by liji HP News | Jul 3, 2024 | Latest News, കേരളം
ഓണ്ലൈന് മാധ്യമങ്ങള്ക്ക് കടിഞ്ഞാണ് ഇടാന് ഫിലിം പ്രൊഡ്യൂസേഴ്സ് അസോസിയേഷന്. അക്രെഡിറ്റേഷന് നിര്ബന്ധമാക്കണമെന്ന് ആവശ്യപ്പെട്ട് ഫെഫ്കക്ക് കത്ത് നല്കി. മരണവീടുകളില് പോലും മര്യാദകള് പാലിക്കുന്നില്ലെന്ന് വിമര്ശനം. ഓണ്ലൈന് മാധ്യമങ്ങളുടെ പെരുമാറ്റം അതിരുവിടുന്നു എന്ന വിലയിരുത്തലിലാണ് പ്രൊഡ്യൂസേഴ്സ് അസോസിയേഷന് അക്രെഡിറ്റേഷന് നിര്ബന്ധമാക്കാന് തീരുമാനിച്ചത്. നിര്ദിഷ്ട ഫോമില് കമ്പനിയുടെ രജിസ്ട്രേഷന്റെ വിവരങ്ങള്, നല്കണം. അംഗീകൃത പിആര്ഒയുടെ കത്തും നിര്ബന്ധമാണ്.ഈ മാനദണ്ഡങ്ങള് പരിഗണിച്ചാകും അക്രെഡിറ്റേഷന് നല്കുക.
സ്ത്രീത്വത്തെ അപമാനിക്കുന്ന ചോദ്യങ്ങള്, സ്വകാര്യതയിലേക്കുള്ള കടന്നുകയറ്റം, മരണവീടുകളില്പോലും മൊബൈല് ക്യാമറയുമായി പിന്തുടരുക തുടങ്ങിയ രീതികളാണ് ഓണ്ലൈന് മാധ്യമങ്ങള്ക്ക് കടിഞ്ഞാണ് ഇടാന് നിര്മ്മാതാക്കളെ പ്രേരിപ്പിച്ചത്. നടന് സിദ്ദിഖിന്റെ മകന്റെ മരണവുമായി ബന്ധപ്പെട്ട് ഓണ്ലൈന് മാധ്യമങ്ങള് സ്വീകരിച്ച സമീപനത്തിനെതിരെ സാമൂഹമാധ്യമങ്ങളിടക്കം രൂക്ഷ വിമര്ശനം ഉയര്ന്നിരുന്നു. നാളെ നടക്കുന്ന സ്റ്റിയറിങ് കമ്മിറ്റി യോഗത്തില് വിഷയം ചര്ച്ച ചെയ്യും. സിനിമകളുടെ പ്രമോഷനുമായി ബന്ധപ്പെട്ട് നടത്തുന്ന എല്ലാ പരിപാടികളിലും നിയന്ത്രണം ബാധകമാകും എന്നാണ് വിവരം.
by liji HP News | Jul 3, 2024 | Latest News, കേരളം
നീറ്റ് പരീക്ഷയ്ക്കെതിരെ നടനും തമിഴക വെട്രികഴകം അധ്യക്ഷനുമായ വിജയ്. നീറ്റ് പരീക്ഷ റദ്ദാക്കണമെന്ന തമിഴ്നാട് സർക്കാരിന്റെ ആവശ്യത്തോട് യോജിക്കുന്നു. സംസ്ഥാന സിലബസിൽ പഠിച്ചവർക്ക് നീറ്റ് പരീക്ഷ ബുദ്ധിമുട്ടുണ്ടാക്കുന്നുവെന്നും വിജയ് പറഞ്ഞു.
നീറ്റ് പരീക്ഷ നിർത്തലാക്കുക മാത്രമാണ് പരിഹാരമെന്ന് തമിഴക വെട്രി കഴകം (ടിവികെ) മേധാവി പറഞ്ഞു. വൈദ്യപരിശോധന നിർത്തലാക്കാനുള്ള ടിഎൻ സംസ്ഥാന അസംബ്ലിയുടെ പ്രമേയത്തെ വിജയ് പിന്തുണച്ചു, നീറ്റിൽ ആളുകൾക്ക് അവരുടെ വിശ്വാസം നഷ്ടപ്പെട്ടുവെന്നും കൂട്ടിച്ചേർത്തു.
‘നീറ്റ് പരീക്ഷയിൽ ജനങ്ങൾക്ക് വിശ്വാസം നഷ്ടപ്പെട്ടു. രാജ്യത്തിന് നീറ്റ് ആവശ്യമില്ല. NEET-ൽ നിന്ന് ഒഴിവാക്കുക മാത്രമാണ് ഏക പരിഹാരം. സംസ്ഥാന സർക്കാർ നിയമസഭയിൽ പാസാക്കിയ നീറ്റിനെതിരായ പ്രമേയത്തെ ഞാൻ പൂർണ്ണഹൃദയത്തോടെ സ്വാഗതം ചെയ്യുന്നു.
തമിഴ്നാട്ടിലെ ജനങ്ങളുടെ വികാരങ്ങളെ മാനിക്കണമെന്ന് ഞാൻ കേന്ദ്ര സർക്കാരിനോട് അഭ്യർത്ഥിക്കുന്നു. വിദ്യാഭ്യാസത്തെ കൺകറൻ്റ് ലിസ്റ്റിൽ നിന്ന് സംസ്ഥാന ലിസ്റ്റിലേക്ക് കൊണ്ടുവരണം- ”വിജയ് പറഞ്ഞു.
by liji HP News | Jul 3, 2024 | Latest News, കേരളം
കണ്ണൂര്: നീണ്ട കാത്തിരിപ്പിനൊടുവില് ഷൊര്ണൂര് -കണ്ണൂര് സ്പെഷല് ട്രെയിന് സര്വീസ് തുടങ്ങി. ഷൊര്ണൂരിനും കണ്ണൂരിനും ഇടയില് റെയില്വേ പ്രഖ്യാപിച്ച ട്രെയിനിന് കണ്ണൂര് റെയില്വേ സ്റ്റേഷനില് യാത്രക്കാര് ആവേശകരമായ സ്വീകരണം നല്കി. മലബാര് റെയില്വേ പാസഞ്ചേഴ്സ് കോര്ഡിനേഷന് കമ്മറ്റിയുടെ നേതൃത്യത്തിലായിരുന്നു സ്വീകരണം ഒരുക്കിയത്.
ജൂലായ് രണ്ടിന് വൈകിട്ട് 3.40 ന് ഷൊര്ണ്ണൂരില് നിന്ന് പുറപ്പെട്ട ട്രെയിന് 7.30 ന് കണ്ണൂരിലെത്തി. കോര്ഡിനേഷന് കമ്മറ്റിയുടെ നേതൃത്യത്തില് ലോക്കോ പൈലറ്റുമാര്ക്ക് ഹാരാര്പ്പണം നടത്തി. കോര്ഡിനേഷന് കമ്മറ്റി ചെയര്മാന് റഷീദ് കവ്വായി, സ്റ്റേഷന് മാനേജര് സജിത്കുമാര് എന്നിവര് സംസാരിച്ചു.
ഷൊര്ണ്ണൂരില് നിന്ന് ചൊവ്വ, ബുധന്, വ്യാഴം, വെള്ളി ദിവസങ്ങളില് വൈകീട്ട് 3. 40 നും കണ്ണൂരില് നിന്ന് ബുധന്, വ്യാഴം, വെള്ളി, ശനി ദിവസങ്ങളില് രാവിലെ 8.10 നുമാണ് ട്രെയിന് സര്വ്വീസ് നടത്തുക. തിരക്കില്ലാത്ത സുഖകരമായ യാത്രയായിരുന്നുവെന്ന് ആദ്യയാത്രക്കാര് പറഞ്ഞു.
അണ് റിസര്വ്ഡ് സ്പെഷ്യല് എക്സ്പ്രസ് ആയി സര്വ്വീസ് നടത്തുന്ന ട്രെയിനിന് തലശ്ശേരി, മാഹി, വടകര, കൊയിലാണ്ടി, കോഴിക്കോട്, ഫെറോക്ക്, പരപ്പനങ്ങാട് താനൂര്, തിരൂര്, കുറ്റിപ്പുറം പട്ടാമ്പി എന്നിവിടങ്ങളില് സ്റ്റോപ്പുണ്ട്. 10 ജനറല് സെക്കന്ഡ് ക്ലാസ് കോച്ചുകളാണ് ട്രെയിനിലുണ്ടാകുക. പുതിയ ട്രെയിന് സര്വ്വീസ് തുടങ്ങുന്നതോടെ യാത്രക്കാരുടെ തിരക്കിന് അല്പം ആശ്വാസമായിട്ടുണ്ട്.
by Midhun HP News | Jul 3, 2024 | Latest News, കേരളം
തിരുവനന്തപുരം: പിഎസ്സിയില് രജിസ്റ്റര് ചെയ്ത ഉദ്യോഗാര്ത്ഥികള് ഇനി പ്രൊഫൈലില് ലോഗിന് ചെയ്യുമ്പോള് ഒടിപി സംവിധാനം വരും. സുരക്ഷയുടെ ഭാഗമായാണ് ഒടിപി സംവിധാനം ഏര്പ്പെടുത്തിയത്. ആദ്യഘട്ടത്തില് നിലവിലെ യൂസര് ഐഡിയും പാസ്വേര്ഡും ഉപയോഗിച്ച് ഉദ്യോഗാര്ത്ഥികള് ലോഗിന് ചെയ്യുമ്പോള് പ്രൊഫൈലില് രജിസ്റ്റര് ചെയ്ത മൊബൈല് നമ്പറും ഇമെയില് വിലാസവും അടങ്ങിയ സ്ക്രീന് പ്രത്യക്ഷപ്പെടും. മൊബൈല് നമ്പറും ഇമെയിലും നിലവില് ഉപയോഗത്തിലുള്ളതാണെന്ന് ഉദ്യോഗാര്ത്ഥികള് ഉറപ്പുവരുത്തേണ്ടതും അല്ലാത്തപക്ഷം ആവശ്യമായ തിരുത്തല് വരുത്തേണ്ടതുമാണ്. കൂടാതെ ഒടിപി സംവിധാനം ഉപയോഗിച്ച് അവ വെരിഫൈ ചെയ്യുകയും വേണം.
ഉദ്യോഗാര്ത്ഥികളുടെ പാസ്വേര്ഡ് നിബന്ധനകള്ക്കനുസരിച്ച് പുതുക്കുവാനുള്ള സ്ക്രീനും തുടര്ന്ന് പ്രത്യക്ഷപ്പെടുന്നതാണ്. അതിനുശേഷം യൂസര് ഐഡിയും പുതുക്കിയ പാസ് വേഡും ഉപയോഗിച്ച് പ്രൊഫൈല് ലോഗിന് ചെയ്യുമ്പോള് വെരിഫൈ ചെയ്ത മൊബൈല് നമ്പറിലോ ഇമെയിലിലോ ലഭ്യമാകുന്ന ഒടിപി രേഖപ്പെടുത്തി ഉദ്യോഗാര്ത്ഥികള്ക്ക് പ്രൊഫൈലില് പ്രവേശിക്കാം. സുരക്ഷാകാരണങ്ങളാല് ആറുമാസത്തിലൊരിക്കല് പാസ് വേര്ഡ് പുതുക്കുവാന് ഉദ്യോഗാര്ത്ഥികള് ശ്രദ്ധിക്കേണ്ടതാണെന്നും പിഎസ്സി അറിയിച്ചു.
by Midhun HP News | Jul 3, 2024 | Latest News, കേരളം
കൊച്ചി: സംസ്ഥാനത്ത് ഇന്ന് സ്വർണവിലയിൽ മാറ്റമില്ല. 53,080 രൂപയാണ് ഒരു പവൻ സ്വർണത്തിന്റെ വില. 6635 രൂപയാണ് ഒരു ഗ്രാം സ്വർണത്തിന്റെ വില. മെയ് മാസം 20ന് 55,120 രൂപയായി ഉയർന്ന് സ്വർണവില പുതിയ ഉയരം കുറിച്ചിരുന്നു. പിന്നീട് നാലുദിവസം കൊണ്ട് രണ്ടായിരം രൂപ കുറഞ്ഞ ശേഷം ഏറിയുംകുറഞ്ഞും നിൽക്കുകയാണ് സ്വർണവില. ഓഹരി വിപണിയിലെയും അന്താരാഷ്ട്ര വിപണിയിലെയും ചലനങ്ങളാണ് സ്വർണവിലയിൽ പ്രതിഫലിക്കുന്നത്.
by Midhun HP News | Jul 3, 2024 | Latest News, കേരളം
തിരുവനന്തപുരം: മീൻ പിടിക്കുന്നതിനിടയിൽ ജെല്ലിഫിഷ് (കടൽച്ചൊറി) കണ്ണില് തെറിച്ച് ചികിത്സയിലായിരുന്ന മത്സ്യത്തൊഴിലാളി മരിച്ചു. പള്ളം പുല്ലുവിള അർത്തയില് പുരയിടത്തില് പ്രവീസ് (56) ആണ് മരിച്ചത്. ഉൾക്കടലിൽ മീൻ പിടിക്കുന്നതിനിടെയാണ് അപകടമുണ്ടായത്.
ജൂൺ 29 നാണ് പ്രവീസ് മക്കൾക്കൊപ്പം രണ്ട് നോട്ടിക്കല് മൈല് ദൂരെ ഉള്ക്കടലില് മീൻ പിടിക്കാനെത്തിയത്. അതിനിടെ വലയിൽ കുടുങ്ങിയ ജെല്ലിഫിഷിനെ എടുത്തുമാറ്റുന്നതിനിടയിൽ കണ്ണിൽ തെറിച്ചു. അലർജി ബാധിച്ച് കണ്ണില് നീരു വന്നതോടെ പുല്ലുവിള ആശുപത്രിയില് ചികിത്സ തേടി. അസുഖം കൂടിയതോടെ ബന്ധുക്കള് നെയ്യാറ്റിൻകര ജനറല് ആശുപത്രിയിലേക്ക് കൊണ്ടുപോയി. അവിടെനിന്ന് മെഡിക്കല് കോളജ് ആശുപത്രിയിലേക്ക് കൊണ്ടുപോകുമ്പോഴായിരുന്നു മരണം.
Recent Comments