by Midhun HP News | Oct 7, 2026 | Latest News, കേരളം
കൊച്ചി: കേരളത്തിന് എയിംസ് അനുവദിക്കുന്നത് മുന്‍ഗണനയില്‍ ഇല്ലെന്ന് കേന്ദ്രസര്‍ക്കാര്‍ ഹൈക്കോടതിയില്‍. ആരോഗ്യരംഗം മോശമായ സംസ്ഥാനങ്ങള്‍ക്കാണ് ആദ്യപരിഗണനെയെന്നും കേരളം ആരോഗ്യരംഗത്ത് മുന്നിലാണെന്നും കേന്ദ്രസര്‍ക്കാര്‍ ഹൈക്കോടതിയെ അറിയിച്ചു. എന്നാല്‍ കേരളം എയിംസ് അര്‍ഹിക്കുന്നുണ്ടെന്നും ആരോഗ്യരംഗത്ത് കേരളം മുന്നില്‍ നില്‍ക്കുന്നത് എയിംസ് ലഭിക്കുന്നതിന് അയോഗ്യതയാണോയെന്നും ഹൈക്കോടതി കേന്ദസര്‍ക്കാരിനോട് ചോദിച്ചു.
കേരളത്തിന് എയിംസ് പരിഗണിക്കാത്ത കേന്ദ്ര സര്‍ക്കാരിന്റെ നടപടിയെ ചോദ്യം ചെയ്ത് കാസര്‍കോട്ട ഒരു കൂട്ടായ്മ നല്‍കിയ ഹര്‍ജി പരിഗണിക്കുന്നതിനിടെയാണ് കോടതിയുടെ വിമര്‍ശനം. ഹൈക്കോടതിയില്‍ നല്‍കിയ സത്യവാങ്മൂലത്തിലാണ് കേരളം എയിംസിന്റെ മുന്‍ഗണനാ പട്ടികയില്‍ ഇല്ലെന്ന് കേന്ദ്രം അറിയിച്ചത്. ആരോഗ്യരംഗത്ത് മോശം സാഹചര്യമുള്ള സംസ്ഥാനങ്ങള്‍ക്കാണ് എയിംസ് അനുവദിക്കുന്നതിന് മുന്‍ഗണനാ പട്ടികയില്‍ ഉള്ളതെന്നും അത്തരം സംസ്ഥാനങ്ങളാണ് പ്രഥമപരിഗണനയെന്നും കേന്ദ്രസര്‍ക്കാര്‍ പറയുന്നു. കേരളം ആരോഗ്യരംഗത്ത് മികച്ചതാണ്. 2030-31ലെ പദ്ധതിക്ക് അംഗീകാരം കിട്ടിയാല്‍ മാത്രമേ ഇക്കാര്യത്തില്‍ എന്തെങ്കിലും ഒരു ആലോചന നടത്താന്‍ കഴിയുകയുള്ളുവെന്ന് കേന്ദ്രസര്‍ക്കാര്‍ സത്യവാങ്മൂലത്തില്‍ പറയുന്നു.
കേരളം ആരോഗ്യരംഗത്ത് മികച്ചുനില്‍ക്കുന്നത് എയിംസ് നല്‍കുന്നതിനുള്ള അയോഗ്യതയാണോയെന്ന് ചീഫ് ജസ്റ്റിസ് അധ്യക്ഷനായ ബെഞ്ച് ചോദിച്ചു. ജനസാന്ദ്രത കൂടിയ സംസ്ഥാനം എന്ന നിലയില്‍ കേരളത്തിന് ഒരു എയിംസ് ആവശ്യമാണ്. കേരളത്തിന് അതിന് അര്‍ഹതയുണ്ട്.
കിനാലൂരില്‍ എയിംസിന് സ്ഥലം കണ്ടെത്തി അതിനുള്ള അപേക്ഷ ആരോഗ്യമന്ത്രാലയത്തിന് സമര്‍പ്പിച്ചിട്ട് വര്‍ഷങ്ങളായെന്നും കോടതി ചൂണ്ടിക്കാട്ടി. ഡല്‍ഹിയില്‍ ഏത് അര്‍ഥത്തിലാണ് എയിംസ് അനുവദിച്ചതെന്നും കോടതി ചോദിച്ചു. കേന്ദ്രസര്‍ക്കാര്‍ ഇക്കാര്യത്തില്‍ ഉചിതമായ നടപടികള്‍ സ്വീകരിക്കണമെന്ന് അറിയിച്ച ഹൈക്കോടതി ആറാഴ്ച കഴിഞ്ഞ വീണ്ടും ഹര്‍ജി പരിഗണിക്കും.
ഇക്കാര്യത്തില്‍ കേന്ദ്രമന്ത്രി സുരേഷ് ഗോപി പറയുന്നതിന് വിപരീതമായാണ് കേന്ദ്രസര്‍ക്കാര്‍ സുപ്രീം കോടതിയില്‍ സമര്‍പ്പിച്ച സത്യവാങ്മൂലം. ബിജെപി എംപി ആയതിനാല്‍ എയിംസ് തൃശൂരില്‍ വരേണ്ടെന്ന് സംസ്ഥാനം തീരുമാനിച്ചാല്‍ അവിടെ തന്നെ കൊണ്ടുവരുമെന്ന് സുരേഷ് ഗോപി ഇന്നലെ പറഞ്ഞിരുന്നു. എയിംസ് കേരളത്തില്‍ വരണമെന്നാണ് തന്റെ ആഗ്രഹമെന്നും അതിനു യോജ്യമായ സ്ഥലം തൃശൂരാണെന്നും സുരേഷ് ഗോപി പറഞ്ഞു.
by Midhun HP News | Oct 7, 2026 | Latest News, കേരളം
കൊച്ചി: എറണാകുളം മഹാരാജാസ് കോളജിലെ എസ്എഫ്ഐ നേതാവായിരുന്ന അഭിമന്യുവിനെ കൊലപ്പെടുത്തിയ കേസിൽ രഹസ്യ വിചാരണ വേണമെന്ന പ്രതികളുടെ ആവശ്യം ഹൈക്കോടതി തള്ളി. എറണാകുളം സെഷൻസ് കോടതിയുടെ പരിഗണനയിലുള്ള കേസിൽ രഹസ്യ വിചാരണ ആവശ്യമില്ലെന്ന് വ്യക്തമാക്കിയ വിചാരണക്കോടതിയുടെ ഉത്തരവ് ജസ്റ്റിസ് സി.എസ്. ഡയസ് ശരിവെച്ചു.
2018-ൽ മഹാരാജാസ് കോളജിൽ നടന്ന ക്യാമ്പസ് രാഷ്ട്രീയ സംഘർഷങ്ങൾക്കൊടുവിലാണ് ഒന്നാം വർഷ ബിരുദ വിദ്യാർഥിയായിരുന്ന അഭിമന്യു കുത്തേറ്റു മരിച്ചത്. നിലവിൽ കേസിൽ ഒന്നു മുതൽ 16 വരെയുള്ള പ്രതികൾക്കെതിരായ വിചാരണ എറണാകുളം സെഷൻസ് കോടതിയിൽ നടക്കുകയാണ്. 17 മുതൽ 26 വരെയുള്ള പ്രതികൾക്കെതിരെയുള്ള അന്വേഷണം പുരോഗമിക്കുന്ന ഘട്ടത്തിലാണ് വിചാരണ രഹസ്യമായി നടത്തണമെന്ന് ആവശ്യപ്പെട്ട് പ്രതികൾ ഹൈക്കോടതിയെ സമീപിച്ചത്.
കേസിന്റെ നിലവിലെ സാഹചര്യങ്ങൾ പരിശോധിക്കുമ്പോൾ രഹസ്യ വിചാരണ നടത്തേണ്ട അടിയന്തര സാഹചര്യവുമില്ലെന്ന് ജസ്റ്റിസ് സി.എസ്. ഡയസ് നിരീക്ഷിച്ചു. വിചാരണക്കോടതിയുടെ മുൻ ഉത്തരവിൽ നിയമപരമായ തെറ്റുകളോ അപാകതകളോ ഇല്ലെന്നും കോടതി വ്യക്തമാക്കി. എന്നാൽ പ്രതികൾ ഉന്നയിച്ച ചില ആശങ്കകൾ പൂർണ്ണമായി അവഗണിക്കാൻ കഴിയില്ലെന്ന് കോടതി ചൂണ്ടിക്കാട്ടി. കോടതിമുറിക്കുള്ളിൽ നടക്കുന്ന വിചാരണ നടപടികളോ പ്രതികളെയോ ഫോട്ടോ എടുക്കാനോ വിഡിയോ പകർത്താനോ ആരെയും അനുവദിക്കരുതെന്ന് ഹൈക്കോടതി നിർദ്ദേശം നൽകി. പൊലീസുമായി ഏകോപിപ്പിച്ച് വിചാരണക്കോടതി ഇക്കാര്യം ഉറപ്പുവരുത്തണം.
വിചാരണയുടെ സുതാര്യതയും നീതിയും ഉറപ്പാക്കുന്നതിനായി, നിർണ്ണായക ദൃക്സാക്ഷികളെ വിസ്തരിക്കുന്ന വേളയിൽ കോടതിമുറിയിലേക്ക് പൊതുജനങ്ങളുടെയോ ഏതെങ്കിലും പ്രത്യേക വ്യക്തികളുടെയോ പ്രവേശനം നിയന്ത്രിക്കാൻ വിചാരണക്കോടതിക്ക് വിവേചനാധികാരം ഉപയോഗിക്കാമെന്നും ഹൈക്കോടതി ഉത്തരവിൽ വ്യക്തമാക്കി.
by Midhun HP News | Oct 7, 2026 | Latest News, കേരളം
കോഴിക്കോട്: മദ്യപിച്ച് വാഹനമോടിച്ച് അപകടമുണ്ടാക്കിയ കേസിൽ യൂട്യൂബർ അശ്വന്ത് കോക്ക് ഹാജരാക്കിയത് കാലാവധി കഴിഞ്ഞ ലൈസൻസ്. സംഭവ ദിവസം ലൈസൻസ് കയ്യിൽ ഇല്ലെന്നാണ് അശ്വന്ത് പൊലീസിനെ അറിയിച്ചത്. പിന്നീട് സമർപ്പിച്ച ലൈസൻസ് പരിശോധിച്ചപ്പോഴാണ് കാലാവധി കഴിഞ്ഞത് മനസ്സിലാകുന്നത്.
2025 ഫെബ്രുവരിയിലാണ് ലൈസൻസിന്റെ കാലാവധി കഴിഞ്ഞത്. ഇതോടെ ലൈസൻസ് ഇല്ലാതെ വാഹനം ഓടിച്ചതിന് കൂടി അശ്വന്ത് കോക്കിനെതിരെ കേസ് എടുക്കും. 5 വർഷത്തേക്ക് ലൈസൻസ് പുതുക്കി നൽകില്ലെന്ന് മോട്ടോർ വാഹന വകുപ്പ് അറിയിച്ചു. 2005 ഫെബ്രുവരി 17 ന് പേരാമ്പ്ര സബ് ആർടി ഓഫിസിൽ നിന്ന് അനുവദിച്ച ലൈസൻസിന് 2025 ഫെബ്രുവരി 16 വരെ മാത്രമാണ് കാലാവധി ഉണ്ടായിരുന്നത്.
കഴിഞ്ഞ ദിവസമാണ് കോഴിക്കോട് നടക്കാവ് വെച്ച് അശ്വന്തിന്റെ വാഹനം കാറിലും ബൈക്കിലും ഇടിച്ച് അപകടമുണ്ടായത്. അപകടം ഉണ്ടാക്കിയ ശേഷം വാഹനം നിർത്താതെ ഓടിച്ചു പോകാൻ ശ്രമിച്ച അശ്വന്തിനെ നാട്ടുകാർ തടഞ്ഞു വച്ച ശേഷം ട്രാഫിക് പൊലീസിന്റെ സഹായത്തോടെ നടക്കാവ് പൊലീസ് കസ്റ്റഡിയിൽ എടുക്കുകയായിരുന്നു.
ഓടിക്കൂടിയ നാട്ടുകാരോട് തട്ടിക്കയറുന്ന അശ്വന്തിന്റെ വിഡിയോ പുറത്ത് വന്നിരുന്നു. മദ്യലഹരിയിലായിരുന്ന അശ്വന്തിനെ പൊലീസ് കസ്റ്റഡിയിലെടുത്ത ശേഷം പിന്നീട് ജാമ്യത്തിൽ വിടുകയായിരുന്നു. അശ്വന്ത് ഓടിച്ച വാഹനത്തിൽ നിന്നും രണ്ട് കുപ്പി മദ്യം കണ്ടെത്തിയിട്ടുണ്ട്. വാഹനത്തിൽ നിന്നും മദ്യവും എയർ ഗണ്ണും കണ്ടെത്തിയിരുന്നു. ഇനി താൻ മദ്യപിച്ച് വാഹനമോടിക്കില്ലെന്നും ചെയ്തത് തെറ്റാണെന്ന് അംഗീകരിക്കുന്നതായും അശ്വന്ത് പിന്നീട് യൂട്യൂബ് ചാനലിലൂടെ പ്രതികരിച്ചു.
by Midhun HP News | Oct 7, 2026 | Latest News, കേരളം
വാൽപ്പാറ: വാൽപ്പാറയ്ക്ക് സമീപം തേയിലത്തോട്ടത്തിന് നടുവിലൂടെ നടന്നുപോവുകയായിരുന്ന എസ്റ്റേറ്റ് സൂപ്പർവൈസർക്ക് നേരെ കരടിയുടെ ആക്രമണം. പച്ചമല എസ്റ്റേറ്റിന്റെ നോർത്ത് ഡിവിഷനിലെ സൂപ്പർവൈസറായ മോസസിനാണ് (58) വന്യമൃഗത്തിന്റെ ആക്രമണത്തിൽ ഗുരുതരമായി പരിക്കേറ്റത്.
‘റോട്ടിക്കട’ മേഖലയിലുള്ള ഒരു ബന്ധുവിന്റെ വീട് സന്ദർശിച്ച ശേഷം തിരികെ ജോലിസ്ഥലത്തേക്ക് കുറുക്കുവഴിയിലൂടെ നടന്നുപോവുകയായിരുന്നു മോസസ്. ഇതിനിടെ തേയിലച്ചെടികൾക്കിടയിൽ പതിയിരുന്ന കരടി പെട്ടെന്ന് ഇയാളുടെ നേർക്ക് ചാടിവീണ് ആക്രമിക്കുകയായിരുന്നു.
നിലത്തു വീണ മോസസ് ജീവൻ രക്ഷിക്കാൻ കരടിയോട് മല്ലിടുകയും ഉറക്കെ നിലവിളിക്കുകയും ചെയ്തു. ബഹളം കേട്ട് സമീപത്തുണ്ടായിരുന്ന നാട്ടുകാരും തോട്ടം തൊഴിലാളികളും വനംവകുപ്പ് ഉദ്യോഗസ്ഥരും ഓടിയെത്തിയതോടെയാണ് കരടി കാട്ടിലേക്ക് പിൻവാങ്ങിയത്. തുടർന്ന് മോസസിനെ ഉടൻതന്നെ വാൽപ്പാറ സർക്കാർ ആശുപത്രിയിൽ എത്തിച്ചു. പ്രാഥമിക ചികിത്സ നൽകിയെങ്കിലും ശരീരമാസകലം ആഴത്തിലുള്ള മുറിവുകളേറ്റതിനാൽ വിദഗ്ദ്ധ ചികിത്സയ്ക്കായി അദ്ദേഹത്തെ പൊള്ളാച്ചി സർക്കാർ ആശുപത്രിയിലേക്ക് മാറ്റി.
by Midhun HP News | Oct 7, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയില്‍ ചാഞ്ചാട്ടം. ഇന്നലെ രാവിലെ കുറഞ്ഞ സ്വര്‍ണവില ഉച്ചയോടെ വീണ്ടും ഉയര്‍ന്ന് 1,10,000ന് മുകളില്‍ എത്തിയിരുന്നു. എന്നാല്‍ ഇന്ന് രാവിലെ വീണ്ടും സ്വര്‍ണവില കുറയുന്ന കാഴ്ചയാണ് ദൃശ്യമായത്. ഇന്ന് പവന് 480 രൂപയാണ് കുറഞ്ഞത്. 1,09,680 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 60 രൂപയാണ് കുറഞ്ഞത്. 13,710 രൂപയാണ് ഒരു ഗ്രാം സ്വര്‍ണത്തിന്റെ വില.
യുഎസ് ഫെഡറല്‍ റിസര്‍വിന്റെ സെപ്റ്റംബറില്‍ നടന്ന യോഗത്തിന്റെ മിനിറ്റ്‌സ് ഇന്ന് പുറത്തുവരും. ഇതടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. പണപ്പെരുപ്പനിരക്ക് വര്‍ധിച്ച പശ്ചാത്തലത്തില്‍ പലിശനിരക്ക് വര്‍ധിപ്പിക്കാന്‍ യുഎസ് കേന്ദ്രബാങ്ക് തയ്യാറാവുമോ എന്നതടക്കമുള്ള കാര്യങ്ങള്‍ മിനിറ്റ്‌സില്‍ നിന്ന് വ്യക്തമാകും.
അതുകൊണ്ട് നിക്ഷേപകര്‍ ഏറെ കരുതലോടെയാണ് വിപണിയില്‍ ഇടപെടുന്നത്. ഇതിന് പുറമേ എണ്ണവിലയും സ്വര്‍ണവിലയെ സ്വാധീനിക്കുന്നുണ്ട്. അമേരിക്ക- ഇറാന് സംഘര്‍ഷവും സൗദി അറേബ്യ- യെമനിലെ ഇറാന് പിന്തുണയുള്ള ഹൂതി വിമതരും തമ്മിലുള്ള യുദ്ധവുമാണ് എണ്ണ വിപണിയെ സ്വാധീനിക്കുന്നത്. നിലവില്‍ ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് നൂറ് ഡോളറിന് മുകളിലാണ്. ബോണ്ട് യീല്‍ഡ് ഉയര്‍ന്ന് നില്‍ക്കുന്നതും ഡോളര്‍ ശക്തിയാര്‍ജിക്കുന്നതും സ്വര്‍ണവിലയില്‍ പ്രതിഫലിക്കുന്നുണ്ട്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 7, 2026 | Latest News, കേരളം
തിരുവനന്തപുരം: സംസ്ഥാനത്തിന്റെ വര്‍ധിച്ചുവരുന്ന വൈദ്യുതി ആവശ്യകത നിറവേറ്റുന്നതിനും ഭാവിയിലെ ഊര്‍ജ സുരക്ഷ ഉറപ്പാക്കുന്നതിനുമായി കേന്ദ്ര പൊതുമേഖലാ സ്ഥാപനമായ എന്‍ടിപിസിയുമായി (NTPC) ചേര്‍ന്ന് നിര്‍ണായക പദ്ധതികള്‍ നടപ്പിലാക്കാന്‍ ഒരുങ്ങി കേരളം. ഡല്‍ഹിയില്‍ നടന്ന ഉയര്‍ന്നതല ചര്‍ച്ചയിലാണ് സംസ്ഥാനത്തിന്റെ ഊര്‍ജ മേഖലയ്ക്ക് വന്‍ കുതിപ്പേകുന്ന തീരുമാനങ്ങള്‍ കൈക്കൊണ്ടത്.
പുനരുപയോഗ ഊര്‍ജ സംഭരണത്തിനായി കായംകുളത്ത് 2000 MWh ശേഷിയുള്ള ബാറ്ററി എനര്‍ജി സ്റ്റോറേജ് സിസ്റ്റം (BESS) സ്ഥാപിക്കാന്‍ തീരുമാനമായി. കെഎസ്ഇബി, എന്‍ടിപിസി, എന്‍ടിപിസി ഗ്രീന്‍ എനര്‍ജി ലിമിറ്റഡ് എന്നിവര്‍ സംയുക്തമായാണ് പദ്ധതി നടപ്പിലാക്കുക. ഇതിന് പുറമെ, 2027 മാര്‍ച്ചോടെ പോത്തന്‍കോട്, ശ്രീകണ്ഠപുരം എന്നിവിടങ്ങളില്‍ 80 MWh വീതം ശേഷിയുള്ള ബിഇഎസ്എസ് പദ്ധതികളും കമ്മീഷന്‍ ചെയ്യും.
ഉടന്‍ നേരിടുന്ന വൈദ്യുതി ക്ഷാമം പരിഹരിക്കുന്നതിനായി മഹാരാഷ്ട്രയിലെ എന്‍.ടി.പി.സി സിന്നര്‍ പദ്ധതിയില്‍ നിന്ന് 300 MW വരെ വൈദ്യുതി യൂണിറ്റിന് 5.18 നിരക്കില്‍ ലഭ്യമാക്കാന്‍ ധാരണയായി. ഒപ്പം കായംകുളത്ത് എന്‍.ടി.പി.സി നടപ്പാക്കുന്ന 27 MW സോളാര്‍ പദ്ധതിയുടെ തുടര്‍നടപടികള്‍ വേഗത്തിലാക്കാനും യോഗത്തില്‍ തീരുമാനമായിട്ടുണ്ട്.സംസ്ഥാനത്തിന്റെ ദീര്‍ഘകാല ആവശ്യങ്ങള്‍ക്കായി സമര്‍പ്പിത വൈദ്യുതി നിലയം സ്ഥാപിക്കണമെന്ന് എന്‍.ടി.പി.സിയോട് ആവശ്യപ്പെടുകയും, രാമഗുണ്ടം പവര്‍ പ്ലാന്റില്‍ നിന്ന് വൈദ്യുതി ലഭ്യമാക്കുന്നതിനുള്ള ധാരണാപത്രത്തില്‍ ഒപ്പുവെക്കാന്‍ എന്‍.ടി.പി.സി സന്നദ്ധത അറിയിക്കുകയും ചെയ്തു. കൂടാതെ കെ.എസ്.ഇ.ബിയുടെ സാങ്കേതിക, മാനേജ്‌മെന്റ് പ്രവര്‍ത്തനങ്ങള്‍ കൂടുതല്‍ കാര്യക്ഷമമാക്കാന്‍ എന്‍.ടി.പി.സിയുടെ പ്രൊഫഷണല്‍ സഹായവും ലഭ്യമാക്കും.
Recent Comments