by Midhun HP News | Feb 24, 2025 | Latest News, കേരളം
കാസർകോട്: അതിദരിദ്രരില്ലാത്ത സംസ്ഥാനമെന്ന പ്രഖ്യാപനം നവംബർ ഒന്നിന് ഉണ്ടാകുമെന്ന് മുഖ്യമന്ത്രി പിണറായി വിജയൻ. കേരളത്തെ അതിദരിദ്രരില്ലാത്ത സംസ്ഥാനമാക്കാനുള്ള പ്രവർത്തനം ഊർജിതമായി തുടരുകയാണ്. തദ്ദേശ സ്ഥാപനങ്ങളുടെ സഹകരണത്തോടെയാണ് അതിനുള്ള പ്രവർത്തനം നടത്തുന്നത് എന്നും മുഖ്യമന്ത്രി പറഞ്ഞു.
കാസർകോട് മടിക്കൈ എരിക്കുളത്ത് കെ എം കുഞ്ഞിക്കണ്ണൻ സ്മാരക ജനകീയാസൂത്രണ രജത ജൂബിലി മന്ദിരം ഉദ്ഘാടനം ചെയ്യുകയായിരുന്നു അദ്ദേഹം. അതതു ദേശത്തുള്ള ജനങ്ങൾക്കാണ് പ്രദേശത്ത്, എന്തു വികസനം വേണമെന്ന് പറയാൻ കഴിയുക. ജനകീയ ആസൂത്രണത്തിലൂടെ ജനങ്ങൾ നിർദ്ദേശിക്കുന്നു. അത് തീരുമാനമായി നടപ്പാക്കുന്നു. നാടിന്റെയും നാട്ടുകാരുടെയും പങ്കാളിത്തത്തോടെ കൂടുതൽ പദ്ധതികൾ നടപ്പിൽ വരുന്നു.
തദ്ദേശ സ്ഥാപനങ്ങൾക്ക് അധികാരവും പണവും നൽകി കേരളത്തിൽ പ്രോത്സാഹിപ്പിക്കുന്നു. പ്രാദേശിക സർക്കാരായിട്ടാണ് അവ പ്രവർത്തിക്കുന്നത്. നവകേരള സൃഷ്ടിക്കായി തദ്ദേശ സ്ഥാപനങ്ങളാണ് മികച്ച പ്രവർത്തനം നടത്തേണ്ടത്. വലിയ വ്യക്തിശുചിത്വമുള്ള നമ്മുടെ നാട്ടിൽ മാലിന്യം വലിച്ചെറിയുന്ന രീതിക്ക് അവസാനമുണ്ടാകണം. ജലാശയങ്ങൾ മാലിന്യക്കൂമ്പാരമാകുന്നുണ്ട്. അവ മറികടക്കാനുള്ള മുൻകൈ തദ്ദേശ സ്ഥാപനങ്ങളാണ് ഏറ്റെടുക്കേണ്ടതെന്നും മുഖ്യമന്ത്രി പറഞ്ഞു.
by Midhun HP News | Feb 23, 2025 | Latest News, കേരളം
ആലപ്പുഴ: കേരള കോണ്ഗ്രസ് എം ചെയര്മാന് ജോസ് കെ മാണി എംപിയുടെ മകള് പാമ്പുകടിയേറ്റ് മെഡിക്കല് കോളജ് ആശുപത്രിയില്. ജോസ് കെ മാണിയുടെ മകള് പ്രിയങ്ക (28)യാണ് പാമ്പുകടിയേറ്റ് ചികിത്സയില് കഴിയുന്നത്.
അമ്മ നിഷ ജോസ് കെ മാണിയുടെ ആലപ്പുഴയിലെ വസതിയില് വച്ച് ഇന്നലെ വൈകിട്ടാണ് പാമ്പുകടിയേറ്റത്. 24 മണിക്കൂര് നിരീക്ഷണത്തിലാണ്. പ്രിയങ്കയെ കടിച്ച പാമ്പ് ഏതാണെന്നു വ്യക്തമായിട്ടില്ല. ആരോഗ്യനില നിലവില് തൃപ്തികരമാണെന്നും ഡോക്ടര്മാര് അറിയിച്ചു.
by Midhun HP News | Feb 23, 2025 | Latest News, കേരളം
കൊല്ലം: കൊല്ലം കടയ്ക്കലില് രണ്ട് മാസം പ്രായമായ കുഞ്ഞ് പാല് തൊണ്ടയില് കുടുങ്ങി മരിച്ചു. പാങ്ങലുക്കാട് പാരിജാതത്തില് സജിന്- റിനി ദമ്പതികളുടെ മകള് ‘അരിയാന’ യാണ് മരിച്ചത്. കുഞ്ഞിന് പാല് നല്കിയ ശേഷം ഭര്ത്താവുമായി വീഡിയോ കോള് ചെയ്ത് കൊണ്ടിരിക്കെയാണ് അമ്മ കുഞ്ഞിന് അനക്കമില്ലായെന്ന് ശ്രദ്ധിക്കുന്നത്.
കുഞ്ഞിനെ ഉടന് കടയ്ക്കല് താലൂക്കാശുപത്രിയിലെത്തിച്ചെങ്കിലും രക്ഷിക്കാനായില്ല. സംഭവത്തില് അസ്വഭാവിക മരണത്തിന് കടയ്ക്കല് പൊലീസ് കേസ് എടുത്തിട്ടുണ്ട്.
by Midhun HP News | Feb 23, 2025 | Latest News, കേരളം
കണ്ണൂര്: മാരക ലഹരി മരുന്ന് നാല് ഗ്രാം മെത്താഫിറ്റമിനുമായി യുവതി അറസ്റ്റില്. കണ്ടങ്കാളി മുല്ലക്കൊടിയാലെ സി നിഖിലയെയാണ്(30) എക്സൈസ് സംഘം വീട്ടിലെത്തി അറസ്റ്റ് ചെയ്തത്. വില്പ്പന നടത്താന് ബെംഗളൂരുവില് നിന്നെത്തിച്ച ലഹരിമരുന്നാണു പിടികൂടിയതെന്ന് എക്സൈസ് ഉദ്യോഗസ്ഥര് പറഞ്ഞു.
2023ല് രണ്ടു കിലോ കഞ്ചാവുമായി ഈ യുവതിയെ അറസ്റ്റ് ചെയ്തിരുന്നുവെന്ന് എക്സൈസ് സംഘം പറഞ്ഞു. ബുള്ളറ്റില് പല സംസ്ഥാനങ്ങളിലൂടെയും സഞ്ചരിക്കുന്ന നിഖില,’ബുള്ളറ്റ് ലേഡി’ എന്നാണ് അറിയപ്പെട്ടിരുന്നത്. ബുള്ളറ്റ് യാത്രയിലൂടെ ലഭിച്ച സൗഹൃദങ്ങള് വഴിയാണ് ലഹരിമരുന്നു വില്പനയിലേക്ക് ഇവര് തിരിഞ്ഞതെന്ന് എക്സൈസ് ഉദ്യോഗസ്ഥര് പറഞ്ഞു.
by Midhun HP News | Feb 22, 2025 | Latest News, കേരളം
കോട്ടയം: മതവിദ്വേഷ പരാമര്ശത്തില് സ്റ്റേഷനില് ഹാജരാകാന് ആവശ്യപ്പെട്ട്, ബിജെപി നേതാവ് പിസി ജോര്ജിന് ഈരാറ്റുപേട്ട പൊലീസിന്റെ നോട്ടീസ്. എന്നാല് ജോര്ജ് നോട്ടീസ് കൈപ്പറ്റിയില്ല. തിങ്കളാഴ്ച പൊലീസിന് മുന്നില് ഹാജരാകാനാണ് തീരുമാനം. പൊലീസ് അറസ്റ്റിലേക്ക് നീങ്ങുന്നതിനിടെയാണ് സാവകാശം ചോദിച്ചിരിക്കുന്നത്.
ടെലിവിഷന് ചര്ച്ചയ്ക്കിടെ നടത്തിയ മതവിദ്വേഷ പരാമര്ശത്തില് പി സി ജോര്ജിനെ അറസ്റ്റ് ചെയ്യാന് സാധ്യതയുണ്ടെന്നാണ് വിവരം. ഉന്നത പൊലീസ് ഉദ്യോഗസ്ഥരുടെ നിര്ദേശത്തിനനുസരിച്ച് നടപടിയെടുക്കാനാണ് ഈരാറ്റുപേട്ട പൊലീസിന്റെ നീക്കം. ഈരാറ്റുപേട്ട യൂത്ത് ലീഗ് മണ്ഡലം കമ്മിറ്റിയാണ് പരാതി നല്കിയത്.
പി സി ജോര്ജിന്റെ മുന്കൂര് ജാമ്യാപേക്ഷ ഇന്നലെ ഹൈക്കോടതി തള്ളിയിരുന്നു. ഈരാട്ടുപേട്ട പൊലീസ് എടുത്ത കേസില് നേരത്തെ കോട്ടയം ജില്ലാ സെഷന്സ് കോടതിയും പി സി ജോര്ജിന്റെ മുന്കൂര് ജാമ്യാപേക്ഷ തള്ളിയിരുന്നു.
ടെലിവിഷന് ചര്ച്ചയ്ക്കിടെ നടത്തിയ പരാമര്ശം അബദ്ധത്തില് പറ്റിപ്പോയ പിഴവെന്നായിരുന്നു പി സി ജോര്ജിന്റെ വാദം. മതസ്പര്ധ വളര്ത്തല്, കലാപാഹ്വാനം തുടങ്ങിയ വകുപ്പുകളാണ് ജോര്ജിനെതിരെ ചുമത്തിയിരിക്കുന്നത്.
by Midhun HP News | Feb 22, 2025 | Latest News, കേരളം
തൃശൂര്: അട്ടപ്പാടിയില് കാലില് പരുക്കേറ്റ നിലയില് കണ്ടെത്തിയ കരടിയെ തൃശൂരിലെ പുത്തൂര് സുവോളജിക്കല് പാര്ക്കില് എത്തിച്ചു ചികിത്സ തുടങ്ങി. ഈ കരടിയുടെ പാദത്തില് ആന ചവിട്ടുകയായിരുന്നു എന്ന് സമീപവാസികള് പറഞ്ഞു.
പിന്കാലിനാണ് പരിക്കെന്ന് മൃഗശാല അധികൃതര് സ്ഥിരീകരിച്ചു. ഒരു ടീം ഡോക്ടര്മാരുടെ നേതൃത്വത്തിലാണ് ചികിത്സ നല്കുന്നത്. കരിടിക്ക് മറ്റ് ശാരീരിക അവശതകളില്ലെന്ന് മൃഗശാല ഡയറക്ടര് കെ.കെ.സുനില്കുമാര് അറിയിച്ചു. ആഹാരവും കഴിക്കുന്നുണ്ട്. വനംവകുപ്പിന്റെ അഗളി, പുതൂര് ആര്ആര്ടി ടീമുകള് ചേര്ന്നാണ് കരടിയെ കൂടുവച്ച് പിടികൂടിയത്.
Recent Comments