by Midhun HP News | Sep 22, 2026 | Latest News, കേരളം
കൊച്ചി: കൊച്ചിയില്‍ നിന്ന് തമിഴ്‌നാട്ടിലെ തൂത്തുക്കുടിയിലേക്ക് 2,448.70 കോടി രൂപ നിക്ഷേപത്തില്‍ പ്രകൃതി വാതക പൈപ്പ് ലൈന്‍ സ്ഥാപിക്കാന്‍ ഇന്ത്യന്‍ ഓയില്‍ കോര്‍പ്പറേഷന്‍ നിക്ഷേപത്തിന് തിങ്കളാഴ്ച ചേര്‍ന്ന യോഗം അംഗീകാരം നല്‍കി. കൊച്ചിയില്‍ നിന്ന് കന്യാകുമാരി വഴി തൂത്തുക്കുടി വരെയുള്ള ഈ വാതകശൃംഖല 426.65 കിലോ മീറ്റര്‍ ദൈര്‍ഘ്യമുള്ളതാണ്. ദക്ഷിണേന്ത്യയില്‍ പ്രകൃതിവാതക ലഭ്യത ശക്തിപ്പെടുത്താന്‍ പര്യാപ്തമാണ് പദ്ധതി. പെട്രോളിയം പ്രകൃതിവാതക നിയന്ത്രണ ബോര്‍ഡ് പദ്ധതിക്ക് നേരത്തെ അനുമതി നല്‍കിയിരുന്നു.
പ്രതിദിനം 6.84 മില്യണ്‍ മെട്രിക് സ്റ്റാന്‍ഡേര്‍ഡ് ക്യുബിക് മീറ്റര്‍ വാതകം വഹിക്കാനുള്ള ശേഷിയാണ് നിര്‍ദിഷ്ട പദ്ധതിക്കുണ്ടാവുക. അതായത് ദിവസം 68.4 ലക്ഷം ക്യുബിക് മീറ്റര്‍ വാതകം ഇതിലൂടെ കൊണ്ടുപോകാനാകും. ഇതില്‍ മറ്റ് വിതരണക്കാര്‍ക്കായി നീക്കിവയ്ക്കുന്ന കോമണ്‍ കാരിയര്‍ ശേഷി 17.1 ലക്ഷം സ്റ്റാന്‍ഡേഡ് ക്യൂബിക് മീറ്ററായിരിക്കും. അതായത് 25 ശതമാനം മറ്റുള്ളവര്‍ക്കും ഉപയോഗിക്കാം. നിര്‍മാണ സമയക്രമത്തെക്കുറിച്ചോ, പദ്ധതി എപ്പോള്‍ കമ്മീഷന്‍ ചെയ്യാന്‍ ആകുമെന്നതിനെക്കുറിച്ചോ ഐഒസി വ്യക്തമാക്കിയിട്ടില്ല. ഫണ്ടിങ് എങ്ങനെയാണെന്നും അറിവായിട്ടില്ല.
2030ഓടെ റോഡുവഴി ടാങ്കറുകളില്‍ വാതകം കൊണ്ടുപോകുന്നത് അവസാനിപ്പിക്കാന്‍ പദ്ധതിയിലൂടെ ലക്ഷ്യമിടുന്നുണ്ട്. കേരളത്തിലും തമിഴ്‌നാടിന്റെ തെക്കന്‍ മേഖലകളിലും പ്രകൃതിവാതകം എത്തിക്കാന്‍ ലക്ഷ്യമിട്ടാണ് പദ്ധതി വിഭാവനം ചെയ്തിട്ടുള്ളത്. ഈ പ്രദേശങ്ങളില്‍ സിറ്റി ഗ്യാസ് ശൃംഖല കൂടുതല്‍ ശക്തിപ്പെടുത്താനും പദ്ധതിയിലൂടെ ഉദ്ദേശിക്കുന്നു. വീടുകള്‍ക്കൊപ്പം വ്യവസായശാലകള്‍ക്കും വാണിജ്യസ്ഥാപനങ്ങള്‍ക്കും ഊര്‍ജനിലയങ്ങള്‍ക്കും വാതക ലഭ്യത എളുപ്പമാക്കാന്‍ ഇതിലൂടെ കഴിയും. കാര്‍ബണ്‍ പുറന്തള്ളല്‍ കൂടുതലുള്ള മറ്റ് ഇന്ധനങ്ങളെ ആശ്രയിക്കുന്നത് ഈ പൈപ്പ് ലൈന്‍ ശൃംഖല സഹായകരമാകും.
കൊച്ചിയിലെ പെട്രോനെറ്റ് എല്‍എന്‍ജി ടെര്‍മിനലിന്റെ ശേഷി വന്‍തോതില്‍ ഉയര്‍ത്താന്‍ പദ്ധതി വഴിവെക്കും. കൊച്ചിയില്‍നിന്ന് കര്‍ണാടകത്തിലെ മംഗളൂരുവിലേക്ക് പ്രകൃതി വാതക പൈപ്പലൈന്‍ നിലവിലുണ്ട്. ഗെയില്‍ നിര്‍മിച്ച 450 കിലോമീറ്റര്‍ വാതകക്കുഴല്‍ 2021-ലാണ് കമ്മിഷന്‍ ചെയ്തത്.
by Midhun HP News | Sep 22, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവിലയില്‍ നേരിയ വര്‍ധന. പവന് 120 രൂപയാണ് വര്‍ധിച്ചത്. 1,13,480 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 15 രൂപയാണ് വര്‍ധിച്ചത്. 14,185 രൂപയാണ് ഒരു ഗ്രാം സ്വര്‍ണത്തിന്റെ വില. ഇന്നലെ രണ്ടു തവണയായി പവന് 920 രൂപയാണ് കുറഞ്ഞത്.
ഡോളര്‍ ശക്തിയാര്‍ജിച്ചതാണ് കഴിഞ്ഞ ദിവസം സ്വര്‍ണവിലയെ ബാധിച്ചത്. പണപ്പെരുപ്പനിരക്ക് കുറയ്ക്കാന്‍ യുഎസ് ഫെഡറല്‍ റിസര്‍വ് പലിശനിരക്ക് കൂട്ടിയതാണ് ഡോളറിന്റെ മൂല്യം ഉയരാന്‍ ഇടയാക്കിയത്. ഇതിന് പുറമേ എണ്ണവിലയിലെ മാറ്റങ്ങളും സ്വര്‍ണവിലയില്‍ പ്രതിഫലിക്കുന്നുണ്ട്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Sep 22, 2026 | Latest News, കേരളം
തിരുവനന്തപുരം: സിഎംആര്‍എല്‍- എക്സാലോജിക് സാമ്പത്തിക ഇടപാടു കേസില്‍ പ്രതിപക്ഷ നേതാവ് പിണറായി വിജയനെതിരെ ഇഡി നല്‍കിയ കത്തില്‍ സര്‍ക്കാര്‍ ഇന്ന് തീരുമാനമെടുത്തേക്കും. മുഖ്യമന്ത്രി വിഡി സതീശനും ആഭ്യന്ത്രമന്ത്രി രമേശ് ചെന്നിത്തലയും തമ്മില്‍ കൂടിക്കാഴ്ച നടത്തിയശേഷമാകും തീരുമാനം. വസ്തുതാപരിശോധന നടത്താനായി പ്രത്യേക അന്വേഷണ സംഘത്തെ രൂപീകരിച്ചേക്കുമെന്നാണ് റിപ്പോര്‍ട്ടുകള്‍. രാഷ്ട്രീയ പ്രതികാരമെന്ന ആക്ഷേപം ഉയരാനുള്ള സാധ്യത കൂടി മുന്നില്‍ക്കണ്ടാകും സര്‍ക്കാര്‍ തീരുമാനമെടുക്കുക.
പ്രതിപക്ഷ നേതാവ് പിണറായി വിജയന്‍, മുന്‍ മന്ത്രി മുഹമ്മദ് റിയാസ് തുടങ്ങിയവര്‍ക്കെതിരെ കേസെടുത്ത് അന്വേഷണം വേണമെന്നാണ് ഇഡി ഡിജിപിക്ക് നല്‍കിയ കത്തില്‍ ആവശ്യപ്പെട്ടിട്ടുള്ളത്. മാസപ്പടി ഇടപാടില്‍ പ്രതിപക്ഷ നേതാവ് പിണറായി വിജയനെതിരെ അഴിമതി നിരോധന വകുപ്പ് പ്രകാരം കേസെടുക്കാമെന്നാണ് അഡ്വക്കേറ്റ് ജനറലിന്റെ നിയമോപദേശം. ആഭ്യന്തരസെക്രട്ടറിക്ക് സമര്‍പ്പിച്ച നിയമോപദേശം ആഭ്യന്തരമന്ത്രിക്ക് കൈമാറിയിട്ടുണ്ട്.
സിഎംആര്‍എല്‍- എക്സാലോജിക് പണമിടപാടിലും ഹവാല ആരോപണത്തിലും അന്വേഷണം ആകാമെന്നും, ഏതു രീതിയിലുള്ള അന്വേഷണമാണ് വേണ്ടതെന്ന് സര്‍ക്കാരിന് തീരുമാനിക്കാമെന്നുമാണ് അഡ്വക്കേറ്റ് ജനറല്‍ ജാജു ബാബു നിയമോപദേശം നല്‍കിയിട്ടുള്ളത്. ഇഡിയുടെ റിപ്പോര്‍ട്ടിന്റെ അടിസ്ഥാനത്തില്‍ നേരിട്ട് എഫ്ഐആര്‍ രജിസ്റ്റര്‍ ചെയ്യുകയോ അല്ലെങ്കില്‍ എഫ്ഐആറിന് മുന്‍പായി വിജിലന്‍സ് തലത്തില്‍ പ്രാഥമിക അന്വേഷണം നടത്തുകയോ ചെയ്യാമെന്നാണ് എജി വ്യക്തമാക്കിയിട്ടുള്ളത്.
സിഎംആര്‍എല്‍ വീണയ്ക്ക് നല്‍കിയ 3.28 കോടി രൂപ മുഖ്യമന്ത്രിയായിരുന്ന പിണറായി വിജയനുള്ള കൈക്കൂലി ആണെന്നാണ് ഇഡി ആരോപിക്കുന്നത്. മകള്‍ വഴി പിണറായി വിജയന്‍ കൈക്കൂലി പണം വാങ്ങിയതിന് തെളിവുണ്ടെന്നും, അഴിമതി നിരോധന നിയമപ്രകാരം കേസെടുക്കാമെന്നും ഡയറക്ടര്‍ ജനറല്‍ ഓഫ് പ്രോസിക്യൂഷന്‍ ടി ആസിഫ് അലിയും സര്‍ക്കാരിന് നിയമോപദേശം നല്‍കിയിട്ടുണ്ട്. പിണറായി വിജയന്റെ മകള്‍ ടി വീണ, ഭര്‍ത്താവും മുന്‍മന്ത്രിയുമായ മുഹമ്മദ് റിയാസ് എന്നിവര്‍ക്കെതിരെയും കേസെടുക്കാമെന്ന് ഡിജിപി നിയമോപദേശത്തില്‍ വ്യക്തമാക്കുന്നു.
എന്‍ഫോഴ്‌സ്‌മെന്റ് ഡയറക്ടറേറ്റ് കൈമാറിയ കേസിന്റെ വസ്തുതകളും സാഹചര്യങ്ങളും പരിശോധിച്ചതില്‍ നിന്ന്, 2017 മാര്‍ച്ച് 4-നും 2019 മെയ് 18-നും ഇടയില്‍ വ്യാജ കരാറിന്റെ മറവില്‍ കൊച്ചിന്‍ മിനറല്‍സ് ആന്‍ഡ് റൂട്ടൈല്‍ ലിമിറ്റഡില്‍ (CMRL) നിന്ന് മകള്‍ ടി. വീണ വഴി 3.28 കോടി രൂപയുടെ സാമ്പത്തിക നേട്ടം പിണറായി വിജയന്‍ കൈവരിച്ചതായി സംശയലേശമന്യേ തെളിയിക്കപ്പെട്ടിട്ടുണ്ടെന്ന്, ഡിജിപി ടി ആസിഫലി നിയമോപദേശത്തില്‍ വ്യക്തമാക്കുന്നു. ഈ തുക പിണറായി വിജയന്റെ അറിയപ്പെടുന്ന വരുമാന സ്രോതസ്സുകള്‍ക്ക് ആനുപാതികമല്ലെന്ന് നിയമോപദേശത്തില്‍ പറയുന്നു.
by Midhun HP News | Sep 22, 2026 | Latest News, കേരളം
പാലക്കാട്: അപായച്ചങ്ങല വലിച്ചു ട്രെയിൻ നിർത്തിച്ചതിന് റിട്ട. റെയിൽവേ സൂപ്രണ്ടിനു ആർപിഎഫ് കേസിൽ സമൻസ്. കോഴിക്കോട് നാദാപുരം വലിയപുരയിൽ വിജയനാണ് സമൻസ് ലഭിച്ചത്. ബുധനാഴ്ച ഷൊർണൂർ റെയിൽവേ കോടതിയിൽ ഹാജരാകാനാണ് നിർദ്ദേശം. ജൂൺ 15ന് എറണാകുളം – കണ്ണൂർ ഇന്റർസിറ്റി എക്സ്പ്രസിൽ ആലുവയിൽ നിന്നു കയറാൻ ഡി1 കോച്ചിൽ റിസർവ് ചെയ്ത വിജയനും ഭാര്യയും മകളും ഡിസ്പ്ലേ ബോർഡിൽ പറഞ്ഞ സ്ഥലത്താണു കാത്തുനിന്നത്.
പക്ഷേ ട്രെയിൻ ഈ ഭാഗത്തല്ല നിർത്തിയത്. ജനറൽ കോച്ച് വരേണ്ട സ്ഥലത്താണ് 1 കോച്ച് എന്നതിനാൽ റിസർവ് ചെയ്യാത്ത യാത്രക്കാർ പലരും കോച്ചിൽ കയറുകയും തിരിച്ചിറങ്ങുകയും ചെയ്തു. അതിനിടെ വിജയൻ ട്രെയിനിൽ കയറുകയും ചെയ്തിരുന്നു. ഒരു മിനിറ്റിനു ശേഷം ട്രെയിൻ മുന്നോട്ടു നീങ്ങി. എന്നാൽ ഭാര്യയ്ക്കും മകൾക്കും കയറാനായില്ല. ഇതോടെയാണ് ചെയിൻ വലിച്ചു ട്രെയിൻ നിർത്തിച്ചത്.
ഡിസ്പ്ലേ ബോർഡിൽ പറഞ്ഞതിൽ നിന്നു വ്യത്യസ്തമായാണു ട്രെയിൻ നിർത്തിയതെന്നു വിജയൻ പറയുന്നു. മാത്രമല്ല രണ്ട് മിനിറ്റ് സ്റ്റോപ്പുള്ള ട്രെയിൻ ഒരു മിനിറ്റ് മാത്രമാണു സ്റ്റേഷനിൽ നിർത്തിയതെന്നും ഇതിന്റെ തെളിവുകൾ അന്നുതന്നെ നാഷനൽ ട്രെയിൻ എൻക്വയറി സിസ്റ്റത്തിൽ (എൻടിഇഎസ്) നിന്നു ശേഖരിച്ചിട്ടുണ്ടെന്നും വിജയൻ വ്യക്തമാക്കി.
മതിയായ കാരണങ്ങളില്ലാതെ ചെയിൻ വലിച്ചാൽ 1000 രൂപ പിഴ അടയ്ക്കണമെന്നാണു വ്യവസ്ഥ. പിഴ ഒടുക്കാൻ തയാറാകാഞ്ഞതിനെ തുടർന്നാണ് സമൻസ് അയച്ചിരിക്കുന്നത്. മതിയായ കാരണമാണോ എന്നത് ആരാണു നിശ്ചയിക്കുക എന്നു ചോദിച്ചു വിവരാവകാശ നിയമപ്രകാരം വിജയൻ ഉന്നയിച്ച ചോദ്യത്തിനു ‘ചുമതലപ്പെട്ട അധികാരി’ എന്നാണു ഡിവിഷനൽ റെയിൽവേ സെക്യൂരിറ്റി കമൻഡാന്റിന്റെ മറുപടി.
by Midhun HP News | Sep 22, 2026 | Latest News, കേരളം
കൊച്ചി: കായിക കേരളം ആവേശത്തോടെ കാത്തിരിക്കുന്ന ബ്രസീല്‍ ലെജന്‍ഡ്‌സും ഇന്ത്യ ഓള്‍ സ്റ്റാര്‍സ് ഇലവനും തമ്മിലുള്ള ഫുട്‌ബോള്‍ പോരാട്ടം നാളെ (ബുധനാഴ്ച) കൊച്ചിയില്‍. രാത്രി 7.30 മുതല്‍ കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തിലാണ് ആവേശപ്പോരാട്ടം. കാനറികളുടെ ആദ്യ സംഘം മത്സരത്തിനായി കൊച്ചിയില്‍ എത്തിയിട്ടുണ്ട്. ഇതിഹാസ താരം റൊണാള്‍ഡീഞ്ഞോ ഇന്നെത്തും. മറ്റ് താരങ്ങള്‍ തിങ്കളാഴ്ച രാവിലെയാണ് കൊച്ചിയിലെത്തിയത്. എഡ്മില്‍സന്‍ അടക്കമുള്ള 12 ബ്രസീല്‍ താരങ്ങളാണ് തിങ്കളാഴ്ച എത്തിയത്. റൊണാള്‍ഡീഞ്ഞോ ഉള്‍പ്പെട്ട അടുത്ത സംഘമാണ് ഇന്നെത്തുന്നത്.
കൊല്‍ക്കത്തയില്‍ നിലവിലെ ബ്രസീല്‍ ടീമും നിലവിലെ ഇന്ത്യന്‍ ടീമും തമ്മിലുള്ള ചരിത്ര പോരാട്ടം അരങ്ങേറുന്നതിന് തൊട്ടുമുന്‍പ് ഇതിഹാസങ്ങള്‍ കളത്തിലെത്തുന്നു എന്ന സവിശേഷതയും കൊച്ചിയിലെ മത്സരത്തിനുണ്ട്. കൊല്‍ക്കത്തയില്‍ വിനീഷ്യസ് ജൂനിയറും റഫീഞ്ഞയും അടക്കമുള്ള താരങ്ങള്‍ കളിക്കാനെത്തും. കൊച്ചിയിലെ മത്സരത്തിന്റെ ടിക്കറ്റ് വില്‍പ്പന മികച്ച രീതിയിലാണ് പുരോഗമിക്കുന്നതെന്നു സംഘാടകര്‍ വ്യക്തമാക്കി.
എഡ്മിസന്‍, പൗലോ സെര്‍ജിയോ, ജിയോവാനി, കമാന്‍ഡുകായ, വിയോള, ഗോമസ്, ഗുസ്താവോ നെരി, എലിവെല്‍ട്ടന്‍, റിക്കാര്‍ഡോ ഒലിവേര, ഡിയോഗോ ഗില്‍ തുടങ്ങിയ താരങ്ങളായ തിങ്കളാഴ്ച എത്തിയത്. കൊച്ചിയില്‍ നടന്ന റോഡ് ഷോയില്‍ ഇവരില്‍ ചില താരങ്ങള്‍ പങ്കെടുക്കുകയും ചെയ്തു.
മുന്‍ ഇന്ത്യന്‍ ക്യാപ്റ്റന്‍മാരായ ഐഎം വിജയന്‍, ബൈച്ചുങ് ബൂട്ടിയ എന്നിവരടക്കമുള്ള ഇതിഹാസങ്ങളാണ് ഇന്ത്യക്കായി ബൂട്ടുകെട്ടുന്നത്. മലയാളി താരങ്ങളായ ജോപോള്‍ അഞ്ചേരി, സികെ വിനീത്, മുഹമ്മദ് റാഫി, എന്‍പി പ്രദീപ്, എംവി നെല്‍സന്‍, റിനോ ആന്റോ തുടങ്ങിയവരും ടീമിലുണ്ട്. ക്ലൈമാക്‌സ് ലോറന്‍സ്, ഗൗരമാംഗി സിങ്, അര്‍ണാബ് മൊണ്ടാല്‍, മഹേഷ് ഗാവ്‌ലി, മഹെറാജുദ്ദീന്‍ വാഡു, മെഹ്താബ് ഹുസൈന്‍ തുടങ്ങിയ ഇന്ത്യന്‍ താരങ്ങളും ഓള്‍സ്റ്റാര്‍സ് ടീമിലുണ്ട്. ബ്രസീല്‍ ഇതിഹാസങ്ങളുടെ ലോക രാജ്യങ്ങളിലെ സന്ദര്‍ശനത്തിന്റെ ഭാഗമായാണ് കൊച്ചിയിലും മത്സരം സംഘടിപ്പിച്ചത്.
by Midhun HP News | Sep 22, 2026 | Latest News, കേരളം
തിരുവനന്തപുരം: കെഎസ്ആർടിസി ഓർഡിനറി ബസുകളിൽ സ്ത്രീകൾക്ക് സൗജന്യ യാത്ര നൽകുന്ന പ്രിയദർശിനി പദ്ധതിയുടെ നൂറാം ദിനമായ ഇന്ന് കെഎസ്ആർടിസിയുടെ രണ്ട് പുതിയ പദ്ധതികൾക്ക് തുടക്കം കുറിക്കുന്നു. കെഎസ്ആർടിസി ബജറ്റ് ടൂറിസം സെല്ലിന്റെ ലക്ഷദ്വീപ്, ഹൈദരാബാദ് ലക്ഷ്വറി പാക്കേജ് സർവീസ്, ബജറ്റ് ടൂറിസം സെല്ലിനായി തയാറാക്കിയ പുതിയ സോഫ്റ്റ് വെയർ, വെയിറ്റിങ് ലിസ്റ്റ് സംവിധാനം എന്നിവയുടെ ഔദ്യോഗിക ഉദ്ഘാടനം ഇന്ന് നിർവഹിക്കും.
വൈകീട്ട് 7:30ന് തമ്പാനൂർ ചൈത്രം ഹോട്ടലിൽ നടക്കുന്ന ചടങ്ങിലാണ്, യാത്രാപ്രേമികൾ കാത്തിരിക്കുന്ന കെഎസ്ആർടിസി ബജറ്റ് ടൂറിസം സെല്ലിന്റെ ലക്ഷദ്വീപ്, ഹൈദരാബാദ് ലക്ഷ്വറി പാക്കേജ് സർവീസിന്റെ ഉദ്ഘാടനം ഗതാഗത മന്ത്രി സി പി ജോൺ നിർവഹിക്കുന്നത്. കെഎസ്ആർടിസി ബജറ്റ് ടൂറിസം സെല്ലിനായി തയാറാക്കിയ പുതിയ സോഫ്റ്റ് വെയർ, വെയിറ്റിങ് ലിസ്റ്റ് സംവിധാനം എന്നിവയുടെയും ഔദ്യോഗിക ഉദ്ഘാടനവും മന്ത്രി നിർവഹിക്കും.
ലക്ഷദ്വീപ് ആദ്യ യാത്രയ്ക്കുവേണ്ടി തെരഞ്ഞെടുക്കപ്പെട്ട 10 യാത്രക്കാർക്കും ജൂലായ്, ഓഗസ്റ്റ് മാസങ്ങളിൽ സംസ്ഥാനതലത്തിൽ മികച്ച പ്രകടനം കാഴ്ചവച്ച ജീവനക്കാർക്കും യൂണിറ്റുകൾക്കും മന്ത്രി പുരസ്കാരം സമ്മാനിക്കുമെന്ന് കെഎസ്ആർടിസി ചെയർമാൻ അറിയിച്ചു. പുതിയ സോഫ്റ്റ്‌വെയർ നിലവിൽ വരുന്നതോടെ യാത്രക്കാർക്ക് ബജറ്റ് ടൂറിസം പാക്കേജുകളുടെ ടിക്കറ്റുകൾ ഓൺലൈൻ വഴി ബുക്ക് ചെയ്യാനാകും.
ഇന്ത്യൻ റെയിൽവേയ്ക്ക് സമാനമായി കെഎസ്ആർടിസി ടിക്കറ്റ് റിസർവേഷനിലും വെയിറ്റിങ് ലിസ്റ്റ് ഏർപ്പെടുത്തുന്നതാണ് പുതുതായി ഏർപ്പെടുത്തുന്ന മറ്റൊരു സംവിധാനം. ചടങ്ങിൽ തമ്പാനൂർ വാർഡ് കൗൺസിലർ ആർ. ഹരികുമാർ അധ്യക്ഷനാകും. കെഎസ്ആർടിസി സിഎംഡി ഡോ. പി.എസ് പ്രമോജ് ശങ്കർ, വകുപ്പിലെ ഉന്നത ഉദ്യോഗസ്ഥർ, രാഷ്ട്രീയ നേതാക്കൾ തുടങ്ങിയവർ പങ്കെടുക്കും.
കെഎസ്ആർടിസി ഓർഡിനറി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുന്ന പ്രിയദർശിനി യാത്രാ പദ്ധതിയുടെ നൂറാംദിനാഘോഷത്തിന്റെ ഭാഗമായി ഇന്നു രാവിലെ പത്തിന് ഗതാഗത മന്ത്രി സി പി ജോൺ തമ്പാനൂർ ഡിപ്പോയിൽ സന്ദർശനം നടത്തും. തുടർന്ന് കെഎസ്ആർടിസി ജീവനക്കാർ യാത്രക്കാർക്ക് മധുരം വിതരണം ചെയ്യും. സ്ത്രീകളുടെ യാത്രാ ചെലവിന്‍റെ ഭാരം കുറയ്ക്കുന്നതിനൊപ്പം പൊതുഗതാഗത സംവിധാനത്തിലേക്ക് കൂടുതൽ സ്ത്രീകളെ ആകർഷിക്കുക എന്ന ലക്ഷ്യത്തോടെയാണ്, സംസ്ഥാന സർക്കാർ 2026 ജൂൺ 15ന് കെഎസ്ആർടിസി ഓർഡിനറി ബസുകളിൽ പ്രിയദർശിനി യാത്രാ പദ്ധതി ആരംഭിച്ചത്.
സൗജന്യ സാരി വിതരണം- തെറ്റായ പ്രചരണമെന്ന് കെഎസ്ആർടിസി
പ്രിയദർശിനി സൗജന്യ യാത്രാ പദ്ധതിയുടെ നൂറാം ദിനാഘോഷത്തിന്റെ ഭാഗമായി കെഎസ്ആർടിസി ഡിപ്പോകളിൽ സാരി വിതരണം നടത്തുമെന്ന പ്രചാരണം അടിസ്ഥാനരഹിതമെന്ന് കെഎസ്ആർടിസി ചെയർമാൻ പി.എസ് പ്രമോജ് ശങ്കർ അറിയിച്ചു. സാമൂഹിക മാധ്യമങ്ങളിൽ പ്രചാരണം വ്യാപകമായതോടെയാണ് കെഎസ്ആർടിസി വിശദീകരണവുമായി രംഗത്തെത്തിയത്. പ്രിയദർശിനി പദ്ധതിയുടെ നൂറാംദിനത്തിൽ എല്ലാ കെഎസ്ആർടിസി ഡിപ്പോകളിലും സ്ത്രീകൾക്ക് സാരി വിതരണം ചെയ്യുമെന്നായിരുന്നു പ്രചാരണം.
Recent Comments