‘മെയ് മാസത്തിലെ മാജിക്കുകളില്‍ ഒന്നു കൂടി’; കറുപ്പിനെക്കുറിച്ച് തൃഷ; പോസ്റ്റില്‍ ‘വിജയ്’യെ കണ്ടെത്തി ആരാധകര്‍

by Midhun HP News | May 20, 2026 | Latest News, കേരളം

വര്‍ഷങ്ങള്‍ക്ക് ശേഷം സൂര്യ-തൃഷ ജോഡി ഒരുമിച്ച ചിത്രമാണ് കറുപ്പ്. ചിത്രം ബോക്‌സ് ഓഫീസില്‍ വന്‍ വിജയമായി മാറിയിരിക്കുകയാണ്. കറുപ്പ് നിറഞ്ഞ സദസില്‍ പ്രദര്‍ശനം തുടരുമ്പോള്‍ തൃഷ പങ്കുവച്ച പോസ്റ്റും ചര്‍ച്ചയാവുകയാണ്. കറുപ്പിന്റെ വിജയം തൃഷയ്ക്ക് ഇരട്ടി മധുരം നല്‍കുന്നതാണ്. കാരണം തൃഷയുടെ ജന്മദിനവും മെയ് മാസത്തിലായിരുന്നു.

പിറന്നാളും കറുപ്പിന്റെ വിജയവും മാത്രമല്ല തൃഷയുടെ 2026 ലെ മെയ് മാസത്തില്‍ തൃഷയ്ക്ക് ഓര്‍ക്കാനായി നല്‍കുന്നത്. മെയ് നാല് മുതല്‍ മെയ് 20 വരെയുള്ള ദിവസങ്ങളില്‍ തൃഷയുടെ ജന്മദിനം, തമിഴ്‌നാട് മുഖ്യമന്ത്രിയായുള്ള വിജയ്‌യുടെ സത്യപ്രതിജ്ഞ, കറുപ്പിന്റെ വിജയം ഇങ്ങനെ മൂന്ന് സന്തോഷങ്ങളാണ് തൃഷയെ തേടിയെത്തിയത്. അതേക്കുറിച്ചാണ് തൃഷ തന്റെ പോസ്റ്റില്‍ പറയുന്നത്.

”എന്റെ മാജിക്കല്‍ മെയ് എന്നാണ് പറഞ്ഞത്. അതിലേക്ക് ഒന്നു കൂടി” എന്നാണ് തൃഷയുടെ പോസ്റ്റ്. കറുപ്പിന്റെ ബിടിഎസ് ചിത്രങ്ങളോടൊപ്പമാണ് തൃഷയുടെ കുറിപ്പ്. അധികം വൈകാതെ പോസ്റ്റ് വൈറലാവുകയും ചെയ്തു. വിജയ്‌യുടെ വിജയത്തെക്കുറിച്ചാണ് പോസ്റ്റില്‍ തൃഷ സൂചിപ്പിക്കുന്നതെന്നാണ് ആരാധകര്‍ പറയുന്നത്. നിരവധി പേരാണ് ഇക്കാര്യം കമന്റിലൂടെ ചൂണ്ടിക്കാണിക്കുന്നത്.

വിജയ്‌യുടെ സത്യപ്രതിജ്ഞാ ചടങ്ങിലേയും മുഖ്യ ആകര്‍ഷണം തൃഷയുടെ സാന്നിധ്യമായിരുന്നു. വിജയ് യും തൃഷയും പ്രണയത്തിലാണെന്ന റിപ്പോര്‍ട്ടുകള്‍ക്കിടെയാണ് ചടങ്ങില്‍ പങ്കെടുക്കാന്‍ നടിയെത്തിയത്. തൃഷയെ കെട്ടിപ്പിടിച്ചാണ് വിജയ്‌യുടെ അമ്മയും ബന്ധുക്കളും സ്വീകരിച്ചത്. നേരത്തെ വിജയ്-സംഗീത വിവാഹ ബന്ധം തകരാന്‍ കാരണം തൃഷയുമായുള്ള അടുപ്പമാണെന്നും റിപ്പോര്‍ട്ടുകളുണ്ടായിരുന്നു.

അതേസമയം തൃഷ നായികയായ കറുപ്പ് വന്‍ വിജയമായി മാറിയിരിക്കുകയാണ്. 13 വര്‍ഷത്തിന് ശേഷമാണ് സൂര്യയ്ക്ക് ബോക്‌സ് ഓഫീസില്‍ വിജയം നേടാനാകുന്നത്. ചിത്രം 161 കോടിയാണ് ഇതുവരെ നേടിയത്. സൂര്യയുടെ കരിയറിലെ തന്നെ ഏറ്റവും വലിയ വിജയമായിരിക്കുകയാണ് കറുപ്പ്. 2006ല്‍ പുറത്തിറങ്ങിയ ആറിന് ശേഷം സൂര്യയും തൃഷയും അഭിനയിക്കുന്ന ചിത്രമാണ് കറുപ്പ്.

മില്‍മ പാല്‍ വില വര്‍ധിപ്പിച്ചു; ലിറ്ററിന് നാലു രൂപ കൂട്ടി

by Midhun HP News | May 20, 2026 | Latest News, കേരളം

തിരുവനന്തപുരം: സംസ്ഥാനത്ത് മില്‍മ പാല്‍ വില വര്‍ധിപ്പിച്ചു. ഇന്ന് ചേര്‍ന്ന മില്‍മ ഡയറക്ടര്‍ ബോര്‍ഡ് യോഗം ലിറ്ററിന് നാല് രൂപ വര്‍ധിപ്പിക്കാനാണ് തീരുമാനിച്ചത്. ജൂണ്‍ ഒന്നാം തീയതി മുതല്‍ പുതിയ വില പ്രാബല്യത്തില്‍ വരും.

3.35 രൂപ കര്‍ഷകന് ലഭിക്കുന്ന രീതിയിലാണ് വില വര്‍ധനവെന്ന് മില്‍മ അധികൃതര്‍ പറഞ്ഞു. പാല്‍ ഉല്‍പ്പന്നങ്ങള്‍ക്കും വില വര്‍ധിക്കും. ഇതോടെ സംസ്ഥാനത്ത് ഒരു ലിറ്റര്‍ മില്‍മ പാലിന്റെ വില 56 രൂപയായി ഉയരും. കഴിഞ്ഞ ഏപ്രിലില്‍ ചേര്‍ന്ന യോഗത്തില്‍ നിയമസഭാ തെരഞ്ഞെടുപ്പ് ഫല പ്രഖ്യാപനത്തിന് ശേഷം വില വര്‍ധിപ്പിക്കാനാണ് തീരുമാനിച്ചത്.

യൂത്ത് കോണ്‍ഗ്രസ് തലപ്പത്ത് ആര്? ചര്‍ച്ച ചെയ്യാതെ നേതൃത്വം; ഇഷ്ടക്കാരുടെ പേരുകള്‍ സജീവ ചര്‍ച്ചയിലേയ്ക്ക് എത്തിച്ച് പ്രവര്‍ത്തകര്‍

by Midhun HP News | May 20, 2026 | Latest News, കേരളം

കൊച്ചി: മന്ത്രിസഭാ വകുപ്പ് വിഭജനം പൂര്‍ത്തിയാക്കി ഭരണത്തിരക്കിലേയ്ക്ക് ഇന്നത്തോടെ പൂര്‍ണമായും കോണ്‍ഗ്രസ് മാറി. കെപിസിസി അധ്യക്ഷന്‍ ഉള്‍പ്പെടെ മന്ത്രിയായതോടെ സ്വാഭാവികമായും ഇനി വേണ്ടത് പുനഃസംഘടനയാണ്. കെപിസിസി അധ്യക്ഷന് പുറമേ രണ്ട് വര്‍ക്കിങ് പ്രസിഡന്റുമാരും ഒരു വൈസ് പ്രസിഡന്റും യൂത്ത് കോണ്‍ഗ്രസ് സംസ്ഥാന അധ്യക്ഷനും യുഡിഎഫ് മന്ത്രിസഭയില്‍ ഇടംനേടി. ഇതോടെ ഈ പദവികളിലെല്ലാം ഒഴിഞ്ഞുകിടക്കുകയാണ്. പുതിയ ആളുകളെ കണ്ടെത്തേണ്ടതുണ്ടെങ്കിലും നിലവില്‍ നേതൃത്വം ഇത്തരം ചര്‍ച്ചകളിലേയ്ക്ക് കടന്നിട്ടില്ല.

പാര്‍ട്ടി നേതൃത്വം നിലവില്‍ മന്ത്രിസഭാ രൂപീകരണത്തിരക്കിലായതിനാല്‍ ഒഴിവുള്ള സ്ഥാനങ്ങളിലേയ്ക്ക് ആരെ കൊണ്ടുവരുമെന്ന ചിന്തിച്ചിട്ടില്ലെങ്കിലും താഴേത്തട്ടില്‍ ചര്‍ച്ചകളും പേരുകളും സജീവമാണ്. ഓരോ പക്ഷവും അവരവര്‍ക്ക് ആവശ്യമുള്ള പേരുകള്‍ ചര്‍ച്ചകളിലേയ്ക്ക് കൊണ്ടുവരുന്ന തിരക്കിലാണ്. കെപിസിസി അധ്യക്ഷ സ്ഥാനത്തേയ്ക്കാണെങ്കില്‍ അവരവര്‍ തന്നെ ചര്‍ച്ചകള്‍ക്ക് തുടക്കം കുറിച്ചിരിക്കുകയാണ്. കൊടിക്കുന്നില്‍ സുരേഷ്, ബെന്നി ബെഹന്നാന്‍, ആന്റോ ആന്റണി എന്നിവര്‍ അതിനായുള്ള ചരടുവലികള്‍ നേരത്തെ തന്നെ തുടങ്ങിയെന്നാണ് വിവരം.

യൂത്ത് കോണ്‍ഗ്രസ് സംസ്ഥാന അധ്യക്ഷന്‍ ഒ ജെ ജനീഷ് അപ്രതീക്ഷിതമായി മന്ത്രിയായതോടെ യുവജനസംഘടനയെ നയിക്കാന്‍ ആര് വരുമെന്ന ചര്‍ച്ചയും നേതൃതലത്തിലേയ്ക്ക് എത്തിയിട്ടില്ല. എങ്കിലും, പല ജില്ലാ പ്രസിഡന്റുമാരുടേയും പേരുകള്‍ താഴേത്തട്ടില്‍ ഉയര്‍ന്നു കേള്‍ക്കുന്നുണ്ട്. കഴിഞ്ഞ തവണ സജീവ ചര്‍ച്ചയിലുണ്ടായിരുന്ന പേരാണ് ബിനു ചുള്ളിയിലേന്റേത്. നിലവില്‍ വര്‍ക്കിങ് പ്രസിഡന്റായ ബിനുവിന്റെ പേര് പലരും സാധ്യത പറയുന്നുണ്ടെങ്കിലും മറ്റ് മൂന്നു പേരുകള്‍ കൂടി സജീവ ചര്‍ച്ചയിലുണ്ടെന്നാണ് വിവരം. കോഴിക്കോട് ജില്ലാ പ്രസിഡന്റും ജില്ലാ പഞ്ചായത്ത് മെമ്പറുമായ ആര്‍ ഷെഹിന്‍, മലപ്പുറം ജില്ലാ പ്രസിഡന്റ് ഹാരിസ് മുതൂര്‍, പത്തനംതിട്ട ജില്ലാ പ്രസിഡന്റ് വിജയ് ഇന്ദുചൂഡന്‍ എന്നിവരുടെ പേരുകളാണ് സജീവ ചര്‍ച്ചകളില്‍. ഇവരെല്ലാവരും തന്നെ എഐസിസി ജനറല്‍ സെക്രട്ടറി കെ സി വേണുഗോപാലിനോട് അടുത്തു നില്‍ക്കുന്നവര്‍ കൂടിയാണ്.

സാമുദായിക സന്തുലനം ഉറപ്പാക്കിയാണ് കഴിഞ്ഞ ടേമിലും ഈ സ്ഥാനങ്ങളെല്ലാം നിശ്ചയിക്കപ്പെട്ടത്. ഇത്തവണയും ആ രീതി തന്നെയാവും പരിഗണിക്കുക. അതാത് ആളുകള്‍ക്ക് താല്‍പ്പര്യമുള്ള മറ്റ് പല പേരുകളും ഉയര്‍ന്ന് കേള്‍ക്കുന്നുണ്ടെങ്കിലും കെ സി പക്ഷത്തിനാണ് കൂടുതല്‍ സാധ്യതയെന്നാണ് യൂത്ത്‌കോണ്‍ഗ്രസിനുള്ളിലെ പ്രവര്‍ത്തകര്‍ നല്‍കുന്ന സൂചന.