by Midhun HP News | Oct 21, 2026 | Latest News, കേരളം
തൃശൂർ: ചാവക്കാട് വീടിന് മുന്നിൽ നിർത്തിയിട്ടിരുന്ന കാർ മോഷ്ടിക്കാൻ ശ്രമിച്ച പ്രതിയെ നാട്ടുകാർ സാഹസികമായി പിന്തുടർന്ന് പിടികൂടി പൊലീസിൽ ഏൽപ്പിച്ചു. ചാവക്കാട് ബസ് സ്റ്റാൻഡിന് വടക്ക് പണിക്കവീട്ടിൽ ഷക്കീറിന്റെ കാറാണ് മോഷണശ്രമത്തിന് ഇരയായത്. സംഭവത്തിൽ മന്നലാംകുന്ന് കിണർ സ്വദേശി നബീലിനെയാണ് ചാവക്കാട് പൊലീസ് കസ്റ്റഡിയിലെടുത്തത്.
കഴിഞ്ഞദിവസം രാത്രി 9:30 ഓടെയായിരുന്നു സംഭവം. കാർ മോഷ്ടിക്കാൻ ശ്രമിക്കുന്നതിനിടെ അബദ്ധത്തിൽ വാഹനത്തിന്റെ ഹോൺ അടിച്ചതാണ് പ്രതിക്ക് വിനയായത്. പെട്ടെന്ന് കാറിന്റെ ഹോൺ ശബ്ദം കേട്ട് വീട്ടുകാർ പുറത്തിറങ്ങി നോക്കിയപ്പോൾ കാറിൽ നിന്ന് ഒരാൾ ചാടിയിറങ്ങി ഓടുന്നത് കണ്ടു. ഉടൻതന്നെ വീട്ടുകാർ ഇയാളെ പിന്തുടർന്നെങ്കിലും രക്ഷപ്പെടാൻ ശ്രമിച്ചു. എന്നാൽ വീട്ടുപരിസരത്ത് സ്ഥാപിച്ചിരുന്ന സിസിടിവി ക്യാമറകൾ പരിശോധിച്ചതോടെ മോഷ്ടാവിന്റെ രൂപം വ്യക്തമായി പതിഞ്ഞത് നാട്ടുകാർക്ക് സഹായകരമായി.
തുടർന്ന് നടത്തിയ തെരച്ചിലിൽ ഷക്കീറിന്റെ സഹോദരൻ ഷബീർ ഇയാളെ കണ്ടെത്തുകയും വിവരങ്ങൾ ചോദിച്ചറിയാൻ ശ്രമിക്കുകയും ചെയ്തു. ഇയാളുടെ ചിത്രം മൊബൈൽ ഫോണിൽ പകർത്താൻ തുടങ്ങിയതോടെ പ്രതി അക്രമാസക്തനാവുകയും ഷബീറിനെ ആക്രമിക്കാൻ ശ്രമിച്ചശേഷം വീണ്ടും ഓടുകയും ചെയ്തു. ഇതോടെ നാട്ടുകാർ സംഘടിച്ച് ഇയാളെ വളഞ്ഞു.
ഒടുവിൽ സമീപത്തെ വീടിന്റെ വിറകുപുരയിൽ ഒളിച്ചിരുന്ന പ്രതിയെ നാട്ടുകാർ കയ്യോടെ പിടികൂടുകയായിരുന്നു. നാട്ടുകാർ ഇയാളെ പരിശോധിച്ചപ്പോൾ കാറിൽ നിന്ന് കാണാതായ വീട്ടുരുടമയുടെ പേഴ്സും കാറിന്റെ താക്കോലും ഇയാളുടെ പോക്കറ്റിൽ നിന്ന് കണ്ടെടുത്തു. വിവരമറിഞ്ഞ് ഉടൻതന്നെ സ്ഥലത്തെത്തിയ ചാവക്കാട് പൊലീസ് പ്രതിയെ കസ്റ്റഡിയിലെടുത്തു. ഇയാളെ വിശദമായി ചോദ്യം ചെയ്തുവരികയാണ്.
by Midhun HP News | Oct 21, 2026 | Latest News, കേരളം
കോട്ടയം: പാമ്പാടി പതിമൂന്നാം മൈലില്‍ ബസിന് അടിയില്‍പ്പെട്ട് സ്‌കൂട്ടര്‍ യാത്രികരായ രണ്ട് യുവതികള്‍ മരിച്ചു. മീനടം വട്ടക്കാവുങ്കല്‍ തോമസിന്റെ മകള്‍ ആഷ്ലി ആന്‍ തോമസ് (25), പാമ്പാടി കടുംവുംഭാഗം ഫാദര്‍ കുര്യാക്കോസിന്റെ മകള്‍ കൃപ മെറിന്‍ കുര്യന്‍ (25) എന്നിവരാണ് മരിച്ചത്. ഇന്ന് രാവിലെയായിരുന്നു അപകടം.
രണ്ടുപേരും അപകട സ്ഥലത്തുതന്നെ മരിച്ചു. പാമ്പാടി പൊലീസ് സ്ഥലത്തെത്തി മേല്‍നടപടി സ്വീകരിച്ചു.
by Midhun HP News | Oct 21, 2026 | Latest News, കേരളം
കണ്ണൂർ: അറിവിന്റെ ലോകത്തേക്ക് ഹരിശ്രീ കുറിച്ച് കുരുന്നുകൾ ചുവടുവെച്ചു. വിജയദശമി നാളിൽ വിദ്യാരംഭ ചടങ്ങുകൾക്കായി കണ്ണൂർ ജില്ലയിലെ പ്രധാന ക്ഷേത്രങ്ങളിലും സാംസ്കാരിക കേന്ദ്രങ്ങളിലും അതിരാവിലെ മുതൽ വലിയ തിരക്കാണ് അനുഭവപ്പെട്ടത്. വടക്കേ മലബാറിലെ പ്രധാന സരസ്വതീ സങ്കേതമായ പള്ളിക്കുന്ന് മൂകാംബിക ക്ഷേത്രത്തിൽ പുലർച്ചെ മുതൽ തന്നെ നൂറുകണക്കിന് കുട്ടികളെയാണ് രക്ഷിതാക്കൾ എഴുത്തിനിരുത്താനായി എത്തിച്ചത്.
പള്ളിക്കുന്ന് മൂകാംബിക ക്ഷേത്രത്തിൽ കാട്ടുമാടം ഇളയടത്ത് ഈശാനൻ നമ്പൂതിരി, മനങ്ങാട്ട് ഇല്ലത്ത് ശങ്കരനാരായണ പ്രസാദ്, ചാലക്കുന്ന് ശങ്കരൻ നമ്പൂതിരി, മംഗലം ഉണ്ണികൃഷ്ണൻ നമ്പൂതിരി, കൊടുവള്ളി ഉണ്ണികൃഷ്ണൻ നമ്പൂതിരി തുടങ്ങിയ പ്രമുഖ ആചാര്യന്മാർ കുരുന്നുകൾക്ക് അറിവിന്റെ ആദ്യക്ഷരം പകർന്നുനൽകി. സ്വർണ്ണമോതിരം കൊണ്ട് നാവിലും തുടർന്ന് നെല്ലിലും അരിയിലും ‘ഹരിശ്രീ ഗണപതയേ നമഃ’ എന്ന് കുരുന്നുകളെക്കൊണ്ട് എഴുതിച്ചതോടെ അവർ അറിവിന്റെ പുത്തൻ ലോകത്തേക്ക് പ്രവേശിച്ചു.
പള്ളിക്കുന്നിന് പുറമെ ജില്ലയിലെ പ്രശസ്തമായ മറ്റ് ക്ഷേത്രങ്ങളിലും വിപുലമായ വിദ്യാരംഭ ചടങ്ങുകൾ നടന്നു. ചെറുകുന്ന് അന്നപൂർണേശ്വരി ക്ഷേത്രം, മുഴക്കുന്ന് മൃദംഗശൈലേശ്വരി ക്ഷേത്രം, ഇരിക്കൂർ മാമാനിക്കുന്നു ദേവീക്ഷേത്രം, വളപട്ടണം കളരിവാതുക്കൽ ക്ഷേത്രം തുടങ്ങിയ പുണ്യകേന്ദ്രങ്ങളിലെല്ലാം അതിരാവിലെ തന്നെ രക്ഷിതാക്കൾ കുട്ടികളുമായി എത്തിച്ചേർന്നിരുന്നു.വിജയദശമി നാളിലെ പ്രത്യേക പൂജകൾക്ക് ശേഷം രാവിലെ ഗ്രന്ഥമെടുപ്പ് ചടങ്ങും നടന്നു. ക്ഷേത്രങ്ങൾക്ക് പുറമെ ജില്ലയിലെ പ്രമുഖ വായനശാലകളിലും സാംസ്കാരിക സ്ഥാപനങ്ങളിലും എഴുത്തിനിരുത്ത് ചടങ്ങുകൾ ഭക്തിസാന്ദ്രമായ അന്തരീക്ഷത്തിൽ സംഘടിപ്പിച്ചു.
by Midhun HP News | Oct 21, 2026 | Latest News, കേരളം
തിരുവനന്തപുരം: ന്യൂനമര്‍ദ്ദത്തിന്റെ സ്വാധീനഫലമായി സംസ്ഥാനത്ത് ഞായറാഴ്ച വരെ പരക്കെ മഴയ്ക്ക് സാധ്യത. ഈ ദിവസങ്ങളില്‍ ഒറ്റപ്പെട്ട സ്ഥലങ്ങളില്‍ തീവ്രമഴയ്ക്കും ശക്തമായ മഴയ്ക്കും സാധ്യതയുള്ളതിനാല്‍ ജാഗ്രത പാലിക്കണമെന്ന് കേന്ദ്ര കാലാവസ്ഥ വകുപ്പ് അറിയിച്ചു.
ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിലാണ് ഒറ്റപ്പെട്ട തീവ്രമഴയ്ക്കുള്ള സാധ്യത നിലനില്‍ക്കുന്നത്. ജാഗ്രതയുടെ ഭാഗമായി ഈ ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചു. കോഴിക്കോട്, വയനാട്, കണ്ണൂര്‍, കാസര്‍കോട് ഒഴികെയുള്ള എല്ലാ ജില്ലകളിലും ഇന്ന് മഴ മുന്നറിയിപ്പ് ഉണ്ട്. ഓറഞ്ച് അലര്‍ട്ട് പ്രഖ്യാപിച്ച അഞ്ചു ജില്ലകള്‍ ഒഴികെ മഴ മുന്നറിയിപ്പ് ഉള്ള മറ്റു ജില്ലകളിലെല്ലാം ഇന്ന് യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
വ്യാഴാഴ്ച എറണാകുളം, തൃശൂര്‍, മലപ്പുറം, കോഴിക്കോട് ജില്ലകളിലാണ് തീവ്രമഴ മുന്നറിയിപ്പ് ഉള്ളത്. മറ്റു ജില്ലകളില്‍ യെല്ലോ അലര്‍ട്ട് ആണ് പ്രഖ്യാപിച്ചത്. വ്യാഴാഴ്ച മുതല്‍ ഞായറാഴ്ച വരെ എല്ലാ ജില്ലകളിലും മഴ മുന്നറിയിപ്പ് ഉണ്ട്. ശനിയാഴ്ച കോഴിക്കോട്, കണ്ണൂര്‍, കാസര്‍കോട് ജില്ലകളിലും ഞായറാഴ്ച എറണാകുളം, ഇടുക്കി, തൃശൂര്‍, പാലക്കാട്, മലപ്പുറം, കോഴിക്കോട്, വയനാട് ജില്ലകളിലും തീവ്രമഴയാണ് പ്രവചിക്കുന്നത്.
തെക്കുപടിഞ്ഞാറന്‍ ബംഗാള്‍ ഉള്‍ക്കടലിലും അതിനോട് ചേര്‍ന്ന തമിഴ്നാട് തീരത്തുത്തിനും മുകളിലായി സമുദ്രനിരപ്പില്‍ നിന്ന് 5.8 കിലോമീറ്റര്‍ വരെ ഉയരത്തില്‍ ചക്രവാത ചുഴി സ്ഥിതി ചെയ്യുന്നുണ്ട്. വരും മണിക്കൂറില്‍ ഇത് ന്യൂനമര്‍ദ്ദമായി രൂപപ്പെടാന്‍ സാധ്യതയുണ്ട്.
തായ്ലന്‍ഡ് കടലിടുക്കിനും അതിനോട് ചേര്‍ന്ന തായ്ലന്‍ഡ്, മ്യാന്‍മര്‍ പ്രദേശത്തിനും മുകളിലായി മറ്റൊരു ചക്രവാത ചുഴിയും നിലനില്‍ക്കുന്നുണ്ട്. വെള്ളിയാഴ്ചയോടെ തെക്കുകിഴക്കന്‍ ബംഗാള്‍ ഉള്‍ക്കടലിലും അതിനോട് ചേര്‍ന്ന മധ്യ-കിഴക്കന്‍ ബംഗാള്‍ ഉള്‍ക്കടലിലും ഇത് ന്യൂനമര്‍ദ്ദമായി രൂപപ്പെടാനും സാധ്യതയുണ്ട്. ഇതിന്റെയെല്ലാം സ്വാധീനഫലമായാണ് സംസ്ഥാനത്ത് മഴ ലഭിക്കുന്നതെന്നും മുന്നറിയിപ്പില്‍ പറയുന്നു. ഒറ്റപ്പെട്ട സ്ഥലങ്ങളില്‍ ഇടിമിന്നലോടുകൂടിയ മഴയ്ക്കും മണിക്കൂറില്‍ 30-40 കി.മീ. വരെ വേഗത്തില്‍ ശക്തമായ കാറ്റിനും സാധ്യതയുണ്ട്.
by Midhun HP News | Oct 21, 2026 | Latest News, കേരളം
കല്ലമ്പലം ആഴാംകോണം മണമ്പൂർ ശ്രീനികേതത്തിൽ പരേതരായ ശിവാനന്ദൻ വൈദ്യന്റെ മകളും ചന്ദ്രദാസിന്റെ സഹധർമ്മിണിയുമായ എസ് ജയശ്രീ ചന്ദ്രദാസ് (72) നിര്യാതയായി.
മകൾ: ലക്ഷ്മി ദാസ്
മരുമകൻ: ജയശങ്കർ
സഞ്ചയനം 24 ആം തീയതി ശനിയാഴ്ച രാവിലെ 8 മണി
by Midhun HP News | Oct 21, 2026 | Latest News, കേരളം
കോഴിക്കോട്: വന്ദേ ഭാരത് ട്രെയിന്‍ തട്ടി കോളജ് വിദ്യാര്‍ഥിനിക്ക് ദാരുണാന്ത്യം. ഇരിങ്ങല്‍ പെരുവയല്‍ സ്വദേശി നന്ദനയാണ് മരിച്ചത്.വടകരക്കും പയ്യോളിക്കും ഇടയില്‍ ഇരിങ്ങല്‍ റെയില്‍വേ ഗേറ്റിന് സമീപം ചൊവ്വാഴ്ച വൈകീട്ടായിരുന്നു അപകടം.
തിരുവനന്തപുരത്തേക്ക് പോകുകയായിരുന്ന വന്ദേ ഭാരത് എക്‌സ്പ്രസ് ട്രെയിനാണ് നന്ദനയെ ഇടിച്ചത്.അങ്കമാലിയിലെ കോളജില്‍ പഠിക്കുന്ന നന്ദന പൂജ അവധിക്ക് നാട്ടില്‍ എത്തിയതായിരുന്നു.റെയില്‍വേ ട്രാക്ക് മുറിച്ചു കിടക്കാന്‍ ശ്രമിക്കുന്നതിനിടെ ട്രെയിന്‍ ഇടിക്കുകയായിരുന്നു. നന്ദന തല്‍ക്ഷണം മരണപ്പെട്ടു. പൊലീസും റെയില്‍വേ അധികൃതരും സ്ഥലത്തെത്തി ഇന്‍ക്വസ്റ്റ് നടപടികള്‍ പൂര്‍ത്തിയാക്കി. മൃതദേഹം പോസ്റ്റ്‌മോര്‍ട്ടം ഉള്‍പ്പെടെയുള്ള തുടര്‍നടപടികള്‍ക്കായി വടകര ഗവ. ജില്ല ആശുപത്രിയിലെ മോര്‍ച്ചറിയിലേക്ക് മാറ്റി.
Recent Comments