by Midhun HP News | Oct 23, 2026 | Latest News, ദേശീയ വാർത്ത
ഡല്‍ഹി: സൈബര്‍ തട്ടിപ്പുകള്‍ തടയാന്‍ മെസേജിങ് ആപ്പുകളില്‍ നിയന്ത്രണങ്ങളുമായി കേന്ദ്ര സര്‍ക്കാര്‍; വാട്‌സ്ആപ്പ്, ടെലഗ്രാം അടക്കമുള്ള ആപ്പുകള്‍ ഇനി സിം കാര്‍ഡില്ലാതെ ഉപയോഗിക്കാനാകില്ല. മെസേജിങ് പ്ലാറ്റ്ഫോമുകളുടെ സേവനം അക്കൗണ്ടുമായി ബന്ധിപ്പിച്ച രജിസ്റ്റര്‍ ചെയ്ത സിം ഫോണില്‍ ഉണ്ടെങ്കില്‍ മാത്രം ലഭ്യമാകുന്ന രീതിയില്‍ ക്രമീകരിക്കാനാണ് ഈ നടപടിയിലൂടെ ലക്ഷ്യമിടുന്നത്. സൈബര്‍ തട്ടിപ്പുകളും മൊബൈല്‍ നമ്പറുകളുടെ ദുരുപയോഗവും തടയുന്നതിനായി കൊണ്ടുവന്ന സിം-ബൈന്‍ഡിങ് നിബന്ധനകള്‍ നടപ്പിലാക്കാന്‍, ടെലികോം വകുപ്പ് മെസേജിങ് പ്ലാറ്റ്ഫോമുകള്‍ക്ക് 2026 ഡിസംബര്‍ 31 വരെയാണ് സമയപരിധി നിശ്ചയിച്ചിരിക്കുന്നത്.
അടുത്ത വര്‍ഷം ജനുവരി ഒന്നുമുതല്‍ ഇത് പ്രാബല്യത്തില്‍ വരും. അക്കൗണ്ടുമായി ബന്ധിപ്പിച്ച സിം കാര്‍ഡ് നിര്‍ജ്ജീവമാക്കുകയോ, ഫോണില്‍ നിന്ന് മാറ്റുകയോ ചെയ്താല്‍ ഉപയോക്താക്കള്‍ക്ക് തങ്ങളുടെ മെസേജിങ് അക്കൗണ്ടുകളിലേക്കുള്ള പ്രവേശനം സാധിക്കില്ല. നിലവില്‍ ഫോണില്‍ സിം കാര്‍ഡ് ഇല്ലാതെ വൈ-ഫൈ മാത്രം ഉപയോഗിച്ച് വാട്സ്ആപ്പും ടെലഗ്രാമും പ്രവര്‍ത്തിപ്പിക്കുന്ന ഉപയോക്താക്കള്‍ക്ക് പുതിയ മാറ്റം തിരിച്ചടിയാകും.
എന്നാല്‍ ഓരോ പ്ലാറ്റ്ഫോമുകളും ഈ ചട്ടങ്ങള്‍ എങ്ങനെ പ്രാവര്‍ത്തികമാക്കുന്നു എന്നതിനെ ആശ്രയിച്ചായിരിക്കും നിയന്ത്രണങ്ങളുടെ വ്യാപ്തി.സിം-ബൈന്‍ഡിങ്ങിനെ പിന്തുണയ്ക്കുന്നതിനായി ആപ്പിള്‍ സെപ്റ്റംബറിലെ സോഫ്റ്റ്വെയര്‍ അപ്ഡേറ്റിലൂടെ ഐഒഎസില്‍ മാറ്റങ്ങള്‍ വരുത്തിയിട്ടുണ്ട്. ഫോണില്‍ സിം കാര്‍ഡില്ലാത്ത സാഹചര്യം തിരിച്ചറിയാന്‍ സഹായിക്കുന്നതാണ് ഈ അപ്ഡേറ്റ്. ഒന്നിലധികം ഡിവൈസുകളില്‍ അക്കൗണ്ട് ഉപയോഗിക്കുന്നവര്‍, വിദേശയാത്ര നടത്തുന്നവര്‍, വൈ-ഫൈയില്‍ മാത്രം ഫോണ്‍ പ്രവര്‍ത്തിപ്പിക്കുന്നവര്‍ എന്നിവര്‍ തങ്ങളുടെ അക്കൗണ്ട് ക്രമീകരണങ്ങള്‍ പരിശോധിക്കേണ്ടി വരും.
മൊബൈല്‍ നമ്പറുകള്‍ ദുരുപയോഗം ചെയ്ത് വ്യാജ അക്കൗണ്ടുകള്‍ സൃഷ്ടിക്കുന്നതും മറ്റുള്ളവരുടെ പേരില്‍ തട്ടിപ്പ് നടത്തുന്നതും തടയുകയാണ് സിം ബൈന്‍ഡിങ്ങിന്റെ പ്രധാന ലക്ഷ്യമെന്ന് കേന്ദ്ര സര്‍ക്കാര്‍ പറയുന്നു. തട്ടിപ്പുകള്‍ക്ക് ഉപയോഗിക്കുന്ന അക്കൗണ്ടുകളെ അവയുടെ രജിസ്റ്റര്‍ ചെയ്ത മൊബൈല്‍ നമ്പറുമായി ബന്ധിപ്പിച്ച് തിരിച്ചറിയാന്‍ ഈ സംവിധാനം സഹായിക്കുമെന്നാണ് വിലയിരുത്തല്‍. മെസേജിങ് ആപ്പുകളായ വാട്സാപ്പ്, ടെലഗ്രാം, സിഗ്‌നല്‍ തുടങ്ങിയ സമൂഹ മാധ്യമ ആപ്പുകള്‍ ഇനി സിം കാര്‍ഡുകളുമായി ബന്ധിപ്പിച്ച് മാത്രമെ പ്രവര്‍ത്തിപ്പിക്കാവൂ എന്ന് ആവശ്യപ്പെട്ടിരിക്കുന്ന ആവശ്യമാണ് സിം ബൈന്‍ഡിങ് എന്ന് അറിയപ്പെടുന്നത്.
by Midhun HP News | Oct 23, 2026 | Latest News, കേരളം
മരശിഖരങ്ങൾ മുറിക്കുന്നതിനിടെ മരംകയറ്റ തൊഴിലാളി കാൽവഴുതിവീണ് മരിച്ചു. ഞാറയിൽകോണം വലിയകുന്ന് കാവ്യവിള വീട്ടിൽ ക്രിസ്റ്റഫർ (48) ആണ് മരിച്ചത്. തിങ്കൾ പകൽ 11.30 ഓടെ കാട്ടുപുതുശ്ശേരിയിലായിരുന്നു സംഭവം. സ്വകാര്യ വ്യക്തിയുടെ തേക്ക്‌മരത്തിന്റെ ശിഖരങ്ങൾ മുറിക്കുന്നതിനിടെ ഉയരത്തിൽനിന്ന് വീഴുകയായിരുന്നു. ഗുരുതരമായി പരിക്കേറ്റ ക്രിസ്റ്റഫറിനെ പാരിപ്പള്ളി മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും മരിച്ചു. പോസ്റ്റ്‌മോർട്ടത്തിന് ശേഷം സംസ്കാരം നടത്തി. പള്ളിക്കൽ പൊലീസ് കേസെടുത്തു. അച്ഛൻ: പരേതനായ വി എം തോമസ്.
അമ്മ: പരേതയായ സാറാമ്മ.
ഭാര്യ: മിനിമോൾ. മകൻ: മീഖ.
by Midhun HP News | Oct 23, 2026 | Latest News, ദേശീയ വാർത്ത
ഡല്‍ഹി: ആഗോള വിപണിയില്‍ എണ്ണവില അഞ്ചുമാസത്തെ ഏറ്റവും ഉയര്‍ന്ന നിലയില്‍. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില ബാരലിന് 113 ഡോളറിന് മുകളിലാണ്. ഇന്നലെ മാത്രം നാലുശതമാനമാണ് ഉയര്‍ന്നത്.
സൗദി അറേബ്യയില്‍ യെമനിലെ ഇറാന്‍ അനുകൂല ഹൂതി വിമതരുടെ ആക്രമണമാണ് എണ്ണവില ഉയരാന്‍ കാരണം. ഇത് എണ്ണവിതരണത്തെ ബാധിക്കുമെന്ന ആശങ്ക നിലനില്‍ക്കുകയാണ്. ഇതാണ് എണ്ണവില ഉയരാന്‍ കാരണമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.
അതിനിടെ ആക്രമണ ഭീഷണി നിലനില്‍ക്കുന്നതിനാണ് സൗദി അരാംകോയുടെ ദഹ്‌റാനിലെ ആസ്ഥാനം ഒഴിപ്പിക്കാന്‍ ഉത്തരവിട്ടു. വര്‍ധിച്ചുവരുന്ന സംഘര്‍ഷം സൗദിയിലെ എണ്ണ അടിസ്ഥാന സൗകര്യങ്ങളെയും പ്രാദേശിക ഊര്‍ജ്ജ വിതരണത്തെയും ബാധിക്കുമെന്ന ആശങ്ക നിലനില്‍ക്കുന്നുണ്ട്. കൂടാതെ ലിബിയയിലെ പൈപ്പ് ലൈനില്‍ ഉണ്ടായ തകരാറുകളും എണ്ണവില വര്‍ധിക്കുമെന്ന ആശങ്കകള്‍ ഇരട്ടിയാക്കിയിട്ടുണ്ട്.
by Midhun HP News | Oct 23, 2026 | Latest News, കേരളം
കൊച്ചി: സംസ്ഥാനത്ത് സ്വര്‍ണവില ഇടിവ് തുടരുന്നു. ഇന്ന് പവന് ഒറ്റയടിക്ക് 1400 രൂപയാണ് കുറഞ്ഞത്. 1,04,480 രൂപയാണ് ഒരു പവന് സ്വര്‍ണത്തിന്റെ വില. ഗ്രാമിന് ആനുപാതികമായി 175 രൂപയാണ് കുറഞ്ഞത്. 13,060 രൂപയാണ് ഒരു ഗ്രാം സ്വര്‍ണത്തിന്റെ വില. രണ്ടാഴ്ചയക്കിടെ പവന് ഏകദേശം 7000 രൂപയാണ് കുറഞ്ഞത്.
ആഗോള വിപണിയിലെ എണ്ണവില അടക്കമുള്ള വിഷയങ്ങളാണ് സ്വര്‍ണവിലയെ സ്വാധീനിക്കുന്നത്. ഇന്ത്യ മുഖ്യമായി ആശ്രയിക്കുന്ന ബ്രെന്‍ഡ് ക്രൂഡ് വില കുതിച്ചു ഉയരുകയാണ്. ബാരലിന് 113 ഡോളര്‍ കടന്നിരിക്കുകയാണ്. ഇതിന്റെ ഫലമായി പണപ്പെരുപ്പ നിരക്ക് കൂടുമെന്നതിനാല്‍ വീണ്ടും പലിശനിരക്ക് വര്‍ധിപ്പിക്കാന്‍ യുഎസ് ഫെഡറല്‍ റിസര്‍വ് തയ്യാറായേക്കുമെന്ന റിപ്പോര്‍ട്ടുകളാണ് വിപണിയില്‍ പ്രതിഫലിക്കുന്നത്. പലിശനിരക്ക് കൂട്ടിയാല്‍ സ്വര്‍ണത്തിന്റെ ആകര്‍ഷണം കുറയുമെന്നാണ് വിപണി വിദഗ്ധര്‍ പറയുന്നത്.
ജനുവരി 29ന് രേഖപ്പെടുത്തിയ 1,31,160 രൂപയാണ് സ്വര്‍ണ വിലയിലെ റെക്കോര്‍ഡ്. ഡിസംബര്‍ 23നാണ് പവന് വില ആദ്യമായി ഒരു ലക്ഷം കടന്നത്.
by Midhun HP News | Oct 23, 2026 | Latest News, കേരളം
കൽപ്പറ്റ: ഉരുൾപൊട്ടൽ തകർത്ത വയനാട്ടിലെ ചൂരൽമലയിൽ 34 കോടി രൂപ ചെലവിൽ നിർമിക്കുന്ന പുതിയ പാലത്തിന്റെ പൈലിങ് ജോലികൾ തുടങ്ങി. ദുരന്തത്തിനു പിന്നാലെ സൈന്യം നിർമിച്ച ബെയ്‌ലി പാലത്തിന് സമാന്തരമായാണ് പുതിയ പാലം നിർമിക്കുന്നത്.
267.95 മീറ്റർ നീളത്തിലാണ് പാലം വിഭാവനം ചെയ്തിരിക്കുന്നത്. ഇതിൽ പുഴയ്ക്ക് കുറുകെയുള്ള ഭാഗത്തിന് 107 മീറ്ററും ഇരുകരകളിലുമായി 80 മീറ്റർ വീതവുമാണ് നീളം. പുഴയ്ക്കുള്ളിൽ തൂണുകളില്ലാത്ത രീതിയിൽ ബോസ്ട്രിങ് മാതൃകയിൽ ഗർഡറുകൾ പരസ്പരം ബന്ധിപ്പിച്ചാണ് പാലത്തിന്റെ നിർമാണം. ഉരുൾപൊട്ടൽ സമയത്ത് പുഴയിൽ രേഖപ്പെടുത്തിയ പരമാവധി ജലനിരപ്പിനേക്കാൾ ഉയരത്തിലാണ് പാലം രൂപകൽപ്പന ചെയ്തിരിക്കുന്നത്.
ചൂരൽമല ടൗണിന് സമീപം തുടങ്ങി മുണ്ടക്കൈ, അട്ടമല റോഡുകൾ സംഗമിക്കുന്ന ജങ്ഷനിൽ അവസാനിക്കുന്ന രീതിയിലാണ് പാലം നിർമിക്കുന്നത്. നിർമാണച്ചുമതല ഊരാളുങ്കൽ ലേബർ കോൺട്രാക്ട് സൊസൈറ്റിക്കാണ് (യുഎൽസിസി). നിലവിൽ ചൂരൽമല ടൗണിലെ പൊതുമരാമത്ത് വകുപ്പിന്റെ ഭൂമിയിലാണ് പൈലിങ് നടക്കുന്നത്.
എന്നാൽ, ചൂരൽമല ടൗണിനോട് ചേർന്നുള്ള പ്രദേശത്തെ ഭൂമി ഏറ്റെടുക്കൽ പൂർത്തിയായിട്ടില്ല. ഇതുമായി ബന്ധപ്പെട്ട് വ്യാപാരികൾ അടുത്തിടെ ജില്ലാ കലക്ടറുമായി ചർച്ച നടത്തിയിരുന്നു. പൂർണമായ നഷ്ടപരിഹാരം ലഭിക്കാതെ ഭൂമി വിട്ടുനൽകില്ലെന്നാണ് വ്യാപാരികളുടെ നിലപാട്.
“പാലം നിർമാണത്തിനുള്ള കരാർ നൽകിയിട്ട് രണ്ടുവർഷത്തോളമായി. ഭൂമി ഏറ്റെടുക്കുന്നതുമായി ബന്ധപ്പെട്ട പ്രശ്നങ്ങളാണ് നിർമാണം തുടങ്ങാൻ വൈകിപ്പിച്ചത്. നിലവിൽ പൊതുമരാമത്ത് വകുപ്പിന്റെ ഭൂമിയിൽ നിർമാണം നടക്കുന്നുണ്ട്. ഭൂമി ഏറ്റെടുക്കൽ നടപടികൾ ഉടൻ പൂർത്തിയായാൽ അപ്രോച്ച് റോഡുകൾ ഉൾപ്പെടെ മുഴുവൻ പദ്ധതിയും പൂർത്തിയാക്കാൻ രണ്ടുവർഷം കൂടി വേണ്ടിവരും,” നിർമാണത്തിന്റെ ചുമതലയുള്ള ഊരാളുങ്കൽ ലേബർ കോൺട്രാക്ട് സൊസൈറ്റി അസിസ്റ്റന്റ് എൻജിനീയർ അർച്ചന സി.ആർ. പറഞ്ഞു.അതേസമയം, പാലം നിർമാണസ്ഥലത്തുനിന്ന് അട്ടമലയിലേക്കുള്ള റോഡിന്റെ നവീകരണം ഒൻപത് കോടി രൂപ ചെലവിൽ പൂർത്തിയാക്കിയിട്ടുണ്ട്. പാലവും അപ്രോച്ച് റോഡുകളും യാഥാർഥ്യമാകുന്നതോടെ ഉരുൾപൊട്ടൽ ദുരന്തബാധിത മേഖലകളിലേക്കുള്ള ഗതാഗതസൗകര്യം മെച്ചപ്പെടുമെന്നാണ് പ്രതീക്ഷ.
by Midhun HP News | Oct 23, 2026 | Latest News, കേരളം
തിരുവനന്തപുരം: കേരളത്തിന്റെ പുതിയ ഗവര്‍ണറായി ഓം പ്രകാശ് മാഥുര്‍ ഇന്ന് ചുമതലയേല്‍ക്കും. ഇന്ന് ഉച്ചക്ക്് 12.15ന് ലോക്ഭവന്‍ ഓഡിറ്റോറിയത്തിലാണ് സത്യപ്രതിജ്ഞ.ഹൈക്കോടതി ചീഫ് ജസ്റ്റിസ് സൗമെന്‍ സെന്‍ സത്യവാചകം ചൊല്ലിക്കൊടുക്കും. മുഖ്യമന്ത്രി ഉള്‍പ്പടെയുള്ള മന്ത്രിമാര്‍ പങ്കെടുക്കും. ചടങ്ങിന് സാക്ഷ്യം വഹിക്കാന്‍ സിക്കിം മുഖ്യമന്ത്രി പ്രേംസിങ് തമാങ്ങും എത്തിയിട്ടുണ്ട്.
അതേസമയം, ഇന്നലെ രാജേന്ദ്ര ആര്‍ലേക്കറുടെ യാത്രയയപ്പ് ചടങ്ങുകളില്‍ നിന്ന് വിട്ടുനിന്ന എല്‍ഡിഎഫില്‍ നിന്ന് ആരെങ്കിലും ഇന്ന് സ്ത്യപ്രതിജ്ഞാ ചടങ്ങിന് എത്തുമോയെന്ന് വ്യക്തമല്ല.
ഇന്നലെ വൈകീട്ട് തിരുവനന്തപുരത്ത് എത്തിയ നിയുക്ത ഗവര്‍ണര്‍ക്ക് വിമാനത്താവളത്തില്‍ സര്‍ക്കാര്‍ ഊഷ്മളമായ സ്വീകരണമൊരുക്കി. മുഖ്യമന്ത്രി വിഡി സതീശന്‍ കസവുഷാള്‍ അണിയിച്ച് സ്വീകരിച്ചു. സ്പീക്കര്‍ തിരുവഞ്ചൂര്‍ രാധാകൃഷ്ണന്‍, മന്ത്രിമാരായ രമേശ് ചെന്നിത്തല, സണ്ണി ജോസഫ്, മേയര്‍ വിവി രാജേഷ്, വി മുരളീധരന്‍ എംഎല്‍എ തിരുവനന്തപുരം കലക്ടര്‍ എസ് അഞ്ജു തുടങ്ങിയവരും സ്വീകരിക്കാനെത്തി.
അവിവാഹിതനായ നിയുക്ത ഗവര്‍ണര്‍ക്കൊപ്പം ഏതാനും കുടുംബാംഗങ്ങളും ഇന്നലെ രാജ്ഭവനില്‍ എത്തിയിട്ടുണ്ട്. ലോക്ഭവനില്‍ വെജിറ്റേറിയന്‍ വിഭവങ്ങള്‍ മാത്രം മതിയെന്ന ഗവര്‍ണറുടെ സ്റ്റാഫ് നിര്‍ദേശം നല്‍കിയത് വിവാദമായി, അടുക്കളയില്‍ മാംസാഹാരം പാകം ചെയ്യരുതെന്നും സസ്യാഹാരം മാത്രം മതിയെന്നുമാണ് നിര്‍ദേശം. ഗവര്‍ണറും കുടുംബവും വെജിറ്റേറിയന്‍ ഭക്ഷണം മാത്രം കഴിക്കുന്നതിനാലാണ് ഇത്തരമൊരു നിര്‍ദേശം നല്‍കിയതെന്നാണ് വിവരം. മുന്‍ ഗവര്‍ണര്‍ രാജേന്ദ്ര ആര്‍ലേക്കറും അതിനു മുന്‍പുണ്ടായിരുന്ന ആരിഫ് മുഹമ്മദ് ഖാനും മാംസാഹാരം കഴിക്കുന്നവരായിരുന്നു.
Recent Comments