by Midhun HP News | Mar 19, 2026 | Latest News, കേരളം
കൊച്ചി: എസ്എന്ഡിപി യോഗം ജനറല് സെക്രട്ടറി സ്ഥാനത്തു നിന്നും വെള്ളാപ്പള്ളി നടേശനെ അയോഗ്യനാക്കിയ ഉത്തരവ് തുടരും. വിധി സ്റ്റേ ചെയ്യണമെന്ന വെള്ളാപ്പള്ളി നടേശന്റെ ആവശ്യം ഹൈക്കോടതി അംഗീകരിച്ചില്ല. അയോഗ്യനാക്കിയ ഹൈക്കോടതി സിംഗിള് ബെഞ്ച് വിധിക്കെതിരെയാണ് വെള്ളാപ്പള്ളി ഡിവിഷന് ബെഞ്ചില് അപ്പീല് നല്കിയത്. സിംഗിള് ബെഞ്ച് വിധി അനുസരിച്ചുള്ള സ്ഥിതി തുടരാനും ഡിവിഷന് ബെഞ്ച് നിര്ദേശം നല്കിയിട്ടുണ്ട്.
വെള്ളാപ്പള്ളി നടേശനും മകനും വൈസ് പ്രസിഡന്റുമായ തുഷാര് വെള്ളാപ്പള്ളിയും അടക്കമുള്ള ഡയറക്ടര്ബോര്ഡ് അംഗങ്ങളെയാണ് ഹൈക്കോടതി സിംഗിള് ബെഞ്ച് അയോഗ്യരാക്കിയത്. ഇതിനെതിരെയാണ് വെള്ളാപ്പള്ളി അടക്കമുള്ളവര് ഡിവിഷന് ബെഞ്ചില് അപ്പീല് നല്കിയത്. അടിയന്തരമായി അപ്പീല് പരിഗണിക്കണമെന്ന ആവശ്യം ഡിവിഷന് ബെഞ്ച് കഴിഞ്ഞദിവസം തള്ളിയിരുന്നു. അടിയന്തിരമായി പരിഗണിക്കേണ്ട ആവശ്യമില്ലെന്നും ചീഫ് ജസ്റ്റിസ് അധ്യക്ഷനായ ബെഞ്ച് ചൂണ്ടിക്കാട്ടി.
തുടര്ന്ന് ഇന്ന് വീണ്ടും ഡിവിഷന് ബെഞ്ച് അപ്പീല് പരിഗണിച്ചപ്പോള്, സിംഗിള് ബെഞ്ച് വിധി സ്റ്റേ ചെയ്യണമെന്ന് വെള്ളാപ്പള്ളിയുടെ അഭിഭാഷകര് ആവശ്യപ്പെട്ടു. എന്നാല് ഈ ആവശ്യം കോടതി നിരാകരിച്ചു. വെള്ളാപ്പള്ളി നടേശനെയും കൂട്ടരെയും നീക്കിക്കൊണ്ടുള്ള വിധി എന്താണോ ആ സ്ഥിതി തുടരാനും ഡിവിഷന് ബെഞ്ച് നിര്ദേശിച്ചു. വെള്ളാപ്പള്ളി അടക്കമുള്ള ഡയറക്ടര് ബോര്ഡ് അംഗങ്ങളെ പുറത്താക്കിയ ഹൈക്കോടതി സിംഗിള് ബെഞ്ച്, എസ്എന്ഡിപിയുടെ താല്ക്കാലിക ഭരണത്തിനായി ഡയറക്ടര് ബോര്ഡ് രൂപീകരിക്കാന് സര്ക്കാരിന് നിര്ദേശം നല്കുകയും ചെയ്തിരുന്നു.
താല്ക്കാലിക ഡയറക്ടര്ബോര്ഡിലേക്ക് സര്ക്കാര് നോമിനികള് ആയിട്ടില്ലെന്ന് സര്ക്കാര് അഭിഭാഷകന് കോടതിയെ അറിയിച്ചു. തുടര്ന്ന് ഡയറക്ടര് ബോര്ഡിലേക്കുള്ള സര്ക്കാര് നോമിനികളുടെ പട്ടിക തിങ്കളാഴ്ച സമര്പ്പിക്കാന് ഡിവിഷന് ബെഞ്ച് നിര്ദേശം നല്കി. തിങ്കളാഴ്ച കേസ് വീണ്ടും ഹൈക്കോടതി പരിഗണിക്കും. വെള്ളാപ്പള്ളി നടേശന് ജനറല് സെക്രട്ടറിയായി തുടരാന് അര്ഹതയില്ലെന്നാണ് ഹൈക്കോടതി സിംഗിൾ ബെഞ്ച് വിധിച്ചത്.
അന്തരിച്ച പ്രൊഫ. എം കെ സാനു അടക്കമുള്ളവര് സമര്പ്പിച്ച ഹര്ജിയിലാണ് വെള്ളാപ്പള്ളി നടേശനെ ജനറൽ സെക്രട്ടറി സ്ഥാനത്തു നിന്നും നീക്കിയത്. കമ്പനി നിയമപ്രകാരമുള്ള നടപടികൾ പാലിച്ചിട്ടില്ലെന്ന കണ്ടെത്തലിന്റെ അടിസ്ഥാനത്തിലാണ് കോടതി വിധി. എസ്എന്ഡിപി യോഗം വൈസ് പ്രസിഡന്റ് തുഷാര് വെള്ളാപ്പള്ളി, പ്രസിഡന്റ് എംഎന് സോമന്, ദേവസ്വം സെക്രട്ടറി അരയക്കണ്ടി സന്തോഷ് എന്നിവര്ക്കും സ്ഥാനത്ത് തുടരാന് അര്ഹതയില്ലെന്ന് കോടതി വ്യക്തമാക്കിയിരുന്നു.
by Midhun HP News | Mar 19, 2026 | Latest News, ദേശീയ വാർത്ത
മുംബൈ: എച്ച്ഡിഎഫ്സി ബാങ്കിന്റെ പാര്ട്ട് ടൈം ചെയര്മാനും സ്വതന്ത്ര ഡയറക്ടറുമായ അതാനു ചക്രവര്ത്തി രാജിവച്ചു. ബാങ്കിനുള്ളിലെ ചില രീതികളും പ്രവര്ത്തനങ്ങളും തന്റെ വ്യക്തിപരമായ ധാര്മിക മൂല്യങ്ങള്ക്ക് നിരക്കുന്നതല്ലെന്ന് ചൂണ്ടിക്കാട്ടിയാണ് രാജി. ബാങ്കിന്റെ ഗവേണന്സ്, നോമിനേഷന് ആന്ഡ് റമ്യൂണറേഷന് കമ്മിറ്റി ചെയര്മാന് നല്കിയ കത്തിലാണ് അദ്ദേഹം രാജി തീരുമാനം അറിയിച്ചത്.
‘കഴിഞ്ഞ രണ്ട് വര്ഷമായി ബാങ്കില് ഞാന് നിരീക്ഷിച്ച ചില സംഭവങ്ങളും രീതികളും എന്റെ വ്യക്തിപരമായ മൂല്യങ്ങളോടും ധാര്മ്മികതയോടും പൊരുത്തപ്പെടുന്നില്ല. ഇതാണ് എന്റെ തീരുമാനത്തിന്റെ അടിസ്ഥാനം. എന്റെ രാജിക്ക് മറ്റ് കാര്യമായ കാരണങ്ങളൊന്നുമില്ലെന്നും ഞാന് വ്യക്തമാക്കുന്നു’- അതാനു ചക്രവര്ത്തി കത്തില് പറയുന്നു.
രാജി വാര്ത്ത പുറത്തുവന്നതിന് പിന്നാലെ എച്ച്ഡിഎഫ്സി ബാങ്കിന്റെ ഓഹരികളില് വന് ഇടിവ് രേഖപ്പെടുത്തി. ഇന്ത്യന് ഓഹരി വിപണിയില് 4.73 ശതമാനത്തിന്റെ ഇടിവാണ് രേഖപ്പെടുത്തിയത്. അതാനു ചക്രവര്ത്തിയുടെ രാജിയെ തുടര്ന്ന് എച്ച്ഡിഎഫ്സി ലിമിറ്റഡിന്റെ മുന് വൈസ് ചെയര്മാനായിരുന്ന കെകി മിസ്ത്രിയെ മൂന്ന് മാസത്തേക്ക് ബാങ്കിന്റെ ഇടക്കാല പാര്ട്ട്-ടൈം ചെയര്മാനായി നിയമിക്കാനുള്ള തീരുമാനത്തിന് റിസര്വ് ബാങ്ക് ഓഫ് ഇന്ത്യ അംഗീകാരം നല്കി. മാര്ച്ച് 19 മുതല് ഈ നിയമനം പ്രാബല്യത്തില് വന്നു.
2021 മെയ് മാസത്തിലാണ് അതാനു ചക്രവര്ത്തി എച്ച്ഡിഎഫ്സി ബാങ്കിന്റെ ബോര്ഡിന്റെ ഭാഗമായത്. ‘ബോര്ഡില് ഞാന് പ്രവര്ത്തിക്കുന്ന സമയത്താണ് എച്ച്ഡിഎഫ്സി ലിമിറ്റഡുമായി ബാങ്ക് ലയിപ്പിച്ചതുപോലുള്ള സുപ്രധാന സംഭവങ്ങള് ഉണ്ടായത്. അത് ബാങ്കിന് കീഴില് ഒരു കൂട്ടായ്മ സൃഷ്ടിച്ചു. ഈ തന്ത്രപരമായ സംരംഭം എച്ച്ഡിഎഫ്സി ബാങ്കിനെ രാജ്യത്തെ രണ്ടാമത്തെ വലിയ ബാങ്കാക്കി മാറ്റി. എന്നിരുന്നാലും, ലയനത്തിന്റെ ഗുണങ്ങള് ഇതുവരെ പൂര്ണ്ണമായി ഫലവത്തായില്ല.’- അദ്ദേഹം കത്തില് പറയുന്നു.
by Midhun HP News | Mar 19, 2026 | Latest News, ദേശീയ വാർത്ത
ഖത്തറിന് പുറമെ യു.എ.ഇ, സൗദി അറേബ്യ എന്നിവിടങ്ങളിലെ ഊർജ്ജ കേന്ദ്രങ്ങളെയും ഇറാൻ ലക്ഷ്യമിട്ടു. അബുദാബിയിലെ ഹബ്ഷാൻ ഗ്യാസ് പ്ലാന്റിന് നേരെ വന്ന മിസൈലുകൾ പ്രതിരോധ സംവിധാനങ്ങൾ തകർത്തു. സുരക്ഷാ മുൻകരുതലിന്റെ ഭാഗമായി അബുദാബിയിലെ പ്ലാന്റുകളുടെ പ്രവർത്തനം താൽക്കാലികമായി നിർത്തിവെച്ചിരിക്കുകയാണ്. സൗദി അറേബ്യയുടെ കിഴക്കൻ മേഖലയിൽ എത്തിയ ഡ്രോണുകളും മിസൈലുകളും റിയാദിന് സമീപം തകർത്തു വീഴ്ത്തി. അന്താരാഷ്ട്ര നിയമങ്ങളുടെ നഗ്നമായ ലംഘനമാണ് ഇറാൻ നടത്തുന്നതെന്ന് യു.എ.ഇ വിദേശകാര്യ മന്ത്രാലയം കുറ്റപ്പെടുത്തി.
യുദ്ധം ശക്തമായതോടെ ആഗോള എണ്ണ വിപണിയിൽ വില കുതിച്ചുയരുകയാണ്. ഹോർമുസ് കടലിടുക്കിലൂടെയുള്ള ഗതാഗതം തടസ്സപ്പെട്ടത് ആശങ്ക വർധിപ്പിക്കുന്നു. സംഘർഷ പശ്ചാത്തലത്തിൽ പ്രമുഖ വിമാനക്കമ്പനിയായ കാത്തി പസഫിക് ദുബൈയിലേക്കുള്ള സർവീസുകൾ ഏപ്രിൽ 30 വരെ റദ്ദാക്കി. മേഖലയിലെ സുരക്ഷാ സാഹചര്യം ചർച്ച ചെയ്യാൻ യു.എ.ഇ വിദേശകാര്യ മന്ത്രി ഷെയ്ഖ് അബ്ദുല്ല ബിൻ സായിദ് അൽ നഹ്യാൻ ഇന്ത്യൻ വിദേശകാര്യ മന്ത്രി ഡോ. എസ്. ജയ്ശങ്കറുമായി ഫോണിൽ സംസാരിച്ചു. വരും ദിവസങ്ങളിൽ കൂടുതൽ ആക്രമണങ്ങൾ ഉണ്ടാകുമെന്ന ഇറാന്റെ ഭീഷണി ഗൾഫ് രാജ്യങ്ങളെ കടുത്ത ജാഗ്രതയിലാക്കിയിരിക്കുകയാണ്.
by Midhun HP News | Mar 19, 2026 | Latest News, കേരളം
കൊല്ലം: പത്തനാപുരത്ത് വനത്തില് കാട്ടാന ആക്രമണത്തില് നിന്ന് അത്ഭുതകരമായി രക്ഷപ്പെട്ട് ദമ്പതികള്. വന വിഭവശേഖരത്തിന് കാട്ടില് പോയ ദമ്പതികള് കാട്ടാനക്കൂട്ടത്തിന് മുന്നില് അകപ്പെടുകയായിരുന്നു. ഉടന് തന്നെ മരമുകളില് അഭയം തേടിയ ദമ്പതികളെ മണിക്കൂറുകള്ക്ക് ശേഷം വനപാലക സംഘം എത്തിയാണ് രക്ഷപ്പെടുത്തിയത്.
മുള്ളുമല വാവരുപന ഭാഗത്ത് കഴിഞ്ഞ ദിവസം രാവിലെ ആയിരുന്നു സംഭവം. പിറവന്തൂര് മുള്ളുമല ഉന്നതിയിലെ ദമ്പതികളായ കരുണാകരന്, റംസ എന്നിവരാണ് കാട്ടാന ആക്രമണത്തില് നിന്ന് രക്ഷപ്പെട്ടത്. വിറക് ശേഖരണത്തിന് പോകും വഴി കാട്ടാനക്കൂട്ടത്തിനു മുന്നിലാണ് ഇവര് അകപ്പെട്ടത്. കാട്ടാനക്കൂട്ടത്തെ കണ്ട് ഭയന്ന ദമ്പതികള് വനത്തിനുള്ളിലെ തേക്ക് മരത്തില് കയറി മണിക്കൂറുകളോളം ഇരുന്നു. കൈയിലുണ്ടായിരുന്ന മൊബൈല് ഫോണ് ഉപയോഗിച്ച് കരുണാകരന് മണ്ണാറപ്പാറ റേഞ്ച് ഓഫീസില് വിവരം അറിയിക്കുകയായിരുന്നു.
ഈ സമയമെല്ലാം കാട്ടാനക്കൂട്ടം ഇവര് കയറിയ മരചുവട്ടില് നിലയുറപ്പിച്ചു. വിവരമറിഞ്ഞ് നാട്ടുകാര് എത്തിയെങ്കിലും കാട്ടാനകള് പിന്മാറിയില്ല. മണിക്കൂറുകള്ക്ക് ശേഷം സ്ഥലത്തെത്തിയ വനപാലക സംഘം കാട്ടാനകളെ വിരട്ടിയോടിച്ച ശേഷം ദമ്പതികളെ രക്ഷപ്പെടുത്തുകയായിരുന്നു.
by Midhun HP News | Mar 19, 2026 | Latest News, കേരളം
കണ്ണൂർ: ഏറെ നാടകീയമായ പ്രസ്താവനകൾക്കും പ്രതികരങ്ങൾക്കും ഒടുവിൽ സമ്മർദത്തിന് വഴങ്ങി ഹൈക്കമാൻഡ്. നിയമസഭാ തെരഞ്ഞെടുപ്പിൽ കെ. സുധാകരൻ മത്സരിക്കും. എം.പിമാർ മത്സരിക്കേണ്ടതില്ല എന്ന എ.ഐ.സി.സി തീരുമാനത്തിൽ സുധാകരന് മാത്രം ഇളവ് നൽകിയാണ് മത്സരിക്കാൻ അനുമതി നൽകിയത്.
“തെരഞ്ഞെടുപ്പിൽ എന്തുവന്നാലും മത്സരിക്കുമെന്ന നിലപാടിലായിരുന്നു സുധാകരൻ. അദ്ദേഹം പുതിയ പാർട്ടിയുണ്ടാക്കുമെന്നും സ്വതന്ത്രനായി മത്സരിക്കുമെന്ന അഭ്യൂഹങ്ങളും ഉടലെടുത്തിരുന്നു. കെ.സി. വേണുഗോപാലിനോട് ‘നിങ്ങൾക്ക് നിങ്ങളുടെ വഴി, എനിക്ക് എൻ്റെ വഴി’ എന്നും ഗുഡ് ബൈയും പറഞ്ഞത് ഈ അഭ്യൂഹങ്ങളിൽ കൂടുതൽ ചർച്ചകളുണ്ടാക്കി.
സംസ്ഥാന വ്യാപകമായി പ്രവർത്തകുടെയും നേതാക്കളുടെയും പിന്തുണ തനിക്കുണ്ടെന്നും സുധാകരൻ അവകാശപ്പെട്ടിരുന്നു. സ്ഥാനാർഥി നിർണയവുമായി ബന്ധപ്പെട്ട് കഴിഞ്ഞ കുറച്ചുദിവസങ്ങളിലായി സുധാകരൻ കടുത്ത അതൃപ്തിയിലായിരുന്നു. മത്സരിക്കാനുള്ള തീരുമാനത്തിൽ ഉറച്ച സുധാകരൻ ഒരു അനുനയത്തിനും വഴങ്ങിയിരുന്നില്ല.
എന്നാൽ എംപിമാർ മത്സരിക്കേണ്ടെന്ന തീരുമാമനാണ് മല്ലികാർജുൻ ഖാർഗെ കൈക്കൊണ്ടത്. ഇതോടെ കെ സുധാകരന് പുറമെ അടൂർ പ്രകാശിനും സീറ്റുണ്ടാകില്ലെന്ന് ഉറപ്പാവുകയായിരുന്നു.പിന്നാലെയാണ് സുധാകരൻ പാർട്ടി വിടുമെന്ന് ഉറപ്പായത്. ഇത്തരമൊരു സാഹചര്യത്തിലാണ് കോൺഗ്രസിന് സുധാകരന് മുന്നിൽ മുട്ടുമടക്കേണ്ടി വന്നത്.
by Midhun HP News | Mar 19, 2026 | Latest News, കേരളം
കൊച്ചി: പെരുമ്പാവൂരിലെ ട്വൻറി 20 സ്ഥാനാർഥി നടി ലക്ഷ്മിപ്രിയയ്ക്ക് വോട്ടില്ല. തൃപ്പൂണിത്തുറ കരിങ്ങാച്ചിറയിൽ ആണ് നിലവിൽ ലക്ഷ്മിപ്രിയയുടെ താമസം. ഇവിടുത്തെ വോട്ടർപട്ടികയിൽ ലക്ഷ്മി പ്രിയയുടെ പേരില്ല. തൃക്കാക്കരിയിലെ ഫ്ലാറ്റുണ്ടായിരുന്ന പ്രദേശത്തും പേര് വിവരങ്ങൾ ലിസ്റ്റിലില്ല എന്നാണ് വിവരം. തുടർന്ന് ഇന്ന് നടത്താനിരുന്ന ലക്ഷ്മിപ്രിയയുടെ റോഡ് ഷോ റദ്ദാക്കി. ആരോഗ്യപ്രശ്നങ്ങളുള്ളതിനാലാണ് റോഡ് ഷോ റദ്ദാക്കിയതെന്നാണ് വിശദീകരണം. ഇന്നലെയാണ് സാബു എം ജേക്കബ് ലക്ഷ്മിപ്രിയയുടെ സ്ഥാനാർത്ഥിത്വം പ്രഖ്യാപിച്ചത്.
സിനിമാ-സീരിയല് താരങ്ങള്ക്ക് കൂട്ടത്തോടെ സീറ്റ് നല്കി ബിജെപി ഘടകകക്ഷിയായ ട്വന്റി 20 സ്ഥാനാര്ത്ഥികളെ പ്രഖ്യാപിച്ചത്. തൃപ്പൂണിത്തുറയില് സിനിമാ താരം അഞ്ജലി നായരാണ് സ്ഥാനാര്ഥി. കൂടുതല് സെലിബ്രിറ്റികള് പാര്ട്ടിയുടെ ഭാഗമായി ഇനിയും മല്സരരംഗത്തുണ്ടാകുമെന്ന് ട്വന്റി ട്വന്റി നേതൃത്വം അവകാശപ്പെട്ടു. തൃപ്പൂണിത്തുറയില് അഞ്ജലി നായര്, പെരുമ്പാവൂരില് ലക്ഷ്മി പ്രിയ, ഏറ്റുമാനൂരില് വീണ നായര്, അങ്കമാലിയില് പ്രോമി കുര്യാക്കോസ്. അഖില് മാരാര്ക്ക് പിന്നാലെയാണ് കൂടുതല് സിനിമ സീരിയല് സോഷ്യല് മീഡിയ താരങ്ങളെ ട്വന്റി ട്വന്റി മത്സരത്തിനിറക്കിയത്.
Recent Comments