by Midhun HP News | Sep 24, 2026 | Latest News, കേരളം
തിരുവനന്തപുരം: മുഖ്യമന്ത്രി വി ഡി സതീശന് അടക്കമുള്ളവരെ പ്രതിരോധത്തിലാക്കി സിഎംആര്‍എല്‍ മാസപ്പടി ഡയറിയുടെ പേജ് എന്ന് അവകാശപ്പെട്ട് രേഖ പുറത്തുവിട്ട് ബിജെപി നേതാവ് ഷോണ്‍ ജോര്‍ജ്. മാസപ്പടി കേസുമായി ബന്ധപ്പെട്ട് വിവാദ കമ്പനിയുടെ എംഡിയില്‍ നിന്ന് പിടിച്ചെടുത്ത ഡയറിയുടെ പേജ് എന്ന പേരില്‍ ഫെയ്‌സ്ബുക്കിലാണ് ഷോണ്‍ ജോര്‍ജ് രേഖ പങ്കുവെച്ചത്. വിഡി സതീശന്റേത് അടക്കം ഇടത്- വലത് നേതാക്കളുടെ പേരുകള്‍ ഉള്‍പ്പെടുന്ന ഡയറിയുടെ പേജ് എസ്എഫ്ഐഒ കോടതിയില്‍ സമര്‍പ്പിച്ച രേഖയെന്നാണ് ഷോണ്‍ ജോര്‍ജിന്റെ അവകാശവാദം.
രേഖയില്‍ വി ഡി സതീശന് പുറമേ പിണറായി, ചെന്നിത്തല, ഹൈബി ഈഡന്‍, കെ മുരളീധരന്‍, ജി സുധാകരന്‍, ശര്‍മ്മ, പന്ന്യന്‍, കെ ചന്ദ്രന്‍പിള്ള, പി രാജീവ് അടക്കം നിരവധി ഇടത് – വലത് നേതാക്കളുടെ പേര് ഇടംപിടിച്ചിട്ടുണ്ട്. ഡയറിയുടെ പേജില്‍ വി ഡി സതീശന് നേരെ അഞ്ചുലക്ഷം രൂപയാണ് കാണിച്ചിരിക്കുന്നത്. ഈ പേജിലെ കണക്കുകള്‍ പല ചോദ്യങ്ങള്‍ക്കും മറുപടി നല്‍കുന്നതാണെന്നാണ് ഷോണ്‍ ജോര്‍ജ് ഫെയ്‌സ്ബുക്കില്‍ കുറിച്ചിരിക്കുന്നത്.
‘എന്തുകൊണ്ട് വിജിലന്‍സ് അന്വേഷണം ഇല്ല? ഈ പേജിലെ കണക്കുകള്‍ പല ചോദ്യങ്ങള്‍ക്കും മറുപടി നല്‍കുന്നതാണ്. വിവാദ കമ്പനിയുടെ മാനേജിംഗ് ഡയറക്ടറില്‍ നിന്ന് പിടിച്ചെടുത്ത ഡയറിയിലെ എന്‍ട്രികളില്‍ ഒരു പേജ് ആണ് ഇത് , എസ്എഫ്ഐഒ കുറ്റപത്രത്തില്‍ കോടതിയില്‍ സമര്‍പ്പിച്ച രേഖകളില്‍ ഒന്ന്’- ഡയറിയുടെ പേജ് സഹിതമുള്ള കുറിപ്പില്‍ ഷോണ്‍ ജോര്‍ജ് കുറിച്ചു.
by Midhun HP News | Sep 24, 2026 | Latest News, കേരളം
തിരുവനന്തപുരം: സംസ്ഥാനത്ത് ഇന്നും ഒറ്റപ്പെട്ട ശക്തമായ മഴയ്ക്ക് സാധ്യത. അഞ്ചു ജില്ലകളില്‍ യെല്ലോ അലര്‍ട്ട് പുറപ്പെടുവിച്ചിട്ടുണ്ട്. വടക്കന്‍ കേരളത്തിലാണ് ശക്തമായ മഴ മുന്നറിയിപ്പുള്ളത്. കാസര്‍കോട്, കണ്ണൂര്‍, വയനാട്, കോഴിക്കോട്, മലപ്പുറം ജില്ലകളിലാണ് യെല്ലോ അലര്‍ട്ട് പുറപ്പെടുവിച്ചിട്ടുള്ളത്.
ഒറ്റപ്പെട്ടയിടങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 40 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. നാളെ എട്ടു ജില്ലകളിലും ശക്തമായ മഴ മുന്നറിയിപ്പുണ്ട്. തിരുവനന്തപുരം, കൊല്ലം, പത്തനംതിട്ട, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് നാളെ യെല്ലോ അലര്‍ട്ട്.
ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദ്ദത്തിന്റെ സ്വാധീനഫലമായാണ് മഴ ശക്തമായത്. ഇതിന്റെ സ്വാധീനഫലമായി സെപ്റ്റംബര്‍ 25 വരെയുള്ള തീയതികളില്‍ ഒറ്റപ്പെട്ട സ്ഥലങ്ങളില്‍ ശക്തമായ മഴയ്ക്ക് സാധ്യത.
സെപ്റ്റംബര്‍ 26 വരെയുള്ള തീയതികളില്‍ കേരളത്തില്‍ ഒറ്റപ്പെട്ട സ്ഥലങ്ങളില്‍ ഇടി മിന്നലിനും, മണിക്കൂറില്‍ 30 – 40 കിലോമീറ്റര്‍ വേഗതയില്‍ ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.
മത്സ്യത്തൊഴിലാളി ജാഗ്രത നിര്‍ദേശം
കേരള – കര്‍ണാടക – ലക്ഷദ്വീപ് തീരങ്ങളില്‍ ഇന്നും മത്സ്യബന്ധനത്തിന് പോകാന്‍ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു. കേരള – കര്‍ണാടക – ലക്ഷദ്വീപ് തീരങ്ങളില്‍ മണിക്കൂറില്‍ 35 മുതല്‍ 45 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 55 കിലോമീറ്റര്‍ വരെയും വേഗതയില്‍ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
പ്രത്യേക ജാഗ്രത നിര്‍ദേശം
തമിഴ്‌നാട് തീരം
വടക്കന്‍ തമിഴ്‌നാട് തീരത്ത് മണിക്കൂറില്‍ 45 മുതല്‍ 55 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 65 കിലോമീറ്റര്‍ വരെയും വേഗതയില്‍ ശക്തമായ കാറ്റിനു സാധ്യത. തെക്കന്‍ തമിഴ്‌നാട് തീരം , ഗള്‍ഫ് ഓഫ് മാന്നാര്‍ അതിനോട് ചേര്‍ന്ന കന്യാകുമാരി പ്രദേശം എന്നിവിടങ്ങളില്‍ മണിക്കൂറില്‍ 40 മുതല്‍ 50 കിലോമീറ്റര്‍ വരെയും ചില അവസരങ്ങളില്‍ മണിക്കൂറില്‍ 60 കിലോമീറ്റര്‍ വരെയും വേഗതയില്‍ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
ബംഗാള്‍ ഉള്‍ക്കടല്‍
മധ്യ പടിഞ്ഞാറന്‍ ബംഗാള്‍ ഉള്‍ക്കടല്‍ അതിനോട് ചേര്‍ന്ന വടക്കു പടിഞ്ഞാറന്‍ ബംഗാള്‍ ഉള്‍ക്കടല്‍ എന്നിവിടങ്ങളില്‍ മണിക്കൂറില്‍ 5565 കി.മീ. വരെയും ചില അവസരങ്ങളില്‍ മണിക്കൂറില്‍ 75 കി.മീ. വരെയും കാറ്റിന്റെ വേഗത വര്‍ധിക്കാന്‍ സാധ്യത. ഈ കാലാവസ്ഥ സെപ്റ്റംബര്‍ 24-ന് വൈകുന്നേരം വരെ തുടരുകയും അതിനു ശേഷം ക്രമേണ കുറയാനും സാധ്യത.
തെക്കന്‍ ഒഡീഷ, വടക്കന്‍ ആന്ധ്രാപ്രദേശ് തീരം, യമന്‍ തീരം എന്നിവിടങ്ങളില്‍ മണിക്കൂറില്‍ 5565 കി.മീ. വരെയും ചില അവസരങ്ങളില്‍ മണിക്കൂറില്‍ 65 കി.മീ. വരെയും കാറ്റിന്റെ വേഗത സെപ്റ്റംബര്‍ 24-ന് വൈകുന്നേരം വരെ തുടരുകയും അതിനു ശേഷം ക്രമേണ കുറയാനും സാധ്യത.
സെപ്റ്റംബര്‍ 24-ന് വൈകുന്നേരം വരെ വടക്കന്‍ ബംഗാള്‍ ഉള്‍ക്കടല്‍, തെക്കന്‍ ബംഗാള്‍ ഉള്‍ക്കടല്‍ എന്നിവിടങ്ങളില്‍ മണിക്കൂറില്‍ 5060 കി.മീ. വരെയും ചില അവസരങ്ങളില്‍ മണിക്കൂറില്‍ 70 കി.മീ. വരെയും വേഗതയില്‍ ശക്തമായ കാറ്റിനു സാധ്യത.
by Midhun HP News | Sep 24, 2026 | Latest News, കേരളം
തിരുവനന്തപുരം: സെപ്റ്റംബർ മാസത്തെ ക്ഷേമപെൻഷൻ ഇന്നുമുതൽ (വ്യാഴം) വിതരണം ചെയ്യും. പെൻഷൻ വിതരണത്തിനായി സംസ്ഥാന സർക്കാർ ആകെ 1,068.79 കോടി രൂപ അനുവദിച്ചു. ക്ഷേമപെൻഷൻ വിതരണത്തിനായി 957.93 കോടി രൂപയും വിവിധ ക്ഷേമനിധി ബോർഡുകൾ വഴിയുള്ള പെൻഷൻ വിതരണത്തിനായി 110.86 കോടി രൂപയുമാണ് അനുവദിച്ചത്.
ഓരോ മാസവും പെൻഷൻ തുക യാഥാസമയത്ത് ഗുണഭോക്താക്കളിലെത്തിക്കുക എന്ന യുഡിഎഫ് സർക്കാരിന്റെ നയത്തിന്റെ ഭാഗമായാണിതെന്ന് ധനമന്ത്രി അറിയിച്ചു.
by Midhun HP News | Sep 24, 2026 | Latest News, കേരളം
കൊച്ചി: കൊച്ചി രാജ്യാന്തര വിമാനത്താവളത്തില്‍ നിന്ന് ബാങ്കോക്കിലേക്ക് ആഴ്ചയില്‍ നാല് സര്‍വീസുകള്‍ കൂടി ഉള്‍പ്പെടുത്തി ശീതകാല സമയക്രമം പ്രഖ്യാപിച്ച് സിയാല്‍. ഒക്ടോബര്‍ 26 മുതല്‍ 2027 മാര്‍ച്ച് 28 വരെയുള്ള ശീതകാല സമയക്രമത്തില്‍ തെക്കുകിഴക്കന്‍ ഏഷ്യയിലേക്കുള്ള കണക്ടിവിറ്റി കൂടുതല്‍ ശക്തമാക്കുമെന്ന് സിയാല്‍ അറിയിച്ചു.
എയര്‍ ഇന്ത്യ എക്‌സ്പ്രസാണ് ബാങ്കോക്കിലേയ്ക്ക് സര്‍വീസ് നടത്തുന്നത്. നിലവിലുള്ള സര്‍വീസുകള്‍ക്ക് പുറമേ നാല് പ്രതിവാര സര്‍വീസുകള്‍ കൂടി വരുന്നതോടെ ബാങ്കോക്കിലേക്കുള്ള യാത്രാസൗകര്യം കൂടുതല്‍ മെച്ചപ്പെടും. ഗള്‍ഫ് മേഖലയിലേക്കും ആഭ്യന്തര മേഖലയിലേക്കും കൂടുതല്‍ സര്‍വീസുകളും പുതിയ സമയക്രമത്തില്‍ ഇടംപിടിച്ചിട്ടുണ്ട്.
ഇന്‍ഡിഗോ ഫുജൈറയിലേക്ക് ദിവസേന സര്‍വീസ് നടത്തും. ദുബായ്, ദമ്മാം, കുവൈത്ത് എന്നിവിടങ്ങളിലേക്കും ദിവസേന സര്‍വീസുകളുണ്ടാകും. ആകാശ എയര്‍ ആണ് സര്‍വീസ് നടത്തുക. ബാങ്കോക്ക് എയര്‍പോര്‍ട്ടിലേക്കുള്ള നാല് പ്രതിവാര സര്‍വീസുകള്‍ സിയാലിന്റെ തെക്കു-കിഴക്കന്‍ ഏഷ്യന്‍ കണക്ടിവിറ്റിക്ക് കൂടുതല്‍ കരുത്തേകുമെന്നും സിയാല്‍ അറിയിച്ചു.
നിലവില്‍ ബാങ്കോക്ക്-ഡോണ്‍ മുവാങ്, ക്വാലാലംപൂര്‍, സിംഗപ്പൂര്‍, മാലി, കൊളംബോ എന്നിവിടങ്ങളിലേക്ക് സര്‍വീസുകളുണ്ട്. തെക്കന്‍, തെക്കു-കിഴക്കന്‍ ഏഷ്യയിലെ ആറ് വിമാനത്താവളങ്ങളില്‍ നിന്നായി ആഴ്ചയില്‍ 93 സര്‍വീസുകളുണ്ട്. തായ്ലാന്‍ഡിലേക്കും ഫാര്‍ ഈസ്റ്റിലെ മറ്റ് കേന്ദ്രങ്ങളിലേക്കുമുള്ള യാത്രാ സൗകര്യങ്ങള്‍ കൂടുതല്‍ വിപുലമാകും. ശീതകാല സമയക്രമത്തില്‍ ഗള്‍ഫ് മേഖലയിലെ 13 വിമാനത്താവളങ്ങളിലേക്കും സര്‍വീസുകളുണ്ടാകുമെന്നും സിയാല്‍ വ്യക്തമാക്കി.
പുതിയ സര്‍വീസുകളുടെ ഭാഗമായി ഫുജൈറ, ദുബായ്, ദമ്മാം, കുവൈത്ത് എന്നിവിടങ്ങളിലേക്കുള്ള ദിവസേനയുള്ള സര്‍വീസുകള്‍ ഗള്‍ഫ് കണക്ടിവിറ്റിക്ക് കൂടുതല്‍ കരുത്തേകും. ആഭ്യന്തര സര്‍വീസ് ശക്തിപ്പെടുത്തും. ആഭ്യന്തര മേഖലയില്‍ കൊല്‍ക്കത്തയിലേക്കും തിരുവനന്തപുരത്തേക്കും ഇന്‍ഡിഗോ ദിവസേന സര്‍വീസ് നടത്തും. ഇതോടെ പ്രധാന ഗള്‍ഫ് കേന്ദ്രങ്ങളിലേക്കും രാജ്യത്തെ പ്രധാന നഗരങ്ങളിലേക്കുമുള്ള കണക്ടിവിറ്റി കൂടുതല്‍ ശക്തമാകും.
ആഭ്യന്തര മേഖലയില്‍ 13 വിമാനത്താവളങ്ങളിലേക്കായി ആഴ്ചയില്‍ 465 അറൈവലുകളാണുള്ളത്. ആഭ്യന്തര സര്‍വീസ് കണക്കില്‍ ബംഗളൂരുവാണ് ഏറ്റവും മുന്നില്‍.14.4 ശതമാനം വര്‍ദ്ധന. ആഴ്ചയില്‍ 1,544 സര്‍വീസുകളാണ് വേനല്‍കാല ഷെഡ്യൂളിലുള്ളത്. ശീതകാലത്ത് 1,766 ആയി. 14.4 ശതമാനമാണ് വര്‍ദ്ധന. 881 സര്‍വീസുകള്‍ കൊച്ചിയില്‍ നിന്ന് പുറപ്പെടുന്നതും 885 സര്‍വീസുകള്‍ കൊച്ചിയിലേക്കെത്തുന്നതുമാണ്. 32 വിമാനത്താവളങ്ങളിലേക്കായി 28 വിമാനക്കമ്പനികളാണ് സര്‍വീസ് നടത്തുന്നത്. പ്രതിദിനം ശരാശരി 252 വിമാന നീക്കങ്ങളാണ് ഷെഡ്യൂള്‍ ചെയ്തിരിക്കുന്നത്.
യാത്രാനുഭവം കൂടുതല്‍ മെച്ചപ്പെടുത്താന്‍ പദ്ധതികള്‍ ആവിഷ്‌കരിച്ചിട്ടുണ്ട്. വീട്ടില്‍നിന്ന് ബാഗേജ് ശേഖരിക്കുന്നതിനുള്ള സൗകര്യവും പ്രത്യേക സഹായം ആവശ്യമായ യാത്രക്കാര്‍ക്കായി മെച്ചപ്പെട്ട സൗകര്യങ്ങളുമുണ്ടാകുമെന്നും സിയാല്‍ അറിയിച്ചു.
by Midhun HP News | Sep 24, 2026 | Latest News, കേരളം
കൊല്ലം: മാതാ അമൃതാനന്ദമയി ദേവിയുടെ 73-ാം ജന്മദിനം വിശ്വസേവാദിനമായി ആചരിക്കും. ഈ മാസം 26, 27 തീയതികളിലായി അമൃതപുരി അമൃത വിശ്വവിദ്യാപീഠം ക്യാംപസിലാണ് വിപുലമായ പരിപാടികള്‍ നടക്കുന്നത്. 26-ന് വൈകീട്ട് അഞ്ചിന് നടക്കുന്ന പൊതുപരിപാടി കേന്ദ്ര ആഭ്യന്തര മന്ത്രി അമിത്ഷാ ഉദ്ഘാടനം ചെയ്യും.
27-ന് രാവിലെ 11 മണിക്ക് നടക്കുന്ന ഔദ്യോഗിക ചടങ്ങില്‍ ഉപരാഷ്ട്രപതി സിപി രാധാകൃഷ്ണന്‍ മുഖ്യാതിഥിയായി പങ്കെടുക്കും. വിശ്വസേവാദിനത്തോടനുബന്ധിച്ച് 50 കോടി രൂപയുടെ ജീവകാരുണ്യപദ്ധതികള്‍ക്ക് മഠം തുടക്കം കുറിക്കും.
ആദ്ധ്യാത്മിക, വൈജ്ഞാനിക, ശാസ്ത്ര മേഖലയിലെ പ്രഗത്ഭര്‍ക്ക് മഠം നല്‍കുന്ന അമൃതകീര്‍ത്തി പുരസ്‌കാരം 26ന് വൈകീട്ട് നടക്കുന്ന ചടങ്ങില്‍ സമ്മാനിക്കും. മുന്‍ ഗവര്‍ണറും പ്രമുഖ അഭിഭാഷകനും ഗ്രന്ഥകാരനുമായ പിഎസ് ശ്രീധരന്‍ പിള്ളയാണ് ഈ വര്‍ഷത്തെ അമൃതകീര്‍ത്തി പുരസ്‌കാരത്തിന് അര്‍ഹനായത്. 1,23,456 രൂപയും ആര്‍ട്ടിസ്റ്റ് നമ്പൂതിരി രൂപകല്‍പന ചെയ്ത സരസ്വതീ ശില്‍പവും പ്രശസ്തി പത്രവുമടങ്ങുന്നതാണ് പുരസ്‌കാരം.
ചടങ്ങില്‍ കേന്ദ്ര സഹമന്ത്രി സുരേഷ് ഗോപി, സംസ്ഥാന ആഭ്യന്തര മന്ത്രി രമേശ് ചെന്നിത്തല, ആരോഗ്യ-ദേവസ്വം വകുപ്പ് മന്ത്രി കെ മുരളീധരന്‍ തുടങ്ങിയവര്‍ പങ്കെടുക്കും. ചടങ്ങില്‍ അസമിലെ പ്രളയദുരിതാശ്വാസ പ്രവര്‍ത്തന നിധിയിലേക്ക് മാതാ അമൃതാനന്ദമയി മഠം നല്‍കുന്ന രണ്ട് കോടി രൂപ കൈമാറും. 27ന് രാവിലെ ഒമ്പതിന് ശ്രീ ഗുരു പാദുക പൂജ, തുടര്‍ന്ന് അമ്മയുടെ നേതൃത്വത്തില്‍ സത്സംഗം, വിശ്വശാന്തി പ്രാര്‍ത്ഥന, ഭജന എന്നിവ നടക്കും. രാവിലെ 11 മണിക്ക് ഉപരാഷ്ട്രപതി ഉദ്ഘാടനം ചെയ്യുന്ന ഔദ്യോഗിക ചടങ്ങില്‍ ഗവര്‍ണര്‍ രാജേന്ദ്ര വിശ്വനാഥ് അര്‍ലേകര്‍, മുഖ്യമന്ത്രി വിഡി സതീശന്, കേന്ദ്ര വ്യോമയാന മന്ത്രി കിഞ്ചരാപ്പു രാംമോഹന്‍ നായിഡു, സംസ്ഥാന മന്ത്രിമാര്‍, എംപിമാര്‍, എംഎല്‍എമാര്‍ തുടങ്ങിയവര്‍ പങ്കെടുക്കും.
ചടങ്ങില്‍ അമൃത ആശുപത്രിയുടെ നേതൃത്വത്തില്‍ നടത്തുന്ന സൗജന്യ അവയവമാറ്റ ശസ്ത്രക്രിയകള്‍ ഉള്‍പ്പെടെയുള്ള ചികിത്സാ സഹായം (20 കോടി), മഠത്തിന് കീഴിലുള്ള സ്വാശ്രയ സംഘങ്ങള്‍ക്കുള്ള ധനസഹായം, തൃശ്ശൂര്‍ വെടിക്കെട്ട് ദുരന്തത്തില്‍ മരിച്ചവരുടെ കുടുംബാംഗങ്ങള്‍ക്കും കടല്‍ക്ഷോഭത്തെ തുടര്‍ന്ന് കൊല്ലം നീണ്ടകരയിലും തിരുവനന്തപുരം മുതലപ്പൊഴിയിലുമുണ്ടായ ബോട്ട് അപകടത്തില്‍ മരിച്ച മത്സ്യത്തൊഴിലാളികളുടെ കുടുംബങ്ങള്‍ക്കുമുള്ള ധനസഹായ പ്രഖ്യാപനം എന്നിവ നടക്കും. പ്രധാന ചടങ്ങിനുശേഷം സമൂഹവിവാഹവും നടക്കും.
by Midhun HP News | Sep 24, 2026 | Latest News, കേരളം
പത്തനംതിട്ട: സ്വര്‍ണപ്പാളി കേസില്‍ എസ്‌ഐടി അന്വേഷണം തുടരുന്നതിനിടെ, ശബരിമലയിലെ സ്വര്‍ണക്കിരീടവും കവര്‍ന്നതായി സൂചന. സ്‌ട്രോങ് റൂമില്‍ നിന്നാണ് കിരീടം കാണാതായതെന്നും കണക്കെടുപ്പിലാണ് ഇക്കാര്യം സ്ഥിരീകരിച്ചതെന്നുമാണ് റിപ്പോര്‍ട്ടുകള്‍ വ്യക്തമാക്കുന്നത്.
തമിഴ്‌നാട്ടില്‍നിന്നുള്ള ഭക്തന്‍ 2012ല്‍ സമര്‍പ്പിച്ച 55.75 പവന്റെ കിരീടം കവര്‍ന്നതായാണ് റിപ്പോര്‍ട്ടുകള്‍ പുറത്തുവന്നത്. പകരം ഡ്യൂപ്ലിക്കറ്റ് കിരീടം വച്ചെന്നാണ് വിവരം. അതേസമയം സ്വര്‍ണക്കിരീടം നഷ്ടപ്പെട്ടിട്ടില്ലെന്നാണ് തിരുവാഭരണം കമ്മീഷണര്‍ പറയുന്നത്. യഥാര്‍ഥ കിരീടവും അതേ മാതൃകയിലുള്ള മറ്റൊരു കിരീടവുമുണ്ട്. മൂല്യമുള്ള പലതിനും സമാനമായ മാതൃക സൂക്ഷിക്കാറുണ്ടെന്നും തിരുവാഭരണം കമ്മീഷണര്‍ ദേവസ്വം കമ്മീഷണര്‍ക്ക് നല്‍കിയ വിശദീകരണത്തില്‍ പറയുന്നു. വാര്‍ത്തകളിലൂടെ മാത്രമാണ് കിരീടം നഷ്ടപ്പെട്ട വിവരം അറിഞ്ഞതെന്നും കിരീടം നഷ്ടപ്പെട്ടെങ്കില്‍ അത് ഗൗരവമായ കാര്യമാണെന്നും ദേവസ്വം ബോര്‍ഡ് പ്രസിഡന്റ് കെ ജയകുമാര്‍ പറഞ്ഞു. ശബരിമലയിലെ സ്‌ട്രോങ് റൂമില്‍ സ്വര്‍ണക്കിരീടം ഇല്ലെങ്കില്‍ കിരീടം ആറന്മുളയില്‍ ഉണ്ടാവേണ്ടതാണ്. ആറന്മുളയിലും സ്വര്‍ണക്കിരീടം ഇല്ലെങ്കില്‍ അത് ഗുരുതരമായ വിഷയമാണെന്നും കെ ജയകുമാര്‍ പറഞ്ഞു. വീഴ്ച പരിശോധിക്കുമെന്നും ഉപ്പു തിന്നവര്‍ വെള്ളം കുടിക്കുമെന്നും ദേവസ്വം ബോര്‍ഡ് പ്രസിഡന്റ് പറഞ്ഞു. ശബരിമലയിലെ സിസ്റ്റം തകരാറിലാകുന്നതിനെ കുറിച്ച് ആശങ്കയുണ്ടെന്നും കെ ജയകുമാര്‍ വ്യക്തമാക്കി.
ഹൈക്കോടതി നിര്‍ദേശ പ്രകാരം ജസ്റ്റിസ് കെടി ശങ്കരന്റെ നേതൃത്വത്തില്‍ ശബരിമലയില്‍ കണക്കെടുപ്പ് പുരോഗമിക്കുന്നതിനിടെയാണ് സ്വര്‍ണക്കിരീടം കാണാതായതായുള്ള റിപ്പോര്‍ട്ടുകള്‍ പുറത്തുവന്നത്. ഹൈക്കോടതിയില്‍ സമര്‍പ്പിക്കുന്ന റിപ്പോര്‍ട്ടില്‍ കൂടുതല്‍ കാര്യങ്ങള്‍ വ്യക്തമാകും. സിസിടിവി കാമറ ഇല്ലാത്ത സ്ഥലത്താണ് കിരീടം സൂക്ഷിച്ചിരുന്നത്.
Recent Comments