സാന്ത്വനം പദ്ധതിയുമായി കുടുംബശ്രീ

by Midhun HP News | Jul 27, 2022 | Latest News, കേരളം, ജില്ലാ വാർത്ത

തിരുവനന്തപുരം: ആരോഗ്യപരിപാലന രംഗത്ത് അനുകരണീയ സംരംഭ മാതൃകയാണ് കുടുംബശ്രീയുടെ സാന്ത്വനം പദ്ധതി. 2006 ൽ ആണ് സാന്ത്വനം പദ്ധതി ആവിഷ്‌കരിച്ചത്. കുടുംബശ്രീ വനിതകൾക്ക് പുതിയൊരു സംരംഭ മാതൃകയും അതിനോടൊപ്പം ജനങ്ങൾക്ക് ആരോഗ്യപരിരക്ഷയും ഉറപ്പാക്കാൻ ലക്ഷ്യമിട്ട് ആരംഭിച്ച പദ്ധതിയാണ് ഇത്.

വീടുകളിൽ നേരിട്ടെത്തി ബിപി, പ്രമേഹം എന്നിവ പരിശോധിച്ച് അതിലൂടെ വരുമാനം നേടാൻ കുടുംബശ്രീ വനിതകൾക്ക് വഴിയൊരുക്കുന്നു. സംരംഭ മേഖലയിൽ താത്പര്യമുള്ള, പത്താം ക്ലാസ് വിജയിച്ച സ്ത്രീകൾക്ക് ഹെൽത്ത് ആക്ഷൻ ബൈ പീപ്പിൾ ഏഴ് ദിവസം പരിശീലനം നൽകുന്നു. ഉയരം, ശരീരഭാരം, ബോഡി മാസ് ഇൻഡക്സ്, രക്തസമ്മർദ്ദം, രക്തക്കുഴലിലെ ഗ്ലൂക്കോസിന്റെ അളവ്, കൊളസ്ട്രോൾ എന്നിവ പരിശോധിക്കാൻ പരിശീലനം നൽകി ഉപകരണങ്ങൾ അടങ്ങിയ കിറ്റും നൽകുന്നു. വിരൽത്തുമ്പിൽനിന്ന് രക്തം എടുത്ത് പരിശോധിക്കുന്ന ഡിജിറ്റൽ ഉപകരണങ്ങളുടെ സഹായത്തോടെയാണ് സാന്ത്വനം വോളണ്ടിയർമാർ സേവനം നൽകുന്നത്.

പരിശോധിക്കാനുള്ള ഉപകരണങ്ങൾ അടങ്ങിയ കിറ്റിനുള്ള തുക വോളണ്ടിയർമാർ നൽകണം. ഇതിനായി വായ്പ കുടുംബശ്രീ സഹായത്തോടെ ലഭിക്കും. കൊളസ്ട്രോൾ പരിശോധയ്ക്ക് ഉപയോഗിക്കുന്ന സ്ട്രിപ് പോലുള്ളവയ്ക്ക് സബ്സിഡിയും നൽകും. വോളണ്ടിയർമാർ കാലാകാലങ്ങളിൽ തങ്ങളുടെ രജിസ്ട്രേഷൻ കാർഡ് പുതുക്കണം.
ഓരോ സേവനത്തിനും ചെറിയ ഫീസ് വാങ്ങിയാണ് വരുമാനം കണ്ടെത്തുന്നത്. കുടുംബശ്രീയുടെ നിർദ്ദേശത്തിനനുസരിച്ചാണ് സേവനങ്ങൾക്കുള്ള നിരക്ക് നിശ്ചയിച്ചിട്ടുള്ളത്. കാര്യക്ഷമതയോടെയും കൃത്യനിഷ്ഠയോടെയും പ്രവർത്തിക്കുന്ന സാന്ത്വനം അംഗങ്ങൾക്ക് മികച്ച വരുമാനമാണ് ലഭിക്കുന്നത്. കുറഞ്ഞത് 15000 രൂപ മുതൽ 50000 രൂപവരെ മാസവരുമാനം നേടുന്ന സാന്ത്വനം വോളണ്ടിയർമാരുണ്ട്. സേവന സ്വീകർത്താവിനെ സംബന്ധിച്ചിടത്തോളം ആവശ്യ സമയത്ത് വീട്ടിൽ തന്നെ സേവനം ലഭിക്കുമെന്നതിനാൽ യാത്രാക്കൂലി ഉൾപ്പെടെ ചെലവ് കുറയ്ക്കാൻ സാധിക്കുന്നു. നിലവിൽ 400 ഓളം സാന്ത്വനം വോളന്റിയർമാർ കേരളത്തിൽ പ്രവർത്തിക്കുന്നുണ്ട്.

ഗണേശോത്സവം 2022-ന്റെ പുരസ്കാര വിതരണവും സ്വാഗത സംഘം കമ്മിറ്റിയും ജൂലൈ 31ന്

by Midhun HP News | Jul 27, 2022 | Latest News, കേരളം, ജില്ലാ വാർത്ത

ആറ്റിങ്ങൽ: ശ്രീ ഗണേശോത്സവ സമിതിയുടെയും ശ്രീ ഗണേശോത്സവ ടെമ്പിൾ ട്രസ്റ്റിന്റേയും നേതൃത്വത്തിൽ നടക്കുന്ന ഗണേശോത്സവം 2022-ന്റെ പുരസ്കാര വിതരണവും സ്വാഗത സംഘം കമ്മിറ്റിയും ജൂലൈ 31 ഞായറാഴ്ച വൈകുന്നേരം 3.30 ന് ആറ്റിങ്ങൽ മുൻസിപ്പൽ ലൈബ്രറി ഹാളിൽ വച്ച് നടക്കും.

ചടങ്ങിൽ ഡോ.ജയരാജു ( മുൻ അനർട്ട് ഡയറക്ടർ അദ്ധ്യക്ഷത വഹിക്കും. ഡോ.ചന്ദ്രമോഹൻ ( മുൻകണ്ണൂർ യൂണിവേഴ്സിറ്റി വൈസ് ചാൻസിലർ ഉത്ഘാടനം നിർവ്വഹിക്കും. സ്വാമി അദ്വൈതാനന്ദപുരി, രാമവർമ്മ തമ്പുരാൻ കിളിമാനൂർ കൊട്ടാരം, തോട്ടയ്ക്കാട് ശരി, പാർത്ഥസാരഥി, അനിൽ പഴഞ്ചിവസിതാര ബാലചന്ദ്രൻ,സുജിത് ഭവാനന്ദൻ,വക്കം അജിത് എന്നിവർ പങ്കെടുക്കും.

ഇക്കൊല്ലത്തെ ഗണേശോത്സവ സമിതി പുരസ്കാരം ഡോ.രജിത്കുമാർ (ബിഗ് ബോസ് ഫെയിം), മാതാ അംബികാ ചൈതന്യമി (ചിന്താമണി ആശ്രമം മൈസൂർ), പി. ജെ നഹാസ് (ചെയർമാൻ കടുവയിൽ തങ്ങൾ ചാരിറ്റബിൾ ട്രസ്റ്റ്), രജേഷ് നമ്പൂതിരി കിഴക്കിലും, സൗത്ത് ഇൻഡ്യൻ വിനോദ്, പുരുഷോത്തമൻ നമ്പൂതിരി, എസ് അബ്ദുൽ നാസർ (അറേബ്യൻ ജവലറി), ശ്യാം അലിങ്കൽ, ഡോ.ബാബു (ബാബ ഹോസ്പിറ്റൽ), പി തങ്കരാജൻ (ഭഗവതി ലോട്ടറി), ബൈജു ശില്പി (ക്ഷേത്ര നിർമ്മാണം), രാമവർമ്മ തമ്പുരാൻ (കിളിമാനൂർ കൊട്ടാരം), എസ്. ജയൻ ദാസ് (കാമറ മാൻ, ആക്ടർ), നടനഭൂഷണം പത്മകുമാർ (നൃത്തം), കടയ്ക്കൽ രാജു (വയലിനിസ്റ്റ്), മുദാക്കൽ ഹരികുമാർ (ഹിന്ദുസ്ഥാനി തബല), കല്ലറ മുരളി (ഗായകൻ), സിദ്ധി സുനിൽ (ഗായിക), ആറ്റിങ്ങൽ മധുകുമാർ (സംഗീതം), വക്കം ദാസൻ (മൃദംഗം) എന്നിവർക്ക് നൽകി ആദരിക്കും. ചിത്രരചനാ മത്സരാർത്ഥികൾക്ക് സമ്മാനദാനവിതരണവും ഉണ്ടായിരിക്കുന്നതാണ്.

കെപിഎസ്ടിഎ കിളിമാനൂർ ഉപ ജില്ല കുത്തിയിരിപ്പ് സമരം നടത്തി

by Midhun HP News | Jul 27, 2022 | Latest News, കേരളം, ജില്ലാ വാർത്ത

കിളിമാനൂർ: സ്കൂൾ കുട്ടികളുടെ ഉച്ച ഭക്ഷണത്തിനുള്ള തുക വർധിപ്പിക്കുക, കുടിശ്ശിക തുക എത്രയും വേഗം വിതരണംചെയ്യുക എന്നീ ആവശ്യങ്ങൾ ഉന്നയിച്ചു കൊണ്ട് കെപിഎസ്ടിഎ കിളിമാനൂർ ഉപജില്ലാ കമ്മിറ്റിയുടെ നേതൃത്വത്തിൽ കിളിമാനൂർ ഉപജില്ലാ വിദ്യാഭ്യാസ ഓഫീസിനു മുന്നിൽ കുത്തിയിരിപ്പ് സമരം സംഘടിപ്പിച്ചു.

ഉപജില്ലാ വൈസ് പ്രസിഡന്റ്‌ ജി എൽ ലാജി യുടെ അധ്യക്ഷതയിൽ നടന്ന സമരത്തിന് ഉപജില്ലാ സെക്രട്ടറി പി എ സാജൻ സ്വാഗതം ആശംസിച്ചു. റവന്യൂ ജില്ലാ ട്രഷറർ ഷമീം കിളിമാനൂർ സമരപരിപാടി ഉദ്ഘാടനം ചെയ്തു. സംസ്ഥാന കൗൺസിൽ അംഗം എസ് സബീർ മുഖ്യ പ്രഭാഷണം നടത്തി. ജില്ലാ വൈസ് പ്രസിഡന്റ്‌ എം ബിനുകുമാർ, അനൂപ് എം ജെ, മുഹമ്മദ്‌ അൻസാർ എ എം, പി വിജയകുമാരി, പി ബിനു, അഭിലാഷ് കെ എസ്, രഞ്ജിത് വെള്ളല്ലൂർ, ജസ്‌ന എ, ജെഫ്ന. എ എസ് തുടങ്ങിയവർ സംസാരിച്ചു. ഉപജില്ലാ ട്രഷറർ അജീഷ് എസ് എസ് നന്ദി രേഖപ്പെടുത്തി.

ആറ്റിങ്ങൽ കുന്നുവാരം യു.പി സ്കൂളിൽ അബ്‌ദുൾകലാം അനുസ്മരണ ദിനാചരണം

by Midhun HP News | Jul 27, 2022 | Latest News, കേരളം, ജില്ലാ വാർത്ത

ആറ്റിങ്ങൽ: എ പി ജെ അബ്ദുൽ കലാമിൻ്റെ അനുസ്മരണ ദിനമായ ഇന്ന് ആറ്റിങ്ങൽ കുന്നുവാരം യു.പി.സ്കൂളിൻ്റെയും ആറ്റിങ്ങൽ ലയൺസ് ക്ലബ്ബിൻ്റെയും സംയുക്താഭിമുഖ്യത്തിൽ സ്കൂളിൽ ഫലവൃക്ഷതൈ നട്ടു. ക്ലബ് പ്രസിഡൻ്റ് വിദ്യാധരൻ പിള്ള, സെക്രട്ടറി കബീർദാസ്, ട്രഷറർ അനിൽകുമാർ, റിജു രാജേന്ദ്രൻ, സ്കൂൾ ഹെഡ്മാസ്റ്റർ മധു.ജി.ആർ എന്നിവർ പരിപാടിക്ക് നേതൃത്വം നൽകി. അദ്ധ്യാപകരും, വിദ്യാർത്ഥികളും ചടങ്ങിൽ പങ്കെടുത്തു.

അപകടത്തിൽ പരിക്കേറ്റ് ചികിത്സയിലിരുന്ന കാനാറ സ്വദേശി മരണപെട്ടു

by Midhun HP News | Jul 27, 2022 | Latest News, കേരളം, ജില്ലാ വാർത്ത

കിളിമാനൂർ: കിളിമാനൂർ ടൗൺഹാളിനടുത്ത് ബൈപാസ് റോഡിൽ സ്ക്കൂട്ടി ഓടിച്ച് അപകടത്തിൽ പരിക്കേറ്റ് മെഡിക്കൽ കോളേജ് ആശുപത്രിയിൽ ചികിത്സയിലായിരുന്ന കാനാറ സ്വദേശിയായ അനന്തു (17) മരണപ്പെട്ടു.
ഞായറാഴ്ച രാത്രി 10 മണിയോടെയായിരുന്നു അപകടം. സ്ക്കൂട്ടിയിടിയേറ്റയാൾ സുഖം പ്രാപിച്ച് വരുന്നു. ഇന്ന് ഉച്ചയ്ക്ക് ശേഷം കാനാറ ശ്മശാനത്തിൽ സംസ്കരിക്കും.
കാനാറ ചരുവിളപുത്തൻ വീട്ടിൽ കവിതയുടെ മകനാണ്.
സഹോദരി: കാഞ്ചന

സിവില്‍ സപ്ലൈസ് ജീവനക്കാരൻ ക്വാര്‍ട്ടേഴ്‌സില്‍ തൂങ്ങിമരിച്ച നിലയില്‍

by Midhun HP News | Jul 27, 2022 | Latest News, കേരളം, ജില്ലാ വാർത്ത

കല്‍പ്പറ്റ: സിവില്‍ സപ്ലൈസ് ജീവനക്കാരനെ തൂങ്ങിമരിച്ച നിലയില്‍ കണ്ടെത്തി. പനമരം കണിയാമ്പറ്റ വില്ലേജ് ഓഫീസിന് സമീപം വാടക ക്വാര്‍ട്ടേഴ്‌സില്‍ താമസിക്കുന്ന വെള്ളാരംകുന്ന് പറമ്പത്ത് രാജേഷ് ആണ് മരിച്ചത്. ചെവ്വാഴ്ച വൈകീട്ട് നാലരയോടെയാണ് ഇയാളെ ക്വാര്‍ട്ടേഴ്‌സ് മുറിയില്‍ തൂങ്ങി മരിച്ച നിലയില്‍ കണ്ടെത്തിയത്. മരണകാരണം എന്താണെന്ന് വ്യക്തമാ‌‌യിട്ടില്ല. കമ്പളക്കാട് പൊലീസ് സ്ഥലത്തെത്തി തുടര്‍നടപടികള്‍ സ്വീകരിച്ചു.

പനമരം ബ്ലോക്ക് പഞ്ചായത്തിലെ ഓവര്‍സിയര്‍ ജാന്‍സി (സ്വപ്‌ന) യാണ് രാജേഷിന്റെ ഭാര്യ.
മക്കള്‍: കൃഷ്ണവേണി, യദുവര്‍ണ.