ആറ്റിങ്ങൽ: എറണാകുളത്ത് വച്ചു നടന്ന സംസ്ഥാന സ്കൂൾ ശാസ്ത്രോത്സവത്തിൽ ഹയർ സെക്കന്ററി വിഭാഗം ഗണിത ശാസ്ത്ര ക്വിസിൽ A ഗ്രേഡോടു കൂടി രണ്ടാം സ്ഥാനം കരസ്ഥമാക്കിയ ആറ്റിങ്ങൽ മോഡൽ ബോയ്സ് ഹയർസെക്കന്ററി സ്കൂളിലെ പ്ലസ് വൺ വിദ്യാർത്ഥി ശ്രീഹരി വിനോദ്.
തിരുവനന്തപുരം
ലഹരിമുക്ത കേരളം പദ്ധതിയുടെ ഭാഗമായുള്ള ‘യോദ്ധാവ്‌’ ഓപ്പറേഷന്റെ ഭാഗമായി നടത്തിയ പരിശോധനയിൽ എംഡിഎംഎയും കഞ്ചാവുമായി നാലുപേർ പിടിയിൽ.
ബീമാപള്ളി സ്വദേശി സെയ്‌ദലി, മാണിക്യവിളാകം സ്വദേശി അക്ബർ, കമലേശ്വരം സ്വദേശി മെഹ്റാജ്‌, മുട്ടത്തറ സ്വദേശി മുഹമ്മദ്‌ ആദിൽ എന്നിവരാണ്‌ പിടിയിലായത്‌. ഫ്ലാറ്റുകൾ കേന്ദ്രീകരിച്ച്‌ മയക്കുമരുന്ന്‌ വിതരണം നടത്തുന്നുവെന്ന വിവരത്തിന്റെ അടിസ്ഥാനത്തിൽ ശംഖുംമുഖം അസി. കമീഷണർ ഡി കെ പൃഥ്വിരാജിന്റെ നേതൃത്വത്തിലായിരുന്നു പരിശോധന.
25 കിലോ കഞ്ചാവുമായാണ്‌ സെയ്‌ദലിയെ പൂന്തുറ പൊലീസ്‌ അറസ്റ്റ്‌ ചെയ്‌തത്‌. ഓവർ ബ്രിഡ്‌ജ്‌, തകരപ്പറമ്പ്‌ ഭാഗങ്ങളിൽ നടത്തിയ വാഹന പരിശോധനയ്‌ക്കിടെ 2.4 ഗ്രാം എംഡിഎംഎയുമായിട്ടാണ്‌ അക്ബറും മെഹ്‌റാജും വഞ്ചിയൂർ പൊലീസിന്റെ പിടിയിലായത്‌.
ചാക്ക ബൈപാസിലെ ഫ്ലാറ്റുകൾ കേന്ദ്രീകരിച്ചുള്ള പരിശോധനയിലാണ്‌ ആദിൽ പേട്ട പൊലീസിന്റെ പിടിയിലായത്‌. ഇയാളിൽനിന്ന്‌ 4 ഗ്രാം എംഡിഎംഎയും 4.36 ഗ്രാം കഞ്ചാവും 95,000 രൂപയും പിടിച്ചെടുത്തിട്ടുണ്ട്‌. എംഡിഎംഎ വിതരണത്തിനായി സൂക്ഷിച്ചിരുന്ന അമ്പതോളം കവറും അനുബന്ധ സാമഗ്രികളും പിടികൂടി. കോവളം, പൂന്തുറ, മ്യൂസിയം പൊലീസ്‌ സ്റ്റേഷനുകളിൽ ഇയാൾക്കെതിരെ കേസുണ്ട്‌.
പൂന്തുറ സിഐ ജെ പ്രദീപ്‌, വഞ്ചിയൂർ സിഐ ഡിപിൻ, എസ്‌ഐമാരായ അനീഷ്‌കുമാർ, ജയശ്രീ, സുധീഷ്‌കുമാർ, എഎസ്‌ഐ സാജുരാജ്‌, സിപിഒമാരായ ബിജു ആർ നായർ, ദീപു, രാജേഷ്, ജോസ്‌, മുനീർ, ശരത്ത്‌, പ്രശാന്ത്‌, ജയരാജ്‌, രഞ്ജിത്ത്‌, ജോയി, ഗോഡ്‌വിൻ എന്നിവരാണ്‌ പ്രതികളെ അറസ്റ്റ്‌ ചെയ്‌തത്‌. കോടതിയിൽ ഹാജരാക്കി റിമാൻഡ്‌ ചെയ്തു.
മാറനല്ലൂർ: പെരുമ്പഴുതൂർ കീളിയോടു സൗമ്യ ഭവനിൽ വിജയകുമാരൻ നായർ (64) ൻ്റെ തിരോധാനത്തിൽ ആണ് ദുരൂഹത ഉള്ളതായി മകൻ സന്തോഷ് മാറനല്ലൂർ പോലീസിൽ പരാതി നൽകിയിരിക്കുന്നത്. 2019 ഡിസംബർ മുതലാണ് ഹോട്ടൽ തൊഴിലാളി കൂടിയായ വിജയകുമാരൻ നായരെ കാണാതാകുന്നത്. ഭാര്യ ഇന്ദിര ഭർത്താവിനെ കണ്ടെത്തിത്തരണം എന്ന് ആവശ്യപ്പെട്ട് മാറനല്ലൂർ പോലീസിൽ പരാതി നൽകിയിരുന്നു.
മൂന്ന് വർഷങ്ങൾക്കിപ്പുറം സന്തോഷിൻ്റെ സുഹൃത്ത് അഭിലാഷിനോട് ഇയാളുടെ സുഹൃത്ത് യാദൃശ്ചികമായി വിജയകുമാരൻ നായരെ കാണാതായത് അദ്ദേഹം മരിച്ചത് കൊണ്ടാണ് എന്നും മദ്യപസങ്കേതത്തിൽ വച്ച് വാക്ക് തർക്കമുണ്ടായി സുഹൃത്തുക്കളിൽ ഒരാൾ വിജയകുമാരനെ മർദ്ദിക്കുകയും ഇതിൻ്റെ ആഘാതത്തിൽ ഉയരത്തിൽ നിന്നും നിലത്ത് വീണ വിജയകുമാരൻ നായരുടെ കഴുത്ത് ഒടിഞ്ഞു ജീവൻ നഷ്ടപ്പെടുകയും ചെയ്‌തെന്നും ശേഷം മൃതദേഹം മദ്യപസങ്കേതത്തിൽ കുഴിച്ചിട്ടുവെന്നും പറഞ്ഞു. മർദിച്ച ആളുടെ ബന്ധുവാണ് ഈ വിവരം പുറത്തു വിട്ടത്. തുടർന്നാണ് അച്ഛൻ ജീവിച്ചിരിപ്പുണ്ടോ മരിച്ചോ എന്നുള്ളത് അന്വേഷിച്ചു കണ്ടെത്തി സഹായിക്കണം എന്ന് ആവശ്യപ്പെട്ട് സന്തോഷ് പരാതി നൽകിയിരിക്കുന്നത്.
ജനപ്രിയ മദ്യങ്ങളുടെ ലഭ്യതക്കുറവ് സര്‍ക്കാരിന്‍റെ ശ്രദ്ധയില്‍പെട്ടിട്ടുണ്ടെന്ന് മന്ത്രി എം ബി രാജേഷ് പറഞ്ഞു. ഡിസ്റ്റിലറികളിൽ നിർമാണം കുറഞ്ഞതാണ് കാരണം.
പ്രശ്നം സർക്കാരിന്‍റെ പരിഗണനയിലാണ്. ഇതിന് വേഗത്തിൽ പരിഹാരം കാണുമെന്നും മന്ത്രി പറഞ്ഞു. സംസ്ഥാനത്ത് വിലകുറഞ്ഞ മദ്യം കിട്ടാനില്ലാത്ത അവസ്ഥയുണ്ട്. 750 രൂപവരെ വിലവരുന്ന മദ്യമാണ് കിട്ടാത്തത്. ബെവ്‌കോ ഔട്ട്‌ലറ്റുകളില്‍ വിലകുറഞ്ഞ മദ്യം കിട്ടാനില്ല.
ബാറുകളിലും വിലകുറഞ്ഞ മദ്യമില്ല. ഇതുമൂലം കഴിഞ്ഞ കുറച്ച് ദിവസങ്ങളായി മദ്യവില്‍പനശാലകൾ വന്‍ പ്രതിസന്ധി നേരിടുകയാണ്. ബെവ്കോയ്ക്ക് വലിയ വരുമാനമുണ്ടാക്കുന്നത് കുറഞ്ഞ നിരക്കിലുള്ള മദ്യവിൽപ്പനയിലൂടെയാണ്. ഇടത്തരം മദ്യ ബ്രാൻറുകളുടെ വിതരണം കമ്പനികള്‍ കുറച്ചത് ബെവ്കോയെയും പ്രതിസന്ധിയിലാക്കിയിരിക്കുകയാണ്. സ്പിരിറ്റിന്‍റെ വില കൂടിയതിനാൽ മദ്യവില കൂട്ടണമെന്ന് കമ്പനികൾ ആവശ്യപ്പെട്ടിട്ടുണ്ട്. ഇതിൽ നടപടി ഇല്ലാതെ വന്നതോടെ മദ്യ വിതരണം കമ്പനികള്‍ കുറയ്ക്കുകയായിരുന്നു.
മൂന്നാര്‍- കുണ്ടള റോഡില്‍ മണ്ണിടിച്ചിലില്‍ കാണാതായ വിനോദസഞ്ചാരിയായ യുവാവിന്റെ മൃതദേഹം കണ്ടെത്തി. കോഴിക്കോട് അശോകപുരം കുന്നിയില്‍കാവ് കല്ലട വീട്ടില്‍ രൂപേഷി (40)ന്റെ മൃതദേഹമാണ് കണ്ടെത്തിയത്. രാവിലെ അഗ്നിരക്ഷാസേനയും നാട്ടുകാരും പൊലീസും ചേര്‍ന്ന് നടത്തിയ തിരച്ചിലിലാണ് മൃതദേഹം കണ്ടെത്തിയത്.
വട്ടവട റോഡിന് അരകിലോമീറ്റര്‍ താഴെ നിന്നാണ് മൃതദേഹം കണ്ടെത്തിയത്. കാട്ടാനശല്യവും കനത്ത മഴയും മൂലം നിര്‍ത്തിവെച്ച തിരച്ചില്‍ രാവിലെ ഏഴുമണിയോടെ പുനരാരംഭിക്കുകയായിരുന്നു. വിനോദസഞ്ചാരത്തിനെത്തിയ രൂപേഷ് ഇന്നലെ വൈകീട്ടാണ് അപകടത്തില്‍പ്പെട്ടത്. മൂന്നാര്‍ മേഖലയില്‍ ടോപ്പ് സ്‌റ്റേഷനും കുണ്ടള അണക്കെട്ടിനും ഇടയിലുള്ള പ്രദേശത്ത് ശനിയാഴ്ച വൈകീട്ട് മൂന്നരയോടെയാണ് ഉരുള്‍പൊട്ടലുണ്ടായത്.
കനത്ത മഴയെത്തുടര്‍ന്നുണ്ടായ മണ്ണിടിച്ചിലിലും ഉരുള്‍ പൊട്ടലിലും കോഴിക്കോട് വടകര സ്വദേശികളായ വിനോദസഞ്ചാരികളുടെ മിനിബസ് കൊക്കയിലേക്ക് ഒഴുകിപ്പോയി. വടകരയില്‍നിന്ന് രണ്ട് വാഹനത്തിലെത്തിയ സംഘം ടോപ്പ് സ്‌റ്റേഷന്‍ സന്ദര്‍ശിച്ച്‌ അണക്കെട്ട് കാണാന്‍ വരികയായിരുന്നു. ബസില്‍ 11 പേരാണുണ്ടായിരുന്നത്. വാഹനത്തിലുണ്ടായിരുന്ന രൂപേഷ് ഒഴികെയുള്ളവര്‍ കഷ്ടിച്ച്‌ രക്ഷപ്പെടുകയായിരുന്നു. ഉരുള്‍പൊട്ടലില്‍ ഒലിച്ചുപോയ ബസ് 750 മീറ്റര്‍ താഴെനിന്ന് കണ്ടെത്തുകയായിരുന്നു. മിനി ബസ് നിശ്ശേഷം തകര്‍ന്ന നിലയിലാണ്.
ആറ്റിങ്ങൽ: രാജ്ഭവൻ മാർച്ചിൽ മുഴുവൻ തൊഴിലാളികളും പങ്കെടുക്കുമെന്ന്
ജനറൽ വർക്കേഴ്സ് യൂണിയൻ (സി.ഐ.ടി.യു )ആറ്റിങ്ങൽ ഏരിയ കൺവെൻഷൻ. ആറ്റിങ്ങൽ എസ്.ഡി.ബാലൻ സ്മാരകഹാളിൽ നടന്ന കൺവെൻഷനിൽ
ജില്ലാ ജനറൽ സെക്രട്ടറി കേശവൻകുട്ടി ഉദ്ഘാടനം ചെയ്തു. ഏരിയ പ്രസിഡന്റ് ഗായത്രിദേവി അധ്യക്ഷ വഹിച്ച കൺവെൻഷനിൽ സി.ഐ.ടി യു ഏരിയ സെക്രട്ടറി അഞ്ചുതെങ്ങ് സുരേന്ദ്രൻ, പ്രസിഡന്റ് എം.മുരളി, ജില്ലാ ജോ.സെക്രട്ടറി ബി. വിജയകുമാർ, രാജശേകരൻ, അരുൺ തുടങ്ങിയവർ സംസാരിച്ചു. സെക്രട്ടറി എസ്.ചന്ദ്രൻ റിപ്പോർട്ട്‌ അവതരിപ്പിച്ചു.
ആറ്റിങ്ങൽഏരിയ ഭാരവാഹികളായി ബി.എൻ.സൈജു രാജ് (പ്രസിഡന്റ്), ഷൈനിചന്ദ്രൻ (വൈസ് പ്രസിഡന്റ്), എസ് ചന്ദ്രൻ (സെക്രട്ടറി), കെ. മോഹനൻ,എസ്.സാബു (ജോ.സെക്രട്ടറി), ഗായത്രിദേവി (ട്രഷറർ) എന്നിവരെ തിരഞ്ഞെടുത്തു. 21പേരുള്ള എക്സിക്യൂട്ടീവ് കമ്മിറ്റിയെ കൺവെൻഷൻ തെരഞ്ഞെടുത്തു. പഞ്ചായത്ത്‌ കൺവെൻഷനുകൾ കിഴുവിലം 27, അഞ്ചുതെങ്ങ് 29, ചിറയിൻകീഴ് 28, കടയ്ക്കാവൂർ, ഡിസംബർ 1,
ആറ്റിങ്ങൽ 2, വക്കം3, മുദാക്കൽ 4 തീയ്യതികളിൽ നടക്കും.
Recent Comments