരിഹാരം ആയിരുന്നില്ല. ഇതിനിടെ ശ്വാസംമുട്ടല്‍ രൂക്ഷമായി. പിതാവ് ദല്ലോ സഹായം അഭ്യര്‍ത്ഥിച്ച് സികെ ശശീന്ദ്രനെ ഫോണില്‍ വിളിച്ചു. വയനാട്ടുകാരനായ നടന്‍ അബു സലിം വഴി മമ്മൂട്ടിയുടെ ജീവകാരുണ്യ പ്രസ്ഥാനമായ കെയര്‍ ആന്റ് ഷെയറിനെക്കുറിച്ചറിഞ്ഞ ശശീന്ദ്രന്‍ മമ്മൂട്ടിയുമായി സംസാരിച്ചു. തുടര്‍ന്ന് മമ്മൂട്ടി, ശശീന്ദ്രനെ എത്രയും പെട്ടെന്ന് തിരിച്ചു ബന്ധപ്പെടാനും കുട്ടിയുടെ ചികിത്സ പൂര്‍ണമായും സൗജന്യമായി നടത്തിക്കൊടുക്കാനും കെയര്‍ ആന്റ് ഷെയര്‍ ഭാരവാഹികളോട് നിര്‍ദേശിച്ചു. അങ്ങനെയാണ് രാജഗിരി ആശുപത്രിയില്‍ ബിക്രമിന്റെ ചികിത്സയ്ക്ക് വേണ്ട ക്രമീകരണങ്ങള്‍ ഒരുക്കിയത്.
ആശുപത്രിയില്‍ എത്തിയ ബിക്രവും പിതാവും പീഡിയാട്രിക് കാര്‍ഡിയാക് സര്‍ജന്‍ ഡോ. മുസ്തഫ ജനീലിനെ കണ്ടു. ശ്വാസകോശ ധമനിയിലെ ഉയര്‍ന്ന രക്തസമ്മര്‍ദം ശസ്ത്രക്രിയക്ക് വെല്ലുവിളി ആയിരുന്നു. തുടര്‍ന്ന് പീഡിയാട്രിക് കാര്‍ഡിയോളജിസ്റ്റ് ഡോ. എസ് വെങ്കിടേശ്വരന്‍ കത്തീറ്റര്‍ കടത്തിയുളള താക്കോല്‍ദ്വാര മാര്‍ഗം അവലംബിച്ച് ധമനിയിലെ സുഷിരം സുരക്ഷിതമായി അടച്ചു. സങ്കീര്‍ണമായ ചികിത്സയില്‍ പീഡിയാട്രിക് കാര്‍ഡിയാക് സര്‍ജറി കണ്‍സള്‍ട്ടന്റ് ഡോ. പ്രീതി കാഥല്‍, പീഡിയാട്രിക് കാര്‍ഡിയാക് അനസ്‌തേഷ്യോളജി കണ്‍സള്‍ട്ടന്റ് ഡോ.ബിജിന ഭരതന്‍ കെ എന്നിവര്‍ പങ്കാളികളായി.
കുട്ടികളില്‍ ജന്മനാ ഉണ്ടാകാനിടയുള്ള ‘പേറ്റന്റ് ഡക്റ്റസ് ആര്‍ട്ടീരിയോസസ്’ എന്ന ഹൃദയതകരാറാണ് ഡോക്ടര്‍മാര്‍ വിജയകരമായി ഭേദമാക്കിയത്. ഒരാഴ്ച നീണ്ട ആശുപത്രി വാസത്തിനൊടുവില്‍ ബിക്രമിനെ തിരികെ വയനാട്ടിലേക്ക് കൂട്ടാന്‍ സികെ ശശീന്ദ്രനും എത്തിയിരുന്നു. ഒരു മാസത്തിന് ശേഷം വീണ്ടും പരിശോധന നടത്തും. പഠിക്കാനും വോളിബോളില്‍ ലോകമറിയാനുമുളള സ്വപ്നം വീണ്ടും കാണുകയാണ് ബിക്രം.
Recent Comments