by Midhun HP News | Sep 14, 2026 | Latest News, കേരളം
കൊച്ചി: മാസപ്പടിക്കേസിൽ സിഎംആർഎൽ ഉദ്യോഗസ്ഥർ ഇന്ന് ഇഡിക്ക് മുന്നിൽ ഹാജരാകണം. രണ്ടാം ഘട്ട ചോദ്യം ചെയ്യൽ ഇന്നും നാളെയുമായി പൂർത്തിയാക്കാൻ ഇഡി നീക്കം. ഇഡിയുടെ കത്തിൽ കേസ് എടുക്കുന്നതിൽ എജിയും ഡിജിപിയും സർക്കാരിന് വൈകാതെ സംയുക്ത നിയമോപദേശം നൽകും.
ഒൻപത് പേരോട് ഇന്ന് ഹാജരാകാനാണ് ഇഡി നിർദ്ദേശം നൽകിയിരിക്കുന്നത്. ആദ്യ ഘട്ടത്തിൽ ഇവരെ ചോദ്യം ചെയ്തതിൽ നിന്നുള്ള വിവരങ്ങളുടെ അടിസ്ഥാനത്തിലായിരുന്നു മറ്റ് അന്വേഷണങ്ങൾ. ഇവരുടെ മൊഴികളിൽ കൂടുതൽ വ്യക്തത വരുത്താനാണ് ഇന്നത്തെ ചോദ്യം ചെയ്യൽ. നേരത്തെ രണ്ട് തവണ വീണയെ ചോദ്യം ചെയ്തിരുന്നു.
ഇനി ഇഡി റിപ്പോർട്ടിൽ വിജിലൻസ് കേസെടുക്കണമെന്ന നിർദ്ദേശത്തിൽ സർക്കാർ തീരുമാനത്തിന് അനുസരിച്ചായിരിക്കും നടപടി. അതേസമയം, മുഹമ്മദ് റിയാസിന്റെ സുഹൃത്തുകളെ ചോദ്യം ചെയ്യുന്നത് കൂടിയാലോചനകൾക്ക് ശേഷമായിരിക്കും. ആദ്യം നൽകിയ മൊഴി നിഷേധിച്ച് മുഹമ്മദ് റിയാസിന്റെ സുഹൃത്ത് വാരിസ് രംഗത്തെത്തിയതിനാൽ, ഇനി കൂടുതൽ ശ്രദ്ധയോടെയാവും ഇഡിയുടെ നീക്കം. മാസപ്പടി കേസിൽ ആദ്യഘട്ട കുറ്റപ്പത്രത്തിനുള്ള മതിയായ തെളിവുകൾ കിട്ടിയിട്ടുണ്ടെന്നാണ് ഇഡി വ്യക്തമാക്കുന്നത്.
by Midhun HP News | Sep 14, 2026 | Latest News, കേരളം
തിരുവനന്തപുരം: സംസ്ഥാനത്ത് രൂക്ഷമായ വൈദ്യുതി പ്രതിസന്ധിയെത്തുടര്‍ന്ന് ഏര്‍പ്പെടുത്തിയ ലോഡ് ഷെഡിങ്ങും പവകട്ടുകളും ഒഴിവാക്കുന്നതിന്റെ ഭാഗമായി യൂണിറ്റിന് 30 രൂപ വരെ കൊടുത്ത് പുറത്തുനിന്ന് വൈദ്യുതി വാങ്ങാന്‍ കെഎസ്ഇബിക്ക് സര്‍ക്കാര്‍ അനുമതി നല്‍കി. തിങ്കളാഴ്ച മുതല്‍ തന്നെ പുതിയ വൈദ്യുതി എത്തിക്കാനാണ് ലക്ഷ്യമിടുന്നത്.
നിലവില്‍ യൂണിറ്റിന് പരമാവധി 10 രൂപ വരെ വിലയ്ക്ക് വൈദ്യുതി വാങ്ങാനേ വൈദ്യുതി റെഗുലേറ്ററി കമ്മീഷന്റെ അനുമതിയുണ്ടായിരുന്നുള്ളൂ. എന്നാല്‍, അടിയന്തര സാഹചര്യം കണക്കിലെടുത്ത് സര്‍ക്കാരിന്റെ പ്രത്യേക അനുമതിയോടെ കെഎസ്ഇബി സ്വയം ഈ തീരുമാനമെടുക്കുകയായിരുന്നു. മറ്റ് പല സംസ്ഥാനങ്ങളും ഉയര്‍ന്ന വില നല്‍കി വൈദ്യുതി വാങ്ങിയാണ് പ്രതിസന്ധി നേരിടുന്നതെന്ന് വ്യക്തമാക്കി കെഎസ്ഇബി സര്‍ക്കാരിന് കത്ത് നല്‍കിയിരുന്നു.
വൈദ്യുതി നിയന്ത്രണം ജനജീവിതത്തെ ബാധിക്കുകയും വന്‍ പ്രതിഷേധങ്ങള്‍ക്ക് കാരണമാവുകയും ചെയ്തതോടെ മുഖ്യമന്ത്രി വിഡി സതീശന്‍, വൈദ്യുതി മന്ത്രി സണ്ണി ജോസഫ്, കെഎസ്ഇബി ചെയര്‍മാന്‍ എംജി രാജമാണിക്യം എന്നിവര്‍ നടത്തിയ ഉന്നതതല ചര്‍ച്ചയിലാണ് നിര്‍ണായക തീരുമാനം എടുത്തത്. ഇതിന്റെ അടിസ്ഥാനത്തില്‍ എന്‍ടിപിസിയുടെ രത്നഗിരി പവര്‍ പ്ലാന്റില്‍ നിന്ന് യൂണിറ്റിന് 30 രൂപ നിരക്കില്‍ 300 മെഗാവാട്ട് വൈദ്യുതി ഈ മാസം 30 വരെ ലഭ്യമാക്കും. ഇതിനുപുറമേ, ഒഡിഷയില്‍ നിന്നും ന്യൂക്ലിയര്‍ പവര്‍ കോര്‍പ്പറേഷനില്‍ നിന്നും 150 മെഗാവാട്ട് വീതം വൈദ്യുതി വാങ്ങുന്നതിനും വാക്കാല്‍ ധാരണയായിട്ടുണ്ട്. ഒഡിഷയില്‍ നിന്നുള്ള വൈദ്യുതിക്ക് യൂണിറ്റിന് 10 രൂപയാണ് വിലയെങ്കില്‍, ന്യൂക്ലിയര്‍ പവര്‍ കോര്‍പ്പറേഷനില്‍ നിന്നുള്ള വൈദ്യുതിയുടെ വില അത് അനുവദിക്കുന്ന മുറയ്ക്ക് നിശ്ചയിക്കും. സംസ്ഥാനത്തിന്റെ വിവിധ ഭാഗങ്ങളില്‍ രാത്രി സമയങ്ങളില്‍ ഒന്നിലധികം തവണ വൈദ്യുതി മുടങ്ങുന്ന സാഹചര്യം ഒഴിവാക്കാനാണ് ഈ നടപടി.
സംസ്ഥാനത്ത് ഉപഭോഗം കുത്തനെ കൂടിയ ദിവസങ്ങളില്‍ 800 മെഗാവാട്ട് വരെ വൈദ്യുതിയാണ് പുറത്തുനിന്ന് കൂടുതലായി ആവശ്യമായി വരുന്നത്. ഇതില്‍ 600 മെഗാവാട്ട് ലഭ്യമാക്കാന്‍ സാധിച്ചാല്‍ ബാക്കി വരുന്ന കുറവ് തത്സമയ വിപണിയില്‍ നിന്നോ മറ്റ് സംസ്ഥാനങ്ങളില്‍ നിന്നോ പരിഹരിക്കാനാകും. ഇതുവഴി നിലവിലുള്ള വൈദ്യുതി നിയന്ത്രണങ്ങളും ലോഡ് ഷെഡിങ്ങും പൂര്‍ണമായും ഒഴിവാക്കാനാകുമെന്നാണ് ബോര്‍ഡിന്റെ വിലയിരുത്തല്‍. റിയല്‍ ടൈം മാര്‍ക്കറ്റില്‍ നിന്ന് 1024 മെഗാവാട്ട് വൈദ്യുതി ലഭിച്ചതിനെ തുടര്‍ന്ന് കഴിഞ്ഞ ദിവസം നിയന്ത്രണം ഒഴിവാക്കിയിരുന്നു.
ഇതിനുപുറമേ, രാജ്യത്തെ മറ്റ് സംസ്ഥാനങ്ങളിലെ മാതൃക പിന്തുടര്‍ന്ന് ബിഹാര്‍, മഹാരാഷ്ട്ര, പഞ്ചാബ്, ഉത്തര്‍പ്രദേശ് എന്നീ സംസ്ഥാനങ്ങളിലെ വിതരണ കമ്പനികളുമായി നേരിട്ട് ചര്‍ച്ച നടത്തി പരമാവധി വൈദ്യുതി ഉറപ്പാക്കാന്‍ മൂന്ന് കെഎസ്ഇബി ഡയറക്ടര്‍മാര്‍ തിങ്കളാഴ്ച യാത്ര തിരിക്കും. രാത്രികാലങ്ങളില്‍ യൂണിറ്റിന് 16 രൂപ മുതല്‍ 30 രൂപ വരെയാണ് ഈ കമ്പനികള്‍ ആവശ്യപ്പെടുന്നത്. തമിഴ്‌നാട് കഴിഞ്ഞദിവസം യൂണിറ്റിന് 36 രൂപ വരെ നല്‍കിയാണ് വൈദ്യുതി വാങ്ങിയത്. ഇത്രയും ഉയര്‍ന്ന നിരക്കില്‍ വൈദ്യുതി വാങ്ങുമ്പോള്‍ ബോര്‍ഡിന് വരുന്ന സാമ്പത്തിക ബാധ്യതയും സര്‍ക്കാരിന്റെ സബ്സിഡി സഹായങ്ങളും സംബന്ധിച്ച് വരും ദിവസങ്ങളില്‍ വ്യക്തതവരും.
by Midhun HP News | Sep 13, 2026 | Latest News, കേരളം
ആറ്റിങ്ങൽ: കട ഉടമയോടുള്ള വൈരാഗ്യത്തിൽ കടയ്ക്ക് മുന്നിൽ പടക്കം എറിഞ്ഞ കേസിൽ മുൻ ജീവനക്കാരൻ പിടിയിൽ. കിഴുവിലം മുടപുരം കാട്ടുമ്പുറം പ്ലാവിള വീട്ടിൽ അറഫ ഖാൻ (27) ആണ് പിടിയിലായത്.
12ന് വൈകുന്നേരം 3 ന് ആറ്റിങ്ങൽ പാലസ് റോഡിലുള്ള ഫിഷ് ബോട്ട് എന്ന് കടയുടെ മുൻവശത്ത് ആണ് സംഭവം. പടക്കം കത്തിച്ചു പൊട്ടിച്ച് ഭീകരാന്തരീക്ഷം സൃഷ്ടിച്ച ശേഷം പ്രതി മുങ്ങുകയായിരുന്നു. ഇതേ കടയിലെ ജീവനക്കാരൻ ആയിരുന്നു അറഫ ഖാൻ. ഉടമ വഴക്ക് പറഞ്ഞതിലുള്ള വൈരാഗ്യം കാരണം ആണ് കടയ്ക്ക് മുന്നിൽ വന്ന് പടക്കം എറിഞ്ഞു ഭീകരാന്തരീക്ഷം സൃഷ്ടിച്ചത്.
by Midhun HP News | Sep 13, 2026 | Latest News, കേരളം
കൊച്ചി: മഴ ലഭിച്ചില്ലെങ്കില്‍ സംസ്ഥാനത്ത് വൈദ്യുതി നിയന്ത്രണം കടുപ്പിക്കാന്‍ സാധ്യത. നിലവിലെ പ്രതിസന്ധി തുടര്‍ന്നാല്‍ രണ്ടുതവണയായി ഏര്‍പ്പെടുത്തുന്ന 25 മിനിറ്റ് നിയന്ത്രണത്തിനു പുറമേ മൂന്നാമതൊരു തവണകൂടി വെട്ടിച്ചുരുക്കല്‍ വന്നേക്കാം. ഇതോടെ നിയന്ത്രണ സമയം ഒന്നേകാല്‍ മണിക്കൂറായി നീളാനാണ് സാധ്യത.
ശനിയാഴ്ച സംസ്ഥാനത്തെ വൈദ്യുതി ഉപഭോഗം സെപ്റ്റംബറിലെ എക്കാലത്തെയും ഉയര്‍ന്ന റെക്കോഡായ 9.63 കോടി യൂണിറ്റിലെത്തി. ഏപ്രില്‍ മാസത്തിലെ ചൂടുകാലത്തിനു സമാനമായ ഉപഭോഗമാണ് ഇപ്പോള്‍ അനുഭവപ്പെടുന്നത്. ആവശ്യകത താഴാതെ നിന്നാല്‍ കെഎസ്ഇബിക്ക് മുന്നില്‍ കടുത്ത നിയന്ത്രണങ്ങള്‍ ഏര്‍പ്പെടുത്തുകയല്ലാതെ മറ്റു മാര്‍ഗ്ഗങ്ങളില്ലാത്ത സ്ഥിതിയാണ്.
മധ്യപ്രദേശില്‍നിന്ന് 200 മെഗാവാട്ട് വൈദ്യുതിക്കായി കരാര്‍ ഉണ്ടാക്കിയിരുന്നെങ്കിലും, അവിടെ അധികമുണ്ടെങ്കില്‍ മാത്രം നല്‍കിയാല്‍ മതിയെന്ന വ്യവസ്ഥയുള്ളതിനാല്‍ കഴിഞ്ഞ രണ്ടു ദിവസങ്ങളിലും ഈ വൈദ്യുതി ലഭിച്ചില്ല. സെപ്റ്റംബറിലെ ഉയര്‍ന്ന വിലയ്ക്കു വൈദ്യുതി വാങ്ങാനുള്ള കമ്പനികളുടെ കരാറിന് റഗുലേറ്ററി കമ്മിഷന്‍ അനുമതി നിഷേധിച്ചതും പ്രതിസന്ധി രൂക്ഷമാക്കി. രാത്രിയിലെ പ്രതിസന്ധിക്ക് ഇത് ആശ്വാസമാകില്ലെന്ന വിലയിരുത്തലിലാണ് കമ്മിഷന്‍ അനുമതി നല്‍കാതിരുന്നത്.
രാജ്യത്താകെ വൈദ്യുതി ആവശ്യം കുത്തനെ ഉയരുന്നതും കേരളത്തിന് തിരിച്ചടിയാകുന്നുണ്ട്. രാജ്യത്തെ പീക്ക് അവര്‍ (ഏറ്റവും കൂടുതല്‍ ഉപയോഗിക്കുന്ന സമയം) ആവശ്യം കഴിഞ്ഞ ദിവസം സര്‍വകാല റെക്കോഡായ 2.67 ലക്ഷം മെഗാവാട്ടിലെത്തി. കഴിഞ്ഞ വര്‍ഷം ഇതേസമയത്ത് ഇത് 2.32 ലക്ഷം മെഗാവാട്ടായിരുന്നു. ‘ഗ്രിഡ് ഇന്ത്യ’യുടെ കണക്കുപ്രകാരം രാജ്യത്ത് ഏറ്റവും കൂടുതല്‍ വൈദ്യുതി പ്രതിസന്ധി നേരിടുന്ന സംസ്ഥാനങ്ങളില്‍ 639 മെഗാവാട്ട് കുറവുള്ള കേരളം രണ്ടാം സ്ഥാനത്താണ്. തമിഴ്നാടാണ് ഒന്നാം സ്ഥാനത്ത്.
ഉത്തരേന്ത്യയില്‍ വരാനിരിക്കുന്ന നവരാത്രി, ദീപാവലി ആഘോഷങ്ങളോടെ വൈദ്യുതി ഉപഭോഗം വീണ്ടും ഉയരുമെന്നാണ് വിലയിരുത്തപ്പെടുന്നത്. ഇത് ഒക്ടോബര്‍ പകുതിയോടെ മറ്റു സംസ്ഥാനങ്ങളില്‍നിന്ന് വൈദ്യുതി ലഭ്യമാകുന്നതിന് തടസ്സമാകും. കഴിഞ്ഞ വര്‍ഷം സെപ്റ്റംബറില്‍ 8.94 കോടി യൂണിറ്റായിരുന്ന പ്രതിദിന ഉപഭോഗം വെള്ളിയാഴ്ച 9.63 കോടി യൂണിറ്റായി ഉയര്‍ന്നപ്പോള്‍, രാത്രിയിലെ പീക്ക് ഡിമാന്‍ഡ് വ്യാഴാഴ്ച 5045 മെഗാവാട്ടായും (കഴിഞ്ഞ വര്‍ഷം 4443 മെഗാവാട്ട്) വര്‍ധിച്ചു.
by Midhun HP News | Sep 13, 2026 | Latest News, കേരളം
തിരുവനന്തപുരം: സംസ്ഥാനത്ത് പുതുതായെത്തിയ 108ആംബുലന്‍സുകളുടെ പ്രീ-ഡെലിവറി പരിശോധന അന്തിമഘട്ടത്തില്‍. രജിസ്‌ട്രേഷന്‍ നടപടികള്‍ പൂര്‍ത്തിയാകുന്നതോടെ പുതിയ ആംബുലന്‍സുകള്‍ ഉടന്‍ നിരത്തിലിറങ്ങും. പുതിയ വാഹനങ്ങള്‍ സര്‍വീസില്‍ എത്തുന്നതോടെ പഴയ 108 ആംബുലന്‍സുകള്‍ നിരത്തുകളില്‍ നിന്ന് ഘട്ടംഘട്ടമായി പിന്‍വലിക്കും. പുതിയ ടെന്‍ഡര്‍ പ്രകാരം 335 ആംബുലന്‍സുകളാണ് 108 ആംബുലന്‍സ് പദ്ധതിയുടെ ഭാഗമായി സംസ്ഥാന ത്തുടനീളം വിന്യസിക്കുക. ഹൈദരാബാദ്, ബെംഗളൂരു എന്നിവിടങ്ങളില്‍ നിന്ന് ഘട്ടം ഘട്ടമായാണ് ആം ബുലന്‍സുകള്‍ തിരുവനന്തപുരത്തേക്ക് എത്തിച്ചത്. നിലവിലെ 108 ആംബുലന്‍സുകള്‍ ആറുവര്‍ഷം മുന്‍പാണ് പദ്ധതിയുടെ ഭാഗമായത്.
നിലവില്‍ ഐരാണിമുട്ടം ഹോമിയോ ഫാര്‍മസി ഗ്രൗണ്ടിലും പുലയനാര്‍കോട്ട ആശുപത്രി പരിസരത്തുമാണ് വാഹനങ്ങള്‍ പാര്‍ക്ക് ചെയ്തിരിക്കുന്നത്. ഇവയില്‍ ജീവന്‍രക്ഷാ ഉപകരണങ്ങള്‍ ഘടിപ്പിക്കുന്നതും സ്റ്റിക്കറുകള്‍ പതിപ്പിക്കുന്നതുമായ നടപടികള്‍ പുരോഗമിക്കുകയാണ്. വാഹനങ്ങളുടെ രണ്ടാംഘട്ട പ്രീ-ഡെലിവറി പരിശോധനകളും വാഹന നിര്‍മാതാക്കളുടെ ഭാഗത്തുനിന്ന് നടന്നുവരികയാണ്. പ്രീ-ഡെലിവറി പരിശോധനയും അത്യാവശ്യ ജീവന്‍രക്ഷ ഉപകരണങ്ങളുടെ ക്രമീകരണവും പൂര്‍ത്തിയാകുന്ന മുറക്ക് മോട്ടോര്‍ വാഹന വകുപ്പിന്റെ രജിസ്‌ട്രേഷന്‍ പൂര്‍ത്തിയാക്കി വാഹനങ്ങള്‍ സര്‍വീസിലിറക്കും.
കേരള മെഡിക്കല്‍ സര്‍വീസസ് കോര്‍പറേഷന്‍ ലിമിറ്റഡിന്റെ മേല്‍നോട്ടത്തില്‍ ഹൈദരാബാദ് ആസ്ഥാനമായ ഇഎംആര്‍ഐ ഗ്രീന്‍ഹെല്‍ത്ത് സര്‍വീസസ് വിന്യസിക്കുന്ന 335 ആംബുലന്‍സുകളില്‍ 315 ബേസിക് ലൈഫ് സപ്പോര്‍ട്ട്, വെന്റിലേറ്റര്‍ സൗകര്യമുള്ള 14 അഡ്വാന്‍സ്ഡ് ലൈഫ് സപ്പോര്‍ട്ട്, നവജാത ശിശുക്കള്‍ക്ക് വേണ്ടിയുള്ള ആറ് നിയോനറ്റല്‍ ആംബുലന്‍സുകള്‍ എന്നിവ ഉള്‍പ്പെടുന്നു. ഇത്തരം സംവിധാനങ്ങളുള്ള ആംബുലന്‍സുകള്‍ ആദ്യമായാണ് കേരളത്തില്‍ 108 ആംബുലന്‍സ് പദ്ധതിയുടെ ഭാഗമായി നിരത്തിലിറക്കുന്നത്.
by Midhun HP News | Sep 12, 2026 | Latest News, കേരളം
36 ഐ.എ.എസുകാരെ സ്ഥലംമാറ്റി. വയനാട്, കാസർകോട്, തിരുവനന്തപുരം ജില്ലകളിൽ പുതിയ കളക്ടർമാരെ നിയമിച്ചു. ലോട്ടറി വകുപ്പ് ഡയറക്ടറായിരുന്ന അഞ്ജു കെ.എസ് ആണ് തിരുവനന്തപുരം ജില്ലാ കളക്ടർ. വിഴിഞ്ഞം തുറമുഖവുമായി ബന്ധപ്പെട്ട പുനരധിവാസ മോണിറ്ററിംഗ് കമ്മിറ്റി ചെയർപേഴ്സൺ ചുമതലയുമുണ്ട്.
തിരുവനന്തപുരം കളക്ടറായിരുന്ന അനുകുമാരിയെ ജി.എസ്.ടി സ്‌പെഷ്യൽ കമ്മിഷണറാക്കി. ഫിഷറീസ് വകുപ്പ് ഡയറക്ടർ വി.ചെൽസാസിനിയെ വയനാട് കളക്ടറാക്കി. ഫുഡ് സേഫ്റ്റി കമ്മിഷണറായിരുന്ന ശ്രീധന്യ സുരേഷാണ് കാസർകോട് ജില്ലാ കളക്ടർ.കാസർകോട് കളക്ടറായിരുന്ന അർജുൻപാണ്ഡ്യനെ കാർഷികവികസന, കർഷക ക്ഷേമവകുപ്പ് ഡയറക്ടറാക്കി. സഹകരണസംഘം രജിസ്ട്രാറുടെ ചുമതലയുമുണ്ട്.കൃഷിവകുപ്പ് ഡയറക്ടർ ശ്രീറാം വെങ്കിട്ടരാമനെ വനം,വന്യജീവി വകുപ്പ് ജോയിന്റ് സെക്രട്ടറിയാക്കി. നൈപുണ്യ, കശുഅണ്ടി വികസന വകുപ്പ് ജോയിന്റ് സെക്രട്ടറി, കേരള അക്കാഡമി ഫോർ സ്‌കിൽസ് എക്സലൻസ് മാനേജിംഗ് ഡയറക്ടർ ചുമതലയും നൽകി. ആരോഗ്യകുടുംബക്ഷേമ അഡി. സെക്രട്ടറിയായ ഡോ.രേണു രാജിന് ദേശീയ ആരോഗ്യ ദൗത്യം സ്റ്റേറ്റ് മിഷൻ ഡയറക്ടർ, ഇ-ഹെൽത്ത് പ്രോജക്ട് ഡയറക്ടർ, സ്റ്റേറ്റ് ഹെൽത്ത് ഏജൻസി എം.ഡി എന്നീ അധികചുമതലകൾ നൽകി. കെ.എം.എസ്.സി.എൽ, കെ.എച്ച്.ആർ.ഡബ്ല്യു.എസ് ചുമതലകളിൽ നിന്ന് ഒഴിവാക്കി.
*അരുൺ കെ.വിജയൻപൊതുവിദ്യാഭ്യാസ ഡയറക്ടർ*
വ്യവസായ വകുപ്പ് ഡയറക്ടറായിരുന്ന അരുൺ കെ.വിജയനെ പൊതുവിദ്യാഭ്യാസ ഡയറക്ടറാക്കി. പൊതുവിദ്യാഭ്യാസ ഡയറക്ടറായിരുന്ന സ്‌നേഹിൽ കുമാർ സിംഗിനെ വ്യവസായവാണിജ്യ വകുപ്പ് ഡയറക്ടറായും കെ.എസ്.ഐ.ഡി.സി, കെ.എസ്.ഐ.ടി.ഐ.എൽ എം.ഡിയായും നിയമിച്ചു. ധനവകുപ്പ് ഡെപ്യൂട്ടി സെക്രട്ടറി സച്ചിൻകുമാർയാദവിനെ സ്റ്റേറ്റ് ഐ.ടി മിഷൻ ഡയറക്ടറാക്കി. കെ-ഫോൺ എം.ഡി,ടെക്‌നോപാർക്ക് സി.ഇ.ഒ ചുമതലയുമുണ്ട്. ഐ.ടി മിഷൻ ഡയറക്ടറായിരുന്ന സന്ദീപ് കുമാറിനെ ധനകാര്യ വകുപ്പിലേക്ക് മാറ്റി.ലാൻഡ് ബോർഡ് സെക്രട്ടറിയായിരുന്ന സാബിൻ സമീദിനെഇൻഫർമേഷൻ ആൻഡ് പബ്ലിക് റിലേഷൻസ് വകുപ്പ് ഡയറക്ടറായും ഒ.ബി.സി കോർപ്പറേഷൻ എം.ഡിയുമാക്കി. സാംസ്‌കാരിക വകുപ്പ് ഡയറക്ടർ കെ.ഇമ്പാശേഖറാണ് ഭാഗ്യക്കുറി വകുപ്പ് ഡയറക്ടർ. എൻ.എച്ച്.എം മിഷൻ ഡയറക്ടറായിരുന്ന അനു എസ്.നായരെ ഭക്ഷ്യസുരക്ഷാ കമ്മീഷണറാക്കി. കെ.എം.എസ്.സി.എൽ എം.ഡിയുടെ ചുമതലയും നൽകി.
ഡോ.കെ.ഹരികുമാറാണ് സിവിൽ സപ്ലൈസ് കമ്മിഷണർ.വനിതാ ശിശുക്ഷേമവകുപ്പ് ഡയറക്ടർ വി.വിഘ്നേശ്വരിക്ക് ദുരന്തനിവാരണവകുപ്പിന്റെയും പൊതുമരാമത്ത് അഡി.സെക്രട്ടറി വി.ആർ.വിനോദിന് കെ.എസ്.ഡി.പിയുടേയും എറണാകുളം കളക്ടർ ജി.പ്രിയങ്കയ്ക്ക് കൊച്ചി മെട്രോയുടേയും അധിക ചുമതല നൽകി. തൃശൂർ കളക്ടർ ശിഖ സുരേന്ദ്രന് കില ഡയറക്ടറുടേയും തദ്ദേശവകുപ്പ് ജോയിന്റ് സെക്രട്ടറി ഡി.ധർമ്മലശ്രീയയ്ക്ക് ശുചിത്വമിഷന്റേയും അധികചുമതല നൽകി.
വാട്ടർ അതോറിറ്റി എം.ഡി ഡോ.ബിനുഫ്രാൻസിസിനെ എസ്.ടി.വകുപ്പ് ഡയറക്ടറാക്കി. സാമൂഹ്യനീതി ഡയറക്ടർ അരുൺ നായർക്ക് വയോജന ക്ഷേമഡയറക്ടർ,കൊച്ചിൻ സ്മാർട്ട് മിഷൻ എന്നിവയുടെ അധികചുമതലകൂടി നൽകി. ലേബർ കമ്മിഷണർ സഫീന നസറുദ്ദീനെ എംപ്ളോയ്മെന്റ് ഡയറക്ടറാക്കി.ജി.എസ്.ടി കമ്മിഷണറായിരുന്ന മുഹമ്മദ് ഷഫീക്കാണ് റവന്യുവകുപ്പ് ജോയിന്റ് സെക്രട്ടറി.
*മറ്റ് നിയമനങ്ങൾ*
കായിക വകുപ്പ് ഡയറക്ടർ എം.സി.റജിലിനെ ലാൻഡ് റവന്യു ജോയിന്റ് കമ്മിഷണറാക്കി. എസ്.ടിവകുപ്പ് ഡയറക്ടർ മിഥുൻ പ്രേംരാജാണ് മിനറൽ കോർപ്പറേഷൻ എം.ഡി. കെ.എസ്.ടി.പി.ഡയറക്ടർ മിസാൽ സാഗർ ഭരതിനെ ഫിഷറീസ് ഡയറക്ടറാക്കി.
വ്യവസായ വകുപ്പ് ഡെപ്യൂട്ടി സെക്രട്ടറി സമീർ കിഷനാണ് എൻട്രൻ കമ്മിഷണർ. സിവിൽ സപ്ളൈസ് എം.ഡി ജയകൃഷ്ണനെ കൺസ്ട്രക്ഷൻ കോർപ്പറേഷൻ എം.ഡിയാക്കി.
വയോജനക്ഷേമവകുപ്പ് ഡെപ്യൂട്ടി സെക്രട്ടറിയായി ഒ.വി.ആൽഫ്രഡ്, കായികവകുപ്പ് ഡയറക്ടറായി അഖിൽ വി.മേനോൻ, ടൂറിസം അഡി.ഡയറക്ടറായി സുമിത് കുമാർ താക്കൂർ, ഫോർട്ട് കൊച്ചി സബ് കളക്ടറായി ഗ്രന്ഥേ സായ് കൃഷ്ണൻ, കാഞ്ഞങ്ങാട് സബ് കളക്ടറായി പി.പി.അർച്ചന എന്നിവരെ നിയമിച്ചു.
*ദിലീപ് കെ. കൈനിക്കര*
*ശബരിമല എ.ഡി.എം*
മണ്ഡല,മകരവിളക്ക് കാലത്തെ ഏകോപനം ശക്തമാക്കാൻ ശബരിമല എ.ഡി.എം തസ്തിക ഐ.എ.എസ് കേഡറിലേക്ക് ഉയർത്തി ദിലീപ് കെ.കൈനിക്കരയെ നിയമിച്ചു. അവിടത്തെ സർക്കാർ വകുപ്പുകളുടെയും സുരക്ഷാ ഏജൻസികളുടെയും പ്രവർത്തനങ്ങൾ ഏകോപിപ്പിക്കാനുള്ള പൂർണ ചുമതലയാണ്.
Recent Comments