പ്രശസ്ത നാടക രചയിതാവും സംവിധായകനുമായ വി. ശശി നീലേശ്വരം അന്തരിച്ചു

by Midhun HP News | Oct 2, 2026 | Latest News, ജില്ലാ വാർത്ത

കാഞ്ഞങ്ങാട്: പ്രശസ്ത നാടക രചയിതാവും പ്രമുഖ സംവിധായകനുമായ നീലേശ്വരം പടിഞ്ഞാറ്റം കൊഴുവലിലെ വി. ശശി നീലേശ്വരം (75) അന്തരിച്ചു. കേരളത്തിലെ പ്രൊഫഷണൽ, അമച്വർ നാടക രംഗങ്ങളിൽ സ്വന്തമായ കയ്യൊപ്പ് പതിപ്പിച്ച അദ്ദേഹം വാർദ്ധക്യസഹജമായ അസുഖങ്ങളെ തുടർന്നാണ് വിടവാങ്ങിയത്. വടക്കൻ മലബാറിന്റെ സാംസ്കാരിക-നാടക മണ്ഡലങ്ങളിൽ പതിറ്റാണ്ടുകളോളം നിറസാന്നിധ്യമായിരുന്നു ശശികുമാർ നീലേശ്വരം എന്ന വി. ശശി നീലേശ്വരം.

നാടകം എന്നത് കേവലമൊരു വിനോദോപാധി മാത്രമല്ലെന്നും സമൂഹത്തിലും മനുഷ്യന്റെ ചിന്തകളിലും ആഴത്തിലുള്ള ചലനങ്ങൾ സൃഷ്ടിക്കാൻ കെൽപ്പുള്ള ശക്തമായ രംഗകലയാണെന്നും അടിവരയിട്ട കലാകാരനായിരുന്നു അദ്ദേഹം. സാമൂഹിക പ്രതിബദ്ധതയുള്ള ഗൗരവമേറിയ വിഷയങ്ങൾ, സാധാരണക്കാരായ മനുഷ്യരുടെ നിത്യജീവിത പോരാട്ടങ്ങൾ, ബന്ധങ്ങളിലെ സങ്കീർണ്ണതകൾ എന്നിവയായിരുന്നു അദ്ദേഹത്തിന്റെ നാടകങ്ങളുടെ കേന്ദ്രബിന്ദു. സംവിധായകനായി അരങ്ങേറ്റം കുറിച്ച ‘ഏകലവ്യൻ’ മുതൽ സംസ്ഥാന തലത്തിൽ ശ്രദ്ധനേടിയ ‘മരമീടൻ’ വരെ നിരവധിയായ നാടകങ്ങൾ അദ്ദേഹത്തിന്റെ രചനയിലും സംവിധാനത്തിലും അരങ്ങിലെത്തി.

മാറ്റി വെച്ച തലകൾ, പാക്കനാർ സൂക്തം, മാനസാന്തരത്തിന്റെ ബാക്കിപത്രം, കൂകി പായും തീവണ്ടി, ബൊളിവിയ, ശ്വാസം, പെൺവിളക്ക്, ഹൃദയത്തിലേക്കൊരു ചക്രം തുടങ്ങിയവയാണ് വി. ശശി സംവിധാനം ചെയ്ത മറ്റ് പ്രധാന നാടകങ്ങൾ. ‘മരമീടൻ’ എന്ന നാടകത്തിലൂടെ മികച്ച സംവിധായകനുള്ള കേരള സംഗീത നാടക അക്കാദമി പുരസ്കാരം അദ്ദേഹത്തെ തേടിയെത്തി.

നാടക കലയ്ക്ക് നൽകിയ നിസ്തുലമായ സംഭാവനകൾ പരിഗണിച്ച് 2023-ലെ കേരള സംഗീത നാടക അക്കാദമി അവാർഡ്, പ്രശസ്ത നാടകപ്രവർത്തകൻ എ. ശാന്തകുമാറിന്റെ സ്മരണാർത്ഥമുള്ള എ. ശാന്തകുമാർ നാടക പുരസ്‌കാരം, കൂടാതെ ഏറ്റവും ഒടുവിൽ ആക്റ്റ് നീലേശ്വരത്തിന്റെ സമഗ്ര സംഭാവനയ്ക്കുള്ള പുരസ്കാരം എന്നിവയുൾപ്പെടെ നിരവധി സംസ്ഥാനതല ബഹുമതികൾ നേടിയിട്ടുണ്ട്. അദ്ദേഹത്തിന്റെ വിയോഗം കേരളത്തിലെ നാടക-സാംസ്കാരിക വേദികൾക്ക് വലിയ നഷ്ടമാണ് സമ്മാനിച്ചിരിക്കുന്നത്.

കോൺഗ്രസ് ആറ്റിങ്ങൽ മണ്ഡലം കമ്മിറ്റിയുടെ നേതൃത്വത്തിൽ ഗാന്ധിജയന്തി ആഘോഷിച്ചു

by Midhun HP News | Oct 2, 2026 | Latest News, ജില്ലാ വാർത്ത

കോൺഗ്രസ് ആറ്റിങ്ങൽ മണ്ഡലം കമ്മിറ്റിയുടെ നേതൃത്വത്തിൽ ഗാന്ധിജയന്തി ആഘോഷിച്ചു. ആറ്റിങ്ങൽ കച്ചേരി ജംഗ്ഷനിൽ നടന്ന പരിപാടി മഹാത്മാഗാന്ധിയുടെ ഛായാ ചിത്രത്തിനു മുന്നിൽ പുഷ്പാർച്ചന നടന്നു. ഡിസിസി ജനറൽ സെക്രട്ടറി പി ഉണ്ണികൃഷ്ണൻ, ടിപി അംബിരാജ, ആർ.എസ്.പ്രശാന്ത്, എസ് രഘുറാം, ഡിസിസി മെമ്പർ നാസിം ആലംകോട്‌, ബ്ലോക്ക്‌ വൈസ് പ്രസിഡന്റ്‌ പി.ജയചന്ദ്രൻ നായർ, മറ്റ് ബ്ലോക്ക് മണ്ഡലം ഭാരവാഹികൾ കൗൺസിലർമാർ, യൂത്ത് കോൺഗ്രസ്സ് ഭാരവാഹികൾ തുടങ്ങിയവർ പങ്കെടുത്തു.

ഭക്ഷണം കഴിക്കുന്നതിനിടെ ശാരീരികാസ്വാസ്ഥ്യം; തിരുവനന്തപുരത്ത് അധ്യാപിക മരിച്ചു

by Midhun HP News | Oct 2, 2026 | Latest News, ജില്ലാ വാർത്ത

തിരുവനന്തപുരം: ഭക്ഷണം കഴിക്കുന്നതിനിടയില്‍ ശാരീരികാസ്വാസ്ഥ്യം അനുഭവപ്പെട്ടതിനെത്തുടര്‍ന്ന് ആശുപത്രിയില്‍ പ്രവേശിപ്പിച്ച അധ്യാപിക മരിച്ചു. മംഗലപുരത്തെ സ്വകാര്യ സ്കൂൾ അധ്യാപികയായ ധന്യ (38) ആണ് മരിച്ചത്.

വെഞ്ഞാറമ്മൂട് ​മണലിമുക്ക് പണിക്കരുകോണം സ്വദേശിനിയായ ഇവർ ജോലിക്ക് പോകുന്നതിനുള്ള സൗകര്യാർത്ഥം കണിയാപുരത്ത് വാടകവീട്ടിലായിരുന്നു താമസിച്ചിരുന്നത്.
ബുധനാഴ്ച വൈകിട്ടോടെ വീട്ടില്‍ ഭക്ഷണം കഴിക്കുന്നതിനിടെയാണ് അസ്വസ്ഥതയുണ്ടായത്. ചൂര മീന്‍ അച്ചാറും മരിച്ചീനി പുഴുങ്ങിയതുമാണ് ഇവര്‍ കഴിച്ചിരുന്നതെന്ന് സമീപവാസികൾ പറഞ്ഞു. ഭക്ഷണം കഴിച്ചയുടനെ കടുത്ത ഛര്‍ദ്ദിയും അസ്വസ്ഥതയും അനുഭവപ്പെടുകയായിരുന്നു.

​ഉടന്‍ തന്നെ കുടുംബാംഗങ്ങള്‍ തലസ്ഥാനത്ത സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. പൊലീസ് നടപടികള്‍ പൂര്‍ത്തിയാക്കിയ ശേഷം ബന്ധുക്കള്‍ക്ക് വിട്ടുനൽകിയ മൃതദേഹം മണലിമുക്കിലെ വീട്ടുവളപ്പില്‍‍ സംസ്‌കരിച്ചു. ഭര്‍ത്താവ്: ശ്രീജിത്. മകള്‍: ശ്രദ്ധ.

തോന്നയ്‌ക്കൽ പ്രാഥമികാരോഗ്യ കേന്ദ്രവും പരിസരവും ശുചീകരിച്ചു

by Midhun HP News | Oct 2, 2026 | Latest News, ജില്ലാ വാർത്ത

വേങ്ങോട്: വേങ്ങോട് മണ്ഡലം കോൺഗ്രസ്സ് കമിറ്റിയും യു.ഡി.എഫ് പോത്തൻകോട് പഞ്ചായത്തു കമ്മിറ്റിയും സംയുക്തമായി ഗാന്ധിജയന്തിദിനത്തോട് അനുബന്ധിച്ച് തോന്നയ്ക്കൽ പ്രാഥമികാരോഗ്യ കേന്ദ്രവും പരിസരവും വൃത്തിയാക്കി.യു.ഡി.എഫ്. പോത്തൻകോട് പഞ്ചായത്ത് ചെയർമാൻ ആർ.എസ്. വിനോദ് മണിയുടെ അദ്ധ്യക്ഷതയിൽ ഡി.സി.സി. ജനറൽ സെക്രട്ടറി അഡ്വ. തേക്കട അനിൽകുമാർ ഉദ്ഘാടന കർമ്മം നിർവ്വഹിച്ചു.

വേങ്ങോട് മണ്ഡലം കോൺഗ്രസ്സ് കമ്മിറ്റി പ്രസിഡൻ്റ് എം. ആർ. ഷാനവാസ് മുഖ്യപ്രഭാഷണം നടത്തി. യു.ഡി.എഫ്. കൺവീനർ ഷാജഹാൻ മർഹബ, RSP ജില്ലാ കമ്മിറ്റി അംഗം വേങ്ങോട് മുരളീധരൻ, JSS സംസ്ഥാന കമ്മിറ്റി അംഗം വാവറ അമ്പലം അജി, സേവാദൾ ജില്ലാ സെക്രട്ടറി അഡ്വ. ആർ. മഞ്ജു, മണ്ഡലം കോൺഗ്രസ്സ് കമ്മിറ്റി ഭാരവാഹികളായ മുജീബ് കല്ലുവെട്ടി, നാരായണൻ നായർ, ശശിധരൻ നായർ, വേങ്ങോട് ലാൽ, കുന്നുകാട് രവി, കൊയ്ത്തൂർക്കോണം സലിം, എം.എ വാഹിദ്, ഹക്കിം തുടങ്ങിയവർ നേതൃത്വം നൽകി.

തിരു. കുറ്റിച്ചലിലെ പെട്രോൾ പമ്പ് ജീവനക്കാരനെ വെട്ടിപ്പരിക്കേൽപ്പിച്ച കേസിൽ മൂന്ന് പ്രതികൾ അറസ്റ്റിൽ

by Midhun HP News | Oct 2, 2026 | Latest News, ജില്ലാ വാർത്ത

തിരുവനന്തപുരം: കുറ്റിച്ചലിലെ പെട്രോൾ പമ്പ് ജീവനക്കാരനെ വെട്ടിപ്പരിക്കേൽപ്പിച്ച കേസിൽ മൂന്ന് പ്രതികൾ അറസ്റ്റിൽ. കുറ്റിച്ചൽ കുഴിയൻകോണം റസാഖ് മൻസിലിൽ അബ്ദുൽ റസാഖ് (21) കോട്ടൂർ കൊട്ടാരത്തുനട വിശ്വകർമ ഭവനിൽ ആകാശ് (21, കുറ്റിച്ചൽ വലിയവിള ലക്ഷംവീട്ടിൽ അനീഷ് (19) എന്നിവരെയാണ് നെയ്യാർഡാം പൊലീസ് അറസ്റ്റ് ചെയ്തത്. പെട്രോൾ പമ്പ് ജീവനക്കാരനായ അനിൽകുമാർ (52) ആണ് ആക്രമണത്തിനിരയായത്.