by Midhun HP News | May 1, 2026 | Latest News, കേരളം
നെടുങ്കണ്ടം: ഇടുക്കി നെടുങ്കണ്ടം ഇരട്ടക്കൊലപാതകത്തില്, കൊല്ലപ്പെട്ട മേരിക്കുട്ടിയുടെ ഭര്ത്താവ് മാത്യു തോമസിനെ കാണാതായതിലും പൊലീസ് അന്വേഷണം ഊര്ജ്ജിതമാക്കി. 2018 മാര്ച്ച് മൂന്നിനാണ് മേരിക്കുട്ടിയുടെ ഭര്ത്താവ് മാത്യുവിനെ കാണാതായത്. പാസ്റ്ററായിരുന്നു ഇദ്ദേഹം. ഭാര്യക്കും മക്കളായ റെജിക്കും സജിക്കുമൊപ്പമാണ് മാത്യു താമസിച്ചിരിക്കുന്നത്.
ഭിന്നശേഷിക്കാരിയായ ഇളയ മകള് ജിജിയുടെ ചികിത്സക്കായി കട്ടപ്പന വെള്ളയാംകുടിയിലേക്ക് പോകുന്നു എന്ന് പറഞ്ഞാണ് മാത്യു വീട്ടില് നിന്നും പോയതെന്നാണ് പൊലീസില് നല്കിയിരിക്കുന്ന വിവരം. മൂത്ത മകന് റെജിയുടെ പരാതിയില് മാര്ച്ച് ഒന്പതിന് പൊലീസ് കേസെടുക്കുകയും ചെയ്തു. ആദ്യ ഘട്ടത്തില് കാര്യമായ അന്വേഷണമാണ് നടത്തിയത്.
നെടുങ്കണ്ടത്തെത്തിയ മാത്യു ബസില് കയറിപ്പോകുന്നത് കണ്ടതായും വിവരം ലഭിച്ചു. എന്നാല് സിസിടിവി ദൃശ്യങ്ങള് പരിശോധിച്ച പൊലീസിന് കൃത്യമായ വിവരങ്ങള് ഒന്നും ലഭിച്ചില്ല. ഇതോടെ തൃപ്തികരമായ വിവരങ്ങള് ലഭിച്ചാല് അന്വേഷണം തുടരാമെന്ന് രേഖപ്പെടുത്തി അന്വേഷണം മാറ്റിവെക്കുകയായിരുന്നു. മേരിക്കുട്ടിയെയും മൂത്ത മകന് റെജിയെയും ഇളയ മകന് സജി കൊലപ്പെടുത്തിയത് സ്ഥിരീകരിച്ചതോടെ കേസില് തുടരന്വേഷണം വേണമെന്ന് ബന്ധുക്കളും നാട്ടുകാരും ആവശ്യപ്പെട്ടിട്ടുണ്ട്. സംഭവം സംബന്ധിച്ച് കൂടുതല് വ്യക്തത വരുത്താനായി റിമാന്ഡില് കഴിയുന്ന സജിയെ പൊലീസ് കസ്റ്റഡിയില് വാങ്ങും. സജിയെ വിശദമായി ചോദ്യം ചെയ്യുന്നതിലൂടെ കാര്യങ്ങള് വ്യക്തമാകുമെന്നാണ് പൊലീസിന്റെ കണക്കുകൂട്ടല്.
by Midhun HP News | May 1, 2026 | Latest News, കേരളം
തൃശൂര്: പാചകവാതക വില വര്ധനയെ ന്യായീകരിച്ച് കേന്ദ്രമന്ത്രി സുരേഷ് ഗോപി. ലോകം മുഴുവന് ഒന്ന് അന്വേഷിച്ചു നോക്കൂ. എവിടെയൊക്കെ എത്രയൊക്കെ കൂടിയെന്ന്. നമ്മള് ഇത്രയും പിടിച്ചു നിന്നില്ലേ ?. വാണിജ്യ സിലിണ്ടര് ഒക്കെ ഒരു നമ്പറല്ലായിരുന്നോയെന്നും സുരേഷ് ഗോപി പറഞ്ഞു. അതേസമയം പെട്രോള്, ഡീസല് വില വര്ധിക്കുമോയെന്ന മാധ്യമങ്ങളുടെ ചോദ്യത്തിന് സുരേഷ് ഗോപി വ്യക്തമായ മറുപടി നല്കിയില്ല.
അഞ്ചു സംസ്ഥാനങ്ങളിലെ നിയമസഭ തെരഞ്ഞെടുപ്പ് കഴിഞ്ഞതിനു പിന്നാലെ പാചകവാതക വിലയില് വന് വര്ധനയാണ് എണ്ണക്കമ്പനികള് വരുത്തിയത്. വാണിജ്യ സിലിണ്ടറിന്റെ (19 കിലോഗ്രാം) വില 993 രൂപയാണ് വര്ധിപ്പിച്ചത്. ഇതോടെ സിലിണ്ടര് വില 3000 രൂപ കടന്നു. 3085 രൂപയാണ് കൊച്ചിയിലെ പുതിയ സിലിണ്ടര് വില. തിരുവനന്തപുരത്ത് 3106 രൂപ. കോഴിക്കോട്ട് 3117.5 രൂപ എന്നിങ്ങനെയാണ്. ഒറ്റത്തവണ ഇത്രയും വില കൂട്ടുന്നത് അപൂര്വമാണ്.
ഒറ്റയടിക്ക് സിലിണ്ടറിന്റെ വില വലിയ തോതില് കൂട്ടിയത് ഹോട്ടല്, റസ്റ്ററന്റുകള്, തട്ടുകടകള് തുടങ്ങിയവയുടെ പ്രവര്ത്തനം താളം തെറ്റിക്കും. പ്രവര്ത്തനച്ചെലവ് കുത്തനെ കൂടുന്നതിനാല്, ഭക്ഷണ വിഭവങ്ങളുടെ വില കൂട്ടാനും ഇടയാക്കിയേക്കും. ഇത് സാധാരണക്കാരന്റെ ബജറ്റിനെയും ബാധിക്കും. അതേസമയം ഗാര്ഹിക സിലിണ്ടര് വിലയില് മാറ്റം വരുത്തിയിട്ടില്ല.
by Midhun HP News | May 1, 2026 | Latest News, കേരളം
കൊച്ചി : അങ്കമാലി കിടങ്ങൂരിൽ ഇടഞ്ഞ് പരിഭ്രാന്ത്രി സൃഷ്ടിച്ച ആനയെ മയക്കു വെടിവെച്ചു തളച്ചു. വിരണ്ട ആനയുടെ ചവിട്ടേറ്റ് ഒരാൾ മരിച്ചിരുന്നു. ആനയെ കൊണ്ടുവന്ന ലോറിയുടെ ഡ്രൈവർ പത്തനംതിട്ട സ്വദേശി വിഷ്ണുവാണ് മരിച്ചത്. രണ്ടാം പാപ്പാൻ പ്രദീപിന് സാരമായി പരിക്കേറ്റിരുന്നു. കിടങ്ങൂർ ശ്രീ മഹാവിഷ്ണു ക്ഷേത്രത്തിൽ വെച്ചായിരുന്നു സംഭവം.
സമീപത്തെ ക്ഷേത്രത്തിൽ ഉത്സവത്തിനെത്തിച്ച മയ്യനാട് പാർത്ഥസാരഥി എന്ന ആനയാണ് ഇടഞ്ഞത്. കുളിപ്പിക്കാനും വെള്ളം കൊടുക്കാനുമൊക്കെയായി കൊണ്ടുപോകുന്നതിനിടെയാണ് ആന വിരണ്ടോടിയത്. തളയ്ക്കാൻ ശ്രമിക്കുന്നതിനിടെ ആനയുടെ ചവിട്ടേറ്റാണ് വിഷ്ണു മരിച്ചത്.
തുടർന്ന് സമീപത്തുണ്ടായിരുന്ന കാർ, പിക്കപ്പ് വാൻ, സ്കൂട്ടർ തുടങ്ങി നിരവധി വാഹനങ്ങൾ ആന തകർത്തു. മണിക്കൂറുകളോളമാണ് ആന പരിഭ്രാന്തി പരത്തിയത്. മലയാറ്റൂരില് നിന്നുള്ള ആര്ആര്ടി സംഘം സ്ഥലത്തെത്തി. സാരമായി പരിക്കേറ്റ കൊല്ലം പുത്തന്പുരയ്ക്കല് സ്വദേശി പ്രദീപിനെ അങ്കമാലി ലിറ്റില് ഫ്ളവര് ആശുപത്രിയില് പ്രവേശിപ്പിച്ചിരിക്കുകയാണ്.
by Midhun HP News | May 1, 2026 | Latest News, കേരളം
തൃശ്ശൂര്: പി.വി അന്വറിനെതിരെ തല മൊട്ടയടിച്ചവരുടെ ആഗോള മലയാളി കൂട്ടായ്മയായ മൊട്ട ഗ്ലോബല് ഫൗണ്ടേഷന്. അന്വറിന്റേത് രാഷ്ട്രീയമായ മറുപടിയല്ലെന്നാണ് സംഘടനയുടെ പ്രസിഡന്റ് സജീഷ് കുട്ടനെല്ലൂര് പ്രതികരിച്ചത്. വാര്ത്താക്കുറിപ്പിലൂടെയായിരുന്നു പ്രതികരണം. മൊട്ടയടിക്കുന്നതിനെ എന്തോ മാരകമായ ദുരന്ത സംഗതി എന്നുള്ള വ്യാഖ്യാനത്തെ എതിര്ക്കുന്നതായും സജീഷ് കുട്ടനെല്ലൂര് പറഞ്ഞു
‘തല മൊട്ടയടിച്ച് കമ്മലിട്ട് നടക്കുക എന്നത് ഫ്രീക്ക് ലുക്കാണ്. തല പകുതി മൊട്ടയടിച്ച് നടക്കാനാണ് പി വി അന്വര് ധൈര്യം കാട്ടേണ്ടത്.” എന്നാണ് സജീഷ് പറയുന്നത്. തങ്ങളുടെ സംഘടനയില് 40 രാജ്യങ്ങളില് നിന്നായി രണ്ടായിരത്തിലേറെ മെമ്പര്മാരുണ്ട്. കൃഷിക്കാരന് മുതല് വിമാനം ഓടിക്കുന്നവര് വരെ സമൂഹത്തിന്റെ നാനാതുറയില് നിന്നുള്ള മെമ്പര്മാര് തല മൊട്ടയടിച്ച് അതില് അതില് അഭിമാനിച്ചുകൊണ്ട് മുന്നോട്ടുപോകുന്നവരാണെന്നും അദ്ദേഹം പറയുന്നു.
മാളിലോ, തിയേറ്ററിലോ, റോഡിലോ, ബസ്സിലോ എവിടെയും തല മൊട്ടയടിച്ച് ആത്മവിശ്വാസത്തോടെ നടന്നുപോകുന്ന വ്യക്തികളെ കാണാന് സാധിക്കുമെന്നും സജീഷ് കുട്ടനെല്ലൂര് കൂട്ടിച്ചേര്ത്തു.
ബേപ്പൂര് നിയോജക മണ്ഡലത്തില് എല്ഡിഎഫ് സ്ഥാനാര്ഥി മുഹമ്മദ് റിയാസ് ജയിച്ചാല് മൊട്ടയടിച്ച് കമ്മലിട്ട് കോഴിക്കോട് അങ്ങാടിയില് നടക്കുമെന്നാണ് പി വി അന്വര് പറഞ്ഞത്. റിയാസ് ജയിച്ചാല് കോഴിക്കോട്ടെ കിഡ്സണ് കോര്ണര് മുതല് എസ്എം സ്ട്രീറ്റ് വഴി റെയില്വേ സ്റ്റേഷന് വരെ നടക്കും എന്നും അന്വര് പറഞ്ഞിരുന്നു. സമാനമായ വെല്ലുവിളി ഏറ്റെടുക്കാന് മുഹമ്മദ് റിയാസ് തയ്യാറുണ്ടോ എന്നും പി വി അന്വര് ചോദിച്ചു.
by Midhun HP News | May 1, 2026 | Latest News, കേരളം
ഇത്തവണ ജനവിധി തേടിയവരില് ഒരാളായി ബിഗ് ബോസ് താരവും സംവിധായകനുമായ അഖില് മാരാരുമുണ്ടായിരുന്നു. സോഷ്യല് മീഡിയയിലെ സജീവ സാന്നിധ്യമായ അഖില് മാരാര് തൃക്കാക്കരയിലെ എന്ഡിഎ സ്ഥാനാര്ത്ഥിയായിരുന്നു. തെരഞ്ഞെടുപ്പ് ഫലം മെയ് നാലിന് പ്രഖ്യാപിക്കാനിരിക്കെ അഖില് മാരാരുടെ പോസ്റ്റ് ചര്ച്ചയായി മാറുകയാണ്.
തനിക്ക് എത്ര വോട്ടാകും ലഭിക്കുക എന്ന് പ്രവചിക്കാന് സോഷ്യല് മീഡിയയിലൂടെ ആവശ്യപ്പെടുകയാണ് അഖില്. ”എത്ര വോട്ട് എനിക്ക് ലഭിക്കാം. കറക്റ്റ് ആയി പറയുന്നവരില് ഒരാള്ക്ക് എന്റെ വക ഒരു ഉഗ്രന് സമ്മാനം. നിങ്ങളുടെ ചിന്തകള് അറിയാനുള്ള ആഗ്രഹം മാത്രം. ചുമ്മാ ആക്ഷേപിക്കാന് കമന്റ് ഇടാതെ ഏറെക്കുറെ ശെരി എന്ന് തോന്നുന്ന കണക്ക് ഇട്ടോളൂ. ഒരാള്ക്ക് ഒരു കമന്റ് മാത്രം” എന്നായിരുന്നു അഖില് മാരാരുടെ പോസ്റ്റ്.
പിന്നാലെ കമന്റുകളുമായി സോഷ്യല് മീഡിയയെത്തി. എന്നാല് അഖില് പ്രതീക്ഷിച്ചത് പോലെ ആയികുന്നില്ല സോഷ്യല് മീഡിയയുടെ പ്രതികരണം. താരത്തെ വിമര്ശിച്ചും ട്രോളിയുമൊക്കെയാണ് സോഷ്യല് മീഡിയ മറുപടി നല്കുന്നത്. ‘ഒട്ടിന്റെ എണ്ണം പറയാന് പറ്റില്ല പക്ഷെ ഒന്ന് പറയാം 100% തോല്ക്കും, അഖില് ചേട്ടന് ലഭിക്കുന്ന വോട്ടിന്റെ എണ്ണം ന്തരോ ന്തോ. പക്ഷെ, തോല്വി സ്ഥാനാര്ഥികളെ ലിസ്റ്റില് മുന്നിരയില് തന്നെ ചേട്ടന്റെ ഫോട്ടോ വരും” എന്നായിരുന്നു ചിലരുടെ പ്രതികരണം.
‘എന്റെ കൂടെ നിയമ സഭയില് ശോഭേച്ചി യും ഉണ്ടാകും”എന്നായിരുന്നല്ലോ നേരെത്തെ പറഞ്ഞിരുന്നത്. ആ കണക്ക് വെച്ച് ഭൂരിപക്ഷം അല്ലേ ചോദിക്കേണ്ടത്, കേരളത്തിലെ അമ്മമാരുടെ വോട്ട് മൊത്തം നിനക്ക് അല്ലെ. അമ്മാതിരി തോന്നിവാസം അല്ലെ ഒരു ഉളുപ്പും ഇല്ലാതെ നീ പറഞ്ഞത്. ദൈവം ഉണ്ടെങ്കില് നീ എട്ട് നിലയില് പൊട്ടും മാരാരെ നീ നോക്കിക്കോ, ഒരു കാര്യം പറയാം. നി ഒരിക്കലും ജയിക്കാന് പോവുന്നില്ല, ജയിക്കാനും പാടില്ല. വര്ഗീയ മുക്ത കേരളം ആകും 4 ലെ റിസള്ട്ട്, കുടുംബത്തില് നിന്നും നോക്കിയാല് വിരലില് എണ്ണാവുന്നതെ ഉണ്ടാവൂ” എന്നും ചിലര് പറയുന്നു.
”ഇലക്ഷനില് ജയവും തോല്വിയും സ്വാഭാവികമാണ്. മിസ്റ്റര് അഖില് മാരാര്,താങ്കളോട് ഒരു കാര്യം പറയാതെ വയ്യ. തിങ്കളാഴ്ച്ച റിസള്ട്ട് വന്നുകഴിയുമ്പോള് താങ്കള് തോല്ക്കുകയാണെങ്കില് ഏറ്റവും കൂടുതല് ട്രോള് ചെയ്യപ്പെടുന്നവരില് ഒരാള് ആയിരിക്കും താങ്കള്. അതിന് പ്രധാന കാരണം താങ്കളുടെ പാര്ട്ടിയോ ഉള്പ്പെടുന്ന മുന്നണിയോ ഒന്നും അല്ല..താങ്കളുടെ സമീപനം തന്നെ പ്രശ്നം. ഇലക്ഷന് ക്യാമ്പയിന് സമയത്ത് പ്രത്യേകിച്ച് സോഷ്യല് മീഡിയായില് ജനപ്രതിനിധിയാവാന് യോഗ്യതയുള്ള പക്വതയുള്ള വ്യക്തി എന്ന നിലയില് ആയിരുന്നില്ല താങ്കളുടെ പ്രതികരണങ്ങളും സംസാരവും” എന്നായിരുന്നു മറ്റൊരു പ്രതികരണം.
by Midhun HP News | May 1, 2026 | Latest News, കേരളം
കൊല്ലം: സംസ്ഥാനത്ത് പാമ്പു കടിയേറ്റ് ഒരാള് കൂടി മരിച്ചു. കൊല്ലം മണ്റോത്തുരുത്ത് സ്വദേശി രാജേന്ദ്രന് ആണ് മരിച്ചത്. 64 വയസ്സായിരുന്നു. അണലിയാണ് രാജേന്ദ്രനെ കടിച്ചത്. ചികിത്സയിലിരിക്കെയാണ് അന്ത്യം സംഭവിച്ചത്.
വെള്ളിയാഴ്ച അരിനെല്ലൂരിലെ മകളുടെ വീടിനു മുമ്പില് വെച്ചാണ് രാജേന്ദ്രന് പാമ്പുകടിയേറ്റത്. കാഴ്ചവൈകല്യമുള്ള ആളാണ്. രാത്രി ഭക്ഷണം കഴിച്ചശേഷം പുറത്തെ ചായ്പിലേക്ക് ഇറങ്ങിയതായിരുന്നു അദ്ദേഹം. ചായ്പിലുള്ള കട്ടിലില് കിടന്ന പുതപ്പ് താഴെ വീണിരുന്നു. അതെടുത്തപ്പോഴാണ് പാമ്പിന്റെ കടിയേറ്റത്. ഉടന് തന്നെ കൊല്ലത്തെ ആശുപത്രിയിലെത്തിച്ചു. തുടര്ന്ന് വിദഗ്ധ ചികിത്സയ്ക്കായി തിരുവനന്തപുരം മെഡിക്കല് കോളജിലേക്ക് മാറ്റിയിരുന്നു.
Recent Comments