by Midhun HP News | Sep 14, 2026 | Latest News, കേരളം
സുൽത്താൻ ബത്തേരി: പൊലീസ് സ്റ്റേഷൻ വളപ്പിൽ സൂക്ഷിച്ചിരുന്ന നിരോധിത ലഹരി ഉൽപ്പന്നങ്ങൾ സ്വന്തം ഉദ്യോഗസ്ഥൻ തന്നെ മോഷ്ടിച്ചു കടത്തിയ സംഭവത്തിൽ സീനിയർ സിവിൽ പൊലീസ് ഓഫീസർക്കെതിരെ ക്രിമിനൽ കേസ് രജിസ്റ്റർ ചെയ്തു. സുൽത്താൻ ബത്തേരി പൊലീസ് സ്റ്റേഷനിലെ സീനിയർ സിവിൽ പൊലീസ് ഓഫീസറും വൈത്തിരി സ്വദേശിയുമായ സബിത്തിനെതിരെയാണ് പൊലീസ് സേനയ്ക്ക് തന്നെ നാണക്കേടുണ്ടാക്കിയ സംഭവത്തിൽ കേസെടുത്തത്. അന്തർസംസ്ഥാന അതിർത്തി ചെക്ക്‌പോസ്റ്റിൽ നിന്ന് പിടികൂടി കോടതി ഉത്തരവുപ്രകാരം പൊലീസ് സ്റ്റേഷനിൽ സുരക്ഷിതമായി സൂക്ഷിച്ചിരുന്ന ഏഴ് ചാക്കോളം വരുന്ന നിരോധിത പുകയില ഉൽപ്പന്നങ്ങളാണ് കടത്തിക്കൊണ്ടുപോയത്.
കഴിഞ്ഞ ദിവസം സ്റ്റേഷനിലെ റൈറ്ററും അസിസ്റ്റന്റ് റൈറ്ററും തൊണ്ടിമുതലുകൾ സൂക്ഷിച്ച മുറിയിൽ പരിശോധനയ്ക്കായി എത്തിയപ്പോഴാണ് ലഹരി ചാക്കുകൾ കാണാനില്ലെന്ന വിവരം ആദ്യമായി തിരിച്ചറിയുന്നത്. മുറിയുടെ വാതിലോ പൂട്ടോ ബലപ്രയോഗത്തിലൂടെ തകർത്തതിന്റെ ലക്ഷണങ്ങളൊന്നും അവിടെ ഉണ്ടായിരുന്നില്ല. തുടർന്ന് നടത്തിയ വിശദമായ പരിശോധനയിലാണ് സ്റ്റേഷൻ റൈറ്ററുടെ പക്കലുണ്ടായിരുന്ന യഥാർത്ഥ താക്കോൽ കൈക്കലാക്കി മുറി തുറന്നാണ് പ്രതി മോഷണം നടത്തിയതെന്ന് സ്ഥിരീകരിച്ചത്. ഇതോടെ കൃത്യത്തിന് പിന്നിൽ സ്റ്റേഷനിലെ തന്നെ ആരെങ്കിലും ആയിരിക്കുമെന്ന സംശയത്തിലേക്ക് അന്വേഷണ സംഘം എത്തുകയായിരുന്നു.
സംഭവത്തെ തുടർന്ന് സുൽത്താൻ ബത്തേരി ഡിവൈഎസ്പിയുടെ നേതൃത്വത്തിൽ സ്റ്റേഷൻ വളപ്പിലെയും പരിസരത്തെയും സിസിടിവി നിരീക്ഷണ ദൃശ്യങ്ങൾ കേന്ദ്രീകരിച്ച് സമഗ്ര അന്വേഷണം ആരംഭിച്ചു. പരിശോധനയിൽ രാത്രി സമയത്ത് കാറിലെത്തിയ ഒരാൾ ചാക്കുകൾ വാഹനത്തിൽ കയറ്റി അതിവേഗം കടത്തിക്കൊണ്ടുപോകുന്ന ദൃശ്യങ്ങൾ പൊലീസിന് ലഭിച്ചു. വാഹന വിവരങ്ങളും ദൃശ്യങ്ങളും ശാസ്ത്രീയമായി വിശകലനം ചെയ്തതോടെയാണ് മോഷണത്തിന് പിന്നിൽ പ്രവർത്തിച്ചത് സ്റ്റേഷനിലെ ഉദ്യോഗസ്ഥനായ സബിത്ത് തന്നെയാണെന്ന് അന്വേഷണ സംഘം സ്ഥിരീകരിച്ചത്. സംഭവത്തിന് പിന്നാലെ ഒളിവിൽപ്പോയ പ്രതിക്കായി പൊലീസ് വ്യാപകമായ തെരച്ചിൽ ആരംഭിച്ചിട്ടുണ്ട്. കടത്തിക്കൊണ്ടുപോയ പുകയില ഉൽപ്പന്നങ്ങൾ ലഹരി മാഫിയകൾക്ക് മറിച്ചുവിറ്റതാണോ എന്നതടക്കമുള്ള കാര്യങ്ങളിൽ വ്യക്തത വരുത്താൻ കൂടുതൽ അന്വേഷണം പുരോഗമിക്കുകയാണെന്ന് ഉന്നത പൊലീസ് ഉദ്യോഗസ്ഥർ വ്യക്തമാക്കി.
by Midhun HP News | Sep 14, 2026 | Latest News, കേരളം
കൊച്ചി: ആലുവ നഗരമധ്യത്തില്‍ നടുക്കുന്ന കവര്‍ച്ച. ആലുവ റെയില്‍വേ സ്റ്റേഷന് സമീപം പ്രവാസി മലയാളിയെ ആക്രമിച്ച് മാലയും പണവും കവര്‍ന്നു. രണ്ടുപേര്‍ ചേര്‍ന്ന് നടത്തിയ ആക്രമണത്തില്‍ ഗുരുതരമായി പരിക്കേറ്റ കോടനാട് സ്വദേശി ജോഫിന്‍ ജിജു ആശുപത്രിയില്‍ ചികിത്സയിലാണ്.
പുലര്‍ച്ചെയാണ് സംഭവം. ആലുവ റെയില്‍വേ സ്റ്റേഷനിലേക്ക് പോകുകയായിരുന്ന ജോഫിന്‍ ജിജുവിനെ തലയ്ക്ക് കല്ലെറിഞ്ഞ് വീഴ്ത്തിയായിരുന്നു ആക്രമണം. തുടര്‍ന്ന് കയറുകൊണ്ട് കെട്ടി കനാലില്‍ തള്ളി. ഇതിന് ശേഷം നെഞ്ചില്‍ കരിങ്കല്ല് കൊണ്ട് ഇടിച്ച് പണവും മാലയും കവര്‍ന്നെന്നാണ് പൊലീസിന് നല്‍കിയ മൊഴി.
റെയില്‍വേ സ്റ്റേഷന് പിന്നില്‍ ഗുഡ്‌സ് യാര്‍ഡിലൂടെ സ്റ്റേഷനിലേക്ക് വരുമ്പോഴാണ് ആക്രമണം ഉണ്ടായത്. പ്രതിയെ പൊലീസ് തിരിച്ചറിഞ്ഞെന്നും ഉടന്‍ തന്നെ അറസ്റ്റ് ചെയ്യുമെന്നും ആലുവ എംഎല്‍എ അന്‍വര്‍ സാദത്ത് അറിയിച്ചു. പ്രദേശത്ത് ഇരുട്ടിന്റെ മറവില്‍ ചില ആളുകള്‍ തമ്പടിക്കുന്ന കാര്യം പൊലീസിന്റെ ശ്രദ്ധയില്‍പ്പെടുത്തിയിട്ടുണ്ടെന്നും അന്‍വര്‍ സാദത്ത് വ്യക്തമാക്കി.
അതിനിടെ രാത്രിസമയങ്ങളില്‍ പ്രദേശത്ത് ആവശ്യത്തിന് വെളിച്ചമില്ലാത്തതും സിസിടിവി കാമറകള്‍ പ്രവര്‍ത്തനരഹിതമായി കിടക്കുന്നതുമാണ് ആക്രമണങ്ങള്‍ ആവര്‍ത്തിക്കാന്‍ കാരണമെന്ന് നാട്ടുകാര്‍ പറയുന്നു. ഇതിന് മുന്‍പും സമാനമായ ആക്രമണം ഉണ്ടായിട്ടുണ്ടെന്നും നാട്ടുകാര്‍ ആരോപിക്കുന്നു.
by Midhun HP News | Sep 14, 2026 | Latest News, കേരളം
തൃശൂർ: പുത്തൂർ സുവോളജിക്കൽ പാർക്കിലെ ഷെഡ്യൂൾ-1 വിഭാഗത്തിൽപ്പെട്ട ‘നന്ദു’ എന്ന കടുവയെ ദയാവധത്തിന് വിധേയമാക്കിയതിലും തുടർന്നുണ്ടായ പോസ്റ്റ്‌മോർട്ടം നടപടികളിലും ഗുരുതര ചട്ടലംഘനങ്ങൾ ആരോപിച്ച് മൃഗസംരക്ഷണ സംഘടനയായ അനിമൽസ് ആൻഡ് നേച്ചർ എത്തിക്‌സ് കമ്മ്യൂണിറ്റി ട്രസ്റ്റ് രംഗത്ത്. വിഷയത്തിൽ നിഷ്പക്ഷവും സ്വതന്ത്രവുമായ സമയബന്ധിത അന്വേഷണം വേണമെന്ന് ട്രസ്റ്റ് ആവശ്യപ്പെട്ടു.
കടുവയുടെ ദയാവധം, വിദഗ്ദ്ധ പരിശോധന, പോസ്റ്റ്‌മോർട്ടം എന്നിവ ദേശീയ കടുവ സംരക്ഷണ അതോറിറ്റിയുടെയും കേന്ദ്ര പരിസ്ഥിതി-വന-കാലാവസ്ഥാ വ്യതിയാന മന്ത്രാലയത്തിന്റെയും മാർഗ്ഗനിർദ്ദേശങ്ങൾക്ക് വിധേയമായാണോ നടന്നതെന്ന് സമഗ്രമായി പരിശോധിക്കണമെന്ന് ട്രസ്റ്റ് അധികൃതർക്ക് നൽകിയ നിവേദനത്തിൽ ആവശ്യപ്പെട്ടു.
കടുവകളുടെ മരണവും പോസ്റ്റ്‌മോർട്ടവുമായി ബന്ധപ്പെട്ട് ദേശീയ കടുവ സംരക്ഷണ അതോറിറ്റി നിഷ്കർഷിച്ചിട്ടുള്ള സ്റ്റാൻഡേർഡ് ഓപ്പറേറ്റിംഗ് പ്രൊസീജ്യർ പുത്തൂരിൽ കൃത്യമായി പാലിക്കപ്പെട്ടോ എന്നതിൽ സംഘടന സംശയം പ്രകടിപ്പിക്കുന്നു. പോസ്റ്റ്‌മോർട്ടം നടത്തിയ മെഡിക്കൽ ബോർഡിൽ നിർദ്ദിഷ്ട യോഗ്യതയുള്ള വിദഗ്ദ്ധരുടെ സാന്നിധ്യമുണ്ടായിരുന്നോ, എൻടിസിഎയുടെ അംഗീകൃത പ്രതിനിധി സംഘത്തിലുണ്ടായിരുന്നോ, നടപടികളിൽ പങ്കെടുത്ത വെറ്ററിനറി സർജൻമാർക്ക് വന്യജീവി ചികിത്സയിൽ ആവശ്യമായ പരിചയസമ്പത്തുണ്ടോ തുടങ്ങിയ കാര്യങ്ങൾ പരിശോധിക്കപ്പെടണം.
കടുവയുടെ ദയാവധവുമായി ബന്ധപ്പെട്ട ഔദ്യോഗിക നടപടിക്രമങ്ങളിൽ പങ്കാളിയായെന്ന് പറയപ്പെടുന്ന സി.ആർ. ഹരിപ്രസാദ് എന്ന ബാഹ്യ എൻജിഒ വിദഗ്ദ്ധന്റെ നിയമനത്തിലും യോഗ്യതയിലും ട്രസ്റ്റ് രൂക്ഷമായ ചോദ്യങ്ങൾ ഉന്നയിച്ചു. ഷെഡ്യൂൾ-1 വിഭാഗത്തിൽപ്പെട്ട സംരക്ഷിത വന്യജീവിയുടെ ജീവനൊടുക്കാനുള്ള അതീവ സുപ്രധാന തീരുമാനത്തിൽ ഇടപെടാൻ ഇയാൾക്ക് എന്ത് അധികാരമാണുള്ളതെന്നും ഏത് മാനദണ്ഡത്തിന്റെ അടിസ്ഥാനത്തിലാണ് ഇയാളെ സംഘത്തിൽ ഉൾപ്പെടുത്തിയതെന്നും വിശദമായ അന്വേഷണത്തിന് വിധേയമാക്കണമെന്ന് അനെക് ട്രസ്റ്റ് ആവശ്യപ്പെട്ടു.
by Midhun HP News | Sep 14, 2026 | Latest News, കേരളം
ചിറയിൻകീഴ്: കേരള വണിക വൈശ്യ സംഘം പെരുങ്ങുഴി ശാഖയുടെ പൊതു സമ്മേളനവും കുടുംബ സംഗമവും പെരുങ്ങുഴി സരസ്വതി വിദ്യ നികേതൻ സ്കൂളിൽ നടന്നു. പൊതു സമ്മേളനത്തിന്റെയും കുടുംബ സംഗമത്തിന്റെയും ഉദ്ഘാടനം കേരള വണിക വൈശ്യ സംഘം സംസ്ഥാന വർക്കിങ് പ്രസിഡന്റ്‌ സുബ്രഹ്മണ്യൻ ചെട്ടിയാർ നിർവഹിച്ചു.
കെ വി വി എസ് ശാഖ സെക്രട്ടറി കെ. സുരേഷ് ബാബു വാർഷിക റിപ്പോർട്ട് അവതരിപ്പിച്ചു. ശാഖ പ്രസിഡന്റ്‌ എൽ. വിജയകുമാർ അധ്യക്ഷത വഹിച്ചു. ഗ്രാമ പഞ്ചായത്ത്‌ വൈസ് പ്രസിഡന്റ്‌ രഞ്ജിത് ലാൽ, ഗ്രാമ പഞ്ചായത്ത്‌ അംഗം കെ. ഓമന, മാധ്യമ പ്രവർത്തകൻ എം. സുരേഷ് ബാബു, യുവ കവി സുനിൽകുമാർ, കെ വി വി എസ് ഭാരവാഹികളായ മഞ്ചേഷ്, ശ്രീരംഗൻ, രത്നമ്മാൾ, ബാലചന്ദ്രൻ, ചന്ദ്ര ബാബു, സുന്ദരൻ ചെട്ടിയാർ എന്നിവർ ആശംസകൾ നേർന്നു.
മികച്ച അന്വേഷണാത്മക റിപ്പോർട്ടുകൾക്ക് നിരവധി അവാർഡുകൾ കരസ്ഥ മാക്കിയ മാധ്യമ പ്രവർത്തകൻ എം. സുരേഷ് ബാബു, യുവ കവി സുനിൽകുമാർ എന്നിവരെ സമ്മേളനത്തിൽ ആദരിച്ചു. കൂടാതെ വിവിധ പരീക്ഷകളിൽ വിജയികളായവർക്ക് അവാർഡുകളും സമ്മാനിച്ചു. ശാഖ വൈസ് പ്രസിഡന്റ്‌ എം. തുളസി സ്വാഗതവും ശ്രീജ നന്ദിയും പറഞ്ഞു. വിവിധ കലാപരിപാടികളും ഓണസദ്യയും സമ്മേളനത്തിന്റെ ഭാഗമായി സംഘടിപ്പിച്ചു.
by Midhun HP News | Sep 14, 2026 | Latest News, കേരളം
പത്തനംതിട്ട: കന്നിമാസ പൂജകള്‍ക്കായി ശബരിമല നട ഈ മാസം 16ന് വൈകീട്ട് 5.30ന് തുറക്കും. തന്ത്രി ബ്രഹ്മദത്തന്റെ കാര്‍മികത്വത്തില്‍ മേല്‍ശാന്തി ഇഡി പ്രസാദ് നമ്പൂതിരി നട തുറന്ന് ദീപം തെളിയിക്കും. തുടര്‍ന്ന് ആഴിയില്‍ അഗ്നി പടരും. കന്നി മാസ പൂജകള്‍ പൂര്‍ത്തിയാക്കി 21ന് രാത്രി 10ന് നട അടയ്ക്കും.
നെയ്യഭിഷേകം, കലശാഭിഷേകം, പടിപൂജ എന്നിവയുണ്ട്. കന്നിമാസ പൂജകളുടെ ഭാഗമായി വെര്‍ച്വല്‍ ക്യു ബുക്കിങ് തുടങ്ങി. https://sabarimalaonline.org/#/login എന്ന വെബ്‌സൈറ്റില്‍ ബുക്ക് ചെയ്യാം. https://www.onlinetdb.com/ എന്ന വെബ്‌സൈറ്റ് വഴി സന്നിധാനത്ത് ദേവസ്വം ബോര്‍ഡിന്റെ ഗസ്റ്റ് ഹൗസുകളിലും പില്‍ഗ്രിം സെന്ററുകളിലും മുറി ബുക്ക് ചെയ്യാം.
by Midhun HP News | Sep 14, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില കുറഞ്ഞു. പവന് 240 രൂപ കുറഞ്ഞതോടെ 1,13,000 രൂപയായി സ്വര്‍ണവില. ഗ്രാമിന് ആനുപാതികമായി 30 രൂപയാണ് കുറഞ്ഞത്. 14,125 രൂപയാണ് ഒരു ഗ്രാം സ്വര്‍ണത്തിന്റെ വില.
പശ്ചിമേഷ്യന്‍ സംഘര്‍ഷത്തെ തുടര്‍ന്ന് ഉയര്‍ന്നു നില്‍ക്കുന്ന എണ്ണവില അടക്കമുള്ള ഘടകങ്ങളാണ് സ്വര്‍ണവിലയെ സ്വാധീനിക്കുന്നത്. ഇത് പണപ്പെരുപ്പനിരക്ക് ഉയരാന്‍ കാരണമാക്കുമെന്നതിനാല്‍ പലിനിരക്ക് വര്‍ധിപ്പിക്കാന്‍ അമേരിക്കന്‍ കേന്ദ്രബാങ്ക് തയ്യാറായേക്കുമെന്ന റിപ്പോര്‍ട്ടുകളും സ്വര്‍ണവിലയില്‍ പ്രതിഫലിക്കുന്നുണ്ട്. പലിശനിരക്ക് ഉയര്‍ത്തുന്നത് സ്വര്‍ണത്തിന്റെ ആകര്‍ഷണം കുറയ്ക്കാന്‍ ഇടയാക്കുമെന്നാണ് വിപണി വിദഗ്ധരുടെ വിലയിരുത്തല്‍. ഇതിന് പുറമേ അമേരിക്കന്‍ ട്രഷറി ബോണ്ട് യീല്‍ഡ് വര്‍ധിച്ചതും സ്വര്‍ണവിലയെ ബാധിക്കും.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
Recent Comments