by Midhun HP News | Sep 29, 2026 | Latest News
ചെന്നൈ: സ്ത്രീകള്‍ക്കുള്ള സര്‍ക്കാരിന്റെ സൗജന്യ യാത്രാ പദ്ധതി വിപുലീകരിക്കുന്നതില്‍ പ്രതിഷേധിച്ച് സ്വകാര്യ ബസുടമകള്‍ തമിഴ്‌നാട്ടില്‍ പണിമുടക്കിന് ആഹ്വാനം ചെയ്തു. ഇന്ന് അര്‍ദ്ധ രാത്രി മുതല്‍ 24 മണിക്കൂറാണ് സൂചനാ പണി മുടക്ക്.
നിലവില്‍ ഏകദേശം 65 ശതമാനം നഷ്ടത്തിലാണ് സ്വകാര്യ ബസുകള്‍ സര്‍വീസ് നടത്തുന്നത് എന്നും ഡീസലിനും സ്‌പെയര്‍ പാര്‍ട്‌സുകള്‍ക്കും വില വര്‍ദ്ധിച്ചതോടെ ഭീമമായ നഷ്ടമമാണ് ബസ് ഉടമകള്‍ക്ക് ഉണ്ടാകുന്നതെന്നും ബസ് ഉടമകളുടെ സംഘടനയായ ഫെഡറേഷന്‍ ഓഫ് ബസ് ഓപ്പറേറ്റേഴ്‌സ് അസോസിയേഷന്‍ പ്രസിഡന്റ് തങ്കരാജ് മാധ്യമ പ്രവര്‍ത്തകരോട് പറഞ്ഞു.
സൗജന്യ യാത്രാ പദ്ധതി നടപ്പിലാക്കുന്നതിനായി സര്‍ക്കാര്‍ ട്രാന്‍സ്‌പോര്‍ട്ട് കോര്‍പ്പറേഷനുകള്‍ക്ക് സബ്‌സിഡി നല്‍കുന്നുണ്ട്. എന്നാല്‍ സ്വകാര്യ ബസുകളെ ഇതില്‍ നിന്ന് ഒഴിവാക്കി. ഡീസലിന് ലിറ്ററിന് 64 രൂപയായിരുന്ന 2018ലാണ് അവസാനമായി നിരക്ക് പരിഷ്‌ക്കരിച്ചത്. എന്നാല്‍ ഇപ്പോള്‍ ഇന്ധന വില ലിറ്ററിന് 100 രൂപ കടന്നിരിക്കുന്നു. യാത്രാ നിരക്ക് വര്‍ദ്ധിപ്പിക്കാന്‍ സര്‍ക്കാര്‍ തയ്യാറാകണമെന്നും ഫെഡറേഷന്‍ ആവശ്യപ്പെട്ടു.
ചെന്നൈ, മധുര, നാഗര്‍കോവില്‍, ഊട്ടി എന്നീ സ്ഥലങ്ങളെ പണിമുടക്കില്‍ നിന്ന് ഒഴിവാക്കിയിട്ടുണ്ട്. നിലവില്‍ തമിഴ്‌നാട്ടില്‍ ഏഴായിരത്തോളം സ്വകാര്യ ബസുകളാണ് സര്‍വ്വീസ് നടത്തുന്നത്. കേരളത്തില്‍ സ്ത്രീകള്‍ക്കുള്ള സൗജന്യ യാത്ര കാരണം നഷ്ടത്തിലായി ഏകദേശം 750 സ്വകാര്യ ബസ്സുകള്‍ സര്‍വ്വീസ് നിര്‍ത്തി എന്ന പരാതിയുമായി ബസ് ഓപ്പറേറ്റേഴ്‌സ് അസോസിയേഷന്‍ നേരത്തെ കോടതിയെ സമീപിച്ചിരുന്നു.
by Midhun HP News | Sep 29, 2026 | Latest News
പത്തനംതിട്ട: സൗദി അറേബ്യയിൽ തടവിൽ കഴിഞ്ഞിരുന്ന മാർത്തോമാ സഭാംഗളങ്ങളെ മോചിപ്പിക്കാൻ നടത്തിയ ശ്രമങ്ങൾക്ക് പ്രധാനമന്ത്രിക്കും കേന്ദ്ര സർക്കാരിനും നന്ദി പറഞ്ഞു മെത്രാപ്പൊലീത്ത. പ്രധാനമന്ത്രി നരേന്ദ്ര മോദിക്കും കേന്ദ്ര സർക്കാരിനും നന്ദി അറിയിച്ച് ഡോ. തിയഡോഷ്യസ് മാർത്തോമ്മാ മെത്രാപ്പൊലീത്ത കത്ത് അയച്ചു. സഭാംഗങ്ങളായ ഡാനിമോൻ, ലിജു മാത്യു, മാത്യു ചെറിയാച്ചൻ എന്നിവരെ മോചിപ്പിക്കാൻ വേണ്ടി നടത്തിയ ഇടപെടലിലാണ് മെത്രാപ്പൊലീത്ത നന്ദി അറിയിച്ചത്.
മോചനം ഉറപ്പാക്കാൻ നരേന്ദ്രമോദിയും പ്രധാനമന്ത്രിയുടെ ഓഫിസും നടത്തിയ നിരന്തര ശ്രമങ്ങൾക്കു നന്ദി രേഖപ്പെടുത്തിയുള്ള കത്ത് ഈ മാസം 9നാണ് അയച്ചത്. പ്രധാനമന്ത്രിയുടെ ഓഫിസ് നടത്തിയ സഹാനുഭൂതിയോടെയുള്ള പരിഗണനയെയും സത്വര ഇടപെടലിനെയും അങ്ങേയറ്റം വിലമതിക്കുന്നതായി കത്തിൽ പറയുന്നു. ഇവരുടെ മോചനം സാധ്യമാക്കിയ സൗദി അറേബ്യയിലെ ഇന്ത്യൻ സ്ഥാനപതി കാര്യാലയത്തിന്റെ ശ്രമങ്ങളെയും ഏകോപനത്തെയും കത്തിൽ പ്രശംസിക്കുന്നുണ്ട്.
കേന്ദ്ര സർക്കാരിന്റെ ഇടപെടൽ തടവിലായിരുന്നവർക്കും അവരുടെ കുടുംബങ്ങൾക്കും വിശാല സമൂഹത്തിനും ഇതു വലിയ ആശ്വാസവും സന്തോഷവും നൽകി. മോചനം സാധ്യമാക്കാൻ ഇടപെടൽ നടത്തിയ എല്ലാവരോടും നന്ദിയെന്നും മെത്രാപ്പൊലീത്ത അയച്ച കത്തിൽ പറയുന്നു. രാജ്യത്തിനും ജനങ്ങൾക്കും വേണ്ടിയുള്ള പ്രധാനമന്ത്രിയുടെ തുടർ സേവനത്തിനായി പ്രാർഥിക്കുന്നു എന്നും ഔദ്യോഗിക മുദ്രയും ഒപ്പുമുള്ള കത്തിൽ മെത്രാപ്പൊലീത്ത പറയുന്നു.
by Midhun HP News | Sep 29, 2026 | Latest News
കോഴിക്കോട്: തലശ്ശേരിയിലേക്കു പോകാൻ കോഴിക്കോട് റെയിൽവേ സ്റ്റേഷനിൽ ട്രെയിൻ കാത്തുനിൽക്കവേ അറിയാതെ മറ്റൊരു ട്രെയിനിൽ കയറിയ നാല് വയസുകാരന് ടിടിഇ രക്ഷകനായി. ചൊവ്വാഴ്‌ച ഉച്ചയ്ക്ക് 1.40 ഓടെയാണ് സംഭവം. പാനൂർ സ്വദേശികളുടെ മകനാണ് ട്രെയിൻ മാറിക്കയറിയത്.
കോഴിക്കോട് പ്ലാറ്റ്ഫോമിൽ ട്രെയിൻ കാത്തു നിൽക്കുന്നതിനിടെ ഐസ്‍ക്രീമിന്റെ കവർ കളയാൻ രക്ഷിതാവ് പോയ സമയത്താണ് പ്ലാറ്റ്ഫോമിൽ നിർത്തിയിട്ട ജനശതാബ്ദി എക്സ്പ്രസിൽ കുട്ടി കയറിയത്. പിന്നാലെ ട്രെയിൻ പ്ലാറ്റ്ഫോം വിടുകയും ചെയ്തു. പിതാവ് സിറാജുദ്ദീനും മാതാവ് ഷമീനയും പ്ലാറ്റ്ഫോമിൽ തിരഞ്ഞെങ്കിലും കുട്ടിയെ കണ്ടില്ല.ജനശതാബ്ദി എക്സ്പ്രസിൽ ഡി 8 കോച്ചിന്റെ വാതിലിനടുത്ത് കുട്ടി തനിച്ചു നിൽക്കുന്നതു കണ്ട ടിടിഇ എൻഎ പ്രതീഷ് വിവരം റെയിൽവേ കൺട്രോൾ റൂമിൽ അറിയിച്ചു. കുട്ടിയെ കാണാതായ വിവരം കോഴിക്കോട് റെയിൽവേ സ്റ്റേഷനിൽ നിന്ന് കൺട്രോൾ റൂം വഴി പ്രതീഷ് കുമാറിനെ അറിയിക്കുകയും ചെയ്തു.
കുട്ടിയെ ടിടിഇയ്ക്ക് കിട്ടിയ വിവരം കോഴിക്കോട് റെയിൽവേ സ്റ്റേഷനിൽ അനൗൺസ് ചെയ്തു. ട്രെയിൻ തിരൂരിൽ നിർത്തിയപ്പോൾ കുട്ടിയെ ടിടിഇ തിരൂർ ആർപിഎഫിനെ ഏൽപ്പിച്ചു. വൈകാതെ മാതാപിതാക്കൾ മറ്റൊരു ട്രെയിനിൽ തിരൂരിലെത്തി കുട്ടിയെ ഏറ്റുവാങ്ങി.
by Midhun HP News | Sep 29, 2026 | Latest News
പാലക്കാട്: നവരാത്രി തിരക്ക് നിയന്ത്രിക്കാൻ സ്പെഷൽ ട്രെയിനുകളും അധിക കോച്ചുകളും അനുവദിച്ച് റെയിൽവേ. മാവേലി, മലബാർ ട്രെയിനുകളിൽ അധിക സ്ലീപ്പർ കോച്ചുകൾ അനുവദിച്ചിട്ടുണ്ട്. ചെന്നൈ എഗ്‌മൂർ– മംഗളൂരു എക്സ്പ്രസിന് ഇരു ഭാഗത്തേക്കും (16159– 16160) ഓരോ സ്ലീപ്പർ കോച്ച് അധികമായി അനുവദിച്ചു. ഇതോടെ സ്ലീപ്പർ കോച്ചുകളുടെ എണ്ണം 12 ആയി. ചെന്നൈയിൽ നിന്നു പുറപ്പെടുന്ന ട്രെയിനിൽ ഇന്ന് മുതലും മംഗളൂരു സെൻട്രലിൽ നിന്നു പുറപ്പെടുന്ന ട്രെയിനിൽ ഒക്ടോബർ ഒന്ന് മുതലും അധിക കോച്ച് ഉണ്ടാകും.
തിരുവനന്തപുരം സെൻട്രൽ– മംഗളൂരു മാവേലി എക്സ്പ്രസിന് ഇരു ഭാഗത്തേക്കും (16603– 16604) ഓരോ സ്ലീപ്പർ കോച്ച് അധികമായി അനുവദിച്ചു. ആകെ സ്ലീപ്പർ കോച്ചുകൾ 10. മംഗളൂരുവിൽ നിന്നു നാളെ പുറപ്പെടുന്ന ട്രെയിനിലും പിറ്റേന്നു മുതൽ തിരിച്ചുള്ള ട്രെയിനിലും അധിക കോച്ച് ഉണ്ടാകും.
തിരുവനന്തപുരം സെൻട്രൽ– മംഗളൂരു സെൻട്രൽ മലബാർ എക്സ്പ്രസിൽ ഇരു ഭാഗത്തേക്കും (16630– 16629) ഓരോ സ്ലീപ്പർ കോച്ച് അധികം ഏർപ്പെടുത്തി. ആകെ സ്ലീപ്പർ കോച്ച് 10 ആയി.
സ്പെഷൽ ട്രെയിൻ
ലോകമാന്യ തിലക് – തിരുവനന്തപുരം നോർത്ത് സ്പെഷൽ ട്രെയിൻ (01463) 15 മുതൽ നവംബർ 19 വരെ എല്ലാ വ്യാഴാഴ്ചയും വൈകീട്ട് 4ന് പുറപ്പെടും. ഇത് വെള്ളിയാഴ്ച രാത്രി 11.30ന് തിരുവനന്തപുരം നോർത്തിൽ എത്തും. പാലക്കാട് ഡിവിഷനിലെ സ്റ്റോപ്പുകൾ- കാസർകോട് (10.30), കണ്ണൂർ (11.47), കോഴിക്കോട് (01.12), തിരൂർ (2.25), ഷൊർണൂർ (3.00).
തിരുവനന്തപുരം നോർത്ത്– ലോകമാന്യതിലക് സ്പെഷൽ എക്സ്പ്രസ് (01464) 17 മുതൽ നവംബർ 21 വരെ എല്ലാ ശനിയാഴ്ചകളിലും ഉച്ചയ്ക്ക് 2.15ന് പുറപ്പെടും. ഈ ട്രെയിൻ ലോകമാന്യതിലക് സ്റ്റേഷനിൽ ഞായർ രാത്രി 11.55ന് എത്തും. പാലക്കാട് ഡിവിഷനിലെ സ്റ്റോപ്പുകൾ- ഷൊർണൂർ (ശനി രാത്രി 9.05), തിരൂർ (9.54), കോഴിക്കോട് (10.37), കണ്ണൂർ (ഞായർ പുലർച്ചെ 12.47), കാസർകോട് (02.08).
by Midhun HP News | Sep 29, 2026 | Latest News
ആറ്റിങ്ങൽ മാമം കീഴെവീട്ടിൽ പരേതനായ ശ്രീധരൻ പിള്ളയുടെ ഭാര്യ ശ്രീസരസിൽ (കാട്ടിൽ വീട്) സരസ്വതി അമ്മ (90) അന്തരിച്ചു.
മക്കൾ: എസ്സ്. രവീന്ദ്രൻ നായർ(Late), എസ്സ്. രാമചന്ദ്രൻ നായർ, എസ്സ്. ഉണ്ണിപ്പിള്ള, എസ്സ്.എസ്സ്. വിജയകുമാർ
മരുമക്കൾ: വസന്ത കുമാരി. പി, അനിത . എ, ബിന്ദു. ബി, മഞ്ജു . എസ്. എൽ
by Midhun HP News | Sep 29, 2026 | Latest News
എഐ ഏജന്റുകള്‍ പരിധിവിട്ട് പ്രവര്‍ത്തിക്കുന്നതായുള്ള റിപ്പോര്‍ട്ടുകള്‍ക്ക് പിന്നാലെ ഏറ്റവും പുതിയ ആര്‍ട്ടിഫിഷ്യല്‍ ഇന്റലിജന്‍സ് മോഡലുകളുടെ പരിശീലനം നിര്‍ത്തിവെച്ചതായി ഓപ്പണ്‍ എഐ. യുഎസ് സര്‍ക്കാരിന്റെ വെബ്സൈറ്റുകളില് നിന്ന് ഓപ്പണ്‍ എഐയുടെ ബോട്ടുകള്‍ വിവരം ചോര്‍ത്തിയെന്നതടക്കം റിപ്പോര്‍ട്ടുകളുണ്ടായിരുന്നു.
സര്‍ക്കാര്‍ വെബ്സൈറ്റുകളില് വിവരങ്ങള്‍ ശേഖരിക്കുകയും കൈമാറുകയും ചെയ്യുന്നതിനിടെ ആവശ്യപ്പെടുന്ന വിവരങ്ങള്‍ കൂടാതെ എഐ ഏജന്റുകള്‍ മറ്റുവിവരങ്ങള്‍ നല്‍കിയെന്നതടക്കമുള്ള സംഭവം പരിശോധിച്ച് വരുകയാണെന്നും കമ്പനി അറിയിച്ചിരുന്നു. ഇതിന് പിന്നാലെയാണ് മോഡലുകളുടെ പ്രവര്‍ത്തനം നിര്‍ത്തിവെച്ചതായി അധികൃതര്‍ അറിയിച്ചത്.
ഓപ്പണ്‍ ഏജന്റുകള്‍ വിദ്യാഭ്യാസ വകുപ്പിന്റെ വെബ്സൈറ്റ് ഹാക്ക് ചെയ്യാന്‍ ശ്രമിച്ചതായി എഐ മൂല്യനിര്‍ണ്ണയ സ്ഥാപനമായ ട്രാന്‍സ്ലസ് വെളിപ്പെടുത്തിയിരുന്നു. എന്നാല്‍ ഓപ്പണ്‍എഐ ഇക്കാര്യം സ്ഥിരീകരിച്ചിട്ടില്ല. കൂടുതല്‍ സുരക്ഷാ സംവിധാനങ്ങള്‍ ഏര്‍പ്പെടുത്തിയെന്ന് ഉറപ്പാക്കിയ ശേഷം മാത്രമേ പരിശീലനം പുനരാരംഭിക്കൂ എന്ന് കമ്പനി പ്രസ്താവനയില്‍ വ്യക്തമാക്കി. എഐ വികസിക്കുമ്പോഴും പുതിയ പ്രശ്‌നങ്ങള്‍ ഉയര്‍ന്നുവരുമ്പോഴും ഇനിയും പ്രവര്‍ത്തനങ്ങള്‍ താല്‍ക്കാലികമായി നിര്‍ത്തിവെക്കേണ്ടി വന്നേക്കാമെന്നും കമ്പനി കൂട്ടിച്ചേര്‍ത്തു.
ഏജന്റുകള്‍ സ്വയം തീരുമാനങ്ങള്‍ എടുക്കുന്നതും വെബ്സൈറ്റുകള്‍ ഹാക്ക് ചെയ്യുന്നതും രഹസ്യവിവരങ്ങള്‍ പുറത്തുവിടുന്നതും തടയാന്‍ ആവശ്യമായ സുരക്ഷാ ക്രമീകരണങ്ങള്‍ ഒരുക്കുന്നതിനായി എഐ വികസനത്തിന്റെ വേഗത കുറയ്ക്കണമെന്ന് നിയമനിര്‍മ്മാതാക്കളില്‍ നിന്നും സാങ്കേതിക വിദഗ്ധരില്‍ നിന്നും എഐ ലാബുകള്‍ക്ക് മേല്‍ സമ്മര്‍ദ്ദമുണ്ട്. ഓപ്പണ്‍ എഐയുടെയും ആന്ത്രോപിക്കിന്റെയും തലവന്മാരും എഐയുടെ വളര്‍ച്ചയിലെ വേഗത കുറയ്ക്കണമെന്ന് ആവശ്യപ്പെട്ടിരുന്നു. പല കാരണങ്ങളാല്‍ കഴിഞ്ഞ മൂന്ന് മാസത്തിനിടെ രണ്ടാം തവണയാണ് ഓപ്പണ്‍എഐ തങ്ങളുടെ മോഡലുകളുടെ വികസനം നിര്‍ത്തിവെക്കുന്നത്.
Recent Comments