ബൈക്ക് കനാലിൽ മറിഞ്ഞ് യുവാവിന് ദാരുണ അന്ത്യം
ബൈക്ക് കനാലിൽ മറിഞ്ഞ് യുവാവിന് ദാരുണ അന്ത്യം.കൊല്ലം പത്തനാപുരം ചാച്ചിപുന്ന സ്വദേശി അജിൻ (24) ആണ് മരിച്ചത്. ബൈക്കിൽ യാത്ര ചെയ്തചെയ്യവെ റോഡിലെ ചപ്പാത്തിൽ തട്ടി കനാലിലേക്ക് മറിഞ്ഞാണ് അപകടം ഉണ്ടായത്.
|
‘ഖത്തറില്‍ എത്തിച്ചത് ജോലി വാഗ്ദാനം ചെയ്ത്, മോഷണത്തിന് പിന്നില്‍ കെഎംസിസി നേതാക്കള്‍’: എട്ട് കോടിയുടെ കവര്‍ച്ചയില്‍ ബിജെപി നേതാവ്
കോഴിക്കോട്: ഖത്തര്‍ കെഎംസിസി ഓഫീസില്‍ നിന്ന് 8 കോടി രൂപ കവര്‍ന്ന സംഭവത്തില്‍ വന്‍ വഴിത്തിരിവ്. കെഎംസിസിയിലെ അംഗങ്ങളാണ് മോഷണത്തിന് പിന്നിലെന്നും ജോലിക്കെന്ന് പറഞ്ഞാണ് തന്നെ വിദേശത്തേക്ക് കൊണ്ടുപോയതെന്നാണ് കേസില്‍ കീഴടങ്ങിയ ബിജെപി നേതാവ് ബാലകൃഷ്ണന്‍ പറയുന്നത്. ഖത്തറിലെ കെഎംസിസി ഓഫീസില്‍ റൂം ബോയിയെ കെട്ടിയിട്ട് എട്ട് കോടി കവര്‍ന്നെന്ന കേസില്‍ കോഴിക്കോട് പൊലീസില്‍ ഇന്നലെയാണ് ഇയാള്‍ കീഴടങ്ങിയത്. കഴിഞ്ഞ തദ്ദേശ തെരഞ്ഞെടുപ്പില്‍ ബിജെപി സ്ഥാനാര്‍ഥിയായിരുന്നു ബാലകൃഷ്ണന്‍.
വിദേശത്തേക്ക് പോകുമ്പോള്‍ മോഷണത്തെക്കുറിച്ച് തനിക്ക് അറിയില്ലായിരുന്നു. കെഎംസിസി അംഗങ്ങള്‍ തന്നെ ജോലി വാഗ്ദാനം ചെയ്താണ് വിദേശത്തേക്ക് കൊണ്ടുപോയതെന്നാണ് ബാലകൃഷ്ണന്‍ പറയുന്നത്. ബാലകൃഷ്ണന്റേതായി പുറത്തു വന്ന വിഡിയോയില്‍ താനും മറ്റ് മൂന്ന് മത്സ്യത്തൊഴിലാളികളും ഖത്തറില്‍ വര്‍ക്ക് വിസയില്‍ എത്തിയതായാണ് പറയുന്നത്. വെല്‍ഡറായി ജോലി ചെയ്തിരുന്ന തന്നെ, ഖത്തറില്‍ ജോലി വാഗ്ദാനം ചെയ്തുകൊണ്ട് ഷാജി എന്നൊരാള്‍ ബന്ധപ്പെട്ടുവെന്ന് പറയുന്നു. അവിടെ എത്തിയപ്പോള്‍ ഗ്യാസ് കട്ടര്‍ ഉപയോഗിച്ച് സ്‌ട്രോങ് റൂമും ലോക്കര്‍ തുറക്കാന്‍ തന്നോട് ആവശ്യപ്പെട്ടു, എന്തിനുവേണ്ടിയാണ് തങ്ങളെ അവിടെ എത്തിച്ചതെന്ന് തനിക്ക് അറിയില്ലായിരുന്നുവെന്നും ബാലകൃഷ്ണന്‍ പറയുന്നു.
സെപ്റ്റംബര്‍ 18-നാണ് ഖത്തര്‍ കെഎംസിസി ഓഫീസില്‍ വന്‍ കവര്‍ച്ച നടന്നത്. ഒരു സംഘം ആളുകള്‍ റൂം ബോയിയെ കെട്ടിയിട്ട ശേഷം ഗ്യാസ് കട്ടര്‍ ഉപയോഗിച്ച് സ്‌ട്രോംഗ് റൂം തകര്‍ക്കുകയും പണവുമായി കടന്നുകളഞ്ഞുവെന്നാണ് കേസ്. മോഷണം നടത്തുന്നതിനായി മാത്രം നാല് പേരെ കേരളത്തില്‍ നിന്ന് ഖത്തറിലേക്ക് കൊണ്ടുവന്നതായും, മറ്റ് രണ്ട് പേര്‍ ഇവര്‍ക്ക് രാജ്യത്ത് താമസിക്കാനുള്ള സഹായം നല്‍കിയതായുമാണ് പൊലീസ് കണ്ടെത്തല്‍.
സംഭവത്തിന് ശേഷം ബാലകൃഷ്ണന്‍ കേരളത്തിലേക്ക് മടങ്ങിയെന്നും പൊലീസ് പറഞ്ഞു. കേസില്‍ ബോംബെ ഷാജി, റാഷി, സാലിഹ്, ഹസന്‍, നിസാര്‍ ഉള്‍പ്പെടെയുള്ള അഞ്ച് പ്രതികള്‍ ഒളിവിലാണ്. എന്നിവരാണ് കേസിലെ മറ്റ് പ്രതികള്‍. ബാലകൃഷ്ണനെ പൊലീസ് ചോദ്യം ചെയ്തുവരികയാണെന്നും, മറ്റ് പ്രതികള്‍ക്കായി തിരച്ചില്‍ തുടരുകയാണെന്നും ഉദ്യോഗസ്ഥര്‍ അറിയിച്ചു. പ്രതികളില്‍ ചിലര്‍ നിലവില്‍ വിദേശത്താണെന്നും അവര്‍ വ്യക്തമാക്കി.
പിണറായി സര്‍ക്കാരിന്റെ വാര്‍ഷികാഘോഷങ്ങള്‍ക്ക് കിഫ്ബി വക 216 കോടി; പരസ്യപ്രചാരണങ്ങള്‍ ഉള്‍പ്പടെ മൊത്തം ചെലവ് 475 കോടി രൂപ
തിരുവനന്തപുരം: എല്‍ഡിഎഫ് സര്‍ക്കാരിന്റെ വാര്‍ഷികാഘോഷങ്ങള്‍ക്കും പരസ്യപ്രചാരണങ്ങള്‍ക്കുമായി കിഫ്ബി വഴി കോടിക്കണക്കിന് രൂപ ചെലവഴിച്ചതായി ഓഡിറ്റ് റിപ്പോര്‍ട്ടുകള്‍ വ്യക്തമാക്കുന്നു. കിഫ്ബി ഓഡിറ്റ് അക്കൗണ്ടുകളും സുധാ പിള്ള കമ്മിറ്റി റിപ്പോര്‍ട്ടും അടിസ്ഥാനമാക്കി പുറത്തുവന്ന വിവരങ്ങള്‍ പ്രകാരം കഴിഞ്ഞ വര്‍ഷങ്ങളില്‍ വലിയ തുകകള്‍ വകമാറ്റിയെന്നാണ് വിവരം. 2016 മുതല്‍ 2026വരെയുള്ള കിഫ്ബിയുടെ വാര്‍ഷിക റിപ്പോര്‍ട്ടുകള്‍ പ്രകാരം പരസ്യങ്ങള്‍ക്കും പ്രചാര പരിപാടികള്‍ക്കുമായി ഏകദേശം 475 കോടി രൂപ ചെലവഴിച്ചതായാണ് കണക്ക്.
ഇതിന്റെ പകുതിയോളം തുകയായ 216 കോടി രൂപ പിണറായി സര്‍ക്കാരിന്റെ വാര്‍ഷിക ആഘോഷമായ ‘എന്റെ കേരളം’ പരിപാടിക്കായി മൂന്ന് വര്‍ഷം കൊണ്ട് ചെലവഴിച്ചു. SC/ST വികസന പദ്ധതികള്‍ക്കായി കിഫ്ബി ഇതുവരെ അനുവദിച്ച 87 കോടി രൂപയുടെ ഇരട്ടിയിലധികമാണിത്. 2022-203ല്‍ 52.03 കോടി രൂപയും 2023-24ല്‍ 67.45 കോടി രൂപയും 2025-26ല്‍ 96.44 കോടി രൂപയും ‘എന്റെ കേരളം പരിപാടിക്കായി ചെലവഴിച്ചു. അടിസ്ഥാന സൗകര്യ വികസനത്തിന് മാത്രമായി ഉപയോഗിക്കേണ്ട കിഫ്ബി ഫണ്ട്, സര്‍ക്കാര്‍ ഉത്തരവുകളുടെ അടിസ്ഥാനത്തില്‍ വകമാറ്റിയെന്നാണ് ഓഡിറ്റ് റിപ്പോര്‍ട്ടില്‍ പറയുന്നത്.
കേന്ദ്രസര്‍ക്കാര്‍ ഏര്‍പ്പെടുത്തിയ വായ്പാ നിയന്ത്രണങ്ങള്‍ നിലനില്‍ക്കേയാണ്, നൂറു കണക്കിന് കോടി വകമാറ്റിയത്. 2023-24ല്‍ കേരളീയം ഉത്സവത്തിന്റെ അടിസ്ഥാന സൗകര്യങ്ങള്‍ക്കായി കിഫ്ബി 12.95 കോടി രൂപ ചെലവഴിച്ചു. 2018-19വരെ പ്രതിവര്‍ഷം 2 കോടി രൂപയില്‍ താഴെ മാത്രമായിരുന്ന കിഫ്ബിയുടെ പ്രചാരണ ചെലവുകള്‍ തെരഞ്ഞെടുപ്പ് വര്‍ഷങ്ങളില്‍ കുത്തനെ ഉയര്‍ന്നു. 2019-20ല്‍ ഇത് 25.33 കോടി രൂപയായി വര്‍ദ്ധിച്ചു.
അന്ന് മുഖ്യമന്ത്രിയായിരുന്ന പിണറായി വിജയന്‍ ഉദ്ഘാടനം ചെയ്ത ‘കേരള നിര്‍മ്മിതി’ പ്രദര്‍ശനത്തിനായി ചെലവഴിച്ചത് 13.61 കോടി രൂപയാണ്. കൊവിഡ് കാരണം നിര്‍മ്മിതി പ്രദര്‍ശനങ്ങള്‍ നിര്‍ത്തിവെച്ചപ്പോള്‍, മണ്ഡലാടിസ്ഥാനത്തില്‍ കിഫ്ബി നടത്തിയ വികസനപ്രവര്‍ത്തനങ്ങള്‍ 14 ടിവി ചാനലുകളിലും റേഡിയോയിലും പ്രചരിപ്പിക്കുന്നതിനായി വന്‍ തുക ചെലവഴിച്ചു. യുഡിഎഫ് സര്‍ക്കാര്‍ നിയോഗിച്ച സുധാ പിള്ള കമ്മിറ്റിയുടെ റിപ്പോര്‍ട്ട് പ്രകാരം, ഏറ്റവും നിയമസഭാ തെരഞ്ഞെടുപ്പിന് മുന്നോടിയായുള്ള 2025-26 വര്‍ഷത്തില്‍ മാത്രം പരസ്യ-പ്രചാരണങ്ങള്‍ക്കായി 203.72 കോടി രൂപയാണ് ചെലവഴിച്ചത്.
തുടര്‍ച്ചയായി മൂന്ന് വര്‍ഷമാണ് പരസ്യച്ചെലവുകളുടെ കാര്യത്തില്‍ കിഫ്ബിയുടെ അക്കൗണ്ടുകള്‍ ഓഡിറ്റര്‍ ചോദ്യം ചെയ്തത്. എന്നാല്‍, സര്‍ക്കാര്‍ ഉത്തരവുകളുടെ അടിസ്ഥാനത്തിലാണ് പരിപാടികളുടെ ചെലവുകള്‍ വഹിച്ചതെന്നും തങ്ങളുടെ പ്രചാരണ ചെലവുകള്‍ ജനറല്‍ ബോഡി അംഗീകരിച്ച ബജറ്റിനുള്ളില്‍ നിന്നാണെന്നും കിഫ്ബി തങ്ങളുടെ റിപ്പോര്‍ട്ടുകളില്‍ വ്യക്തമാക്കി. ഈ ചെലവുകള്‍ക്കെതിരെ സാമ്പത്തിക വിദഗ്ദന്‍ കെ പി കണ്ണന്‍ കടുത്ത വിമര്‍ശനമാണ് ഉന്നയിച്ചത്. കടമെടുത്ത കാശുകൊണ്ടുള്ള ഇത്തരം ധൂര്‍ത്ത് അനാവശ്യവും തികച്ചും ഞെട്ടിക്കുന്നതുമാണെന്ന് അദ്ദേഹം അഭിപ്രായപ്പെട്ടു. ഇതില്‍ സര്‍ക്കാര്‍ നടപടി എടുക്കണമെന്നും അദ്ദേഹം ആവശ്യപ്പെട്ടു.
ഓട്ടോ ഡ്രൈവറെ ഫോണിലൂടെ കബളിപ്പിച്ച് 14,700 രൂപ തട്ടിയെടുത്തു; തട്ടിപ്പ് നടത്തിയത് ഷൊർണൂരിൽനിന്ന് മോഷ്ടിച്ച ഫോൺ വഴി
പാലക്കാട്: ഷൊർണൂർ റെയിൽവേ സ്റ്റേഷനിൽനിന്ന് മോഷ്ടിച്ച മൊബൈൽ ഫോൺ ഉപയോഗിച്ച് ചരക്ക് ഓട്ടോ ഡ്രൈവറെ കബളിപ്പിച്ച് 14,700 രൂപ തട്ടിയെടുത്തതായി പരാതി. പാലക്കാട് വടക്കന്തറ വൃന്ദാവൻ കോളനി സ്വദേശിയായ ഗുഡ്സ് ഓട്ടോ ഡ്രൈവർ മണികണ്ഠനാണ് തട്ടിപ്പിനിരയായത്. സംഭവത്തിൽ പാലക്കാട് ടൗൺ നോർത്ത് പൊലീസും സൈബർ സെല്ലും കേസെടുത്ത് അന്വേഷണം ഊർജ്ജിതമാക്കി.
രണ്ട് ദിവസം മുൻപായിരുന്നു സംഭവം. മേലാമുറിയിലെ ഒരു ഗോഡൗണിൽനിന്ന് വാളയാറിലെ സ്ഥാപനത്തിലേക്ക് ഇരുമ്പുകമ്പികൾ എത്തിക്കണമെന്ന് ആവശ്യപ്പെട്ടാണ് തട്ടിപ്പുസംഘം ഫോൺ വഴി മണികണ്ഠനെ ഓട്ടം വിളിച്ചത്. ഇതനുസരിച്ച് ഗോഡൗണിലെത്തിയ മണികണ്ഠൻ അരലക്ഷം രൂപയിലധികം വിലമതിക്കുന്ന കമ്പികൾ ഓട്ടോറിക്ഷയിൽ കയറ്റി വാളയാറിലേക്ക് തിരിച്ചു. വാഹനം കോട്ടമൈതാനത്തിന് സമീപമെത്തിയപ്പോൾ പ്രതികൾ വീണ്ടും മണികണ്ഠനെ ഫോണിൽ ബന്ധപ്പെട്ടു.
സൈറ്റിലേക്ക് ഒരു ഇലക്ട്രിക് കട്ടിങ് മെഷീൻ കൂടി വാങ്ങേണ്ടതുണ്ടെന്നും ഇതിന്റെ തുക തൽക്കാലം നൽകണമെന്നും വാളയാറിൽ എത്തുമ്പോൾ ഓട്ടക്കൂലിയോടൊപ്പം ഈ തുക കൂടി തിരികെ നൽകാമെന്നും ഇവർ വിശ്വസിപ്പിച്ചു. ഇത് വിശ്വസിച്ച മണികണ്ഠൻ അവർ നൽകിയ ബാങ്ക് അക്കൗണ്ടിലേക്ക് ഗൂഗിൾ പേ വഴി 14,700 രൂപ അയച്ചുകൊടുത്തു.
പണം അക്കൗണ്ടിലെത്തിയ ഉടൻ തന്നെ തട്ടിപ്പുസംഘം വീണ്ടും മണികണ്ഠനെ വിളിച്ചു. സൈറ്റിൽ ചില അസൗകര്യങ്ങൾ ഉള്ളതിനാൽ ലോഡ് ഇപ്പോൾ ഇറക്കാൻ കഴിയില്ലെന്നും പിന്നീട് അറിയിക്കാമെന്നും പറഞ്ഞ സംഘം ഉടൻ തന്നെ ഫോൺ സ്വിച്ച് ഓഫ് ചെയ്തു. സംശയമൊന്നും തോന്നാത്ത മണികണ്ഠൻ കമ്പി ലോഡുമായി ഒന്നര ദിവസത്തോളം റോഡരികിൽ കാത്തിരുന്നു. തുടർന്നും ബന്ധപ്പെടാൻ സാധിക്കാതിരുന്നതോടെയാണ് ഇയാൾ സൈബർ പൊലീസിനെ സമീപിക്കുന്നത്.
പൊലീസ് നടത്തിയ പ്രാഥമിക സൈബർ പരിശോധനയിലാണ് തട്ടിപ്പ് നടത്താൻ ഉപയോഗിച്ച സിം കാർഡും ഫോണും ഷൊർണൂർ റെയിൽവേ സ്റ്റേഷനിൽനിന്ന് യാത്രക്കാരനിൽനിന്ന് മോഷ്ടിച്ചതാണെന്ന് വ്യക്തമായത്. പണം ട്രാൻസ്ഫർ ചെയ്ത അക്കൗണ്ട് വിവരങ്ങൾ കേന്ദ്രീകരിച്ച് യഥാർത്ഥ പ്രതികളെ കണ്ടെത്താനുള്ള ശ്രമത്തിലാണ് സൈബർ വിഭാഗം.
ഏലൂരിൽ 11 കെവി വൈദ്യുതി ലൈൻ വീടുകൾക്കും സ്ഥാപനങ്ങൾക്കും മുകളിലേക്ക് പൊട്ടിവീണു; ഒഴിവായത് വൻ ദുരന്തം
കൊച്ചി: കനത്ത മഴയ്ക്കും ശക്തമായ ഇടിമിന്നലിനും പിന്നാലെ കൊച്ചി ഏലൂരിൽ 11 കെവി വൈദ്യുത ലൈൻ വീടുകൾക്കും വാണിജ്യ സ്ഥാപനങ്ങൾക്കും മുകളിലേക്ക് പൊട്ടിവീണു. വ്യാഴാഴ്ച പുലർച്ചെ 12:30 ഓടെയാണ് സംഭവം. അർധരാത്രിയിൽ ലൈൻ പൊട്ടിവീണ ഉടൻ തന്നെ വൈദ്യുതി ബന്ധം വിച്ഛേദിക്കപ്പെട്ടതിനാൽ വലിയൊരു ദുരന്തമാണ് തലനാരിഴയ്ക്ക് ഒഴിവായതെന്ന് കെഎസ്ഇബി ഉദ്യോഗസ്ഥർ അറിയിച്ചു.
ഏലൂർ പുതിയ റോഡ് ഭാഗത്തുകൂടി കടന്നുപോകുന്ന 11 കെവി ഹൈടെൻഷൻ ലൈനാണ് കനത്ത കാറ്റിലും മഴയിലും മിന്നലിലും തകർന്ന് വീണത്. വീടുകൾക്കും സമീപത്തെ കടകൾക്കും മുകളിലേക്കാണ് ലൈൻ പതിച്ചതെങ്കിലും ആർക്കും പരിക്കേൽക്കുകയോ നാശനഷ്ടങ്ങൾ ഉണ്ടാവുകയോ ചെയ്തിട്ടില്ല.
പരിഭ്രാന്തരായ പ്രദേശവാസികൾ വിവരമറിയിച്ചതിനെ തുടർന്ന് കെഎസ്ഇബി അധികൃതരും അഗ്നിരക്ഷാ സേനയും ഉടൻ സ്ഥലത്തെത്തി. താഴെ വീണുകിടന്ന ലൈനുകൾ മാറ്റി സുരക്ഷിതമാക്കാനുള്ള നടപടികൾ ഉദ്യോഗസ്ഥർ വേഗത്തിൽ പൂർത്തിയാക്കി. അറ്റകുറ്റപ്പണികൾ പൂർത്തിയായ ശേഷം മേഖലയിലെ വൈദ്യുതി വിതരണം പുനഃസ്ഥാപിക്കുമെന്ന് കെഎസ്ഇബി വ്യക്തമാക്കി. നിരവധി ഫാക്ടറികളും വ്യവസായശാലകളും പ്രവർത്തിക്കുന്ന പ്രധാന വ്യവസായ മേഖലയിലാണ് അപകടമുണ്ടായത്.
പ്രഭാതസവാരിക്കിറങ്ങിയ വീട്ടമ്മ വീടിന് മുന്നിൽ അജ്ഞാത വാഹനമിടിച്ച് മരിച്ചു
പഴയങ്ങാടി : പ്രഭാത നടത്തത്തിനിറങ്ങിയ വീട്ടമ്മ വീടിന് മുന്നിൽ അജ്ഞാത വാഹനം ഇടിച്ച് മരിച്ചു. പഴയങ്ങാടി അടുത്തില സ്വദേശി കെ. സുലോചന (53) യാണ് മരണപ്പെട്ടത്. വ്യാഴാഴ്ച രാവിലെ ആറ് മണിയോടെ വീടിന് തൊട്ടുമുന്നിലെ റോഡിലായിരുന്നു സംഭവം. നടന്നുപോകുന്നതിനിടെ അമിതവേഗതയിലെത്തിയ വാഹനം സുലോചനയെ ഇടിച്ച് തെറിപ്പിച്ച ശേഷം നിർത്താതെ ഓടിച്ചുപോവുകയായിരുന്നു.
ഇടിയുടെ ആഘാതത്തിൽ റോഡിലേക്ക് തെറിച്ചുവീണ് ഗുരുതരമായി പരിക്കേറ്റ സുലോചനയെ ശബ്ദം കേട്ടെത്തിയ നാട്ടുകാരും ബന്ധുക്കളും ചേർന്ന് ഉടൻതന്നെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. ഭർത്താവ്: ഗോപി. മകൾ: പി.കെ. സ്നേഹ. മരുമകൻ: ശ്രീജിത്ത്. പോസ്റ്റ്‌മോർട്ടം നടപടികൾക്കായി മൃതദേഹം പരിയാരത്തെ കണ്ണൂർ ഗവ. മെഡിക്കൽ കോളജ് മോർച്ചറിയിലേക്ക് മാറ്റി.
അപകടമുണ്ടാക്കി നിർത്താതെ പോയ അജ്ഞാത വാഹനത്തെയും ഡ്രൈവറെയും കണ്ടെത്താൻ പഴയങ്ങാടി പൊലീസ് അന്വേഷണം ആരംഭിച്ചു. സംഭവത്തിൽ അസ്വാഭാവിക മരണത്തിന് പൊലീസ് കേസെടുത്തിട്ടുണ്ട്. അപകടം നടന്ന റോഡിലൂടെ ആ സമയത്ത് കടന്നുപോയ വാഹനങ്ങൾ തിരിച്ചറിയുന്നതിനായി പ്രദേശത്തെ വീടുകളിലെയും വ്യാപാര സ്ഥാപനങ്ങളിലെയും സിസിടിവി ക്യാമറ ദൃശ്യങ്ങൾ പൊലീസ് ശേഖരിച്ച് വിശദമായി പരിശോധിച്ചുവരികയാണ്. വാഹനത്തെക്കുറിച്ച് എന്തെങ്കിലും വിവരം ലഭിക്കുന്നവർ ഉടൻ തന്നെ സ്റ്റേഷനിൽ അറിയിക്കണമെന്ന് പൊലീസ് നിർദ്ദേശിച്ചു.
Recent Comments