by Midhun HP News | Oct 21, 2026 | Latest News, കേരളം
മൂന്നാർ: പൂജാ അവധി ആഘോഷിക്കാൻ സഞ്ചാരികൾ കൂട്ടത്തോടെ എത്തിയതോടെ പ്രമുഖ മലയോര വിനോദസഞ്ചാര കേന്ദ്രമായ മൂന്നാറിൽ അഭൂതപൂർവ്വമായ ഗതാഗതക്കുരുക്ക്. റോഡുകൾ പൂർണ്ണമായും വാഹനങ്ങൾ കയ്യടക്കിയതോടെ അതീവ ഗുരുതരാവസ്ഥയിലുള്ള രോഗികളുമായി ആശുപത്രികളിലേക്ക് കുതിച്ച ആംബുലൻസുകൾക്കുപോലും വഴിയൊരുക്കാൻ സാധിക്കാത്ത അതീവ ഗുരുതര സാഹചര്യമാണ് നിലവിലുള്ളത്. മണിക്കൂറുകളോളം നിരങ്ങിനീങ്ങേണ്ടി വന്നതോടെ വിനോദസഞ്ചാരികളും നാട്ടുകാരും ഒരുപോലെ വലഞ്ഞു.
ദേശീയപാത 85-ൽ പള്ളിവാസൽ രണ്ടാം മൈലിൽ കൂറ്റൻ പാറയിടിഞ്ഞു വീണതിനെത്തുടർന്ന് റോഡിൽ ഏർപ്പെടുത്തിയ ഗതാഗത നിയന്ത്രണങ്ങളും വാഹനങ്ങൾ വഴിതിരിച്ചുവിട്ടതുമാണ് പ്രതിസന്ധി ഇരട്ടിയാക്കിയത്. മൂന്നാർ ടൗണിൽ നിന്നും മാട്ടുപ്പെട്ടി, മറയൂർ, ദേവികുളം, അടിമാലി തുടങ്ങിയ മേഖലകളിലേക്ക് തിരിഞ്ഞുപോകേണ്ട പ്രധാന റോഡുകളിലെല്ലാം കിലോമീറ്ററുകളോളം വാഹനങ്ങളുടെ നീണ്ട നിരയാണ് രൂപപ്പെട്ടത്. റോഡുകളിൽ വാഹനങ്ങൾ കുരുങ്ങിക്കിടന്നതോടെ അത്യാഹിത വിഭാഗത്തിലേക്ക് അടിയന്തര ചികിത്സയ്ക്കായി രോഗികളുമായി പോയ സാധാരണക്കാരുൾപ്പെടെ വഴിയിൽ കുടുങ്ങിപ്പോകുന്ന അവസ്ഥയുണ്ടായി. പലയിടങ്ങളിലും സൈറൺ മുഴക്കി എത്തിയ ആംബുലൻസുകൾക്ക് മുന്നോട്ട് പോകാൻ വഴിയില്ലാതെ മറ്റ് വാഹനങ്ങൾക്കൊപ്പം നിസ്സഹായമായി മണിക്കൂറുകളോളം കിടക്കേണ്ടി വന്നു.
മൂന്നാറിലെ ശാശ്വതമായ ഗതാഗത പ്രശ്നങ്ങൾ പരിഹരിക്കുന്നതിനായി ഉന്നതതലത്തിൽ നിർദ്ദേശിക്കപ്പെട്ടിരുന്ന പുതിയ ട്രാഫിക് പരിഷ്കാരങ്ങൾ കഴിഞ്ഞ ഓഗസ്റ്റ് മാസം മുതൽ കർശനമായി നടപ്പിലാക്കുമെന്നായിരുന്നു നേരത്തെ ഔദ്യോഗികമായി പ്രഖ്യാപിച്ചിരുന്നത്. എന്നാൽ മാസങ്ങൾ കഴിഞ്ഞിട്ടും നിർദ്ദേശങ്ങളിലെ സുപ്രധാന കാര്യങ്ങൾ പോലും ഭരണകൂടമോ പോലീസോ പ്രാവർത്തികമാക്കിയിട്ടില്ലെന്ന ആക്ഷേപം ശക്തമാണ്. അവധിക്കാലത്തെ വാഹനപ്രവാഹവും ട്രാഫിക് മാനേജ്മെന്റിലെ ഈ വീഴ്ചയുമാണ് വിനോദസഞ്ചാര നഗരത്തെ പൂർണ്ണമായും നിശ്ചലമാക്കിയത്.
by Midhun HP News | Oct 21, 2026 | Latest News, കേരളം
കൊച്ചി: ഒരിടവേളയ്ക്ക് ശേഷം സംസ്ഥാനത്ത് സ്വര്‍ണവിലയില്‍ മാറ്റമില്ല. 1,07,120 രൂപയാണ് ഒരു പവന്‍ സ്വര്‍ണത്തിന്റെ വില. ഗ്രാമിന് 13,390 രൂപ നല്‍കണം. പണിക്കൂലിയും നികുതിയും കൂടി ചേരുമ്പോള്‍ വില ഇനിയും ഉയരും. ഇന്നലെ രണ്ടു തവണയായി 1440 രൂപ കുറഞ്ഞതോടെ ഈ മാസത്തെ ഏറ്റവും താഴ്ന്ന നിലവാരത്തില്‍ എത്തിയിരിക്കുകയാണ് സ്വര്‍ണവില.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ഉയര്‍ന്നതാണ് സ്വര്‍ണവില കുറയാന്‍ കാരണം. ബാരലിന് 110 ഡോളര്‍ കടന്നിരിക്കുകയാണ്. പണപ്പെരുപ്പ നിരക്ക് കൂടിയതോടെ വീണ്ടും പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് തയ്യാറായേക്കുമോ എന്ന ആശങ്കയും വിപണിയില്‍ പ്രതിഫലിക്കുന്നുണ്ട്. പലിശനിരക്ക് കൂട്ടിയാല്‍ സ്വര്‍ണത്തിന്റെ ആകര്‍ഷണം കുറയുമെന്നാണ് വിപണി വിദഗ്ധര്‍ പറയുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന്‍ വില ആദ്യമായി ഒരു ലക്ഷം കടന്നത്.
by Midhun HP News | Oct 21, 2026 | Latest News, കേരളം
കൊച്ചി: വിജയദശമി ദിനത്തില്‍ അറിവിന്റെയും അക്ഷരങ്ങളുടെയും ലോകത്തേക്ക് കാല്‍വെച്ച് കുരുന്നുകള്‍. പൂജവെയ്പ്പിനു ശേഷം ഇന്ന് രാവിലെ മുതല്‍ സംസ്ഥാനത്തെ പ്രധാന ക്ഷേത്രങ്ങളിലും ആത്മീയ-സാംസ്‌കാരിക കേന്ദ്രങ്ങളിലും വിദ്യാരംഭം ചടങ്ങുകള്‍ പുരോഗമിക്കുകയാണ്.
മലപ്പുറം തിരൂര്‍ തുഞ്ചന്‍പറമ്പില്‍ പുലര്‍ച്ചെ അഞ്ചോടെ വിദ്യാരംഭ ചടങ്ങുകള്‍ക്ക് തുടക്കമായി. പ്രമുഖ സാഹിത്യകാരന്മാരും പാരമ്പര്യ എഴുത്താശാന്മാരും രണ്ട് മണ്ഡപങ്ങളിലായി കുരുന്നുകളെ അക്ഷരലോകത്തേക്ക് ആനയിക്കുന്നു. തിരുവനന്തപുരം ഐരാണിമുട്ടം തുഞ്ചന്‍ സ്മാരകം, കോട്ടയം പനച്ചിക്കാട് ദക്ഷിണ മൂകാംബിക ക്ഷേത്രം, പറവൂര്‍ മൂകാംബിക ക്ഷേത്രം എന്നിവിടങ്ങളിലും വിദ്യാരംഭത്തിനായി വന്‍ തിരക്കാണ് അനുഭവപ്പെടുന്നത്.
തിരുവനന്തപുരത്ത് പത്മനാഭസ്വാമി ക്ഷേത്രം, പൂജപ്പുര സരസ്വതി ക്ഷേത്രം, ആറ്റുകാല്‍ ദേവി ക്ഷേത്രം ഉള്‍പ്പെടെയുള്ള പ്രമുഖ ആരാധനാലയങ്ങളിലും സാംസ്‌കാരിക കേന്ദ്രങ്ങളിലും വിദ്യാരംഭ സൗകര്യങ്ങള്‍ ഒരുക്കിയിട്ടുണ്ട്. ദക്ഷിണമൂകാംബികയായ പനച്ചിക്കാട് സരസ്വതീ ക്ഷേത്രത്തില്‍ പുലര്‍ച്ചെ 3.30ന് നടതുറന്ന് പൂജയെടുപ്പിനു ശേഷമാണ് വിദ്യാരംഭം തുടങ്ങിയത്. 40 ഗുരുക്കന്മാരുടെ നേതൃത്വത്തില്‍ വൈകിട്ട് നാല് മണി വരെ എഴുത്തിനിരുത്ത് തുടരും. ഒപ്പം സംഗീതാര്‍ച്ചനയും വൈവിധ്യമാര്‍ന്ന കലാപരിപാടികളും ക്ഷേത്രമുറ്റത്ത് അരങ്ങേറുന്നുണ്ട്.
കൊല്ലൂര്‍ മൂകാംബിക ക്ഷേത്രത്തില്‍ പുലര്‍ച്ചെ നാല് മണിയോടെ വിദ്യാരംഭം ചടങ്ങുകള്‍ ആരംഭിച്ചു. സരസ്വതി മണ്ഡപത്തിലും പരിസരത്തുമായാണ് ചടങ്ങുകള്‍ നടക്കുന്നത്. നാടിന്റെ വിവിധ ഭാഗങ്ങളില്‍ നിന്നുള്ള പതിനായിരക്കണക്കിന് ഭക്തരാണ്, പ്രത്യേകിച്ച് മലയാളികള്‍, കുരുന്നുകള്‍ക്ക് ആദ്യാക്ഷരം കുറിക്കാനും കലാപരിപാടികളില്‍ അരങ്ങേറ്റം കുറിക്കാനുമായി കൊല്ലൂരിലെത്തിയത്. വൈകിട്ട് നടക്കുന്ന വിജയോത്സവത്തോടെ കൊല്ലൂരിലെ നവരാത്രി ആഘോഷങ്ങള്‍ക്ക് സമാപനമാകും.
by Midhun HP News | Oct 20, 2026 | Latest News, കേരളം
ഇടുക്കി: കൊച്ചി–ധനുഷ്കോടി ദേശീയപാത 85-ലെ അടിമാലി–മൂന്നാർ റൂട്ടിൽ വൻപാറ അടർന്നുവീണതിനെത്തുടർന്ന് പാതയിലെ ഗതാഗതം പൂർണ്ണമായി നിരോധിച്ചു. മൂന്നാർ രണ്ടാം മൈൽ ഭാഗത്താണ് കഴിഞ്ഞ രാത്രി ദേശീയപാത വികസനത്തിനായി മണ്ണുമാന്തുന്നതിനിടെ കൂറ്റൻ പാറ റോഡിലേക്ക് പതിച്ചത്. റോഡിലെയും പരിസരത്തെയും മുഴുവൻ സുരക്ഷാ ഭീഷണികളും ഒഴിവാക്കുന്നത് വരെ ഈ റൂട്ടിലെ ഗതാഗത നിരോധനം തുടരുമെന്ന് ഇടുക്കി ജില്ലാ കളക്ടർ ഡോ. ദിനേശൻ ചെറുവത്ത് അറിയിച്ചു.
റോഡിലേക്ക് പതിച്ച വലിയ പാറയ്ക്ക് പുറമെ, ഈ മേഖലയിൽ മറ്റ് പാറകളും വൻമരങ്ങളും അപകടകരമായ അവസ്ഥയിൽ നിൽക്കുന്നത് സുരക്ഷാ ഭീഷണി ഉയർത്തുന്നുണ്ട്. റോഡ് തടസ്സപ്പെടുത്തി കിടക്കുന്ന പാറ പൊട്ടിച്ചുനീക്കാനും അപകടാവസ്ഥയിലുള്ള മരങ്ങളും മറ്റ് കല്ലുകളും വെട്ടിമാറ്റാനും ചുരുങ്ങിയത് മൂന്ന് ദിവസമെങ്കിലും വേണ്ടിവരുമെന്നാണ് അധികൃതരുടെ പ്രാഥമിക നിഗമനം. മൂന്ന് ദിവസത്തിനകം തടസ്സങ്ങൾ പൂർണ്ണമായി നീക്കം ചെയ്യാൻ ദേശീയപാത അതോറിറ്റി പ്രോജക്ട് ഡയറക്ടർക്ക് ജില്ലാ കളക്ടർ കർശന നിർദ്ദേശം നൽകിയിട്ടുണ്ട്.
വാഹനങ്ങൾ വഴിതിരിച്ചുവിട്ടത് ഇങ്ങനെ:
മൂന്നാറിൽ നിന്ന് അടിമാലി ഭാഗത്തേക്ക് പോകുന്ന വാഹനങ്ങൾ രണ്ടാം മൈലിൽ നിന്ന് തിരിഞ്ഞ് ആനച്ചാൽ, ഇരുട്ടുകാനം വഴി അടിമാലിയിലേക്ക് പോകണം.
അടിമാലിയിൽ നിന്ന് മൂന്നാറിലേക്ക് പോകുന്ന വാഹനങ്ങൾ ഇരുട്ടുകാനത്തുനിന്ന് തിരിഞ്ഞ് ആനച്ചാൽ വഴി രണ്ടാം മൈലിലെത്തി മൂന്നാറിലേക്ക് യാത്ര തുടരണം.
മാങ്കുളത്തേക്ക് പോകുന്ന വാഹനങ്ങൾ ഇരുട്ടുകാനത്തുനിന്ന് തിരിഞ്ഞ് കല്ലാർ ജംഗ്ഷനിലെത്തി മാങ്കുളം റോഡിലേക്ക് പ്രവേശിക്കണം.
വിദഗ്‌ധരടങ്ങുന്ന സാങ്കേതിക സമിതി സ്ഥലത്തെത്തി പരിശോധന നടത്തി റോഡിലെ മുഴുവൻ സുരക്ഷാ ഭീഷണികളും ഒഴിഞ്ഞുവെന്ന് ഉറപ്പുവരുത്തിയ ശേഷം മാത്രമേ അടിമാലി–മൂന്നാർ റൂട്ടിൽ ഗതാഗതം പുനഃസ്ഥാപിക്കുകയുള്ളൂവെന്ന് ഉദ്യോഗസ്ഥർ വ്യക്തമാക്കി. രാത്രികാല സുരക്ഷ ഉറപ്പാക്കുന്നതിനായി ആവശ്യമായ മുന്നറിയിപ്പ് ബോർഡുകളും ബാരിക്കേഡുകളും അടിയന്തരമായി സ്ഥാപിക്കാൻ ജില്ലാ പൊലീസ് മേധാവിക്കും നിർദ്ദേശം നൽകിയിട്ടുണ്ട്. മലഞ്ചെരിവുകളിൽ മണ്ണ് മാറ്റുമ്പോൾ കുത്തനെയുള്ള വെട്ടിമാറ്റലിന് പകരം സുരക്ഷിതമായ ശാസ്ത്രീയ ബെഞ്ച് കട്ടിംഗ് രീതി നടപ്പിലാക്കണമെന്ന് ദുരന്തനിവാരണ അതോറിറ്റിയും നിർദ്ദേശിച്ചു.
by Midhun HP News | Oct 20, 2026 | Latest News, കേരളം
കൊല്ലം:കൊട്ടാരക്കരയില്‍ ശബരിമല ദര്‍ശനം കഴിഞ്ഞ് മടങ്ങുകയായിരുന്ന അയ്യപ്പ ഭക്തര്‍ക്ക് മദ്യപസംഘത്തിന്റെ ക്രൂര മര്‍ദനം. ഒന്നര വയസ്സുള്ള കുഞ്ഞിനും സ്ത്രീകള്‍ക്കുമുള്‍പ്പെടെ പരിക്കേറ്റു. ഇവരെ കൊട്ടാരക്കര താലൂക്ക് ആശുപത്രിയില്‍ പ്രവേശിപ്പിച്ചു. സംഭവത്തില്‍ കൊട്ടാരക്കര സ്വദേശികളായ പ്രണവ്, ഷിബിന്‍, ശരത്, പ്രവീണ്‍ എന്നിവരെ പൊലീസ് കസ്റ്റഡിയിലെടുത്തു.
ഇന്നലെ രാത്രിയിലായിരുന്നു സംഭവം. ഭക്തര്‍ സഞ്ചരിച്ച കാറില്‍ മദ്യപ സംഘത്തിന്റെ കാര്‍ തട്ടി. തുടര്‍ന്ന് ഇരുകൂട്ടരും തമ്മില്‍ വാക്കേറ്റമുണ്ടായി. പിന്നാലെ മദ്യലഹരിയിലായിരുന്ന നാലംഗ സംഘം വാഹനത്തിലുണ്ടായിരുന്ന കുടുംബത്തെ ആക്രമിക്കുകയായിരുന്നു. തുടര്‍ന്ന് സമീപവാസികള്‍ പൊലീസില്‍ വിവരം അറിയിക്കുകയായിരുന്നു.യുവാക്കള്‍ അമിതമായി മദ്യപിച്ചിരുന്നതായും ഇവര്‍ സഞ്ചരിച്ച വാഹനത്തില്‍ നിന്നും മദ്യ കുപ്പികള്‍ കണ്ടെടുത്തതായും പൊലീസ് പറഞ്ഞു.
by Midhun HP News | Oct 20, 2026 | Latest News, കേരളം
പത്തനംതിട്ട: പത്തനംതിട്ടയിലെ പുളികീഴിൽ മൂന്ന് വര്‍ഷം മുമ്പ് കുട്ടിയുടെ മൃതദേഹം കണ്ടെത്തിയ സംഭവം കൊലപാതകമെന്ന് തെളിഞ്ഞു. തന്റെ ആൺസുഹൃത്ത് കുട്ടിയെ ശ്വാസം മുട്ടിച്ച് കൊലപ്പെടുത്തുകയായിരുന്നു എന്ന് അമ്മ മൊഴി നൽകി. ചതുപ്പിൽ കുഴിച്ചിട്ട നിലയിലാണ് മൂന്നു വയസ്സുള്ള കുഞ്ഞിന്റെ മൃതദേഹം കണ്ടെത്തിയിരുന്നത്.
മൂന്നു വർഷങ്ങൾക്ക് ശേഷമാണ് കുട്ടിയുടെ അമ്മയായ നാടോടി സ്ത്രീയെ പൊലീസ് പിടികൂടുന്നത്. കഴിഞ്ഞയാഴ്ച പാലക്കാട് വെച്ച് നാടോടികളായ സ്ത്രീകള്‍ തമ്മിലുണ്ടായ വഴക്കിനിടെയാണ് കുട്ടിയുടെ മരണത്തെക്കുറിച്ച് അമ്മ വെളിപ്പെടുത്തുന്നത്. വിവരം അറിഞ്ഞ പൊതു പ്രവർത്തകൻ വിവരം പൊലീസിനെ അറിയിക്കുകയായിരുന്നു.
ചെങ്ങന്നൂരില്‍ വെച്ച് സുഹൃത്തുമായുള്ള ലൈംഗിക ബന്ധത്തിനിടെ കുഞ്ഞ് കരഞ്ഞതാണ് പ്രകോപനമായത്. ദേഷ്യത്തിൽ ആൺസുഹൃത്ത് കുട്ടിയെ ശ്വാസം മുട്ടിച്ച് കൊലപ്പെടുത്തുകയായിരുന്നുവെന്ന് സ്ത്രീ പൊലീസിനോട് സമ്മതിച്ചു. തുടര്‍ന്ന് ആണ്‍സുഹൃത്തിന്റെ സഹായത്തോടെ മൃതദേഹം പുളിക്കീഴിലെ ചതുപ്പില്‍ കുഴിച്ചിടുകയായിരുന്നു. പ്രതിയായ ആൺസുഹൃത്തിനായി പൊലീസ് തിരച്ചിൽ ഊർജ്ജിതമാക്കി.
Recent Comments