by Midhun HP News | Oct 23, 2026 | Latest News, കായികം, ജില്ലാ വാർത്ത
ഖെബര്‍ഹ: ഓസ്‌ട്രേലിയക്കെതിരായ രണ്ടാം ക്രിക്കറ്റ് ടെസ്റ്റില്‍ ദക്ഷിണാഫ്രിക്ക ഇന്നിങ്‌സ് ജയം സ്വന്തമാക്കിയതോടെ ലോക ടെസ്റ്റ് ചാംപ്യന്‍ഷിപ്പ് പോരാട്ടം കനക്കുന്നു. ഇന്നിങ്‌സിനും 31 റണ്‍സിനുമാണ് പ്രോട്ടീസ് വിജയിച്ചത്. ആദ്യ ടെസ്റ്റില്‍ ഓസ്‌ട്രേലിയയും വിജയിച്ചിരുന്നു.
നിലവില്‍ ടെസ്റ്റ് ചാംപ്യന്‍ഷിപ്പ് പോയിന്റ് പട്ടികയില്‍ ഓസ്‌ട്രേലിയ ഒന്നാമതും ന്യൂസിലന്‍ഡ് രണ്ടാം സ്ഥാനത്തും ദക്ഷിണാഫ്രിക്ക മൂന്നാം സ്ഥാനത്തുമുണ്ട്. തോറ്റെങ്കിലും ഓസ്‌ട്രേലിയയുടെ ഒന്നാം സ്ഥാനത്തിനു ഇളക്കമൊന്നും വന്നില്ല. എന്നാല്‍ അവര്‍ക്ക് ലീഡുയര്‍ത്താന്‍ സാധിക്കാത്തത് തിരിച്ചടിയാണ്. ഇന്ത്യ ഉള്‍പ്പെടെയുള്ള ടീമുകള്‍ക്കാണ് ഇതോടെ പ്രതീക്ഷ വര്‍ധിച്ചത്.
നിലവില്‍ ഓസ്‌ട്രേലിയക്ക് 75.00 ശതമാനം പോയിന്റുകളും ന്യൂസിലന്‍ഡിന് 72.22 ശതമാനം പോയിന്റും ദക്ഷിണാഫ്രിക്കയ്ക്ക് 66.67 ശതമാനവുമാണ് പോയിന്റ്. ഇന്ത്യ അഞ്ചാം സ്ഥാനത്താണ് നില്‍ക്കുന്നത്. പട്ടികയില്‍ ഇന്ത്യയേക്കാള്‍ ചെറിയ പോയിന്റ് മുന്‍തൂക്കത്തില്‍ ബംഗ്ലാദേശാണ് നാലാമത് നില്‍ക്കുന്നത്.
ഇന്ത്യന്‍ സാധ്യത
ടെസ്റ്റ് ചാംപ്യന്‍ഷിപ്പിലെ ഈ സൈക്കിളില്‍ ഇന്ത്യക്ക് ഇനി 7 മത്സരങ്ങളാണ് ശേഷിക്കുന്നത്. രണ്ടാം സ്ഥാനത്തുള്ള ന്യൂസിലന്‍ഡുമായി 2 ടെസ്റ്റ് മത്സരങ്ങളാണ് ഇന്ത്യ കളിക്കാനൊരുങ്ങുന്നത്. പിന്നാലെ സ്വന്തം മണ്ണില്‍ 5 ടെസ്റ്റ് പോരാട്ടങ്ങളില്‍ ഇന്ത്യ ഓസ്‌ട്രേലിയയുമായും ഏറ്റുമുട്ടും. 60 ശതമാനം പോയിന്റുകളാണ് ഇന്ത്യക്ക് ഫൈനലിലെത്താന്‍ വേണ്ടത്. ഈ ഏഴ് ടെസ്റ്റുകളില്‍ നിന്നായി ഇന്ത്യ 62 പോയിന്റുകള്‍ നേടണം. മാത്രമല്ല രണ്ടില്‍ കൂടുതല്‍ മത്സരങ്ങളില്‍ തോല്‍ക്കാനും പാടില്ല.
അത്ര എളുപ്പമല്ല ഇന്ത്യക്ക് മുന്നിലുള്ള കടമ്പ. അടുത്ത 7 ടെസ്റ്റില്‍ 5 ടെസ്റ്റുകളെങ്കിലും ജയിക്കണം. അതുമാത്രം പോര ഓസ്‌ട്രേലിയ, ന്യൂസിലന്‍ഡ്, ദക്ഷിണാഫ്രിക്ക ടീമുകള്‍ തങ്ങളുടെ ബാക്കിയുള്ള മത്സരങ്ങളില്‍ രണ്ടെണ്ണത്തിലെങ്കിലും പോയിന്റും നഷ്ടപ്പെടുത്തണം.
പട്ടികയില്‍ നാലാമതുള്ള ബംഗ്ലാദേശും ഇന്ത്യയെ പോലെ മറ്റ് മത്സരങ്ങളുടെ ഫലവും ഒപ്പം സ്വന്തം മുന്നേറ്റവും ആശ്രയിച്ചാണ് നില്‍ക്കുന്നത്. 6 കളികളാണ് സൈക്കിളില്‍ അവര്‍ക്ക് ശേഷിക്കുന്നത്. ഇതില്‍ 4 പോരാട്ടങ്ങള്‍ സ്വന്തം നാട്ടിലാണെന്നത് അവര്‍ക്ക് വലിയ ആത്മവിശ്വാസം നല്‍കുന്നതാണ്.
by Midhun HP News | Oct 23, 2026 | Latest News, കേരളം
കൊച്ചി: പാമ്പാടിയില്‍ സ്വകാര്യ ബസിടിച്ച് സ്‌കൂട്ടര്‍ യാത്രികരായ രണ്ടു വിദ്യാര്‍ഥിനികള്‍ മരിച്ച സംഭവത്തില്‍ റോഡില്‍ സംസാരിച്ചു നിന്ന രണ്ടു പേര്‍ക്കെതിരെയും പൊലീസ് അന്വേഷണം ആരംഭിച്ചു. സംഭവം നടക്കുമ്പോള്‍ ഈ രണ്ടു പേര്‍ അപകടകരമായ രീതിയില്‍ റോഡില്‍ സംസാരിച്ചു നില്‍ക്കുന്നുണ്ടായിരുന്നു എന്നതിന് പൊലീസിന് തെളിവുകള്‍ ലഭിച്ചു. ഇതാണ് അപകടത്തിന് പ്രധാന കാരണമായതെന്ന നിഗമനത്തിലാണ് അന്വേഷണം പുരോഗമിക്കുന്നത്. എന്നാല്‍ ഇവര്‍ ആരാണെന്ന് കണ്ടെത്താനോ തിരിച്ചറിയാനോ പൊലീസിന് ഇതുവരെ സാധിച്ചിട്ടില്ല. ഇവരെ കണ്ടെത്തിയാല്‍ തന്നെ ഏത് വകുപ്പ് ചുമത്തി കേസ് രജിസ്റ്റര്‍ ചെയ്യും എന്ന ആശയക്കുഴപ്പവും പൊലീസിനുണ്ട്.
കഴിഞ്ഞ ബുധനാഴ്ച്ചയാണ് വാഹനാപകടത്തില്‍ പാമ്പാടി ബ്ലോസംവാലി ചൈല്‍ഡ് ഡവലപ്‌മെന്റ് സെന്റര്‍ ഡയറക്ടറുടെ മകള്‍ കൃപയും മീനടം വട്ടക്കാവുങ്കല്‍ വി വി തോമസിന്റെ മകള്‍ ആഷ്‌ലിയും മരണപ്പെടുന്നത്. ദേശീയപാത 183ല്‍ 13ാം മൈലില്‍ രാവിലെ എട്ടരക്കായിരുന്നു അപകടം. കാനത്തുള്ള സുഹൃത്തിന്റെ വീട്ടിലേക്ക് ഇരുവരും പോകുമ്പോള്‍ മുന്നില്‍ പോയിരുന്ന കാര്‍, റോഡില്‍ നിന്നവരെ ഇടിക്കാതിരിക്കാന്‍ ബ്രേക്കിട്ടു. പിന്നാലെ എത്തിയ സ്‌കൂട്ടറും ബ്രേക്കിട്ടെങ്കിലും മറിഞ്ഞു വീണു. ഈ സമയം, കട്ടപ്പനയില്‍ നിന്ന് കോട്ടയത്തേക്കു വന്ന സിഎംഎസ് ബസിന് അടിയിലേക്ക് സ്‌കൂട്ടര്‍ മറിഞ്ഞാണ് വിദ്യാര്‍ഥിനികള്‍ മരിക്കുന്നത്.
സിസിടിവി പരിശോധിച്ചപ്പോള്‍ സ്വകാര്യ ബസ് അമിത വേഗത്തില്‍ സഞ്ചരിക്കുകയും മറ്റൊരു ബസ് പിന്തുടരുകയും ചെയ്യുന്നത് കണ്ടു. ബസുകളുടെ മത്സരയോട്ടത്തിനിടെ അശ്രദ്ധമായി വണ്ടിയോടിച്ചതിനാണ് പോലീസ് എഫ്‌ഐആറിട്ടത്. ബസും ബസ് ഡ്രൈവറെയും കസ്റ്റഡിയില്‍ എടുത്തിട്ടുണ്ട്. നിലവില്‍ മനപൂര്‍വമല്ലാത്ത നരഹത്യകുറ്റമാണ് ബസ് ഡ്രൈവര്‍ക്ക് എതിരെ എടുത്തിട്ടുള്ളത്. ആഷ്‌ലിയുടെ സംസ്‌കാരം ഇന്ന് രാവിലെ മീനടം ജോര്‍ജ് ഓര്‍ത്തഡോക്‌സ് പള്ളി സെമിത്തേരിയില്‍ നടന്നു. കൃപയുടേത് ഇന്നലെ കടവുംഭാഗം സെന്റ് ഇഗ്നാത്തിയോസ് യാക്കോബായ സുറിയാനി പള്ളിയിലും നടന്നു.
by Midhun HP News | Oct 23, 2026 | Latest News, കേരളം
കോഴിക്കോട്: അധ്യാപകർ പ്രതികളായ പേരാമ്പ്ര എംഡിഎംഎ കേസുമായി ബന്ധപ്പെട്ട് സമഗ്ര ശിക്ഷ കേരളം കോഴിക്കോട് ജില്ലാ പ്രൊജക്ട് കോർഡിനേറ്റർ അബ്ദുൽ ഹക്കീമിനെതിരെ വിജിലൻസ് അന്വേഷണം ആരംഭിച്ചു. ഔദ്യോഗിക പദവി ദുരുപയോഗം ചെയ്യൽ, അനധികൃത സ്വത്ത് സമ്പാദനം തുടങ്ങിയ ഗുരുതരമായ ആരോപണങ്ങളിലാണ് വിജിലൻസ് സംഘം അന്വേഷണം നടത്തുന്നത്. യൂത്ത് കോൺഗ്രസ് സംസ്ഥാന ജനറൽ സെക്രട്ടറി വി.പി. ദുൽഖിഫിൽ നൽകിയ പരാതിയുടെ അടിസ്ഥാനത്തിലാണ് നടപടി.
പേരാമ്പ്ര എംഡിഎംഎ കേസിൽ പിടിയിലായ മൂന്ന് അധ്യാപികമാരും പേരാമ്പ്ര ബ്ലോക്ക് റിസോഴ്സ് സെന്ററിന് കീഴിൽ കരാർ അടിസ്ഥാനത്തിൽ നിയമനം ലഭിച്ചവരായിരുന്നു. ഇവരുടെ കരാർ കാലാവധി അവസാനിച്ചതിന് പിന്നാലെ, ഇതിൽ രണ്ടുപേരെ മാനദണ്ഡങ്ങൾ മറികടന്ന് വീണ്ടും നിയമിച്ചതുമായി ബന്ധപ്പെട്ടാണ് പ്രധാനമായും പരാതി ഉയർന്നിരിക്കുന്നത്. കോഴിക്കോട് ജില്ലാ പ്രൊജക്ട് കോർഡിനേറ്റർ അബ്ദുൽ ഹക്കീമിന്റെ പ്രത്യേക താൽപര്യപ്രകാരമാണ് ഈ പുനർനിയമനം നടന്നതെന്നും ലഹരിക്കേസുമായി ബന്ധപ്പെട്ട് ഇദ്ദേഹത്തിന് പങ്കാളിത്തമുണ്ടെന്നുമാണ് വി.പി. ദുൽഖിഫിലിന്റെ പരാതിയിലെ ആരോപണം. ഇതിനുപുറമെ, ഔദ്യോഗിക പദവി ദുരുപയോഗം ചെയ്ത് അബ്ദുൽ ഹക്കീം വലിയ തോതിൽ അനധികൃത സ്വത്ത് സമ്പാദിച്ചിട്ടുണ്ടെന്നും പരാതിയിൽ വ്യക്തമാക്കുന്നുണ്ട്.
പരാതിയിൽ ഉന്നയിക്കപ്പെട്ടിട്ടുള്ള ആരോപണങ്ങളുടെ നിജസ്ഥിതി പരിശോധിക്കുന്നതിന്റെ പ്രാഥമിക ഘട്ടമായി പരാതിക്കാരനായ വി.പി. ദുൽഖിഫിലിനെ വിജിലൻസ് ഓഫീസിലേക്ക് വിളിച്ചുവരുത്തിയിട്ടുണ്ട്. പരാതിക്ക് ആധാരമായ രേഖകളും കൂടുതൽ വിവരങ്ങളും അദ്ദേഹത്തിൽനിന്ന് അന്വേഷണ സംഘം നേരിട്ട് ശേഖരിക്കും. വരും ദിവസങ്ങളിൽ ആരോപണവിധേയനായ ഉദ്യോഗസ്ഥനെ ചോദ്യം ചെയ്യുന്നതടക്കമുള്ള തുടർനടപടികളിലേക്ക് വിജിലൻസ് കടക്കുമെന്നാണ് വിവരം.
by Midhun HP News | Oct 23, 2026 | Latest News, കേരളം
കണ്ണൂര്‍ മുന്‍ ജില്ലാ പഞ്ചായത്ത് പ്രസിഡന്റ് പിപി ദിവ്യക്കെതിരെ വിജിലന്‍സ് അന്വേഷണത്തിന് ഉത്തരവിട്ട് സര്‍ക്കാര്‍. കണ്ണുര്‍ ജില്ലാ പഞ്ചായത്ത് പ്രസിഡന്റായിരിക്കെ നടത്തിയ ക്രമക്കേടുകളിലാണ് വിജിലന്‍സ് അന്വേഷണം. ടെന്‍ണ്ടര്‍ ഇല്ലാതെ കാര്‍ട്ടണ്‍ ഇന്ത്യ കമ്പനിക്ക് നിര്‍മാണ കരാര്‍ നല്‍കിയതെന്ന് കെഎസ് യു ഉപാധ്യക്ഷന്‍ വൈസ് പ്രസിഡന്റ് മുഹമ്മദ് ഷമാസിന്റെ പരാതിയിലാണ് ആഭ്യന്തരവകുപ്പ് വിജിലന്‍സ് അന്വേഷണത്തിന് ഉത്തരവിട്ടത്. പിപി ദിവ്യയുടെയും ഭര്‍ത്താവിന്റെയും സ്വത്തും അന്വേഷിക്കും.
കാര്‍ട്ടണ്‍ ഇന്ത്യ കമ്പനി ദിവ്യയുടെ ബിനാമിയാണെന്നാണ് പരാതി. പരാതിയുടെ അടിസ്ഥാനത്തില്‍ വിജിലന്‍സ് പ്രാഥമിക അന്വേഷണം നടത്തിയപ്പോള്‍ വസ്തുതപരമായ കാര്യങ്ങള്‍ ഉണ്ടെന്ന് കണ്ടെത്തിയിരുന്നു. ഇതിന്റെ അടിസ്ഥാനത്തിലാണ് തുടര്‍നടപടി. പിപി ദിവ്യ ജില്ലാ പഞ്ചായത്ത് പ്രസിഡന്റായിരിക്കെ ജില്ലാ പഞ്ചായത്ത് സെക്രട്ടറിയായിരുന്ന അബ്ദുള്‍ ലത്തീഫിനെതിരെയും അന്വേഷണം നടക്കും.
പിപി ദിവ്യ ജില്ലാ പഞ്ചായത്ത് പ്രസിഡന്റായിരിക്കെ 2021 മുതല്‍ പ്രീ ഫാബ്രിക്കേറ്റ് നിര്‍മ്മാണങ്ങള്‍ ഒരൊറ്റ കമ്പനിക്കാണ് കിട്ടിയത്. മൂന്നുവര്‍ഷത്തിനിടെ കിട്ടിയത് 12 കോടിയിലേറെ രൂപയുടെ കരാറാണ്. പി പി ദിവ്യ ജില്ലാ പഞ്ചായത്ത് പ്രസിഡന്‍ഡ് ആയ് ശേഷമാണ് കമ്പനി രൂപീകരിച്ചത്. കാര്‍ട്ടണ്‍ ഇന്ത്യ അലയന്‍സ് പ്രൈവറ്റ് ലിമിറ്റഡ് എന്ന കമ്പനി ബെനാമി പേരില്‍ ദിവ്യയും ഭര്‍ത്താവും ചേര്‍ന്ന് ആരംഭിച്ചതാണെന്നാണ് ആരോപണം.
by Midhun HP News | Oct 23, 2026 | Latest News, ജില്ലാ വാർത്ത
തിരുവനന്തപുരം: സ്‌പൈനല്‍ മസ്‌കുലര്‍ അട്രോഫി രോഗബാധിതര്‍ക്ക് ഇന്ത്യന്‍നിര്‍മിത ജനറിക് മരുന്ന് മാത്രമേ നല്‍കുകയുള്ളുവെന്നും വിദേശ കമ്പനികളുടെ മരുന്ന് ഇനി അനുവദിക്കില്ലെന്നും ആരോഗ്യമന്ത്രി കെ മുരളീധരന്‍. ഇന്ത്യന്‍ മരുന്നില്‍ ആശങ്കവേണ്ടെന്നും ഡോക്ടര്‍മാര്‍ രക്ഷിതാക്കളോട് സംസാരിച്ചെന്നും വിവാദത്തിന് പിന്നില്‍ വിദേശ മരുന്ന് കമ്പനിയാകാമെന്നും കെ മുരളീധരന്‍ പറഞ്ഞു. എസ്എംയ്ക്ക് ഇന്ത്യന്‍ മരുന്നുകള്‍ ഇല്ലാത്തപ്പോഴാണ് വിദേശ മരുന്നുകള്‍ നല്‍കിയതെന്ന് വിദഗ്ധ സമിതി ചെയര്‍മാന്‍ ഡോ. വിശ്വനാഥന്‍ പറഞ്ഞു. മരുന്നില്‍ ക്ലിനിക്കല്‍ ട്രയല്‍ എന്നെഴുതിയതില്‍ ഭയം വേണ്ടെന്നും ഇന്ത്യന്‍ മരുന്ന് പരീക്ഷിച്ച് വിജയം ഉറപ്പിച്ചതാണെന്നും അദ്ദേഹം പറഞ്ഞു.
സംശയങ്ങള്‍ ഒഴിവാക്കാനാണ് മരുന്ന് തിരികെ എത്തിക്കാന്‍ പറഞ്ഞതെന്ന് മന്ത്രി പറഞ്ഞു. ആ മരുന്നിന്റെ വിശ്വാസ്യതയില്‍ ആര്‍ക്കും ഒരും സംശയവുമില്ല. ആശങ്ക അകറ്റാനാണ് രോഗികളോട് ഡോക്ടര്‍ നേരിട്ടുസംസാരിക്കുന്നത്. ഡോക്ടര്‍മാര്‍ക്ക് രോഗികളോടെ സംസാരിക്കാന്‍ പറ്റുകയുള്ളു. രാഷ്ട്രീയക്കാര്‍ക്കേ ചാനുലുകളോട് സംസാരിക്കാന്‍ പറ്റൂ, ഇതിന് ചില പ്രോട്ടോകോള്‍ ഉണ്ടെന്നും കെ മുരളീധരന്‍ പറഞ്ഞു.
സുപ്രീം കോടതി നല്‍കാന്‍ പറഞ്ഞ മരുന്നില്‍ എന്തിനാണ് ആശങ്കയെന്നും കെ മുരളീധരന്‍ ചോദിച്ചു. ഈ മരുന്ന് അനുയോജ്യമാണെന്ന് എല്ലാ വിദഗ്ധരും പറഞ്ഞില്ലേ?. മന്ത്രി എംബിബിഎസുകാരനല്ല. പക്ഷെ എക്‌സ്‌പേര്‍ട്ട് ഡോക്ടര്‍മാരുണ്ട്. അവരെ എങ്ങനെയാ ചോദ്യം ചെയ്യുകയെന്നും കെ മുരളീധരന്‍ ചോദിച്ചു. കുട്ടികളുടെ രക്ഷിതാക്കള്‍ക്ക് അതിന്റെ ഗുണം വിവരിച്ച ശേഷമേ മരുന്ന് നല്‍കിയിട്ടുള്ളൂ. ആശങ്കയുണ്ടാക്കിയത് ചില മാധ്യമവാര്‍ത്തകളാണ്. പിന്നില്‍ വിദേശ മരുന്ന് കമ്പനികള്‍ ഉണ്ടാകും.
2024 ഈ മരുന്ന് വാങ്ങിയ കമ്പനിക്ക് 50 കോടി കൊടുക്കാനുണ്ടന്നും മന്ത്രി പറഞ്ഞു. 2023-2024ല്‍ നാറ്റ്‌കോ കമ്പനിയില്‍ നിന്ന് സിപിഎം ഒരു കോടിയും 2024-2025ല്‍ അരലക്ഷവും പാര്‍ട്ടി ഫണ്ട് വാങ്ങിയിട്ടുണ്ട്. ഇക്കാര്യം ഇലക്ഷന്‍ കമ്മീഷന്റെ കണക്കുകള്‍ നോക്കിയാല്‍ കാണാം. മുന്‍ ആരോഗ്യമന്ത്രിമാര്‍ വനിതകളായതുകൊണ്ടും അവരോട് ബഹുമാനം ഉള്ളതുകൊണ്ടും പറയുകയാണ്; സ്വന്തം പാര്‍ട്ടിക്ക് വേണ്ടാത്തവര്‍ ഇന്നലെ ഒന്ന് ഒന്നിച്ചുനിന്ന് കെ മുരളീധരനെതിരെ രംഗത്തുവന്നത് നന്നായെന്നും അദ്ദേഹം പറഞ്ഞു.
by Midhun HP News | Oct 23, 2026 | Latest News, ദേശീയ വാർത്ത
നാഗപട്ടണം: തമിഴ്നാട്ടിലെ പ്രശസ്ത തീർത്ഥാടന കേന്ദ്രമായ വേളാങ്കണ്ണിയിലെ സ്വകാര്യ ലോഡ്ജിൽ വെച്ച് പ്രായപൂർത്തിയാകാത്ത രണ്ട് സ്കൂൾ വിദ്യാർഥിനികളെ ലൈംഗികമായി പീഡിപ്പിച്ച കേസിൽ രണ്ട് മലയാളി യുവാക്കളെ പൊലീസ് അറസ്റ്റ് ചെയ്തു. തിരുവനന്തപുരം സ്വദേശികളായ എ. അജയ് (26), എ. വിശാൽ (23) എന്നിവരാണ് ബുധനാഴ്ച വൈകുന്നേരത്തോടെ പിടിയിലായത്. കേരളത്തിൽനിന്ന് വേളാങ്കണ്ണിയിലെത്തിയ 15 അംഗ വിനോദസഞ്ചാര സംഘത്തിലുൾപ്പെട്ടവരാണ് ഇരുവരും.
പുതുക്കോട്ടയിലെ സർക്കാർ സ്കൂളിലെ പതിനൊന്നാം ക്ലാസ് വിദ്യാർഥിനികളാണ് പീഡനത്തിനിരയായത്. കുടുംബപ്രശ്നങ്ങളെ തുടർന്ന് വീട്ടിൽനിന്ന് പിണങ്ങിയിറങ്ങിയ ഒരു പെൺകുട്ടി സുഹൃത്തിനൊപ്പം വേളാങ്കണ്ണിയിൽ എത്തുകയായിരുന്നു. ജോലി അന്വേഷിച്ചാണ് ഇരുവരും ഇവിടെ എത്തിയത്. പെൺകുട്ടികളിൽ ഒരാളെ കാണാനില്ലെന്ന് കാണിച്ച് ഒക്ടോബർ 18-ന് രക്ഷിതാക്കൾ പുതുക്കോട്ട പൊലീസിൽ പരാതി നൽകിയിരുന്നു.
ഒക്ടോബർ 20 ചൊവ്വാഴ്ച രാത്രി വേളാങ്കണ്ണി ബീച്ചിൽ നിന്ന പെൺകുട്ടികളെ പ്രതികൾ പ്രലോഭിപ്പിച്ച് സ്വകാര്യ ലോഡ്ജിലേക്ക് കൂട്ടിക്കൊണ്ടുപോവുകയും അവിടെവെച്ച് ക്രൂരമായി ലൈംഗികാതിക്രമത്തിന് ഇരയാക്കുകയുമായിരുന്നുവെന്ന് പൊലീസ് പറഞ്ഞു. ബുധനാഴ്ച ഉച്ചയോടെ പ്രതികൾ വീണ്ടും ഈ ലോഡ്ജ് മുറിയിലേക്ക് മടങ്ങിയെത്തി.
ലോഡ്ജിന് സമീപത്ത് സംശയാസ്പദമായ സാഹചര്യത്തിൽ പ്രായപൂർത്തിയാകാത്ത പെൺകുട്ടികളെ കണ്ടതിനെ തുടർന്ന് സമീപവാസി നൽകിയ വിവരത്തിന്റെ അടിസ്ഥാനത്തിലാണ് പൊലീസ് സ്ഥലത്തെത്തിയത്. തുടർന്ന് പെൺകുട്ടികളെ പൊലീസ് മോചിപ്പിക്കുകയും വിവരങ്ങൾ ചോദിച്ചറിയുകയുമായിരുന്നു. പെൺകുട്ടികളുടെ മൊഴിയുടെ അടിസ്ഥാനത്തിൽ അജയ്, വിശാൽ എന്നിവരെ ബുധനാഴ്ച തന്നെ പൊലീസ് അറസ്റ്റ് ചെയ്തു. പ്രതികൾക്കെതിരെ പോക്സോ കേസെടുത്തു.
Recent Comments