by Midhun HP News | Oct 22, 2026 | Latest News, ജില്ലാ വാർത്ത
വര്‍ക്കല: അധ്യാപികയും എഴുത്തുകാരിയുമായ രതിമോള്‍ ജിനിയുടെ കഥാസമാഹാരം ‘ശ്രീമയി’ സാഹിത്യകാരന്‍ ഉണ്ണി ആറ്റിങ്ങല്‍ പ്രകാശനം ചെയ്തു. കവിയും നാടകപ്രവര്‍ത്തകനുമായ രാധാകൃഷ്ണന്‍ കുന്നുംപുറം പുസ്തകം ഏറ്റുവാങ്ങി. രതിമോള്‍ ജിനിയുടെ കഥകള്‍ ലളിതവും ജീവിതഗന്ധിയുമാണെന്ന് ഉണ്ണി ആറ്റിങ്ങല്‍ പറഞ്ഞു.
എഴുത്തുകാരന്‍ സുദീപ് തെക്കേപ്പാട്ട് അധ്യക്ഷത വഹിച്ചു. കഥാകൃത്ത് പ്രേം മധുസൂദനന്‍ പുസ്തക പരിചയം നടത്തി. ആറ്റിങ്ങല്‍ വീരളം ദ്വാരക ഓഡിറ്റോറിയത്തില്‍ നടന്ന ചടങ്ങില്‍ എഴുത്തുകാരായ രശ്മി മൂത്തേടത്ത്, ദിലിപ്രസാദ് സുരേന്ദ്രന്‍, ദിനശ്രീ സുചിത്തന്‍, രതിമോള്‍ ജിനി, റിട്ട. അധ്യാപകന്‍ ലോഹിദാസ് എസ്, ശാന്തകുമാരി അമ്മ, അധ്യാപകരായ മണികണ്ഠന്‍ ജി.എസ്, കൃഷ്ണ ടി.എസ്, എം.ജി. മനോജ്, അക്ഷര രാജ് തുടങ്ങിയവര്‍ സംസാരിച്ചു. സാഹിത്യ പബ്ലിക്കേഷന്‍സ് ആണു പ്രസാധകര്‍. വര്‍ക്കല ശിവഗിരി ശ്രീനാരായണ സീനിയര്‍ സെക്കന്‍ഡറി സ്‌കൂളിലെ മലയാളം അധ്യാപികയാണു രതിമോള്‍ ജിനി.
by Midhun HP News | Oct 22, 2026 | Latest News, ജില്ലാ വാർത്ത
തിരുവനന്തപുരം: ഗതാഗത സെക്രട്ടറി സ്ഥാനത്തുനിന്ന് ടിവി അനുപമയെ മാറ്റി. തദ്ദേശ സ്വയംഭരണ വകുപ്പ് സെക്രട്ടറി ആയിട്ടാണ് മാറ്റം. കൂടാതെ ഗതാഗത വകുപ്പിന്റെ (ഏവിയേഷന്‍, മെട്രോ, റെയില്‍വേ) മുഴുവന്‍ സമയ അധിക ചുമതലയും വഹിക്കും. മന്ത്രിയുമായുള്ള അഭിപ്രായവ്യത്യാസത്തില്‍ ഗതാഗത കമ്മീഷണര്‍ നാഗരാജുവിനെ നേരത്തെ മാറ്റിയിരുന്നു. ഇതിന് പിന്നാലെയാണ് സെക്രട്ടറി അനുപമയെയും മാറ്റിയത്.
അനുപമയെ ഗതാഗത സെക്രട്ടറി സ്ഥാനത്ത് നിന്ന് മാറ്റണമെന്ന് എംവിഡി ഉദ്യോഗസ്ഥ സംഘടന മന്ത്രിയോട് ആവശ്യപ്പെട്ടിരുന്നു. കേന്ദ്ര സര്‍വീസില്‍ ഡപ്യൂട്ടേഷന്‍ കഴിഞ്ഞ് തിരികെയെത്തിയ ഡി ബാലമുരളിയാണ് ഗതാഗത വകുപ്പിന്റെ പുതിയ സെക്രട്ടറി. ഭക്ഷ്യ സിവില്‍ സപ്ലൈസ് സ്‌പെഷ്യല്‍ സെക്രട്ടറി സ്ഥാനവും ബാലമുരളിക്കാണ്. കേരള ട്രാന്‍സ്പോര്‍ട്ട് ഡെവലപ്മെന്റ് ഫിനാന്‍സ് കോര്‍പ്പറേഷന്‍ ലിമിറ്റഡിന്റെ ചെയര്‍മാന്‍ & മാനേജിംഗ് ഡയറക്ടര്‍ പദവിയും നല്‍കി.
ആരോഗ്യ-കുടുംബക്ഷേമ വകുപ്പ് പ്രിന്‍സിപ്പല്‍ സെക്രട്ടറിയായ ഡോ. ശര്‍മ്മിള മേരി ജോസഫിനെ ഭക്ഷ്യ-പൊതുവിതരണ, ഉപഭോക്തൃകാര്യ വകുപ്പിന്റെ പ്രിന്‍സിപ്പല്‍ സെക്രട്ടറിയുടെ അധിക ചുമതലകളില്‍ നിന്ന് ഒഴിവാക്കി. ജനറല്‍ അഡ്മിനിസ്‌ട്രേഷന്‍ വകുപ്പാണ് ഐഎഎസ് ഉദ്യോഗസ്ഥരെ മാറ്റി നിയമിച്ച് ഉത്തരവായത്.
by Midhun HP News | Oct 22, 2026 | Latest News, കേരളം
കൊച്ചി: ഹോളിവുഡ് സിനിമകളുടെ ആസ്ഥാനമായ കൊച്ചി മേനകയിലെ ശ്രീധര്‍ തിയേറ്റര്‍ അടച്ചുപൂട്ടി എന്ന പ്രചാരണം തള്ളി തിയേറ്റര്‍ ഉടമ സുരേഷ് ഷേണായി രംഗത്തെത്തി. തിങ്കളാഴ്ച മുതല്‍ ശ്രീധര്‍ അടച്ചു എന്നത് ശരിയാണ്. അതുപക്ഷേ, നവീകരണത്തിനു വേണ്ടിയാണെന്ന് അദ്ദേഹം പറഞ്ഞു. ആധുനിക സാങ്കേതികവിദ്യയും പാര്‍ക്കിങ് സൗകര്യങ്ങളുമായി ശ്രീധര്‍ പുതിയ സ്റ്റൈലില്‍ തിരിച്ചുവരും. നവീകരണത്തിന്റെ അന്തിമരൂപമായിട്ടില്ല. കൂടുതല്‍ സ്‌ക്രീനുകളുള്ള മള്‍ട്ടിപ്ലക്‌സ് സംവിധാനത്തിലായിരിക്കും ശ്രീധര്‍ തിരിച്ചെത്തുക.
1964ല്‍ പ്രവര്‍ത്തനമാരംഭിച്ച ശ്രീധര്‍, കേരളത്തിലെ ആദ്യത്തെ എയര്‍ കണ്ടീഷന്‍ഡ് തിയേറ്റര്‍ ആണ്. ഡോള്‍ബി സൗണ്ട് സിസ്റ്റവും 3D ഡിജിറ്റല്‍ പ്രൊജക്ടറും കേരളത്തില്‍ ആദ്യമായി അവതരിപ്പിച്ചതും ശ്രീധറിലായിരുന്നു. ഹോളിവുഡ് നിര്‍മ്മാണ കമ്പനിയായ കൊളംബിയ പിക്‌ചേഴുമായുള്ള ദീര്‍ഘകാല കരാര്‍ പ്രകാരം ലോകോത്തര ഇംഗ്ലീഷ് സിനിമകള്‍ ഹോളിവുഡിനൊപ്പംതന്നെ ശ്രീധറിലും റിലീസ് ചെയ്തിരുന്നു. ടൈറ്റാനിക്, ജുറാസിക് പാര്‍ക്ക്, ദ ഗോഡ്ഫാദര്‍ തുടങ്ങിയ ചിത്രങ്ങള്‍ റെക്കോര്‍ഡ് കലക്ഷനാണ് നേടിയത്.
മള്‍ട്ടിപ്ലക്‌സുകള്‍ സജീവമായതോടെ ശ്രീധറിന്റെ പൊലിമ മങ്ങി. പാര്‍ക്കിങ് സൗകര്യം ഇല്ലാത്തതും തിയേറ്ററില്‍ ആളുകുറഞ്ഞതും തിരിച്ചടിയായി. എന്നിട്ടും ഹിന്ദി, ഇംഗ്ലീഷ്, തമിഴ് ചിത്രങ്ങളായി തിയേറ്റര്‍ നിലനിര്‍ത്തിയെങ്കിലും നവീകരണം എന്ന തീരുമാനത്തിലേക്ക് ഉടമകള്‍ എത്തുകയായിരുന്നു. എംജി റോഡിലെ പത്മ, ഷേണായീസ് തിയേറ്ററുകളുടെ ഉടമകളായ ഷേണായി കുടുംബത്തിന്റെതാണ് ശ്രീധര്‍. ലക്ഷ്മണന്‍ ഷേണായിയുടെ മകന്‍ ശ്രീധര്‍ ഷേണായിയുടെ ഓര്‍മ്മയ്ക്കായാണ് ശ്രീധര്‍ എന്ന പേര് നല്‍കിയത്.
by Midhun HP News | Oct 22, 2026 | Latest News, കേരളം
ബൈക്ക് കനാലിൽ മറിഞ്ഞ് യുവാവിന് ദാരുണ അന്ത്യം.കൊല്ലം പത്തനാപുരം ചാച്ചിപുന്ന സ്വദേശി അജിൻ (24) ആണ് മരിച്ചത്. ബൈക്കിൽ യാത്ര ചെയ്തചെയ്യവെ റോഡിലെ ചപ്പാത്തിൽ തട്ടി കനാലിലേക്ക് മറിഞ്ഞാണ് അപകടം ഉണ്ടായത്.
|
by Midhun HP News | Oct 22, 2026 | Latest News, കേരളം
കോഴിക്കോട്: ഖത്തര്‍ കെഎംസിസി ഓഫീസില്‍ നിന്ന് 8 കോടി രൂപ കവര്‍ന്ന സംഭവത്തില്‍ വന്‍ വഴിത്തിരിവ്. കെഎംസിസിയിലെ അംഗങ്ങളാണ് മോഷണത്തിന് പിന്നിലെന്നും ജോലിക്കെന്ന് പറഞ്ഞാണ് തന്നെ വിദേശത്തേക്ക് കൊണ്ടുപോയതെന്നാണ് കേസില്‍ കീഴടങ്ങിയ ബിജെപി നേതാവ് ബാലകൃഷ്ണന്‍ പറയുന്നത്. ഖത്തറിലെ കെഎംസിസി ഓഫീസില്‍ റൂം ബോയിയെ കെട്ടിയിട്ട് എട്ട് കോടി കവര്‍ന്നെന്ന കേസില്‍ കോഴിക്കോട് പൊലീസില്‍ ഇന്നലെയാണ് ഇയാള്‍ കീഴടങ്ങിയത്. കഴിഞ്ഞ തദ്ദേശ തെരഞ്ഞെടുപ്പില്‍ ബിജെപി സ്ഥാനാര്‍ഥിയായിരുന്നു ബാലകൃഷ്ണന്‍.
വിദേശത്തേക്ക് പോകുമ്പോള്‍ മോഷണത്തെക്കുറിച്ച് തനിക്ക് അറിയില്ലായിരുന്നു. കെഎംസിസി അംഗങ്ങള്‍ തന്നെ ജോലി വാഗ്ദാനം ചെയ്താണ് വിദേശത്തേക്ക് കൊണ്ടുപോയതെന്നാണ് ബാലകൃഷ്ണന്‍ പറയുന്നത്. ബാലകൃഷ്ണന്റേതായി പുറത്തു വന്ന വിഡിയോയില്‍ താനും മറ്റ് മൂന്ന് മത്സ്യത്തൊഴിലാളികളും ഖത്തറില്‍ വര്‍ക്ക് വിസയില്‍ എത്തിയതായാണ് പറയുന്നത്. വെല്‍ഡറായി ജോലി ചെയ്തിരുന്ന തന്നെ, ഖത്തറില്‍ ജോലി വാഗ്ദാനം ചെയ്തുകൊണ്ട് ഷാജി എന്നൊരാള്‍ ബന്ധപ്പെട്ടുവെന്ന് പറയുന്നു. അവിടെ എത്തിയപ്പോള്‍ ഗ്യാസ് കട്ടര്‍ ഉപയോഗിച്ച് സ്‌ട്രോങ് റൂമും ലോക്കര്‍ തുറക്കാന്‍ തന്നോട് ആവശ്യപ്പെട്ടു, എന്തിനുവേണ്ടിയാണ് തങ്ങളെ അവിടെ എത്തിച്ചതെന്ന് തനിക്ക് അറിയില്ലായിരുന്നുവെന്നും ബാലകൃഷ്ണന്‍ പറയുന്നു.
സെപ്റ്റംബര്‍ 18-നാണ് ഖത്തര്‍ കെഎംസിസി ഓഫീസില്‍ വന്‍ കവര്‍ച്ച നടന്നത്. ഒരു സംഘം ആളുകള്‍ റൂം ബോയിയെ കെട്ടിയിട്ട ശേഷം ഗ്യാസ് കട്ടര്‍ ഉപയോഗിച്ച് സ്‌ട്രോംഗ് റൂം തകര്‍ക്കുകയും പണവുമായി കടന്നുകളഞ്ഞുവെന്നാണ് കേസ്. മോഷണം നടത്തുന്നതിനായി മാത്രം നാല് പേരെ കേരളത്തില്‍ നിന്ന് ഖത്തറിലേക്ക് കൊണ്ടുവന്നതായും, മറ്റ് രണ്ട് പേര് ഇവര്‍ക്ക് രാജ്യത്ത് താമസിക്കാനുള്ള സഹായം നല്‍കിയതായുമാണ് പൊലീസ് കണ്ടെത്തല്‍.
സംഭവത്തിന് ശേഷം ബാലകൃഷ്ണന്‍ കേരളത്തിലേക്ക് മടങ്ങിയെന്നും പൊലീസ് പറഞ്ഞു. കേസില്‍ ബോംബെ ഷാജി, റാഷി, സാലിഹ്, ഹസന്‍, നിസാര്‍ ഉള്‍പ്പെടെയുള്ള അഞ്ച് പ്രതികള്‍ ഒളിവിലാണ്. എന്നിവരാണ് കേസിലെ മറ്റ് പ്രതികള്‍. ബാലകൃഷ്ണനെ പൊലീസ് ചോദ്യം ചെയ്തുവരികയാണെന്നും, മറ്റ് പ്രതികള്‍ക്കായി തിരച്ചില്‍ തുടരുകയാണെന്നും ഉദ്യോഗസ്ഥര്‍ അറിയിച്ചു. പ്രതികളില്‍ ചിലര്‍ നിലവില്‍ വിദേശത്താണെന്നും അവര്‍ വ്യക്തമാക്കി.
by Midhun HP News | Oct 22, 2026 | Latest News, കേരളം
തിരുവനന്തപുരം: എല്‍ഡിഎഫ് സര്‍ക്കാരിന്റെ വാര്‍ഷികാഘോഷങ്ങള്‍ക്കും പരസ്യപ്രചാരണങ്ങള്‍ക്കുമായി കിഫ്ബി വഴി കോടിക്കണക്കിന് രൂപ ചെലവഴിച്ചതായി ഓഡിറ്റ് റിപ്പോര്‍ട്ടുകള്‍ വ്യക്തമാക്കുന്നു. കിഫ്ബി ഓഡിറ്റ് അക്കൗണ്ടുകളും സുധാ പിള്ള കമ്മിറ്റി റിപ്പോര്‍ട്ടും അടിസ്ഥാനമാക്കി പുറത്തുവന്ന വിവരങ്ങള്‍ പ്രകാരം കഴിഞ്ഞ വര്‍ഷങ്ങളില്‍ വലിയ തുകകള്‍ വകമാറ്റിയെന്നാണ് വിവരം. 2016 മുതല്‍ 2026വരെയുള്ള കിഫ്ബിയുടെ വാര്‍ഷിക റിപ്പോര്‍ട്ടുകള്‍ പ്രകാരം പരസ്യങ്ങള്‍ക്കും പ്രചാര പരിപാടികള്‍ക്കുമായി ഏകദേശം 475 കോടി രൂപ ചെലവഴിച്ചതായാണ് കണക്ക്.
ഇതിന്റെ പകുതിയോളം തുകയായ 216 കോടി രൂപ പിണറായി സര്‍ക്കാരിന്റെ വാര്‍ഷിക ആഘോഷമായ ‘എന്റെ കേരളം’ പരിപാടിക്കായി മൂന്ന് വര്‍ഷം കൊണ്ട് ചെലവഴിച്ചു. SC/ST വികസന പദ്ധതികള്‍ക്കായി കിഫ്ബി ഇതുവരെ അനുവദിച്ച 87 കോടി രൂപയുടെ ഇരട്ടിയിലധികമാണിത്. 2022-203ല്‍ 52.03 കോടി രൂപയും 2023-24ല്‍ 67.45 കോടി രൂപയും 2025-26ല്‍ 96.44 കോടി രൂപയും ‘എന്റെ കേരളം പരിപാടിക്കായി ചെലവഴിച്ചു. അടിസ്ഥാന സൗകര്യ വികസനത്തിന് മാത്രമായി ഉപയോഗിക്കേണ്ട കിഫ്ബി ഫണ്ട്, സര്‍ക്കാര്‍ ഉത്തരവുകളുടെ അടിസ്ഥാനത്തില്‍ വകമാറ്റിയെന്നാണ് ഓഡിറ്റ് റിപ്പോര്‍ട്ടില്‍ പറയുന്നത്.
കേന്ദ്രസര്‍ക്കാര്‍ ഏര്‍പ്പെടുത്തിയ വായ്പാ നിയന്ത്രണങ്ങള്‍ നിലനില്‍ക്കേയാണ്, നൂറു കണക്കിന് കോടി വകമാറ്റിയത്. 2023-24ല്‍ കേരളീയം ഉത്സവത്തിന്റെ അടിസ്ഥാന സൗകര്യങ്ങള്‍ക്കായി കിഫ്ബി 12.95 കോടി രൂപ ചെലവഴിച്ചു. 2018-19വരെ പ്രതിവര്‍ഷം 2 കോടി രൂപയില്‍ താഴെ മാത്രമായിരുന്ന കിഫ്ബിയുടെ പ്രചാരണ ചെലവുകള്‍ തെരഞ്ഞെടുപ്പ് വര്‍ഷങ്ങളില്‍ കുത്തനെ ഉയര്‍ന്നു. 2019-20ല്‍ ഇത് 25.33 കോടി രൂപയായി വര്‍ദ്ധിച്ചു.
അന്ന് മുഖ്യമന്ത്രിയായിരുന്ന പിണറായി വിജയന്‍ ഉദ്ഘാടനം ചെയ്ത ‘കേരള നിര്‍മ്മിതി’ പ്രദര്‍ശനത്തിനായി ചെലവഴിച്ചത് 13.61 കോടി രൂപയാണ്. കൊവിഡ് കാരണം നിര്‍മ്മിതി പ്രദര്‍ശനങ്ങള്‍ നിര്‍ത്തിവെച്ചപ്പോള്‍, മണ്ഡലാടിസ്ഥാനത്തില്‍ കിഫ്ബി നടത്തിയ വികസനപ്രവര്‍ത്തനങ്ങള്‍ 14 ടിവി ചാനലുകളിലും റേഡിയോയിലും പ്രചരിപ്പിക്കുന്നതിനായി വന്‍ തുക ചെലവഴിച്ചു. യുഡിഎഫ് സര്‍ക്കാര്‍ നിയോഗിച്ച സുധാ പിള്ള കമ്മിറ്റിയുടെ റിപ്പോര്‍ട്ട് പ്രകാരം, ഏറ്റവും നിയമസഭാ തെരഞ്ഞെടുപ്പിന് മുന്നോടിയായുള്ള 2025-26 വര്‍ഷത്തില്‍ മാത്രം പരസ്യ-പ്രചാരണങ്ങള്‍ക്കായി 203.72 കോടി രൂപയാണ് ചെലവഴിച്ചത്.
തുടര്‍ച്ചയായി മൂന്ന് വര്‍ഷമാണ് പരസ്യച്ചെലവുകളുടെ കാര്യത്തില്‍ കിഫ്ബിയുടെ അക്കൗണ്ടുകള്‍ ഓഡിറ്റര്‍ ചോദ്യം ചെയ്തത്. എന്നാല്‍, സര്‍ക്കാര്‍ ഉത്തരവുകളുടെ അടിസ്ഥാനത്തിലാണ് പരിപാടികളുടെ ചെലവുകള്‍ വഹിച്ചതെന്നും തങ്ങളുടെ പ്രചാരണ ചെലവുകള്‍ ജനറല്‍ ബോഡി അംഗീകരിച്ച ബജറ്റിനുള്ളില്‍ നിന്നാണെന്നും കിഫ്ബി തങ്ങളുടെ റിപ്പോര്‍ട്ടുകളില്‍ വ്യക്തമാക്കി. ഈ ചെലവുകള്‍ക്കെതിരെ സാമ്പത്തിക വിദഗ്ദന്‍ കെ പി കണ്ണന്‍ കടുത്ത വിമര്‍ശനമാണ് ഉന്നയിച്ചത്. കടമെടുത്ത കാശുകൊണ്ടുള്ള ഇത്തരം ധൂര്‍ത്ത് അനാവശ്യവും തികച്ചും ഞെട്ടിക്കുന്നതുമാണെന്ന് അദ്ദേഹം അഭിപ്രായപ്പെട്ടു. ഇതില്‍ സര്‍ക്കാര്‍ നടപടി എടുക്കണമെന്നും അദ്ദേഹം ആവശ്യപ്പെട്ടു.
Recent Comments