by Midhun HP News | Oct 22, 2026 | Latest News, കേരളം
കൊല്ലം: ട്രെയിന്‍ കാത്തു നില്‍ക്കുന്ന യാത്രക്കാര്‍ക്ക്, പ്രത്യേകിച്ച് കുട്ടികള്‍ക്ക് സമയം വിനോദപ്രദമായി ചെലവഴിക്കാന്‍ ഗെയിമിംഗ്&എന്റര്‍ടെയ്ന്‍മെന്റ് സെന്ററുമായി ദക്ഷിണ റെയില്‍വേ. കേരളത്തില്‍ ആദ്യമായി എറണാകുളം ജംഗ്ഷന്‍ (SOUTH) റെയില്‍വേ സ്‌റ്റേഷനിലാണ് സെന്റര്‍ ആരംഭിക്കുന്നത്. രണ്ട് നിലകളിലായി 6,000 ചതുരശ്ര അടിയിലധികം വിസ്തീര്‍ണ്ണമുള്ള ഈ കേന്ദ്രത്തില്‍ ഗെയിം സോണുകള്‍, വെര്‍ച്വല്‍ ഗെയിമിംഗ്, വിനോദത്തിനായി മറ്റു സൗകര്യങ്ങളും ഉണ്ടാകും. ഏതാനും മാസങ്ങള്‍ക്കുള്ളില്‍തന്നെ സെന്റര്‍ പ്രവര്‍ത്തനസജ്ജമാകും.
ഓഫീസേഴ്‌സ് റെസ്റ്റ് ഹൗസിന് സമീപത്തായി വിഭാവനം ചെയ്തിരിക്കുന്ന ഈ പദ്ധതി ‘ബില്‍ഡ്, ഓപ്പറേറ്റ് ആന്റ് ട്രാന്‍സ്ഫര്‍ (BOT) മാതൃകയിലാണ് നടപ്പിലാക്കുക. തിരുവനന്തപുരം ഡിവിഷന്‍ 10 വര്‍ഷത്തെ കരാര്‍ കാലാവധിയോടെ പദ്ധതിക്കായി ടെന്‍ഡറുകള്‍ ക്ഷണിച്ചു. കേന്ദ്രത്തിന്റെ ഒന്നാം നിലയില്‍ മൂന്ന് മീറ്റിംഗ് റൂമുകള്‍ ഉണ്ടായിരിക്കും. ഇതില്‍ ഒന്നില്‍ ഏകദേശം 15 പേരെ ഉള്‍ക്കൊള്ളാന്‍ കഴിയും. മറ്റൊന്ന് കുടുംബങ്ങള്‍ക്കായുള്ള ചെറിയ മുറിയായിരിക്കും. മൂന്നാമത്തെ മുറിയെക്കുറിച്ചുള്ള വിശദാംശങ്ങള്‍ ലഭ്യമായിട്ടില്ല. ടോയ്‌ലറ്റുകളും വാഷ്‌റൂമുകളും ഉണ്ടാകും.
എറണാകുളം സൗത്ത് റെയില്‍വേ സ്റ്റേഷന്‍ ഒരു പ്രധാന കേന്ദ്രമായതിനാലാണ് ആദ്യം തെരഞ്ഞെടുത്തിരിക്കുന്നത്. ജനങ്ങളുടെ പ്രതികരണം കണക്കിലെടുത്ത് ഈ ആശയം മറ്റ് സ്റ്റേഷനുകളിലേക്കും വ്യാപിപ്പിക്കും. ചെറിയ സ്റ്റേഷനുകളില്‍ പ്ലേസ്റ്റേഷന്‍ സൗകര്യങ്ങള്‍ ഒരുക്കുന്ന കാര്യവും ഡിവിഷന്‍ പരിഗണിക്കുന്നുണ്ടെന്ന് ദക്ഷിണ റെയില്‍വേ കൊമേഴ്‌സ്യല്‍ വിഭാഗത്തിലെ ഒരു മുതിര്‍ന്ന ഉദ്യോഗസ്ഥന്‍ പറഞ്ഞു.
റെയില്‍വേ സ്റ്റേഷനുകളിലെ ടിക്കറ്റിതര വരുമാനം വര്‍ദ്ധിപ്പിക്കാനും പരമ്പരാഗത യാത്രാ സേനവനങ്ങള്‍ക്കപ്പുറമുള്ള സൗകര്യങ്ങള്‍ അവതരിപ്പിക്കാനുള്ള ഡിവിഷന്റെ ശ്രമങ്ങളുടെ ഭാഗമായാണ് ഈ സംരഭം. പലചരക്ക് സ്റ്റാളുകള്‍, കാര്‍ സര്‍വീസ് സെന്ററുകള്‍, പെര്‍ഫ്യും സ്റ്റാളുകള്‍ തുടങ്ങിയവ സ്റ്റേഷനുകളില്‍ അവതരിപ്പിച്ചതും ഈ ലക്ഷ്യത്തോടെയാണ്.
by Midhun HP News | Oct 22, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയില്‍ വന്‍ ഇടിവ്. പവന് ഒറ്റയടിക്ക് 1240 രൂപയാണ് കുറഞ്ഞു. 1,05,880 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 155 രൂപയാണ് കുറഞ്ഞത്. ഒരു ഗ്രാം സ്വര്‍ണത്തിന്റെ വില 13,235 രൂപയാണ്. ഈ മാസത്തെ ഏറ്റവും താഴ്ന്ന നിലവാരത്തില്‍ എത്തിയിരിക്കുകയാണ് സ്വര്‍ണവില.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ഉയര്‍ന്നതാണ് സ്വര്‍ണവില കുറയാന്‍ കാരണം. ബാരലിന് 110 ഡോളര്‍ കടന്നിരിക്കുകയാണ്. പണപ്പെരുപ്പ നിരക്ക് കൂടിയതോടെ വീണ്ടും പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് തയ്യാറായേക്കുമോ എന്ന ആശങ്കയും വിപണിയില്‍ പ്രതിഫലിക്കുന്നുണ്ട്.
പലിശനിരക്ക് കൂട്ടിയാല്‍ സ്വര്‍ണത്തിന്റെ ആകര്‍ഷണം കുറയുമെന്നാണ് വിപണി വിദഗ്ധര്‍ പറയുന്നത്. ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 22, 2026 | Latest News, കേരളം
തിരുവനന്തപുരം: പാറശ്ശാലയിൽ റെയിൽവേ ട്രാക്കിൽ മണ്ണിടിഞ്ഞുവീണ് ട്രെയിൻ എഞ്ചിൻ പാളം തെറ്റി. ബിലാസ്പൂർ-തിരുനെൽവേലി എക്സ്പ്രസ് ട്രെയിനാണ് അപകടത്തിൽപ്പെട്ടത്. കനത്ത മഴയിൽ പുലർച്ചെ രണ്ടു മണിയോടെ ട്രാക്കിലേക്ക് മണ്ണിടിഞ്ഞ് വീഴുകയായിരുന്നു. എഞ്ചിന്റെ നാല് വീലുകൾ പാളം തെറ്റി. അപകടത്തിൽ ആർക്കും പരിക്കില്ല. മണ്ണ് നീക്കാനുള്ള ശ്രമം തുടരുകയാണ്.
പരശുറാം എക്സ്പ്രസ്സ്‌ ഉൾപ്പെടെ വൈകും. താംബരം–തിരുവനന്തപുരം സെൻട്രൽ സ്പെഷ്യൽ ട്രെയിൻ (06163), മധുര-പുനലൂർ എക്സ്പ്രസ് (16729), താംബരം–തിരുവനന്തപുരം സെൻട്രൽ അമൃത് ഭാരത് എക്സ്പ്രസ് (16121) എന്നീ ട്രെയിനുകൾ പിടിച്ചിട്ടു. നിലവധി ട്രെയിനുകൾ വൈകുമെന്നും റെയിൽവേ അധികൃതർ അറിയിച്ചു.
by Midhun HP News | Oct 22, 2026 | Latest News, കേരളം
തിരുവനന്തപുരം: സംസ്ഥാനത്ത് ഞായറാഴ്ച വരെ അതിശക്തമായ മഴ തുടരുമെന്ന് കേന്ദ്രകാലാവസ്ഥ വകുപ്പ്. തീവ്രമഴ കണക്കിലെടുത്ത് വിവിധ ജില്ലകളില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചു. എറണാകുളം, തൃശൂര്‍, മലപ്പുറം, കോഴിക്കോട് ജില്ലകളിലാണ് ഓറഞ്ച് അലര്‍ട്ട്. എല്ലാ ജില്ലകളിലും ശക്തമായ മഴ മുന്നറിയിപ്പുണ്ട്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, പാലക്കാട്, വയനാട്, കണ്ണൂര്‍, കാസര്‍കോട് ജില്ലകളിലാണ് യെല്ലോ അലര്‍ട്ട്.
ഓറഞ്ച് അലര്‍ട്ട്.
24/10/2026: കോഴിക്കോട്, കണ്ണൂര്‍, കാസര്‍കോട്
25/10/2026: ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളില്‍ കേന്ദ്ര കാലാവസ്ഥ വകുപ്പ് ഓറഞ്ച് അലര്‍ട്ട് പ്രഖ്യാപിച്ചിരിക്കുന്നു. ഒറ്റപ്പെട്ടയിടങ്ങളില്‍ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. 24 മണിക്കൂറില്‍ 115.6 mm മുതല്‍ 204.4 mm വരെ മഴ ലഭിക്കുമെന്നാണ് അതിശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്. .
യെല്ലോ അലര്‍ട്ട്
22/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, പാലക്കാട്, വയനാട്, കണ്ണൂര്‍, കാസര്‍കോട്
23/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട്
24/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, വയനാട്
25/10/2026: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, കണ്ണൂര്‍, കാസര്‍കോട് എന്നീ ജില്ലകളില്‍ കേന്ദ്ര കാലാവസ്ഥ വകുപ്പ് യെല്ലോ അലര്‍ട്ട് പ്രഖ്യാപിച്ചിരിക്കുന്നു. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 64.5 മില്ലിമീറ്ററില്‍ മുതല്‍ 115.5 മില്ലിമീറ്റര്‍ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അര്‍ത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്.
തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ തമിഴ്നാട് തീരത്തിന് സമീപം ന്യൂനമര്‍ദ്ദം രൂപപ്പെട്ടു. തായ്ലന്‍ഡ് കടലിടുക്കിനും അതിനോട് ചേര്‍ന്ന തായ്ലന്‍ഡ്, മ്യാന്‍മര്‍ പ്രദേശത്തിനും മുകളിലായി ചക്രവാതച്ചുഴി സ്ഥിതിചെയ്യുന്നു. ഈ ചക്രവാതച്ചുഴി വടക്കന്‍ ആന്‍ഡമാന്‍ കടലിലേക്ക് പ്രവേശിച്ചു. തുടര്‍ന്ന് പടിഞ്ഞാറ്-വടക്കുപടിഞ്ഞാറ് ദിശയിലേക്ക് നീങ്ങി. ഇതിന്റെ സ്വാധീനഫലമായി ഒക്ടോബര്‍ 23-ഓടെ തെക്കുകിഴക്കന്‍ ബംഗാള്‍ ഉള്‍ക്കടലിലും അതിനോട് ചേര്‍ന്ന മധ്യ-കിഴക്കന്‍ ബംഗാള്‍ ഉള്‍ക്കടലിലും ന്യൂനമര്‍ദ്ദം രൂപപ്പെടാന്‍ സാധ്യത. തുടര്‍ന്ന് ഇത് വടക്കുപടിഞ്ഞാറന്‍ ദിശയിലേക്ക് നീങ്ങുകയും അടുത്ത മൂന്ന് ദിവസങ്ങളില്‍ കൂടുതല്‍ ശക്തിപ്രാപിക്കാനും സാധ്യതയെന്ന് മുന്നറിയിപ്പില്‍ പറയുന്നു.
മത്സ്യത്തൊഴിലാളി ജാഗ്രത നിർദേശം
കേരള – ലക്ഷദ്വീപ് തീരങ്ങളിൽ 25/10/2026 വരെയും കർണാടക തീരത്ത് 23/10/2026 മുതൽ 25/10/2026 വരെയും മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥ വകുപ്പ് അറിയിച്ചു.
25/10/2026 വരെ കേരള – ലക്ഷദ്വീപ് തീരങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
23/10/20206 മുതൽ 25/10/2026 വരെ: കർണാടക തീരങ്ങളിൽ മണിക്കൂറിൽ 35 മുതൽ 45 കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത.
by Midhun HP News | Oct 21, 2026 | Latest News, കേരളം
തിരുവനന്തപുരം: കോവളത്തെ സ്പായുടെ മറവിൽ പ്രായപൂർത്തിയാകാത്ത പെൺകുട്ടിയെ ലൈംഗിക ചൂഷണത്തിന് ഇരയാക്കിയ കേസിൽ ശക്തമായ നടപടിയുണ്ടാകുമെന്ന് ഡിജിപി റവാഡ ചന്ദ്രശേഖർ. സംഭവത്തിൽ ഉൾപ്പെട്ട മനുഷ്യക്കടത്ത് അതീവ ഗൗരവത്തോടെയാണ് പൊലീസ് കാണുന്നതെന്നും സംസ്ഥാനത്തെ സ്പാകൾ കേന്ദ്രീകരിച്ച് കർശനവും വ്യാപകവുമായ പരിശോധനകൾ നടത്തുമെന്നും അദ്ദേഹം വ്യക്തമാക്കി.
കോവളം സ്പാ കേന്ദ്രീകരിച്ച് നടന്ന പെൺവാണിഭ സംഘത്തിലെ പ്രധാന കണ്ണി തിരുവനന്തപുരം നഗരസഭയിലെ ഹെൽത്ത് ഇൻസ്പെക്ടറായ അനുരൂപാണെന്നാണ് പൊലീസിന്റെ കണ്ടെത്തൽ. ഇയാളുടെ ഉടമസ്ഥതയിലുള്ള നാല് ബാങ്ക് അക്കൗണ്ടുകളിൽ നിന്നായി ലക്ഷക്കണക്കിന് രൂപയുടെ അസ്വാഭാവിക പണമിടപാടുകൾ കണ്ടെത്തിയിട്ടുണ്ട്. ഉള്ളൂർ സോണൽ ഓഫീസിലെ ജൂനിയർ ഹെൽത്ത് ഇൻസ്പെക്ടറായി ജോലിയിൽ പ്രവേശിച്ച ശേഷമാണ് അനുരൂപ് സ്പാ ബിസിനസുകളിലേക്ക് കടന്നത്. പീഡനം നടന്ന കോവളത്തെ സ്പാ ഇയാളുടെ ബെനാമി സ്ഥാപനമാണെന്ന് വ്യക്തമായിട്ടുണ്ട്. കൂടാതെ മറ്റ് രണ്ട് സ്പാകളുടെ നടത്തിപ്പിലും ഇയാൾക്ക് നേരിട്ട് പങ്കാളിത്തമുണ്ടെന്നാണ് പൊലീസിന്റെ പ്രാഥമിക നിഗമനം. ആന്ധ്രാ സ്വദേശിനിയായ പതിനാറുകാരിയെ കോവളത്ത് എത്തിച്ചതും അനുരൂപുമായി സംസാരിച്ചതിന് ശേഷമാണ്.
അറസ്റ്റിലായതിനെത്തുടർന്ന് തിരുവനന്തപുരം മേയർ വി.വി. രാജേഷ് അനുരൂപിനെ സർവീസിൽ നിന്ന് സസ്പെൻഡ് ചെയ്തിരുന്നു. സംഭവത്തിന്റെ ഗൗരവം കണക്കിലെടുത്ത് ഇയാളെ സർവീസിൽ നിന്ന് സ്ഥിരമായി പിരിച്ചുവിടാനുള്ള നടപടികളിലേക്ക് നഗരസഭ കടന്നിരിക്കുകയാണ്.
മാതൃസഹോദരി വിറ്റത് കമ്മീഷൻ വ്യവസ്ഥയിൽ; കുട്ടിക്ക് ക്രൂരപീഡനം
അതേസമയം, കേസിൽ മനസ്സാക്ഷിയെ മരവിപ്പിക്കുന്ന വിവരങ്ങളാണ് പുറത്തുവരുന്നത്. മാതാപിതാക്കൾ ചെറുപ്പത്തിലേ മരിച്ചുപോയ ആന്ധ്രാ സ്വദേശിനിയായ പെൺകുട്ടിയെ വളർത്തിയത് അമ്മയുടെ സഹോദരിയായിരുന്നു. എന്നാൽ, പോറ്റി വളർത്തിയ ആ മാതൃസഹോദരി തന്നെയാണ് പതിനാറ് വയസ്സ് തികയും മുൻപേ കുട്ടിയെ ലൈംഗിക ചൂഷണത്തിനായി വിറ്റത്. ഓരോ തവണ പീഡനത്തിന് ഇരയാക്കുമ്പോഴും 1,000 മുതൽ 4,000 രൂപ വരെ എന്ന കമ്മീഷൻ വ്യവസ്ഥയിലാണ് കുട്ടിയെ കോവളത്തെ സ്പായിലെത്തിച്ചതെന്ന് പൊലീസ് കണ്ടെത്തി.
പെൺകുട്ടി ലൈംഗിക ചൂഷണത്തിന് വഴങ്ങുന്നുണ്ടെന്ന് ഉറപ്പുവരുത്താനായി വളർത്തമ്മയും ഭർത്താവും ഇതേ സ്പായിൽത്തന്നെ ശുചീകരണ ജീവനക്കാരായി ജോലിക്ക് കയറുകയും ചെയ്തു. പീഡനത്തെ കുട്ടി എതിർത്തപ്പോഴെല്ലാം വളർത്തമ്മയും ഭർത്താവും ചേർന്ന് അതിക്രൂരമായി ഉപദ്രവിച്ചു. പൊള്ളലേൽപ്പിച്ചതിന്റെ ഉൾപ്പെടെയുള്ള പാടുകൾ പെൺകുട്ടിയുടെ ശരീരത്തിൽ കണ്ടെത്തിയിട്ടുണ്ട്.
കുട്ടിയെ വിറ്റ വളർത്തമ്മ, ഭർത്താവ്, സ്പാ നടത്തിപ്പുകാരായ അനുരൂപ് ഉൾപ്പെടെയുള്ളവർ എന്നിവർ നിലവിൽ പൊലീസിന്റെ പിടിയിലായിട്ടുണ്ട്. സ്പായിലെത്തി പെൺകുട്ടിയെ പീഡിപ്പിച്ച സന്ദർശകരെ കണ്ടെത്താനാണ് പൊലീസ് ഇപ്പോൾ ഊർജ്ജിതമായ അന്വേഷണം നടത്തുന്നത്. തമിഴും മലയാളവും സംസാരിക്കുന്ന നിരവധി ആളുകൾ തന്നെ ചൂഷണം ചെയ്തിട്ടുണ്ടെന്ന് കുട്ടി മൊഴി നൽകിയിട്ടുണ്ട്. സ്പായിൽ സിസിടിവി ദൃശ്യങ്ങളോ സന്ദർശക രജിസ്റ്ററോ സൂക്ഷിച്ചിട്ടില്ലാത്തതിനാൽ, പ്രതികളുടെയും സ്ഥാപനത്തിന്റെയും ഫോൺ കോൾ രേഖകൾ വിശദമായി പരിശോധിച്ച് സന്ദർശകരിലേക്ക് അന്വേഷണം വ്യാപിപ്പിച്ചിരിക്കുകയാണ് പൊലീസ്.
by Midhun HP News | Oct 21, 2026 | Latest News, കേരളം
ഡല്‍ഹി: അടുത്ത വര്‍ഷം നിയമസഭ തെരഞ്ഞെടുപ്പ് നടക്കാനിരിക്കുന്ന അഞ്ചു സംസ്ഥാനങ്ങളില്‍ തെരഞ്ഞെടുപ്പ് മുന്നൊരുക്കങ്ങള്‍ ഊര്‍ജ്ജിതമാക്കി തെരഞ്ഞെടുപ്പ് കമ്മീഷന്‍. മണിപ്പൂര്‍, ഉത്തര്‍പ്രദേശ്, ഉത്തരാഖണ്ഡ്, പഞ്ചാബ്, ഗോവ എന്നീ സംസ്ഥാനങ്ങളിലാണ് അടുത്ത വര്‍ഷം തെരഞ്ഞെടുപ്പ് നടക്കാനിരിക്കുന്നത്. ഒരുക്കങ്ങള്‍ വിലയിരുത്താനായി തെരഞ്ഞെടുപ്പ് കമ്മീഷനിലെ മുതിര്‍ന്ന ഉദ്യോഗസ്ഥര്‍ അടങ്ങുന്ന സംഘം മണിപ്പൂരിലെത്തി.
തെരഞ്ഞെടുപ്പ് തീയതികള്‍ പ്രഖ്യാപിക്കുന്നതിന് മുന്നോടിയായി, ഡെപ്യൂട്ടി തെരഞ്ഞെടുപ്പ് കമ്മീഷണര്‍മാരുടെ നേതൃത്വത്തിലുള്ള സംഘങ്ങള്‍ സംസ്ഥാനങ്ങള്‍ സന്ദര്‍ശിക്കുന്നുണ്ട്. ഉത്തരാഖണ്ഡില്‍ ഇതിനകം സന്ദര്‍ശനം നടത്തി. ഒക്ടോബര്‍ 28-ന് പഞ്ചാബില്‍ സന്ദര്‍ശനം നടത്താന്‍ തീരുമാനിച്ചിട്ടുണ്ട്. ഗോവ സന്ദര്‍ശന തീയതികള്‍ പുനഃക്രമീകരിച്ചുവരികയാണ്. യു പി സന്ദര്‍ശന വിവരങ്ങള്‍ അന്തിമമായിട്ടില്ല.
ഉത്തര്‍പ്രദേശ് നിയമസഭയുടെ കാലാവധി അടുത്ത വര്‍ഷം മെയ് 22-ന് അവസാനിക്കും. മണിപ്പൂര്‍ (60 എംഎല്‍എമാര്‍), ഗോവ (40), പഞ്ചാബ് (117), ഉത്തരാഖണ്ഡ് (70) എന്നീ സംസ്ഥാനങ്ങളിലെ നിയമസഭകളുടെ കാലാവധി 2027 മാര്‍ച്ചിലും അവസാനിക്കുകയാണ്. നിയമസഭ തെരഞ്ഞെടുപ്പ് നടക്കാനിരിക്കുന്ന അഞ്ച് സംസ്ഥാനങ്ങളില്‍ നിലവില്‍ പ്രത്യേക സംക്ഷിപ്ത വോട്ടര്‍പട്ടിക പുതുക്കല്‍ നടപടികള്‍ നടന്നുവരികയാണ്. 17 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും അന്തിമ വോട്ടര്‍പട്ടിക ജനുവരി 4-ന് പ്രസിദ്ധീകരിക്കും.
Recent Comments